དེ་རིང་ཕྱི་ཟླ་ ༨ ཚེས་ ༡༥ སྟེ་རྒྱ་གར་རང་ལ་བཙན་ཐོབ་ནས་མི་ལོ་ ༧༨ འཁོར་བ་དང་བསྟུན། བོད་མིའི་སྒྲིག་འཛུགས་ངོས་ནས་རྒྱ་གར་གནས་ཡུལ་རྒྱལ་ཁབ་ལ་བཀའ་དྲིན་བསམ་ཤེས་དང་ཆེ་མཐོང་མཚོན་ཆེད་ཉིན་མོ་དེ་སྲུང་བརྩི་གཟབ་རྒྱས་ཞུས་སོང་།
དེ་ཡང་དེ་རིང་སྔ་དྲོ་ཕྱག་ཚོད་ ༩།༣༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བཀའ་བློན་རྣམ་པ། བོད་མི་མང་སྤྱི་འཐུས་ཁག་གཅིག ལྷན་ཁང་ཁག་གི་དྲུང་ཆེ་ཆུང་རྣམ་པ་དང་ལས་བྱེད་བཅས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་མདུན་ཐང་དུ་ལྷན་འཛོམས་ཐོག་རྒྱ་གར་གྱི་རྒྱལ་གླུ་དབྱངས་སུ་གྱེར་བ་དང་སྲིད་སྐྱོང་མཆོག་གིས་རྒྱ་གར་གྱི་རྒྱལ་དར་མཁའ་དབྱིས་སུ་བསྒྲེངས་བ། དེ་བཞིན་མངར་ཟས་འགོད་འགྲེམས་གནང་སྟེ་ཉི་མོ་འདི་ཉིད་སྲུང་བརྩི་ཞུས་སོང་།
མཛད་སྒོ་གྲུབ་མཚམས་སྲིད་སྐྱོང་མཆོག་གིས་འདི་ག་གསར་འགོད་པར་བོད་ཀྱི་ལོ་རྒྱུས་ཀྱི་ཉག་ཕྲ་བའི་དུས་སྐབས་སུ་རྒྱ་གར་གཞུང་མང་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་མི་བཙན་བྱོལ་བ་རྣམས་ལ་གནས་ཚང་དང་རང་ཉིད་མི་རིགས་ཀྱི་ངོ་བོ་མཚོན་པའི་སྐད་ཡིག་དང་ཆོས་རིག་སྲུང་སྐྱོབ་ཆེད་དུ་སློབ་སྦྱོང་བྱེད་པའི་གོ་སྐབས་གནང་བ་མ་ཟད། བོད་ནང་རྒྱ་གཞུང་གིས་དགོན་སྡེ་ཁག་གཏོར་བཅོམ་ཤུགས་ཆེ་བྱས་པ་རྣམས་བཙན་བྱོལ་དུ་ཉམས་གསོ་ཐུབ་པ་དེ་རྒྱ་གར་གཞུང་མང་གཉིས་ཀྱི་བཀའ་དྲིན་ཡིན་པར་ཐུགས་རྗེ་ཆེ་ཞུ་དང་འབྲེལ་འཚམས་འདྲི་ཞུས་སོང་།
ལྷག་པར་ཕྱི་ལོ་ ༡༩༤༧ ལོར་རྒྱ་གར་གཙོས་པའི་རྒྱལ་ཁབ་མང་པོ་ཞིག་རྒྱ་སྐྱེད་རིང་ལུགས་འོག་ནས་ཐར་ཏེ་རང་བཙན་ཐོབ་ཡོད་པ་དང་། སྟབས་མ་ལེགས་པ་ཞིག་ལ་ལོ་གསུམ་རྗེས་སུ་བོད་འདི་ཉིད་རྒྱ་ནག་དམར་པོའི་བཙན་འོག་ཏུ་ཚུད་ནས་སོ་སོའི་རང་དབང་རླགས་ཏེ། ཆིངས་ཡིག་དོན་ཚན་ ༡༧ ཟེར་བ་དེའི་འོག་ལོ་བརྒྱད་ཙམ་འབད་བརྩོན་གནང་ཡོད་པ་དེ་ལྟར་ཡང་། མཐར་བོད་མི་རྣམས་བཙོན་བྱོལ་དུ་གྱར་དགོས་བྱུང་ནས་ད་ཆ་ལོ་ངོ་ ༦༥ ཕྱིན་ཡོད་སྟབས། མ་འོངས་པར་འགྱུར་བ་འགྲོ་དགོས་ངེས་ཡིན་པར་བརྟེན། བོད་མིའི་སྒྲིག་འཛུགས་ཀྱི་ངོས་ནས་རྒྱལ་སྤྱིའི་སྤྱི་ཚོགས་ནང་བོད་དོན་གོ་རྟོགས་དང་རྒྱབ་སྐྱོར་འཚོལ་ནས་བོད་རྒྱའི་དཀའ་རྙོག་སེལ་ཆེད་འབད་བརྩོན་གནང་མུས་ཡིན་ཞིང་། བོད་གཞིས་བྱེས་མཉམ་འཛོམས་ཡོང་ཆེད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བྱིན་རླབས་དང་བོད་པའི་མི་རབས་རྒན་པ་རྣམས་ཀྱི་སྐུ་ལས་སྐྱོན་པ་རྣམས་མུ་མཐུད་དེ་མཉམ་རུབ་ཀྱིས་ལས་དོན་གྲུབ་ཆེད། བོད་ཕྱི་ནང་གཉིས་ཀའི་བོད་མི་རྣམ་པས་རིག་པ་སྒྲིམ་ནས་ཕྱག་ལས་གནང་རོགས་ཞེས་འབོད་སྐུལ་དང་སྦྲགས། གཞིས་བཞུགས་བོད་མི་རྣམས་ལ་རྒྱ་གར་འདི་བཞིན་ལོ་བརྒྱ་ཕྲག་གཉིས་ཙམ་གྱི་རྗེས་སུ་དབྱིན་ཇིའི་འོག་ནས་རང་བཙན་ཐོབ་པའི་ཉམས་མྱོང་རྣམས་ལོ་རྒྱུས་ཀྱི་གནས་བབ་ཡིན་དུས་དེ་དག་ནས་བསླབ་བྱ་བླངས་དགོས་གལ་ཡིན་པར་ང་ཚོ་ནམ་ཡང་སེམས་ཤུགས་མ་ཆགས་པར་མུ་མཐུད་འབད་བརྩོན་བྱ་དགོས་གལ་ཡིན་པའི་སྐུལ་མ་གནང་སོང་།
དེ་རིང་རྒྱལ་ས་ལྡི་ལི་གཙོ་བོར་གྱུར་བའི་རྒྱ་གར་གྱི་ས་ཕྱོགས་གང་སར་གཞུང་འབྲེལ་མཛད་སྒོ་སོགས་དགའ་སྤྲོའི་རྣམ་པའི་ཐོག་རྒྱ་གར་ལ་རང་བཙན་ཐོབ་ནས་མི་ལོ་ ༧༨ འཁོར་བའི་དུས་སྟོན་དེ་སྲུང་བརྩི་གནང་བཞིན་པ་དང་འབྲེལ། དེ་རིང་བོད་མིའི་སྒྲིག་འཛུགས་ཙམ་མིན་པར་རྒྱ་གར་གྱི་ས་ཁུལ་འདྲ་མིན་ནང་དུ་ཡོད་པའི་བོད་པའི་སློབ་གྲྭ་ཁག་དང་གཞུང་དང་གཞུང་འབྲེལ་མིན་པའི་ཚོགས་པ་སོགས་ཀྱིས་རྒྱ་གར་གཞུང་མང་གཉིས་ལ་འཚམས་འདྲི་དང་བཀའ་དྲིན་རྗེས་དྲན་གྱི་གནང་སྒོ་འདྲ་མིན་བརྒྱུད་དེ་སྲུང་བརྩི་ཞུ་བཞིན་ཡོད་པ་རེད།
