ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ David Sweet ལགས་ཀྱིས་ཡུལ་དེའི་གྲོས་ཚོགས་འོག་མའི་ནང་ཁེ་ན་ཌ་གཞུང་ནས་བོད་ཀྱི་གནད་དོན་གསལ་ཆེད་གྲོས་མོལ་ཡོང་རྒྱུར་བཟང་ཕྱོགས་ཀྱི་རེ་བ་ཙམ་གནང་ནས་མ་བཞུགས་པར་དེ་སྔ་ལས་ལྷག་པའི་བོད་དོན་ཐོག་རྒྱབ་སྐྱོར་གྱི་ལས་འགུལ་ཤུགས་ཆེ་ཙམ་སྤེལ་དགོས་པའི་རེ་འདུན་ཤུགས་ཆེ་བཏོན་འདུག
ཟླ་བ་འདིའི་ཕྱི་ཚེས་ ༢༥ ཉིན་ཁེ་ན་ཌའི་གྲོས་ཚོགས་འོག་མའི་ནང་རྒྱ་ནག་དང་ཁེ་ན་ཌའི་འབྲེལ་ལམ་སྐོར་གྱི་དམིགས་བསལ་ལྷན་ཚོགས་ཐོག་ས་གནས་ཀྱི་རྙིང་ཞེན་ཆབ་སྲིད་ཚོགས་པའི་གྲོས་ཚོགས་འཐུས་མི་སྐུ་ཞབས་ David Sweet ལགས་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིང་གིས་འགོ་ཁྲིད་པའི་དམར་ཤོག་ཚོགས་པས་ད་བར་རྒྱ་ནག་ནང་གི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་འཚབས་ཆེན་བཏང་དང་གཏོང་བཞིན་པ་མ་ཟད། བོད་མི་དང་ཤར་ཏུར་ཀི་སི་ཐན་། ཤིན་ཅང་ཡུ་གུར་མི་རིགས་རྣམས་ཀྱི་ཐོག་ཚད་ལས་འགལ་བའི་དྲག་གནོན་བྱེད་མུས་ཡིན་པའི་གནས་སྟངས་སོགས་ལུང་འདྲེན་གནང་སྟེ་ཁེ་ན་ཌ་འདི་འཛམ་གླིང་ནང་མང་གཙོའི་རིང་ལུགས་སྣེ་འཁྲིད་གནང་མཁན་གྱི་རྒྱལ་ཁབ་ཅིག་ཡིན་པའི་ངོས་ནས་ངེས་པར་དུ་གྲངས་ཉུང་མི་རིགས་རྣམས་ཀྱི་རང་དབང་དང་མང་གཙོ། འགྲོ་བ་མིའི་ཐོབ་ཐང་སྲུང་སྐྱོབ་བྱེད་གནང་དགོས་པའི་འབོད་སྐུལ་ཤུགས་ཆེ་གནང་འདུག
ལྷག་པར་དུ་ཁོང་གིས་བོད་མི་ནི་རྒྱ་གཞུང་གི་དྲག་གནོན་འོག་དཀའ་སྡུག་མང་ཤོས་མྱངས་དང་མྱོང་མཁན་མི་རིགས་ཤིག་ཆགས་ཀྱི་ཡོད་པར་མ་ཟད། ད་བར་བོད་ནང་རང་ལུས་མེར་བསྲེགས་གནང་བའི་གནད་དོན་ ༡༥༤ ཙམ་བྱུང་ཡོད་པ་དེ་ནི་གཙོ་བོ་རྒྱ་གཞུང་གིས་བོད་མིའི་ཐོག་མི་སྤྱོད་ལས་འདས་པའི་དམ་དྲག་ཤུགས་ཆེ་བྱེད་བཞིན་སོགས་ལ་བརྟེན་ནས་ཡིན་སྟབས་ཁེ་ན་ཌ་གཞུང་ནས་རྒྱ་གཞུང་གི་དྲག་གནོན་དང་དམ་དྲག་གི་བྱེད་བབ་དེར་བཟོད་མེད་ཀྱིས་སྐྱོན་བརྗོད་གནང་མ་ཐུབ་པར་དེ་མུར་བཞུགས་དོན་གང་ཡིན་ནམ་ཞེས་འདྲི་རྩད་གནང་འདུག
སྐུ་ཞབས་ཁོང་གིས་རྒྱལ་སྤྱིའི་མང་གཙོའི་རྒྱལ་ཁབ་ཚང་མས་རང་དབང་དང་མང་གཙོ། འགྲོ་བ་མིའི་ཐོབ་ཐང་གི་གནད་དོན་དེ་དག་གལ་ཆེས་ཆེར་གུས་བརྩི་ཞུས་ཏེ་སྲུང་སྐྱོབ་ཐུབ་པར་རྒྱབ་སྐྱོར་གནང་དགོས་ཞེས་གསུངས་འདུག
རྩ་བའི་སྐུ་ཞབས་ David Sweet ལགས་ནི་བོད་དོན་ལ་ཡུན་རིང་ནས་རྒྱབ་སྐྱོར་གནང་མཁན་གྱི་གྲོས་ཚོགས་འཐུས་མི་ཞིག་དང་ལྷག་དོན་རྒྱལ་སྤྱིའི་འགྲོ་བ་མིའི་ཐོག་ཐང་གི་ཚོགས་ཆུང་ཐོག་བོད་ཀྱི་ཚོར་བ་རྣོ་བའི་གནད་དོན་ཁག་ལ་ཞལ་གསང་པོས་གླེང་སློང་གནང་མཁན་གཙོ་གྲས་ཤིག་ཡིན་པ་རེད།
