རྒྱ་ནག་གི་གཞུང་འབྲེལ་Global Times གསར་ཁང་གིས་དེ་རིང་གནས་ཚུལ་སྤེལ་བའི་ནང་དུ། རྒྱ་ནག་གི་་ཆིན་རྒྱལ་རབས་ཀྱི་གོང་མ་ཨན་བན་དང་འབྲེལ་བའི་གློག་བརྙན་གསར་བ་ཞིག་མི་འགྱངས་བར་ཕྱིར་འདོན་བྱེད་རྒྱུ་ཡིན་ལུགས་སྦྲགས་ཏེ། ལྟད་མོ་དེའི་བརྗོད་སྙིང་གཙོ་བོ་ནི་རྒྱ་ནག་གི་ཆིན་གོང་མས་བོད་ས་དབང་སྒྱུར་གྱིས་བལ་ཡུལ་གྱི་གོར་ཁ་དམག་འཐབ་ལས་བོད་ས་སྲུང་སྐྱོབ་བྱས་པ་གཙོ་བོར་བསྟན་ཡོད་པ་ཞིག་ཡིན་པར་བསྒྲགས་ཏེ། གློག་བརྙན་དེ་ནི་རྒྱ་ནག་གིས་བོད་ལ་བཅིངས་གྲོལ་ཟེར་བ་བཏང་ནས་མི་ལོ་བདུན་ཅུ་འཁོར་བའི་དུས་སྟོན་གྱི་ཆ་ཤས་ཤིག་ཏུ་སྟོན་རྒྱུ་ཡིན་པར་བསྒྲགས་འདུག
གསར་ཤོག་དེའི་ནང་དུ། རྒྱ་ནག་ཕྱི་ལོག་གི་བརྒྱུད་ལམ་ཁག་ཅིག་ནས་གློག་བརྙན་དེ་ནི་རྒྱ་ནག་གིས་ཆེད་དུ་ཏཱ་ལའི་རུ་ཚོགས་ལ་ཉེན་བརྡ་བཏང་བ་ཞིག་ཡིན་པར་འགྲེལ་བརྗོད་བྱེད་མཁན་བྱུང་ཡོད་སྐོར་བརྗོད་པ་མ་ཟད། རྒྱ་ནག་གི་ཉམས་ཞིབ་པའི་ལྟད་མོ་དེར་སྡོམ་རྒྱབ་པ་ཞིག་ལུང་འདྲེན་བྱས་ཏེ། གློག་བརྙན་དེས་ཏྭ་ལའི་རུ་ཚོགས་ལ་བརྡ་ལན་ཞིག་སྤྲད་ཚེ། དེ་ནི་རྒྱ་ནག་གཞུང་གི་ད་བར་འགྱུར་བ་མེད་པའི་ཐོག་ནས་བཟུང་པའི་ལངས་ཕྱོགས་ཏེ། ཁ་བྲལ་གྱི་ལས་འགུལ་དེ་ནམ་ཡང་ལེགས་འགྲུབ་བྱུང་ཐབས་མེད་པ་དང་། རྒྱ་ནག་གི་ངོས་ནས་རྒྱལ་ཁབ་ཀྱི་བདག་དབང་དང་ས་ཁོངས་གོང་བུ་སྲུང་སྐྱོབ་བྱེད་རྒྱུའི་ཆོད་སེམས་བརྟན་པོ་ཡོད་པ་དེ་རེད་ཅེས་འགྲེལ་བརྗོད་བྱས་འདུག
Global Times གསར་ཁང་གིས་བརྗོད་པ་ལྟར་ན། གློག་བརྙན་དེ་ནི་རྒྱ་ནག་གི་གོང་མ་ཆིན་ལོང་གི་སྐབས་ཏེ། པཎ་ཆེན་སྐུ་ཕྲེང་དྲུག་པའི་སྤུན་མཆེད་ཀྱིས་ཕྱི་ལོག་གི་སྟོབས་ཤུགས་དང་ཟླ་སྒྲིལ་གྱིས་བོད་ས་དབང་སྒྱུར་བྱེད་ཐབས་ལ་དམིགས་ཏེ་བཀྲ་ཤིས་ལྷུན་པོ་དགོན་པ་ཇག་བཅོམ་བྱས་པའི་སྐབས་སུ། ཆིན་གོང་མས་དམག་སྤྱི་བོད་དུ་བཏང་སྟེ། བོད་དང་མན་ཇུ། དེ་བཞིན་ཧན་མི་རིགས་དང་སོག་པོ་སོགས་ས་ཁོངས་གཅིག་སྒྲིལ་གྱིས་ཕྱི་ལོག་གི་བཙན་འཛུལ་བ་ཕྱིར་ཕུད་བཏང་སྟེ། གྲངས་ཉུང་མི་རིགས་རྣམས་ཀྱི་སྟོབས་ཤུགས་གཅིག་སྒྲིལ་བྱས་པ་མ་ཟད། བོད་ཀྱི་སྲིད་གཞུང་ལ་སྲུང་སྐྱོབ་བྱས་ཏེ། སྐབས་དེ་ནས་བཟུང་བོད་ཏུ་ཡང་སྲིད་ཐག་གཅོད་གནང་སྟངས་ཀྱི་གསེར་བུམ་དཀྲུག་སྲོལ་གསར་དུ་ལག་བསྟར་བྱས་པ་ཞིག་ཡིན་ཚུལ་བརྗོད་འདུག
དེ་བཞིན་རྒྱ་ནག་གི་ཉམས་ཞིབ་པས་སྐབས་དེ་ནས་བོད་དུ་གསེར་བུམ་དཀྲུག་སྲོལ་བྱུང་བ་ལྟར། བོད་ཀྱི་རྒྱལ་བ་པཎ་ཆེན་གཉིས་ཀྱི་ཡང་སྲིད་ཀྱང་གསེར་བུམ་དཀྲུག་ནས་ཐག་གཅོད་བྱེད་ཀྱི་ཡོད་ནའང་། ད་ཆ་༸གོང་ས་མཆོག་གི་གཙོ་བྱས་པའི་ཁ་བྲལ་བ་ཚོས་ལམ་ལུགས་དེར་ངོས་ལེན་མ་བྱས་པར་༸གོང་ས་མཆོག་གི་ཡང་སྲིད་དང་འབྲེལ་བའི་དྲིལ་བསྒྲགས་བྱེད་ཀྱི་ཡོད་པར་བརྗོད་པ་མ་ཟད། ༸གོང་ས་ཏཱ་ལའི་བླ་མ་ནི་ཆོས་བ་རྣམ་དག་ཅིག་མིན་པར་བཙན་བྱོལ་དུ་གྱར་བའི་ཁ་བྲལ་བ་ཞིག་ཡིན་པའི་མཚན་སྨོད་བྱས་འདུག
གོང་གི་གནས་ཚུལ་དེ་དང་འབྲེལ་ནས་འདི་གའི་གསར་འགོད་པས་ཐེ་ཝན་དོན་གཅོད་དང་སྤྱི་ཟུར་སྐལ་བཟང་རྒྱལ་མཚན་ལགས་སུ་བཀའ་འདྲི་ཞུས་པར་ཁོང་གིས་རྒྱ་ནག་གི་ཐེངས་འདིའི་གློག་བརྙན་འདི་ནི་ལོ་འགའ་ཤས་ཀྱི་གོང་ནས་འཆར་གཞི་ལྡན་པའི་ཐོག་ནས་བཟོ་སྐྲུན་བྱས་ཏེ། ལོ་རྒྱུས་ཀྱི་ཐོག་ནས་བོད་རྒྱ་ཁོངས་ཡིན་པ་དང་། ཆོས་ལུགས་ཀྱི་ཐོག་ནས་༸གོང་ས་སྐུ་ཕྲེང་༡༤་པ་མཆོག་རྒྱལ་སྤྱིའི་སྟེང་ནས་མཛད་འཕྲིན་རྒྱས་བཞིན་ཡོད་སྟབས་སྐུ་ཕྲེང་བཅོ་ལྔ་བ་དེ་རྒྱ་ནག་རང་གིས་གདམ་ཐབས་སུ་ལོ་རྒྱུས་ཀྱི་ཁྲོད་དུ་ཆོས་ལུགས་ཀྱི་བཀའ་དབང་རྒྱ་ནག་ལ་ཡོད་པ་སོགས་ཀྱི་ལོ་རྒྱུས་ལ་འཁྱོགས་བརྗོད་བྱེད་བཞིན་པའི་གནད་དོན་ཞིག་ཆགས་ཡོད་པར་ངོ་སྤྲོད་གནང་སོང་།
དེ་བཞིན་ཁོང་གིས་གོར་ཁ་དམག་མི་མཐར་སྐྲོད་བཏང་ཟིན་པའི་རྗེས་སུ་བོད་དང་འབྲེལ་མཐུད་ཀྱི་ཕྱིར་ཏུ་ཨན་བན་ལས་ཁུངས་བོད་དུ་བཙུགས་པ་དང་དེ་བཞིན་བོད་ཀྱི་ཆབ་སྲིད་ཀྱི་འཛིན་སྐྱོང་དང་ལ་ལེགས་བཅོས་ཀྱི་དོན་ཚན་ཉེར་དགུ་ཅན་གྱི་བསམ་ཚུལ་ཞིག་ཕུལ་བ་ཙམ་ལས་བོད་ཀྱི་བདག་དབང་ཡོངས་སུ་རྫོགས་ལ་རྒྱ་ནག་ལ་ཡོད་པར་བརྗོད་བཞིན་པ་དེ་ནི་ལོ་རྒྱུས་ཐོག་རྩ་བ་ཉིད་ནས་གཞི་རྩ་མེད་པ་ཞིག་ཆགས་ཡོད་པར་འགྲེལ་བརྗོད་གནང་སོང་།
དེ་བཞིན་བོད་ཀྱི་སྲིད་བྱིས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་ཚེ་བརྟན་ལགས་ཀྱིས་རྒྱ་ནག་གིས་དུས་རྒྱུས་ནས་རྣམ་པ་འདྲ་མིན་གྱི་ཐོག་ནས་ཆབ་སྲིད་དགོས་མཁོ་ལ་དམིགས་པའི་དྲིལ་བསྒྲགས་ཀྱི་རིགས་བྱེད་ཀྱི་ཡོད་པ་ལྟར། གློག་བརྙན་འདི་ལ་མཚོན་ན་ཡང་གཙོ་བོ་ལོ་རྒྱུས་ཀྱི་ཐོག་བོད་རྒྱལ་ཁོངས་ཡིན་པ་དང་རྒྱ་ནག་ལ་བོད་ཀྱི་བདག་དབང་ཡོད་པར་དྲིལ་བསྒྲགས་བྱེད་ཐབས་དང་། དེ་བཞིན་བོད་དང་ཆིན་གོང་མའི་བར་གྱི་མཆོད་ཡོན་གྱི་འབྲེལ་བ་བརྒྱུད་ནས་སྐུའི་ཡང་སྲིད་ཀྱི་བདག་དབང་ཡང་རྒྱ་ནག་ལ་ཡོད་པར་སྒྲུབ་པར་འབད་བརྩོད་བྱེད་བཞིན་པའི་དྲིལ་བསྒྲགས་ཁོ་ན་ཡིན་པར་ངོ་སྤྲོད་གནང་སོང་།
གཞི་རྩའི་ཨན་བན་ཞེས་པའི་གློག་བརྙན་དེ་ནི་ཕྱི་ལོ་ ༢༠༡༦ ལོར་བཟོ་བསྐྲུན་གྱིས་ཕྱི་ལོ་ ༢༠༡༧ ལོར་དངོས་སུ་གཟིགས་འབུལ་ཞུ་རྒྱུར་ཐག་གཅོད་བྱས་ཡོད་ཀྱང་། ཕྱིས་སུ་གློག་བརྙན་དེ་དུས་ཐོག་ཏུ་འདོན་སྤེལ་མ་བྱས་པར་ལོ་བཞིའི་རིང་ལ་ཕྱིར་འགྱངས་བྱས་པ་ཞིག་ཡིན་པ་དང་། འདི་ལོར་རྒྱ་ནག་གི་བོད་ཞི་བའི་བཅིངས་གྲོལ་ཟེར་བ་བཏང་ནས་ལོ་བདུན་ཅུ་འཁོར་བའི་དུས་སྟོན་གྱི་ཆ་ཤས་སུ་ཕྱིར་འདོན་གནང་རྒྱུ་ཡིན་པར་བསྒྲགས་འདུག
