Monthly Archives: July, 2020

མི་ལོ་ ༡༡ རིང་རྒྱ་གཞུང་གིས་ཆེས་དྲག་གནོན་འོག་བཙོན་འཇུག་ཁྲིམས་ཆད་མྱངས་པའི་བོད་ཀྱི་ཆབ་སྲིད་བཙོན་ཟུར་གྲྭ་བསྟན་འཛིན་ཆོས་གྲགས་ལགས་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་ཡོད་པ་རེད།དེའང་ཁ་ཉིན་ཟླ་ ༧ ཚེས་ ༢༦ ཉིན་བཞུགས་སྒར་དྷ་རྨ་ས་ལར་རྟེན་གཞི་བྱས་པའི་དབུས་བདེ་ལེགས་སྨན་ཁང་དུ་བོད་ཀྱི་ཆབ་སྲིད་བཙོན་ཟུར་གྲྭ་བསྟན་འཛིན་ཆོས་གྲགས་ལགས་དགུང་ལོ་ ༧༩ ཐོག་འདས་ལོའི་ནང་གནས་མཆོག་རྡོ་རྗེ་གདན་དུ་འཁྲུས་ཁང་ནང་བརྡབ་སྐྱོན་བྱུང་རྐྱེན་ཅན་རྡི་སྒར་དུ་སྨན་བཅོས་གནང་བ་མ་ཟད། དེ་བཞིན་དབུས་བདེ་ལེགས་སྨན་ཁང་དུ་ཡུན་རིང་སྨན་བཅོས་གང་དྲག་གནང་ཡང་དྲག་སྐྱེད་མ་བྱུང་བར་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པ་དང་བསྟུན། བཙན་བྱོལ་བོད་མིའི་གནས་ཡུལ་རྒྱ་གར་གྱིས་གཙོས་པའི་རྒྱལ་ཁབ་འདྲ་མིན་ནང་གནས་བཞུགས་བོད་མི་གང་ཟག་སྒེར་དང་དེ་བཞིན་བོད་ཀྱི་དགུ་བཅུ་གསུམ་ལས་འགུལ་ཚོགས་པ་གཙོས་ཚོགས་སྐྱིད་ཁག་གིས་ཀྱང་ངོ་དེབ་སོགས་སྤྱི་ཚོགས་ཀྱི་བརྒྱུད་ལམ་ཁག་ཏུ་མྱ་ངན་གུས་བཏུད་དང་ཐུགས་གསོའི་གསུང་འཕྲིན་སོགས་ཀྱང་སྤེལ་དང་སྤེལ་མུས་རེད་འདུག ལྷག་པར་དུ་བོད་ཀྱི་དགུ་བཅུ་གསུམ་ལས་འགུལ་ཚོགས་པས་ཁོང་གློ་བུར་དུ་འདས་གྲོངས་སོང་བའི་གནས་ཚུལ་ཐོས་པ་དང་འཕྲལ་མ་ཉིད་དུ་འབྲེལ་ཡོད་མི་སྣ་བརྒྱུད་ནས་འདས་མཇུག་གི་ཕྱག་རོགས་ཞུ་འོས་ཅི་དགོས་དང། དེ་བཞིན་ཐེག་ཆེན་ཆོས་གླིང་གཙུགས་ལག་ཁང་དུ་ཆོས་འབུལ་བྱ་རྒྱུ་སོགས་ཆད་ལུས་མེད་པ་ཞུ་བཞིན་པ་དང་བཅས། དམ་པ་གང་ཉིད་གང་ཚོ་དང་དུས་གཏན་དུ་ཞལ་བྲལ་ཡང། ཁོང་གིས་ང་ཚོའི་མི་རིགས་དང་རྒྱལ་ཁབ་ཀྱི་དོན་དུ་འཐབ་རྩོད་གནང་བའི་ལོ་རྒྱུས་དེ་དུས་ནམ་ཡང་བོད་ཀྱི་རྒྱལ་རབས་ལོ་རྒྱུས་ནང་འཁོད་ངེས་རེད་ཅེས་ཁོང་གི་མཛད་རྗེས་ཁག་དྲན་གསོ་དང་མྱ་ངན་གུས་བཏུད་ཞུས་འདུགརྩ་བའི་གྲྭ་བསྟན་འཛིན་ཆོས་གྲགས་ལགས་དམ་པ་དེ་ཉིད་ཕྱི་ལོ་ ༡༩༤༡ ལོར་ནག་ཤོད་འབྲི་རུ་རྫོང་དུ་འཁྲུངས་པ་དང། དགུང་ལོ་ ༡༠ ལ་ཕེབས་སྐབས་འབྲི་རུ་རྫོང་གི་རབ་བརྟན་དགོན་དུ་ཆོས་ཞུགས་གནང་། དེ་རྗེས་ཕྱི་ལོ་ ༡༩༦༩ ལོར་འབྲི་རུ་ཁུལ་དུ་ས་གནས་རྒྱ་ནག་གཞུང་གི་དབང་སྒྱུར་ལ་བོད་མི་ཚོས་རྒྱ་གཞུང་ལ་གཞི་རྒྱ་ཆེ་བའི་ངོ་རྒོལ་གནང་རྗེས་རྒྱ་གཞུང་གིས་ཁོང་འཛིན་བཟུང་བྱས་ཡོད་པ་ལྟར། མི་ལོ་ ༡༡ རིང་བཙོན་འཇུག་འོག་བཀག་བསྐྱིལ་བྱས་ཡོད་པ་རེད། ཕྱི་ལོ་ ༡༩༨༡ ལོར་ཁོང་བཙོན་གྲོལ་ཐོབ་ཡོད་པ་དང་བྱེས་སུ་ཕེབས་འབྱོར་རྗེས་ཁོང་གིས་རང་གི་མི་ཚེའི་ནང་དཀའ་སྡུག་ཇི་ཙམ་མྱངས་པའི་༼༼དངོས་མྱོང་མི་ཚེའི་རི་མོ་༽ ཞེས་པའི་ལོ་རྒྱུས་རྩོམ་འབྲི་གནང་ཡོད་པ་རེད། འདི་ག་རླུང་འཕྲིན་ཁང་གིས་དེ་རིང་བོད་ནང་དུ་ད་ལྟའི་ཆར་བོད་མི་ཆབ་སྲིད་བཙོན་ཟུར་སྤྱིའི་གནས་སྟངས་དང་འབྲེལ་ནས་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཟླ་བ་བཀྲིས་ལགས་ལ་བཅར་འདྲི་ཁག་ཅིག་ཞུས་པར་ཁོང་གིས་ཆབ་སྲིད་བཙོན་ཟུར་རྣམས་ལ་སྨན་བཅོས་དང་འཕྲོད་བསྟེན་ཐོག་ལ་ངལ་བ་ཆེན་པོ་འཕྲད་བཞིན་ཡོད་སྐོར་སོགས་གསུངས་སོང་།

ཉན་པ།: Listen ཕབ་ལེན། Download ༸གོང་ས་མཆོག་གིས་དྲྭ་རྒྱ་བརྒྱུད་བཀའ་ཆོས་དང་བཀའ་སློབ་ཁག་ཅིག་བསྩལ་གཏན་ཁེལ་བ། སྐད་འཕྲིན་དངོས་སུ་སྒོ་རྒྱབ་པར་བརྟེན་བོད་ཕྱི་ནང་གི་འབྲེལ་ལམ་རྒྱང་ཐག་རིང་དུ་གྱེས་རྒྱུའི་ཉེན་ཚབས། སིཌ་ནི་དང་པརྠ་གྲོང་ཁྱེར་གྱི་རྒྱ་ནག་གཞུང་ཚབ་མདུན་དུ་བོད་དོན་ལས་འགུལ། ཁྲིན་ཏུའུ་ནང་གི་ཨ་རི་གཞུང་ཚབ་སྒོ་རྒྱབ་པས་བོད་དོན་མཁོ་སྒྲུབ་ལ་གནོད་སྐྱོན་ཐེབས་ངེས་ཡིན་པ། ནང་ཆོས་ཐོག་སློབ་གཉེར་གནང་ཕྱིར་ལ་དྭགས་དབུས་གཙུག་ལག་སློབ་གཉེར་ཁང་གསར་འཛུགས་གནང་འཆར། Monday 27/07/2020 More live webcasts from the Dalai Lama lined up till September Tibetans express concern as Wechat officially blocked in India Solo protests against China in Sydney and Perth US suspends operations in Chengdu, Is it a loss for Tibetans? Modi approves Ladakh’s first Ladakh Central University, to include centre for Buddhist Studies

རིང་མིན་ཟླ་བ་འདིའི་ཕྱི་ཚེས་ ༢༩ དང་ཕྱི་ཟླ་ ༨ ཚེས་ ༤ ནས་ ༦ དེ་བཞིན་ཕྱི་ཟླ་ ༩ ཚེས་ ༤ ནས་ ༦ བར་བཅས་སོ་སོར་རྒྱ་གར་གྱི་སློབ་མ་ཁག་ཅིག བོད་རིགས་གཞོན་སྐྱེས་རྣམས་དང་ཨེ་ཤ་ཡའི་ཚོགས་སྡེ་ཁག་བཅས་ཀྱིས་ཇི་ལྟར་གསོལ་འདེབས་ཞུས་དོན་ལྟར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་རྒྱ་བརྒྱུད་ནས་བཀའ་ཆོས་དང་བཀའ་སློབ་བསྩལ་གཏན་ཁེལ་འདུགདེ་ཡང་༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་དྷ་རམ་ས་ལའི་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་དྲྭ་རྒྱ་བརྒྱུད་བཀའ་ཆོས་དང་བཀའ་སློབ་ཁག་ཅིག་བསྩལ་གཏན་ཁེལ་བའི་གསལ་བསྒྲགས་ཤིག་སྤེལ་འདུག་པ་དང་།  དེའི་ནང་ཀུན་གྱིས་དགོངས་མངའ་བཞིན་རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་གཉན་རིམས་གསར་པའི་གློ་ཚད་རིམས་ནད་ COVID-19 ཀྱི་གནས་ཚུལ་ཛ་དྲག་ཆེ་བར་བརྟེན་ཕྱི་ཟླ་ ༧ ཚེས་ ༢༩ ཉིན་གྱི་སྔ་དྲོ་ཚོུད་ ༩ ནས་ ༡༠ བར་ཚོུད་གཅིག་གི་རིང་རྒྱ་གར་གྱི་ཤེས་ཡོན་སྡེ་ཁག་འདྲ་མིན་ཁག་གིས་ཇི་ལྟར་གསོལ་འདེབས་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་དེང་དུས་ཀྱི་རྙོག་ཟིང་ཆེ་བའི་འཛམ་གླིང་ཞེས་པའི་བརྗོད་གཞི་དང་འབྲེལ་བྱམས་བརྩེའི་ཐོག་བཀའ་སློབ་དང་རྒྱ་གར་གྱི་སློབ་མ་ཁག་ནས་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་ཡིན་པ་དང་།དེ་བཞིན་ཕྱི་ཟླ་ ༨ ཚེས་ ༤ ནས་ ༦ ཉིན་སོ་སོའི་སྔ་དྲོ་ཚོུད་ ༩ ནས་ ༡༠ བར་ཁྱོན་ཉིན་གྲངས་གསུམ་གྱི་རིང་བོད་རིགས་གཞོན་སྐྱེས་རྣམས་ཀྱིས་ཇི་ལྟར་གསོལ་བ་བཏབ་པ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་སྩལ་རྒྱུ་དང་། དེ་རྗེས་ཆུ་ཚོད་ ༡༠ ནས་ ༡༠༌༣༠ བར་ཚོགས་པ་དེའི་ཚོགས་མི་རྣམས་ནས་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་རེད་འདུགགཞན་ཡང་ཕྱི་ཟླ་ ༩ ཚེས་ ༤ ནས་ ༦ ཉིན་སོ་སོའི་སྔ་དྲོ་ཚོུད་ ༩ ནས་ ༡༠ བར་ཁྱོན་ཉིན་གྲངས་གསུམ་གྱི་རིང་ཨེ་ཤ་ཡའི་ཚོགས་སྡེ་ཁག་ཅིག་ནས་ཇི་ལྟར་གསོལ་བ་བཏབ་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཆོས་ཤིག་བསྩལ་རྒྱུ་དང་ཚོགས་པའི་ཚོགས་མི་རྣམ་པས་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་བཅས་ཀྱི་མཛད་འཆར་ཐུགས་གཏན་ཁེལ་འདུག གཞི་རྩའི་དྲྭ་ལམ་ཐད་གཏོང་བརྒྱུད་བཀའ་ཆོས་དང་བཀའ་སློབ་དེ་དག་དབྱིན་ཇི། ཧིཾདཱི། བལ་སྐད། རྒྱ་སྐད། ཧྥི་རེན་ཆི། ར་ཤི་ཡ། སི་པེན། ཝི་ཏ་ནམ། ཉི་འོང་། སོག་པོ། ཀོ་རི་ཡ། འཇར་མི་ནི། པོར་ཇུ་གྷལ་དང་ཨི་ཊ་ལིའི་བཅས་ཀྱི་སྐད་རིགས་ནང་གསུང་སྒྱུར་གནང་སྟེ་ཐད་གཏོང་གནང་གི་འདུག དོན་གཉེར་ཅན་ཕྱི་ནང་གི་མང་ཚོགས་རྣམས་ནས་༸དཔལ་ལྡན་དགའ་ལྡན་ཕོ་བྲང་གི་དྲྭ་ཚིགས་དང་༸གོང་ས་མཆོག་གི་ངོ་དེབ་ནང་ཐད་ཀར་གསན་གཟིགས་ཞུ་རྒྱུ་ཡོད་པ་ལྟར། དད་ལྡན་མང་ཚོགས་ཚོས་ས་གནས་སོ་སོར་བཅད་པའི་སྤྱི་ཚོགས་རྒྱང་བཀྱེད་ཀྱི་བཀའ་རྒྱ་ལས་མི་འདའ་བར་གསན་གཟིགས་གནང་དགོས་པའི་གཞེན་སྐུལ་གནང་ཡོད་པ་རེད།

འདས་པའི་བདུན་ཕྲག་གི་རེས་གཟའ་པ་སངས་ཉིན་ཨ་རིའི་རྒྱལ་ཁབ་ཀྱི་གསང་བའི་གནས་ཚུལ་སྲུང་སྐྱོབ་སླད་ཨ་རིའི་གྲོང་ཁྱེར་ཧུས་ཊོན་ནང་རྟེན་གཞི་བྱས་པའི་ཨ་རིར་སོ་མྱུལ་བྱེད་མཁན་གཙོ་བོ་རྒྱ་ནག་གཞུང་ཚབ་ལས་ཁང་སྒོ་རྒྱག་ཏུ་བཅུག་ཡོད་པ་དང་། ཨ་རིའི་བྱེད་ཕྱོགས་དེར་རྒོལ་ལན་ཚུལ་དུ་རྒྱ་གཞུང་གིས་དེ་རིང་རེས་གཟའ་ཟླ་བའི་ཉིན་ཁྲིན་ཏུའུ་ནང་ཡོད་པའི་ཨ་རིའི་གཞུང་ཚབ་ལས་ཁང་སྒོ་རྒྱབ་ ཡོད་པ་རེད། འོན་ཀྱང་ད་ལན་ཕྱི་ལོ་ ༡༩༨༥ ལོར་གསར་འཛུགས་བྱས་པའི་ཁྲིན་ཏུའུ་ནང་གི་ཨ་རིའི་གཞུང་ཚབ་ཁང་སྒོ་བརྒྱབ་པ་དེས་བོད་དོན་གནས་ཚུལ་མཁོ་སྒྲུབ་སླད་ཤུགས་རྐྱེན་ཐེབས་རྒྱུ་ཡིན་པ་དཔྱད་ཞིབ་པ་ཚོས་གསུངས་འདུག གཞི་རྩའི་ཨ་རིས་ཧུས་ཊོན་ནང་གི་རྒྱ་ནག་གཞུང་ཚབ་ཁང་སྒོ་རྒྱབ་པའི་གནད་དོན་དེའི་ཐད་རྒྱ་ནག་གིས་ཨ་རིའི་ངོས་ནས་ཐག་གཅོད་དེ་ཕྱིར་བསྡུ་མ་བྱས་པ་ཡིན་ན་དེར་གཅིག་མཚུངས་ཀྱི་ཡ་ལན་སྤྲོད་རྒྱུ་ཡིན་པ་བརྗོད་ཡོད་པ་དང་སྦྲགས། རྒྱ་གཞུང་གིས་གཟའ་འཁོར་སྔོན་མའི་རེས་གཟའ་པ་སངས་ཉིན་ཁྲིན་ཏུའུ་ནང་གི་ཨ་རིའི་གཞུང་ཚབ་ལས་ཁང་དེ་ཆུ་ཚོད་ ༧༢ ནང་ཚུད་དུ་སྒོ་རྒྱག་དགོས་པའི་བཀའ་རྒྱ་བཏང་བ་དང་། དེ་རིང་རེས་གཟའ་ཟླ་བའི་ཉིན་གྱི་སྔ་དྲོ་ཕྱག་ཚོད་ ༡༠ པའི་ཐོག་ཨ་རིའི་གཞུང་ཚབ་ལས་ཁང་དེ་སྒོ་རྒྱབ་འདུག དུས་སྐབས་དེ་དང་འབྲེལ་ནས་ཁྲིན་ཏུའུ་ནང་གནས་སྡོད་རྒྱ་རིགས་རྣམས་ཁུལ་དེར་ཡོང་ནས་རྒྱ་ནག་གི་རྒྱལ་དར་ཁྱེར་བ་དང་འདྲ་པར་སོགས་རྒྱབ་པའི་གནས་ཚུལ་ཡང་མཐོང་རྒྱུ་འདུག གནད་དོན་དེ་དང་འབྲེལ་བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་དང་བོད་དང་རྒྱ་ནག་ཐོག་གི་གནད་དོན་དཔྱད་ཞིབ་པ་ཁུ་ཚུར་ཀུན་དགའ་བཀྲ་ཤིས་ལགས་ཀྱིས་ཡུ་ཊུབ་ཐོག ཀུན་དགའ་བཀྲ་ཤིས་ཀྱི་ཆེད་གཏམ་ཞེས་པའི་ལེ་ཚན་ཐོག་རྒྱ་གཞུང་གིས་ཁྲིན་ཏུའུ་ཡོད་པའི་ཨ་རིའི་གཞུང་ཚབ་ཁང་སྒོ་རྒྱག་དགོས་པའི་གནད་དོན་གང་ཡིན་མིན་སྐོར་དཔྱད་ཞིབ་གནང་བའི་ནང་ལ། ད་ལན་རྒྱ་ནག་གཞུང་གིས་ཨ་རིར་འཁོན་ལན་ཚུལ་དུ་ཆེད་མངགས་ཁྲིན་ཏུའུ་ནང་ཡོད་པའི་ཨ་རིའི་གཞུང་ཚབ་ལས་ཁང་དེ་བདམས་དགོས་དོན་ནི། གཞུང་ཚབ་ཁང་དེས་རྒྱ་ནག་གཞུང་གིས་ཆ་བགོས་བྱས་པའི་བོད་རང་སྐྱོང་ལྗོངས་ཟེར་བ་དང་སི་ཁྲོན་ཞིང་ཆེན། ཡུ་ནན་ཞིང་ཆེན། དེ་བཞིན་Guizhou ཞིང་ཆེན་དང་Chongqing ཞིང་ཆེན་བཅས་ཀྱི་ནང་ལས་དོན་སྒྲུབ་ཀྱི་ཡོད་པ་དང་། གཞུང་ཚབ་ཁང་དེ་བོད་ཀྱི་ས་ཁུལ་ཕལ་མོ་ཆེ་དང་ཐག་ཉེ་ཤོས་ཆགས་ཀྱི་ཡོད་པ་དང་ཕྱོགས་མཚུངས། བོད་དང་ཤིན་ཅང་ནང་གི་འགྲོ་བ་མིའི་ཐོབ་ཐང་སོགས་དང་འབྲེལ་གནས་ཚུལ་རྒྱུས་ལོན་བྱེད་རྒྱུའི་ལྟེ་གནས་ཤིག་ཆགས་ཀྱི་ཡོད་སྟབས། གཞུང་ཚབ་ཁང་དེ་སྒོ་བརྒྱབ་པ་ཡིན་ན་རྒྱ་ནག་ལ་དཔལ་འབྱོར་སོགས་དང་འབྲེལ་བའི་དམིགས་བསལ་གྱི་གནོད་སྐྱོན་ཐེབས་ཀྱི་མེད་སྐོར་གསུངས་ཡོད། ཁོང་གིས་ད་དུང་ཁྲིན་ཏུའུ་རུ་ཡོད་པའི་ཨ་རིའི་གཞུང་ཚབ་ཁང་སྒོ་རྒྱབ་པ་དེས་བོད་མིར་གྱོང་གུད་ཚབས་ཆེན་ཡོད་པ་དང་། དུས་རྒྱུན་ཁྲིན་ཏུའུ་རུ་ཨ་རིའི་གཞུང་ཚབ་ཁང་དེས་བོད་ཀྱི་ས་ཁུལ་ཁག་ནང་གི་གནས་ཚུལ་མཁོ་སྒྲུབ་ཐད་ནུས་ཤུགས་འདོན་བཞིན་ཡོད་པས། ས་གནས་དེར་གཞུང་ཚབ་ཁང་སྒོ་རྒྱབ་པ་དེས་བོད་མིའི་ཐོག་དོ་སྣང་གནང་རྒྱུར་ཏོག་ཙམ་གནོིད་སྐྱོན་ཐེབས་བཞིན་ཡོད་པ་རེད་ཅེས་གསུངས་ཡོད། གནད་དོན་འདིའི་ཐད་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་སུ་བཀའ་འདྲི་ཞུ་སྐབས་ཁོང་གིས། རྩ་བའི་ས་གནས་ས་ཐོག་ཏུ་གཞུང་ཚབ་ལས་ཁང་ཞིག་མེད་པ་ཡིན་ན་དོ་ཕོག་འགྲོ་ངེས་ཡིན་པ་དང་། ཡང་སྒོས་བོད་ཀྱི་ས་གནས་གཞན་ཁག་ལ་པེ་ཅིན་དུ་ཡོིད་པའི་ཨ་རིའི་དོན་གཅོད་ཀྱིས་ཐད་གར་གཟིགས་རྟོག་གནང་གི་ཡོད་པས། བོད་དོན་གྱི་གནད་དོན་ཐད་དོ་ཕོག་དེ་ཙམ་ཞིག་འགྲོ་རྒྱུ་མིན་པར་གསུངས་སོང་། ཁོང་གིས་ད་དུང་། ཁྲིམས་ཐོག་ནས་ཨ་རིས་བོད་ཀྱི་གནད་དོན་ཐད་ཐུགས་སྣང་གནང་དགོས་སྟབས། གཞུང་ཚབ་ལས་ཁང་སྒོ་བརྒྱབ་མིན་ལ་མ་ལྟོས་པར། ཨ་རིའི་གཞུང་ཚབ་ཀྱིས་བོད་དོན་ཐད་དོ་སྣང་གནང་དགོས་སྐོར་གསུངས་སོང་། གཞན་ཡང་ཨ་རིའི་གཞུང་ཚབ་ལས་ཁང་སྒོ་རྒྱག་རྒྱུའི་ཐག་གཅོད་དེ་དང་འབྲེལ། ཁྲིན་ཏུའུ་རུ་རྟེན་གཞི་བྱས་པའི་རྒྱལ་སྤྱིའི་ལས་དོན་ལྟེ་གནས་ཁང་གི་འགན་འཛིན་ Long Xingchun ཟེར་བས་ཁྲིན་ཏུའུ་ནང་དུ་ཡོད་པའི་ཨ་རིའི་གཞུང་ཚབ་ཁང་དེས་བོད་ཐོག་དམིགས་བསལ་གྱི་དོ་ཁུར་གནང་གི་ཡོད་སྟབས། གཞུང་ཚབ་ཁང་དེ་སྒོ་བརྒྱབ་པ་ཡིན་ན་ཨ་རིའི་ལས་དོན་ལ་ཤུགས་རྐྱེན་ཐེབས་རྒྱུ་ཡིན་པར་བརྗོད་ཡོད་པ་རེད། རྩ་བའི་ཕྱོགས་གཉིས་ཀྱི་གཞུང་ཚབ་སྒོ་བརྒྱབ་པའི་གནད་དོན་དེ་ནི་ཨ་རྒྱ་གཉིས་ཀྱི་ད་ལྟའི་ཚོར་བ་རྣོ་བའི་ཆབ་སྲིད་ཀྱི་གནས་སྟངས་དང་འབྲེལ་བ་ཡོད་པ་མ་ཟད། ཨ་རི་ངོས་ནས་རྒྱ་གཞུང་གི་གཞུང་ཚབ་དེ་ཡིས་ཨ་རིའི་ནང་གསང་བའི་ལས་དོན་གཉེར་གྱི་ཡོད་པ་གསུངས་ཡོད།

རྒྱ་ནག་གི་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཁྲོད་ད་ཆ་འཛམ་གླིང་རྒྱལ་ཁབ་ཕལ་མོ་ཆེ་ནས་རྒྱ་ནག་ལ་སྐྱོན་བརྗོད་ཤུགས་ཆེ་བྱེད་བཞིན་པའི་གོ་སྐབས་དམ་འཛིན་གྱིས་ཨོ་སི་ཊོ་ལི་ཡའི་ནང་གི་གྲོང་ཁྱེར་ཆེ་ཤོས་ Sydney ནང་གི་རྒྱ་ནག་གཞུང་ཚབ་ལས་ཁུངས་དང་ནུབ་ཨོ་སི་ཊོ་ལི་ཡའི་མངའ་སྡེའི་རྒྱལ་ས་ Perth ནང་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུ་ས་གནས་བོད་མི་གཉིས་ཀྱིས་ཁེར་རྐྱང་བོད་དོན་ལས་འགུལ་སྤེལ་འདུག ཆབ་སྲིད་བཙོན་ཟུར་དང་བོད་རང་བཙན་ལས་འགུལ་བ་བསྟན་པ་དར་རྒྱས་ལགས་ཀྱིས་ཟླ་ ༧ ཚེས་ ༡༧ ནས་ Perth གྲོང་ཁྱེར་གྱི་རྒྱ་ནག་གཞུང་ཚབ་ལས་ཁུངས་མདུན་དུ་ཟླ་བ་དྲུག་གི་རིང་ཁེར་རྐྱང་ཐོག་བོད་དོན་ལས་འགུལ་དབུ་འཛུགས་གནང་བ་དང་འབྲེལ། ཉེ་ཆར་རེས་གཟའ་པ་སངས་ཉིན་ལས་འགུལ་ཐེངས་གཉིས་པ་དེ་སྤེལ་འདུགསྐབས་དེར་ཁོང་གིས་བོད་སྐྱོབས་རོགས་ཞེས་ཐོད་དཀྲིས་བཅིངས་ནས་ཨོ་སི་ཊོ་ལི་ཡ་དང་བོད་ཀྱི་རྒྱལ་དར་འཕྱར་བ་དང་སྦྲགས་ཏེ་རྒྱ་ནག་གཞུང་ཚབ་ལས་ཁུངས་མདུན་དུ་བོད་དོན་ལས་འགུལ་སྤེལ་འདུག་པ་མ་ཟད། རྒྱ་ནག་དམར་པོའི་གཞུང་གིས་ཨོ་སི་ཊོ་ལི་ཡ་ནང་དུ་བཙན་ཤེད་མཚམས་འཇོག་དང་། འཛམ་གླིང་ལ་རྫུན་བཤད་རྒྱུ་མཚམ་འཇོག བོད་དེ་རྒྱ་ནག་གིས་ཁྲིམས་འགལ་ཐོག་ནས་བཙན་འཛུལ་བྱས་པ་ལས་རང་བཙན་གཙང་མའི་རྒྱལ་ཁབ་ཅིག་ཡིན་པ་མ་ཟད་བོད་དེ་ནམ་ཡང་རྒྱ་ནག་གི་ཆ་ཤས་མིན་སྐོར་གཙོས་དགོས་འདུན་དོན་ཚན་བཞི་ཅན་ཞིག་ཆེད་འདོན་གྱིས་ལས་འགུལ་སྤེལ་བཞིན་འདུག བསྟན་པ་དར་རྒྱས་ལགས་ནི་དུས་རྒྱུན་ནས་བོད་དོན་ལས་འགུལ་སྤེལ་མཁན་ཞིག་ཡིན་པ་མ་ཟད་ཁོང་གིས་བོད་ལ་རང་དབང་གི་ཉི་མ་ཤར་ནས་གཞིས་བྱེས་བོད་མི་མཉམ་འཛོམས་མ་བྱུང་བར་དུ་བོད་སྐྱོབས་རོགས་ཞེས་པའི་ཐོད་དཀྲིས་ནག་པོ་དེ་བཅིངས་ནས་ལོ་མང་ཕྱིན་ཡོད་པ་དང་བོད་ཀྱི་ལོ་གསར་ཡང་སྲུང་བརྩི་གནང་གི་མེད་པ་རེད།དེ་བཞིན་ཨོ་སོ་ཊོ་ལི་ཡ་ནང་གི་གྲོང་ཁྱེར་ཆེ་ཤོས་ Sydney ནང་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུའང་ཕྱི་ཚེས་ ༢༢ སྟེ་རེས་གཟའ་ལྷག་པའི་ཉིན་བོད་མི་བློ་བཟང་འབྱོར་ལྡན་ལགས་ཀྱིས་བོད་ཀྱི་རྒྱལ་དར་འཕྱར་བཞིན་རྒྱ་ནག་གཞུང་ལ་ཁེར་རྐྱང་གིས་ངོ་རྒོལ་ལས་འགུལ་སྤེལ་འདུགཤེས་རྟོགས་བྱུང་བར་སྐབས་དེར་ཁོང་གི་བོད་དོན་ལས་འགུལ་དེ་མཚམས་འཇོག་སླད་རྒྱ་ནག་གཞུང་ཚབ་ལས་ཁུངས་ཀྱིས་ས་གནས་ཉེན་རྟོག་པ་ཆེད་འབོད་བྱས་ཡོད་ཀྱང་། ཁོང་གི་ལས་འགུལ་སྤེལ་བ་དེ་ཡུལ་དེའི་ཁྲིམས་སྒྲིག་གི་ཆ་རྐྱེན་གང་དང་ཡང་འགལ་གྱི་མེད་སྟབས་ཉེན་རྟོག་པའི་ངོས་ནས་དེར་དམིགས་བསལ་ཁྲིམས་ཆད་བཀལ་མེད་པ་རེད་འདུག བློ་བཟང་འབྱོར་ལྡན་ལགས་ཀྱིས་འདི་ལོའི་ཕྱི་ཟླ་ ༦ ཚེས་ ༡༠ དང་ཕྱི་ཟླ་ ༧ ཚེས་ ༡ བཅས་སོ་སོར་བོད་མི་ཆབ་སྲིད་བཙོན་ཟུར་གྲྭ་བག་གྲོ་ལགས་དང་ལྷན་དུ་རྒྱ་ནག་གཞུང་ཚབ་མདུན་དུ་ལས་འགུལ་སྤེལ་བ་ནས་བཟུང་སྟེ་རེས་གཟའ་ལྷག་པ་ཕལ་ཆེ་བར་རྒྱ་ནག་གཞུང་ཚབ་ལས་ཁུངས་སུ་བོད་དོན་ལས་འགུལ་སྤེལ་གྱི་ཡོད་པ་རེད།

ཉེ་ལམ་རྒྱ་གར་གྱི་གསར་ཁང་ཁག་གིས་གནས་ཚུལ་སྤེལ་བར་མོ་དྷི་སྲིད་གཞུང་གིས་རྒྱ་གར་བྱང་ཕྱོགས་ལ་དྭགས་ཁུལ་དུ་བོད་བརྒྱུད་ནང་བསྟན་ལ་སློབ་གཉེར་གནང་རྒྱུའི་སླད་དུ་ Ladakh Central University ཞེས་ལ་དྭགས་དབུས་གཙུག་ལག་སློབ་གཉེར་ཁང་ཆེས་ཐོག་མ་དེ་གསར་འཛུགས་གནང་རྒྱུའི་བཀའ་འཁྲོལ་གནང་འདུགརྒྱ་གར་གྱི་སྲིད་བློན་མོ་དྷི་མཆོག་དབུས་ཞུགས་ཐོག་རྒྱ་གར་གྱི་ནང་སྲིད་བློན་ཆེན་སྐུ་ཞབས་ Amit Shah ལགས་དང་རྒྱ་གར་གྱི་ཕྱི་སྲིད་བློན་ཆེན་ Jaishankar ལགས། དེ་བཞིན་རྒྱ་གར་གཞུང་གི་རྒྱལ་སྲུང་སློབ་སྟོན་པ་ Arjit Doval ལགས་བཅས་ལྷན་བཞུགས་གནང་སྟེ་ལ་དྭགས་དེ་སྔ་ལོར་ UT ཞེས་རྒྱ་གར་དབུས་གཞུང་ཀྱི་ཐད་ཀར་འཛིན་སྐྱོང་གནང་རྒྱུའི་ཐག་གཅོད་གནང་ནས་ལོ་གཅིག་གི་རྗེ་སུ་ཁུལ་དེར་ལས་དོན་གནང་ཕྱོགས་ཐད་བསྐྱར་ཞིབ་གནང་འབྲས་སུ་བྱུང་བ་ཞིག་དང་། གསར་འཛུགས་གནང་འཆར་གྱི་གཙུག་ལག་སློབ་གཉེར་ཁང་དེའི་ནང་གཙོ་བོ་རི་བོ་དགེ་ལུགས་པ་དང་བཀའ་བརྒྱུད་པའི་གཞུང་ལ་སློབ་གཉེར་གནང་རྒྱུ་ཙམ་མ་ཟད་བོད་བརྒྱུད་ནང་བསྟན་སྤྱི་དང་། བཟོ་སྐྲུན་རིག་གནས་དང་སྨན་པའི་སློབ་སྦྱོང་གནང་རྒྱུ་སོགས་ཕུད་པའི་གཞན་ liberal arts སྒྱུ་རྩལ་གྱི་སློབ་ཚན་དང་ཚན་རིག་སོགས་ལ་སློབ་གཉེར་གནང་རྒྱུའི་གོ་སྐབས་བསྐྲུན་འཆར་ཡོད་པ་རེད། གསར་ཁང་ཁག་གིས་བརྗོད་དོན་ལྟར་ན་གཙུག་ལག་སློབ་གཉེར་ཁང་དེས་མ་འོངས་པར་ལ་དྭགས་ཁུལ་གྱི་གཞོན་སྐྱེས་སྟོང་ཕྲག་ལ་ཐུགས་ཕན་ཆེན་པོ་གསོ་ངེས་ཡིན་པ་དང་། ཧི་མཱ་ཅལ་མངའ་སྡེའི་ནང་རྟེན་གཞི་བྱས་པའི་མ་ན་ལི་དང་ལ་དྭགས་དབར་འཛུགས་སྐྲུན་བྱེད་བཞིན་པའི་རོ་ཐང་གཞུང་ལམ་ཆེན་མོ་དེ་ཡོངས་སུ་ལེགས་པར་གྲུབ་ནས་འགྲུལ་སྐྱོད་དབུ་འཛུགས་གནང་མཚམས་སུ་བོད་བརྒྱུད་ནང་བསྟན་འཛིན་མཁན་གྱི་ལ་ཧོར་དང་སྤིཏི་ཁུལ་གྱི་གཞོན་སྐྱེས་ཚོ་ལའང་གོ་སྐབས་ཆེན་པོ་རག་སྐོར་བརྗོད་འདུག གཞི་རྩའི་མོ་དྷི་གཞུང་གིས་ལ་དྭགས་ཁུལ་དུ་གཙུག་ལག་སློབ་གཉེར་ཁང་གསར་འཛུགས་གནང་རྒྱུ་བཀའ་འཁྲོལ་གནང་ཡོད་ཀྱང་། ཤེས་རིག་ལྷན་ཁང་གིས་གྲོས་འཆར་བསྣམས་ནས་དེ་གྲོས་ཚོགས་ཀྱིས་གཏན་འབེས་གནང་གི་ཡོད་པ་རེད།

ཉེ་བའི་ཆར་རྒྱ་དཀར་ནག་གི་བར་དུ་རྩོད་རྙོག་ཆེ་རུ་ཕྱིན་ཏེ། མཐའ་སྲུང་བའི་བར་དུ་ལག་འཛིང་ཤོར་ནས་ཕན་ཚུན་གྱི་དམག་མི་གསོད་རེས་ཀྱི་གྱོད་དོན་རྣོ་ངར་ཅན་དུ་གྱུར་བ་ལ་བརྟེན་རྒྱ་གར་སྲིད་གཞུང་གི་བརྡ་འཕྲིན་འཕྲུལ་ལས་སྡེ་ཁག་གིས་ཟླ་བ་འདིའི་ཟླ་སྟོད་དུ་རྒྱ་ནག་གིས་བཟོས་བའི་མཉེན་ཆས་ཁག་ ༥༩ རྒྱ་གར་གྱི་བདེ་འཇགས་སྲུང་སྐྱོབ་ཀྱི་མིང་ཐོག་ནས་བཀག་སྡོམ་བྱས་ཡོད་པ་ལྟར། ཁ་ཉིན་ནས་བཟུང་དངོས་སུ་རྒྱ་གར་གྱི་ནང་དུ་སྐད་འཕྲིན་བེད་མེད་ཆགས་ཡོད་པར་བརྟེན་བོད་ནས་ཕེབས་པའི་བོད་མི་མང་པོ་ཞིག་ལ་དངོས་སུ་དེར་འབྲེལ་གྱི་དཀའ་ངལ་མང་པོ་འཕྲད་བཞིན་ཡོད་པ་རེད།བཞུགས་སྒར་ཁུལ་དུ་གནས་སྡོད་གནང་མཁན་བོད་ནས་ཕེབས་པ་ཁག་ཅིག་ལ་བཅར་འདྲི་ཞུས་པར་ཁོང་རྣམས་ཀྱིས་སྤྱི་ཡོངས་ཀྱི་ཆ་ནས་བོད་ཕྱི་ནང་གཉིས་ཀྱི་འབྲེལ་ལམ་གྱི་གཙོས་མི་སྒེར་གྱི་འཚོ་བ་ཚུན་ཆད་ལ་དཀའ་ངལ་འཕྲད་བཞིན་ཡོད་སྐོར་ངོ་སྤྲོད་གནང་སོང་། བོད་རང་སྐྱོང་ལྗོངས་ཟེར་བའི་ཁོངས་གཏོགས་ཀྱི་བོད་མི་གསར་དུ་འབྱོར་བ་ཞིག་གིས་ངོ་སྤྲོད་བྱས་པ་ལྟར་ན་ཁོང་གི་ཕ་ཡུལ་དུ་དུས་རྒྱུན་ནས་རྒྱ་ནག་གི་དམ་དྲག་ཡོད་སྟབས། ནང་མི་རྣམས་ལ་ཕར་འབྲེལ་བ་བྱེད་སྐབས་གནམ་གཤིས་ཡག་པོ་མེད་པ་དང་ཆར་བ་འབབ་བཞིན་ཡོད་པ་སོགས་ཀྱི་གསང་བའི་བརྡ་སྟོན་གྱི་ཐོག་ནས་སྟབས་བདེ་མིན་པའི་གོ་བརྡ་སྤྲོད་ཀྱི་ཡོད་སྟབས་དུས་རྒྱུན་ནས་འབྲེལ་བ་བྱེད་ཀྱི་མེད་ཚུལ་ངོ་སྤྲོད་གནང་སོང་། དེ་བཞིན་ལྡི་ལི་མཐོ་སློབ་ཏུ་ཞིབ་འཇུག་གི་སློབ་སྦྱོང་གནང་བཞིན་པའི་བཀྲ་ཤིས་རྡོ་རྗེ་ལགས་ཀྱིས་ལོ་མང་པོའི་རྗེས་སུ་སྐད་འཕྲིན་བརྒྱུད་ནས་ཕ་མ་དང་འབྲེལ་བ་བྱེད་ཐབས་བྱུང་བས་དགའ་སྤྲོ་ཆེན་པོ་སྐྱེས་ཡོད་ནའང་། ཁ་སང་ནས་སྐད་འཕྲིན་བཀག་སྡོམ་བྱས་ཡོད་སྟབས་བོད་ནང་དུ་འབྲེལ་ལམ་ཆད་ཡོད་སྐོར་ངོ་སྤྲོད་ཀྱིས་གསར་འབྱོར་བ་མང་པོ་ཞིག་ད་དུང་ཡང་ཐད་ཀར་ཕ་ཡུལ་གྱི་དཔལ་འབྱོར་གྱི་རྒྱབ་རྟེན་འོག་འཚོ་བ་སྐྱེལ་བཞིན་ཡོད་པར་བརྟེན་སྐད་འཕྲིན་བཀག་སྡོམ་གྱི་གནས་བབ་འོག་དཀའ་ངལ་འཕྲད་རྒྱུ་ཡིན་སྐོར་གསུངས་ཡོད། དེ་བཞིན་གཉན་ཚེ་རིང་བཀྲ་ཤིས་ལགས་ཀྱིས་བོད་ནང་གི་བོད་མི་རྣམས་ཀྱིས་དུས་རྒྱུན་ནས་སྐད་འཕྲིན་བརྒྱུད་དེ་སྐུ་སྒེར་ཡིག་ཚང་དུ་སྐྱབས་རྟེན་དང་བསྔོ་རྟེན་འཇོག་གི་ཡོད་པ་དང་། དེ་ནི་བོད་མི་རྣམས་ཀྱི་དད་འདུན་གྱི་ངོས་ནས་བལྟས་ན་གནད་དོན་གལ་ཆེན་ཞིག་ཆགས་ཡོད་པར་ངོ་སྤྲོད་ཀྱིས་ད་ནས་བཟུང་སྐད་འཕྲིན་བརྒྱུད་ནས་ཕྱི་ཕྱོགས་སུ་འབྲེལ་བ་བྱེད་རྒྱུ་ཡོངས་སུ་མཚམས་ཆད་ཡོད་སྐོར་གསུངས་སོང་། དེ་བཞིན་རྡ་སའི་བོད་རང་བཙན་སློབ་ཕྲུག་ཚོགས་པའི་ལས་འཆར་འགན་འཛིན་རྒྱལ་མཚན་ལགས་ཀྱིས་སྐད་འཕྲིན་བཀག་སྡོམ་བྱས་པ་དེས་མི་སྒེར་གྱི་འཚོ་བ་ཙམ་མིན་པར་སྤྱི་ཡོངས་ཀྱི་ཆ་ནས་བོད་ནང་གི་གནས་ཚུར་ཕྱི་ལ་མཁོ་སྤྲོད་བྱེད་རྒྱུར་འགོག་རྐྱེན་ཆེན་པོ་ཞིག་བཟོས་ཡོད་པར་ངོ་སྤྲོད་གནང་སོང་། ཁ་ཉིན་ཚེས་ ༡༥ ནས་བཟུང་རྒྱ་གར་གྱི་ནང་དུ་ཕབ་ལེན་བྱས་པའི་སྐད་འཕྲིན་གྱི་རིགས་ཡོངས་སུ་བེད་མེད་ཆགས་ཡོད་སྟབས་བོད་མི་མང་པོས་གནད་དོན་དེ་སྤྱི་ཚོགས་དྲྭ་ལམ་དུ་བརྒྱུད་སྤེལ་གྱིས་བོད་ཕྱི་ནང་གཉིས་ཀྱིའབྲེལ་ལམ་ལ་དོ་ཕོག་ཐེབས་ངེས་ཀྱི་གདུང་སེམས་མཉམ་བསྐྱེད་ཀྱི་པར་རིས་དང་མཆན་མང་པོ་བཀོད་མཁན་བྱུང་སོང་།  འགའ་ཤས་ཀྱིས་དེ་རིང་གློ་བུར་དུ་སྐད་འཕྲིན་ཚེ་ལས་འདས་སོང་ཞེས་པའི་མཆན་བཀོད་ཀྱི་འོག་སྐད་འཕྲིན་གྱི་པར་རིས་ཐོག་རྒྱ་ནག་གི་རྒྱལ་དར་བཀབ་སྟེ་དུར་འཇུག་བྱེད་ཀྱི་ཡོད་པའི་རྣམ་པ་བསྟན་སོང་།གཞི་རྩའི་སྐད་འཕྲིན་འདི་ནི་བོད་ཕྱི་ནང་གཉིས་སུ་སྤྱོད་བདེ་བའི་ཕན་ཚུན་འབྲེལ་མཐུད་ཀྱི་མ་ལག་སྟབས་བདེ་ཞིག་ཡིན་སྟབས། ཡི་གེ་ཤེས་མིན་ལ་མ་བལྟས་པར་བོད་མི་རྒན་གཞོན་དར་གསུམ་གྱིས་ཡོངས་ཁྱབ་ཀྱིས་བེད་སྤྱོད་བྱེད་ཀྱི་ཡོད་པ་མ་ཟད། རང་ཉིད་ཀྱི་འཚོ་བའི་ཁྲོད་ཀྱི་དགའ་སྐྱོ་ཆགས་སྡང་གི་རྣམ་པ་ཕྱིར་མངོན་སའི་སྟེགས་བུ་ཞིག་ཀྱང་ཆགས་ཡོད་ཡོད་པ་རེད། བོད་མི་གསར་དུ་འབྱོར་བ་ཚོར་མཚོན་ན་སྐད་འཕྲིན་འདི་བོད་ཕྱི་ནང་གཉིས་ཀྱི་འབྲེལ་ཐག་ལྟ་བུའི་མི་སྒེར་གྱི་འཚོ་བའི་གྲུབ་ཆ་གལ་ཆེན་ཞིག་ཆགས་ཡོད་པར་བརྟེན། ཐེངས་འདིར་རྒྱ་གར་གྱིས་མཉེན་ཆས་འདི་བཀག་སྡོམ་བྱས་པ་ལ་བརྟེན་ནས་བོད་མི་གསར་འབྱོར་བ་རྣམས་ཀྱིས་རང་ཡུལ་དུ་འབྲེལ་འདྲིས་བྱེད་སའི་ལམ་ཁ་གལ་ཆེན་ཞིག་འགག་ཡོད་པ་རེད། འོན་ཀྱང་བོད་མི་རྣམས་ཀྱིས་སྐད་འཕྲིན་ལྟ་བུའི་མཉེན་ཆས་གཞན་དང་གཞན་བརྒྱུད་ནས་ཕན་ཚུན་གྱི་བར་ལ་འབྲེལ་བ་གནང་རྒྱུར་ཐབས་ཤེས་གནང་བཞིན་འདུག དེ་རིང་རྒྱ་གར་གྱི་གསར་ལམ་དུ་གནས་ཚུལ་ཐོན་པ་ལྟར་ན་རྒྱ་གར་གཞུང་གིས་ད་དུང་ཡང་རྒྱ་ནག་གིས་བཟོས་པའི་མཉེན་ཆས་ ༢༥༠ ལ་ཞིབ་འཇུག་བྱེད་བཞིན་ཡོད་སྟབས། རྒྱ་ནག་གི་མཉེན་ཆས་མང་པོ་ཞིག་ད་དུང་ཡང་བཀག་སྡོམ་བྱེད་རྒྱུ་ཡིན་སྐོར་ངོ་སྤྲོད་གནང་ཡོད་པའི་ཁྲོད་དུ་རྒྱལ་སྤྱིའི་སྟེང་དར་ཁྱབ་ཆེས་ཆེར་བྱུང་བའི་རོལ་རྩེད PUBS སོགས་ཀྱང་བཀག་འགོག་གནང་རྒྱུ་ཡིན་སྐོར་གསལ་འདུག

ཉན་པ།: Listen ཕབ་ལེན། Download ༸གོང་ས་མཆོག་གི་༸སྐུའི་ཧིཾ་སྐད་གསུང་སྒྱུར་བ་སྐུ་ཞབས་ཀེ་ལ་ཤ་ལགས་དང་གླེང་མོལ་ཞུས་པ། Sunday 26/07/2020 In conversation with Kailash Chandra Bauddha, Official Hindi translator for His Holiness Dalai Lama

ཉན་པ།: Listen ཕབ་ལེན། Download བྱང་ཨ་རིའི་ནང་དུ་རྐང་འཁོར་སྐོར་སྐྱོད་དང་བོད་དོན་གོམ་བགྲོད་གནང་མཁན་གྱི་བོད་མི་ལས་འགུལ་བ་གཉིས་དང་ལྷན་དུ་གླེང་མོལ། Saturday 25/07/2020 In conversation with two Tibetan activists who recently concluded Peace March and Cycle Rally for Tibet