སྔར་ལོ་རྒྱ་ན་གིས་བོད་ནང་དུ་རྒྱ་སྒྱུར་གྱི་སློབ་གསོ་སྤེལ་ཤུགས་ཆེ་རུ་བཏང་བ་དང་འབྲེལ་ནས། སྔ་རྗེས་སུ་བོད་ཁུལ་ནས་སྒེར་གཉེར་གྱི་སློབ་གྲྭ་སྒོ་བརྒྱབ་པ་དང་འབྲེལ་ཡོད་ཀྱི་དགེ་རྒན་དང་སློབ་མ་ཁག་ཅིག་འཛིན་བཟུང་བྱས་པའི་གནས་ཚུལ་རིམ་པ་བྱུང་བ་ལྟར། སྔར་ལོའི་ལོ་མཇུག་ཏུ་མགོ་ལོག་དར་རྫོང་གི་བོད་མི་དཔལ་བཟང་ཞུ་བ་ཞིག་འཛིན་བཟུང་གིས་བཙན་ཁྲིད་བྱས་ཏེ་ད་ཆ་གར་སོང་ཆ་མེད་དུ་གྱུར་བའི་གནས་ཚུལ་ཐོན་འདུག
དེ་ཡང་བཞུགས་སྒར་གྱི་བོད་གནས་ལྟ་ཞིབ་ཁང་གི་པདྨ་རྒྱལ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། སྔར་ལོའི་རྒྱ་ནག་གི་བོད་སྐད་ཡིག་རྒྱ་སྒྱུར་གྱི་སྲིད་བྱས་ལག་བསྟར་བྱས་པ་དང་འབྲེལ་ནས་། མཚོ་སྔོན་ཞིང་ཆེན། མགོ་ལོག་དར་ལག་རྫོང་ནས་ཡིན་པའི་བོད་མི་དཔལ་བཟང་ལགས་ཀྱིས་རྒྱ་སྒྱུར་སློབ་གསོར་ངོ་རྒོལ་བྱས་རྐྱེན་ཁོང་རྒྱ་ནག་གིས་རང་ཁྱིམ་ནས་འཛིན་བཟུང་བྱས་ཏེ་ཟི་ལིང་དུ་འཁྲིད་རྗེས་གར་ཡོད་མ་ཤེས་པར་ད་བར་ཟླ་བཞི་ལྷག་འགྲོ་བཞིན་ཡོད་པ་རེད་འདུག
ཁོང་གིས་འགྲེལ་བརྗོད་གནང་བ་ལྟར་ན། མཚོ་སྔོན་ཞིང་ཆེན་མགོ་ལོག་ཁུལ་དར་ལག་རྫོང་ནས་ཡིན་པའི་བོད་མི་དཔལ་བཟང་ལགས་ཀྱིས་སྐད་འཕྲིན་གྱི་ཚོགས་པ་ཞིག་གི་ནང་དུ། སྐད་ཡིག་རྒྱ་སྒྱུར་གྱི་སློབ་གསོ་དང་འབྲེལ་ནས་བཀའ་མོལ་གནང་སྟེ། རྒྱ་ལ་རྒྱ་ཡིག་དགོས་ན་བོད་ལ་བོད་ཡིག་དགོས་ཅེས་གཏམ་བཤད་བྱས་པ་དང་ཉིན་དེའི་མཚན་མོར་དར་ལག་རྫོང་ཉེན་རྟོག་པ་དཔལ་བཟང་ལགས་ཀྱི་རང་ཁྱིམ་དུ་ཡོང་ནས་འཛིན་བཟུང་བཙན་འཁྲིད་བྱས་རྗེས་ཉིན་གྲངས་ ༡༥ རིང་དར་ལག་རྫོང་ཉེས་དོན་ཞིབ་དཔྱོད་ཁང་དུ་བཀག་ཉར་འོག་བཞག་ཡོད་པ་དང་། དེའི་རྗེས་མཚོ་སྔོན་ཞིང་ཆེན་གྱི་གྲོང་ཁྱེར་ཟི་ལིང་དུ་ཁྲིད་ནས་ཟླ་གསུམ་དང་ཕྱེད་ཀ་ལྷག་འགྲོ་བཞིན་ཡོད་ནའང་གར་ཡོད་འདིར་ཡོད་ཀྱི་གནས་ཚུལ་གང་ཡང་ཤེས་རྟོགས་ཐུབས་ཀྱི་མེད་སྟབས། ཁོང་གི་འབྲེལ་ཡོད་ཀྱི་ནང་མི་རྣམས་ཀྱིས་སེམས་ཁྲལ་བྱེད་བཞིན་ཡོད་པར་གསུངས་སོང་། 
གཞན་ཡང་ཁོང་གིས། སྔར་ལོའི་ལོ་མཇུག་ཏུ་རྒྱ་ནག་གཞུང་གིས་བཅད་བགོ་བྱས་པའི་བོད་རང་སྐྱོང་ལྗོངས་ཆབ་མདོ་ས་ཁུལ་སྨར་ཁམས་སྤོམ་མདའ་སྡེ་བ་ནས་ཡིན་པའི་བོད་རིགས་དམའ་འབྲིང་སློབ་ཕྲུག་བུ་གཅིག་དང་བུད་མེད་གཉིས་ཀྱང་རྒྱ་སྒྱུར་སློབ་གསོ་ལག་བསྟར་བྱེད་བཞིན་པ་དང་འབྲེལ་ནས་འཛིན་བཟུང་བྱས་ཏེ་ཡུལ་དེའི་སློབ་གསོ་སྒྱུར་བཀོད་ཁང་ཞིག་ཏུ་བཀག་ཉར་འོག་བཞག་སྟེ་ཟླ་བ་ཁ་ཤས་འགྲོ་བཞིན་ཡོད་ཀྱང་། ད་དུང་ཀློད་གྲོལ་བཏང་མེད་སྐོར་འགྲེལ་བརྗོད་གནང་སོང་།
ཁོང་གིས་མུ་མཐུད་དུ་གསུངས་དོན། ད་སྐབས་རྒྱ་ནག་གིས་མཚོ་སྔོན་ཞིང་ཆེན། མགོ་ལོག་ཁུལ་གྱི་རྫོང་ཐོག་ཏུ་རྒྱ་ནག་གིས་བོད་རིགས་སློབ་མའི་ཕ་མའི་ཚོགས་འདུ་མང་པོ་སྐོང་འཚོགས་བྱས་དང་བྱེད་བཞིན་པ་མ་ཟད། སློབ་མའི་ཕ་མ་རྣམས་ཀྱིས་ཀྱང་རྒྱ་ཡིག་རྒྱ་སྐད་སྦྱང་ནས་སློབ་མའི་སློབ་སྦྱོང་ལ་རམས་འདེགས་བྱེད་དགོས་བ་མ་ཟད། བོད་རིགས་སློབ་མ་རྣམས་ཀྱིས་རྒྱ་ཡིག་རྒྱ་སྐད་སྦྱོང་བརྩོན་ལ་སྐུལ་མ་བཏང་ནས་རྒྱ་ནག་གི་གོང་རིམ་གྱི་ཚོགས་འདུ་རིམ་པའི་སྙིང་དོན་ལ་གོ་བ་ཡང་དག་ལེན་དགོས་བ་སོགས་ཀྱི་ཚོགས་འདུ་མང་པོ་སྐོང་འཚོགས་གནང་བཞིན་པའི་གནད་དོན་འབྱུང་བཞིན་ཡོད་པ་ངོ་སྤྲོད་གནང་སོང་།
གཞི་རྩའི་རྒྱ་ནག་གིས་བོད་ཁམས་གང་སར་སྐད་གཉིས་སློབ་གསོ་བྱས་པ་ལག་བསྟར་བྱས་ནས་སྦྱང་བྱའི་བསླབ་གཞི་ཁག་མང་པོ་ཞིག་རྒྱ་སྒྱུར་བྱས་ཡོད་ཀྱང་། སྔར་ལོ་ནས་རྒྱ་ནག་གི་དབུས་ཤེས་ཡོན་ལྷན་ཚོགས་ཀྱིས་གཏན་འབེབས་བྱས་པ་ལྟར། བོད་ཁུལ་གྱི་གཙོ་བྱས་པའི་རྒྱལ་ནག་ཡོངས་སུ་རྒྱ་སྐད་རྒྱ་ཡིག་གཙོར་ཁྲིད་ཀྱིས་རྒྱ་ནག་གི་སྤྱི་སྐད་བེད་སྤྱོད་གཏོང་ཤུགས་ཆེ་རུ་གཏོང་དགོས་བའི་བཀའ་རྒྱ་བཏང་བའི་ཁྲོད། བོད་ཁུལ་གང་སར་བོད་སྐད་བོད་ཡིག་གི་སྤྱོད་སྒོ་ཆེས་ཆུང་རུ་ཕྱིན་པར་བརྟེན་ནས། སྔ་རྗེས་སུ་བོད་ཁུལ་གྱི་དགེ་རྒན་དང་སློབ་མ་ཁག་ཅིག་འཛིན་བཟུང་བྱས་ཡོད་པ་རེད།
