Monthly Archives: April, 2020

ཉན་པ།: Listen ཕབ་ལེན། Download ༸པཎ་ཆེན་རིན་པོ་ཆེའི་གནད་དོན་ཐོག་ཐུགས་འཚབ་ཡོད་པ། ཇར་མན་གཞུང་གིས་རྒྱ་གཞུང་གི་རིམས་ནད་འགོག་ཐབས་ཀྱི་ལས་དོན་དང་འབྲེལ་བའི་རེ་སྐུལ་ལ་ངོས་བཞེས་གནང་མེད། རིམས་ནད་དང་འབྲེལ་ཏེ་འཛིན་བཟུང་བྱས་པའི་གསར་འགོད་པ་རྣམས་གློད་བཀྲོལ་དགོས། ཁྱིམ་སྡོད་བཀག་རྒྱའི་ཁྲོད་སློབ་ཕྲུག་ལ་ལམ་སྟོན། གླུ་གཞས་ལས་རིམ། ཏོག་དབྱིབས་དང་འབྲེལ་བའི་གླུ་གཞས་ཕྱོགས་བསྒྲིགས། Tuesday 28/04/2020 Belgium expresses concern over Panchen Lama's plight Germany ‘rejected China’s bid for positive spin’ on pandemic response Rights watchdog urges China to release covid-19 activists, citizen journalists Tips for students during this lockdown MUSIC Feature: New songs on 'Covid-19'

ཉེ་ཆར་ཟླ་བ་འདིའི་ཕྱི་ཚེས་ ༨ ཉིན་ཡོ་རོབ་སྦེལ་ཇམ་རྒྱལ་ཁབ་ཀྱི་གྲོས་ཚོགས་འཐུས་མི་དང་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་གཞོན་པ་སྐུ་ཞབས་ Samuel Cogolati མཆོག་གིས་སྦེལ་ཇམ་ཕྱི་སྲིད་ལས་ཁུངས་ཀྱིས་རྒྱ་ནག་གཞུང་ལ་༸ཀུན་གཟིགས་༸པཎ་ཆེན་རིན་པོ་ཆེ་མཆོག་ཆ་རྐྱེན་གང་ཡང་མེད་པར་མགྱོགས་མྱུར་གློད་བཀྲོལ་དགོས་པའི་བརྡ་ལན་གསལ་པོ་སྤྲོད་དགོས་པ་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་སྦེལ་ཇམ་གཞུང་གི་འགན་འཁུར་གང་འདྲ་བཞེས་ཀྱི་ཡོད་མེད་སོགས་དང་འབྲེལ་བའི་འདྲི་རྩད་ཅན་གྱི་བསྒྲགས་གཏན་ཞིག་སྤེལ་ཡོད་པ་རེད། གྲོས་ཚོགས་འཐུས་མིའི་འདྲི་རྩད་ཅན་གྱི་བསྒྲགས་གཏན་དེའི་ཐད་ཕྱི་ཚེས་ ༢༥ སྟེ་༸ཀུན་གཟིགས་༸པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༣༡ ལ་ཕེབས་པའི་༸སྐུའི་འཁྲུངས་སྐར་ཉིན་སྦེལ་ཇམ་ཕྱི་སྲིད་བློན་ཆེན་སྐུ་ཞབས Philippe Goffin མཆོག་གིས་ལན་འདེབས་ཤིག་གནང་བ་བརྒྱུད་ནས་སྦེལ་ཇམ་གཞུང་ནས་དུས་རྟག་ཏུ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་དུ་ལོ་ངོ་ ༢༥ ལྷག་གི་རིང་ལ་རྒྱ་གཞུང་གིས་བཙན་ཁྲིད་བྱས་ནས་གར་སོང་ཆ་མེད་དུ་གྱུར་བའི་བོད་མའི་ཆབ་སྲིད་བཙོན་པ་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་ད་ལྟའི་གནས་སྟངས་གང་འདྲ་ཡོད་མེད་སོགས་ཀྱི་ཐོག་ཐུགས་འཚབ་ཆེན་པོ་གནང་བཞིན་ཡོད་ཅེས་གསུངས་འདུག ཕྱི་སྲིད་བློན་ཆེན་མཆོག་གིས་༸ཀུན་གཟིགས་༸པཎ་ཆེན་རིན་པོ་ཆེའི་གནད་དོན་དེ་ནི་བོད་མིའི་ཆོས་ཕྱོགས་དང་འབྲེལ་བ་ཡོད་སྟབས། རྒྱ་ནག་གཞུང་ནས་དེ་ལ་ཐད་བྱུས་རིགས་བྱེད་རྒྱུའི་ཐོབ་ཐང་ཡོད་མ་རེད་ཅེས་ནན་པོ་གནང་འདུག་པ་མ་ཟད་འདས་པའི་ལོ་དུས་ནང་ལ་བོད་ནང་གི་དངོས་ཡོད་གནས་སྟངས་ཤེས་ཐབས་སུ་སྦེལ་ཇམ་གཞུང་གིས་རྒྱ་ནག་དང་ལྷན་དུ་ཕྱོགས་གཉིས་ཀྱི་འབྲེལ་མོལ་མང་དག་ཅིག་གནང་བ་བརྒྱུད་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གླེང་སློང་གནང་ཡོད་པ་མ་ཟད། རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱ་ནག་ཐོག་གི་དུས་བཀག་བསྐྱར་ཞིབ་ཀྱི་ལས་རིམ་ཐོག་རྒྱ་ནག་གྱི་སྐུ་ཚབ་ལ་དངོས་སུ་འདྲི་རྩད་སོགས་ཀྱང་བྱེད་ཡོད་པ་ལུང་འདྲེན་དང་སྦྲགས། བོད་ཀྱི་གནད་དོན་ཐོག་བློན་ཆེན་སྐུ་སྒེར་གྱི་ངོས་ནས་མུ་མཐུད་དམིགས་བསལ་གྱི་ཐུགས་སྣང་གནང་གི་ཡིན་སྐོར་གསུངས་འདུག དེ་བཞིན་རྒྱ་ནག་གཞུང་གི་རྒྱལ་ཚོགས་ཀྱི་ལྷན་ཚོགས་ཁག་ནས་གྲངས་ཉུང་མི་རིགས་ཀྱི་གནད་དོན་སོགས་ཀྱི་ཐད་འདྲི་རྩད་བྱས་པ་ཁག་ལ་ལན་འདེབས་གནང་སྟངས་དང་། རྒྱལ་ཚོགས་ཀྱི་སྐུ་ཚབ་མི་སྣ་རྒྱ་ནག་དང་བོད་ཁུལ་དུ་ཕེབས་རྒྱུའི་རེ་སྐུལ་ཁག་ནར་འགྱངས་བྱེད་བཞིན་པ་སོགས་འགྲེལ་བརྗོད་དང་སྦྲགས། སྦེལ་ཇམ་གཞུང་ནས་ཡོ་རོབ་མཐུན་ཚོགས་དང་རྒྱལ་སྤྱིའི་མཉམ་འབྲེལ་རྒྱལ་ཚོགས་དང་ཟུང་འབྲེལ་ཐོག་རྒྱ་ནག་སྤྱི་དང་ལྷག་པར་དུ་བོད་དང་ཤིན་ཅང་ཁུལ་གྱི་འགྲོ་བ་མིའི་ཐོབ་ཐང་། དེ་བཞིན་ཆོས་དད་རང་དབང་གི་གནས་སྟངས་སོགས་ཀྱི་ཐད་མུ་མཐུད་ཐུགས་སྣང་གང་ཐུབ་གནང་གི་ཡིན་ཅེས་གསུངས་འདུག གཞི་རྩའི་ད་རེས་སྦེལ་ཇམ་ཕྱི་སྲིད་བློན་ཆེན་སྐུ་ཞབས Philippe Goffin མཆོག་གིས་ལན་འདེབས་འདི་མ་གནང་བའི་གོང་དུ་ཡོ་རོབ་གྲོས་ཚོགས་འཐུས་མི་ ༣༢ ཀྱིས་ཟུང་འབྲེལ་ཐོག་ཡོ་རོབ་ཕྱི་འབྲེལ་ལས་དོན་ཚོགས་ཆུང་གི་གཙོ་འཛིན་སྐུ་ཞབས་ Josep Borrel མཆོག་ལ་ཡང་ཞུ་སྙན་ཞིག་ཕུལ་ནས་རྒྱ་ནག་གཞུང་གི་ངོས་ནས་ཆ་རྐྱེན་གང་ཡང་མེད་པར་༸པཎ་ཆེན་རིན་པོ་ཆེ་༸སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་དགོས་པའི་ཤུགས་གནོན་སྤྲོད་རྒྱུའི་རེ་སྐུལ་ཞུས་ཡོད་པ་རེད།

ཁ་སང་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་རྒྱ་ནག་གིས་ད་ཆ་ཏོག་དབྱིབས་ནད་ཡམས་གནས་སྟངས་ཀྱི་ཐད་ནས་གནས་ཚུལ་བརྒྱུད་སྤེལ་བྱེད་མཁན་རྣམས་གང་བྱུང་དུ་འཛིན་བཟུང་བཀག་ཉར་བྱེད་བཞིན་ཡོད་པར་སྐྱོན་བརྗོད་ཀྱིས་ཉེ་ཆར་རྒྱ་ནག་གིས་ཏོག་དབྱིབས་ནད་དུག་གི་གནས་ཚུལ་དང་འབྲེལ་ཏེ་གསར་འགོད་པ་ Chen Qiushi དང་ Fang Bin སོགས་ཀྱི་མི་གསུམ་གང་བྱུང་དུ་འཛིན་བཟུང་བཀག་ཉར་བྱས་ཡོད་པ་རྣམས་ཆ་རྐྱེན་གང་ཡང་མེད་པར་གློད་བཀྲོལ་གཏོང་དགོས་པའི་འབོད་སྐུལ་གནང་འདུག གནས་ཚུལ་དེ་དང་འབྲེལ་འགྲོ་བ་མིའི་ཐོབ་ཐང་ལྟ་ཞིབ་ཁང་དུ་རྒྱ་ནག་ལ་ཞིབ་འཇུག་བྱེད་བཞིན་པའི་ Yaqiu Wang ཟེར་བ་ཞིག་གིས་ད་ཆ་རྒྱ་ནག་གིས་རྒྱལ་སྤྱིའི་ཐོག་རྒྱ་ནག་གི་ནང་དུ་ཏོག་དབྱིབས་ནད་ཡམས་ལ་གདོང་ལེན་བྱས་ནས་ལེགས་གྲུབ་བྱུང་ཡོད་པར་དྲིལ་བསྒྲགས་ཆེན་པོ་བྱེད་ཀྱི་ཡོད་ཀྱང་ཕྱོགས་གཞན་ཞིག་ནས་རྒྱ་ནག་གིས་ཏོག་དབྱིབས་ནད་དུག་དང་འབྲེལ་བའི་དངོས་ཡོད་གནས་ཚུལ་སྤེལ་མཁན་རྣམས་གང་བྱུང་དུ་འཛིན་བཟུང་བྱེད་ཀྱི་ཡོད་སྟབས། ཏོག་དབྱིབས་ནད་དུག་གི་དངོས་ཡོད་གནས་སྟངས་མང་པོ་ཞིག་ནམ་ཡང་ཤེས་ཐབས་མེད་པར་ལྷག་སྲིད་པར་བརྗོད་འདུག དེ་བཞིན་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་རྒྱ་ནག་གིས་ཟླ་བ་འདིའི་ ༡༩ ཉིན་མིང་ལ་ Cai དང་Tang ཟེར་བའི་མི་གཉིས་འཛིན་བཟུང་བྱས་ཡོད་པ་ཡོངས་གྲགས་ཀྱིས་རྒྱ་ནག་གིས་རྒྱལ་ནང་དུ་སྲིད་གཞུང་གིས་རྟོག་ཞིབ་བཀའ་རྒྱ་བཏང་ཡོད་པར་ཡ་ལན་སློག་པའི་ཉེས་འཛུགས་འོག་ཁོང་གཉིས་འཛིན་བཟུང་བྱས་ཡོད་པ་ཞིག་ཡིན་པར་བསྒྲགས་ཏེ་ད་ཆ་སྲིད་གཞུང་གིས་མི་སུ་ཞིག་གཞུང་གི་བཀའ་རྒྱའི་འོག་འཛིན་བཟུང་བྱས་པ་ཡིན་ཚེ་ཟླ་བ་དྲུག་གི་རིང་ལ་འཛིན་བཟུང་བྱས་པའི་མི་དེ་དག་གི་གནས་སྟངས་ཕྱིར་བསྒྲགས་བྱེད་མི་དགོས་པའི་ཁྲིམས་སྒྲིག་ཅིག་ལག་བསྟར་བྱེད་ཀྱི་ཡོད་པར་འཁོད་འདུག རྒྱ་ནག་གིས་ཏོག་དབྱིབས་ནད་དུག་དང་འབྲེལ་ནས་འཛིན་བཟུང་བཀག་ཉར་བྱས་པ་རྣམས་ལས་མི་མང་པོ་ཞིག་ནི་ཏོག་དབྱིབས་རིམས་ནད་ཐོག་ནས་གནས་ཚུལ་ཕྱིར་འདོན་བྱེད་ནཁན་གྱི་ཚོགས་པ་ Terminus 2049 ཞེས་པའི་གསང་ཚིག་བརྒྱུད་དེ་གནས་ཚུལ་མཁོ་འདོན་བྱེད་མཁན་གྱི་ཚོགས་པའི་ཚོགས་མི་ Cai Wei དང་ Chen Mei སོགས་ཡིན་ཞིང་། རྒྱ་ནག་གིས་ཚོགས་པ་དེའི་ཚོགས་མི་ཁག་ཅིག་འཛིན་བཟུང་བྱས་པར་བརྟེན་ད་ཆ་ཚོགས་པ་དེའི་གནས་ཚུལ་མཁོ་འདོན་བྱེད་ཐབས་མེད་པར་སྒོ་བརྒྱབ་ཡོད་པ་མངོན་གསལ་གནང་འདུག རྩ་བའི་རྒྱ་ནག་གིས་ཏོག་དབྱིབས་གནས་ཚུལ་ཕྱིར་བསྒྲགས་དང་འབྲེལ་ནས་མི་མང་པོ་འཛིན་བཟུང་བྱས་ཡོད་པ་ལས་གཙོ་བོ་ཁྲིམས་རྩོད་པ་དང་གསར་འགོད་པ། དེ་བཞིན་ཏོག་དབྱིབས་ནད་དུག་ཐོག་མར་ཁྱབ་སྐབས་གྲོང་ཁྱེར་ཝུ་ཧན་གྱི་སྨན་ཁང་ཁག་གི་གནས་ཚུལ་བརྙན་ལམ་ནས་ཕྱིར་བསྒྲགས་བྱེད་མཁན་གྱི་མི་སེར་དཀྱུས་མ་སོགས་མང་པོ་ཞིག་འཛིན་བཟུང་བྱས་ཡོད་པ་ཐེར་འདོན་གྱིས་འགྲོ་བ་ཐོབ་ཐང་གི་ཞིབ་འཇུག་པ་ Yaqiu Wang ལགས་ཀྱིས་རྒྱ་ནག་གི་ནང་དུ་གནས་ཚུལ་ཁྱབ་སྤེལ་འགྲོ་བར་རང་དབང་མེད་པར་བརྟེན་ཏོག་དབྱིབས་ནད་ཡམས་དེ་འཛམ་གླིང་དུ་ཁྱབ་ཡོད་པར་ལུང་འདྲེན་གྱིས་ད་ཆ་ཕྱི་ལོག་གི་སྲིད་གཞུང་ཁག་གིས་རྒྱ་ནག་ལ་གནོད་ཤུགས་སྤྲད་པ་བརྒྱུད་པ་ནས་ཏོག་དབྱིབས་ནད་དུག་དང་འབྲེལ་ནས་ཉེས་མེད་ཀྱི་ཁྲིམས་རྩོད་པ་དང་གསར་འགོད་པ་མང་པོ་ཞིག་རྒྱ་ནག་གིས་འཛིན་བཟུང་བཀག་ཉར་བྱས་ཡོད་པ་རྣམས་འཕྲལ་དུ་གློད་བཀྲོལ་གཏོང་རྒྱུར་ཤུགས་སྣོན་རྒྱག་དགོས་པའི་འབོད་སྐུལ་གནང་འདུག

ཉེ་ཆར་ཡུ་རོབ་ཁུལ་གྱི་གཞུང་འབྲེལ་བརྒྱུད་ལམ་ཐོག་རྒྱ་ནག་གཞུང་གིས་གནོན་ཤུགས་འོག་ཡུ་རོབ་མཐུན་ཚོགས་ཀྱིས་རྒྱ་ནག་གཞུང་ནས་ཏོག་དབྱིབས་རིམས་ནད་ཁྱབ་བརྡལ་འགོག་ཐབས་ཁྲོད་རྫུན་གཏམ་དང་གནས་ཚུལ་སྦས་བསྐུངས་བྱས་པའི་སྙན་ཐོའི་ནང་རྒྱ་གཞུང་གིས་ནོར་འཁྲུལ་དེ་ཙམ་མེད་པའི་རྣམ་པ་བསྟན་ཡོད་སྐོར་ཐོན་པ་དང་འབྲེལ་ནས་ཇར་མ་ནི་གཞུང་གིས་རྒྱ་ནག་གཞུང་ནས་ཇར་མན་གཞུང་ལ་རིམས་ནད་འགོག་ཐབས་ཐོག་གང་ཐུབ་བྱས་ཡོད་པའི་བཟང་ཕྱོགས་ཀྱི་ལྟ་ཚུལ་བཤད་དགོས་པར་སྐུལ་མ་ཞུས་ཡོད་ཀྱང་དེར་དང་ལེན་གནང་མེད་པ་གསུངས་འདུགཁ་སང་ལྷོ་རྒྱ་ནག་སྔ་དྲོའི་ཆ་འཕྲིན་གྱི་དྲྭ་གནས་ཐོག་གནས་ཚུལ་སྤེལ་བར་ཉེ་ཆར་ཇར་མ་ནི་ལྗང་ཁུ་ཚོགས་པའི་གྲོས་ཚོགས་འཐུས་མི་དང་རྒྱ་གཞུང་ལ་སྐྱོན་བརྗོད་ཤུགས་ཆེ་བྱེད་མཁན་གྲོས་ཚོགས་འཐུས་མི་ Margarete Bause ལགས་ཀྱི་ཡུལ་དེའི་གཞུང་ལ་དྲི་བ་ཕུལ་བ་ལྟར་ཇར་མ་ནི་ནང་སྲིད་ལྷན་ཁང་གི་ངོས་ནས་ཚེས་ ༢༢ ཉིན་གྲོས་ཚོགས་ལ་ཡིག་ཐོག་ནས་ལན་འདེབས་གནང་འདུག་པ་དང་དེའི་ནང་རྒྱ་ནག་གཞུང་འབྲེལ་མི་སྣ་ཁག་ཅིག་གིས་ཏོག་དབྱིབས་རིམས་ནད་འགོག་ཐབས་ཐད་རྒྱ་ནག་གཞུང་གིས་ལས་དོན་ཚགས་ཚུད་སྤེལ་ཡོད་པའི་བཟང་ཕྱོགས་ཀྱི་ལྟ་ཚུལ་བཤད་དགོས་པར་སྐུལ་མ་ཞུས་ཡོད་ཀྱང་ཇར་མན་གཞུང་གིས་འབོད་སྐུལ་དེར་དང་ལེན་གནང་མེད་པ་གསུངས་འདུག རྩ་བའི་ཟླ་བ་འདིའི་ཕྱི་ཚེས་ ༡༢ ཉིན་ Welt am Sonntag ཞེས་པའི་ཇར་མན་བརྒྱུད་ལམ་ཐོག་རྒྱ་ནག་གཞུང་འབྲེལ་མི་སྣས་ཇར་མ་ནི་གཞུང་ལ་དེ་ལྟར་འབོད་སྐུལ་བྱས་ཡོད་སྐོར་གྱི་གནས་ཚུལ་སྤེལ་ཡོད་སྟབས་སྐབས་དེར་རྒྱ་ནག་གཞུང་ཚབ་ལས་ཁུངས་ཀྱི་ངོས་ནས་རིམས་ནད་ཁྱབ་བརྡལ་འགོག་ཐབས་ཐོག་རྒྱ་ནག་གཞུང་གིས་ལས་དོན་ལེགས་པོ་གཉེར་ཡོད་པ་རྒྱལ་སྤྱིའི་གཞུང་ཚོགས་ཁག་ཚང་མས་ཁས་ལེན་གྱི་ཡོད་སྟབས། བརྒྱུད་ལམ་གཅིག་གིས་དེ་འབྲེལ་གནས་ཚུལ་རྫུན་བཟོ་བྱེད་ཐུབ་ཀྱི་མ་རེད་ཅེས་བཤད་དེ Welt am Sonntag བརྒྱུད་ལམ་ཐོག་སྤེལ་བའི་གནས་ཚུལ་དེ་བདེན་པ་མིན་པ་དང་འགན་ཁུར་མེད་པའི་གནས་ཚུལ་ཞིག་ཡིན་སྐོར་བརྗོད་ཡོད་པ་རེད། འོན་ཀྱང་ཁ་ཉིན་རེས་གཟའ་ཉི་མ་ཉིན་ཇར་མན་གཞུང་གིས་གྲོས་ཚོགས་ལ་ཕུལ་བའི་ཕྱག་བྲིས་ནང་རྒྱ་ནག་གཞུང་འབྲེལ་མི་སྣས་རིམས་ནད་ཀྱི་གནད་དོན་ཐད་རྒྱབ་སྐྱོར་སླད་ཇར་མ་ནིར་འབྲེལ་བ་ཞུས་པ་ལས་ར་ཕྲོད་བྱུང་ཡོད་པ་མ་ཟད་སྤྱིར་ཇར་མ་ནི་གཞུང་གིས་རྒྱ་ནག་གིས་ཕྱི་ཟླ་ ༡ ཚེས་ ༢༣ ནས་བཟུང་རིམས་ནད་དེ་འགོག་ཐབས་ཐོག་ལས་དོན་གཉེར་ཡོད་པ་ངོས་ལེན་གནང་ཡོད་ཀྱང་དེ་རྗེས་རྒྱལ་སྤྱི་ཐོག་ཛ་དྲག་རང་བཞིན་གྱི་ནད་ཡམས་འགོག་ཐབས་ཐོག་ཕྱི་གསལ་ནང་གསལ་གནང་གལ་ཆེ་བ་ཡིན་སྐོར་གསུངས་ཡོད་པ་རེད། ཇར་མ་ནི་ནང་རྟེན་གཞི་བྱས་པའི་ Mercator Institute of China Studies ཞེས་པའི་རྒྱ་ནག་ཐོག་གི་སྲིད་བྱུས་ཉམས་ཞིབ་ཁང་གི་འགན་འཛིན་སྐུ་ཞབས་ Mikko Huotari ལགས་དང་ Global Public Policy Institute ཞེས་པའི་སྲིད་བྱུས་ཉམས་ཞིབས་ཁང་གི་འགན་འཛིན་སྐུ་ཞབས་ Thorsten Benner ལགས་གཉིས་ཀྱིས་ད་ལན་ཇར་མན་གཞུང་གིས་ལན་འདེབས་གསལ་བཤད་དེ་འདོད་བློ་ཁེངས་པ་ཞིག་གནང་མེད་པ་མ་ཟད་རྒྱ་ནག་ལ་གདོང་ལེན་བྱ་འཆར་མེད་པའི་རྣམ་པ་མངོན་རྒྱུ་ཡོད་པར་སྐྱོན་བརྗོད་བྱས་འདུག གཞི་རྩའི་བདུན་ཕྲག་སྔོན་མའི་ནང་ཡོ་རོབ་མཐུན་ཚོགས་ཀྱི་ངོས་ནས་རིམས་ནད་ཁྱབ་བརྡལ་འགོག་ཐབས་ཐོག་རྒྱ་ནག་གིས་འཁྱོག་བཤད་དྲིལ་བསྒྲགས་སྤེལ་བཞིན་པ་དང་འབྲེལ་བའི་སྙན་ཐོ་ཞིག་སྤེལ་ཡོད་པ་དེར་འགྱུར་ཕྲན་བཏང་ཡོད་པ་དེ་ལྟར་ཡང་ཡོ་རོབ་མཐུན་ཚོགས་ཀྱིས་རྒྱ་ནག་གཞུང་ནས་སྙན་ཐོ་དེ་སྤེལ་རྒྱུ་མེད་པའི་རེ་སྐུལ་ཤུགས་ཆེ་ཞུས་པར་ལྟོས་མེད་སྙན་ཐོ་ཕྱིར་སྤེལ་གྱིས་རྒྱ་ནག་གི་གནོན་ཤུགས་འོག་ཚུད་མེད་པར་འགྲེལ་བརྗོད་བྱས་འདུག དེའི་བར་ན་དབྱིན་ཡུལ་ནང་རྙིང་ཞེན་ཚོགས་པའི་གྲོས་ཚོགས་འཐུས་མི་ཁག་ཅིག་གིས་སྣེ་ཁྲིད་འོག་དབྱིན་ཡུལ་དང་རྒྱ་ནག་ཕྱོགས་གཉིས་དབར་གྱི་འབྲེལ་ལམ་དང་འབྲེལ་བའི་སྲིད་བྱུས་ལ་བསྐྱར་ཞིབ་བྱེད་དགོས་པའི་གྲོས་བསྡུར་གནང་བཞིན་ཡོད་པ་རེད་འདུག རྩ་བའི་རྒྱ་ནག་གི་ཝུ་ཧན་གྲོང་ཁྱེར་དུ་སྔ་ལོའི་ཕྱི་ཟླ་ ༡༢ ནང་རིམས་ནད་དེ་ཁྱབ་བརྡལ་བྱུང་་ཡོད་པ་དང་ཕྱི་ཟླ་ ༡ ཚེས་ ༢༣ ཉིན་རྒྱ་ནག་གཞུང་གིས་རིམས་ནད་ཁྱབ་བརྡལ་འགོག་ཐབས་སུ་ཝུ་ཧན་གྲོང་ཁྱེར་ཡོངས་རྫོགས་ཕྱི་ལ་སྒོ་བརྒྱབ་ཡོད་པ་རེད། ཝུ་ཧན་གྲོང་ཁྱེར་སྤྱི་ཁྱབ་ཀྱིས་ཕྱི་ཟླ་ ༡༢ ནས་ཕྱི་ཟླ་ ༡ ཚེས་ ༢༣ བར་མི་ས་ཡ་ ༢ ཙམ་ཝུ་ཧན་གྲོང་ཁྱེར་ནས་ཕྱི་ལ་བསྐྱོད་ཟིན་ཡོད་པར་བརྗོད་ཡོད་པ་རེད། དེའི་ཁྲོད་ད་ལྟའི་ཆར་རིམས་ནད་དེ་འཛམ་གླིང་རྒྱལ་ཁབ་ ༢༡༣ ཙམ་གྱི་ནང་ཁྱབ་བརྡལ་ཕྱིན་པའི་འོག་མི་ས་ཡ་གཉིས་དང་ཕྱེད་ཀ་ལྷག་ལ་ནད་གཞི་དེ་ཕོག་པ་དང་མི་འབུམ་གཅིག་དང་སྟོང་ཕྲག་བརྒྱད་ཅུ་ལྷག་རྐྱེན་འདས་སུ་ཕྱིན་ཡོད་པ་རེད། ད་ལྟའི་ཆར་ཨ་རི་དང་ཨོ་སི་ཊོ་ལི་ཡ། དེ་བཞིན་སི་པེན་སོགས་རྒྱལ་ཁབ་མང་དག་ཅིག་གིས་རིམས་ནད་ཁྱབ་བརྡལ་ཕྱིན་ནས་མི་རྒྱུ་གཉིས་ཀར་དཀའ་ངལ་འཕྲད་པའི་འགན་ཆ་ཚང་རྒྱ་ནག་ལ་ཡོད་སྐོར་གསུངས་པ་དང་འབྲེལ། རྒྱ་ནག་གི་ངོས་ནས་གནད་དོན་དེའི་གུན་གསབ་སྤྲོད་དགོས་པ་གསུང་མཁན་མང་དག་ཅིག་ཡོད་པ་རེད། ད་ལྟའི་ཆར་རྒྱལ་སྤྱིའི་གཞུང་ཚོགས་དང་ཉམས་ཞིབ་པ་མང་པོས་ཏོག་དབྱིབས་ནད་དུག་གསར་པ་དེ་རྒྱ་ནག་གིས་ཆེད་བསྐྲུན་བྱས་པ་ཞིག་ཡིན་སྐོར་གསུང་མཁན་ཡང་མང་དུ་འགྲོ་བཞིན་ཡོད་པ་རེད།

ཉན་པ།: Listen ཕབ་ལེན། Download སྐུ་ཞབས་ Jim Mcgovern ལགས་ཀྱིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་དགོས་པ་གསུངས་འདུག ཡོ་རོབ་ཏུ་གནས་སྡོད་བོད་མིས་དྲྭ་ཐོག་བརྒྱུད་༸པཎ་ཆེན་རིན་པོ་ཆེའི་༸སྐུའི་འཁྲུངས་སྐར་སྲུང་བརྩི་ཞུས་པ། དྲི་བ་ཞེས་པའི་གླེང་མོལ་ལེ་ཚན་གསར་འཛུགས་གནང་བའི་དགོས་དམིགས་ཐོག་གླེང་མོལ། པདྨའི་ལྒང་ཕུག་ཅེས་པའི་གློག་བརྙན་སྐོར་ཆེད་བསྒྲིགས། Monday 27/04/2020 Jim McGovern urges immediate release of Panchen Lama Tibetans in Europe mark Panchen Lama's birthday through online campaign Driwa, a Tibetan podcast : Interview Pema's Balloon: new Tibetan short film

༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༣༡ ལ་ཕེབས་པའི་༸སྐུའི་འཁྲུངས་སྐར་དུས་ཆེན་དང་བསྟུན་ཨ་རིའི་གྲོས་ཚོགས་ཀྱི་རྒྱ་ནག་འཛིན་སྐྱོང་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Jim Mcgovern ལགས་ཀྱིས་རྒྱ་ནག་གཞུང་གིས་འཛིན་བཟུང་བྱས་ཏེ་ད་ཆ་གར་སོང་ཆ་མེད་དུ་གྱུར་བའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་དགོས་པའི་ཡོངས་ཁྱབ་ཀྱི་བརྙན་ཐུག་ཞིག་སྤྱི་ཚོགས་དྲྭ་ལམ་བརྒྱུད་སྤེལ་གནང་འདུགཨ་རིའི་ཕོ་བྲང་དཀར་པོའི་མདུན་ཐང་ནས་སྤེལ་བའི་བརྙན་ཐུང་དེའི་ནང་སྐུ་ཞབས་ Jim Mcgovern ལགས་ཀྱིས་རྒྱ་ནག་ནས་ཁྱབ་བརྡལ་བྱུང་བའི་ཏོག་དབྱིབས་ནད་ཡམས་དེའི་རྐྱེན་པས་ད་ཆ་འཛམ་གླིང་ཁྱོན་ཡོངས་ལ་དཀའ་ངལ་ཆེན་པོ་ཞིག་འཕྲད་བཞིན་ཡོད་པའི་ཁར་ནད་དུག་དེ་ཡང་མི་མང་འདུ་འཛོམས་ཀྱི་ཁྲོད་དུ་ཁྱབ་བརྡལ་ཆེན་པོ་འགྲོ་བཞིན་ཡོད་པ་ལྟར་དེ་ནི་རྒྱ་ནག་གཞུང་གི་བཀག་སྐྱིལ་ཁང་དང་བཙོན་ཁང་དག་ལ་དེ་བས་ཀྱང་ཆེས་ཛ་དྲག་གི་གནས་སྟངས་ཤིག་ཆགས་ཡོད་སྟབས། འཛམ་གླིང་འཕྲོད་བསྟེན་ལྷན་ཚོགས་དང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ངོས་ནས་ཆབ་སྲིད་བརྩོན་པ་རྣམས་མགྱོགས་མྱུར་གློད་བཀྲོལ་དང་། ལྷག་པར་དུ་ལོ་ངོ་དྲུག་ལ་འཛིན་བཟུང་བྱས་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་ཡོང་ཐབས་སུ་གནོན་ཤུགས་སྤྲོད་དགོས་པ་གསུངས་འདུགཁོང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༩༥ ལོར་༸པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་མཛད་པ་ནས་ཉིན་གསུམ་གྱི་རྗེས་སུ་རྒྱ་ནག་གཞུང་གིས་ཆུང་སྲིད་རིན་པོ་ཆེ་དང་ཁོང་གི་ཡབ་ཡུམ་བཅས་བཙན་ཁྲིད་གསང་ཉར་བྱས་སྟབས་མི་མང་གིས་ད་བར་ལོ་ངོ་ ༢༥ རིང་ཀུན་གཟིགས་པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཡིན་སྐོར་བཤད་པ་དེ་ལྟར་ཡང་ད་བར་མིག་མཐོང་རྣ་ཐོས་ཡོད་མཁན་སུ་གང་བྱུང་མྱོང་མེད་སྟབས་རྒྱ་གཞུང་གི་བཤད་པར་ཡིད་ཆེད་རྩ་བ་ནས་བྱེད་ཐབས་མེད་པར་འགྲེལ་བརྗོད་གནང་བ་དང་སྦྲགས། མི་སྣ་སུ་རུང་ཞིག་བཙན་ཁྲིད་བྱས་ནས་མི་ཚེ་ཧྲིལ་པོ་བཀག་སྐྱིལ་འོག་གནས་སུ་བཅུག་པ་ནི་རྒྱལ་སྤྱི་ཐོག་ནས་ཁྲིམས་འགལ་ཞིག་དང་ལྷག་པར་དུ་རིན་པོ་ཆེ་མཆོག་ལ་གཞི་རྩའི་འགྲོ་བ་མིའི་ཐོབ་ཐང་དང་། ཆོས་དད་རང་དབང་། དེ་བཞིན་སྨྲ་བརྗོད་རང་དབང་སོགས་ནི་རང་བཞིན་ལྷན་རྒྱས་སུ་ལྡན་ཡོད་སྟབས། རང་དབང་དེ་དག་ལོངས་སུ་སྤྱོད་འཇུག་དགོས་པ་མ་ཟད་ཆུང་སྲིད་རིན་པོ་ཆེ་མཆོག་ལྟ་བུར་མཚོན་ན་ད་ཆ་སྐུ་གཞོན་པའི་དུས་སྐབས་ཤིག་ཆགས་ཀྱི་ཡོད་སྟབས་ངེས་པར་དུ་མགྱོགས་མྱུར་གློད་བཀྲོལ་དགོས་པ་གསུངས་འདུགརྩ་བའི་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་༸སྐུའི་འཁྲུངས་སྐར་དུས་ཆེན་དང་བསྟུན་འཛམ་གླིང་ས་ཕྱོགས་གང་སར་གནས་པའི་བོད་མིའི་ཚོགས་སྒེར་ཁག་ནས་དུས་ཆེན་དེ་སྲུང་བརྩི་དང་འབྲེལ། ཐེམ་སྤང་གི་དུས་སྐབས་འདིར་དབུས་བོད་ཀྱི་གཞོན་ནུ་ལྷན་ཚོགས་ཀྱིས་གཙོས་པའི་ས་གནས་གཞོན་ལྷན་ཡན་ལག་ཁག་གིས་༸སྐུའི་འཁྲུངས་སྲུང་བརྩི་རྣམ་པ་འདྲ་མིན་གྱི་བརྒྱུད་དེ་ཞུས་ཡོད་པའི་ཁྲོད་མི་ནི་སོ་ཊའི་བོད་ཀྱི་གཞོན་ནུ་ལྷན་ཚོགས་ནས་ཁྱིམ་མེད་རྣམས་ལ་ཞལ་ལག་སྦྱིན་གཏོང་གནང་འདུགདབུས་བོད་ཀྱི་བེུད་ལྷན་ཚོགས་ནས་བསང་གསོལ་དང་དྷ་སའི་ཁུལ་དུ་ཡོད་པའི་བོད་མིའི་ཁྱིམ་ཚང་རྣམ་ལ་མཆོད་མར་ཞལ་འདེབས་ཕུལ་ནས་རང་ཁྱིམ་དུ་རིན་པོ་ཆེ་མཆོག་མགྱོགས་མྱུར་གློད་བཀྲོལ་ཡོང་ཐབས་སུ་མཆོད་མེ་ཕུལ་དགོས་པའི་གཞེན་བསྐུལ་གནང་སོང་བ་དང་དེ་བཞིན་ས་གནས་བེུད་ལྷན་ཚོགས་རྣམས་ནས་ཀྱང་ཉིན་མོ་དེ་རྣམ་པ་འདྲ་མིན་བརྒྱུད་དེ་སྲུང་བརྩི་ཞུས་ཡོད།ཕྱོགས་མཚུངས་སྤྱི་ཚོགས་དྲྭ་ལམ་ཁག་ཏུ་ཆུང་སྲིད་རིན་པོ་ཆེ་མཆོག་གི་༸སྐུའི་འཁྲུངས་སྐར་དུས་ཆེན་ཉིན་བོད་རིགས་གཞོན་སྐྱེས་དང་ལྷག་པར་དུ་སློབ་ཕྲུག་རྣམས་ནས་ཀྱང་དོ་སྣང་ཆེན་པོས་རང་ནུས་གང་ལྕོགས་ཀྱིས་རང་ཁྱིམ་དུ་བགྲོ་གླེང་དང་། སྙན་ངག་གྱེར་འདོན། བསྟོད་དབྱངས་ཕུལ་བ་སོགས་རྣམ་པ་འདྲ་མིན་ཐོག་ནས་སྲུང་བརྩི་ཞུས་པའང་མངོན་རྒྱུ་འདུག

ད་ཆ་ཡོ་རོབ་ཁུལ་དུ་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་ནད་ཡམས་རྐྱེན་པས་ས་གནས་སོ་སོའི་གཞུང་ནས་མང་ཚོགས་ཐོག་ཁྱིམ་སྡོད་བཀའ་རྒྱ་དང་མང་ཚོགས་འདུ་འཛོམས་བཅས་ཀྱི་གནང་སྒོ་མང་པོ་ཞིག་བཀག་སྡོམ་བྱས་ཡོད་པའི་གནས་སྟངས་འདིའི་ཁྲོད་ཟླ་བ་འདིའི་ཕྱི་ཚེས་ ༢༥ ཉིན་ཡོ་རོབ་རྒྱལ་ཁབ་ཁུལ་དུ་གནས་སྡོད་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་རང་ཁྱིམ་ནས་སྤྱི་ཚོགས་དྲྭ་ལམ་བརྒྱུད་རྣམ་པ་འདྲ་མིན་ཐོག་ནས་རྒྱ་ནག་གཞུང་གི་བཙན་འོག་ཏུ་ཡོད་པའི་༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༡ ལ་ཕེབས་པའི་༸སྐུའི་འཁྲུངས་སྐར་ལ་དགའ་སྐྱོ་ཟུང་འབྲེལ་ཐོག་སྲུང་བརྩི་ཞུས་ཡོད་པ་རེད། ཡོ་རོབ་རྒྱལ་ཁབ་སུད་སི་ནང་ལ་ཆ་མཚོན་ན་སུད་སི་ས་གནས་བོད་ཀྱི་བེུད་ཚོགས་པ་ནས་སྤྱི་ཚོགས་དྲྭ་ལམ་ཐོག་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༡ ལ་ཕེབས་པའི་འཁྲུངས་སྐར་ལ་འཚམས་འདྲི་དང་རིན་པོ་ཆེའི་རྗེས་དྲན་ཞུས་པའི་བརྙན་ཐུང་ཞིག་འགྲེམས་སྤེལ་གནང་བ་དང་འབྲེལ་ཏེ་བརྙན་ཐུང་འདིའི་ནང་༸གོང་ས་མཆོག་གིས་ངོས་འཛིན་མཛད་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་དྲུག་ལ་ཕེབས་སྐབས་རྒྱ་གཞུང་གིས་བཙན་ཁྲིད་བྱས་ནས་ད་བར་ལོ་ ༢༥ རིང་གར་སོང་ཆ་མེད་དུ་གྱུར་ཡོད་པའི་རྒྱབ་ལྗོངས་ཀྱི་ལོ་རྒྱུས་སྙིང་བསྡུས་དང་དེ་བཞིན་ས་གནས་སུ་གནས་སྡོད་བོད་མི་རྒན་གཞོན་དར་གསུམ་གྱིས་རང་ཁྱིམ་ནས་རིན་པོ་ཆེ་མཆོག་གི་འཁྲུངས་སྐར་ལ་འཚམས་འདྲི་དང་༸པཎ་ཆེན་རིན་པོ་ཆེ་མཆོག་གང་མགྱོགས་གློད་བཀྲོལ་ཡོང་བའི་རེ་འདུན་དང་བཅས་པའི་པར་རིས་ཕྱོགས་བསྒྲིགས་བཅས་ཞུས་འདུགསུད་སི་བོད་ཀྱི་བེུད་ཚོགས་པའི་ཚོགས་གཙོ་བདེ་སྐྱིད་ལགས་ཀྱིས་བརྙན་ཐུང་དེ་ཡང་གཙོ་བོ་རིན་པོ་ཆེ་མཆོག་གི་འཁྲུངས་སྐར་དང་བསྟུན་འཛམ་གླིང་མང་ཚོགས་ཁྲོད་༸པཎ་ཆེན་རིན་པོ་ཆེ་མཆོག་གི་གནད་དོན་གོ་རྟོགས་སྤེལ་ཆེད་དང་རིན་པོ་ཆེ་མཆོག་གང་མགྱོགས་གློད་བཀྲོལ་ཡོང་བའི་ཆེད་རྒྱལ་སྤྱིའི་ཚོགས་སྡེ་ཁག་ནས་རྒྱ་གཞུང་ལ་གནོན་ཤུགས་སྤྲོད་གོས་པའི་འབོད་སྐུལ་ཞུས་འདུག དེ་བཞིན་ཡང་སུད་སི་སྐུ་ཚབ་དོན་གཅོད་ཁང་ནས་༸པཎ་ཆེན་རིན་པོ་ཆེ་མཆོག་གི་འཁྲུངས་སྐར་ཉིན་མོར་སྤྱི་ཚོགས་དྲྭ་ལམ་ཐོག་ཡོངས་ཁྱབ་བསྒྲགས་གཏམ་ཞིག་སྤེལ་ནས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནད་དོན་ནི་ད་དུང་ཡང་སེལ་མ་ཐུབ་པ་ལྷག་ཡོད་པར་བརྟེན་ད་ཆ་རྒྱ་གཞུང་ནས་རང་ཉིད་ཀྱིས་བསགས་པའི་ཉེས་པ་དེར་འགན་ཁུར་འཇུག་དགོས་པ་མ་ཟད་རིན་པོ་ཆེ་མཆོག་གི་གནད་དོན་གསལ་འདོན་གནང་རྒྱུའི་དུས་ལ་སླེབས་ཡོད་ཅེས་བརྗོད་འདུག རིན་པོ་ཆེ་མཆོག་དང་སྐུ་འཁོར་ནང་མི་རྣམས་གང་མགྱོགས་གློད་བཀྲོལ་ཡོང་བའི་ཆེད་རྒྱལ་སྤྱིའི་ཚོགས་སྡེ་ཁག་དང་མཉམ་འབྲེལ་རྒྱལ་ཚོགས་ནས་རྒྱ་གཞུང་ལ་གནོན་ཤུགས་སྤྲོད་སྐྱོང་ཡོང་བ་དང་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་དང་ཆོས་དད་རང་དབང་གི་གནས་བབ་རྒྱུས་ལོན་ཆེད་རྒྱལ་ཚོགས་ཀྱི་རང་དབང་ཅན་གྱི་རྟོག་ཞིབ་རུ་ཁག་བོད་དུ་སྐྱོད་རྒྱུའི་ཐོག་རྒྱ་གཞུང་ལ་གནོན་ཤུགས་སྤྲོད་དགོས་པའི་རེ་འདུན་ཡང་བཏོན་འདུག དེ་དང་ཕྱོགས་མཚུངས་ཉིན་འདིར་དབྱིན་ཡུལ་ནང་དབྱིན་ཡུལ་བོད་རིགས་ཚོགས་པས་རང་ཁྱིམ་དུ་༸པཎ་ཆེན་རིན་པོ་དགེ་འདུན་ཆོས་ཀྱི་ཉི་མ་མཆོག་གི་༸སྐུ་པར་སྒྲིག་གཤོམ་དང་རྟེན་འབྲེལ་མཆོད་མེ་ཞལ་ཕྱེ། དགའ་སྐྱོང་ཟུང་འབྲེལ་གྱི་གླུ་དབྱངས་། དེ་བཞིན་དགུང་གྲངས་ ༣༡ ལ་ཕེབས་པའི་མངར་ཟས་ Cake བགོ་འགྲེམས་གནང་སྟེ་འཁྲུངས་སྐར་སྲུང་བརྩི་ཞུས་འདུག་པ་མ་ཟད། ས་གནས་བོད་རིགས་རྒན་གཞོན་དར་གསུམ་ནས་ལག་ཏུ་དཀར་གཙང་མཇལ་དར་དང་བོད་ཆས་ལེགས་པར་སྤྲས་ཏེ་སྤྱི་ཚོགས་དྲྭ་ལམ་བརྒྱུད་༸པཎ་ཆེན་རིན་པོ་ཆེ་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་འདུགཡོ་རོབ་རྒྱལ་ཁབ་ཨི་ཊ་ལི་དང་སེ་པན། ཕ་རན་སི། སྦེལ་ཇམ། ཨོ་སི་ཊོ་ལི་ཡ། ཇར་མི་ནི། ཅེཀ་སྤྱི་མཐུན་རྒྱལ་ཁབ་སོགས་སོ་སོའི་ནང་དུ་གནས་སྡོད་བོད་མི་སྒེར་དང་ཚོགས་སྐྱིད་ཁག བོད་དོན་རྒྱབ་སྐྱོར་ཚོགས་པ། དེ་བཞིན་ཆོས་ཚོགས་བཅས་ཀྱིས་༸པཎ་ཆེན་དགེ་འདུན་ཆོས་ཀྱི་ཉི་མཆོག་གི་འཁྲུངས་སྐར་ཉིན་བསང་གསོལ་དང་སྨོན་ལམ་གསུང་འདོན། དེ་བཞིན་འཛམ་གླིང་མང་ཚོགས་ཁྲོད་རིན་པོ་ཆེ་མཆོག་གི་གནད་དོན་གོ་རྟོགས་ཀྱི་གཏམ་བཤད་སྤེལ་བ། ལྷག་དོན་རིན་པོ་ཆེ་མཆོག་གློད་བཀྲོལ་དགོས་པའི་ས་རྟགས་བསྡུ་རུབ་གནང་བ་སོགས་པ་རྣམ་པ་འདྲ་མིན་བརྒྱུད་དེ་དགའ་སྐྱོང་ཟུང་འབྲེལ་གྱི་ཚོར་བ་དང་བཅས་ཉིན་མོ་འདི་སྲུང་བརྩི་ཞུས་ཡོད་པ་རེད།

ཉེ་ཆར་ཨ་རིའི་ Northwetern གཙུག་སློབ་སློབ་གཉེར་ཁང་དུ་ཆོས་ལུགས་ལོ་རྒྱུས་ཀྱི་ལོ་རྒྱུས་ཐོག་འབུམ་རམས་པའི་སློབ་སྦྱོང་གནང་བཞིན་པའི་དོན་གྲུབ་བཀྲ་ཤིས་ལགས་དང་དེ་བཞིན་ཨ་རིའི་ Michigan གཙུག་ལག་སློབ་ཁང་དུ་དངོས་ཁམས་ཚན་རིག་ཐོག་འབུམ་རམས་པའི་སློབ་སྦྱོང་གནང་བཞིན་པའི་བསྟན་འཛིན་རབ་དགའ་ལགས་གཉིས་ཀྱིས་ Podcast ཞེས་པའི་མི་སྒེར་གྱི་གླེང་མོལ་གྱི་ལེ་ཚན་ཞིག་གསར་བཟོ་གནང་སྟེ་བརྗོད་གཞི་སྣ་མང་ཐོག་ལྟ་གྲུབ་མང་པོའི་བཞེད་ཚུལ་བརྒྱུད་ནས་བགྲོ་གླེང་གི་ལས་རིམ་ཞིག་གཙོ་སྐྱོང་གནང་གི་ཡོད་པ་རེད། གསར་འགོད་པས་གླེང་མོལ་དེའི་གཙོ་སྐྱོང་བ་བསྟན་འཛིན་རབ་དགའ་ལགས་སུ་གླེང་མོལ་དེ་གསར་གཏོད་གནང་ནས་བོད་པའི་སྤྱི་ཚོགས་ལ་ཐུགས་རེ་ག་རེ་གནང་གི་ཡོད་མེད་དང་གླེང་མོལ་གྱི་ལེ་ཚན་དེར་དམིགས་བསལ་གྱི་དྲི་བ་ཞེས་པའི་མཚན་བྱང་འདོགས་དགོས་དོན་གང་ཡིན་སོགས་ཀྱི་ཐོག་དྲི་བ་ཁག་ཅིག་དྲིས་པར་དྲི་བ་ནི་སློབ་སྦྱོང་ལ་འཇུག་པའི་སྒོ་ཡིན་སྟབས་མཚན་བྱང་དེ་ལྟར་བཏགས་པ་ཡིན་པར་ངོ་སྤྲོད་གནང་སོང་བ་དང་ཆབས་ཅིག་ཏུ་གླེང་མོལ་དེ་བརྒྱུད་ནས་བོད་པའི་སྤྱི་ཚོགས་སུ་ཤེས་བྱ་གསར་པ་ནང་འདྲེན་དང་གུ་ཡངས་ཀྱི་བགྲོ་གླེང་གི་ལམ་ཁ་ཞིག་བསྐྲུན་རྒྱུའི་རེ་བ་ཡོད་སྐོར་གསུངས་ཡོད།

ཉན་པ།: Listen ཕབ་ལེན། Download རྒྱ་ནག་དང་ཏོག་དབྱིབས་ནད་རིམས། བོད་དོན་ལ་གོ་སྐབས་ཐོག་གླེང་མོལ། Sunday 26/04/2020 COVID-19 crisis and China, opportunities for Tibet: Panel Discussion