བོད་མིའི་གཞིས་སྒར་མོན་གྷོ་འདོད་རྒུ་གླིང་ནས་ཡིན་པ་ཚེ་རིང་དོན་གྲུབ་ལགས་དང་བོད་མིའི་གཞིས་སྒར་སྦེལ་ཀོབ་ནས་ཡིན་པ་བོད་ཀྱི་དྭང་ཞབས་དམག་མི་ཟུར་པ་ཟླ་བ་ཚེ་རིང་ལགས་རྣམ་གཉིས་ཀྱིས་རྒྱ་གར་ལྷོ་ཕྱོགས་བོད་མིའི་གཞིགས་ཆགས་ནས་དབུ་འཛུགས་ཀྱིས་རྒྱ་གར་རྒྱལ་ཡོངས་སུ་བོད་རང་བཙན་ཆེད་སྦག་སྦག་སྐོར་སྐྱོད་ཀྱི་ལས་འགུལ་ཞིག་སྤེལ་ཡོད་པ་བཞིན། དེ་རིང་སྔ་དྲོར་ཁོང་གཉིས་༸རྒྱལ་བའི་བཞུགས་གནས་བཞུགས་སྒར་དྷ་རམ་ས་ལར་འབྱོར་སོང་།
གསར་འགོད་པས་ཚེ་རིང་དོན་གྲུབ་ལགས་སུ་ཐེངས་འདིའི་ལས་འགུལ་དང་འབྲེལ་བའི་བཅར་འདྲི་ཁག་ཅིག་ཞུས་པར་ཁོང་གིས་ད་རེས་རྒྱ་གར་ལྷོ་ཕྱོགས་ནས་ཕྱི་ཟླ་ ༧ ཚེས་ ༡ དབུ་འཛུགས་ཀྱིས་ལ་དྭགས་ཀྱི་རྒྱལ་ས་གླེ་བར་དུ་ Free Tibet Movement འམ་བོད་རང་བཙན་ཆེད་སྦག་སྦག་སྐོར་སྐྱོད་གནང་གི་ཡོད་པ་དང་། བོད་མིའི་གཞིས་ཆགས་ཁག་ཏུ་ཡོད་པའི་བོད་པའི་གཞོན་སྐྱེས་ཚོའི་ངོས་ནས་བོད་དོན་ཆེད་སྦག་སྦག་སྐོར་སྐྱོད་ཀྱི་ལས་འགུལ་གང་མང་སྤེལ་དགོས་གལ་ཡིན་པའི་གཞེན་སྐུལ་གནང་སོང་། 
དེ་བཞིན་ཟླ་བ་ཚེ་རིང་ལགས་ཀྱིས་ལམ་བར་ལ་ཐུག་པའི་རྒྱ་གར་མང་ཚོགས་ཀྱི་ངོས་ནས་བོད་དོན་ལ་དོ་སྣང་མི་དམན་པ་ཡོད་པའི་ཚོར་སྣང་བྱུང་ཞེས་དང་ཁོང་རྣམ་གཉིས་ལ་རྒྱ་གར་གྱི་གསར་ལམ་ཁག་གཅིག་ལ་བཀའ་མོལ་ཞུ་རྒྱུའི་གོ་སྐབས་བྱུང་ཡོད་སྐོར་གསུངས་སོང་བ་དང་ཆབས་ཅིག གཞིས་ཆགས་ཁག་གི་གཞོན་སྐྱེས་ཚོའི་ཁྲོད་ལ་བོད་དོན་ཆེད་སྦག་སྦག་སྐོར་སྐྱོད་གནང་རྒྱུར་དམིགས་བསལ་དོ་སྣང་མི་འདུག་ཅེས་གསུངས་ཡོད། 
གཞི་རྩའི་ཁོང་རྣམ་གཉིས་ཀྱི་སྦག་སྦག་སྐོར་སྐྱོད་ཀྱི་ལས་འགུལ་དེ་ནི་རྒྱ་གར་ལྷོ་ཕྱོགས་མོན་གྷོ་དང་སྦེལ་ཀོབ་གཉིས་ནས་དབུ་འཛུགས་ཀྱིས་ལ་དྭགས་བར་ས་གནས་སོ་སོའི་རྒྱ་གར་གྱི་མང་ཚོགས་ཁྲོད་ནས་བོད་དོན་ལ་རྒྱབ་སྐྱོར་སྔར་ལྷག་ཡོང་ཐབས་སུ་ཆེད་དམིགས་གནང་སྟེ་ཐེངས་འདིའི་ལས་འགུལ་སྤེལ་བ་ཞིག་ཡིན་པ་རེད།
