དེ་རིང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དུ་འཚོགས་བཞིན་པའི་བོད་ཀྱི་ཞོ་སྟོན་རྒྱས་པ་ཐེངས་ ༢༥ ཐོག་མཉམ་ཞུགས་གནང་མཁན་བོད་ཀྱི་ཟློས་གར་ཚོགས་པ་གཙོས་ཕྱོགས་མཐའ་ཁག་ནས་བཅར་བའི་ལྷ་མོའི་ཚོགས་པ་ཁག་གི་ཚོགས་མི་ལས་བྱེད་ཡོངས་ལ་དམིགས་བསལ་མཇལ་དང་བླང་དོར་བཀའ་སློབ་བཀྲིན་ཆེ་བ་སྩལ་སོང་།
༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་དེ་སྔ་བོད་ཀྱི་རྒྱལ་ས་ལྷ་སར་ཞོ་སྟོན་ཉིན་མ་ལྔ་ཙམ་རིང་ཚོགས་ཀྱི་ཡོད་པ་དང་སྐབས་དེར་མགོན་པོ་༸གང་ཉིད་མཆོག་༸རྒྱལ་ཡུམ་ཆེན་མོ་མཆོག་དང་མཇལ་འཕྲད་ཡང་ཡང་བྱུང་གི་སྟབས་དུས་ཚོད་དེ་ནི་ཆེས་སྐྱིད་ཤོས་ཤིག་དང་། དེ་ནི་དབྱར་ཁའི་གུང་སེང་རིང་ཤོས་ཤིག་ཀྱང་ཡིན་པ་སོགས་དྲན་གསོ་མཛད་ཡོད།
མགོན་པོ་༸གང་ཉིད་མཆོག་ནས་ང་ཚོ་བཙན་བྱོལ་བ་ཆགས་ནས་རང་མགོ་གང་ཐོན་བྱས་ནས་མ་ཕྱིན་པར་བོད་ཀྱི་ཆོས་དང་རིག་གཞུང་། ལེགས་བྱང་ཁག་འཛིན་སྐྱོང་གནང་སྟེ་གནས་ཡོད་པ་དང་། ལྷག་པར་དུ་བོད་མི་ཚོས་བཤད་སྒྲུབ་ཟུང་འབྲེལ་ཐོག་བདག་གཅེས་གནང་བའི་ནང་པ་སངས་རྒྱས་པའི་ཆོས་ལ་ད་ཆ་རྒྱ་ནག་ནང་ལ་དམིགས་བསལ་དོ་སྣང་བྱེད་མཁན་མང་དུ་འགྲོ་བཞིན་པ་མ་ཚད་པར་དད་པ་ཙམ་མིན་པར་ཚན་རིག་དང་མཐུན་པའི་བོད་ཀྱི་ནང་ཆོས་ལ་རྒྱལ་སྤྱིའི་ཚན་རིག་མཁས་པ་ཚོས་ཀྱང་དོ་སྣང་ཆེན་པོ་བྱེད་བཞིན་ཡོད་པ་སོགས་བཀའ་སྩལ་བ་དང་ཆབས་ཅིག ང་ཚོ་བཙན་བྱོལ་ལ་གྱུར་བའི་རྐྱེན་ངན་དེ་གྲོགས་ལ་ཤར་ནས་འཛམ་གླིང་ས་ཕྱོགས་གང་སར་བོད་ཀྱི་ཆོས་རིག་དང་ལེགས་བྱང་སོགས་ཁྱབ་སྤེལ་ཐུབ་ཡོད་སྟབས། བོད་མི་ཚོའི་ངོས་ནས་བོད་ཀྱི་ཆོས་རིག་དེ་དག་མུ་མཐུད་བདག་གཅེས་གནང་གལ་ཡིན་པའི་ལམ་སྟོན་མཛད་ཡོད།
དེ་བཞིན་ཆོས་རྒྱལ་སྲོང་བཙན་སྒམ་པོ་མཆོག་གིས་དབུས་པའི་ཆོས་རྒྱལ་ཚོས་བོད་ཀྱི་ཡི་གེ་གསར་གཏོད་དང་དཔལ་ནཱ་ལེནྡཱའི་རིག་གཞུང་རྣམས་བོད་བསྒྱུར་གནང་བ་སོགས་རླབས་ཆེན་གྱི་མཛད་རྗེས་བསྐྱངས་ཁག་དྲན་གསོ་མཛད་དེ། ང་ཚོ་བོད་མི་རྣམས་བཙན་བྱོལ་བ་ཞིག་ཆགས་ཡོད་ཀྱང་ལོ་རྒྱུས་ལྡན་པའི་བོད་པའི་རིག་གཞུང་དག་ལ་གཞིགས་ན་བོད་མི་རྣམས་སེམས་ཞུམ་མི་དགོས་པར་སྤོབས་པ་གནང་འོས་པ་ཞིག་ཆགས་ཡོད་པར་བཀའ་སྩལ་གྲུབ་མཚམས་སུ་བོད་ཀྱི་ཟློས་གར་ཚོགས་པ་གཙོས་ཕྱོགས་མཐའ་ཁག་ནས་བཅར་བའི་ལྷ་མོའི་ཚོགས་ཁག་གི་སྐུ་ཚབ་རེ་རེའི་ངོས་ནས་མགོན་པོ་༸གང་ཉིད་མཆོག་ལ་རྣམ་ཐར་རེ་གཟིགས་ཕུད་ཞུས་ཡོད།
རྣམ་མཐར་གཟིགས་ཕུད་སྤྱན་འབུལ་ཞུ་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་གིས་མདོ་སྨད་ཙོང་ཁའི་ཡུལ་ནས་ཡོང་བའི་ལྷ་མོ་དོན་གྲུབ་ཞུ་བའི་བུ་དེས་ད་བར་༸རྒྱལ་བའི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་གཙོ་གྱུར་རིས་སུ་མ་ཆད་པའི་བསྟན་པ་སྤྱིར་སྨན་པའི་ཞབས་འདེགས་ཞུས་ཡོད་པ་དེ་དག་ལ་བོད་མི་ཚོའི་ངོས་ནས་སྤོབས་པ་གནང་འོས་པ་དང་། ད་ལྟའི་ཆར་ལྷ་བླའི་བཀའ་ལུང་ཁག་ལ་གཞིགས་ན་མགོན་པོ་༸གང་ཉིད་མཆོག་ད་དུང་དགུང་ལོ་བཅུ་བཅོ་ལྔ་བར་བཞུགས་ངེས་ཡིན་པ་ལྟར་བོད་མི་ཚོའི་ངོས་ནས་ཀྱང་ཧུར་ཐག་གནང་རོགས་ཞེས་བཀའ་སྩལ་མཛད་ཡོད།
དེ་རིང་མཇལ་ཁའི་ཐོག་ཉེ་ཆར་བཞུགས་སྒར་དུ་ཚོགས་པའི་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་སྐབས་ལྔ་པའི་རྒྱལ་ཡོངས་ཚོགས་ཆེན་ཐོག་བཅར་བའི་ཚོགས་མི་རྣམས་ཀྱང་ལྷན་ཞུགས་གནང་ཡོད་པ་དང་འབྲེལ། མགོན་པོ་༸གང་ཉིད་མཆོག་གིས་དབུ་མའི་ལམ་ཞེས་རྒྱ་ཆེ་ས་ནས་དགོངས་པ་བཞེས་ཚེ་བོད་ཙམ་མིན་པར་རྒྱ་ནག་ལའང་འགྱུར་བ་འགྲོ་ཐབས་དང་། ལྷག་པར་དུ་ང་ཚོས་རང་སྐྱོང་ཞེས་པ་དེ་ཆབ་སྲིད་འཛིན་སྐྱོང་གི་སྐད་ཆ་ཞིག་མིན་པར་བོད་ཆོལ་ཁ་གསུམ་ལ་མིང་དོན་མཚུངས་པའི་རང་སྐྱོང་གི་གནས་བབ་འོག་བོད་ཀྱི་ཐུན་མིན་ཆོས་རིག་དང་ལེགས་བྱང་བཅས་པ་བདག་གཅེས་གནང་རྒྱུའི་ཐོབ་ཐང་བྱུང་རྒྱུ་ཡིན་སྐོར་བཀའ་སྩལ་བ་མ་ཟད། རིམ་པས་ཆོས་རིག་ཐོག་ནས་རྒྱ་ནག་ལ་ཕར་དབང་བསྒྱུར་བྱེད་ཐུབ་པའི་ཐུགས་རེ་ཡོད་པར་བཀའ་སྩལ་མཛད་ཡོད་པ་རེད།
