སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བརྒྱད་པའི་ཉིན་རྒྱབ་ཚོགས་དུས་ཐོག་བོད་མིའི་སྒྲིག་འཛུགས་བཀའ་ཤག་ནས་ལྔ་དང་ལྔ་བཅུའི་བྱུང་རིམ་དང་། ད་བར་ཚོགས་པའི་ལྔ་དང་ལྔ་བཅུའི་ཚོགས་འདུའི་དགོས་དམིགས་སོགས་ཀྱི་ཐད་ལ་དམིགས་བསལ་གསལ་བཤད་ཀྱི་གོ་སྐབས་བླངས་ཐོག་ལྔ་དང་ལྔ་བཅུ་ཞེས་པ་དེ་ནི་༸གོང་ས་མཆོག་གི་གཟིམ་ཆུང་མཇལ་ཁ་རིམ་པའི་ཐོག་སྩལ་བའི་བཀའ་སློབ་ཀྱི་དགོངས་དོན་གཞི་རྩར་བཟུང་ནས་ལྔ་དང་ལྔ་བཅུ་ཞེས་པ་དེ་བྱུང་ཡོད་པ་གསུངས་སོང་།
བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཁོང་དེ་སྔ་སྲིད་སྐྱོང་གི་དམ་འབུལ་ཐོག་མར་ཕུལ་བའི་རྗེས་སུ་༸གོང་ས་མཆོག་གི་གཟིམ་ཆུང་མཇལ་ཁར་ཡང་ཡང་བཅར་སྐབས་མགོན་པོ་༸གང་ཉིད་མཆོག་ནས་ད་ཁྱེད་རང་ཆབ་སྲིད་ཀྱི་འགན་འཁྱེར་དགོས། ངོས་མེད་པ་ནང་བཞིན་བྱས་ནས་འཆར་གཞི་སྒྲིགས་ཤིག་ཞེས་བཀའ་ཡང་ཡང་ཕེབས་ཡོད་སྟབས། སེམས་ལྗིད་ཏིག་ཏིག་དང་སྐྱོང་ལྷང་ལྷང་ཡོང་མིན་ལ་ལྟོས་མེད། ༸གོང་ས་མཆོག་གི་བཀའ་སྒྲུབ་རྒྱུའི་འགན་དེ་བཀའ་ཤག་ལ་ཡོད་བསམ་པའི་ཐོག་ནས་བཀའ་ཤག་ལྷན་རྒྱས་དང་མང་ཚོགས་ཁྲོད་ལ་༸གོང་ས་མཆོག་ཡོད་པའི་སྐབས་ཀྱི་འཆར་གཞི་དང་མེད་པའི་སྐབས་ཀྱི་འཆར་གཞི་ཞེས་གསུང་ཕོད་པ་ཞིག་མེད་སྟབས། ལྔ་དང་ལྔ་བཅུ་ཞེས་ཕྱོགས་གཅིག་ནས་ལོ་ལྔ་དང་ལྔ་བཅུ། ཕྱོགས་གཉིས་ནས་འཕྲལ་དང་ཕུགས། ད་ལྟ་དང་མ་འོངས་བཅས་ལྔ་དང་ལྔ་བཅུའི་འཆར་སྣང་དང་། འཆར་གཞི། སྲིད་བྱུས་དང་ལག་བསྟར་བཅས་བྱུང་ཡོད་པ་ངོ་སྤྲོད་དང་སྦྲགས། ལྔ་དང་ལྔ་བཅུ་འདི་བཞིན་རིམ་པས་བཟང་དུ་དང་ཡག་ཏུ་འགྲོ་རྒྱུའི་གདེང་ཚོད་ཆེན་པོ་ཡོད་པ་གསུངས་སོང་། 
སྲིད་སྐྱོང་མཆོག་ནས་༸གོང་ས་མཆོག་གིས་ད་བར་མི་ལོ་བདུན་ཅུ་ཙམ་གྱི་ནང་གནང་བའི་བོད་མིའི་ཆེད་མཐོང་དང་། བོད་མིའི་སྒྲིག་འཛུགས་ཀྱི་གནས་བབས། དེ་བཞིན་བོད་ནང་གི་བོད་མི་ཚོའི་སྙིང་སྟོབས་བཅས་མི་ཉམས་གོང་འཕེལ་གནང་རྒྱུ་གལ་ཆེན་པོ་ཡིན་པ། མགོན་པོ་༸གང་ཉིད་མཆོག་དགུང་ལོའོ་བབས་ལ་གཞིགས་པའི་ཕྱིའི་རྒྱལ་ཁབ་ཁག་ཏུ་ཕེབས་རྒྱུ་ཁག་པོ་ཡིན་པ་སོགས་ཀྱི་བཀའ་སློབ་ཕེབས་ཁག་ལུང་འདྲེན་དང་སྦྲགས། ལྔ་དང་ལྔ་བཅུའི་འཆར་སྣང་འདིའི་ཐོག་ནས་བོད་པའི་རྩ་དོན་གྱི་འགན་དེ་བོད་མི་མང་ཚོགས་ནས་འཁྱེར་ཐུབ་དགོས་གལ་ཡིན་པ་གསུངས་ཡོད། 
ལྷག་པར་དུ་སྲིད་སྐྱོང་མཆོག་ནས་༸གོང་ས་མཆོག་གིས་ད་བར་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་བཞི་གཙོ་གྱུར་མང་གཙོ་དར་སྤེལ་དང་ཁོར་ཡུག འགྲོ་བ་མིའི་ཐོབ་ཐང་སོགས་ཀྱི་ཐད་ལ་མཛད་འཕྲིན་རླབས་ཆེན་བསྐྱངས་པ་རྣམས་མུ་མཐུད་རྒྱུན་སྐྱོང་ཞུ་རྒྱུའི་འགན་དེ་ང་ཚོ་བོད་པ་ཚོར་ཡོད་སྟབས། ང་ཚོས་ག་ཚོད་སྒྲུབ་ཐུབ་ཀྱི་ཡོད་མེད་ལ་དགོངས་པ་བཞེས་གལ་ཡིན་པ་དང་། ༸གོང་ས་མཆོག་གི་བཀའ་དྲིན་ཐོག་ད་བར་རྒྱལ་སྤྱིའི་ཁྲོད་དབུ་མའི་ལམ་ལ་རྒྱབ་སྐྱོར་ཐོབ་པ་ཁག་གཙོ་གྱུར་བོད་ཀྱི་ཆབ་སྲིད་གནད་དོན་ཁག་རྒྱུན་སྐྱོང་ཞུ་རྒྱུའི་བོད་མི་ཚོར་འགན་ཡོད་སྟབས། གནད་དོན་དེ་དག་སྒྲུབ་ཐབས་སུ་ཐོག་མར་ཆབ་སྲིད་ཀྱི་ལྔ་དང་ལྔ་བཅུ་ཞེས་འགོ་འཛུགས་གནང་ཡོད་པ་གསུངས་སོང་། 
སྐབས་དེར་སྲིད་སྐྱོང་མཆོག་ནས་ཆབ་སྲིད་ཀྱི་ལྔ་དང་ལྔ་བཅུའི་རྗེས་སུ་གཞོན་སྐྱེས་ལྔ་དང་ལྔ་བཅུ་དང་བཙན་བྱོལ་བོད་མིའི་སྤྱི་ཚོགས་སྲ་བརྟན་རྒྱུན་སྐྱོང་ལ་དམིགས་པའི་ལྔ་དང་ལྔ་བཅུ་བཅས་ཀྱི་ཚོགས་འདུ་རིམ་པ་ཚོགས་པ་ཁག་ངོ་སྤྲོད་དང་སྦྲགས། ལྔ་དང་ལྔ་བཅུ་འདི་ད་རེས་ཀྱི་བཀའ་ཤག་ནས་མཚམས་འཇོག་རྒྱུ་ཞིག་མིན་པར་མུ་མཐུད་གནང་དགོས་གལ་ཡིན་པ་གསུངས་ཡོད། 
བཀའ་ཤག་གི་གསལ་བཤད་དེའི་ཁྲོད་སྲིད་སྐྱོང་མཆོག་ནས་ལྔ་དང་ལྔ་བཅུའི་འཕྲལ་ཕུགས་ཀྱི་ལས་དོན་སོགས་དང་འབྲེལ། ད་བར་འཛིན་སྐྱོང་ནས་ཆོས་རིག་དང་འབྲེལ་བའི་ཐོག་ལ་མཐའ་མཚམས་ཁག་ཏུ་ཡོད་པའི་དགོན་ཁག་རྣམས་ཉམས་གསོ་དང་དཔེ་ཁྲིད་དགེ་རྒན་བསྐོ་གཞག དེ་བཞིན་ནང་སྲིད་དང་འབྲེལ་བོད་པའི་གཞིས་ཁག་རྒྱ་གར་གཞུང་གྱི་ཁྲིམས་མཐུན་ངོས་ལེན་དང་སྲིད་བྱུས་ལྡན་པ། དེ་བཞིན་དཔལ་འབྱོར་དང་འབྲེལ་བའི་དངུལ་ཁང་དང་བུན་གཡར་ལས་གཞི་བརྒྱུད་སྒྲིག་འཛུགས་དང་མང་ཚོགས་གཉིས་ཀར་ཕན་པའི་ལས་གཞི། གཞན་ཡང་བདེ་སྲུང་གི་ལས་དོན་དང་འབྲེལ་༸གོངས་མཆོག་གི་༸སྐུ་ཕྱྭའི་སྲུང་སྐྱོབ་ཐོག་སྔར་ལྷག་ཚགས་ཚུད་དང་། ཤེས་ཡོན་དང་འབྲེལ། ཤེས་ཡོན་ལྷན་ཚོགས་གསར་འཛུགས་དང་ཤེས་ཡོན་སྲིད་བྱུས་ལག་བསྟར་གཙོས་དགེ་རྒན་གསོ་སྐྱོང་དང་ཟབ་སྦྱོང་རྒྱ་ཆེ་གནང་བ། འཕྲོད་བསྟེན་དང་འབྲེལ་ནས་སྨན་བཅོས་ལྟ་སྐྱོང་ལས་གཞི་སོགས་འཆར་གཞི་དང་ལྡན་པའི་ཐོག་ནས་གནང་ཐུབ་ཡོད་པ་སོགས་ཀྱང་གསུངས་ཡོད།
