བོད་མིའི་སྒྲིག་འཛུགས་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ནས་ཕ་རན་སིའི་གྲོས་ཚོགས་གོང་མའི་འཐུས་མི་ཁག་ཅིག་དང་མཇལ་འཕྲད་ཀྱིས་བོད་ཀྱི་ཁོར་ཡུག་དང་གནམ་ཤིས་འགྱུར་ལྡོག་དང་འབྲེལ་བའི་གནད་དོན་ཁག་ཅིག་སྙན་སེང་ཞུས་ཡོད་པ་རེད། 
ད་ལྟ་ France ཡི་རྒྱལ་ས་ Paris ནང་དུ་རྒྱལ་ཚོགས་ཀྱི་གོ་ལའི་གནམ་ཤིས་འགྱུར་ལྡོག་དང་འབྲེལ་བའི་ཚོགས་ཆེན་ COP21 ཚོགས་བཞིན་པ་དང་བསྟུན། ཕྱི་དྲིལ་བཀའ་བློན་མཆོག་ཁུལ་དེར་ཁ་སང་ཆེད་ཕེབས་ཀྱིས་བོད་མཐོ་སྒང་གི་གནམ་ཤིས་འགྱུར་ལྡོག་ཐོག་གོ་རྟོགས་སྤེལ་བའི་བགྲོ་གླེང་གི་ཚོགས་འདུའི་ཐོག་ལྷན་ཞུགས་གནང་པ་མ་ཟད།
དེ་རིང་སྔ་དྲོ་ France གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Michel Raison ལགས་ཀྱིས་གོ་སྒྲིག་འོག བཀའ་བློན་མཆོག་གཙོས་པའི་བོད་མིའི་སྒྲིག་འཛུགས་ཀྱི་ཁོར་ཡུག་ཚན་པའི་འབྲེལ་ཡོད་ལས་བྱེད་པ་ཁག་ཅིག་གིས་གྲོས་ཚོགས་འཐུས་མི་རྣམས་ལ་བོད་ཀྱི་ཁོར་ཡུག་གནས་སྟངས་སྐོར་སྙན་སེང་ཞིབ་ཁྲ་ཞུས་གནང་འདུག
བཀའ་བློན་མཆོག་ནས་ཐེངས་འདིའི་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་དང་འབྲེལ་བའི་ལྷན་ཚོགས་དེའི་ཐོག་ཁོར་ཡུག་གི་གནད་དོན་ཐད་གྲོས་ཆོད་བཞག་གི་ཡོད་སྟབས། ད་ལན་གྱི་ལྷན་ཚོགས་དེ་དམིགས་བསལ་གྱི་གལ་ཆེ་ཞིག་ཆགས་ཀྱི་ཡོད་སྐོར་གསུངས་པ་དང་འབྲེལ། 
རྒྱ་ནག་གཞུང་གི་ངོས་ནས་ཁོར་ཡུག་སྲུང་སྐྱོབ་ཀྱི་ཁྲིམས་གཏན་འབེབས་ཡོད་པ་ལྟར་དེ་དག་དོན་ཁྱོན་གནང་དགོས་གལ་ཡིན་པར་འགྲེལ་བརྗོད་གནང་པ་མ་ཟད། བོད་མི་མང་ཚོགས་ཀྱི་ངོས་ནས་ཀྱང་གནད་དོན་དེ་དག་ཐོག་དོ་སྣང་གནང་དགོས་གལ་ཡིན་སྐོར་གསུངས་ཀྱི་འདུག
ཡང་དེའི་བར་ན་ཁ་སང་ཉིན་རྒྱབ་ཕྱག་ཚོད་ ༣ ནས་ ༥ པའི་བར་ 
Paris ནང་བོད་མིའི་སྒྲིག་འཛུགས་ཀྱི་གོ་སྒྲིག་འོག བོད་ཀྱི་གནམ་གཤིས་འགྱུར་ལྡོག་དང་འབྲེལ་བའི་ཟུར་ཚོགས་ཤིག་ཀྱང་ཚོགས་ཡོད་པ་དང་། ལས་རིམ་དེའི་ཐོག་བཀའ་བློན་མཆོག་གཙོས་པའི་ནང་པའི་དགེ་འདུན་པ་ཕ་རན་སིའི་ཚན་རིག་པ་གྲགས་ཅན་ Matthieu Ricard ལགས་དང། ཅེཀ་སྤྱི་མཐུན་རྒྱལ་ཁབ་ཀྱི་ཁོར་ཡུག་བློན་ཆེན་ཟུར་པ་ Martin Bursik དེ་བཞིན་བོད་མིའི་སྒྲིག་འཛུགས་ཀྱི་ཁོར་ཡུག་ཚན་པའི་འགན་འཛིན་ཟུར་པ་བསྟན་འཛིན་ནོར་བུ་ལགས་དང། བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་བསྟན་པ་རྒྱལ་ཚན་ལགས་བཅས་ནས་གསུང་བཤད་གནང་འདུག
