བོད་ནག་ཆུ་ས་ཁུལ་ཁམས་ཤག་རོང་པོ་ཁུལ་ནས་ཡིན་པ་མཆོག་སྤྲུལ་ཟླ་བ་རིན་པོ་ཆེའི་སྐུ་གདུང་ཞུགས་འབུལ་གནང་སྐབས་རྒྱ་གཞུང་གིས་དགོན་པའི་དགེ་འདུན་པ་མ་གཏོགས་མང་ཚོགས་རྣམས་ཕེབས་མི་ཆོག་པར་བཀག་སྡོམ་བྱས་འདུག 
བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་གཞིགས་ན། ཆབ་སྲིད་བཙོན་ཟུར་གྲགས་ཅན་མཆོག་སྤྲུལ་ཟླ་བ་རིན་པོ་ཆེ་སྐུ་ཕྲེང་ལྔ་པ་༸རྗེ་བཙུན་མཁྱེན་རབ་དབང་ཕྱུག་བསམ་གཏན་བསྟན་པའི་རྒྱལ་མཚན་དཔལ་བཟང་པོ་མཆོག་འདི་ལོའི་ཕྱི་ཟླ་ ༡ ཚེས་ ༣༠ ཉིན་བོད་ནང་གི་ཕྱི་དྲོ་ཕྱག་ཚོད་ ༥༌༡༠ ཙམ་ལ་དགུང་གྲངས་ ༨༦ ཐོག་ལྷ་སའི་གཟིམ་ཤག་ཏུ་དགོངས་པ་ཆོས་དབྱིངས་སུ་ཐིམས་པའི་ཡིད་སྐྱོའི་གནས་ཚུལ་ཐོན་པ་དང་ལྷག་དོན་རིན་པོ་མཆོག་ཉིན་གྲངས་བཅུ་བཞིའི་རིང་ཐུགས་དམ་ལ་བཞུགས་ཡོད་སྐོར་བཀོད་འདུག འོན་ཀྱང་རྒྱ་གཞུང་གིས་གསང་རྒྱ་དམ་པོ་བྱེད་བཞིན་པའི་འོག་ནས་དགོངས་རྫོགས་སྐོར་གནས་ཚུལ་ཕྱིར་བསྒྲགས་མི་ཆོག་པའི་ཉེན་བརྡ་བཏང་བ་མ་ཟད། དྲ་ལམ་ཐོག་དད་ལྡན་པ་རྣམས་ནས་དེ་འབྲེལ་གྱི་པར་རིས་དང་བརྙན་ཐུང་བཞག་པ་ཡོངས་ནག་སུབ་བཏང་འདུག ལྷག་པར་ཕྱི་ཟླ་ ༢ ཚེས་ ༡༣ ཉིན་ཐུགས་དམ་གྲོལ་རྗེས་དད་ལྡན་སེར་སྐྱ་མི་མང་ནས་རྒྱ་གཞུང་གི་ལྟ་སྲུང་ཉེན་རྟོག་པ་དང་འབྲེལ་ཡོད་ལས་བྱེད་ཚོར་སྐུ་གདུང་མཇལ་ཁ་ཞུ་བར་གཏོང་རོགས་ཞེས་རེ་སྐུལ་ཞུས་འདུག་ཀྱང་རྒྱ་གཞུང་གི་ཉེན་རྟོག་པས་ལྷ་སར་གནས་སྡོད་གནང་མཁན་མ་གཏོགས་ས་གནས་གཞན་གྱི་མང་ཚོགས་གཅིག་ཀྱང་ཕེབས་མི་ཆོག་པའི་སྡིག་ར་སྐུལ་བཏང་ཡོད་པ་རེད་འདུག
ཕྱི་ཟླ་ ༢ ཚེས་ ༡༥ ཉིན་སེར་སྐྱ་རྒན་བགྲེས་རེ་ཟུང་ལས་མཇལ་ཁ་བཏང་མེད་པ་དང་མཇལ་ཁ་ལ་ཡོང་མཁན་ཚོ་རླངས་འཁོར་ཐོག་ནས་ཡོང་མི་ཆོག་པ་དང་། ཁ་བཏགས་ཕྱིར་འདོན་མི་ཆོག་པ། ཟིང་སློང་མི་ཆོག་པ། དེ་བཞིན་པར་དང་བརྙན་བླངས་མི་ཆོག་ཅེས་ཀྱི་དོན་ཚན་བཞི་གསལ་བསྒྲགས་སྤེལ་ཡོད་པ་དང་འབྲེལ་ཏེ། མང་ཚོགས་ནས་བྱེད་མི་ཆོག་པའི་དོན་ཚན་བཞི་པོ་དེ་ལག་བསྟར་མ་གནང་ཚེ་འཛིན་བཟུང་བཙོན་འཇུག་བྱེད་ངེས་ཡིན་པ་དང་། དེ་བཞིན་རིན་པོ་ཆེ་མཆོག་གི་སྐུ་གདུང་རོང་པོ་དགོན་དགའ་ལྡན་དར་རྒྱས་གླིང་དུ་གདན་ཞུ་མི་ཆོག་པའི་འཇིགས་སྐུལ་བྱས་འདུག 
ལྷག་པར་ཕྱི་ཚེས་ ༡༨ ཉིན་རྒྱ་གཞུང་གི་ལྟ་སྲུང་ནན་པོའི་འོག་ལྷ་ས་ནས་སྐུ་གདུང་དགའ་ལྡན་དར་རྒྱས་གླིང་དུ་གདན་འདྲེན་ཞུས་པ་དང་སྐབས་དེར་དགོན་པའི་རླངས་འཁོར་གཉིས་མ་གཏོགས་བཏང་མི་ཆོག་པའི་བཀོད་ཁྱབ་བཏང་འདུག སྐུ་གདུང་དགོན་པར་གདན་འདྲེན་ཞུས་པའི་གནས་ཚུལ་དེ་ཡུལ་མི་ཁ་ཤས་ནས་ཤེས་རྟོགས་བྱུང་སྟབས་མི་ཁ་ཤས་དགོན་པར་བཅར་ནས་སྐུ་གདུང་མཇལ་ཁ་ཞུ་རྒྱུ་བྱུང་འདུག་ཀྱང་། རིམ་པས་མི་མང་པོ་ཞིག་དགོན་པར་ཡོང་བར་བརྟེན་སྐུ་གདུང་མཇལ་ཁ་ལ་བཀག་སྡོམ་བྱས་ཡོད་སྟབས། ཉེན་རྟོག་པ་དང་མི་མང་དབར་རྩོད་རྙོག་བྱུང་གྲབས་སྐབས་དགོན་པའི་དགེ་འདུན་པ་ཞིག་གིས་བཀའ་གནང་བ་ལྟར་མི་མང་རྣམས་རང་ཉིད་ཀྱི་གནས་སུ་ཕྱིར་ལོག་གནང་འདུག ཕྱི་ཚེས་ ༢༥ ཉིན་སྐུ་གདུང་ཞུགས་འབུལ་སྐབས་རྒྱ་གཞུང་གིས་བཀོད་ཁྱབ་དམ་པོའི་འོག་དགོན་པར་ཡོད་པའི་དགེ་འདུན་པ་མ་གཏོགས་མང་ཚོགས་གཅིག་ཀྱང་ཡོང་མི་ཆོག་པའི་བཀག་སྡོམ་བྱས་པ་མ་ཟད་སྐུ་གདུང་ཞུགས་འབུལ་སྐབས་ཡོད་པའི་དགེ་འདུན་པ་ཚོའི་ངོས་ནས་པར་ཆས་དང་ཁ་པར་བསྣམ་མི་ཆོག་ཅེས་ཟེར་ནས་ལུས་བཤེར་བཏང་ཡོད་པ་རེད། 
གཞི་རྩའི་མཆོག་སྤྲུལ་ཟླ་བ་རིན་པོ་ཆེ་མཆོག་ཕྱི་ལོ་ ༡༩༣༧ ལོར་ནག་ཆུ་ས་ཁུལ་ཁམས་སྟོད་རུ་གསར་དུ་ཡབ་བཙན་མགོ་ཡང་མགོན་བླ་འགའ་ལགས་དང་ཡུམ་མཚོ་དཀར་ལགས་གཉིས་ཀྱི་སྲས་སུ་འཁྲུངས་ཡོད་པ་དང་། ཕྱི་ལོ་ ༡༩༦༠ ལོར་རྒྱ་ནག་གིས་བོད་ལ་དབང་བསྒྱུར་བྱེད་སྐབས་རྒྱ་ལ་ཁ་གཏད་ལངས་པའི་ཉེས་འཛུགས་ཀྱིས་ཕྱི་ལོ་ ༡༩༦༠ ལོར་དམངས་གཙོ་བཅོས་བསྒྱུར་ཟེར་བའི་སྐབས་སུ་རྒྱ་གཞུང་ནས་འཛིན་བཟུང་དང་། ལན་མང་འཐབ་རྩོད་དང་རྡུང་རྡེག་ཚབ་ཆེན་བཏང་སྟེ་བཙོན་འཇུག་ལོ ༥ དང་། གཞན་ཡང་རིག་གནས་གསར་བརྗེ་སྐབས་ལས་མི་རུ་ཁག་ཟེར་བའི་ནང་ནས་སླར་ཡང་འཛིན་བཟུང་བྱས་ཏེ་འཐབ་རྩོད་དང་མནར་གཅོད་བཟོད་བཀའ་བ་བཏང་སྟེ་ལོ་ ༧ བཙོན་འཇུག་བྱས་ཡོད་པ་རེད། དེ་རྗེས་ཕྱི་ལོ་ ༢༠༡༠ ཟླ་ ༥ ཚེས་ ༢༠ ཉིན་མདོ་ཁམས་ཤག་རོང་པོ་ཁུལ་དུ་སླར་ཡང་རྒྱ་གཞུང་གིས་ལྔ་ཉི་ཤུའི་དོན་རྐྱེན་ཟེར་བའི་འོག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་སྐོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བ་ཡོད་པའི་ནག་ཉེས་བཙུགས་ཏེ་སླར་ཡང་ལོ་ ༧ བཙོན་འཇུག་ཁྲིམས་ཐག་བཅད་ཡོད་པ་མ་ཟད། སྐུ་ཚེ་གང་པོར་ཆབ་སྲིད་ཀྱི་ཁེ་དབང་འཕྲོག་ནས་རྒྱ་གཞུང་གི་སྟངས་འཛིན་འོག་ཆེད་མངགས་མི་སྣས་ཡང་ནས་ཡང་དུ་ཞིབ་བཤེར་བྱས་པར་བརྟེན་བཟང་བཙོན་ལྟ་བུར་བཞུགས་དགོས་བྱུང་ཡོད་པ་རེད།
