CECC ཞེས་པའི་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གིས་ཁ་སང་དེང་གི་རྒྱ་ནག་ནང་དུ་གྲངས་ཉུང་མི་རིགས་ཀྱི་སྐད་ཡིག་དང་མི་རིགས་ཀྱི་ངོ་བོ་སྲུང་སྐྱོབ་ཐོག་དམ་དྲག་ཇེ་ཆེར་གཏོང་བཞིན་པའི་སྐོར་ལ་ཉན་ཞིབ་ལས་རིམ་ཞིག་ཚོགས་ཡོད་པ་དང་དེའི་ཐོག་བོད་དོན་ལས་འགུལ་བསྟི་གནས་ཁང་གི་འགན་འཛིན་བཀྲས་མཐོང་ལྷག་སྒྲོན་ལགས་དང་རྒྱལ་སྤྱིའི་སྐད་ཡིག་རང་དབང་མཐུན་འབྲེལ་ཚོགས་པའི་ཚོགས་གཙོ་དང་ཉམས་ཞིབ་པ་ Gerald Roche ལགས། དེ་བཞིན་ནང་སོག་འགྲོ་བ་མིའི་ཐོབ་ཐང་ཚོགས་པའི་གཙོ་འཛིན་ Enghebatu Togochog ལགས། ཡུ་གུར་ཆབ་སྲིད་བཙོན་ཟུར་དང་སྐད་ཡིག་ལས་འགུལ་བ་ Abduweli Ayup ལགས་བཅས་ནས་མཉམ་ཞུགས་གནང་སྟེ་རྒྱ་ནག་གཞུང་གིས་གྲངས་ཉུང་མི་རིགས་ཀྱི་སྐད་ཡིག་རྩ་མེད་བཏང་དང་གཏོང་བཞིན་པར་གང་གནང་དགོས་མིན་གྱི་དགོས་འདུན་ཆེད་བཏོན་གནང་བ་མ་ཟད། གྲོས་ཚོགས་འཐུས་མིའི་བཀའ་འདྲི་ཁག་ལ་ལན་འདེབས་གནང་འདུག
ཁ་སང་ CECC ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་ Jeff Merkley ལགས་ཀྱིས་གཙོ་སྐྱོང་གནང་སྟེ་དྲ་རྒྱ་བརྒྱུད་ཚོགས་པའི་ལས་རིམ་ཐོག་ CECC ཚོགས་གཙོ་གཞན་གྲོས་ཚོགས་འཐུས་མི་ Jim Mcgovern ལགས་དང་གྲོས་ཚོགས་འཐུས་མི་གཞན་གཉིས་ནས་མཉམ་ཞུགས་གནང་འདུག
བོད་དོན་ལས་འགུལ་བསྟི་གནས་ཁང་གི་འགན་འཛིན་བཀྲས་མཐོང་ལྷག་སྒྲོན་ལགས་ཀྱིས། སྔ་ལོར་བསྟི་གནས་ཁང་གིས་རྒྱ་གཞུང་ནས་བོད་ནང་མི་རིགས་མཉམ་བསྲེས་ཀྱི་སྲིད་བྱུས་འོག་བོད་ཕྲུག་བརྒྱ་ཆ་ ༧༠ ལྷག་བཙན་དབང་ཐོག་དབང་བསྒྱུར་ལམ་ལུགས་ཀྱི་བཅའ་སྡོད་སློབ་གྲྭར་བཏང་སྟེ་བོད་ཀྱི་སྐད་ཡིག་དང་རིག་གཞུང་སོགས་གང་ཡང་མི་ཤེས་པའི་མི་རབས་ཤིག་བཟོ་ཐབས་བྱེད་བཞིན་སྐོར་མངོན་གསལ་གནང་བའི་སྙན་ཐོ་ལུང་འདྲེན་དང་སྦྲགས། ཁོང་གིས་སྙན་ཐོར་ཞིབ་འཇུག་གནང་སྐབས་རྒྱ་ནག་གཞུང་གིས་ལོ་ ༦ ནས་ ༡༨ བར་གྱི་བོད་ཕྲུག་ཁྱོན་བརྒྱ་ཆ་ ༨༠ ཙམ་དབང་བསྒྱུར་ལམ་ལུགས་ཀྱི་བཅའ་སྡོད་སློབ་གྲྭར་བཞག་ནས་བོད་པའི་སྐད་ཡིག་དང་ཆོས། རིག་གཞུང་བཅས་དང་འབྲེལ་བ་མེད་པའི་མི་རབས་ཤིག་བཟོ་ཐབས་བྱེད་བཞིན་པ་སོགས་ཀྱི་གནས་སྟངས་ཤེས་སྐབས་ཧང་སང་བའི་མྱོང་ཚོར་ཞིག་བྱུང་ཡོད་པ་གསུངས་འདུག
ཁོང་གིས་ད་དུང་རྒྱ་ནག་གཞུང་གིས་དབང་བསྒྱུར་ལམ་ལུགས་ཀྱི་བཅའ་སྡོད་སློབ་གྲྭར་གཏོང་དགོས་པའི་བཙན་བཀའ་བཏང་བར་ངོས་ལེན་མ་གནང་མཁན་གྱི་ཕྲུ་གུའི་ཕ་མ་ཚོར་ཉེན་བརྡ་དང་འཇིགས་སྐུལ་སོགས་ཀྱིས་སུན་གཙེར་ཤུགས་ཆེར་བཟོ་བཞིན་པ་དང་། ཐ་ན་ཕྲུ་གུ་ལོ་ན་ ༤ ནས་ ༦ བར་གྱི་སློབ་ཕྲུག་གཏོང་དགོས་སྟབས། ཕྲུ་གུ་རྣམས་ཕ་མ་དང་ཁ་བྲལ་བའི་སྡུག་བསྔལ་བཟོད་དཀའ་བའི་ངུ་འབོད་དང་ཕ་མའི་ངོས་ནས་ཀྱང་བུ་ཕྲུག་བློས་གཏོང་མ་ཐུབ་པའི་ངལ་བ་ཆེས་ཆེར་འཕྲད་པ་ལ་སོགས་པའི་གནས་སྟངས་ཁག་ཅིག་ཤེས་རྟོགས་བྱུང་བ་སྙན་སེང་གིས་དེང་སྐབས་ཨ་རི་དང་ཁེ་ན་ཊ། དེ་བཞིན་ཨོ་གླིང་བཅས་ནས་དེ་སྔ་དེ་གའི་གདོད་མའི་མི་རིགས་ཐོག་གཉའ་གནོན་ཤུགས་ཆེར་བཏང་བའི་འོག་གདོད་མའི་མི་རིགས་ཀྱི་ཕྲུ་གུ་རྣམས་བཅའ་སྡོད་སློབ་གྲྭར་བཞག་པའི་གནད་དོན་དེ་དག་ཐད་ལ་གཞུང་དང་སྤྱི་ཚོགས་ནས་མཐའ་གཅིག་ཏུ་ནོར་འཁྲུལ་ཡིན་པ་ངོས་ལེན་གྱིས་དགོངས་སེལ་ཞུ་བཞིན་པའི་དུས་སྐབས་འདིར་རྒྱ་ནག་གིས་གཞི་རྒྱ་ཆེན་པོའི་ཐོག་ནས་བོད་མི་རིགས་རྩ་མེད་ཀྱི་སྲིད་བྱུས་སྤེལ་བཞིན་ཡོད་པ་སོགས་སྙན་སེང་ཞུས་འདུག
དེ་བཞིན་ཁོང་གིས་ཉེ་ཆར་ཟླ་བ་སྔོན་མའི་ཚེས་༢༥ཉིན་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏྭ་ལའི་མདུན་དུ་རང་ལུས་མེར་བསྲེགས་རྐྱེན་གྱིས་འདས་གྲོངས་སུ་གྱུར་མཁན་བོད་ཀྱི་གཞས་པ་གྲགས་ཅན་ཚེ་དབང་ནོར་བུ་ལགས་ཀྱི་གནད་དོན་ལུང་འདྲེན་དང་སྦྲགས། གནད་དོན་དེས་རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་ལག་བསྟར་ལ་མ་ལྟོས་པར་བོད་མི་རབས་ནས་མི་རབས་བར་དུ་བོད་རྒྱལ་ཁབ་དང་བོད་ཀྱི་སྐད་ཡིག རིག་གཞུང་། ༸གོང་ས་མཆོག་མ་གཏོགས་བསམ་རྒྱུ་མེད་པ་མངོན་གསལ་གནང་གི་ཡོད་པ་སོགས་གསུངས་ཏེ། བོད་མིའི་འཐབ་རྩོད་རང་དབང་ལ་དགའ་བའི་རྒྱལ་སྤྱིའི་སྤྱི་ཚོགས་ནས་རྒྱབ་སྐྱོར་དགོས་གནད་ཡིན་པ་གསུངས་འདུག
དེ་བཞིན་ཁ་སང་གི་ལས་རིམ་ཐོག་ཡུ་གུར་ལས་འགུལ་བ་ Abduweli Ayup ལགས་དང་ནང་སོག་ལས་འགུལ་བ་ Enghebatu Togochog ལགས་གཉིས་ཀྱིས་རྒྱ་གཞུང་གི་ངོས་ནས་ཡུལ་ལུང་སོ་སོར་མི་རིགས་ཀྱི་ངོ་བོ་རྩ་མེད་བཟོ་ཐབས་ཀྱི་སྲིད་བྱུས་ལག་བསྟར་བརྒྱུད་གཞི་རྒྱ་ཆེ་བའི་ལས་འགུལ་སྤེལ་བཞིན་སྐོར་སོགས་སྙན་སེང་ཞུས་ཡོད།
