ཟླ་བ་འདིའི་ཕྱི་ཚེས་ ༢༩ ཉིན་རྒྱ་གར་གྱི་རྒྱལ་ས་ལྡི་ལིར་རྒྱ་གར་རྒྱལ་ཡོངས་ཀྱི་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་ལྷན་ཚོགས་ཤིག་ལྡི་ལི་དོན་གཅོད་ཁང་དུ་ཚོགས་ཡོད་པ་དང་ལྷན་ཚོགས་ཐོག་སྡེ་ཚན་ནང་མའི་དབུས་ཀྱི་འབྲེལ་མཐུད་པ་གཙོ་བོ་སྐུ་ཞབས་ R K Khirmey མཆོག་དབུ་བཞུགས་ཐོག་ས་གནས་ཀྱི་སྡེ་ཚན་ནང་མ་ཁག་དགུའི་སྐུ་ཚབ་དང་། དེ་བཞིན་ལྡི་ལི་དོན་གཅོད་ཁང་གི་དྲུང་ཆེ། འཕགས་བོད་འབྲེལ་མཐུད་ལས་ཁང་གི་ལས་བྱེད་བཅས་ཁྱོན་ཚོགས་མི་ ༡༤ ལྷག་ལྷན་འཛོམས་གནང་འདུག
ཉིན་གཅིག་གི་ལྷན་ཚོགས་ཐོག་ནས་རྒྱ་གར་རྒྱལ་ཡོངས་ཀྱི་བོད་དོན་རྒྱབ་སྐྱོར་ཚོགས་པ་ཁག་གི་འདས་པའི་ལས་དོན་ལ་བསྐྱར་ཞིབ་དང་མ་འོངས་གནང་འཆར་བཅས་ཀྱི་ཐོག་གྲོས་མོལ་གནང་ཡོད་པ་དང་། ལྷག་དོན་ལོ་གསུམ་རེའི་མཚམས་སུ་ཐེངས་གཅིག་ཚོགས་སྲོལ་ཡོད་པའི་རྒྱ་གར་རྒྱལ་ཡོངས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བདུན་པ་འདི་ལོའི་ཕྱི་ཟླ་ ༡༠ དང་ ༡༢ དབར་ཀར་ན་ཊ་ཀ་མངའ་སྡེའི་སྦེང་ལོར་གྲོང་ཁྱེར་ནང་འཚོགས་གཏན་འཁེལ་འདུག
ལྷན་ཚོགས་ཐོག་ད་དུང་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་སྐུ་ཞབས་ R K Khirmey མཆོག་གིས་ས་གནས་ཀྱི་འབྲེལ་མཐུད་པ་རྣམས་ལ་བོད་དང་རྒྱ་གར། རྒྱ་ནག་བཅས་ཀྱི་ད་ལྟའི་ཆབ་སྲིད་ཀྱི་འགྱུར་གྲོས་དང་བོད་དོན་རྒྱབ་སྐྱོར་བ་རྣམས་ཀྱི་ངོས་ནས་གོ་སྐབས་དམ་འཛིན་གནང་ཕྱོགས་བཅས་ལམ་སྟོན་གནང་བ་དང་འབྲེལ། ས་གནས་ཀྱི་ཚོགས་མི་རྣམ་པའི་འདས་པའི་ལས་དོན་ལ་ཡི་རང་བསྔགས་བརྗོད། མ་འོངས་པར་མུ་མཐུད་སྔར་ལྷག་འབད་བརྩོན་གནང་སྟེ་བོད་དོན་བདེན་མཐའ་མྱུར་དུ་གསལ་བའི་ཐུགས་རེ་ཡོད་སྐོར་སོགས་གསུངས་ཡོད།
གཞི་རྩའི་རེས་གཟའ་ཉི་མའི་ཉིན་ལྡི་ལི་དོན་གཅོད་ཁང་དུ་ཚོགས་པའི་ལྷན་ཚོགས་དེ་ནི།རྒྱ་གར་རྒྱལ་ཡོངས་ཀྱི་སྡེ་ཚན་ནང་མའི་ཚོགས་མི་རྣམས་ལོ་རེའི་མཚམས་སུ་ཐེངས་གཉིས་རེ་ཚོགས་སྲོལ་ཡོད་པའི་ཆ་ཤས་ཤིག་ཡིན་པ་དང་། ལྷན་ཚོགས་ཀྱི་དམིགས་ཡུལ་གཙོ་བོ་འདས་པའི་ལས་དོན་ལ་བསྐྱར་ཞིབ་དང་མ་འོངས་ལས་དོན་བྱེད་ཕྱོགས་བཅས་ཀྱི་ཐོག་གྲོས་མོལ་གནང་རྒྱུ་ཡིན་པ་ལྟར་སྐབས་དེར་ལྡི་ལི་དོན་གཅོད་ཀྱི་དྲུང་ཆེ་དོན་གྲུབ་རྒྱལ་པོ་ལགས་ཀྱིས་རྒྱ་གར་གྱི་བོད་དོན་རྒྱབ་སྐྱོར་བ་ཚོས་སློབ་གྲྭ་ཁག་གི་སློབ་ཕྲུག་རྣམས་ལ་བོད་དོན་དྲིལ་བསྒྲགས་གང་མང་ཐུབ་ཐབས་གནང་དགོས་པའི་འབོད་སྐུལ་སོགས་གནང་ཡོད།
རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མ་ཞེས་པ་དེ་ནི། རྒྱ་གར་གྱི་མངའ་སྡེ་འདྲ་མིན་ནང་ཡོད་པའི་བོད་དོན་རྒྱབ་སྐྱོར་ཚོགས་པ་ཚང་མའི་འབྲེལ་མཐུད་ཀྱི་ལས་ཁུངས་གཙོ་བོ་དེ་ཡིན་པ་དང་། ལྡི་ལིར་རྟེན་གཞི་བྱས་པའི་ལས་ཁུངས་དེའི་ངོས་ནས་ས་གནས་ཀྱི་བོད་དོན་རྒྱབ་སྐྱོར་ཚོགས་པ་ཁག་གི་ལས་དོན་དོན་ལ་མཐུན་འགྱུར་རམ་འདེགས་དང་ལྷག་པར་རྒྱ་གར་དབུས་གཞུང་དང་བོད་མིའི་སྒྲིག་འཛུགས་བཅས་སུ་འབྲེལ་མཐུད་ཀྱི་ཐུགས་འགན་བཞེས་གནང་གི་ཡོད་པར་མ་ཟད་ས་གནས་ཀྱི་ཚོགས་པ་ཁག་ལ་ལས་དོན་བྱེད་ཕྱོགས་ཀྱི་ལམ་སྟོན་སོགས་ཀྱང་གནང་གི་ཡོད་པ་རེད།
