བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོས་ཆེད་འཛུགས་གནང་བའི་སྤྱི་འཐུས་གསུམ་ལས་འདུས་པའི་བསྐྱར་ཞིབ་ཆེད་འཛུགས་ཚོགས་ཆུང་གིས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཕོ་འགྱུར་དང་འབྲེལ་བའི་སྒྲིག་གཞི་བསྐྱར་བཅོས་ཁྲིམས་འཆར་ཐོག་བསྐྱར་ཞིབ་ཀྱི་ལས་དོན་ཡོངས་སུ་བསྒྲིལ་ནས་ཁ་སང་ཕྱི་ཟླ་ ༨ པའི་ཚེས་ ༡༣ ཉིན་རྒྱབ་ཚོགས་ཆུང་གི་གྲུབ་དོན་སྙན་ཐོ་ཚོགས་དྲུང་ལས་ཁུངས་སུ་ཕུལ་ཡོད་འདུག
དེ་ཡང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་ ༡༠ པའི་ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཕོ་འགྱུར་དང་འབྲེལ་བའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞིར་བསྐྱར་བཅོས་ཁྲིམས་འཆར། ཡིག་ཆ་ཨང་ ༡༧ པའི་ཐོག་བརྗོད་པ་དང་པོ་ཟིན་པ་དང་བསྟུན་དགོངས་འཆར་སྤྱི་མོས་གཞིར་བཟུང་། སྒྲིག་གཞི་བསྐྱར་བཅོས་ཐོག་བསྐྱར་ཞིབ་ནན་ཏན་གྱིས་སྒྲིག་གཞི་དེ་རང་ངམ། ནང་དོན་དེར་བསྟུན་གྱིས་སྒྲིག་གཞི་ཞིག་ཟུར་དུ་གསར་བཟོ་དགོས་མིན་གང་དགེའི་སླད་སྤྱི་འཐུས་གསུམ་ལས་གྲུབ་པའི་ཆེད་འཛུགས་ཚོགས་ཆུང་ཞིག་བསྐོ་བཞག་དགོས་པ་གསལ་བ་ལྟར། ཚོགས་གཙོ་སྦྲེལ་པོས་འདི་ལོའི་ཟླ་ ༥ པའི་ཚེས་ ༨ ཉིན་ཚོགས་ཆུང་གི་མི་འགྲོར་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་དང་། སྤྱི་འཐུས་ཀརྨ་དགེ་ལེགས་ལགས། སྤྱི་འཐུས་བསྟན་འཛིན་འཇིགས་བྲལ་ལགས་བཅས་བསྐོ་བཞག་གིས་ཕྱི་ཟླ་ ༦ པའི་ཚེས་ ༤ ཉིན་ཚོགས་ཆུང་གི་ཚོགས་གཙོ་སྤྱི་འཐུས་རྡོ་རྗེ་ཚེ་བརྟན་ལགས་བསྐོ་བཞག་ཐོག་ལས་དོན་དངོས་སུ་དབུ་འཛུགས་གནང་ཡོད་པ་ལྟར། ཚོགས་ཆུང་ནས་གོང་གསལ་སྒྲིག་གཞི་དང་འབྲེལ་བའི་ཐོག་ཞིབ་འཇུག་དང་། དེ་དང་འབྲེལ་བའི་རྒྱལ་ཁབ་མང་པོའི་ཁྲིམས་སྒྲིག་ཐོག་ཟླ་བ་གཉིས་ལྷག་དཔྱད་བསྡུར་སོགས་གནང་ནས་ཁ་སང་ཕྱི་ཟླ་ ༨ པའི་ཚེས་ ༡༣ ཉིན་ཚོགས་ཆུང་གི་གྲུབ་དོན་སྙན་ཐོ་ཚོགས་དྲུང་ལས་ཁུངས་སུ་ཕུལ་ཡོད་པ་རེད་འདུག
རྩ་བའི་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་བདུན་པའི་ཐོག ཁྲིམས་སྒྲིག་བསྐྱར་བཅོས་འཆར་ཟིན་ཚོགས་ཆུང་ངོས་ནས་ལས་སྡོམས་དང་ལྷན་དུ་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་ཁག་ ༣༠ ལ་བསྐྱར་བཅོས་འཆར་ཟིན་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི། བཙན་བྱོལ་བོད་མིའི་འོས་བསྡུའི་སྒྲིག་གཞི། ལས་བྱེད་འདེམས་བསྐོ་ལྷན་ཁང་གི་སྒྲིག་གཞི། བཙན་བྱོལ་བོད་མིའི་རྩིས་ཞིབ་ལས་ཁང་གི་སྒྲིག་གཞི་སོགས་ཁྱོན་སྒྲིག་གཞི་གྲངས་བརྒྱད་ཀྱི་དོན་ཚན་མི་ཉུང་བ་ཞིག་གི་ཐོག་ལ་བསྐྱར་བཅོས་འཆར་ཟིན་བསྣམས་ཕེབས་པའི་ཁྲོད། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཕོ་འགྱུར་དང་འབྲེལ་བའི་སྒྲིག་གཞི་བསྐྱར་བཅོས་ཁྲིམས་འཆར་ཐོག་བགྲོ་གླེང་གནང་སྐབས་སྲིད་སྐྱོང་མཆོག་གི་དབུས་པའི་སྤྱི་འཐུས་ཁག་གཅིག་གིས་དོགས་འདྲི་མང་དག་ཞིག་ཕེབས་པ་ལྟར། བསྐྱར་བཅོས་ཁྲིམས་འཆར་གྱི་བརྗོད་པ་གཉིས་པའི་སྐབས། ཚོགས་གཙོ་མཆོག་གིས་སྲིད་སྐྱོང་མཆོག་ནས་དེའི་ཐོག་ཚོགས་ཆུང་ཞིག་གི་བརྒྱུད་ནས་རྟོག་ཞིབ་གནང་དགོས་པའི་དགོངས་འཆར་གསུངས་བ་བཞིན། དེ་སྔོན་ཡང་དེ་ལྟར་དགོངས་ཚུལ་བསྡུས་ཏེ་འོས་བསྡུའི་ལམ་ནས་ཐག་གཅོད་ཐོག་ཚོགས་ཆུང་བརྒྱུད་མཇུག་སྐྱོང་གི་གྲོས་ཆོད་གཅིག་བསྣམས་ཕེབས་ཡོད་སྟབས། དེ་ལྟར་གནང་རྒྱུ་ཡིན་པ་གསུངས་ནས། སྤྱི་མོས་ཐོག་ཚོགས་ཆུང་ཆེད་འཛུགས་གནང་རྒྱུའི་ཐག་གཅོད་བྱུང་ཡོད་པ་རེད།
འདི་ག་རླུང་འཕྲིོན་ཁང་ནས་དེ་རིང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཕོ་འགྱུར་དང་འབྲེལ་བའི་སྒྲིག་གཞི་བསྐྱར་བཅོས་ཁྲིམས་འཆར་ཐོག་བསྐྱར་ཞིབ་གནང་མཁན་ཆེད་འཛུགས་ཚོགས་ཆུང་གི་ཚོགས་གཙོ་རྡོ་རྗེ་ཚེ་བརྟེན་ལགས་སུ་བཅར་དྲི་ཞུ་ཐབས་ཞུས་ཀྱང། ཁོང་གིས་ཚོགས་ཆུང་ངོས་ནས་ད་ལྟའི་ཆར་དེའི་སྐོར་གསར་འགོད་པར་འགྲེལ་བརྗོད་གང་ཡང་གནང་རྒྱུ་མེད་པའི་ཐག་གཅོད་བྱུང་ཡོད་སྐོར་གསུང་སོང་།
