ཧིན་དྷུའི་བླ་ཆེན་ Swami Chidanand Saraswati ལགས་དང་ཐེ་ཝན་ནས་ཡིན་པ་སྐུ་ཞབས་ Her Rey Sheng ལགས། ལ་དྭགས་ནས་ཡིན་པ་སྐུ་ཞབས་ Mohammed Deen ལགས་བཅས་གསུམ་ལ་ཆོས་ལུགས་མཐུན་འབྲེལ་གྱིས་མཚོན་པའི་ཁོར་ཡུག་སྲུང་སྐྱོབ་སོགས་ཀྱི་ལས་འགུལ་ཤུགས་ཆེ་སྤེལ་བཞིན་པར་ཆེ་བསྟོད་ཀྱིས་འདི་ལོའི་གཉན་ཡོད་ཐེབས་རྩ་ལྷན་ཁང་གི་རྒྱལ་སྤྱིའི་རང་བཞིན་ལྡན་པའི་གཉན་ཡོད་གཟེངས་རྟགས་ཆེས་ཐོག་མ་འབུལ་བཞེས་གནང་འདུག
རྒྱལ་སྤྱིའི་རང་བཞིན་ལྡན་པའི་གཉན་ཡོད་གཟེངས་རྟགས་དེ་བཞིན་༸སྒྲུབ་བརྒྱུད་བསྟན་པའི་མངའ་བདག་འབྲི་གུང་༸སྐྱབས་མགོན་ཆེ་ཚང་རིན་པོ་ཆེ་མཆོག་གི་རླབས་ཆེན་གྱི་དགོངས་གཞི་ལྟར། སྔ་ལོ་ཨ་རིར་གཉན་ཡོད་ཐེབས་རྩ་ལྷན་ཁང་ཞིག་གསར་འཛུགས་ཀྱིས་ཚོགས་པ་དེའི་ག་སྒྲིག་འོག་འདི་ལ་ནས་བཟུང་ལོ་ལྟར་འབྲེལ་ཡོད་གལ་ཆེའི་མི་སྣ་ཁག་ལ་འབུལ་གཏན་འཁེལ་བ་ཞིག་ཡིན་པ་རེད།
འདི་ལོའི་གཉན་ཡོད་གཟེངས་རྟགས་དེ་བཞིན་སྡེ་ཚན་གསུམ་གྱི་ཐོག་ནས་གནད་ཡོད་མི་སྣ་གསུམ་ལ་འབུལ་གནང་མཛད་ཡོད་ཅིང་། དེའི་ཁོངས་ནས་གཟེངས་རྟགས་དང་པོ་དེ་ཆོས་ལུགས་མཐུན་འབྲེལ་གྱིས་མཚོན་པའི་ཁོར་ཡུག་སྲུང་སྐྱོབ་དང་འབྲེལ་བའི་ལས་འགུལ་ཁག་ལ་འབད་བརྩོན་ཤུགས་དྲག་གནང་མཁན་ཧིན་དྷུའི་བླ་ཆེན་ Swami Chidanand Saraswati ལགས་ཡིན་པ་དང་གཟེངས་རྟགས་གཉིས་པ་དེ་འགྲོ་བ་མི་རིགས་ཀྱི་བདེ་སྡུག་གིས་མཚོན་པའི་གལ་ཆེའི་ལས་དོན་ཁག་ལ་ཐུགས་སྣང་ཆེན་པོས་ཕྱག་ལས་གནང་མཁན་ཐེ་ཝན་ནས་ཡིན་པ་སྐུ་ཞབས་ Her Rey Sheng ལགས། གཟེངས་རྟགས་གསུམ་པ་ཁོར་ཡུག་ཐོག་ལ་ཕྱག་ལས་ཤུགས་ཆེ་གནང་མཁན་ལ་དྭགས་ནས་ཡིན་པ་སྐུ་ཞབས་ Mohammed Deen ལགས་བཅས་ལ་ཐོབ་ཡོད་པ་རེད།
རྩ་བའི་གཉན་ཡོད་གཟེང་རྟགས་ཀྱི་དམིགས་ཡུལ་གཙོ་བོ་ནི་དེང་སྐབས་འཛམ་གླིང་ས་ཡི་གོ་ལ་འདིར་ཆོས་ལུགས་ནང་ཕན་ཚུན་མཐུན་འབྲེལ་མེད་པའི་དབང་གིས་ཞི་བདེ་ལྷིང་འཇགས་མེད་པ་སོགས་ཀྱི་ངལ་བ་མང་དག་ཞིག་འཕྲད་བཞིན་པར་བརྟེན་ལོ་ངོ་དུ་མའི་སྔོན་ནས་འབྲི་གུང་༸སྐྱབས་མགོན་མཆོག་སྐུ་སྒེར་གྱི་ངོས་ནས་དངོས་ཡོད་གནས་བབས་དང་བསྟུན་ཧི་མཱ་ལ་ཡའི་ས་ཁུལ་ཁག་ཏུ་གངས་ཀྱི་མཆོད་རྟེན་དང་གངས་རི་རྫུས་མ་དུ་མ་བཟོ་གནང་བ། དེ་བཞིན་ལྗང་བསྒྱུར་དང་རང་བསྒྱུར་གྱིས་མཚོན་པའི་ཁོར་ཡུག་སྲུང་སྐྱོབ་ཀྱི་ལས་འགུལ་ཤུགས་ཆེར་སྤེལ་གནང་མཛད་པ་མ་ཟད། ཆོས་ལུགས་ཁག་གི་བླ་ཆེན་ཚོ་དང་ལྷན་དུ་མཇལ་འཕྲད་ཀྱིས་ཛ་དྲག་གི་གནད་དོན་ཁག་ལ་བཀའ་བསྡུར་གནང་བ་སོགས་ཀྱིས་མཚོན་པའི་ལས་འགུལ་དུ་མ་ཞིག་བཀའ་དྲིན་བསྐྱངས་དང་སྐྱོང་བཞིན་པ་ལྟར། འཛམ་གླིང་འདིར་ཆོས་ལུགས་མཐུན་འབྲེལ་དང་ཁོར་ཡུག་སྲུང་སྐྱོབ་སོགས་ཀྱི་ཐོག་ལ་ཕྱག་ལས་གནང་བཞིན་པའི་གནད་ཡོད་མི་སྣ་དུ་མ་ཞིག་ཡོད་པ་རྣམས་ཀྱི་སྤོབས་པ་ཡར་བསྐྱེད་དང་གུས་བཀུར་ཆེ་མཐོང་ཞུ་བ། དེ་བཞིན་དེ་ལྟ་བུའི་རྣམ་དཀར་གྱི་བྱ་བ་རྣམས་བསྟུད་མར་གནང་སྐྱོང་ཡོང་བའི་འབོད་སྐུལ་གྱི་ཚུལ་དུ་ཡིན་པ་རེད།
