ཟླ་བ་འདི་ཕྱི་ཚེས་ ༢༢ ཉིན་ཨ་རི་ནེའུ་ཡོག་གྲོང་ཁྱེར་དུ་བྱང་ཨ་རིའི་བོད་རིགས་གཙོས་པའི་དད་ལྡན་མང་ཚོགས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་པ་དང་བསྟུན། མགོན་པོ་༸གང་ཉིད་མཆོག་ཕྱི་ཉིན་ཚེས་ ༢༣ ཉིན་ཨ་རི་ནས་སུད་སིར་ཆིབས་བསྒྱུར་གྱིས་ཕྱི་ཚེས་ ༢༥ ཉིན་ཡུལ་དེའི་དད་ལྡན་པ་རྣམས་ལ་ཆོས་འབྲེལ་བཀྲིན་བསྩལ་རྒྱུ་ཙམ་མ་ཟད། སྐབས་དེར་སུད་སི་དང་ Liechtenstein བོད་རིགས་མི་མང་ནས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཚེས་ ༢༦ ཉིན་སུད་སིའི་རྒྱལ་ས་ཛུ་རིག་ནས་མཁའ་ལམ་བརྒྱུད་རྒྱ་གར་དུ་ཕེབས་ཐོན་གནང་རྒྱུ་ཡིན་པ་རེད་འདུག
དེ་ཡང་དེ་རིང་ཕྱི་ཚེས་ ༡༤ ཉིན་སུད་སིའི་སྐུ་ཚབ་དོན་བཅོད་ཁང་དང་སྐབས་དགུ་པའི་སུད་སི་དང་ Liechtenstein བོད་རིགས་མི་མང་སྒྲིག་འཛུགས་ཀྱི་ཡོངས་ཁྱབ་གསལ་བསྒྲགས་སྤེལ་བའི་ནང་མགོན་པོ་༸གང་ཉིད་མཆོག་ཕྱི་ཟླ་ ༨ ཚེས་ ༢༣ ཉིན་ཨ་རི་ནས་ཕྱིར་རྒྱ་གར་དུ་ཆིབས་བསྒྱུར་བཀྲིན་བསྐྱངས་གནང་མཛད་པའི་སྐབས་སུ་ལམ་བར་དུ་སུད་སི་ཁུལ་དུ་སྐུ་ངལ་གསོ་བཞུགས་མཛད་ཀྱི་ཡོད་པ་དང་བསྟུན། སུད་སི་དང་ Liechtenstein བོད་རིགས་མི་མང་ནས་ཇི་ལྟར་གསོལ་འདེབས་ཞུས་པ་བཞིན་མགོན་པོ་༸གང་ཉིད་མཆོག་གིས་ཕྱི་ཚེས་ ༢༥ ཉིན་ Zurich གྲོང་ཁྱེར་གྱི་ Hallenstadion ཚོགས་ཁང་ནང་དུ་ཞོགས་པ་ཕྱག་ཚོད་ ༩།༠༠ ཐོག་དད་ལྡན་མང་ཚོགས་ལ་སྤྱན་རས་གཟིགས་བླ་མའི་རྣལ་འབྱོར་བསྡུས་པའི་བཤད་ལུང་དང་མ་ཎིའི་ལྗགས་ལུང་བཀྲིན་བསྩལ་གནང་མཛད་རྒྱུའི་བཀའ་བཞེས་བཟང་པོ་སྨིན་གནང་མཛད་པ་མ་ཟད། སྐབས་དེར་སུད་སི་དང་ Liechtenstein བོད་རིགས་མི་མང་ནས་༸གོང་ས་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཐུགས་གཏན་འཁེལ་ཡོད་པ་ལྟར། མང་ཚོགས་ཀྱིས་གསུང་ཆོས་ཀྱི་འཛིན་བྱང་དེ་བཞིན་ཕྱི་ཟླ་ ༨ ཚེས་ ༡༤ ཉིན་རྒྱབ་ཕྱག་ཚོད་ ༢།༠༠ ནས་ www.ticketcorner.ch བརྒྱུད་བཞེས་དགོས་པའི་གསལ་བསྒྲགས་གནང་འདུག
གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་ལོའི་ཕྱི་ཟླ་ ༦ ཚེས་ ༢༡ ཉིན་ཨ་རིར་ཞབས་པུས་སྨན་བཅོས་སླད་བཞུགས་སྒར་༸རྒྱལ་བའི་ཕོ་བྲང་ནས་ཆིབས་ཐོན་དང། ཕེབས་ལམ་དུ་སྐུ་ངལ་གསོ་ཆེད་སུད་སི་ཛུ་རིག་གྲོང་ཁྱེར་ནང་ཉིན་གཅིག་བཞུགས་ཞག་མཛད་དེ་ཕྱི་ཚེས་ ༢༣ ཉིན་ཨ་རིར་༸ཞབས་སོར་བདེ་བར་འཁོད་གནང་མཛད་ཡོད་པ་དང་། ཕྱི་ཟླ་ ༦ པའི་ཚེས་ ༢༨ ཉིན་ཨ་རིའི་ནིའུ་ཡོག་ནང་རྟེན་གཞི་བྱས་པའི་ཞབས་པུས་ཀྱི་སྨན་ཁང་རྩེ་ཕུད་ Hospital of Special Surgery ནང་༸སྐུའི་ཞབས་པུས་གཤག་བཅོས་ལེགས་གྲུབ་བྱུང་ནས་ཕྱི་ཚེས་ ༢༩ ཉིན་སྨན་ཁང་ནས་ཕྱིར་ཨ་རིའི་གཞུང་གི་གྲ་སྒྲིག་ཞུས་པའི་༸རྒྱལ་བའི་བཞུགས་གནས་ Park Hyatt New York གསོལ་མགྲོན་ཁང་དུ་ཆིབས་ཐོན་མཛད་པ་དང་། ཕྱི་ཚེས་ ༨ ཉིན་༸སྐུའི་བཞུགས་གནས་ Park Hyatt གསོལ་མགྲོན་ཁང་ནས་ཨ་རིའི་ནིའུ་ཡོག་མངའ་སྡེའི་བྱང་རྒྱུད་ Syracuse ཁུལ་དུ་ཆིབས་བསྒྱུར་གྱིས་ཕྱི་བཅོས་གསོ་ཐབས་གནང་ནས་ད་བར་སྐུ་ངལ་གསོ་བཞུགས་མཛད་མུས་ཡིན་པ་རེད།
ཤེས་རྟོགས་བྱུང་བར་གཞིགས་ན། ༸གོང་ས་མཆོག་ཟླ་བ་འདིའི་ཚེས་ ༡༦ ཉིན་ Syracuse ནེའུ་ཡོག་གི་ཨེ་ཐེ་ཀ་གྲོང་ཁྱེར་དུ་རྟེན་གཞི་བྱས་པའི་སྐུ་བཅར་རྣམ་རྒྱལ་གྲྭ་ཚང་གི་ཆོས་ཚོགས་ལ་ཆིབས་བསྒྱུར་མཛད་དེ་གང་ཉིད་མཆོག་གི་མཚན་གནས་རྗེས་དྲན་གྱི་དཔེ་མཛོད་ཁང་དང་འགྲེམས་སྟོན་ཁང་རབ་གནས་བཀའ་དྲིན་མཛད་རྒྱུ་དང་། དེ་ནས་མགོན་པོ་༸གང་ཉིད་མཆོག་ཨ་རིར་ལོ་ ༧ གྱི་རྗེས་སུ་ཞབས་སོར་འཁོད་པའི་དུས་སྐབས་དང་བསྟུན་བྱང་ཨ་རིའི་བོད་རིགས་ཡོངས་དང་། སོག་རིགས། ཧི་མ་ལ་ཡའི་རི་རྒྱུད་ཀྱི་དད་ལྡན་མི་མང་བཅས་ནས་ཟླ་བ་འདིའི་ཚེས་ ༢༢ ཉིན་ནེའུ་ཡོག་ཁུལ་གྱི་ UBS ARENA རྩེད་རའི་ཚོགས་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་སྐལ་བརྒྱར་བརྟན་པའི་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་པ་རེད།
དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲ་གནས་ཐོག་འཁོད་པའི་༸གོང་ས་མཆོག་གི་མཛད་འཆར་ལ་གཞིགས་ཚེ། མགོན་པོ་གང་ཉིད་མཆོག་གིས་སུད་སི་ཁུལ་གྱི་མཛད་འཆར་ཁག་ལེགས་པར་གྲུབ་ནས་ཕྱིར་རྒྱ་གར་དུ་༸ཞབས་སོར་འཁོད་པའི་རྗེས་སུ་རྒྱ་གར་ནང་གི་མཛད་འཆར་ཐོག་མར་དེ་བྱང་ཤར་ཨ་རུ་ཎཱ་ཅལ་མངའ་སྡེའི་མོན་མི་རིགས་ཀྱི་ཚབ་ཞུས་ཏེ་མོན་ཡུལ་བསྟན་དོན་རིག་གཞུང་གཅེས་སྐྱོང་ལྷན་ཚོགས་ནས་ཇི་ལྟར་གསོལ་འདེབས་ཞུས་པ་བཞིན་ཕྱི་ཟླ་ ༩ ཚེས་ ༦ ཉིན་མགོན་པོ་༸གང་ཉིད་མཆོག་གིས་སྤྱན་རས་གཟིགས་ཀྱི་བཀའ་དབང་བཀྲིན་བསྩལ་རྒྱུ་དང་། ཕྱི་ཚེས་ ༧ ཉིན་༸གོང་ས་སྐྱབས་མགོན་ཆེན་པོ་མཆོག་དེ་སྔ་ ༡༩༥༩ ལོར་དང་ཐོག་མོན་ཡུལ་གྱི་བརྒྱུད་དེ་རྒྱ་གར་ནང་བྲོས་བྱོལ་ལ་ཕེབས་ནས་ལོ་ངོ་ ༦༥ དང་བཙན་བྱོལ་ནང་གི་ཆོས་འབྲེལ་དང་པོ་དེ་ཡང་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་དུ་བསྩལ་བ། དེ་བཞིན་༸གང་ཉིད་མཆོག་འདི་ལོར་བོད་ལུགས་ལྟར་དགུང་གྲངས་ ༩༠ བདག་གིར་བཞེས་པ་སོགས་ཀྱི་དུས་ཚིགས་དུ་མ་ལྷན་དུ་འཛོམས་པ་ལ་བརྟེན་ནས་མོན་ཡུལ་གྱི་ལྷ་སྡེ་མི་སྡེ་ཡོངས་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དག་སྣང་གསང་བ་རྒྱ་ཅན་ལས་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་ཐོག་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུ་རྒྱུ་ཡིན་པ་རེད།
སྐབས་དེའི་དུས་སུ་རྒྱ་གར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གི་དབུས་པའི་བློན་ཆེན་རྣམ་པ་དང་། ནང་པའི་བླ་ཆེན་རྣམ་པ། དེ་བཞིན་མོན་ཡུལ་གྱི་མི་མང་བཅས་ཁྱོན་མི་མང་སྟོང་ཕྲག་གཅིག་ལྷག་ཙམ་བཞུགས་སྒར་དུ་ཆེད་ཕེབས་གནང་གི་ཡོད་པ་མོན་ཡུལ་བསྟན་དོན་རིག་གཞུང་གཅེས་སྐྱོང་ལྷན་ཚོགས་ཀྱི་གཙོ་འཛིན་དང་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་གྱི་སློབ་དཔོན་ཟུར་པ་བླ་མ་ངག་དབང་ནོར་བུ་ལགས་ཀྱིས་འདི་ག་རླུང་འཕྲིན་ཁང་ལ་ཞལ་པར་བརྒྱུད་འགྲེལ་བརྗོད་གནང་སོང་།
