དེ་རིང་སྔ་དྲོ་ཕྱག་ཚོད་ ༩ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོན་ཏོན་གྱི་དཔལ་འབྱོར་རིག་པའི་སློབ་གཉེར་ཁང་གི་བདེ་སྐྱིད་ལག་ལེན་ཐོབ་ཐབས་ཀྱི་ལས་འགུལ་ཚོགས་པའི་ཚོགས་གཙོ་མཁས་དབང་ Prof. Lord Richard Layard ལགས་དང་ལྷན་དུ་བདེ་སྐྱིད་སྔར་ལས་ལྷག་པའི་འཛམ་གླིང་བསྐྲུན་ཚུལ་ཞེས་པའི་བརྗོད་གཞིའི་ཐོག་དྲ་ལམ་བཀའ་སློབ་གནང་སྟེ། རིགས་རུས་ལ་ལྟོས་མེད་ཀྱི་འགྲོ་བ་མིའི་གཅིག་གྱུར་གྱི་འདུ་ཤེས་སྐྱེད་གལ་ཡིན་པའི་བཀའ་སློབ་ལམ་སྟོན་སྩལ་སོང་།
དེ་ཡང་དེ་རིང་གི་བཀའ་སློབ་གྱི་ཐོག་མར་མགོན་པོ་གང་གིས། འགྲོ་བ་མིའི་རིགས་ནི་ཐོག་མར་སྐྱེས་བ་ནས་བཟུང་རང་གི་ཨ་མའི་གཙོ་བྱས་པའི་སྤྱི་ཚོགས་ཀྱི་བྱམས་བརྩེ་ལ་བརྟེན་ནས་འཚར་ལོང་བྱུང་གི་ཡོད་པ་ཞིག་ཡིན་པའི་བཀའ་འབྲེལ་དང་ལྷན་དུ། བྱམས་བརྩེ་ནི་འགྲོ་བ་མིའི་རིགས་ཀྱི་རྒྱུད་དུ་གདོད་མ་ནས་གནས་བ་ཞིག་ཡིན་ནའང་། ནུབ་ཕྱོགས་ཀྱི་སྤྱི་ཚོགས་ནས་དར་ཁྱབ་བྱུང་བའི་ཤེས་ཡོན་གྱི་ལམ་ལུགས་དེ་དངོས་གཙོ་རིང་ལུགས་ལ་རྨང་གཞི་བྱས་ཡོད་པ་ཞིག་ཡིན་སྟབས། ། ད་ལྟའི་ཤེས་ཡོན་ལམ་ལུགས་ཀྱི་ནང་དུ་སེམས་ཀྱི་ཞི་བདེ་སྐྲུན་ཐབས་དང་། ལས་སེམས་ཀྱི་འཕྲོད་བསྟེན་ཡར་རྒྱས་གཏོང་ཐབས། དེ་བཞིན་བདེ་སྐྱིད་ཀྱི་ཁྱིམ་ཚང་སྐྲུན་ཐབས་སོགས་ཀྱི་བསླབ་གཞི་གཏན་འབེབས་བྱེད་གལ་ཡིན་པའི་བཀའ་སྟོན་ལམ་སྟོན་བཀའ་དྲིན་ཆེ་བ་སྩལ་སོང་།
དེ་བཞིན་མགོན་པོ་གང་གིས་དུས་རྒྱུན་ནས་འགྲོ་བ་མིའི་གཅིག་གྱུར་གྱི་འདུ་ཤེས་སྐྲུན་ཐབས་ལ་ཐུགས་བརྩོན་གནང་གི་ཡོད་པར་བཀའ་སྩལ་ཏེ། འཛམ་གླིང་གི་ཤར་ལྷོ་ནུབ་བྱང་གི་གང་དུ་གནས་བའི་འགྲོ་བ་མི་ཡོངས་རྫོགས་ཆོས་ལུགས་མ་འདྲ་བའི་རྗེས་འབྲངས་ཡིན་པ་དང་། དེ་བཞིན་རྒྱལ་ཁོངས་མི་གཅིག་པ་དང་བཞིན་རས་ཀྱི་ཁ་ཏོག་ཀྱང་མི་གཅིག་ནའང་། གཞི་རྩའི་འགྲོ་བ་མི་ཡིན་པ་གཅིག་གྱུར་ཡིན་སྟབས། འགྲོ་བ་མི་གཅིག་གྱུར་ཡིན་པའི་འདུ་ཤེས་དེ་གཙོ་བོར་འཛིན་དགོས་བ་ལས་ཆོས་ལུགས་དང་རྒྱལ་ཁོངས་སོགས་རིམ་པ་གཉིས་བ་ཡིན་སྟབས། འགྲོ་བ་མིའི་གཅིག་གྱུར་གྱི་འདུ་ཤེས་གོང་སྤེལ་བཏང་བའི་ཐོག་ནས་བདེ་སྐྱིད་ལྡན་པའི་སྤྱི་ཚོགས་ཤིག་སྐྲུན་ཐབས་གནང་དགོས་བར་བཀའ་སྩལ་སོང་།
གཞན་ཡང་མགོན་པོ་གང་གིས་བོད་ཀྱི་རིག་གཞུང་ནི་གཞན་ལ་འཚེ་བ་མི་བྱེད་པའི་སྲོལ་རྒྱུན་ལ་གཞི་བྱས་པ་ཞིག་ཡིན་པར་ལུང་འདྲེན་མཛད་པ་དང་འབྲེལ་ནས། གང་ཉིད་ཀྱིས་འདས་བའི་ལོ་ངོ་བཅུ་ཕྲག་ཁ་ཤས་ཀྱི་ནང་དུ་འཛམ་གླིང་གང་སར་སེམས་ཀྱི་ཞི་བདེ་ཁྱབ་སྤེལ་བྱེད་རྒྱུར་ཕྱག་ལས་མཛད་ཡོད་པའི་ཁྲོད། ནུབ་ཕྱོགས་ཀྱི་ཚན་རིག་པ་མང་པོར་མཇལ་འཕྲད་གནང་པ་དང་། ད་ཆ་ཚན་རིག་པ་རྣམས་ཀྱིས་ཀྱང་སེམས་ཀྱི་ཞི་བདེའི་གལ་གནད་ཆེན་པོར་བརྩི་བཞིན་ཡོད་པར་བཀའ་སྩལ་ནས། ཁོང་ཁྲོ་དང་རྣམ་རྟོག་བྲལ་བའི་ཐོག་སེམས་ཀྱི་ཞི་བདེ་ཡོད་པ་ཡིན་ན་ལུས་སེམས་ཞི་ལྷོད་ངང་གནས་ཐུབ་པ་ཞིག་ཡིན་པར་བཀའ་སྩལ་སོང་།
དེ་རིང་གི་བཀའ་སློབ་ལས་རིམ་གྲུབ་མཚམས་སུ་མགོན་པོ་གང་གིས་ལས་རིམ་ལ་ཞུགས་མཁན་རྣམས་ཀྱི་བཀའ་འདྲི་དགོངས་སྐོར་གནང་བ་ཁག་ལ་བཀའ་ལན་སྩལ་བའི་ཁྲོད་དུ། གྲོགས་པོའི་མཛའ་འབྲེལ་ཇི་ལྟར་རྒྱུན་སྐྱོང་གནང་དགོས་བའི་བཀའ་ལན་དུ། འགྲོ་བ་མིའི་རིགས་ཀྱིས་རང་ཉིད་གཞན་ལས་ཐ་དད་པར་འཛིན་པའི་བློ་སྤངས་ཏེ་རང་ཉིད་ཀྱི་སྤྱི་ཚོགས་དང་སྲིད་གཞུང་སོགས་ལ་གཙིགས་འཛིན་བྱེད་རྒྱུ་མེད་པར། ཕ་རོལ་བ་དེ་ཡང་འགྲོ་བ་མི་གཅིག་གྱུར་གྱི་གཅེན་གཅུང་ཞིག་ཏུ་ངོས་འཛིན་གནང་བ་ཡིན་ན། ཕན་ཚུན་གྱི་འབྲེལ་ལམ་ཇེ་ལེགས་སུ་གཏོང་ཐུབ་པ་ཞིག་པའི་བཀའ་ལན་སྩལ་སོང་།
གཞན་ཡང་འཛུལ་ཞུགས་པ་ཞིག་གིས་རང་ཉིད་ཀྱི་ཨ་ཕ་འདི་ལོར་འདས་གྲོངས་སུ་ཕྱིན་ཡོད་སྟབས་སེམས་ཀྱི་སྡུག་བསྔལ་ལས་གྲོལ་ཐབས་ཀྱི་ཐད་ནས་བཀའ་འདྲི་ཞུས་པར་མགོན་པོ་གང་གིས། འཇིག་རྟེན་གྱི་བྱ་བཞག་ཡོད་ཚད་ཀྱི་ཁྲོད་དུ་འདས་ཟིན་པ་ཞིག་ལ་སེམས་ཁྲལ་བྱས་ནས་ཕན་ཐོགས་ལྡན་པ་ཞིག་ཡིན་ན་སེམས་ཁྲལ་བྱ་འོས་བ་ཞིག་ཡིན་ནའང་། སེམས་ཁྲལ་བྱས་ཀྱང་འདས་ཟིན་པའི་གནད་དོན་དེར་བསྐྱར་ལོག་བྱེད་ཐབས་བྲལ་བ་ཞིག་ཡིན་ན་སེམས་ཁྲལ་བྱས་ནས་ཕན་ཐོགས་གང་ཡང་མེད་སྟབས། དེ་ལས་འདས་བོ་གང་གིས་རང་ཉིད་ལ་བཅིངས་བའི་རེ་བ་དེ་དག་ལེགས་འགྲུབ་ཡོང་ཐུབ་ལ་བརྩོན་པ་གནང་རྒྱུ་དང་། དེ་བཞིན་རང་ཉིད་ཀྱི་མཐའ་འཁོར་ན་ཡོད་པའི་མི་དག་ལ་བརྩེ་བ་སྦྱིན་རྒྱུ་དེ་གལ་ཆེན་པོ་ཡིན་པའི་ལམ་སྟོན་སྩལ་ཏེ་དེ་རིང་གི་བཀའ་སློབ་ལམ་སྟོན་གྱི་མཛད་རིམ་དེ་མཇུག་སྒྲིལ་མཛད་སོང་།
