རྒྱ་ནག་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ཁུལ་དུ་ད་ཆ་ཏོག་དབྱིབས་རིམས་ནད་ཕོག་པའི་མི་གཅིག་ཀྱང་མེད་སྐོར་དང་རྒྱ་ནག་ཁྱོན་ཡོངས་སུ་རིམས་ནད་འགོག་སྲུང་གང་ལེགས་བྱས་ཡོད་ཚུལ་སོགས་འགྲེལ་བརྗོད་བྱས་ཏེ་བོད་ཀྱི་དགོན་སྡེ་གྲྭ་ཚང་དང་ཚོང་གི་ལྟེ་གནས་ཁག་རིམ་བཞིན་སྒོ་ཕྱེ་རྒྱུ་ཡིན་སྐོར་བཤད་ཡོད། འོན་ཀྱང་བོད་ལྷོ་ཁ་ཁུལ་དུ་ཆགས་པའི་བསམ་ཡས་དགོན་པ་དང་བཀའ་བརྒྱུད་ཀྱི་ཆོས་སྡེ་ཆེན་པོ་གཡའ་བཟང་དགོན་པ་གཉིས་སླར་སྒོ་རྒྱག་དགོས་པའི་བཀའ་རྒྱ་བཏང་འདུག
ཟླ་བ་སྔོན་མའི་ཕྱི་ཚེས་ ༣༠ ཉིན་ལྷ་ས་གྲོང་ཁྱེར་ནང་བསྟན་མཐུན་ཚོགས་ནས་ལྷ་ས་གྲོང་ཁྱེར་དང་ཐག་རིང་གི་དགོན་པ་དང་ལྷ་ཁང་གྲངས་ ༢༤༡ ཕྱི་ཟླ་ ༣ ཚེས་ ༣༡ ནས་སྒོ་ཕྱེ་རྒྱུ་ཡིན་པ་ཡོངས་གྲགས་བྱས་ཡོད་པ་དེ་ལྟར་ཡང་། ཟླ་བ་འདིའི་ཚེས་ ༡༤ དང་ ༡༥ སོ་སོར་བསམ་ཡས་དང་གཡའ་བཟང་དགོན་པའི་ལས་ཤོག་ཐོག་ཏུ་གོང་རིམ་གྱི་བརྡ་ཐོ་དང་ཏོག་དབྱིབས་ནད་རིམས་འགོག་བཅོས་ཀྱི་ལས་ཀའི་དགོས་མཁོར་དམིགས་ནས་བསམ་ཡས་དགོན་པ་ཕྱི་ཟླ་ ༤ ཚེས་ ༡༤ ནས་སྒོ་རྒྱག་རྒྱུ་དང་དེ་བཞིན་གཡའ་བཟང་དགོན་པ་ཚེས་ ༡༥ ནས་སྒོ་རྒྱག་རྒྱུ་ཡིན་ཞེས་གསལ་བསྒྲགས་སྤེལ་འདུག
གསལ་བསྒྲགས་དེའི་ནང་བོད་པའི་དགོན་པ་དེ་གཉིས་སླར་སྒོ་རྒྱག་དགོས་པའི་ཞིབ་ཕྲའི་རྒྱུ་མཚན་དང་དུས་ཚོད་ནམ་ཞིག་གི་བར་སྒོ་རྒྱག་རྒྱུ་ཡིན་པ་སོགས་ཁ་གསལ་གང་ཡང་བཀོད་མེད་པ་དང་། བརྒྱུད་ལམ་ཁག་ཏུ་དེ་འབྲེལ་གནས་ཚུལ་ཐོན་ཁག་ལ་གཞིགས་ན་ས་གནས་བོད་མི་ཚོས་ཐེངས་འདིའི་གོང་རིམ་གྱི་བཀའ་རྒྱ་དེ་ཏོག་དབྱིབས་རིམས་ནད་ལ་ཁག་དཀྲི་པ་ཞིག་ཡིན་ཀྱང་དོན་དངོས་སུ་རྒྱུ་རྐྱེན་གཞན་ཞིག་ཡོད་སྲིད་པར་ཚོད་དཔག་གནང་གི་འདུག
གཞི་རྩའི་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁུལ་གྱི་འཕྲོད་བསྟེན་བདེ་ཐང་ལྷན་ཁང་གི་བརྡ་ཁྱབ་ལྟར་བྱས་ན་ཁུལ་དེར་ད་བར་རིམས་ནད་ཕོག་པ་གཅིག་བྱུང་བ་དེ་དྲག་སྐྱེད་བྱུང་ཡོད་པ་དང་། ད་ལྟའི་ཆར་རིམས་ནད་ཕོག་པ་དང་ནད་རྟགས་ཡོད་པའི་མི་གཅིག་ཀྱང་མེད་སྐོར་བརྗོད་འདུག་ཀྱང་། རྒྱལ་སྤྱིའི་གཞུང་དང་གཞུང་འབྲེལ་མ་ཡིན་པའི་ཚོགས་པ། ལྷག་པར་དུ་འཕྲོད་བསྟེན་དཔྱད་ཞིབ་པ་མང་དག་ཅིག་གིས་རྒྱ་ནག་གཞུང་གིས་ཏོག་དབྱིབས་གཉན་རིམས་ཕོག་པ་དང་འདས་གྲོངས་སུ་གྱུར་བ་སོགས་དང་འབྲེལ་བའི་གྲངས་ཐོའི་ཐོག་སྦས་བསྐུངས་བྱེད་བཞིན་པར་སྐྱོན་བརྗོད་ཤུགས་ཆེ་གནང་མུས་ཡིན་པ་རེད།
