བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཁ་སང་སུད་སིའི་ཇི་ནི་ཝ་གྲོང་ཁྱེར་དུ་ཆེད་ཕེབས་དང་འབྲེལ། དེ་རིང་སུད་སི་ནང་གི་ལས་རིམ་ཐོག་མར་ཇི་ནི་ཝའི་གླེང་སྟེགས་ཐོག་དབུ་བཞུགས་གནང་སྟེ་བོད་མིའི་སྒྲིག་འཛུགས་ཀྱི་ངོས་ནས་རྒྱ་ནག་དང་ཞི་བའི་གྲོས་མོལ་བརྒྱུད་གཉིས་སྨན་དབུ་མའི་ལམ་གྱི་ཐོག་ནས་བོད་ཀྱི་གནད་དོན་སེལ་རྒྱུར་མུ་མཐུད་ཆོད་སེམས་བརྟན་པོ་ཡོད་པ་དང་རྒྱ་ནག་གཞུང་ནས་དེ་ལྟར་མ་གནང་བར་དུ་བཙན་བྱོལ་བོད་མི་རྣམས་ཀྱིས་བོད་མི་ཙམ་མ་ཡིན་པར་རྒྱ་ནག་གི་དབང་བསྒྱུར་འོག་ཡོད་པའི་ཤིན་ཅང་དང་ལྷོ་སོག ཧོང་ཀོང་། ཐེ་ཝན་སོགས་ཀྱི་ཛ་དྲག་གནད་དོན་འཛམ་གླིང་ལ་དྲིལ་བསྒྲགས་མུ་མཐུད་ནས་གནང་ངེས་ཡིན་པར་མ་ཟད་ལྷག་དོན་རྒྱ་ནག་གིས་གང་བཤད་ཀྱང་མགོ་བོ་སྒུར་ནས་ཁ་ཁུ་སིམ་པོར་རྩ་བ་ཉིད་ནས་བསྡད་ཐབས་མེད་ཅེས་གསུངས་འདུག
བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་ཇི་ནི་ཝ་སྐུ་ཚབ་དོན་ཁང་གཉིས་ཟུང་སྦྲེལ་གྱིས་གོ་སྒྲིག་ཞུས་ཏེ་དེ་རིང་ཕྱི་ཟླ་ ༡༡ ཚེས་ ༡ དང་སང་ཚེས་ ༢ བཅས་ཉིན་གྲངས་གཉིས་རིང་སུད་སི་གྲོང་ཁྱེར་ཇི་ནི་ཝར་ Geneva Forum འམ་ཇི་ནི་ཝ་བོད་དོན་གླེང་སྟེགས་ ༢༠༢༡ ཞེས་པ་དབུ་འཛུགས་གནང་ཡོད་པ་དང་ཐེངས་འདིའི་གླེང་སྟེགས་གྱི་བརྗོད་གཞི་གཙོ་བོ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབང་བསྒྱུར་འོག་ཡོད་པའི་ས་ཁུལ་ཁག་གི་དཔལ་འབྱོར་དང་སྤྱི་ཚོགས། རིག་གཞུང་བཅས་ཀྱི་རང་དབང་ཁག་རྡོག་རོལ་ཞེས་པ་དེ་ཡིན་པ་རེད།
དེ་རིང་གླེང་སྟེགས་དབུ་འབྱེད་ཀྱི་མཛད་སྒོར་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་སྐུ་མགྲོན་གཙོ་བོར་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་ Jiri Oberfalzer མཆོག དམིགས་བསམ་སྐུ་མགྲོན་དུ་སུད་སིའི་གྲོས་ཚོགས་འཐུས་མི་ Nicolas Walder ལགས། ཧང་གྷ་རིའི་རྒྱལ་ས་ Budapest གྱི་རྫོང་དང་པོའི་གྲོང་ཁྱེར་སྤྱི་ཁྱབ་པ་ Geleneser Ferenc ལགས་བཅས་ཆེད་ཕེབས་གནང་འདུག
སྲིད་སྐྱོང་སྤེན་པ་ཚེ་རིང་མཆོག་གིས་ཚོགས་འདུ་དབུ་འབྱེད་ཀྱི་གསུང་བཤད་ཁྲོད་ཐོག་མར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་ཕྱག་སྔོན་དུ་བཏང་བ་དང་། བོད་ནང་རྒྱ་ནག་གི་དཀའ་སྡུག་འོག་སྡུག་སྦྱོང་མནར་གཅོད་མྱོང་བཞིན་པའི་བོད་མི་རྣམས་ལ་གདུང་སེམས་མཉམ་བསྐྱེད་ཞུས་པ་དང་འབྲེལ། མཉམ་འབྲེལ་རྒྱལ་ཚོགས་ནང་དེ་སྔ་བོད་ཀྱི་གནད་དོན་ཐོག་གྲོས་ཆོད་ཁག་ཅིག་བཞག་ཐུབ་ཡོད་ཀྱང་གྲོས་ཆོད་ཀྱི་ནང་དོན་ཁག་ལག་བསྟར་དོན་འཁྱོལ་རྩ་བ་ཉིད་ནས་བྱུང་མེད་པར་མ་ཟད། དེང་གི་དུས་འདིར་མཉམ་འབྲེལ་རྒྱལ་ཚོགས་ཞེས་པའི་སྒྲིག་འཛུགས་ཀྱི་ད་ལྟའི་སྒྲོམ་གཞི་དང་གནས་བབས་ལ་མང་ཚོགས་དུ་མས་ཡིད་ཆེས་བློ་འགེལ་གནང་གི་མེད་པའི་ཁྲོད་འདིར་སྲིད་སྐྱོང་མཆོག་སྐུ་ཉིད་ད་རེས་ཚོགས་འདུར་ཐུགས་ཕམ་རང་བཞིན་གྱི་ཐུགས་ཚོར་ཞིག་གི་ཐོག་ནས་ཆེད་བཅར་གནང་ཡོད་ཀྱང་། ཚོགས་འདུའི་ཐོག་ཆེས་གུས་བརྩི་ཡོད་པའི་སྐུ་མགྲོན་དང་ཆེད་ལས་པ། དེ་བཞིན་གཞོན་སྐྱེས་མང་དག་ཅིག་བོད་ཙམ་མ་ཡིན་པར་རྒྱ་ནག་གི་དབང་བསྒྱུར་འོག་དཀའ་སྡུག་མྱོང་བཞིན་པ་ཚང་མའི་ཆེད་དུ་ཕེབས་པ་མཇལ་སྐབས་སྲིད་སྐྱོང་མཆོག་ལ་སེམས་འགུལ་འཕར་མ་ཞིག་ཐེབས་ཡོད་པར་འགྲེལ་བརྗོད་གནང་ཡོད།
སྲིད་སྐྱོང་མཆོག་གིས་སྐབས་དེར་ལོ་རྒྱུས་ཁྲོད་བོད་རང་བཙན་གྱི་གནས་བབས་ཞིབ་ཕྲ་ངོ་སྤྲོད་གནང་བ་དང་འབྲེལ་ཏེ་བོད་རྒྱའི་གནད་དོན་གཙོས་རྩོད་རྙོག་གང་འདྲ་ཞིག་འཕྲད་ཀྱང་དེ་སེལ་ཐབས་སུ་འཚེ་མེད་ཞི་བའི་ཐབས་ལམ་ལས་གཞན་པའི་ཐབས་ལམ་ཞིག་རྩ་བ་ཉིད་ནས་མེད་པ་ལྟར་བོད་མིའི་ངོས་ནས་རྒྱ་ནག་ལ་མུ་མཐུད་འབྲེལ་གཏུག་བརྒྱུད་གཉིས་སྨན་དབུ་མའི་ལམ་གྱི་ཐབས་ལམ་བརྒྱུད་ཕན་ཚུན་དབར་ཞི་བའི་གྲོས་མོལ་ཐོག་དཀའ་རྙོག་སེལ་ཐབས་གནང་རྒྱུ་དང་། དེ་ལྟ་བུའི་གནས་སྟངས་ཤིག་མ་འབྱུང་བར་དུ་བོད་མི་ངོས་ནས་བོད་ནང་གི་ཛ་དྲག་གནད་དོན་རྒྱལ་སྤྱིའི་ཁྲོད་མངོན་གསལ་དང་གསལ་བཟོ་གནང་རྒྱུར་འཛེམ་ཟོན་རྩ་བ་ནས་གནང་རྒྱུ་མིན་ལ། ཤིན་ཅང་དང་། ལྷོ་སོག ཧོང་ཀོང། དེ་བཞིན་ཐེ་ཝན་སོགས་ཀྱི་དངོས་ཡོད་གནས་ཚུལ་གང་ཡིན་གླེང་ངེས་ཡིན་པར་མ་ཟད་དུས་ནམ་ཡང་རྒྱ་ནག་གི་གནོན་ཤུགས་འོག་མགོ་བོ་སྒུར་ནས་ཁ་ཁུ་སིམ་པོར་བསྡད་རྒྱུ་མིན་ཞེས་ནན་པོ་གསུངས་སོང་།
སྲིད་སྐྱོང་མཆོག་གིས་གཞན་ཡང་ཐེངས་འདིའི་གླེང་སྟེགས་ཀྱི་གོ་སྐབས་དང་བསྟུན་ Scotland གྱི་ Glasgow གྲོང་ཁྱེར་དུ་འཚོགས་བཞིན་པའི་རྒྱལ་སྤྱིའི་གནམ་གཤིས་འགྱུར་ལྡོག་གི་ལྷན་ཚོགས་ཐོག་འཛམ་གླིང་གི་སྣེ་མོ་གསུམ་པར་གྲགས་པའི་བོད་མཐོ་སྒང་གི་གནད་དོན་གླེང་དགོས་པའི་ཞུ་འབོད་གནང་བར་མ་ཟད། དེ་སྔ་ཕྱི་ལོ་ ༢༠༠༨ ལོར་རྒྱ་ནག་ཨོ་ལམ་པིག་རྩེད་འགྲན་ཚོགས་སྐབས་བོད་མིའི་ངོས་ནས་དེར་རྒྱབ་སྐྱོར་ཞུས་པ་དང་། རྒྱ་ནག་འཛམ་གླིང་ཚོང་ལས་སྒྲིག་འཛུགས་ནང་ཞུགས་ཐབས་བྱས་པའི་སྐབས་སུའང་བོད་མིའི་ངོས་ནས་རྒྱབ་སྐྱོར་ཞུས་ཏེ་རྒྱ་ནག་དེ་ནམ་ཞིག་འགན་འཁུར་ལྡན་པའི་རྒྱལ་ཁབ་ཞིག་ཆགས་ཐུབ་པའི་རེ་བ་གནང་ཡོད་ཀྱང་ད་བར་དེ་ལྟར་རྩ་བ་ཉིད་ནས་བྱུང་མེད་སྟབས། ༢༠༢༢ ལོའི་པེ་ཅིང་དགུན་དུས་ཨོ་ལམ་པིག་རྩེད་འགྲན་ལ་མཉམ་ཞུགས་གནང་མཁན་རྒྱལ་ཁབ་སུ་འདྲ་ཞིག་ནས་དེ་ལྟར་གནང་ཚེ་དེ་ནི་རྒྱ་ནག་གི་ནོར་འཁྲུལ་ཅན་གྱི་དྲག་པོའི་སྲིད་བྱུས་ལ་ངན་སྦྲེལ་ཡོད་པར་ངོས་འཛིན་གནང་རྒྱུ་ཡིན་པར་གསུངས་ཡོད།
ཕྱོགས་མཚུངས་རྒྱ་ནག་ལ་དཔལ་འབྱོར་དང་ཆབ་སྲིད་ཀྱི་སྟོབས་ཤུགས་ཡོད་ཀྱང་བཟང་སྤྱོད་ཐོག་འཛམ་གླིང་སྣེ་ཁྲིད་བྱ་རྒྱུའི་སྟོབས་ཤུགས་མེད་པར་འགྲེལ་བརྗོད་དང་འབྲེལ། ཐེངས་འདིའི་ལྷན་ཚོགས་ཐོག་ཚོགས་བཅར་བ་རྣམས་ཀྱིས་ཕན་ཚུན་བགྲོ་གླེང་ལྷུག་པོ་གནང་སྟེ་གླེང་སྟེགས་ཐོག་མར་གསར་འཛུགས་བའི་གནང་བའི་དམིགས་ཡུལ་གཞིར་བཟུང་ནུས་པ་ལྡན་པའི་ལམ་བུ་ཞིག་ལ་བསྐྱོད་དེ་བོད་དང་ཤིན་ཅང། ཧོང་ཀོང། ཐེ་ཝན་སོགས་ཀྱི་གནད་དོན་རྒྱལ་སྤྱིའི་ཁྲོད་འབུར་ཐོན་བྱེད་ཐུབ་པའི་རེ་བ་ཞུས་པ་མ་ཟད། རྒྱལ་སྤྱིའི་ཚོགས་སྡེ་ཁག་དང་ལྷག་པར་ཡུ་རོབ་མཐུན་ཚོགས་ཀྱི་ངོས་ནས་རྒྱ་ནག་ཐོག་གཅིག་གྱུར་གྱི་ཕྱི་འབྲེལ་སྲིད་བྱུས་དང་ཚོང་འབྲེལ་ཐོག་གཅིག་གྱུར་གྱི་སྲིད་བྱུས་ཟིན་ཐུབ་པའི་རེ་སྐུལ་གནང་ཡོད། 
ཉིན་གཉིས་ཀྱི་ཇི་ནི་ཝའི་གླེང་སྟེགས་ཐོག་སྐུ་མགྲོན་གཙོ་བོ་ཅེཀ་སྤྱི་མཐུན་རྒྱལ་ཁབ་ཀྱི་ཚོགས་གཞོན་སྐུ་ཞབས་ Jiri oberfalzer ལགས་ཀྱིས་ཅེཀ་སྤྱི་མཐུན་རྒྱལ་ཁབ་གཙོས་ཤར་ཡོ་རོབ་ཀྱི་རྒྱལ་ཁབ་ཁག་ཅིག་དེ་བྱུང་གི་ཉམས་མྱོང་ངོ་སྤྲོད་དང་འབྲེལ། མང་གཙོ་ལྡན་པའི་རྒྱལ་ཁབ་ཚོས་ཚོང་འབྲེལ་དང་དཔལ་འབྱོར་གྱི་ཁེ་ཕན་སླད་རྒྱ་ནག་ནང་གི་འགྲོ་བ་མིའི་ཐོབ་ཐང་གི་ཡ་ང་བའི་གནས་སྟངས་ལ་སྡིག་པ་མིག་བཙུམ་གནང་ན་དེ་ནི་ཧ་ཅང་གི་བྱབ་ཆུང་དང་གླེན་རྟགས་ཡིན་པར་འགྲེལ་བརྗོད་གནང་ཡོད། 
དེ་བཞིན་དམིགས་བསལ་སྐུ་མགྲོན་སུད་སིའི་གྲོས་ཚོགས་འཐུས་མི་སྐུ་ཞབས་ nicholaswalderལགས་ཀྱིས་རྒྱ་ནག་སྤྱིའི་འགྲོ་བ་མིིའི་ཐོབ་ཐང་གི་གནད་དོན་དང་བོད་ནང་གི་རང་དབང་རྡོག་རོལ་གྱི་གནད་དོན་ནི་འཛམ་གླིང་སྤྱི་དང་སུད་སི་གཞུང་ལ་ནག་ཐིག་ཞིག་ཏུ་ངོས་འཛིན་གནང་གི་ཡོད་སྐོར་གསུངས་པ་དང་འབྲེལ། སུད་སི་གྲོས་ཚོགས་ཀྱི་ཕྱི་ནང་གཉིས་སུ་ཁོང་གཙོས་བོད་ཀྱི་གྲོགས་པོ་རྣམས་ཀྱིས་བོད་དོན་འཐབ་རྩོད་ལ་སྨན་པའི་རྒྱབ་སྐྱོར་གྱི་ལས་དོན་གང་སྤེལ་སྙན་སེང་ཞུས་པ་དང་། ནུབ་ཕྱོགས་ཀྱི་རྒྱལ་ཁབ་མང་པོ་ཞིག་གིས་རྒྱ་ནག་དམར་ཤོག་གི་རྒྱ་སྐྱེད་རིང་ལུགས་ཀྱི་ཤུགས་རྐྱེན་སྐོར་ལ་གཞི་ནས་གོ་རྟོགས་འཕེལ་ཏེ་རྒྱ་ནག་གི་དཔོན་རིགས་ལ་གཞུང་འབྲེལ་ཉེས་ཆད་སོགས་བཏང་བའི་ལམ་བུར་ཕེབས་བཞིན་པ་ནི་ཤིན་ཏུ་འོས་འཚམས་དང་བཟང་ཕྱོགས་ཀྱི་གནད་དོན་ཞིག་ཡིན་པར་འགྲེལ་བརྗོད་གནང་སོང་། དེ་བཞིན་དམིགས་བསལ་སྐུ་མགྲོན་ Geleneser Ferenc ལགས་ཀྱིས་ཀྱང་ཧང་གྷ་རིའི་ནང་རྒྱ་ནག་གི་ཤུགས་རྐྱེན་སྐོར་འགྲེལ་བརྗོད་དང་འབྲེལ། མེས་མེར་ཁ་གཏད་གཅོག་རྒྱུ་ཞེས་པ་དེ་འོས་འཚམས་མེད་ཀྱང་། རྒྱ་ནག་ལ་ཐུག་སྐབས་རྒྱལ་སྤྱིའི་ཚོགས་སྡེ་ཁག་ནས་དེ་ལྟར་གནང་བ་བརྒྱུད་ནམ་ཞིག་རྒྱ་ནག་ལ་རང་ཉིད་སོ་སོའི་རྒྱལ་ཁབ་ཀྱི་རྩ་ཆེའི་རིན་ཐང་དང་ལེན་བྱེད་ཐུབ་པ་ཞིག་བཟོ་དགོས་སྐོར་གསུངས་འདུག
ཉིན་གཉིས་རིང་གི་ཇི་ནི་ཝའི་གླེང་སྟེགས་ཐོག་སྲིད་སྐྱོང་མཆོག་གཙོས་བོད་མིའི་སྒྲིགས་འཛུགས་ཀྱི་སྐུ་ཚབ་དང་། གསར་འགོད་པ། བོད་དང་རྒྱ་ནག་རིག་པའི་ཁས་དབང། དེ་བཞིན་ཆབ་སྲིད་མི་སྣ་སོགས་གནད་ཡོད་སྐུ་མགྲོན་ཁག་ཅིག་གདན་ཞུ་ཕུལ་བའི་ཐོག་བོད་ནང་རིག་གཞུང་རྩ་གཏོར་གྱི་སྲིད་བྱུས་དང་༸པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གི་གནད་དོན། རྒྱ་ནག་གིས་རང་ཉིད་ཀྱི་རྒྱལ་མཚམས་ལས་འགལ་ནས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་རྡོག་རོལ་བཏང་བའི་གནད་དོན་སོགས་ཀྱི་བརྗོད་གཞི་འདྲ་མིན་ཐོག་བཀའ་བསྡུར་གནང་གི་ཡོད་པ་རེད།
