དེ་ཡང་ཐེངས་འདིའི་ཞོ་སྟོན་དེ་བཞིན་ཟླ་བ་འདིའི་ཚེས་ ༡ ནས་དབུ་འཛུགས་ཀྱིས་དེ་རིང་ཚེས་ ༩ བར་ཉིན་གྲངས་དགུའི་རིང་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་གཟིགས་འབུལ་ཞུས་ཡོད་པ་དང་། དེ་རིང་ཞོ་སྟོན་གྱི་མཇུག་སྡོམ་མཛད་སྒོར་སྐུ་མགྲོན་གཙོ་བོ་འབྲས་སྤུངས་སྒོ་མང་གྲྭ་ཚང་གི་མཁན་རིན་པོ་ཆེ་བློ་བཟང་རྒྱལ་མཚན་མཆོག་གིས་དབུས། ས་གནས་གཞི་འགོ་དང་ས་གནས་ཀྱི་གཞུང་འབྲེལ་དང་གཞུང་འབྲེལ་མིན་པའི་ཚོགས་ཁག་གི་སྐུ་ཚབ་རྣམ་པ། དེ་བཞིན་ཁུལ་དེའི་སེར་སྐྱ་མི་མང་གཅིག་སྟོང་བརྒལ་བ་བཅས་ཚང་འཛོམས་ཐོག་བོད་ཀྱི་ཟློས་གར་ཚོགས་པས་སྟོན་པའི་མཛད་པ་ ༡༢ གཟིགས་འབུལ་ཞུས་ཏེ་ལེགས་གྲུབ་ངང་མཇུག་སྒྲིལ་གནང་ཡོད་པ་རེད།
སྐབས་དེར་སྐུ་མགྲོན་གཙོ་བོ་འབྲས་སྤུངས་སྒོ་མང་གྲྭ་ཚང་གི་མཁན་རིན་པོ་ཆེ་བློ་བཟང་རྒྱལ་མཚན་མཆོག་གིས་བོད་ཀྱི་འབྲས་སྤུངས་ཀྱི་ཞོ་སྟོན་སྐོར་ལ་ངོ་སྤྲོད་དང་འབྲེལ། སྲོལ་རྒྱུན་ལྷ་མོའི་རིག་གཞུང་ནི་བོད་དེ་རྒྱལ་ཁབ་གཞན་དང་ཐ་དད་་ཡིན་པའི་མཚོན་ཆེད་ཡིན་པ་དང་། ལྷག་དོན་ལྷ་མོའི་འཁྲབ་སྟོན་ལ་གདེང་འཇོག་གནང་བ་མ་ཟད། དེ་མུ་མཐུད་ནས་ཡར་རྒྱས་གོ་འཕེལ་གནང་དགོས་པ་སོགས་ཀྱི་སྐུལ་ལྕག་གནང་ཡོད་པ་རེད།
རྩ་བའི་ལོ་རྗེས་མའི་བོད་ཀྱི་ཞོ་སྟོན་གྱི་ལྷ་མོའི་འཁྲབ་སྟོན་དེ་ས་གནས་གང་དུ་སྲུང་བརྩི་ཞུ་མིན་ཐད་སང་ཉིན་འབྲེལ་ཡོད་ཀྱི་ཚོགས་འདུ་བསྐོང་ཚོགས་གནང་སྟེ་ཐག་གཅོད་གནང་རྒྱུ་ཡིན་འདུག