ཁེ་ན་ཌར་གནས་བཞུགས་བོད་དོན་ལས་འགུལ་བ་སངས་རྒྱས་སྐྱབས་ལགས་ཀྱིས་ཉིན་གྲངས་ ༥༥ རིང་ཁེ་ན་ཌའི་རྒྱལ་ཡོངས་སུ་བོད་རང་དབང་དོན་དུ་རྐང་འཁོར་སྐོར་བསྐྱོད་ཀྱི་ལས་འགུལ་ཐེངས་གསུམ་པ་མཇུག་བསྒྲིལ་གནང་འདུག
དེ་ཡང་སངས་རྒྱས་སྐྱབས་ལགས་ཀྱིས་བོད་རང་དབང་དོན་དུ་རྐང་འཁོར་སྐོར་བསྐྱོད་ཀྱི་ལས་འགུལ་ཐེངས་གསུམ་པ་འདི་བཞིན་ཟླ་བ་ ༦ ཚེས་ ༢༡ ཉིན་ཁེ་ན་ཌ་ Victoria British Columbia ནས་འགོ་འཛུགས་ཀྱིས་ཁ་སང་ཕྱི་ཚེས་ ༡༤ ༸རྒྱལ་བའི་སྐུའི་ལྷ་དཀར་ཉིན་ཀྲོ་རོན་ཀྲོར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་དུ་མཇུག་སྒྲིལ་གནང་ཡོད། ཁོང་གི་ངོ་དེབ་ཐོག་ཐེངས་འདིའི་བོད་དོན་རྐང་འཁོར་སྐོར་བསྐྱོད་བརྒྱུད་ཁེ་ན་ཌའི་གཞུང་དང་རྒྱལ་སྤྱིའི་སྤྱི་ཚོགས་ལ་དོན་ཚན་དྲུག་ཅན་གྱི་དགོས་འདུན་བཏོན་ཡོད་པ་དང་། དེའང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆ་རྐྱེན་གང་ཡང་མེད་པའི་ཐོག་ནས་བོད་དུ་གདན་འདྲེན་ཞུ་དགོས་པ་དང་། བོད་རྒྱ་གྲོས་མོལ་བསྐྱར་གསོ་དགོས་པ། ༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་དབུས་སྒོ་ཤེས་རབ་རྒྱ་མཚོ་སོགས་བོད་ཀྱི་ཆབ་སྲིད་བཙོན་པ་རྣམས་འཕྲལ་མར་གློད་བཀྲོལ་དགོས་པ། བོད་ནང་རྒྱ་ནག་མི་སེར་སྤེལ་ཡུལ་གཏན་འཇགས་བཅའ་སྡོད་སློབ་གྲྭ་སྒོ་བརྒྱབ་སྟེ་བོད་ཕྲུག་ས་ཡ་ ༡ ལྷག་གཏན་སློབ་ནང་བཙན་འཇུག་མཚམས་འཇོག་དགོས་པ། དེ་བཞིན་ཁམས་སྡེ་དགེ་གཙོས་པའི་བོད་ནང་ཁྲིམས་འགལ་གྱི་ཆུ་མཛོད་གསར་རྒྱག་མཚམས་འཇོག་པ་དང་བོད་ནང་འགྲོ་བ་མིའི་ཐོབ་ཐང་གཙོས་པའི་ཆོས་དད་རང་དབང་དགོས་པ་བཅས་འཁོད་འདུག
ཁ་སང་སངས་རྒྱས་སྐྱབས་ལགས་ཀྱིས་རྒྱ་ནག་གཞུང་ཚབ་ཁང་གི་མདུན་དུ་ལས་འགུལ་མཇུག་བསྒྲིལ་མ་གནང་གོང་བོད་མི་ཁག་གཅིག་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་གྱི་ལས་འགུལ་སྤེལ་འདུག་པ་དང་། རྗེས་སུ་སངས་རྒྱལ་སྐྱབས་ལགས་ཀྱིས་གསུང་བཤད་གནང་བའི་ནང་ལམ་བར་དུ་ཉིན་གྲངས་གསུམ་མ་གཏོགས་ངལ་གསོ་བརྒྱབ་མེད་པ་དང་། གྲོང་གསེབ་ཀྱི་ཁྱིམ་ཚང་ཁག་ལ་བོད་ནང་གི་ཛ་དྲག་གནས་སྟངས་ཐེར་འདོན་གནང་བའི་དྲིལ་བསྒྲགས་ཀྱི་ཡིག་ཆ་འགྲེམས་སྤེལ་གནང་ཡོད་ཅིང་། དེ་ནི་ང་ཚོའི་ལས་འགན་ཞིག་ཡིན་པ་མ་ཟད། བོད་རྒྱལ་ཁབ་དང་མི་རིགས་ཀྱི་བདེ་དོན་ཆེད་དུ་ལས་འགུལ་སྤེལ་དགོས་གལ་དང་ལས་འགུལ་སྤེལ་སྐབས་མི་མང་ནས་རྒྱབ་སྐྱོར་དང་མཉམ་ཞུགས་གནང་དགོས་གལ་ཡིན་པ་སོགས་གསུངས་འདུག སྐབས་དེར་བོད་དོན་ལ་རྒྱབ་སྐྱོར་གནང་མཁན་ཁེ་ན་ཌའི་གྲོས་ཚོགས་འཐུས་མི་ཟུ་པར་སྐུ་ཞབས་ Consiglio Di Nino ལགས་ཆེད་ཕེབས་གནང་ཡོད་པ་རེད་འདུག
མ་ཟད་ཁེ་ན་ཌ་ཨོན་ཊེ་རི་ཡོ་བོད་རིགས་སྤྱི་མཐུན་ཚོགས་པ་དང་། ཀྲོ་རོན་ཀྲོ་ས་གནས་བོད་ཀྱི་གཞོན་ནུ་ལྷན་ཚོགས་དང་ཨོན་ཊེ་རི་ཡོ་ས་གནས་བོད་ཀྱི་བུད་མེད་ལྷན་ཚོགས། ཁེ་ན་ཌ་ས་གནས་མདོ་ཁམས་ཆུ་བཞི་སྒང་དྲུག་ཚོགས་པ་བཅས་ནས་སངས་རྒྱས་སྐྱབས་ལགས་སུ་དགའ་བསུ་ཞུས་འདུག
གཞི་རྩའི་སངས་རྒྱས་སྐྱབས་ལགས་ནི་ཕྱི་ལོ་ ༢༠༠༤ ལོར་བོད་ནས་བཙན་བྱོལ་དུ་ཕེབས་ཡོད་པ་དང་། ཕྱི་ལོ་ ༢༠༡༨ ནས་བཟུང་༸རྒྱལ་བའི་སྐུའི་བླ་གཟའ་ནམ་ཡིན་ལ་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་གྱི་ལས་འགུལ་སྤེལ་འགོ་ཚུགས་ཡོད་ཅིང་། ལྷག་པར་ཕྱི་ལོ་ ༢༠༢༠ ལོ་ནས་བཟུང་ད་བར་བོད་དོན་སླད་དུ་ཞི་བའི་གོམ་བགྲོད་ཐེངས་ལྔ་གནང་ཡོད་པ་མ་ཟད། ཕྱི་ལོ་ ༢༠༢༢ ལོ་ནས་ད་བར་བོད་རང་དབང་དོན་དུ་རྐང་འཁོར་སྐོར་བསྐྱོད་ཀྱི་ལས་འགུལ་ཐེངས་གསུམ་སྤེལ་མྱོང་ཡོད་པ་རེད།
