རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུས་བོད་ལྗོངས་གཞིས་རྩེ་བདེ་ཆེན་བསྐལ་བཟང་ཕོ་བྲང་དུ་དུས་འཁོར་དབང་ཆེན་གནང་རྒྱུ་དེ་ནི་ཆོས་ལུགས་ཆབ་སྲིད་ཐོག་ལོག་པར་སྤྱོད་པའི་སྲིད་བྱུས་ཤིག་ལ་ངོས་འཛིན་
གྱིས་བཙན་བྱོལ་བོད་མི་ཚོས་ངོས་ལེན་མེད་པའི་ལས་འགུལ་ཞིག་སྤེལ་སོང་།
དེ་རིང་ཟླ་ ༧ ཚེས་ ༢༡ ཉིན་གྱི་སྔ་དྲོ་ཚོུད་ ༡༠།༠༠ སྟེང་བོད་ཀྱི་བེུད་ལྷན་ཚོགས་དང་། བོད་རྒྱལ་ཡོངས་མང་གཙོ་ཚོགས་པ། བོད་ཀྱི་དགུ་བཅུ་གསུམ་ལས་འགུལ་ཚོགས་པ། རྒྱ་གར་བོད་རང་བཙན་སློབ་ཕྲུགས་ཚོགས་པ་བཅས་གཞུང་འབྲེལ་མིན་པའི་ཚོགས་པ་བཞི་ནས་ཟུང་སྦྲེལ་གྱིས་གོ་སྒྲིག་འོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་ཡོད་པའི་དཔའ་བོའི་རྡོ་རིང་མདུན་དུ་རྒྱ་གཞུང་གིས་འོས་འཛིན་བྱས་པའི་པཎ་ཆེན་རྒྱལ་མཚན་ནོར་བུས་བོད་ལྗོངས་གཞིས་རྩེ་བདེ་ཆེན་བསྐལ་བཟང་ཕོ་བྲང་དུ་དུས་འཁོར་དབང་ཆེན་དབུ་འཛུགས་གནང་
པ་དེ་ནི་ཆོས་ལུགས་ཆབ་སྲིད་ཐོག་ལོག་པར་སྤྱོད་པའི་སྲིད་བྱུས་ཤིག་ལ་ངོས་འཛིན་གྱིས་བཙན་བྱོལ་བོད་མི་ཚོས་ངོས་ལེན་མེད་པའི་ལས་འགུལ་ཞིག་སྤེལ་ཡོད་པ་རེད།
སྐབས་དེར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་གནང་པའི་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་༸སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་ཞུས་ཀྱིས་ས་གནས་མང་ཚོགས་ནས་དད་གུས་ཆེན་པོས་དཀར་གཙང་གི་མཇལ་དར་སྒྲོན་འབུལ་ཞུས་ཏེ། རྒྱ་གཞུང་ནས་པཎ་ཆེན་རིན་པོ་ཆེའི་ཡང་སྲིད་དུ་ངོས་ལེན་བྱས་པའི་རྒྱལ་མཚན་ནོར་བུས་དུས་དབང་བསྩལ་འགོ་བཙུགས་པ་མ་ཟད། གཞིས་བཞུགས་བོད་མི་རྣམས་ལ་ངེས་པར་དུ་ཆོས་ཞུར་བཅར་དགོས་པ་སོགས་ཀྱི་བཙན་བཀའ་བཏང་བར་ངོས་ལན་ན
མ་ཡང་མེད་པའི་ལས་འགུལ་སྤེལ་སོང་།
དེ་རྗེས་ལས་འགུལ་གོ་སྒྲིག་གནང་མཁན་ཁོངས་སུ་ཡོད་པའི་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཨ་ཚོགས་ཀླུ་མཁར་བྱམས་ལགས་ནས་ཚོགས་པ་བཞི་མཉམ་མཐུན་གྱིས་སྤེལ་བའི་གསར་འགོད་བསྒྲགས་གཏམ་སྒྲོག་སྦྱང་གནང་པ་དང་འབྲེལ། རྒྱ་ནག་གཞུང་ནས་ད་རེས་བོད་ནང་དུས་འཁོར་དབང་ཆེན་གོ་སྒྲིག་བྱས་པ་དེ་ནི་བོད་ཀྱི་ཆོས་དང་རིག་གཞུང་། སྐད་ཡིག་དང་བོད་རྒྱུད་ནང་བསྟན་གྱི་སྤྲུལ་སྐུ་ངོས་འཛིན་བྱེད་ཕྱོགས་སོགས་ལ་མཐོང་ཆུང་ཁྱད་གསོད་བྱས་པ་ཞིག་ཏུ་ངོས་འཛིན་གནང་གི་ཡོད་སྐོར་
གསུངས་པ་མ་ཟད། ལྷག་པར་དུ་རྒྱ་ནག་གཞུང་ནས་ཆབ་སྲིད་ཀྱི་དམིགས་ཡུལ་ངེས་ཅན་ཞིག་གི་འོག་རྒྱལ་བ་ཡབ་སྲས་གཉིས་ཀྱི་མཐུན་མོང་མ་ཡིན་པའི་ལོ་རྒྱུས་ཀྱི་འབྲེལ་ལམ་ལ་ཐེས་བྱུས་བྱེད་བཞིན་པར་མཐའ་གཅིག་ཏུ་ངོ་རྒོལ་ཡོད་ཅེས་གསུངས་ཡོད།
དེ་དང་ཕྱོགས་མཚུངས་བཞུགས་སྒར་དུ་རྟེན་གཞི་བྱས་པའི་དབུས་བོད་ཀྱི་གཞོན་ནུ་ལྷན་ཚོགས་ནས་ཀྱང་གསར་འགོད་བསྒྲགས་གཏམ་ཞིག་སྤེལ་་བའི་ནང་། རྒྱ་ནག་གཞུང་ནས་རྒྱལ་མཚན་ནོར་བུར་བོད་ནང་དུས་དབང་བསྩལ་བཅུག་པ་དེ་ལ་ངོས་ལེན་ནམ་ཡང་མེད་པ་མ་ཟད།
རྒྱ་གཞུང་གི་བྱ་སྤྱོད་དེ་ནི་བོད་རྒྱ་ནག་གི་མངའ་ཁོངས་བསྒྲུབ་ཐབས་ཀྱི་སྲིད་བྱུས་གསར་པ་ཞིག་རེད་ཅེས་སྐྱོན་བརྗོད་གནང་འདུག
ད་དུང་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་རྒྱ་གཞུང་གིས་པཎ་ཆེན་གྱི་ཡང་སྲིད་དུ་ངོས་འཛིན་བྱས་པའི་རྒྱལ་མཚན་ནོར་བུ་ལ་བོད་གཞི་བྱེས་གཉིས་སུ་ཡོད་པའི་བོད་མི་ཚོས་ངོས་ལེན་མེད་བཞིན་དུ་དུས་འཁོར་དབང་ཆེན་གནང་བཅུག་པ་དེས་དུས་ད་ལྟའང་བོད་མིའི་སྙིང་སྟོབས་དང་སེམས་པར་དབང་བསྒྱུར་བྱེད་ཐུབ་མེད་པའི་མངོན་རྟགས་ཤིག་རེད་ཅེས་བརྗོད་འདུག
