རྒྱ་གར་བྱང་ཤར་ནུབ་སྦེང་གྷལ་མངའ་སྡེའི་ Darjeeling གྲོང་ཁྱེར་ནང་དུ་སྨན་ཞབས་པའི་ཕྱག་ལས་གནང་བཞིན་པའི་བོད་རིགས་བེུད་ལྷ་མོ་དབྱངས་འཛོམ་ལགས་ལ་རྒྱལ་སྤྱིའི་ Rotary ཚོགས་པའི་རྡོ་རྗེ་གླིང་སྡེ་ཚན་གྱིས་ལས་རིགས་ཞབས་ཞུའི་གཟེངས་རྟགས་འབུལ་བཞེས་གནང་འདུག
དེ་རིང་རྡོ་གླིང་གཞོན་ནུའི་གླེང་སྟེགས་ཀྱི་ངོ་དེབ་དྲ་ལམ་ཐོག་ལྷ་མོ་དབྱངས་འཛོམས་ལགས་ཀྱི་གཟེངས་རྟགས་བཞེས་པའི་སྐུ་པར་དང་འབྲེལ་ནས་དེའི་སྐོར་གནས་ཚུལ་སྤེལ་འདུག ལྷ་མོ་དབྱངས་འཛོམས་ལགས་ཀྱིས་མི་རིགས་དང་དབུལ་ཕྱུག་དབྱེར་མེད་ངང་ནས་རང་ཉིད་ཀྱི་སྨན་ཞབས་པའི་ལས་རིགས་ཐོག་ལྷག་བསམ་རྣམ་དག་གིས་གཉེར་བར་ངོས་འཛིན་དང་འབྲེལ། ས་གནས་ Rotary ཚོགས་པའི་ངོས་ནས་ཟླ་བ་འདིའི་ཕྱི་ཚེས་ ༡༣ ཉིན་ཁོང་ལ་ལོ་འདིའི་ལས་རིགས་ཞབས་ཞུའི་གཟེངས་རྟགས་འབུལ་རྒྱུའི་ཐུགས་གཏན་ཁེལ་བའི་ཕྱག་བྲིས་ཤིག་ཕུལ་འདུག Rotary ཚོགས་པའི་ངོས་ནས་ཕྱི་ཟླ་ ༡༠ པ་འདི་སྤྱི་ཚོགས་ཁྲོད་ལས་རིགས་འདྲ་མིན་ལ་ཆེ་བསྟོད་ཞུ་རྒྱུའི་ཟླ་བར་སྲུང་བརྩི་གནང་གི་ཡོད་པ་དང་བསྟུན། སྤྱི་ཚོགས་ཁྲོད་ལས་རིགས་ཞབས་ཞུ་གཟེངས་ཐོན་བསྒྲུབས་པའི་ཐོག་སོ་སོའི་ལས་རིགས་ཀྱི་ཆེ་མཐོང་གོང་འཕེལ་གཏོང་མཁན་གྱི་གང་ཟག་རྣམས་ལ་ཆེ་བསྟོད་འབུལ་གྱི་ཡོད་པ་ལྟར་ལྷ་མོ་དབྱངས་འཛོམས་ལགས་ཀྱིས་རང་དོན་བློས་གཏོང་གིས་སྤྱི་ཚོགས་ཞབས་ཞུ་གནང་བ་དང་། རང་ཉིད་ཀྱི་གཟེངས་ཐོན་ཕྱག་ལས་ཐོག་ནས་སྨན་ཞབས་པའི་ལས་རིགས་ཀྱི་ཆེ་མཐོང་གོང་འཕེལ་གནང་བར་ལོ་འདིའི་ལས་རིགས་ཞབས་ཞུའི་གཟེངས་རྟགས་དེ་ཁོང་ལ་འབུལ་གཏན་ཁེལ་ཡོད་པ་གསུངས་ཏེ་ཉེ་ཆར་ཕྱི་ཚེས་ ༡༧ ཉིན་རྡོ་རྗེ་གླིང་ནང་དུ་རྟེན་གཞི་བྱས་པའི་ Little Tibet ཞེས་པའི་གསོལ་མགྲོན་ཁང་དུ་མཛད་སྒོ་གཟབ་རྒྱས་ཤིག་གི་ཐོག་ཁོང་ལ་གཟེངས་རྟགས་དེ་དངོས་སུ་འབུལ་བཞེས་གནང་འདུག
གསར་འགོད་པས་དེ་རིང་ཞལ་པར་བརྒྱུད་ལྷ་མོ་དབྱངས་འཛོམས་ལགས་སུ་བཀའ་འདྲི་ཞུས་པར་ཁོང་གིས་རང་ཉིད་ནས་ལྷག་བསམ་རྣམ་དག་གིས་རང་གི་ལས་རིགས་ཞུབས་ཞུ་སྒྲུབ་པར་ངོས་འཛིན་གནང་བར་དགའ་སྤོབས་ཆེན་པོ་བྱུང་ཡོད་པ་དང་། གཟེངས་རྟགས་དེ་བརྒྱུད་ནས་ས་གནས་བོད་རིགས་མང་ཚོགས་ལ་ཡུལ་མིའི་ལྟ་ཕྱོགས་བཟང་བ་དང་ཆེ་མཐོང་ཆེ་རུ་འགྲོ་རྒྱུ་ཡིན་པར་དགའ་སྤོབས་ཆེན་པོ་བྱུང་སྐོར་གསུངས་སོང་། 
གཞན་ཡང་དེ་མཚུངས་སུ་དེ་རིང་ Ireland བོད་རིགས་ཚོགས་པའི་ངོ་དེབ་དྲ་ལམ་ཐོག་གནས་ཚུལ་སྤེལ་བར་ཡུལ་དེའི་ Dublin གྲོང་ཁྱེར་ནང་དུ་སྨན་ཞབས་པ་དང་ Yoga ལུས་སྦྱོང་དགེ་རྒན་གྱི་ཕྱག་ལས་གནང་བཞིན་པའི་བོད་རིགས་བེུད་ཡེ་ཤེས་དབང་མོ་ལགས་ནས་འདི་ལོའི་ཕྱི་ཟླ་ ༨ པའི་ནང་ཚོགས་པའི་ International Yoga Olympic རྩེད་འགྲན་ཐེངས་དང་པོ་ཚོགས་པའི་ཐོག་བོད་ཀྱི་སྐུ་ཚབ་ཐོག་ནས་མཉམ་ཞུགས་གནང་སྟེ་བེུད་ Yoga ལུས་སྦྱོང་རྩེད་འགྲན་ནང་ཨང་གཉིས་པའམ་དངུལ་གྱི་རྟགས་མ་ཐོབ་འདུག ཁོང་གིས་ད་ལྟའི་ཆར་ Ireland ནང་དུ་སྨན་ཞབས་པའི་ཕྱག་ལས་གནང་མུས་རེད་འདུག
