ཁ་སང་ཕྱི་ཚེས་ ༢༨ ཉིན་རྒྱ་གར་གྱི་རྒྱལ་ས་ལྡི་ལིར་ G20 འབྱོར་ལྡན་རྒྱལ་ཁབ་ ༢༠ ཡི་ཕྱི་སྲིད་བློན་ཆེན་རྣམས་ཀྱི་ཚོགས་ཆེན་འཚོག་བཞིན་པའི་དུས་སྐབས་དང་བསྟུན། དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་དབུས་པའི་ལྡི་ལི་སྐུ་ཚབ་དོན་གཅོད་བློ་བཟང་ཤཱསྟྲི་ལགས་དང་དྲུང་ཆེ་བཅས་ནས་ཅེག་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་ Jan Lipavsky ཇན་ལི་བྷ་སི་ཀེ་མཆོག་དང་ལྷན་མཇལ་འཕྲད་གནང་འདུག
ལྡི་ལི་སྐུ་ཚབ་དོན་གཅོད་ཁང་དུ་གོ་སྒྲིག་ཞུས་པའི་ཚོགས་འདུ་དེའི་སྐབས་ཅེག་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་མཆོག་ནས་སྲིད་འཛིན་ཟུར་པ་ Vaclav Havel མཆོག་གི་དགོངས་གཞི་ལྟར་ཅེག་སྤྱི་མཐུན་རྒྱལ་ཁབ་ངོས་ནས་བོད་དོན་ཐོག་དམ་པ་ཁོང་གི་དགོངས་གཞི་མུ་མཐུད་མཇུག་སྐྱོང་གནང་བཞིན་པ་དང་། མ་འོངས་པར་ཡང་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུའི་ཁས་ལེན་ཞུས་འདུག་པ་མ་ཟད། ད་དུང་དབུ་ཁྲིད་རྣམ་པའི་དབར་བོད་དོན་དང་འབྲེལ་བའི་གནད་དོན་གཞན་ཡང་བཀའ་མོལ་ལྷུག་པོ་བྱུང་ཡོད་འདུག
གཞི་རྩའི་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་སྐུ་ཞབས་ Vaclav Havel ཝ་སི་ལབ་ཧ་ཝེལ་མཆོག་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཐུགས་ཤིན་ཏུ་ཉེ་བའི་འཛམ་གླིང་གི་དབུ་ཁྲིད་ཅིག་ཡིན་པའི་མ་ཟད། སྲིད་འཛིན་དམ་པ་ཁོང་ནི་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ཁག་ལ་ཡིད་སྨོན་དང་ཞལ་ཞེ་གཉིས་མེད་ཀྱི་རྒྱབ་སྐྱོར་གནང་མཁན་ཞིག་ཡིན་པ་དང་། ལྷག་པར་དུ་སྲིད་འཛིན་དམ་པ་ཁོང་ཡང་ཅེག་མི་མང་གི་ངོས་ནས་དགའ་ཞེན་དང་བརྩི་བཀུར་ཆེན་པོ་ཞུ་ཡུལ་གྱི་དབུ་ཁྲིད་ཅིག་ཡིན་པ་རེད།
ཅེག་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་ Jan Lipavsky ཇན་ལི་བྷ་སི་ཀེ་མཆོག་ཐེངས་འདིར་རྒྱ་གར་གྱི་རྒྱལ་ས་ལྡི་ལིར་ཉིན་གྲངས་གསུམ་རིང་གི་གཞུང་འབྲེལ་འཚམས་གཟིགས་སུ་ཆེད་ཕེབས་གནང་ཡོད་པ་དང་། འཚམས་གཟིགས་སྐབས་ Wion ཝི་ཡོན་གསར་ཁང་གི་བཅར་འདྲི་ཁྲོད། ཞི་བདེ་རྒྱ་མཚོའི་ས་ཁུལ་དུ་ད་ལྟའི་ཆར་ཉེན་ཚབས་ཆེ་ཤོས་ནི་རྒྱ་ནག་ཆགས་ཀྱི་ཡོད་པ་དང་། རྒྱ་གར་དང་ཞི་བདེ་རྒྱ་མཚོའི་མང་གཙོ་ལྡན་པའི་རྒྱལ་ཁབ་རྣམས་ཀྱིས་མཉམ་འབྲེལ་ཐོག་རྒྱ་ནག་གི་དཔལ་འབྱོར་དང་དྲག་པོའི་སྟོབས་ཤུགས་ལ་གདོང་ལེན་གནང་དགོས་གལ་སྐོར་གསུངས་བ་མ་ཟད། རྒྱ་ནག་གིས་ཉེ་བའི་ཆར་འཕགས་བོད་མཐའ་མཚམས་སུ་རྒྱ་གར་ལ་དྲག་རྒོལ་བྱས་པའི་ལས་དོན་ཁག་ལ་སྐྱོན་བརྗོད་ཤུགས་ཆེ་གནང་འདུག པར་དབང་བོད་མིའི་སྒྲིག་འཛུགས།
