ཕྱི་ཟླ་ ༦ ཚེས་ ༢༦ སྟེ། རྒྱལ་ཚོགས་ནས་གཏན་འབེབས་གནང་བའི་ International Day in Support of Victims of Torture འམ་རྒྱལ་སྤྱིའི་མནར་གཅོད་འགོག་རྒོལ་གྱི་ཉིན་མོ་ཡིན་པ་དང་བསྟུན། བཞུགས་སྒར་དུ་རྟེན་གཞིས་བྱས་པའི་བོད་ཀྱི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་། བོད་ཀྱི་གཞོན་ནུ་ལྷན་ཚོགས། བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ་བཅས་ཀྱི་གོ་སྒྲིག་འོག རྡ་ས་ས་གནས་འགོ་འཛིན་ཚོགས་ཁང་དུ་ཆབ་སྲིད་བཙོན་ཟུར་ལྔ་གདན་ཞུས་ཀྱིས་རྒྱ་གཞུང་གི་བཙན་འོག་ཏུ་སྡུག་སྦྱོང་མནར་གཅོད་མྱངས་དང་མྱོང་མུས་ཡིན་པའི་བོད་ཀྱི་ཆབ་སྲིད་བཙོན་པ་དང་བཙོན་ཟུར་འདས་གསོན་འབྲེལ་ཡོད་ནང་མི་ཡོངས་ལ་གདུང་སེམས་མཉམ་བསྐྱེད་དང་གུས་འདུད་བརྒྱུད་ཉིན་མོ་འདི་བཞིན་སྲུང་བརྩི་ཞུས་སོང་བ་མ་ཟད། རྒྱ་གཞུང་ལ་བོད་ཀྱི་ཆབ་སྲིད་བཙོན་པ་འདས་གསོན་རྣམས་པའི་གནས་སྟངས་ཕྱི་གསལ་ནང་གསལ་བཟོ་དགོས་པའི་ནན་བརྗོད་གནང་སོང་།
དེ་ཡང་དེ་རིང་གི་མཛད་སྒོའི་ཐོག་བོད་ཀྱི་ཆབ་སྲིད་བཙོན་ཟུར། དགེ་བཤེས་ཚེ་རིང་རྡོ་རྗེ་ལགས་དང་། བློ་བཟང་ཡོན་ཏན་ལགས། དགེ་འདུན་རིན་ཆེན་ལགས། དགེ་བཤེས་ངག་དབང་བདེ་ལེགས་ལགས། ཤེས་རབ་རྒྱ་མཚོ་ལགས་བཅས་དང་། ཚོགས་པ་བཞིའི་ཚོགས་གཙོ་དང་ཚོགས་གཞོན། དྲུང་ཆེ་སོགས་དང་མི་མང་ཁག་གཅིག་ལྷན་ཞུགས་གནང་ཡོད།
དེ་རིང་གི་ལས་འགུལ་ཐོག་གདན་ཞུ་གནང་བའི་བོད་མི་ཆབ་སྲིད་བཙོན་ཟུར་རྣམས་ནས། དེ་སྔོན་ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་གྱི་བོད་མིའི་རང་དབང་སྒེར་ལངས་སོགས་ཀྱི་ནང་མཉམ་ཞུགས་གནང་བའི་མྱོང་བ་དང་། ཕྱི་ལོ་ ༡༩༨༧ ལོར་ཞི་རྒོལ་ནང་མཉམ་ཞུགས་ཀྱིས་དྲག་གནོན་དཀའ་སྡུག་གི་མྱོང་བ། དེ་བཞིན་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྙིང་སྟོབས་དང་བློས་བཏང་སོགས་ཕྱིར་དྲན་གནང་སྟེ། རྒྱའི་བཙོན་ཁང་ནང་སྡུག་སྦྱོང་མནར་གཅོད་ཚད་ལས་བརྒལ་བ་མྱངས་ཡོད་པ་སོགས་ཕྱིར་དྲན་དང་འབྲེལ། ཚང་མས་ཞལ་གཅིག་བསྒྲགས་ཀྱི་ཐོག་ནས་བཙན་བྱོལ་ནང་དུ་ཡོད་པའི་བོད་མི་རྣམས་ནས་གཞིས་བཞུགས་བོད་མི་རྣམས་ཀྱི་མངོན་འདོད་མཁྱེན་དགོས་ཤིང་། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་བོད་མི་ནང་ཁུལ་རྡོག་རྩ་ཆིག་སྒྲིལ་གནང་དགོས་གལ་ཡིན་པ་སོགས་གསུངས་སོང་།
འདི་ག་རླུང་འཕྲིན་ཁང་ནས་ལས་འགུལ་གོ་སྒྲིག་གནང་མཁན་ཁོངས་སུ་ཡོད་པའི་བོད་ཀྱི་འགྲོ་བ་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་སུ་བཀའ་འདྲི་ཞུས་སྐབས། ཁོང་གིས་རྒྱལ་སྤྱིའི་མནར་གཅོད་འགོག་རྒོལ་གྱི་ཉིན་མོ་འདི་བཞིན་ཧ་ཅང་གལ་འགངས་ཆེན་པོ་ཞིག་ཆགས་ཀྱི་ཡོད་སྟབས། བོད་པའི་སྤྱི་ཚོགས་ནང་བོད་ཀྱི་འཐབ་རྩོད་ལོ་རྒྱུས་ཁྲོད་མི་རབས་རྒན་བགྲེས་རྣམས་ནས་སྐུ་ལས་བསྐྱོན་པ་དེ་དག་མི་རབས་གཞོན་པ་ཚོར་གོ་རྟོགས་ཡོང་ཆེད་དང་། སེམས་ཤུགས་གོང་འཕེལ། སྤྱི་ཚོགས་མཉམ་མཐུན་ཡོང་རྒྱུ་བཅས་ལ་དམིགས་ནས་ལས་འགུལ་འདི་བཞིན་གོ་སྒྲིག་ཞུས་ཡོད་པ་དང་། ལྷག་པར་རྒྱལ་སྤྱིའི་སྤྱི་ཚོགས་ཁྲོད་བོད་ཀྱི་ཆབ་སྲིད་བཙོན་པའི་གནས་སྟངས་ཐད་དོ་སྣང་རྒྱ་གང་ཆེ་དང་། རྒྱ་གཞུང་གི་འགོ་ཁྲིད་རྣམས་ལ་འགན་ལེན་ཐུབ་པ་བཟོ་དགོས་གལ་ཡིན་པ་འགྲེལ་བརྗོད་གནང་སོང་།
ད་དུང་རྒྱ་ནག་གཞུང་དེ་བཞིན་མཉམ་འབྲེལ་རྒྱལ་ཚོགས་ཀྱི་མནར་གཅོད་འགོག་རྒོལ་གྱི་སྤྱི་ཆིངས་ལ་མཚན་རྟགས་བཀོད་མཁན་ཞིག་ཡིན་སྟབས། བོད་ཀྱི་ཆབ་སྲིད་བཙོན་པ་འདས་གསོན་རྣམ་པའི་གནས་སྟངས་ཕྱི་གསལ་ནང་གསལ་བཟོ་དགོས་པ་དང་། འབྲེལ་ཡོད་རྒྱ་གཞུང་དཔོན་རིགས་རྣམས་ལ་ཞིབ་འཇུག་གིས་ཉེས་ཆད་བཀལ་དགོས་པའི་དགོས་འདུན་དང་སྦྲགས། དེ་རིང་ནས་བཟུང་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་གྱི་ཡོད་མ་ཟད། ལྟེ་གནས་ཁང་གི་ངོས་ནས་སྤྱི་ཚོགས་དྲ་རྒྱའི་ཐོག་ཉིན་གྲངས་ ༢༠ རིང་རྒྱ་གཞུང་གི་བཀག་ཉར་དང་མནར་གཅོད་འོག་ཚེ་སྲོག་ཤོར་བའི་བོད་མི་ ༢༠ ཙམ་གྱི་ལོ་རྒྱུས་ཕྱིར་དྲན་གྱིས་གོ་རྟོགས་སྤེལ་རྒྱུ་མཚོན་པའི་ཁོང་རྣམས་ཀྱི་བློས་བཏང་ལ་གུས་འདུད་དང་ཤུལ་ལུས་ནང་མི་ཡོངས་ལ་གདུང་སེམས་མཉམ་བསྐྱེད་ཞུ་རྒྱུ་ཡིན་པ་འགྲེལ་བརྗོད་གནང་སོང་།
དེ་རིང་གི་མཛད་སྒོའི་ཐོག་གཞན་ཡང་བོད་ཀྱི་ཆབ་སྲིད་བཙོན་པ་ཉི་ཤུའི་དངོས་ཡོད་ལོ་རྒྱུས་ངོ་སྤྲོད་གནང་སོང་བ་མ་ཟད། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོ་ལགས་ཀྱིས་བརྙན་ཐུང་བརྒྱུད་རྒྱལ་སྤྱིའི་སྤྱི་ཚོགས་ཀྱིས་དྲང་བདེན་ལ་འགེབ་གཡོག་མེད་པར་རིན་པོ་ཆེ་མཆོག་འདས་རྐྱེན་སོགས་ལ་མུ་མཐུད་ཞིབ་འཇུག་ནན་པོ་བྱས་ཏེ། རྒྱ་གཞུང་གི་བཙོན་འགོ་ཏུ་ཡོད་པའི་བོད་མི་རྣམས་ལ་དེ་རིགས་ཆག་འཇིགས་མི་བྱུང་བའི་ཐབས་འཐེན་དགོས་པ་མ་ཟད། རིན་པོ་ཆེ་མཆོག་གི་ཐུགས་རེ་མུ་མཐུད་མི་རབས་རྗེས་མའི་སེམས་ཁོང་ན་གསོན་པོར་གནས་ཡོད་པ་གསུངས་སོང་།
གཞི་རྩའི་མཉམ་འབྲེལ་རྒྱལ་ཚོགས་ནས་མནར་གཅོད་འགོག་རྒོལ་གྱི་སྤྱི་ཆིངས་གཏན་འབེབས་བྱས་ནས་མི་ལོ་ ༣༧ འཁོར་གྱི་ཡོད་པ་རེད།
