ཁ་སང་རྒྱལ་ཁབ་བདེ་འཇགས་ཀྱི་ཁྲིམས་གཞིའི་འོག་ཉེན་རྟོག་པས་ཧོང་ཀོང་གི་མང་གཙོ་དོན་གཉེར་བ་ ༤༧ འཛིན་བཟུང་གིས་ཁྲིམས་བཤེར་འགོ་འཛུགས་སྐབས་ཧོང་ཀོང་གི་མང་གཙོ་དོན་གཉེར་བའི་མི་མང་བརྒྱ་ཕྲག་ལྷག་གིས་ཁྲིམས་ཁང་མདུན་དུ་འདུ་འཛོམས་ཀྱིས་ངོ་རྒོལ་གྱི་ལས་འགུལ་སྤེལ་འདུག
རྒྱ་ནག་གཞུང་གིས་ཧོང་ཀོང་ནང་ལག་བསྟར་བྱེད་བཞིན་པའི་རྒྱལ་ཁབ་བདེ་འཇགས་ཁྲིམས་གཞི་ཟེར་བའི་འོག་ཉེན་རྟོག་པས་ཧོང་ཀོང་ཁྱོན་ཡོངས་སུ་ཞིབ་བཤེར་བརྒྱུད་ཁུལ་དེའི་མང་གཙོ་དོན་གཉེར་བ་ ༤༧ ལ་རྒྱལ་ཁབ་མགོ་རྟིང་སློག་ཐབས་བྱས་པའི་ཉེས་མིང་འོག་འཛིན་བཟུང་བྱས་ཏེ་ཁ་སང་རེས་གཟའ་ཟླ་བའི་ཉིན་ཁོང་རྣམས་ལ་ཁྲིམས་བཤེར་འགོ་འཛུགས་སྐབས་གྱོན་ཆས་ནག་པོ་གྱོན་པའི་ཧོང་ཀོང་གི་མང་གཙོ་དོན་གཉེར་ཅན་མི་མང་བརྒྱ་ཕྲག་བརྒལ་བ་ཡུལ་དེའི་ཁྲིམས་ཁང་མདུན་དུ་འདུ་འཛོམས་ཀྱིས་ཧོང་ཀོང་བཅིངས་བཀྲོལ་གཏོང་དགོས། རང་དབང་ཐོག་འཐབ་རྩོད་དང་ཧོང་ཀོང་ལ་རྒྱབ་སྐྱོར་བྱེད་དགོས་ཞེས་པའི་འབོད་ཚིག་འོག་ངོ་རྒོལ་གྱི་ལས་འགུལ་ཤུགས་ཆེ་སྤེལ་གནང་འདུག སྐབས་དེར་རྒྱ་ནག་གཞུང་གིས་ཁྲིམས་ཁང་གི་ཉེ་འཁོར་དུ་ཉེན་རྟོག་པ་བརྒྱ་བརྒལ་བ་འགྲེམས་འཇོག་གིས་ས་གནས་ཡུལ་མིའི་ངོ་རྒོལ་ལས་འགུལ་སྤེལ་བར་འགོག་ཐབས་ཀྱིས་དམ་དྲག་ཤུགས་ཆེར་བྱེད་བཞིན་པའི་ཁྲོད་རང་ལོ་ ༥༧ ཡིན་པ་ Herbert Chow ཡིས་ད་ཐེངས་ཀྱི་འཛིན་བཟུང་བྱས་པ་དེ་ནི་ཧོང་ཀོང་གི་འདས་པའི་ལོ་རྒྱུས་ཁྲོད་ཁུངས་ལུང་མེད་པའི་འཛིན་བཟུང་ཚད་མཐོ་ཤོས་བྱས་པ་དེ་ཆགས་ཀྱི་ཡོད་པར་ཟུར་ཟ་བྱས་འདུག་ཀྱང་། ཁོང་གིས་ཁྲིམས་ཁང་གིས་དྲང་བདེན་ལ་རྒྱབ་སྐྱོར་གནང་རྒྱུའི་ཡིད་ཆེས་ཡོད་ཅེས་གསུངས་འདུག
འཛིན་བཟུང་བྱས་པའི་མང་གཙོའི་དོན་གཉེར་བ་ ༤༧ དེ་དག་ཁོངས་སུ་ ༣༩ སྐྱེས་པ་དང་ ༨ བེུད་ཆགས་ཀྱི་ཡོད་པར་མ་ཟད་ཁོང་རྣམས་རང་ལོ་ ༢༣ ནས་ ༦༤ བར་རེད་འདུག
རྒྱ་ནག་གཞུང་གིས་བར་ལམ་ཧོང་ཀོང་ནག་རྒྱལ་ཁབ་བདེ་འཇགས་ཁྲིམས་གཞི་ཟེར་བ་གཏན་འབེབས་བྱས་ཏེ་ཧོང་ཀོང་མང་གཙོ་དོན་གཉེར་བའི་ཐོག་དྲག་གནོན་དང་མང་གཙོ་དོན་གཉེར་བ་ ༤༧ འཛིན་བཟུང་བྱས་པའི་གནས་ཚུལ་ཐོན་འཕྲལ་ནུབ་ཕྱོགས་རྒྱལ་ཁབ་ཁག་ནས་རྒྱ་གཞུང་ལ་དབྱིན་ཡུལ་གཞུང་གིས་དེ་སྔ་ཧོང་ཀོང་རྒྱ་ནག་ལ་རྩིས་སྤྲོད་སྐབས་ཁས་ལེན་བྱས་པའི་འབྲུ་དོན་ཁག་ལ་བརྩི་མེད་རྡོག་རོལ་གྱིས་བྱ་སྤྱོད་སྤེལ་བཞིན་པར་སྐྱོན་བརྗོད་བྱས་དང་བྱེད་པའི་ཁྲོད་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Anthony Bliken ལགས་ཀྱིས་རང་ཉིད་ཀྱི་ Twitter དྲྭ་གནས་ཐོག་རྒྱ་གཞུང་གིས་ཧོང་ཀོང་གི་མང་གཙོ་དོན་གཉེར་བར་ཉེས་འཛུགས་བྱས་པར་སྐྱོན་བརྗོད་དང་འབྲེལ་ཁོང་རྣམས་འཕྲལ་མར་གློད་བཀྲོལ་དགོས་པའི་དགོས་འདུན་ཆེད་འདོན་དང་། ཆབ་སྲིད་ཀྱི་ལས་འགུལ་ནང་མཉམ་ཞུགས་དང་རང་ཉིད་ཀྱི་སྨྲ་བརྗོད་རང་དབང་ལོངས་སུ་སྤྱོད་རྒྱུ་ནི་ཁྲིམས་འགལ་གང་ཡང་མིན་པར་ནན་བརྗོད་གནང་སྟེ་ཨ་རི་ཧོང་ཀོང་མི་མང་དང་མཉམ་དུ་ཡོད་ཅེས་གསུངས་འདུག
དེ་བཞིན་ཁེ་ན་ཌའི་ཕྱི་སྲིད་བློན་ཆེན་མཆོག་གིས་ཀྱང་ Twitter དྲ་གནས་ཐོག་ཧོང་ཀོང་མང་གཙོ་དོན་གཉེར་བ་དེ་དག་ནི་རྒྱལ་ཁབ་མགོ་རྟིང་སློག་ཐབས་གནང་བའི་ནག་ཉེས་འགེལ་བའི་བྱ་སྤྱོད་དེ་ནི་དྲང་བདེན་མིན་པ་དང་ཁེ་ན་ཌ་གཞུང་གིས་འབྲེལ་ཡོད་དཔོན་རིགས་ལ་འགྲོ་བ་མིའི་ཐོབ་ཐང་དང་རང་དབང་ལག་བསྟར་བྱེད་དགོས་པའི་འབོད་སྐུལ་གནང་འདུག དབྱིན་ཡུལ་དང་རྒྱ་ནག་གཉིས་ཟུང་འབྲེལ་ཐོག་སྤྱི་བསྒྲགས་ཀྱི་འབྲུ་དོན་ལྟར་རྒྱ་ནག་གིས་ཁས་ལེན་བྱས་པའི་རྒྱལ་སྤྱིའི་འཆིངས་ཡིག་ལག་བསྟར་བྱེད་དགོས་པའི་འབོད་སྐུལ་ཞུ་བཞིན་ཡོད་ཅེས་གསུངས་འདུག
རྒྱལ་སྤྱིའི་ཉེས་ཡང་ཚོགས་པའི་དྲྭ་ཐོག་བདེན་དཔང་ར་སྤྲོད་ཀྱི་ཉམས་ཞིབ་པ་ Sophie Mask ལགས་ཀྱིས་ཧོང་ཀོང་གི་མང་གཙོ་དོན་གཉེར་བ་རྣམས་ཀྱིས་རྒྱ་གཞུང་གི་དྲག་ཤུགས་དབང་སྒྱུར་ལ་ཁ་གཏད་གཅོག་རྒྱུའི་ཐབས་ཤེས་གནང་བ་ཙམ་ལ་ནག་ཅན་དུ་ངོས་འཛིན་གྱིས་ཚེ་བཙོན་ཁྲིམས་ཐག་བཅད་པ་ནི་མང་གཙོ་ལ་རྒོལ་རྡུང་ཚ་ནན་དང་ཐབས་བྱུས་མི་ལྡན་པའི་ཁྲིམས་ཞིག་ཆགས་ཡོད་པར་ཟུར་ཟ་གནང་བར་མ་ཟད། ཧོང་ཀོང་ནང་མངོན་པར་གསལ་བའི་མང་གཙོའི་དོན་གཉེར་བ་ཚང་མ་བཙན་དབང་ཐོག་བཙོན་འཇུག་བྱས་པ་དང་ཡང་ན་རྒྱལ་ཁབ་ཀྱི་སྲིད་གཞུང་མགོ་རྟིང་སློག་ཐབས་གནང་བར་སྐྱོན་འཛུགས་བྱེད་ཀྱི་ཡོད་པ་རེད།
དབྱིན་ཡུལ་དང་ཡོ་རུབ་མཐུན་ཚོགས་བཅས་ཀྱིས་མང་གཙོ་དོན་གཉེར་བའི་ཐོག་སྐྱོན་འཛུགས་བྱས་པ་དེ་དག་ནི་རྒྱལ་ཁབ་དེའི་ཁྲིམས་རྣམས་མང་གཙོ་དོན་གཉེར་བར་འགོག་རྒོལ་བྱ་རྒྱུ་ཁོ་ནར་དམིགས་པ་ལས་དོན་དངོས་ཐོག་རྒྱལ་ཡོངས་ཀྱི་བདེ་འཇགས་ལ་ཆ་འཇོག་གནང་བ་མིན་པར་སྐྱོན་བརྗོད་ཤུགས་ཆེ་གནང་འདུག
