དབུས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་འོག་ཟླ་བ་སྔོན་མའི་ཕྱི་ཚེས་ ༢༩ སྟེ་དཔའ་བོའི་རྗེས་དྲན་ཉིན་མོ་དང་བསྟུན། འབྲས་ལྗོངས་ཀྱི་རྒྱལ་ས་སྒང་ཏོག་ནས་རྒྱ་གར་བྱང་ཤར་ཨ་སམ་མངའ་སྡེའི་གྲོང་ཁྱེར་ཏེཛ་པུར་བར་དུ་ Tibet Matters March ཞེས་པའི་བོད་དོན་ཛ་དྲག་གླེང་སློང་གོམ་བགྲོད་ལས་འགུལ་ཞིག་སྤེལ་བཞིན་ཡོད་པ་དེ་དེ་རིང་ཕྱི་ཚེས་ ༢༣ ཉིན་མཇུག་སྒྲིལ་གནང་འདུག
ཟླ་བ་གཅིག་ཙམ་གྱི་འབྲས་ལྗོངས་ནས་ཨ་སམ་བར་ཁྱོན་སྤྱི་ལེ་ ༧༠༠ ལྷག་གི་གོམ་བགྲོད་ལས་འགུལ་འདི་བཞིན་དེ་རིང་ཕྱི་ཟླ་ ༥ ཕྱི་ཚེས་ ༢༣ སྟེ། དེ་སྔ་རྒྱ་ནག་གཞུང་གིས་ཕྱི་ལོ་ ༡༩༥༡ ཟླ་ ༥ ཚེས་ ༢༣ ཉིན་བོད་མིར་བཙན་དབང་གིས་གྲོས་མཐུན་དོན་ཚན་ ༡༧ ཞེས་པར་མིང་རྟགས་བཀོད་བཅུག་པའི་ཉིན་མོ་དྲན་གསོ་དང་སྦྲགས་ཏེ་ཨ་སམ་གྱི་གྲོང་ཁྱེར་ Tezpur ནང་དུ་མཇུག་སྒྲིལ་གནང་ཡོད་པ་དང་། ས་གནས་དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༥༩ ལོར་གྲོས་མཐུན་དོན་ཚན་བཅུ་བདུན་ཟེར་བ་དེ་ངོས་ལེན་མེད་པའི་ཡོངས་ཁྱབ་གསལ་བསྒྲགས་མཛད་སའི་ས་ཚིགས་ཤིག་ཀྱང་ཡིན་པ་རེད།
དེ་རིང་ལས་འགུལ་མཇུག་སྒྲིལ་དང་འབྲེལ་བའི་མཛད་སྒོའི་ཐོག་དབུས་བོད་ཀྱི་གཞོན་ནུ་ལྷན་ཚོགས་ནས་ལས་འགུལ་ནང་མཉམ་ཞུགས་དང་རོགས་རམ་གནང་མཁན་ཡོངས་ལ་ཐུགས་རྗེ་ཆེ་ཞུའི་ཕྱག་འཁྱེར་གནང་འདུག་པ་མ་ཟད། ཚོགས་གཙོ་མགོན་པོ་དོན་གྲུབ་ལགས་ཀྱིས་ཇི་སྲིད་བོད་དོན་བདེན་མཐའ་མ་སེལ་བར་དུ་སྐད་འབོད་དང་ལས་འགུལ་མུ་མཐུད་སྤེལ་རྒྱུ་ནི་ང་ཚོའི་དམ་བཅའ་ཡིན་པ་དང་། རིང་མིན་རྒྱལ་ས་ལྡི་ལི་ནང་དུ་ཚོགས་གཏན་འཁེལ་བའི་ G20 ཞེས་འཛམ་གླིང་སྟོབས་ཆེན་རྒྱལ་ཁབ་ ༢༠ ལྷན་ཚོགས་སྐབས་རྒྱལ་སྤྱི་དབུ་ཁྲིད་ཚོར་བོད་དོན་ཞུ་གཏུག་ཀྱི་ལས་འགུལ་ཞིག་སྤེལ་འཆར་ཡོད་སྐོར་སོགས་གསུངས་འདུག
གཞི་རྩའི་ཐེངས་འདིའི་བོད་དོན་ཛ་དྲག་གླེང་སློང་གོམ་བགྲོད་ལས་འགུལ་ནང་རྒྱ་གར་ནང་གི་བོད་མི་གནས་ཡུལ་གྱི་ས་གནས་ཁག་ ༡༧ ནས་ལས་འགུལ་བ་ཕོ་མོ་གྲངས་ ༨༧ ལྷག་མཉམ་ཞུགས་གནང་ཡོད་པ་དང་། འདི་ག་རླུང་འཕྲིན་ཁང་ནས་ལས་འགུལ་ནང་མཉམ་ཞུགས་གནང་མཁན་བགྲེས་ཤོས་དགུང་ལོ་ ༧༠ སོན་པ་ཨ་མ་སྐྱིད་པ་ལགས་དང་། ཆུང་ཤོས་རང་ལོ་ ༢༤ ལ་སོན་པའི་བསྟན་འཛིན་འབྲུག་བཟང་ལགས་གཉིས་སུ་ཐེངས་འདིའི་ལས་འགུལ་ནང་མཉམ་ཞུགས་གནང་བའི་མྱོང་བ་དང་འབྲེལ། བཀའ་འདྲི་ཁག་ཅིག་ཞུ་སྐབས། ལས་འགུལ་ནང་གཞོན་སྐྱེས་ཚོས་མཉམ་ཞུགས་གནང་རྒྱུ་དེ་གལ་འགངས་ཆེན་པོ་ཡིན་པ་སོགས་གསུངས་སོང་།
