ཁ་སང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཁ་སང་སྲིད་སྐྱོང་ཚོགས་ཁང་གི་ནང་དུ། སྲིད་ཞུ་ལས་བྱེད་ཚང་འཛོམས་ཀྱི་ཐོག་ནས་བཀའ་ཤག་སྐབས་ ༡༦ པའི་དགོངས་གཞི་དང་ལས་དོན། དེ་བཞིན་དམིགས་ཚད་བཅས་ཀྱི་སྐོར་ལ་ཆུ་ཚོད་གཉིས་ཙམ་གྱི་རིང་གཏམ་བཤད་གནང་སྟེ། གཙོ་བོ་སྲི་ཞུ་ལས་བྱེད་རྣམས་ཀྱིས་སྤྱི་སེམས་དང་ལྷག་བསམ་རྒྱ་སྐྱེད་ཀྱིས་བོད་སྤྱི་བའི་ལས་དོན་ཐོག་འབད་འབུངས་གང་ཐུབ་གནང་དགོས་བའི་ཞེན་སྐུལ་གནང་འདུག
སྐབས་དེར་སྲིད་སྐྱོང་མཆོག་གིས་བོད་མི་རྣམས་ཐོག་མར་བཙན་བྱོལ་དུ་གྱར་དགོས་བའི་རྒྱུ་རྐྱེན་གཙོ་བོ་དེ་ནི་རྒྱ་ནག་གི་བཙན་འཛུལ་ལ་བརྟེན་ནས་ཡོང་བ་ཞིག་ཡིན་སྟབས། བོད་མི་རྣམས་ཀྱི་ལས་འགན་གཙོ་བོ་དེ་བཅའ་ཁྲིམས་ཀྱི་ནང་དུ་གསལ་བ་ལྟར་བོད་དོན་བདེན་མཐའ་གསལ་ཐབས་ཟེར་བ་ཡིན་དུས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་དགོངས་གཞི་དང་ལམ་སྟོན་ལྟར་སྤྱི་དོན་གཙིག་འཛིན་གྱིས་ལས་དོན་ལ་ཤར་སྐྱོད་གནང་དགོས་རྒྱུ་དེ་གལ་ཆེན་པོ་ཡིན་པར་གསུངས་འདུག
སྲིད་སྐྱོང་མཆོག་གིས་རྒྱལ་སྤྱིའི་སྤྱི་ཚོགས་ཀྱི་ཆབ་སྲིད་ཀྱི་འགྱུར་འགྲོས་དང་རྒྱ་ནག་ནང་གི་གནད་དོན་ལ་གཞིར་བཞག་གིས་བོད་དོན་བདེན་མཐའ་གསལ་ཐབས་ལ་རེ་བ་ཆེན་པོ་ཡོད་པ་ཞིག་གནས་སྐབས་སུ་མཐོང་གི་མེད་ཀྱང་། ཆབ་སྲིད་ཀྱི་འགྱུར་འགྲོས་ཁྲོད་ནས་རྒྱུ་རྐྱེན་ཕྲ་མོ་ཙམ་གྱིས་ཀྱང་གནད་དོན་ཆེན་པོ་དེ་འདྲ་འགྲུབ་སྲིད་པས། བོད་མིའི་སྒྲིག་འཛུགས་ཀྱི་ངོས་ནས་རྒྱ་ནག་གི་ཡ་ལན་ལ་ལྟོས་མེད་གོ་སྐབས་དམ་འཛིན་བྱ་རྒྱུ་གལ་ཆེར་བརྩི་བཞིན་ཡོད་པ་དང་། ནམ་ཞིག་བོད་ཀྱི་བདེན་མཐའ་གསལ་བའི་དུས་ཞིག་མ་ཤར་བར་དུ་ང་ཚོའི་ངོས་ནས་ད་ཡོལ་གྱི་བོད་ནང་གི་དངོས་ཡོད་གནས་སྟངས་དེ་རྒྱལ་སྤྱིའི་སྤྱི་ཚོགས་ཐོག་ཇི་བཞིན་དུ་དྲིལ་བསྒྲགས་ཡང་དག་པ་ཞིག་བྱེད་རྒྱུ་དེ་ལས་འགན་ཆེ་ཤོས་དེ་ཡིན་པར་མངོན་གསལ་གནང་འདུག 
དེ་བཞིན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་ལས་འབོར་ཉམས་ཞིབ་དང་འབྲེལ། སྒྲིག་གཞིའི་ནང་ལོ་གཉིས་རེའི་ནང་ལས་འབོར་ཉམས་ཞིབ་ཚོགས་ཆུང་ཐེངས་རེ་འཚོགས་དགོས་པ་འཁོད་ཡོད་ནའང་ཕྱི་ལོ་ ༢༠༡༤ ནས་ད་བར་ལས་འབོར་ཚོགས་ཆུང་མ་བཙུགས་ནས་ལོ་ ༧ ལྷག་འགྲོ་ཡི་ཡོད་ཅིང་། དེའི་ཐད་གྲོས་ཚོགས་ངོས་ནས་ཀྱང་འདྲི་རྩད་བྱས་མེད་ལ། ད་ལྟའི་བཀའ་ཤག་ངོས་ནས་འདྲི་རྩད་བྱེད་མཁན་ཡོད་མེད་ལ་མ་ལྟོས་པར་སྒྲིག་གཞིའི་དགོངས་དོན་གཞིར་བཟུང་ལོ་གཉིས་རེའི་མཚམས་སུ་ལས་འབོར་ཉམས་ཞིབ་འཚོག་རྒྱུ་གཏན་འཁེལ་གནང་ཡོད་སྐོར་གསུངས་འདུག
མ་ཟད་ད་ལྟ་བར་དུ་༸གོང་ས་མཆོག་གི་མཚན་གནས་རྗེས་འབྲེལ་གྱི་ཐོག་ནས་རྒྱལ་སྤྱིའི་སྤྱི་ཚོགས་ཀྱིས་བོད་དོན་ལ་རྒྱབ་སྐྱོར་གནང་ནས་ཡོང་ཡོད་པ་ཞིག་ཡིན་ཡང་། ད་ཆ་མགོན་པོ་གང་ཉིད་དགུང་ནའི་བབ་དང་བསྟུན་ནས་ཕྱིའི་རྒྱལ་ཁབ་ལ་ཆིབས་སྒྱུར་གནང་རྒྱུའི་མཛད་འཆར་ཁག་ཡོང་ཐབས་མེད་དུས། ད་ནི་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ཡོངས་ཀྱི་གཙོ་བྱས་པའི་བོད་མི་གང་ན་སུ་ཡོད་མི་རེ་ངོ་རེ་ནས་དམིགས་བསལ་གྱིས་འགན་ཁུར་དང་དུ་བླངས་ནས་རྒྱལ་སྤྱིའི་སྤྱི་ཚོགས་ཁྲོད་ཀྱི་རྒྱ་ནག་གི་འཁྱོགས་བརྗོད་ལ་གདོང་ལེན་གྱིས་བོད་དོན་འཐབ་རྩོད་ལ་ནུས་ཤུགས་འཕར་མ་ཞིག་འདོན་དགོས་བའི་དུས་ལ་བབ་ཡོད་པར་གསུངས་འདུག 
སྲིད་སྐྱོང་མཆོག་གིས་ཁ་སའི་གཏམ་བཤད་དེའི་སྐབས་ད་དུང་སྲི་ཞུའི་ལས་བྱེད་པ་ཡོངས་ནས་བོད་ཀྱི་ལོ་རྒྱུས་ཀྱི་གནས་བབས་ལ་ལྟ་ཀློག་དང་བོད་ནང་གི་གནས་སྟངས་ལ་ཞིབ་འཇུག་ཞིབ་ཚགས་བྱེད་དགོས་པ་མ་ཟད། བོད་མིའི་སྒྲིག་འཛུགས་ཀྱི་ཁྲིམས་དང་སྒྲིག་གཞི་ཁག་ལ་སློབ་སྦྱོང་དགོས་པའི་ལམ་སྟོན་ནན་པོ་གནང་བ་མ་ཟད། གཙོ་བོ་བོད་མིའི་སྒྲིག་འཛུགས་ཀྱི་ཁྲིམས་སྒྲིག་བསྐྱར་བཅོས་ཀྱི་གནད་དོན་ཁག་ཅིག་ངོ་སྤྲོད་བྱས་པའི་ནང་དུ། དེ་སྔ་ལས་བྱེད་ཀྱི་ས་མིག ༧༠༥ ཡོད་པ་དང་། ད་ལྟའི་ཆར་ས་མིག་ ༦༦༦ གཏན་འབེབས་བྱས་ཏེ་ངོ་ཡོད་ལས་བྱེད་ ༥༦༨ ཡས་མས་ཡོད་པ་དང་། རྒས་ཡོལ་ཐོན་སྐབས་བོད་མིའི་སྒྲིག་འཛུགས་ལ་ལབ་གླེང་སྣ་ཚོགས་མ་ཡོང་བའི་ཆེད་དུ་ཞབས་ཕྱིའི་རང་ལོ་ ༦༠ དེ་ ༦༢ ལ་སྤར་ཏེ། བཀའ་ཤག་འདིའི་ལས་ཡུན་རིང་རྒས་ཡོལ་འཕར་འགྱངས་དང་བསྐྱར་བསྐོས་གནང་འཆར་མེད་པ་དང་། ཟུར་ཕོགས་དང་ཕྱོགས་སྐྱོད་ཀྱི་སྒྲིག་གཞི་ལའང་འགྱུར་བ་བཏང་ཡོད་པ་དང་འབྲེལ་ནས། བཞུགས་སྒར་ཁུལ་གྱི་ས་ཁང་གི་རྙོག་དྲའི་རིགས་ལ་ཆེད་དམིགས་ཀྱིས་ལས་བྱེད་ཅིག་བསྐོ་བཞག་གིས་ཞིབ་འཇུག་གནང་སྟེ་དཀལ་ངལ་སེལ་ཐབས་ལ་འབད་བརྩོན་གནང་རྒྱུ་ཡིན་པ་སོགས་ཀྱི་ཐད་ནས་ལམ་སྟོན་གནང་འདུག པར་དབང་། བོད་མིའི་སྒྲིག་འཛུགས།
