བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་མཛད་ཐོག་ཟླ་བ་འདིའི་ ཕྱི་ཚེས་ ༡༤ ནས་དེ་རིང་ཕྱི་ཚེས་ ༡༧ བཅས་ཉིན་གྲངས་བཞིའི་རིང་རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་དུ་ནང་པའི་མཁས་པ་དང་ཚན་རིག་པའི་དབར་བགྲོ་གླེང་གི་ལྷན་ཚོགས་ཚོགས་གནང་ཡོད་པ་ལྟར། དེ་རིང་ཟླ་ ༡༢ ཕྱི་ཚེས་ ༡༧ ཉིན་ལས་རིམ་ཁག་ཡོངས་སུ་ལེགས་གྲུབ་ངང་མཇུག་སྒྲིལ་གནང་འདུག
གཞི་རྩའི་སེམས་དང་སྲོག་གི་བགྲོ་གླེང་དེ་གདན་ས་ཁག་ཏུ་ཚོགས་པ་ཐེངས་གཉིས་པ་དེ་ཡིན་པ་དང། སྤྱིར་བཏང་བགྲོ་གླེང་དེ་ ཐེངས་སུམ་ཅུ་ཙམ་ཚོགས་ཡོད་པ་རེད། ད་ལན་གྱི་ཉིན་བཞིའི་ཚོགས་འདུའི་ཐོག་༸གོང་ས་མཆོག་དབུ་བཞུགས་མཛད་པ་དང་ལྷན་ཚོགས་སུ་ནུབ་ཕྱོགས་པའི་ཚན་རིག་པ་དང་ལྟ་གྲུབ་མཁས་དབང་། Susan Bauera-wu ལགས་དང། Matthieu Ricard ལགས་དང། Jay Garfield ལགས་གཙོས་པའི་ Pawan Sinha ལགས་དང། John Dunne ལགས་དང་ Catherine Kerrz ལགས་སོགས་ཆེད་ཕེབས་གནང་ཡོད་པ་དང། བོད་བརྒྱུད་ནང་བསྟན་གྱི་མཁས་པའི་ཁོངས་སུ་དགེ་བཤེས་ཡེ་ཤེས་ཐབས་མཁས་ལགས་དང། དགེ་བཤེས་ལྷག་རྡོ་ལགས། དགེ་བཤེས་བློ་བཟང་བསྟན་འཛིན་ལགས། དགེ་བཤེས་དགྲ་འདུལ་རྣམ་རྒྱལ་ལགས་སོགས་ཆེད་ཕེབས་ཀྱིས་ལྷན་བཞུགས་གནང་ཡོད་པ་རེད། ཉིན་བཞི་པོ་དེའི་རིང་ལ་མཁས་པ་རྣམས་ནས་གཙོ་བོ་མངོན་སུམ་དང་རྟོག་པ། དེ་བཞིན་བདག་འདོད་ཚུལ་སྐོར་ལ་ཕྱི་ནང་གི་བཞེད་ཚུལ་ཐད་ལ་བགྲོ་གླེང་བཀའ་བསྡུར་གནང་ཡོད་པ་རེད། རྩ་བའི་སང་ཉིན་༸གོང་ས་མཆོག་བཀྲིས་ལྷུན་པར་ཆིབས་བསྒྱུར་མཛད་ནས་གཙུག་ལག་ཁང་གསར་བཞེངས་ལེགས་གྲུབ་ཟིན་པའི་དབུ་འབྱེད་རབ་གནས་མཛད་རྒྱུའི་མཛད་འཆར་ཡོད་པ་རེད།
