བོད་མིའི་སྒྲིག་འཛུགས་ཀྱིས་རྒྱ་གཞུང་གི་རྒྱབ་ཤ་དཀར་པོའི་ཡིག་ཆར་ལན་འདེབས་ཀྱི་ཕྱག་དེབ་འདོན་སྤེན།

དེ་རིང་ཕྱི་ཟླ་ ༩ ཕྱི་ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག་དེ་སྔ་ཕྱི་ཟླ་ ༥ པའི་ནང་ལ་རྒྱ་ནག་གཞུང་གིས་བོད་ཐོག་བཏོན་པའི་རྒྱབ་ཤ་དཀར་པོའི་ཡིག་ཆར་ལན་འདེབས་ཀྱིས་དཔེ་དེབ་ཅིག་འདོན་སྤེན་གནང་སོང་། འདི་ལོའི་ཕྱི་ཟླ་ ༥ ཕྱི་ཚེས་ ༢༡ ཉིན་རྒྱ་ནག་གཞུང་ནས་བོད་ཞི་བའི་བཅིངས་གྲོལ་ཟེར་བ་བཏང་ནས་ལོ་ངོ་ ༧༠ འཁོར་བ་ཞེས་པའི་དུས་སྐབས་དང་བསྟུན་རྒྱ་ནག་རྒྱལ་སྲིད་སྤྱི་ཁྱབ་ཁང་གི་དྲིལ་བསྒྲགས་ཚན་པས་རྒྱལ་ས་པེ་ཅིང་དུ་སླར་ཡང་རྒྱབ་ཤ་དཀར་པོའི་ཡིག་ཆ་ཞིག་འདོན་སྤེལ་བྱས་ཏེ། རྒྱ་ནག་གཞུང་གིས་འདས་པའི་ལོ་ངོ་ ༧༠ ནང་ལ་བོད་མི་གཙོ་བོར་གྱུར་བའི་རྒྱ་ནག་མི་མང་ཡོངས་ཀྱི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་དང་། བོད་མིའི་བདེ་དོན་ལ་དམིགས་ཏེ་འཛུགས་སྐྲུན་ལས་གཞི་རྒྱ་བསྐྱེད་བཏང་སྟེ་དཔལ་འབྱོར་གྱི་གནས་བབ་ཡར་རྒྱས་ཚད་མཐོར་བཏང་ཡོད་ཚུལ་སོགས་འགྲེལ་བརྗོད་བྱས་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དེ་རྒྱ་ནག་དབུས་གཞུང་གིས་ངོས་འཛིན་བཀའ་འཁྲོལ་ཐོག་ནས་ཐག་གཅོད་བྱ་རྒྱུ་ཡིན་ཚུལ་སོགས་བཤད་ཡོད་པ་རེད། དེ་རིང་བོད་མིའི་སྒྲིག་འཛུགས་ནས་རྒྱ་ནག་གཞུང་གིས་འདོན་སྤེལ་བྱས་པའི་རྒྱབ་ཤ་དཀར་པོའི་ཡིག་ཆ་ལ་ལན་འདེབས་ཀྱིས་ Tibet 70 Years of Occupation and Oppression ཞེས་ལོ་ངོ་ ༧༠ བཙན་འཛུལ་དང་གཉའ་གནོན་བྱས་པའི་བོད་ཅེས་འཁོད་པའི་དཔེ་དེབ་གསར་པ་ཞིག་འདོན་སྤེལ་གནང་པ་འདི་བཞིན་འདས་པའི་ཟླ་བ་བཞི་ལྷག་གི་རིང་ལ་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་འབུམ་རམས་པ་བསྟན་འཛིན་བདེ་གསལ་ལགས་ཀྱིས་རྐང་འགན་བཞེས་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ལས་ཐོག་དང་ཟུར་པ། དེ་བཞིན་འབྲེལ་ཡོད་ཕྱི་ནང་གི་སློབ་སྟོན་པ་མི་ཉུང་བ་ཞིག་གི་སློབ་སྟོན་སོགས་ལ་བསྟེན་རྩོམ་སྒྲིག་ཞུས་པ་ཞིག་ཆགས་ཀྱི་ཡོད་པ་དང་། སྲིད་སྐྱོང་སྤེན་པ་ཚེ་རིང་མཆོག་ནས་ལན་འདེབས་ཀྱི་དཔེ་དེབ་དབུ་འབྱེད་དང་སྦྲགས། སྤྱི་ཡོངས་ནས་རྒྱ་ནག་གཞུང་ནས་གནད་དོན་གང་འདྲ་ཞིག་འགྲེལ་བརྗོད་བྱས་ཀྱང་རྒྱ་ནག་རང་ཉིད་ཀྱི་ཁེ་ཕན་ཁོ་ན་སྒྲུབ་རྒྱུ་དང་། ལྷག་པར་དུ་བྱེད་བབ་དེ་དག་བརྒྱུད་རྒྱ་མི་རིགས་གཙོས་པའི་རྒྱལ་སྤྱིའི་སྤྱི་ཚོགས་བསླུ་བྲིད་བྱེད་རྒྱུར་དམིགས་པ་ཞིག་ཡིན་པ་གསལ་པོ་རེད་ཅེས་གསུངས་ཡོད། ལན་འདེབས་ཀྱི་དཔེ་དེབ་ནང་འཁོད་པའི་དོན་ཚན་ཁག་ཞིབ་ཕྲ་ངོ་སྤྲོད་དང་སྦྲགས། དཔེ་དེབ་འདི་རྒྱ་ནག་གཞུང་ལ་ལན་འདེབས་ཤིག་ཆགས་པ་ཙམ་མ་ཟད། རྒྱལ་སྤྱིའི་ཐོག་ལ་བོད་དོན་ངོ་སྤྲོད་གནང་རྒྱུར་ཕན་ཐོག་ཡོད་པ་ཞིག་ཡིན་སྟབས། བོད་མི་ཚོས་ངོས་ནས་ཀྱང་ལན་འདེབས་ཀྱི་དཔེ་དེབ་དེར་སློབ་སྦྱོང་བྱེད་རྒྱུ་གལ་ཆེན་པོ་ཡིན་པ་གསུངས་སོང་། ལྷག་པར་དུ་སྲིད་སྐྱོང་མཆོག་ནས་མ་འོངས་པའི་གནད་དོན་དེ་གལ་ཆེན་པོ་ཞིག་ཡིན་སྟབས། རྒྱ་ནག་གཞུང་ནས་བོད་རྒྱའི་དཀའ་རྙོག་སེལ་འདོད་ཀྱི་བློ་ཞིག་ཡོད་པ་ཡིན་ན་བསམ་བློ་མདུན་ཕྱོགས་སུ་བཏང་སྟེ་བོད་དང་འབྲེལ་བའི་འཁྱོགས་བཤད་དྲིལ་བསྒྲགས་རིགས་སྤེལ་མཚམས་འཇོག་དགོས་པ་གསུངས་ཡོད། གཞི་རྩའི་ད་རེས་བོད་མིའི་སྒྲིག་འཛུགས་ནས་འདོན་སྤེན་གནང་པའི་རྒྱ་ནག་གཞུང་གིས་བོད་དོན་ཐོག་བཏོན་པའི་རྒྱབ་ཤ་དཀར་པོའི་ཡིག་ཆ་ལ་ལན་འདེབས་ཀྱི་དཔེ་དེབ་དེའི་ནང་ལ་བོད་དང་རྒྱ་ནག་གཉིས་ཀྱི་ལོ་རྒྱུས་གནས་བབ་དང་། རྒྱ་ནག་གཞུང་གིས་བཅིངས་གྲོལ་ཟེར་བའི་ཐ་སྙད་འོག་བོད་བཙན་འཛུལ་བྱས་པ། བཙན་དབང་འོག་ཆིངས་ཡིག་དོན་ཚན་ ༡༧ ཞེས་པ་དེ་བཞག་པའི་གནས་སྟངས། འཛུགས་སྐྲུན་གྱི་མིང་བྱང་འོག་བོད་མི་གཙོས་པའི་རྒྱལ་སྤྱིའི་མི་མང་བསླུ་བྲིད་བྱེད་བཞིན་པ། དེ་བཞིན་འགྲོ་བ་མིའི་ཐོབ་ཐང་གཙོས་པའི་སྐད་ཡིག་གི་རང་དབང་དང་། ལོ་ངོ་ ༧༠ རིང་ལ་བོད་ཀྱི་ཁོར་ཡུག་གཏོར་སྐྱོན་བཏང་པ་སོགས་རྒྱ་ནག་གཞུང་གིས་བཏོན་པའི་རྒྱབ་ཤ་དཀར་པོའི་ཡིག་ཆའི་ནང་འཁོད་པའི་དོན་རེ་རེ་ཐོག་ལ་ལན་འདེབས་གནང་འདུག རྒྱ་ནག་གཞུང་ནས་བོད་རྒྱའི་དཀའ་རྙོག་འདི་སྣང་མེད་དུ་གཏོང་ཐབས་མེད་པ་དང་། ལྷག་པར་དུ་རྒྱ་ནག་གཞུང་ནས་ད་བར་བོད་ཐོག་ལག་བསྟར་བྱེད་བཞིན་གདུག་རྩུབ་ཅན་གྱི་སྲིད་བྱུས་ཁག་ལམ་ལྷོང་བྱུང་མེད་པ་ཤེས་པའི་ཐོག་ནས་བོད་རྒྱའི་དཀའ་རྙོག་སེལ་ཐབས་ཐོག་ལ་གོམ་པ་སྤོ་དགོས་པ་སོགས་བཀོད་འདུག