སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་སུ་བདམས་ཐོན་བྱུང་བའི་འཐུས་མི་རྣམ་པ་སྡིངས་ཆ་གཅིག་གི་ཐོག་ཏུ་བབས་ཏེ་ཚོགས་གཙོ་ཚོགས་གཞོན་གྱི་འོས་བསྡུའི་ལས་རིམ་གཙོས་གྲོས་ཚོགས་ཀྱི་ལས་དོན་ཁག་སྔར་རྒྱུན་བཞིན་གནང་མ་ཐུབ་པའི་དཀའ་རྙོག་དེ་དེ་མུར་ལྷག་ནས་ཟླ་བ་གཉིས་ཙམ་འགྲོ་བཞིན་པའི་མཚམས་འདིར་བཞུགས་སྒར་དུ་རྟེན་གཞི་བྱས་པའི་བོད་མིའི་གཞུང་འབྲེལ་མ་ཡིན་པའི་ཚོགས་པ་ཆེ་གྲས་བཞི་ཐུན་མོང་གིས་ཟླ་ ༨ ཚེས་ ༤ ཉིན་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་འོས་འདེམས་དང་འཛིན་སྐྱོང་བཀའ་ཤག་གི་བཀའ་བློན་འོས་འདེམས་སོགས་གྲོས་ཚོགས་ཀྱི་ལས་རིམ་སྔར་རྒྱུན་བཞིན་འགྲོ་ཐུབ་རྒྱུར་འབྲེལ་ཡོད་ཕྱོགས་ཡོངས་ནས་དགོངས་པ་བཞེས་དགོས་པའི་རེ་སྐུལ་དོན་ཚན་གསུམ་ཅན་གྱི་ལས་རིམ་ཞིག་དབུ་འཛུགས་གནང་ཡོད་པ་རེད།
རེ་སྐུལ་གྱི་ལས་རིམ་དེ་གནང་སྟེ་བདུན་ཕྲག་གཉིས་ཙམ་འགྲོ་བཞིན་པའི་མཚམས་དེ་རིང་ཕྱི་ཚེས་ ༡༨ ཉིན་གྱི་སྔ་དྲོའི་ཆུ་ཚོད་ ༡༡ ཐོག་བོད་མིའི་གཞུང་འབྲེལ་མ་ཡིན་པའི་ཚོགས་པ་ཆེས་གྲས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་དང་བོད་ཀྱི་བེུད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས། བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་ཚེ་བརྟན་ནོར་བུ་ལགས། རྒྱ་གར་བོད་རང་བཙན་སློབ་ཕྲུག་ཚོགས་པའི་འགན་འཛིན་རིག་འཛིན་ཆོས་སྒྲོན་ལགས་བཅས་ཀྱིས་གསར་འགོད་ལྷན་ཚོགས་ཤིག་གནང་སྟེ་ད་ཆ་རྒྱལ་སྤྱིའི་ཁྱོན་ཡོངས་ནས་རྒྱ་ནག་ལ་གནོན་ཤུགས་སྤྲོད་བཞིན་པའི་དུས་སྐབས་དང་བོད་ནང་གི་གནས་སྟངས་ཛ་དྲགས་ཆེས་ཆེར་འགྲོ་བཞིན་པའི་གནས་སྟངས། དེ་བཞིན་འབྱུང་འགྱུར་རྒྱ་ནག་ནང་དུ་རྒྱལ་སྤྱིའི་དགུན་དུས་ཨོ་རྩེད་འགྲན་ཚོགས་འཚོགས་གཏན་ཁེལ་བ་སོགས་ཀྱི་དུས་སྐབས་འདིར་བོད་དོན་ལས་འགུལ་སྔར་ལྷག་སྤེལ་དགོས་པའི་སྐབས་ཤིག་ཆགས་ཀྱི་ཡོད་སྟབས། ང་ཚོ་ནང་ཁུལ་ཕན་ཚུལ་དབར་ཤོག་ཁག་སྒྲིག་རེས་དང་། ཚིག་རྩོད་རྒྱག་རེས་ལ་དབུ་འཁོར་ནས་བཞུགས་ཐབས་རྩ་བ་ནས་མེད་པའི་ཁར་བོད་དོན་མ་སེལ་གྱི་བར་དུ་ལས་འགུལ་རྒྱུན་སྐྱོང་དང་ཆོལ་གསུམ་ཆིག་སྒྲིལ་གནང་དགོས་པའི་འགན་འཁྲི་དེ་མི་མང་གིས་འོས་འདེམས་ཞུས་པའི་དབུ་ཁྲིད་ཚོར་ཡོད་པ་གཡོལ་ཐབས་མེད་པ་ཞིག་ཡིན་པར་བརྟེན་བོད་མིའི་རྩ་དོན་འཐབ་རྩོད་ཀྱི་གཞི་རྩ་བོད་མིའི་མང་གཙོའི་གཞུང་འདི་རྒྱུན་གནས་ཡོང་ཆེད་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་དང་འཛིན་སྐྱོང་བཀའ་ཤག་གི་བཀའ་བློན་འོས་འདེམས་སོགས་གྲོས་ཚོགས་ཀྱི་ལས་རིམ་ཁག་སྔར་རྒྱུན་བཞིན་འགྲོ་ཐུབ་ཐབས་སུ་འབྲེལ་ཡོད་ཕྱོགས་ཚང་མས་སྤྱི་དོན་དོན་ལ་དགོངས་བཞེས་ཀྱིས་ནང་ཁུལ་ལེ་འགྲིག་ཅིག་གནང་སྐྱོང་ཡོང་བའི་རེ་སྐུལ་ནན་པོ་ཞུས་ཡོད་ཀྱང་། ཚོགས་པ་བཞིས་བཏོན་པའི་རེ་སྐུལ་ལ་ནུས་པ་ཐོན་ཐབས་མེད་པའི་གནད་དོན་གསལ་ཤེས་བྱུང་བར་བརྟེན་དེ་རིང་ནས་རེ་སྐུལ་དེ་དག་དང་འབྲེལ་བའི་ལས་རིམ་ཡོངས་རྫོགས་མཚམས་འཇོག་ཞུ་རྒྱུ་ཡིན་ཞེས་གསུངས་སོང་། 
གཞུང་ཁོངས་མ་ཡིན་པའི་ཚོགས་ཁག་བཞིས་དེ་སྔ་དོན་ཚན་གསུམ་ཅན་གྱི་རེ་སྐུལ་བཏོན་པ་དེའང་ཚོགས་པ་སོ་སོའི་དམིགས་ཡུལ་གཞིར་བཞག་ཐོག་གཞན་གྱི་གནོད་ཤུགས་དང་བརྒྱུད་སྐུལ་ཕྱོགས་ལྷུང་སོགས་ཀྱི་དབང་དུ་མ་སོང་བར་དྲང་ཚུགས་ཀྱི་ཐོག་སྤྱི་དོན་ཁོ་ནར་བསམ་ཞིབ་དང་འགན་འཁུར་ཞུས་པ་ཞིག་ཡིན་པ་སོགས་གསུངས་པ་དང་ཆབས་ཅིག ཚོགས་ཁག་བཞིས་༸གོང་ས་མཆོག་གི་དབུ་འོག་དཔུང་འདེགས་དང་བོད་དོན་འཐབ་རྩོད་ཀྱི་ལས་འགུལ་རྒྱུན་སྐྱོང་སྤེལ་རྒྱུའི་ཆོད་སེམས་བརྟན་པོ་ཡོད་ཅེས་གསུངས་ཡོད།
གཞི་རྩའི་ཉེ་ལམ་བོད་མིའི་ཚོགས་ཁག་ཆེ་གྲས་བཞིས་ད་ཆ་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ལས་རིམ་རྒྱུན་སྐྱོང་མ་ཐུབ་པར་ལྷག་པའི་གནད་དོན་དེ་སེལ་ཆེད་དུ་དེ་སྔ་ཕྱི་ཟླ་ ༦ ཚེས་ ༨ ཉིན་བདམས་ཐོན་སྤྱི་འཐུས་ ༤༤ ནས་དམ་འབུལ་ཞུ་ཡུལ་ཁག་གཉིས་ཀྱི་ཐོག་ནས་དམ་འབུལ་བཞེས་ཟིན་པ་དེ་དག་བཅའ་ཁྲིམས་ནང་གསལ་ཆ་མེད་ཀྱང་དེ་སྔ་ཚོགས་གཙོ་རེས་མོས་གནང་བའི་ལམ་ལུགས་ཡོད་པ་བཞིན། ད་ཆ་ནང་ཁུལ་ཁྲིམས་སྒྲིག་གི་འགྲེལ་བཤད་ལས་གལ་ཆེ་བ་བོད་མིའི་རྩ་དོན་འཐབ་རྩོད་ཀྱི་གཞི་རྩ་བོད་མིའི་མང་གཙོའི་གཞུང་འདི་བསྐྱར་གསོ་དང་རྒྱུན་གནས་ཡོང་ཕྱིར་སྤྱི་འཐུས་རྣམ་པ་བཞུགས་མོལ་ཚོགས་འདུ་འཚོགས་ཏེ་མང་མོས་གང་བྱུང་ཐོག་གྲོས་ཚོགས་ཀྱི་ལས་རིམ་སྔར་རྒྱུན་བཞིན་འགྲོ་ཐུབ་རྒྱུར་འབྲེལ་ཡོད་ཕྱོགས་ཡོངས་ནས་དགོངས་པ་བཞེས་དགོས་པ་དང་། མ་འོངས་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ལས་རིམ་དབུ་བཙུགས་པའི་རྗེས་སུ་ཕྱོགས་ཚང་མས་གཞུང་བསྟེན་སྲུང་མ་དམར་ནག་གཉིས་དཔང་པོར་བཞག་སྟེ་ད་ལྟའི་དཀའ་རྙོག་ཐོག་གླེང་སློང་མི་གནང་བའི་ཁས་ལེན་དང་། ད་ཡོད་བཙན་བྱོལ་བོད་མིའི་བཅའ་ཁྲིམས་ནང་ཁ་གསལ་མེད་པ་དང་འགྲེལ་བཤད་གནང་ཕྱོགས་མི་འདྲ་བའི་སྐྱོན་ཆ་དང་དོགས་གནས་གང་ཡོད་རྣམས་སེལ་ཐབས་སུ་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཆེད་འཛུགས་གནང་གལ་ཡོང་བ་བཅས་དོན་ཚན་གསུམ་གྱི་ཐོག་ནས་རེ་སྐུལ་ཞུས་ཡོད།
ཕྱི་ཚེས་ ༤ ཉིན་ཚོགས་ཁག་བཞིས་བཏོན་པའི་དོན་ཚན་གསུམ་ཅན་གྱི་རེ་སྐུལ་དེ་ཕྱོགས་གཉིས་སུ་གྱེས་པའི་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་བདམས་ཐོན་སྤྱི་འཐུས་རྣམ་པ་དང་། དབུས་འོས་བསྡུ་ལས་ཁང་། འཛིན་སྐྱོང་བཀའ་ཤག་བཅས་སུ་ཕུལ་ཡོད་པ་དང་། སྐབས་དེར་བོད་པའི་སྤྱི་ཚོགས་ཁྲོད་དུ་ཁག་ཅིག་གིས་ཚོགས་ཁག་བཞིས་གྲོས་ཚོགས་ཀྱི་དཀའ་ངལ་དེ་སེལ་ཐབས་གནང་བར་དགའ་བསུ་ཞུས་པ་དང་། ཁག་ཅིག་ནས་ཚོགས་ཁག་བཞིའི་རེ་འདུན་དེ་དག་ཕྱོགས་གཅིག་ལ་དམིགས་པ་ཞིག་ཡིན་སྐོར་སོགས་ཀྱི་སྐྱོན་བརྗོད་གནང་མཁན་བྱུང་བ་མ་ཟད། ཕྱི་ཚེས་ ༡༡ ཉིན་དེ་སྔ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༤༧ དགོངས་དོན་ལྟར་བར་བརྒལ་ཚོགས་གཙོའི་དྲུང་ནས་དམ་འབུལ་ཞུ་མཁན་ཁོངས་སུ་ཡོད་པ་དབུས་གཙང་དང་མདོ་སྨད་སྤྱི་འཐུས་ ༡༩ ཐུན་མོང་ནས་ཚོགས་ཁག་བཞིས་ཕྱོགས་གཉིས་འདུམ་འགྲིག་ཡོང་ཐབས་ལ་ནང་ཁུལ་ཞི་ལྷིང་གྲོས་མོལ་གྱི་ཐབས་ལམ་མི་བསྟེན་པ་དང་ཁྲིམས་མཐུན་དམ་འབུལ་མི་ཞུ་མཁན་ལ་གོ་སྐོན་གསལ་བཤད་གནང་རྒྱུའི་ཚབ་ཏུ་ཁྲིམས་མཐུན་དམ་འབུལ་ཞུས་ཏེ་འགྲིག་འཇགས་ཡོང་རྒྱུར་འབད་བརྩོན་ཞུ་མཁན་ཚོ་ཁྲིམས་འགལ་ནང་འཛུལ་རོགས་ཞེས་ཨུ་ནན་བྱེད་སྟངས་བཅས་ལ་གཞིགས་ན་ནང་ཀུན་སློང་༸གོང་ས་མཆོག་གིས་གསོལ་སྩལ་མཛད་པའི་མང་གཙོའི་སྒྲིག་འཛུགས་འདི་གཏོར་འདོད་རེད་ཟེར་དཀའ་ཡང་། ཕྱིའི་ཀུན་སྤྱོད་བཅའ་ཁྲིམས་རིན་པོ་ཆེ་དང་མང་གཙོའི་སྒྲིག་འཛུགས་འདི་ཉིད་གཏོར་བཤིག་ལ་རོགས་ཕན་གནང་གི་ཡོད་པར་ངོས་འཛིན་མི་བྱེད་ཐབས་མེད་ཡིན་པ་སོགས་ཤོག་གྲངས་ལྔ་ཅན་གྱི་གསལ་བཤད་གནང་བ་དང་སྦྲགས། གལ་སྲིད་ཚོགས་ཁག་བཞི་ལ་ཁྲིམས་སྒྲིག་ལྟར་སྐབས་ ༡༧ པའི་སྤྱི་འཐུས་ལྷན་ཚོགས་ཚོགས་ཐབས་ཤིག་ཡོད་ན་མཉམ་ཞུགས་གནང་རྒྱུར་གྲ་སྒྲིག་ཨང་གསར་ཡོད་ཅེས་གསུངས་ཡོད།
དེ་རིང་གསར་འགོད་ལྷན་ཚོགས་སྐབས་གསར་འགོད་པས་དེ་སྔ་༸གོང་ས་མཆོག་གི་༸སྐུ་པར་དང་བཅའ་ཁྲིམས་རིན་པོ་ཆེའི་མདུན་ནས་དམ་འབུལ་བཞེས་མཁན་གྱི་བདམས་ཐོན་སྤྱི་འཐུས་ཚོས་ཚོགས་པ་བཞིའི་རེ་སྐུལ་ཐད་ལན་འདེབས་གསལ་བཤད་ཅིག་གནང་ཡོད་དམ་ཞེས་བཀའ་འདྲི་ཞུས་པར་ཚོགས་པ་བཞིས་བཏོན་པའི་རེ་སྐུལ་ལ་ནུས་པ་ཐོན་ཐབས་མེད་པའི་གནད་དོན་གསལ་ཤེས་བྱུང་ཞེས་བསྒྲགས་གཏམ་ནང་བཀོད་པའི་གསལ་བཤད་དེ་ལས་གཞན་པའི་བརྒྱུད་རིམ་གཞན་གྱི་སྐོར་ལ་ལན་འདེབས་གང་ཡང་གནང་མེད།
