ཡོ་རོབ་ཁུལ་གྱི་བོད་མིའི་མི་འབོར་མང་ཤོས་གནས་པའི་སྦེལ་ཇམ་ས་གནས་འོས་བསྡུ་ལས་ཁང་གི་ཁྱབ་ཁོངས་ཡོ་རོབ་རྒྱལ་ཁབ་སྦེལ་ཇམ་གཙོས་ཕ་རན་སི་དང། ཧོར་ལན་ཌི། དེ་བཞིན་སཱི་པན་བཅས་རྒྱ་ཁབ་བཞིའི་ནང་གི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་གྲངས་གཤབར་གནང་ཟིན་པ་དང་འབྲེལ་ནས་ཁ་སང་ཕྱོགས་བསྡོམས་གྲུབ་འབྲས་གསལ་བསྒྲགས་གནང་ཡོད་ཅིང། ཐེངས་འདིའི་སྲིད་སྐྱོང་གི་སྔོན་འགྲོའི་འོས་བསྡུར་མང་ཚོགས་ཁྲོད་ཡོངས་གྲགས་ཡིན་པའི་འོས་གཞི་ཁག་གི་འོས་གྲངས་ཀྱི་གྲུབ་འབྲས་ལ་གཞིགས་ཚེ་སྲིད་སྐྱོང་འོས་གཞིར་བཞེངས་མཁན་སྤེན་པ་ཚེ་རིང་ལ་འོས་གྲངས། ༡༤༡༩ དང་དབུ་དཀར་ཚང་སྐལ་བཟང་རྡོ་རྗེ་ལ་འོས་གྲངས། ༡༢༠༦ རྒྱ་རི་སྒྲོལ་མར་འོས་གྲངས་ ༤༧༦ འབྲོང་ཆུང་དངོས་གྲུབ་ལ་འོས་གྲངས། ༣༦༠ བློ་བཟང་སྙན་གྲགས་ལ་འོས་གྲངས། ༢༨ དེ་བཞིན་ཨཱཙཱརྱ་ཡེ་ཤེས་ཕུན་ཚོགས་ལ་འོས་གྲངས། ༨ བཅས་ཐོབ་འདུག
སྤྱིར་ད་རེས་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུར་སྦེལ་ཇམ་ས་གནས་འོས་བསྡུ་ལས་ཁང་གི་ཁྱབ་ཁོངས་རྒྱལ་ཁབ་བཞི་ནས་བོད་མི་ཁྱོན་ ༤༠༤༣ གྱིས་དེབ་སྐྱེལ་གནང་ཡོད་པ་ལྟར་དངོས་སུ་སྔོན་འགྲོ་འོས་བསྡུར་མི་གྲངས་ ༣༥༤༦ ནས་ཆ་ཤས་བཞེས་འདུག
གསར་འགོད་པས་འོས་བསྡུའི་གྲུབ་འབྲས་གསལ་བསྒྲགས་གནང་རྗེས་སྦེལ་ཇམ་ས་གནས་འོས་བསྡུའི་འགན་འཛིན་དང་སྦེལ་ཇམ་སྐུ་ཚབ་དོན་གཅོད་བཀྲིས་ཕུན་ཚོགས་ལགས་སུ་འོས་བསྡུའི་ལས་དོན་སྤྱི་དང་སྒོས་གྲང་བཤེར་གནང་ཕྱོགས་སོགས་ཀྱི་ཐོག་བཅར་འདྲི་ཞུས་པར་ཏོག་དབྱིབས་ནད་ཡམས་རྐྱེན་གྱིས་ས་གནས་སུ་མང་ཚོགས་འདུ་འཛོམས་གནང་བར་དམ་དྲག་ཆེས་ཆེར་གནང་རྐྱེན་སྦེལ་ཇམ་ས་གནས་འོས་བསྡུ་ལས་ཁང་གིས་སྦེལ་ཇམ་ནང་དུ་གཞུང་གི་བཀོད་ཁྱབ་སོགས་དང་མཐུན་པའི་ཐོག་ནས་མང་གཙོའི་ཁེ་དབང་ལོངས་སུ་སྤྱོད་རྒྱུའི་གོ་སྐབས་བསྐྲུན་ཐུབ་པ་དེ་ནི་དམིགས་བསལ་གྱི་མཛད་རྗེས་ཤིག་ལ་ངོས་འཛིན་གནང་སྐོར་གསུངས་ཡོད།
