ཟླ་འདིའི་ཕྱི་ཚེས་ ༢༤ ཉིན་ཨ་རིའི་ནིའུ་ཡོག་གྲོང་ཁྱེར་དུ་བོད་རང་བཙན་སློབ་ཕྲུག་ཚོགས་པ་དབུ་བརྙེས་ནས་ལོ་ངོ་ ༣༠ འཁོར་བའི་དུས་དྲན་དང་བསྟུན་ཕྱི་ལོ་ ༢༠༢༤ ལོའི་ལོངས་ཤོག་མཚན་ཚོགས་གོ་སྒྲིག་ཐོག བོད་རང་བཙན་ལས་འགུལ་ལ་ཞབས་འདེགས་གལ་ཆེན་སྒྲུབ་མཁན་ཚོགས་སྒེར་ཁག་གཅིག་གི་ཐུན་མོང་མ་ཡིན་པའི་སྙིང་སྟོབས་དང་ལྷག་བསམ་ལ་ཆེ་བསྟོད་ཀྱིས་ལྷག་དཀར་གཟེངས་རྟགས་འབུལ་བཞེས་གནང་འདུག
དེ་ཡང་བོད་རང་བཙན་སློབ་ཕྲུག་ཚོགས་པའི་ངོ་དེབ་དུ་དེ་འབྲེལ་གནས་ཚུལ་སྤེལ་བའི་ནང་། ཐེངས་འདིའི་ལྷག་དཀར་གཟེངས་རྟགས་བཞེས་མཁན་ཁོངས་སུ་རྒྱ་ནག་གི་ཆུ་མཛོད་གསར་རྒྱག་གི་ལས་གཞི་ལ་ཞི་བའི་ངོ་རྒོལ་གནང་མཁན་བོད་ཁམས་སྡེ་གེའི་མང་ཚོགས་དང་། ཨ་རི་ Philadelphia ནང་དུ་བོད་དོན་ཐོག་ཞུ་གཏུག་དང་གོ་རྟོགས་ཀྱི་ལས་འགུལ་སྟུད་མར་སྤེལ་མཁན་ཐུབ་བསྟན་ཆོས་ཉིད་ལགས། དེ་བཞིན་རྒྱ་ནག་གི་སྲིད་བློན་ཞི་ཅིན་ཕིང་སྔ་ལོ་ཨ་རིའི་ San Francisco གྲོང་ཁྱེར་ནང་བསྐྱོད་སྐབས་དང་དེ་བཞིན་ཕ་རན་སི་རྒྱལ་ས་ Paris བཅས་སུ་བསྐྱོད་སྐབས་གལ་ཆེན་ས་ཚིགས་སུ་ཀ་བའི་ཐོག་འཛེགས་ནས་བོད་ཀྱི་རྒྱལ་དར་དང་འཕྲེད་དར་འཕྱར་བ་སོགས་ཀྱི་མངོན་པར་གསལ་བའི་ལས་འགུལ་སྤེལ་མཁན་གཞོན་སྐྱེས་ཚེ་ལྷ་རྫོགས་སངས་ལགས་བཅས་ཡོད་འདུག ཕྱོགས་མཚུངས་མཛད་སྒོའི་ཆ་ཤས་སུ་རྒྱལ་ཁབ་འདྲ་མིན་ནང་གི་གྲོས་ཚོགས་འཐུས་མི་དང་གནད་ཡོད་མི་སྣ་ཐུག་འཕྲད་ཀྱིས་བོད་ནང་གི་ཛ་དྲག་གནས་སྟངས་ངོ་སྤྲོད་སོགས་ཀྱི་ཞུ་གཏུག་ལས་འགུལ་སྤེལ་མཁན་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱང་ཆེད་ཕེབས་ཀྱིས་དེ་སྔ་ཁོང་ལ་ཕྱི་ལོ་ ༢༠༡༣ ལོའི་ལྷ་དཀར་གཟེངས་རྟགས་ཐོབ་པ་དེ་དངོས་སུ་འབུལ་བཞེས་གནང་ཡོད་པ་རེད་འདུག
སྐབས་དེར་བོད་རང་བཙན་སློབ་ཕྲུག་ཚོགས་པ་ངོས་ནས་ཚོགས་པའི་ལས་འགུལ་བ་དང་རྒྱབ་སྐྱོར་བ་ཚོར་ཐུགས་རྗེ་ཆེ་ཞུས་ཀྱིས་ལོ་ངོ་བཅུ་ཕྲག་མང་པོའི་རིང་བོད་རྩ་དོན་ཐོག་གཡོ་བ་མེད་པར་བློས་གཏོང་བྱས་ཡོད་པ་ལ་བསྔགས་བརྗོད་གནང་འདུག
རྩ་བའི་ཐེངས་འདིའི་ལོངས་ཤོག་མཚན་ཚོགས་སུ་བོད་ཀྱི་གཞས་པ་གྲགས་ཅན་ཕུར་བུ་རྣམ་རྒྱལ་དང་། བསོད་ནམས་ཆོས་སྐྱིད། བསྟན་འཛིན་དོན་གྲུབ། Young Lama དེ་བཞིན་ Tedd Kyab དང་། ཚེ་སྐྱིད་ཚུལ་ཁྲིམས། མི་མང་སྒོར་གཞས་ཚོགས་པ་བཅས་གདན་ཞུས་ཀྱིས་འཁྲབ་སྟོན་གནང་བ་མ་ཟད་ཚེ་ལྷ་རྫོགས་སངས་དང་འཆི་མེད་ལྷ་མོ་ལ་སོགས་པའི་ལས་འགུལ་བ་རྣམས་ཀྱིས་གཏམ་བཤད་ཀྱང་གནང་འདུག
རྩ་བའི་བོད་རང་བཙན་སློབ་ཕྲུག་ཚོགས་པ་དེ་ཉིད་ཨ་རི་ནིའུ་ཡོག་ཏུ་ཕྱི་ལོ་ ༡༩༩༤ ལོར་གསར་བཙུགས་གནང་བ་ཞིག་ཡིན་པ་དང་། ད་ལྟའི་ཆར་ཚོགས་པའི་ཡན་ལག་ཁོངས་སུ་རྒྱལ་ཁབ་ ༡༠༠ ལྷག་གི་ནང་གཙུག་ལག་སློབ་གཉེར་ཁང་དང་གཞི་རིམ་སློབ་གྲྭ་སོགས་ཀྱི་ཁྲོད་ཚོགས་ཆུང་ཁག་ ༦༥༠ ཙམ་ཡོད་པས། ལས་དོན་གཙོ་བོ་བོད་ཀྱི་ཆབ་སྲིད་དང་དཔལ་འབྱོར་འགྲོ་བ་མིའི་ཐོབ་ཐང་གི་གནད་དོན་ཐོག་གོ་རྟོགས་དང་ཞུ་གཏུག་ངོ་རྒོལ་གྱི་ལས་འགུལ་རབ་དང་རིམ་པ་སྤེལ་དང་སྤེལ་མུས་ཡིན་པ་རེད།
ལོ་ངོ་ ༣༠ འཁོར་བའི་དུས་དྲན་དང་འབྲེལ་ནས་ཨ་རིའི་གྲོས་ཚོགས་འཐུས་མི་ Jim Mcgovern ལགས་ཀྱིས་བོད་རང་བཙན་སློབ་ཕྲུག་ཚོགས་པར་འཚམས་འདྲི་ཞུས་པ་དང་སྦྲགས། ཚོགས་པའི་ངོས་ནས་ད་བར་ཞུ་གཏུག་གི་ལས་འགུལ་སྤེལ་ཏེ་བོད་དོན་འཐབ་རྩོད་ཁྲོད་དམིགས་བསལ་གྱི་ཁྱད་པར་བཟོས་ཡོད་པ། མ་ཟད་བོད་རྒྱ་དཀའ་རྙོག་སེལ་ཐབས་ཀྱི་ཁྲིམས་ཡིག་གཙོས་པའི་གྲུབ་འབྲས་བཟང་པོ་མང་པོ་ཐོན་ཡོད་པར་སྐུ་ཞབས་ཁོང་ནས་ཐུགས་རྗེ་ཆེ་ཞུས་ཀྱིས། ཉེ་བའི་ཆར་ཁོང་དང་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ Nancy Pelosi དང་འཐུས་མི་སྐུ་ཚབ་ཚོ་ཁག་གཅིག་ནས་༸གོང་ས་མཆོག་ལ་མཇལ་ཁ་ཞུས་ཏེ་བསྐྱར་དུ་བོད་མི་མང་ལ་རྒྱབ་སྐྱོར་མུ་མཐུད་གནང་རྒྱུ་ཡིན་པའི་ཁས་ལེན་དམ་བཅའ་གནང་ཡོད་པ་འགྲེལ་བརྗོད་ཀྱིས། ང་ཚོའི་ངོས་ནས་ད་དུང་ཡང་གནང་སྒོ་རིགས་མང་པོ་ཡོད་པ་གང་ལྟར་ཡང་བོད་རང་བཙན་སློབ་ཕྲུག་ཚོགས་པའི་རྒྱབ་སྐྱོར་དང་ཞུ་གཏུག་གི་ལས་འགུལ་བརྒྱུད་ གྲུབ་འབྲས་འཐོན་རྒྱུ་ཡིན་པས་མུ་མཐུད་ཡིད་ཆེས་ཀྱིས་སེམས་ཤུགས་སྐྱེ་དགོས་གལ་ཡིན་པ་གསུངས་འདུག
