རྒྱ་གཞུང་གིས་བོད་མདོ་སྨད་རྔ་པ་ནས་ཡིན་པའི་གཞས་པ་པདྨ་འཕྲིན་ལས་ལགས་དང་ཕྱག་རྡོར་ལགས་རྣམ་པ་གཉིས་ལོ་བཞིའི་རིང་གི་བཙོན་འཇུག་དུས་ཡུན་ཚང་རྗེས་བཙོན་གྲོལ
་བཏང་འདུག
རྩ་བའི་གཞས་པ་པདྨ་འཕྲིན་ལས་ལགས་དང་ཕྱག་རྡོར་གཉིས་ཀྱིས་ཕྱི་ལོ་ ༢༠༡༢ ཟླ་ ༧ ཡས་མས་ཙམ་ནས་༸གོང་ས་མཆོག་དང་༸པཎ་ཆེན་རིན་པོ་ཆེ། དེ་བཞིན་བོད་ཀྱི་རང་དབང་སླད་དུ་སྐུ་ལུས་ཞུགས་འབུལ་གནང་མཁན་ཚོར་བསྟོད་གླུ་ཕུལ་བའི་ཆེད་སྒྲིག་གི་འོད་སྡེར་འགྲེམས་སྤེལ་གནང་པར་བརྟེན། རྒྱ་གཞུང་གིས་ཁོང་གཉིས་རྨ་ཆུ་རྫོང་ཐོག་ནས་འཛིན་བཟུང་གིས་ཟླ་བ་དྲུག་ལྷག་རིང་རྔ་བ་རྫོང་དུ་བཀག་བསྐྱིལ་བྱས་རྗེས། ལོ་བཞིའི་རིང་བཙོན་ཁང་ནང་བཞུགས་དགོས་བྱུང་ཡོད་པ་རེད།
འདི་ག་རླུང་འཕྲིན་ཁང་ལ་སུད་སིར་བཞུགས་པའི་བསོད་ནམས་ལགས་ཀྱིས་གནས་ཚུལ་
འགྲེལ་བརྗོད་གནང་པར་གཞིགས་ན། གཞས་པ་པདྨ་འཕྲིན་ལས་ལགས་དང་ཕྱག་རྡོར་ལགས་རྣམ་གཉིས་ཁ་ནུབ་ཙམ་ལ་བཙོན་གྲོལ་ཐོབ་སྟེ་རང་གི་ཕ་ཡུལ་དུ་འབྱོར་ཡོད་པ་ཙམ་ལས་གཟུགས་གཞིའི་གནས་སྟངས་ཇི་ཡོད་སྐོར་སོགས་ཞིབ་ཕྲའི་ཁ་གསལ་མིན་འདུག
གཞི་རྩའི་གཞས་པ་ཁོང་རྣམ་གཉིས་བོད་མདོ་སྨད་རྔ་བ་རྨེའུ་རུ་མའི་རུ་ཆེན་དང་པོའི་ཡུལ་མི་ཡིན་པ་དང་། གླུ་བ་པདྨ་འཕྲིན་ལས་ལགས་རང་ལོ་ ༢༢ ཡིན་ཞིང་ཕ་མིང་ལ་འཛམ་ལྷ་དང་མ་མིང་ལ་ཚེ་རིས་མ་ཡིན་འདུག དེ་བཞིན་གླུ་བ་ཕྱག་རྡོར་ལགས་ནི་རང་ལོ་ ༣༢ ཡིན་ཞིང་ཕ་མིང་ལ་མཆོག་ལྡན་མདོ་བ་ཡིན་པ་དང་རྒྱལ་གཅེས་པ་གཅོད་པ་ལགས་ཀྱི་སྤུན་མཆེད་རེད་འདུག
