བོད་རྒྱལ་ཡོངས་རྩེད་རིགས་ཚོགས་པས་འདིའི་ལོའི་རྒྱལ་ཡུམ་ཆེན་མོའི་དྲན་རྟེན་རྐང་སྤོལ་རྩེད་འགྲན་གྱི་མཐའ་མའི་འགྲན་བསྡུར་དེ་བཞིན་སང་ཕྱིེ་ཚེས་ ༣༠ ཉིན་གོ་ལ་ཐ་ལ་རུ་ཁག་དང་མོན་གྷོ་འདོད་རྒུ་གླིང་རུ་ཁག་གཉིས་དབར་གནང་གཏན་འཁེལ་འདུག
དེ་ཡང་འདི་ག་ཧུན་སིར་རབ་རྒྱས་གླིང་དུ་ཚོགས་བཞིན་པའི་འདིའི་ལོའི་རྒྱལ་ཡུམ་ཆེན་མོའི་དྲན་རྟེན་རྐང་སྤོལ་རྩེད་འགྲན་གྱི་ Final མཐའ་མའི་རྩེད་འགྲན་དེ་བཞིན་ཁ་སང་དྷ་ས་ཆིག་སྒྲིལ་རུ་ཁག་དང་མོན་གྷོ་འདོད་རྒུ་གླིང་རུ་ཁག་གཉིས་དབར་འགྲན་རྩོད་གནང་རྒྱུ་ཡིན་པ་དེ་ལྟར་ཡང་། དྷ་ས་ཆིག་སྒྲིལ་རུ་ཁག་གི་རྩེད་འགྲན་པ་གཅིག་གི་དཔྱ་ཁྲལ་ལག་དེབ་ཚད་ལྡན་ཡིད་མིན་གྱི་གནད་དོན་རྐྱེན་པས་གོ་ལ་ཐ་ལའི་མི་མང་ཁག་གཅིག་གིས་རྐང་སྤོལ་ཐང་དུ་ངོ་རྒོལ་གནང་ཡོད་པར་བརྟེན་རྩེད་འགྲན་དེ་ཉིད་རྩེ་མ་ཐུབ་པའི་གནས་སྟངས་འོག་ལྷུང་སྟེ། རྩེད་འགྲན་གོ་སྒྲིག་ཚོགས་ཆུང་ནས་ཁ་སང་དང་དེ་རིང་བཅས་ཉིན་གྲངས་གཉིས་རིང་གནད་དོན་དེའི་སྐོར་ཚོགས་འདུ་རབ་དང་རིམ་པ་ཚོགས་ཡོད།
གསར་འགོད་པས་བོད་རྒྱལ་ཡོངས་རྩེད་རིགས་ཚོགས་པའི་འགན་འཛིན་བྱང་ཆུབ་རྒྱལ་མཚན་ལགས་སུ་ཁ་སང་དང་དེ་རིང་བཅས་ཉིན་གྲངས་གཉིས་རིང་འདི་ལོའི་༸རྒྱལ་ཡུམ་ཆེན་མིའི་དྲན་རྟེན་གསེར་གྱི་གཟེངས་རྟགས་རྐང་རྩེད་སྤོ་ལོའི་མཐའ་མའི་འགྲན་བསྡུར་དེ་ཉིད་རྩེ་མ་ཐུབ་པའི་གནད་དོན་དེ་གང་ལ་ཐུག་ཡོད་མིན་དང་། ཚོགས་འདུ་རབ་དང་རིམ་པ་ཚོགས་ཡོད་པས་མཐར་ཐག་གཅོད་གང་བྱུང་ཡོད་མིན་ཐད་བཅར་འདྲི་ཞུས་སྐབས། ཁོང་གིས་དྷ་སའི་རྩེད་འགྲན་པ་གཅིག་གིས་མི་གཞན་ཞིག་གི་དཔྱ་ཁྲལ་ལག་དེབ་བེད་སྤྱོད་བྱས་པ་ར་སྤྲོད་བྱུང་སྟབས། རྡ་ས་རུ་ཁག་ལ་ཚོགས་པའི་སྒྲིག་གཞི་གཞིར་བཟུང་ཉེས་ཆད་བཏང་རྒྱུ་དང་། མཐའ་མའི་འགྲན་སྡུར་དེ་བཞིན་སང་ཉིན་ཕྱི་ཚེས་ ༣༠ ཉིན་གྱི་ཕྱག་ཚོད་ ༡༡ ཐོག་གོ་ལ་ཐ་ལ་རུ་ཁག་དང་མོན་གྷོ་འདོད་རྒུ་གླིང་རུ་ཁག་གཉིས་དབར་འགྲན་རྩོད་གནང་རྒྱུ་ཡིན་སྐོར་འགྲེལ་བརྗོད་གནང་སོང་།
རྩ་བའི་འདི་ལོར་བོད་རྒྱལ་ཡོངས་རྩེད་རིགས་ཚོགས་པའི་སྒྲིག་གཞིར་བསྐྱར་བཅོས་ཀྱིས། གལ་ཏེ་རུ་ཁག་གཅིག་གིས་རྩེད་འགྲན་པའི་ཡིག་ཆ་རྫུན་མ་མཁོ་སྤྲོད་བྱས་ཚེ། འབྲེལ་ཡོད་རུ་ཁག་དེར་ལོ་གཉིས་རིང་རྩེད་འགྲན་ནང་མཉམ་ཞུགས་མི་ཆོག་པ་བཟོས་ཡོད་པ་དང་། གང་ཟག་དེར་ལོ་གཅིག་རིང་རྩེད་འགྲན་ནང་མཉམ་ཞུགས་གནང་ཆོག་གི་མེད་པའི་ཉེས་ཆད་བཟོས་ཡོད་པ་གསུངས་སོང་།
ད་ལྟའི་ཆར་དྷ་ས་རུ་ཁག་ངོས་ནས་བོད་རྒྱལ་ཡོངས་རྩེད་རིགས་ཚོགས་པའི་ཐག་གཅོད་དང་འབྲེལ་ནས་གསལ་བཤད་གང་ཡང་གནང་མེད་པ་རེད།
