ཅོ་ནེའི་བོད་མི་གཉིས་ལ་དོན་མེད་གཅར་རྡུང་དང་འཛིན་བཟུང་བྱས་པ།

ཕྱི་ཟླ་ ༥ པའི་ཚེས་ ༢༧ ཉིན་རྒྱལ་གཅེས་སངས་རྒྱས་མཚོ་ལགས་ཀྱི་རང་ལུས་མེར་བསྲེགས་བཏང་ཡུལ་བོད་མདོ་སྨད་ཅོ་ནེ་རྫོང་ཆས་བུ་གཞིས་ཁུལ་གྱི་ཉིན་པ་སྡེ་བའི་འབྲོག་སར་བདེ་འཇགས་སླད་ཡིན་ཟེར་བའི་རྒྱ་གཞུང་སྤྱི་བདེ་མི་སྣས། ཉིན་པའི་འབྲོག་མི་ཕར་འགྲོ་ཚུར་འོང་རྣམས་ཀྱི་གཞུང་ལམ་བཀག་འགོག་དང། འབྲོག་པ་ཚོ་དབྱར་དགུན་རུ་པ་སྤོ་སྐབས་དོན་མེད་ཀྱིས་གཅར་རྡུང་དང་སུན་གཙེར་བཟོ་བཞིན་པའི་ཁྲོད་དུ། ཟླ་འདིའི་ཕྱི་ཚེས་ ༡༣ ཉིན་ཁུལ་དེའི་བོད་མི་རྣམ་རྒྱལ་སྐྱབས་དང་བན་དེ་མཁར་ཞུ་བ་གཉིས་ལ་གཅར་རྡུང་དྲགས་པོ་བཏང་སྟེ་འཛིན་བཟུང་བྱེད་འདུག ཉེན་རྟོག་པས་ས་གནས་བོད་མི་ཚོར་ཞིབ་བཤེར་བྱ་རྒྱུ་ཡིན་པའི་སྔོན་བརྡ་གང་ཡང་མ་བྱེད་པར་ཉིན་པ་སྡེ་པའི་སྐྱེས་པ་ཚོར་གཞུང་ལམ་བཀག་འགོག་གིས་སྔོག་གཤེར་བྱས་སྟབས། སྐྱེས་པ་ཚོས་ཞིབ་གཤེར་བྱེད་དོན་ཅི་ཡིན་སོགས་ཀྱི་གནད་དོན་དྲི་པར། ཉེན་རྟོག་པས་དེ་མ་ཐག་རྣམ་འགྱུར་མི་ལེགས་པར་ཁ་གཡར་ཏེ་ཁོང་གཉིས་ལ་དབྱུག་པ་དང་ཁུ་ཚུར། རྡོག་ཐོ་སོགས་ཀྱིས་གཞུས་ནས་རུབ་རྡུང་ཡུན་རིང་བྱས་མཐར། ཉེན་རྟོག་པས་རླངས་འཁོར་ནང་བཞག་སྟེ་ལྐོག་སུད་ཀྱིས་ཀན་ལྷོ་མི་མང་སྨན་ཁང་དུ་འཕྲལ་མར་བཙན་ཁྲིད་བྱས་ཡོད་པ་མ་ཟད། ཆུ་ཚོད་ཉེར་བཞི་རྗེས་སུའང་ ཁོང་གི་སྤུན་གཉེན་རྣམས་ལ་བརྡ་ལན་སྤྲད་མི་འདུག