དེ་རིང་ཕྱི་ཟླ་ ༡༢ ཚེས་ ༡༩ ཉིན་བོད་ཀྱི་བླ་ན་མེད་པའི་དབི་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གཙོས། 
སྐུ་མགྲོནགཙོ་བོ་རྒྱ་གར་དབུས་གཞུང་གི་སྐུ་ཚབ་ཀར་ན་ཀྲ་ཀ་མངའ་སྡེའི་སྲིད་སྐྱོང་སྐུ་ཞབས་ vajubhai rudabhai vala མཆོག་དང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག དེ་བཞིན་ཕྱི་ནང་གི་གནད་ཡོད་སྐུ་མགྲོན་རྣམ་པ་དང་སེར་སྐྱ་མང་ཚོགས་སྟོང་ཕྲག་བརྒལ་བ་ལྷན་འཛོམས་ཐོག་ཆོས་སྡེ་བཀྲིས་ལྷུན་པོའི་གཙུག་ལག་ཁང་གི་རྟེན་དང་བརྟེན་པ་བཅས་པར་གསར་བཞེངས་ལེགས་གྲུབ་བྱུང་བར་དབུ་འབྱེད་ཀྱི་མཛད་སྒོ་གཟབ་རྒྱས་ཤིག་ཚོགས་ཡོད་པ་རེད།
སྐབས་དེར་༸གོང་ས་མཆོག་གིས་ཆོས་སྡེ་བཀྲིས་ལྷུན་པོའི་གཙུག་ལག་ཁང་གི་རྟེན་དང་བརྟེན་པ་བཅས་པར་གསར་བཞེངས་ལེགས་གྲུབ་བྱུང་བར་ཡི་རང་བསྔགས་བརྗོང་མཛད་པ་དང་སྦྲགས། དགོན་པའི་ནང་གཙོ་བོ་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་འཐུས་ཚང་ཞིག་ཡོང་བར་བཤད་སྒྲུབ་གཉིས་ཀྱི་ཐོག་ནས་བསླབ་པ་སློབ་གཉེར་གནང་གལ་ཆེ་བ་ཡིན་པ་བཀའ་སྩལ་མཛད་ཡོད་པ་རེད། ད་དུང་༸གང་ཉིད་མཆོག་གིས་བོད་མི་རྣམ
ས་བཙན་བྱོལ་དུ་འགྱར་རྗེས་གཙོ་བོ་བོད་མི་རིགས་ཀྱིི་ངོ་བོ་དང་ཆོས་དང་རིག་གཞུང་བཅས་མི་ཉམས་རྒྱུན་འཛིན་དང་གཞོན་སྐྱེས་རྣམས་ལ་སྲོལ་རྒྱུན་དང་དེང་དུས་ཀྱི་ཤེས་ཡོན་ཟུང་འབྲེལ་གྱི་སློབ་གྲྭ་ཁག་ཟུར་བཙུགས་ཀྱིས་དམིགས་ཡུལ་ལྟར། རྒྱ་གར་དབུས་གཞུང་དང་ལྷག་དོན་ཀར་ན་ཀྲ་ཀ་གཞུང་གིས་དམིགས་བསལ་གཟིགས་སྐྱོང་རོགས་རམ་གནང་བར་བརྟེན་ནས་ད་ཆ་མངའ་སྡེ་དེའི་ནང་གཞིས་ཆགས་ཁག་དང་རིས་མེད་དགོན་སྡེ་ཁག་བཙུགས་ཐུབ་པ་བྱུང ་ཞིང། བོད་ཀྱི་ཆོས་རིག་འཛིན་སྐྱོང་ཐུབ་པར་རྒྱ་གར་དབུས་གཞུང་དང་མངའ་སྡེ་གཞུང་ལ་དམིགས་བསལ་གྱི་ཐུགས་རྗེ་ཆེ་ཞུའི་བཀའ་སྩལ་མཛད་ཡོད་པ་དང། དེ་མཚུངས་སུ་བོད་མི་ཚོས་བོད་ཀྱི་ཆོས་དང་རིག་གཞུང་བདག་པོ་རྒྱག་བཞིན་པ་དེ་དག་ནི་རྒྱ་གར་མཁས་པའི་རིག་གཞུང་ཆགས་ཡོད་ལ། དེང་སྐབས་འཛམ་གླིང་འདིའི་ཐོག་ལེགས་སྐྱེས་འབུལ་བཞིན་ཡོད་ལ་དོ་སྣང་བྱེད་མཁན་ཡང་ཉིན་རེ་བཞིན་ཇེ་མང་དུ་འགྲོ་བཞིན་ཡོད་པ་ནི་ང་ཚོ་བཙན་བྱོལ་བའི་གྲུབ་འབྲས་ཤིག་ཡིན་སྐོར་བཀའ་སློབ་སྩལ་འདུག
དེ་རྗེས་སྐུ་མགྲོན་གཙོ་བོ་མངའ་སྡེའི་སྲིད་སྐྱོང་མཆོག་གིས་བོད་ཀྱི་ཆོས་དང་སྐད་ཡིག་ནི་རྒྱ་གར་ནས་བྱུང་བ་ཞིག་ཡིན་པ་ཤེས་རྟོག་ཡོད་སྐོར་གསུངས་པ་དང་སྦྲགས་ཏེ། བོད་མི་རྣམས་ལ་ཐོག་མར་དཀའ་ངལ་ཆེན་པོ་འཕྲད་ཡོད་ཀྱང་མངའ་སྡེ་གཞུང་གིས་བོད་མི་རྣམས་ལ་སྔར་བཞིན་མུ་མཐུད་རྒྱབ་སྐྱོར་དང་སྣེ་ལེན་ཞུ་རྒྱུ་ཡིན་ཞེས་གསུངས་འདུག ད་དུང་ཁོང་གིས་བཀྲིིས་ལྷུན་པོ་དགོན་པ་དེ་བཞིན་བོད་ཀྱི
་ཆོས་དང་རིག་གཞུང་སྲུང་སྐྱོབ་བྱ་རྒྱུར་གལ་ཆེན་པོ་ཞིག་ཆགས་ཡོད་པ་མ་ཟད། དགོན་པ་དེའི་དགོན་བདག་པཎ་ཆེན་ཆུང་སྲིད་རིན་པོ་ཆེ་མཆོག་ནི་ད་ལྟ་ཡང་རྒྱའི་བཙོན་ཁང་དུ་བཞུགས་ཡོད་པ་རེད། ང་ཚོས་ཁོང་གང་མགྱོགས་གློད་གྲོལ་ཆེད་སེམས་ཤུགས་སྐྱེས་ནས་འབད་བརྩོན་དང་སྔར་རྒྱ་གར་རང་བཙན་ལེན་ཚུལ་གྱི་དཔེ་ལུང་འདྲེན་དང་བཅས་བོད་ཀྱི་བདེན་དོན་སེལ་ཕྱིར་དྲག་པོའི་ལངས་ཕྱོགས་དོར་ཏེ་འཚེ་མེད་ཞི་བའི་ལམ་ཁོ་ནའི་ཐོག་ནས་འཐབ་རྩོད་གནང་གལ་ཡིན་པ་སོགས་གསུངས་ཡོད་པ་རེད།
བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་ད་ལན་བཀྲིས་ལྷུན་པོའི་འདུ་ཁང་གསར་བཞེངས་ལེགས་གྲུབ་བྱུང་བར་འཚམས་འདྲིའི་གསུང་བཤད་གནང་པའི་ནང་དེང་སྐབས་མི་རེ་གཉིས་ཀྱིས་༸གོང་ས་མཆོག་ལ་གཞི་མེད་ཀྱི་མཚན་སྨད་ཞུ་བཞིན་པ་དེ་དག་ནི་བློ་ཕམ་བྱ་དགོས་པ་དང་དེ་བཞིན་ཡོངས་སུ་ནོར་འཁྲུལ་རེད་ཅེས་གསུངས་ཡོད་པ་མ་ཟད། ལྷག་དོན་དོལ་རྒྱལ་བསྟེན་སྲོལ་བྱེད་མཁན་ཚོས་ཀྱང་༸གོང་ས་མཆོག་དང་དབུས་བོད་མིའི་སྒྲིག་འཛུགས་ལ་སྐྱོན་བརྗོད་བྱེད་བཞིན་པ་དེ་དག་ཀྱང་ཁུངས་མེད་ཡིན་པ་སོགས་ཀྱི་གཏམ་བཤད་གནང་འདུག
བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དེ་རིང་གི་དུས་ཚོད་འདིར་ང་ཚོས་པཎ་ཆེན་རིན་པོ་ཆེའི་༸སྐུ་ཕྲེང་ན་རིམ་ལ་རྗེས་དྲན་ཞུ་རྒྱུ་དང། ལྷག་པར་དུ་བོད་ནང་ལ་བོད་ཀྱི་ཆོས་དང་བོད་སྐད་ཡིག་རྒྱུན་གནས་ཐུབ་པ་དེ་དག་ཀྱང་པཎ་ཆེན་རིན་པོ་ཆེ་༸སྐུ་ཐོག་གོང་མའིི་མཛད་རྗེས་ལ་བརྟེན་ནས་བྱུང་ཡོད་པ་གསུངས་པ་དང་སྦྲགས་ཏེ། རྒྱ་གཞུང་གིས་བླ་སྤྲུལ་ངོས་འཛིན་གནང་ཕྱོགས་དེ་ཡང་ཆབ་སྲིད་ཀྱི་ལག་ཆར་བེད་སྤྱོད་གཏོང་བཞིན་པ་དེར་ང་ཚོས་དོ་སྣ་ང་ཆེན་པོ་བྱེད་དགོས་པའི་གནད་དོན་ཞིག་ཡིན་པ་མ་ཟད། དམིགས་བསལ་དེང་སྐབས་ཀྱི་སྤྱི་ཚོགས་ནང་མི་རེ་ཟིང་གིས་མགོན་པོ་༸གོང་ཉིད་མཆོག་ལ་གཞི་མེད་ཀྱི་སྐྱོན་བརྗོད་དང་ཐུགས་ཕམ་ཡོང་གཞིའི་ཛ་དྲག་གི་གནད་དོན་ཡོང་བཞིན་པར་བརྟེན་ང་ཚོས་༸གོང་ས་མཆོག་གི་དགོངས་པ་དང་འགལ་རྐྱེན་དང་དེ་བཞིན་ཐུགས་ཕམ་མི་ཡོང་བའི་དམ་བཅའ་འཇོག་དགོས་གལ་ཡིན་པ་སོགས་གསུངས་ཡོད་པ་རེད། རྩ་བའི་སང་ཉིན་ནས་ཆོས་སྡེ་བཀྲིས་ལྷུན་པར་བྱང་ཆུབ་ལམ་རིམ་ཆེན་མོའི་བཀའ་ཆོས་དབུ་འཛུགས་གནང་གི་ཡོད་པ་རེད།
