འཕགས་བོད་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་མཐའ་སྲུང་དམག་མིའི་དབར་ས་ཆའི་བདག་དབང་གི་གནད་དོན་སོགས་དང་འབྲེལ་ཏེ་རྩོད་རྙོག་མི་ཉུང་བ་ཞིག་འབྱུང་བཞིན་པར་བརྟེན་འབྲོག་པ་ཚོས་རང་གི་སྒོ་ཕྱུགས་རྣམས་རྩྭ་ཆུ་བཟང་སར་འཚོ་ཐབས་དཀའ་བའི་ངལ་བ་འཕྲད་བཞིན་ཡོད་པ་མངོན་གསལ་གནང་འདུག 
ཁ་སང་རྒྱ་གར་གྱི་ Hindustan Times གསར་སྤེལ་ཁང་གིས་གནས་ཚུལ་སྤེལ་བར་ལ་དྭགས་ཆུ་ཤུལ་གྲོང་སྡེའི་འཐུས་མི་དཀོན་མཆོག་བསྟན་འཛིན་ལགས་ཀྱིས་གསར་ཁང་ལ་ད་ལྟའི་ཆར་འཕགས་བོད་གཉིས་ཀྱི་ས་མཚམས་སུ་རྒྱ་དཀར་ནག་གི་དམག་མིའི་དབར་ས་ཆའི་བདག་དབང་དང་འབྲེལ་ཏེ་རྩོད་རྙོག་མི་ཉུང་བ་ཞིག་འབྱུང་བཞིན་ཡོད་པའི་ཁར་ཕྱོགས་གཉིས་ནས་མཐའ་མཚམས་སྲུང་སྐྱོབ་ལ་དམིགས་ཏེ་དམག་མི་སྔར་ལྷག་འཕར་སྣོན་གནང་བའི་གནས་སྟངས་ལ་བློ་འཚབ་ཀྱི་རྣམ་པ་ཆེད་བཏོན་གནང་བ་དང་འབྲེལ། དེས་འབྲོག་པ་རྣམས་མི་རབས་ནས་རང་གི་གཡག་དང་རྭ་ལུག་སོགས་སྒོ་ཕྱུགས་སྲོག་ཆགས་དང་མཉམ་དུ་རྩྭ་ཆུ་བཟང་སར་འཚོ་བ་རོལ་རྒྱུའི་གོམས་སྲོལ་ཡོད་པ་དེ་ལྟར་ནའང་། སྔར་བཞིན་འཚོ་ཐབས་དཀའ་བའི་ངལ་བ་འཕྲད་བཞིན་ཡོད་པར་གསུངས་འདུག
དེ་བཞིན་འཕགས་བོད་ཀྱི་ས་མཚམས་ས་ཁུལ་གྱི་འབྲོག་པ་ཚོར་མཐའ་མཚམས་ཀྱི་རྩོད་རྙོག་དང་འབྲེལ་ནས་ངལ་བ་གང་ཙམ་འཕྲད་རྗེས་ད་ལྟའི་ཆར་འབྲོག་པའི་ཁྱིམ་བདག་དེ་དག་གི་ངོས་ནས་སོ་སོའི་སྒོ་ཕྱུགས་རྣམས་རྩྭ་ཆུ་བཟང་བ་ཡོད་སའི་ཤར་ཧི་མཱ་ལ་ཡའི་ས་ཁུལ་ཁུ་ལ་གཙོས་ས་ཁུལ་ཁག་ཅིག་ཏུ་ཁྲིད་རྒྱུའི་ཐག་གཅོད་གནང་འདུག་ཀྱང་རྒྱ་གར་ཕྱོགས་ནས་དམ་དྲག་གནང་ཡོད་སྐོར་གསུངས་འདུག རྒྱ་གར་གཞུང་གི་ངོས་ནས་ངེས་པར་དུ་འབྲོག་པ་ཚོར་རྩྭ་ཆུ་བཟང་སར་འཚོ་ཐབས་གནང་འཐུས་ཆོག་མཆན་གནང་བ་དང་མཐའ་མཚམས་ཀྱི་ས་ཁུལ་ཁག་ཡར་རྒྱས་སླད་མདུན་སྐྱོད་གནང་དགོས་སྐོར་ནན་བརྗོད་གནང་འདུག
སྐུ་ཞབས་ཁོང་གིས་ད་དུང་འབྲོག་པ་ཚོའི་འདས་པའི་ལོ་བཅུ་ཡས་མས་ཙམ་གྱི་རྗེས་སུ་རང་གི་སྒོ་ཕྱུགས་གཡག་རྣམས་རྒྱུན་སྲོལ་གྱི་རྩྭ་ཆུ་བཟང་བ་ཡོད་སའི་ས་ཁུལ་ཁུ་ལ་དང་ཚོགས་ཚ་ལུ་བཅས་སུ་ཁྲིད་རྒྱུར་ཐག་གཅོད་གནང་དོན་ལྟར་བྱུང་མེད་པ་དེས་རྒྱ་དཀར་ནག་གཉིས་ཀྱི་དམག་མིའི་འགོ་ཁྲིད་དབར་གྲོས་མོས་བརྒྱུད་གནད་དོན་དེ་གང་ཙམ་ཞི་སྒྲིག་བྱུང་ཡོད་ཀྱང་དུས་ད་ལྟའང་ཕྱོགས་གཉིས་དབར་རྒྱུན་ལྡན་གྱི་གནས་སྟངས་ལྟ་བུ་ཞིག་མེད་པ་མཚོན་གྱི་ཡོད་ཅེས་གསུངས་པ་མ་ཟད། འབྲོག་པ་ཚོས་རང་གི་སྒོ་ཕྱུགས་རྣམས་འབྲོག་སར་འཚོ་ཐབས་གནང་རྒྱུ་དེ་ནི་ས་མཚམ་ས་ཁུལ་དུ་ཡོད་པའི་ Phobrang དང་ Yourgo དེ་བཞིན་ Lukung གྲོང་གསེབ་པ་རྣམས་ཀྱིས་ཐོག་མ་དབུ་འཛུགས་གནང་བ་ཞིག་དང་འབྲོག་པ་ཚོས་མཐའ་མཚམས་ས་ཁུལ་ཁག་སྲུང་སྐྱོབ་བྱ་རྒྱུར་རྒྱལ་ཁབ་ཀྱི་མིག་དང་ཨམ་ཆོག་ལྟ་བུའི་འགན་ཁུར་གྱི་ཡོད་པར་གསུངས་འདུག
འཕགས་བོད་ཀྱི་ས་མཚམས་རྩོད་རྙོག་ཁྲོད་འབྲོག་པར་རྩྭ་ཆུ་བཟང་སར་འཚོ་ཐབས་མེད་པའི་ངལ་འཕྲད།
Tibetan News Headlines
- 14th General body meeting of TWA concludes with Tsering Dolma as the new President
- Abbot of Tashi Lhunpo urges active support on Panchen Lama issue ahead of rinpoche’s35th birthday
- Dalai Lama grants audience to members of Indian journalist fraternity
- Long time president of SOS Children’s village Helmut Kutin passes away at 82
- US Senate passes bill to force sale of TikTok, sending it to Biden
- Launch of Shivdham Kailash Mansarovar Tibet freedom association marks global initiative for religious freedom
རེས་གཟའ་ལྷག་པ། ༢༠༢༤།༠༤།༢༤
- བུད་མེད་ལྷན་ཚོགས་སྐབས་ ༡༤ པའི་དབུས་སྤྱི་ཁྱབ་རྒྱུན་ལས་གསར་བསྐོ་དང་འབྲེལ་ཚོགས་ཆེན་ཐེངས་ ༡༤ པ་མཇུག་སྒྲིལ།
- ༸ཀུན་གཟིགས་པཎ་ཆེན་རིན་པོ་ཆེའི་གནད་དོན་ཐོག་མི་མང་ནས་གོ་རྟོགས་ཀྱི་ལས་འགུལ་སྤེལ་གནང་ཡོང་བའི་སྐུལ་འདེབས།
- འཛམ་གླིང་གི་ཡང་དག་པའི་བསམ་བློ་བ་ཕལ་མོ་ཆེས་སྐུའི་ཡང་སྲིད་ཀྱི་སྐུ་དབང་༸གོང་ས་མཆོག་༸གང་ཉིད་ལ་ཡོད་པ་ངོས་འཛིན་གནང་འདུག
- རྒྱལ་སྤྱིའི་ SOS བུ་ཕྲུག་ཁྱིམ་སྡེའི་ཚོགས་གཙོ་ཟུར་པ་ Helmut Kutin མཆོག་འདས་གྲོངས་སུ་གྱུར་འདུག
- རྒྱ་ནག་གི་ཊིག་ཊོག་མཉེན་ཆས་བཀག་སྡོམ་དང་འབྲེལ་བའི་ཁྲིམས་འཆར་ལ་གྲོས་ཚོགས་གོང་མའི་རྒྱབ་སྐྱོར་ཐོབ་འདུག
- གངས་རིན་པོ་ཆེའི་གནས་མཆོག་དེ་ཉིད་རྒྱའི་དབང་སྒྱུར་ནས་བཅིངས་གྲོལ་ཐུབ་ཆེད་ཚོགས་པ་གསར་འཛུགས།
