༸དཔལ་ལྡན་སྟོད་རྒྱུད་སྔགས་རམས་པ་རྒན་དགེ་འདུན་ཚེ་རིང་མཆོག་ཟླ་བ་སྔོན་མའི་ཚེས་ ༡༠ ཉིན་སྔ་དྲོ་ཚོུད་ ༤༌༤༠ ཐོག་བཞུགས་སྒར་ཉེ་འཁྲིས་སུ་ཆགས་པའི་རྒྱུད་སྟོད་གྲྭ་ཚང་གི་རང་ཤག་ཏུ་དགུང་གྲངས་ ༨༧ སྟེང་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པ་དང་འབྲེལ། དགོངས་པ་རྫོགས་པའི་ཉིན་ནས་བཟུང་ཟླ་བ་འདིའི་ཚེས་ ༡༦ བར་ཁྱོན་ཉིན་གྲངས་ ༣༧ རིང་ལ་ཐུགས་དམ་དུ་བཞུགས་འདུག
རྒྱུད་སྟོད་གྲྭ་ཚང་གི་ངོས་ནས་ཟླ་བ་འདིའི་ཚེས་ ༡༧ བར་ཁོང་དགོངས་པ་རྫོགས་པའི་གནད་དོན་དེ་གསང་རྒྱ་གནང་བའི་རྗེས་སུ་ཁ་ཉིན་ཚེས་ ༡༩ ཉིན་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་ཆོ་གའི་སྒོ་ནས་སྐུ་ཕུང་ཞུགས་འབུལ་དང་སྨོན་ལམ་གསུང་དོན་གནང་འདུག
༸དཔལ་ལྡན་སྟོད་རྒྱུད་སྔགས་རམས་པ་རྒན་དགེ་འདུན་ཚེ་རིང་དམ་པ་མཆོག་ཟླ་བ་སྔོན་མའི་ཚེས་ ༡༠ ཉིན་དགོངས་པ་རྫོགས་རྗེས་ཐུགས་དམ་ལ་བཞུགས་ནས་ཉིན་གྲངས་ ༣༧ སོང་མཚམས་སུ་སྐུ་ཕུང་ལ་དྲི་མ་ཅུང་ཙམ་སླེབས་པ་དང་ཕྱི་ཉིན་དེར་སྐུ་གཟུགས་ལ་དྲི་མ་སྔར་ལས་མང་དུ་ཕྱིན་པར་བརྟེན་ཐུགས་དམ་གྲོལ་བར་ངོས་འཛིན་གནང་སྟེ། ཟླ་བ་འདིའི་ཚེས་ ༡༩ སྟེ་ཁ་ཉིན་རེས་གཟའ་ཟླ་བའི་ཉིན་གྱི་སྔ་དྲོར་རྒྱུད་སྟོད་གྲྭ་ཚང་གི་༸སྐྱབས་རྗེ་མཁན་བླ་རྣམ་གཉིས་དབུ་བཞུགས་ཀྱིས་འདུས་མང་ཡོངས་ནས་༸དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་ཆོ་གའི་སྒོ་ནས་སྐུ་ཕུང་ཞུགས་འབུལ་གནང་ཡོད་པ་རེད།
༸དཔལ་ལྡན་སྟོད་རྒྱུད་གྲྭ་ཚང་གི་བླ་མ་དབུ་མཛད་གངས་དཀར་རིན་པོ་ཆེ་མཆོག་གིས་སྔགས་རམས་པ་རྒན་དགེ་འདུན་ཚེ་རིང་དམ་པ་ཁོང་དགོངས་པ་གཤེགས་ཚུལ་དང་༸སྐུ་ཚེའི་མཛད་རྗེས་སོགས་ཀྱི་ཐོག་ངོ་སྤྲོད་གནང་བ་ཞིག་གནང་བ་ཞིག་གཤམ་དུ་གསན་རོགས་གནང་། 
གཞི་རྩའི་༸དཔལ་ལྡན་སྟོད་རྒྱུད་སྔགས་རམས་པ་རྒན་དགེ་འདུན་ཚེ་རིང་མཆོག་ནི། མདོ་སྟོད་སྨར་ཁམས་སུ་ཕྱི་ལོ་ ༡༩༣༥ ལོར་སྐུ་འཁྲུངས་ཤིང་། དགུང་གྲངས་ ༡༡ ལ་དཔལ་ལྡན་ཀླུ་རྭ་དགོན་པའི་སྒྲིག་ཁོངས་སུ་ཞུགས་ཏེ་དགེ་བའི་བཤེས་གཉེན་བྱམས་པ་རིན་པོ་ཆེ་ལས་དགེ་ཚུལ་གྱི་སྡོམ་པ་བཞེས། དགུང་གྲངས་༡༩ ལ་འབྲས་བློ་གླིང་གྲྭ་ཚང་དུ་ཞུགས་ཏེ་སློབ་གཉེར་མཛད། དེ་ནས་དཔལ་ལྡན་རྒྱུད་སྟོད་གྲྭ་ཚང་དུ་སྒྲིག་ཞུགས་གནང་སྟེ་དགེ་བའི་བཤེས་གཉེན་དུ་མའི་དྲུང་ནས་མཐོང་བརྒྱུད་ཀྱི་ཕྱག་བཞེས་བཟང་པོ་གྲྭ་ཚང་གི་ཆོ་ག་ཕྱག་ལེན། ཐིག་རྡུལ་ཚོན། མཆོད་བཟོ་དཀར་རྒྱན་བཅས་ལ་སྦྱངས་པ་མཐིལ་ཕྱིན་གནང་རྗེས། དགུང་གྲངས་ ༢༡ ལ་༸སྐུའི་ཡོངས་འཛིན་༸སྐྱབས་རྗེ་གླིང་སྤྲུལ་རྡོ་རྗེ་འཆང་ཆེན་པོའི་ཞལ་སྔ་ནས་བསྙེན་རྫོགས་ཀྱི་སྡོམ་པ་བཞེས་གནང་ཡོད། 
ཕྱི་ལོ་ ༡༩༥༩ ལོར་དུས་འགྱུར་དབང་གིས་རྒྱ་གར་དུ་ཕེབས་རྗེས། ཐོག་མར་ཌལ་ཧོར་དང་། དེ་ནས་བསྟན་འཛིན་སྒང། དྷ་རམ་ས་ལ་བཅས་སུ་གལ་ཆེའི་ལས་འགན་མང་དག་ཅིག་བཞེས་པ་དང་། ལྷག་པར་རྒྱུད་ཆེན་གོང་མའི་ཕྱག་བཞེས་ཀྱི་རྒྱུན་བཟང་པོ་ཡི་དམ་གསང་བདེ་འཇིགས་གསུམ་གྱི་སྒྲུབ་མཆོད་ཀྱི་རིམ་པ་གཙོས་པའི་མཆོད་བཟོ་དཀར་རྒྱན་སོགས་རང་ཉིད་ཀྱིས་ཉམས་འོག་ཏུ་ཆུད་པའི་སྒོ་ནས་གདན་ས་ཆེན་མོ་ནས་ཕེབས་པའི་ཆོས་ཐོག་དགེ་བཤེས་རྣམ་པ་དང་། རྒྱུད་པའི་སྐྱེད་རིམ་པ་རྣམས་ལ་འཆད་ཁྲིད་རྒྱ་ཆེར་གནང་ཡོད་པ་རེད།
དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་དང་༸སྐུའི་ཡོངས་འཛིན་རྣམ་གཉིས་གཙོས་གྲྭ་ཚང་གི་མཁན་ལས་ཟུར་དུ་མའི་དྲུང་ནས་རྒྱུད་ཀྱི་འཆད་ཉན་དང་། དབང་ལུང་མན་ངག་གི་རྒྱུན་བཟང་པོ་རྣམས་ཆད་ལུས་མེད་པ་གསན་བཞེས་མཛད་པ་མ་ཟད། ཐུགས་དམ་ཉམས་བཞེས་ལ་རྟག་ཏུ་གཞོལ་བར་མཛད་པ་དང་། དྷ་སར་གནས་སྤོས་ཟིན་རྗེས་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་གཞི་བསྙེན་ཆེན་མོ་ཡང་བཞུགས་ཡོད་པ་རེད།
དེ་བཞིན་ཁོང་གིས་རྒྱུད་སྟོད་གྲྭ་ཚང་གི་འགྲོ་ཁུངས་དང་། ཆོས་འབྱུང་། མཆོད་དཔེ་སོགས་གསར་སྒྲྲིག་དང་བསྐྱར་ཞིབ་སོགས་ལས་གཞི་རིམ་པ་མང་པོའི་ནང་ཐུགས་ཁུར་བཞེས་གནང་བ་དང་། དམ་པ་ཁོང་གིས་༸སྐུ་ཚེ་ཧྲིལ་པོར་སྟོད་རྒྱུད་གྲྭ་ཚང་ལ་ཐུགས་བརྩེ་ཆེན་པོས་རྨད་དུ་བྱུང་བའི་ལེགས་སྐྱེས་འཇོག་གནང་བར་བརྟེན། འདི་ལོའི་ཕྱི་ཟླ་ ༡ ཚེས་ ༡༤ ཉིན་༸དཔལ་ལྡན་རྒྱུད་སྟོད་གྲྭ་ཚང་ནས་བཀའ་དྲིན་རྗེས་དྲན་གྱི་ཚུལ་དུ་དགེ་རྒན་ཆེན་མོའི་མཚན་བསྟོད་གཟེངས་རྟགས་འབུལ་ལམ་ཞུས་འདུག
