Tibetan Royal Year of 2151 | Year of the Wood Dragon

ARCHIVE

Monthly Archives: May, 2021

ཚན་རིག་དང་སེམས་ཚོར་སྐོར་གྱི་ལྷན་ཚོགས་དབུ་འབྱེད་ཐོག་བཀའ་སློབ་སྩལ་འདུག

ཁ་སང་ཕྱི་ཚེས་ ༢ ཉིན་དྲ་ཐོག་བརྒྱུད་དབུ་འཛུགས་གནང་པའི་ Science and Wisdom of Emotion ཞེས་ཚན་རིག་དང་སེམས་འཚོར་སྐོར་གྱི་ལྷན་ཚོགས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་བཀའ་སློབ་དང་སྦྲགས། ང་ཚོའི་སེམས་ཀྱི་གནས་བབ་དེ་ཞི་བ་དང་ལྷོད་པོའི་ངང་གནས་ཐུབ་པ་བྱུང་ན། ཕྱིའི་དཀའ་ངལ་སོགས་རྐྱེན་གང་འདྲ་ཞིག་འཕྲད་ཀྱང་སེམས་ཚོར་གྱི་གནས་བབ་ལ་དོ་ཕོགས་དེ་ཙམ་གཏོང་ཐུབ་ཀྱི་མ་རེད་ཅེས་ལམ་སྟོན་མཛད་འདུག དེ་ཡང་ཨ་རིའི་ནང་རྟེན་གཞི་བྱས་པའི་སེམས་དང་སྲོག་ལྟེ་གནས་ཁང་དང་། The Awake Network ཞེས་པའི་ཚོགས་པ་གཉིས་ཟུང་འབྲེལ་ཐོག་གོ་སྒྲིག་ཞུས་པའི་ཚན་རིག་དང་སེམས་ཚོར་སྐོར་གྱི་ལྷན་ཚོགས་དབུ་འབྱེད་ཐོག་༸གོང་ས་སྐྱབས་མགོན་ཆེན་པོ་མཆོག་ནས་ང་ཚོས་རྩལ་འདོན་གནང་བཞིན་བདེ་སྐྱིད་དམ་Happiness ཞེས་པ་དེ་ནི་ང་ཚོའི་སེམས་ཚོར་གྱི་གནས་བབ་དང་འབྲེལ་བ་ཆེན་པོ་ཆགས་ཀྱི་ཡོད་པ་དང་། སེམས་འཚོར་གནས་བབ་དེ་བཞིན་ཕྱི་ནང་གི་རྒྱུ་རྐྱེན་མང་པོ་ཞིག་ལ་བརྟེན་ནས་འགྱུར་བ་འགྲོ་བཞིན་ཡོད་མ་ཟད། ལྷག་པར་དུ་སོ་སོའི་ཉེ་འཁོར་གྱི་ཁོར་ཡུག་གཙོས་པའི་ཕྱིའི་གནས་སྟངས་མང་པོ་ཞིག་གིས་སེམས་ཚོར་གྱི་གནས་བབ་ལ་འགྱུར་ལྡོག་ཆེན་པོ་ཐེབས་བཞིན་པ་སོགས་བཀའ་འགྲེལ་དང་སྦྲགས། གཙོ་བོ་ང་ཚོས་དོ་བདག་སོ་སོའི་སེམས་ཀྱི་གནས་བབ་དེ་ཞི་བ་དང་ལྷོད་པོའི་ངང་གནས་ཐུབ་པ་བྱུང་ན། ཕྱིའི་དཀའ་ངལ་སོགས་རྐྱེན་གང་འདྲ་ཞིག་འཕྲད་ཀྱང་སེམས་ཚོར་གྱི་གནས་བབ་ལ་དོ་ཕོགས་དེ་ཙམ་གཏོང་ཐུབ་ཀྱི་མེད་སྟབས། སེམས་གཅུན་རྒྱུ་དེ་གལ་ཆེན་པོ་ཡིན་པའི་ལམ་སྟོན་མཛད་འདུགམ་ཟད་མགོན་པོ་གང་ཉིད་མཆོག་ནས། བཟང་པྱོགས་ནས་བལྟས་པ་ཡིན་ན་ང་ཚོའི་སེམས་ཚོར་གྱི་གནས་སྟངས་དེ་དག་འགྱུར་བ་གཏང་རྒྱུ་ཡོད་པ་ཞིག་ཡིན་པ་དང་། དེ་ཡང་ང་ཚོས་བློ་སྦྱོང་རིམ་པའི་ཐོག་ནས་ཁོང་ཁྲོ་དང་ངག་འཆལ་སོགས་སེམས་ཚོར་དྲག་པོའི་ཆ་དེ་དག་ཇེ་ཉུང་དང་རིམ་པས་མེད་པ་བཟོས་ཏེ། སྙིང་རྗེ་དང་བྱམས་པ་སོགས་སེམས་ཚོར་བཟང་པོའི་ཆ་དེ་དག་གོང་འཕེལ་དུ་གཏོང་ཐུབ་རྒྱུ་ཡོད་པ་དང་། ལྷག་པར་དུ་སེམས་ཚོར་བཟང་པོའི་ཆ་དེ་དག་རྒྱུ་མཚན་ཡང་དག་ལ་བརྟེན་ནས་བྱུང་གི་ཡོད་སྟབས། ང་ཚོ་སྤྱི་ཚོགས་སེམས་ཅན་ཞིག་ཡིན་པའི་ཆ་ནས་གཞན་ཕན་གྱི་བསམ་བློ་ཞིག་ཐོག་མ་ཉིད་ནས་ཡོད་སྟབས། སེམས་ཚོར་བཟང་པོའི་ཆ་དེ་དག་རང་ཉིད་ཀྱི་བདེ་དོན་ཙམ་མ་ཡིན་པར། རྒྱ་ཆེ་ས་ནས་སྤྱི་ཚོགས་ནང་གོང་འཕེལ་གཏང་རྒྱུའི་ནུས་པ་ཡང་ཡོད་པར་བཀའ་སྩལ་འདུགདེ་བཞིན་༸གོང་ས་མཆོག་ནས་ང་ཚོ་ཚང་མ་ཐོག་མར་སྐྱེས་པའི་སྐབས་ནས་གཅིག་ལ་གཅིག་བརྟེན་ཐོག་འཚོ་དགོས་པ་ཞིག་ཡིན་སྟབས། གཞན་ཕན་དང་སྙིང་རྗེའི་བསམ་བློ་དེ་དག་ངེས་པར་དུ་དགོས་གལ་ཞིག་ཡིན་པ་དང་། དེ་ཡང་བྱམས་རྙིང་རྗེ་ཞེས་པ་དེ་ནི་ཆོས་ཕྱོགས་ཀྱི་གནད་དོན་ཞིག་མིན་པར། འདི་ནི་ང་ཚོའི་སྤྱི་ཚོགས་དང་འགྲོ་བ་མི་སྤྱིའི་བདེ་ཐབས་དང་འབྲེལ་བ་ཡོད་པ་ཞིག་ཡིན་སྟབས། ང་ཚོ་རྒྱུན་དུ་འགྲོ་བ་མིའི་གཅིག་འགྱུར་འདུ་ཤེས་འཛིན་པའི་ཐོག་སེམས་ཚོར་བཟང་པོའི་ཆ་དེ་དག་གོང་འཕེལ་བརྒྱུད་འགྲོ་བ་མིའི་སྤྱི་ཚོགས་འདི་བདེ་སྐྱིད་ལྡན་པ་ཞིག་བཟོ་རྒྱུའི་ཐོག་དགོངས་པ་བཞེས་དགོས་པའི་ལམ་སྟོན་མཛད་འདུག གཞི་རྩའི་ཁ་སང་དབུ་འཛུགས་གནང་པའི་ Science and Wisdom of Emotion ཞེས་ཚན་རིག་དང་སེམས་ཚོར་སྐོར་གྱི་ལྷན་ཚོགས་ཐོག་དེ་བཞིན་སང་ཉིན་བར་ཉིན་གྲངས་གསུམ་རིང་དྲ་ཐོག་བརྒྱུད་འཚོགས་གནང་གི་ཡོད་པ་དང་། ལྷན་ཚོགས་དེའི་ཐོག་རྒྱལ་སྤྱིའི་ཚན་རིག་མཁས་པ་དང་སློབ་དཔོན་སོགས་མི་སྣ་གསུམ་བཅུ་ཙམ་ནས་འདས་པའི་ལོ་༢༠ ལྷག་གི་རིང་ལ་༸གོང་ས་མཆོག་དང་རྒྱལ་སྤྱིའི་ཚན་རིག་མཁས་པའི་དབར་འགྲོ་བ་མིའི་བཟང་སྤྱོ་དང་། སེམས་ཚོར་གྱི་རྣམ་བཞག་སོགས་ཀྱི་ཐོག་གྲོས་བསྡུར་དཔྱད་ཞིབ་གནང་པའི་གྲུབ་དོན་ཁག་གི་ཐོག་བགྲོ་གླེང་གནང་རྒྱུ་ཡིན་པ་དང་། དེའི་ཁོངས་སུ་ཀླད་པའི་ཚན་རིག་པ་གྲགས་ཅན་སྐུ་ཞབས་ Richard Davidson ལགས་དང་སེམས་ཁམས་རིག་པའི་ཚན་རིག་པ་གྲགས་ཅན་སྐུ་ཞབས་ Daniel Goleman ལགས། དེ་བཞིན་༸སྐུའི་དབྱིན་སྐད་གསུང་བསྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་དང་ཡོངས་དགེ་མི་འགྱུར་རིན་པོ་ཆེ་སོགས་ཕྱི་ནང་གི་མཁས་པ་མང་པོ་ཞིག་གིས་མཉམ་གནང་གི་ཡོད་པ་རེད།

བུད་མེད་སྤྱི་འཐུས་གསར་པ་གཉིས་ཀྱི་ལས་ཁུར་དམ་འབུལ།

དེ་རིང་ཟླ་བ་ ༥ བའི་ཚེས་༣ ཉིན་གྱི་སྔ་དྲོ་ཆུ་ཚོད་ ༡༠ ཐོག་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༧ དང་ ༤༧ ནང་གསེས་གཉིས་པའི་དགོངས་དོན་འོག་བོད་མི་མང་སྤྱི་འཐུས་གྲོས་ཚོགས་སུ་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་གི་དྲུང་ནས་མདོ་སྨད་ཀྱི་སྤྱི་འཐུས་ཚབ་གསར་བསོད་ནམས་དབང་མོ་ལགས་དང་། མདོ་སྟོད་ཀྱི་སྤྱི་འཐུས་ཚབ་གསར་ཚེ་རིང་སྒྲོལ་མ་ལགས་རྣམ་གཉིས་ཀྱིས་སྐབས་ ༡༦ པའི་བོད་མི་མང་སྤྱི་འཐུས་ཀྱི་ལས་ཁུར་དམ་འབུལ་ཞུས་སོང་། གཞི་རྩའི་ཉེ་ལམ་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ཐོག་སྟེང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དབུས་ཁྲིམས་ཞིབ་པ་གཞན་གཉིས་སྡེབ་གཅིག་ཏུ་འཕོ་འགྱུར་བཏང་བའི་གནད་དོན་དང་འབྲེལ་ནས་ཟླ་བ་འདིའི་ཚེས་ ༢༡ ཉིན་ཉིན་གཅིག་གི་རིང་སྤྱི་འཐུས་ལྷན་ཚོགས་ཀྱི་ཚོགས་དུས་འཕར་མ་ཞིག་འཚོགས་གཏན་འཁེལ་བའི་སྐབས་འདིར། ཨོ་གླིང་དུ་བཅའ་བཞུགས་སྐབས་ ༡༦ པའི་མདོ་སྨད་་སྤྱི་འཐུས་རྒྱ་རིགས་ཐར་ལགས་ཀྱིས་ཨོ་གླིང་ནང་དུ་གཉན་རིམས་ཁྱབ་གདལ་རྐྱེན་པས་ཐེམ་སྤང་བཀའ་རྒྱ་སྔར་ལྷག་དམ་པོ་གནང་བར་བརྟེན་གྲོས་ཚོགས་སུ་མཉམ་ཞུགས་ཐུབ་མིན་ལ་སོང་། སྐབས་ ༡༦ སྤྱི་འཐུས་ལས་ཡུན་ལོ་དུས་མཐའ་མའི་གྲོས་ཚོགས་འཕར་མར་སྤྱི་འཐུས་ཀྱི་གྲུབ་ཆ་ཚང་ཆེད་རྩ་དགོངས་ཞུ་རྒྱུ་ཡིན་པར་བརྗོད་དེ་རྩ་དགོངས་ཞུས་ཡོད་པ་དང་། དེ་བཞིན་ཉེ་ལམ་བཀའ་ཤག་གིས་སྐབས་བཅུ་དྲུག་པའི་སྤྱི་འཐུས་བློ་བཟང་གྲགས་པ་ལགས་ལས་བྱེད་འདེམས་བསྐོ་ལྷན་ཁང་གི་སྒྲིག་གཞིའི་དགོངས་དོན་གཞིར་བཟུང་ཟུང་དྲུང་གནས་རིམ་ཚད་མཉམ་ཐོག ཨོ་གླིང་སྐུ་ཚབ་དོན་གཅོད་ལས་ཁུངས་ཀྱི་རྒྱ་རིགས་འབྲེལ་མཐུད་པར་བསྐོ་གཞག་གནང་ཡོད་པར་བརྟེན། ཁོང་གཉིས་ཀྱི་ཚབ་ཏུ་སྒུག་ཐོ་གཞིར་བཟུང་གིས་དེ་རིང་སྤྱི་འཐུས་བསོད་ནམས་དབང་མོ་ལགས་དང་ཚེ་རིང་སྒྲོལ་མ་ལགས་གཉིས་ཀྱིས་སྤྱི་འཐུས་ཀྱི་ལས་ཁུར་དམ་འབུལ་ཞུས་ཡོད་པ་རེད། སྤྱི་འཐུས་གཉིས་ཀྱིས་ལས་ཁུར་དམ་འབུལ་གྲུབ་མཚམས་སུ། འདི་གའི་གསར་འགོད་པས་བདམས་ཐོན་སྤྱི་འཐུས་བསོད་ནམས་དབང་མོ་ལགས་སུ་དེ་རིང་གི་དམ་འབུལ་དེ་བརྒྱུད་ནས། སྐབས་ ༡༦ བའི་ཚོགས་དུས་འཕར་མ་དེ་ཉིན་གཅིག་གི་རིང་ལ་མ་གཏོགས་མེད་སྟབས། ཁོང་གིས་ཚོགས་དུས་དེ་བརྒྱུད་ནས་དམིགས་བསལ་གྱི་ལས་དོན་བྱེ་བྲག་པ་དེ་འདྲར་ཤུགས་སྣོན་གནང་དགོས་བ་དེ་འདྲ་ཅི་ཡོད་ཀྱི་ཐད་ནས་བཀའ་འདྲི་ཞུས་པར་ཁོང་གིས། ད་ལྟའི་ཆར་ལས་དོན་འདི་དང་དེ་ཞེས་གསལ་བོ་ཞིག་བཤད་རྒྱུ་ཁག་པོ་ཡིན་ནའང་། ད་སྐབས་ང་ཚོར་དཀའ་ཆེན་པོ་ཞིག་འཕྲད་བཞིན་པའི་སྐབས་འདིར་ཁོང་གིས༸གོང་ས་སྐྱབས་མགོན་རིན་པོ་ཆེ་མཆོག་གི་དགོངས་གཞི་དང་མི་འགལ་བ་ཞིག་གི་ཐོག་ལ་ཤུགས་སྣོན་རྒྱག་རྒྱུ་ཡིན་པར་གསུངས་སོང་། གཞན་ཡང་ཁོང་གིས་སྐབས་དེར། ཐེངས་འདིར་སྤྱི་འཐུས་ཀྱི་དམ་འབུལ་ཞུས་ཡོད་ཀྱང་ལས་ཡུན་ཐུང་ཐུང་ཞིག་ལས་མེད་པར་གསལ་བཤད་ཀྱིས། ཁོང་རང་ཉིད་ནས་ཕྱི་ལོ་ ༡༩༩༤ ལོ་ནས་བཟུང་སྤྱི་ཚོགས་ཞབས་ཞུའི་ལས་རིགས་གཉེར་ནས་ཡོང་མཁན་ཞིག་ཡིན་པར་བརྟེན། མི་མང་གིས་ངོ་ཚབ་ཀྱིས་དམ་འབུལ་ཞུ་ཐུབ་པ་དེ་སྐལ་བ་བཟང་པོ་ཞིག་ལ་ངོས་འཛིན་གྱིས་མ་འོངས་བར་ཡང་མུ་མཐུད་དུ་སྤྱི་ཚོགས་ཞབས་ཞུའི་ལས་རིགས་གཉེར་རྒྱུ་ཡིན་པར་གསུངས་སོང་།དེ་བཞིན་སྤྱི་འཐུས་ཚེ་རིང་སྒྲོལ་མ་ལགས་སུ་བཅར་འདྲི་ཞུས་པར་ཁོང་གིས། སྐབས་བཅུ་དྲུག་གི་ཚོགས་འདུ་འཕར་མའི་ཐོག་ཚོགས་ཞུགས་བྱེད་རྒྱུའི་གོ་སྐབས་བྱུང་བར་དགའ་སྤྲོ་སྐྱེས་ཡོད་ལུགས་དང་འབྲེལ་ནས། ཚོགས་འདིའི་སྐབས་དང་དུས་ལ་བསྟུན་ནས་རང་ཉིད་ཀྱི་ངོས་ནས་ལམ་ཁ་བཟང་ཕྱོགས་ཤིག་ལ་འགྲོ་བར་གྲ་སྒྲིག་གནང་ཡོད་སྐོར་གསུངས་སོང་། གཞི་རྩའི་དེང་སྐབས་རྒྱ་གར་རྒྱལ་ཡོངས་སུ་རིམས་ནད་ཁྱབ་བརྡལ་གྱི་རླབས་རྒྱུན་གཉིས་བ་དེ་ཆེས་ཆེར་འཕེལ་བཞིན་པའི་དུས་སྐབས་འདིར། མང་ཚོགས་ཀྱི་ཁྲོད་དུ་ཐེངས་འདིའི་སྐབས་བཅུ་དྲུག་པའི་སྤྱི་འཐུས་ལྷན་ཚོགས་ཀྱི་ཚོགས་དུས་འཕར་མ་དེར་ཕྱོགས་བཞུགས་ཀྱི་སྤྱི་འཐུས་རྣམས་དུས་ཐོག་ཏུ་བཞུགས་སྒར་དུ་ཕེབས་ནས་ཚོགས་འདུ་བདེ་ལེགས་ངང་འཚོགས་ཐུབ་མིན་ལ་སེམས་འཚབ་ཆེན་པོ་བྱེད་བཞིན་པ་རེད་འདུག

ནད་རྟགས་ཐོན་ཚེ་ངེས་པར་དུ་བརྟག་དཔྱད་གནང་དགོས་པའི་འབོད་སྐུལ།  

རྒྱ་གར་ནང་ནད་རླབས་གཉིས་པའི་ཛ་དྲག་གནས་སྟངས་འགྲོ་མུས་ཁྲོད་ཁ་སང་ཚེས་ ༢ ཉིན་ནད་གཞི་ཕོག་མཁན་གསར་པ་མི་གྲངས་ ༣༧༠༠༥༩ བྱུང་བ་དང་དེ་བཞིན་འདས་གྲོངས་སུ་ཕྱིན་མཁན་༣༤༢༢ བྱུང་འདུག   ལྷག་པར་བོད་མིའི་འདུས་སྡོད་ཁག་ཏུའང་ཏོག་དབྱིབས་གཉན་རིམས་ཕོག་མཁན་དང་གཉན་རིམས་རྐྱེན་གྱིས་ཚེ་སྲོག་ཤོར་མཁན་གྱི་གྲངས་ཐོ་རིམ་བཞིན་ཇེ་མང་དུ་འགྲོ་བཞིན་པ་རེད་འདུག སྤྱིར་ཏོག་དབྱིབས་གཉན་རིམས་ཕོག་མཁན་གྱི་གང་ཟག་དང་འབྲེལ་བ་བྱུང་བ་དང་།  ཡང་ན་སོ་སོར་དེ་འབྲེལ་ནད་རྟགས་ཐོན་ཚེ།  རང་འགན་རང་འཁུར་གྱིས་ཟུར་བཀག་བཞུགས་རྒྱུ་དང་བརྟག་དཔྱད་གནང་དགོས་རྒྱུ།  ལྷག་པར་ནད་རླབས་གཉིས་པའི་ཛ་དྲག་གི་དུས་ཡུན་ལ་མང་ཚོགས་ནས་སྔར་ལྷག་གཟབ་ནན་དགོས་གལ་ཆེ་བ་སྒྲིག་འཛུགས་དང་སྨན་པ་ཚོས་ལམ་སྟོན་ཡང་ཡང་གནང་གི་ཡོད་པ་རེད།    གནས་སྟངས་དེའི་འོག་བོད་མིའི་འདུས་སྡོད་ཁག་ཏུ་ནད་ཡམས་ཁྱབ་གདལ་སྔོན་འགོག་སླད་ས་གནས་སུ་སྒོ་རྒྱ་སོགས་ཀྱི་བཀའ་རྒྱ་ཡང་བསྡམས་ཡོད་པ་རེད་འདུག  དེའི་ཁྲོད་ཉེ་ལམ་རྡ་རམ་ས་ལར་གཉན་རིམས་རྐྱེན་པས་བོད་མི་གཉིས་འདས་གྲོངས་སུ་སོང་ཡོད་པ་དང་མ་ཟད།  སྲིད་ཞུ་བའི་ཁྲོད་དུའང་གཉན་རིམས་ཕོག་མཁན་རིམ་པས་ཐོན་བཞིན་སྟབས།  ད་ཆ་ལས་ཁུངས་ཡོངས་སྒོ་བརྒྱབ་པའི་གནས་སྟངས་ཆགས་ཡོད་པ་རེད།  འདི་ག་རླུང་འཕྲིན་ཁང་ནས་རྡ་རམ་ས་ལའི་གནས་སྟངས་དང་འབྲེལ་ས་གནས་འགོ་འཛིན་ཀུན་དགའ་ཚེ་རིང་ལགས་སུ་བཀའ་འདྲི་ཞུས་སྐབས།  ཁོང་གིས་ད་ལྟའི་ཆར་ས་གནས་ནང་བོད་མི་ ༡༠༠ ལྷག་ལ་ཏོག་དབྱིབས་གཉན་རིམས་ཕོག་ཡོད་པ་དེ་ལྟར་ཡང་། ཕལ་མོ་ཆེའི་གནས་སྟངས་ཛ་དྲག་མིན་སྐོར་གསུངས་སོང་། དེ་བཞིན་ནད་རླབས་གཉིས་པའི་ཁྲོད་གྲ་སྒྲིག་དང་གདོང་ལེན་སོགས་དང་འབྲེལ།   ཁོང་གིས།  ད་ཆ་ས་གནས་ནས་དབུས་ཀྱི་ཛ་དྲག་ཚོགས་ཆུང་གཙོས་བདེ་ལེགས་སྨན་ཁང་དང་སྨན་རྩིས་ཁང་དང་ལྷན་དེ་སྔ་བཞིན་མུ་མཐུད་ལས་དོན་ཁག་གནང་མུས་ཡིན་པ་གསུངས་སོང་།  གཞན་ཡང་ཁོང་གིས་མང་ཚོགས་ལ་འབོད་སྐུལ་དང་སྦྲགས།  མང་ཚོགས་རྣམས་ནས་ད་ལྟའི་རིང་ཕྱིར་ཕེབས་དགོས་དོན་མེད་ན་མི་ཕེབས་པ་རྩོལ་འདོན་དང་།  ནད་ཡམས་སྔོན་འགོག་སླད་ཁ་རས་བཞེས་རྒྱུ་དང་ཕྱག་ཡང་སེ་བཀྲུ་རྒྱུ་སོགས་མུ་མཐུད་གནང་དགོས་པ་མ་ཟད། སོ་སོར་ནད་རྟགས་རིགས་ཐོན་ཚེ་དེར་སྣང་མེད་བཏང་ནས་མི་བཞུགས་པར་དེ་མ་ཐག་བརྟག་དཔྱད་གནང་དགོས་པ་དང་།   ལྷག་པར་ཉེ་ལམ་རྡ་སར་ནད་ཡམས་རྐྱེན་པས་བོད་མི་འདས་གྲོངས་སུ་སོང་བའི་གནས་ཚུལ་ཀྱང་དེ་དང་འབྲེལ་བ་ཡོད་པ་ཞིག་ཆགས་ཀྱི་འདུག་ཅེས་གསུངས་སོང་། གཞི་རྩའི་ཀངྒ་ར་ནང་ནད་གཞི་ཕོག་མཁན་ཇེ་མང་དུ་སོང་རྐྱེན་ཉེ་བའི་ཆར་ནས་བཟུང་རྫོང་ནང་རེས་གཟའ་སྤེན་པ་དང་ཉི་མའི་ཉིན་ཕྱིར་བསྐྱོད་མི་ཆོག་པ་དང་།  དེ་བཞིན་མཚན་གྱི་བཀའ་རྒྱ་ཡང་བསྡམས་ཡོད་པ་རེད།  ལྷག་པར་ད་ཆ་ས་གནས་ནང་ནད་གཞི་ཕོག་མཁན་ཇེ་མང་དུ་ཕྱིན་རྐྱེན།  བོད་པའི་ཚོང་པ་སྐྱིད་སྡུག་ཚོགས་པ་ནས་ཡོང་རྒྱུ་བསྡད་པའི་བདུན་ཕྲག་གཅིག་ནང་ཚོང་ཁང་ཡོངས་སྒོ་བརྒྱབ་རྒྱུ་ཐག་གཅོད་གནང་འདུག་པ་དང་ཆབས་ཅིག    ས་གནས་འགོ་འཛིན་ནས་དེར་བསྔགས་བརྗོད་དང་སྦྲགས།  ཡོང་རྒྱུའི་བདུན་ཕྲག་གཉིས་གསུམ་རིང་སྒོ་བརྒྱབ་ཐུབ་ན་ལེགས་པོ་ཡོད་སྐོར་གྱི་ལམ་སྟོན་གནང་འདུག  

རེས་གཟའ་ཉི་མ། ༢༠༢༡།༠༥།༠༢

ཉན་པ།: Listen ཕབ་ལེན། Download བོད་ཀྱི་བུད་མེད་ལེ་ཚན། Communication Industry ཞེས་བརྡ་འབྲེལ་ལས་ཁང་དུ་ཆེད་ལས་འདྲ་མིན་ཐོག་ཕྱག་ལས་གནང་མཁན་དང་ Tenzin’s Show ཞེས་པའི་གླེང་མོལ་ལས་རིམ་གཙོ་སྐྱོང་བ་བསྟན་འཛིན་ཆོས་སྒྲོན་ལགས་སུ་བཅར་འདྲི། བོད་རིགས་ཟུར་བཀག་ཟིན་པ་རྣམས་ཀྱི་ལུས་སེམས་གསོ་བར་གསོལ་སྨན་མཆོད་ཚུལ། Sunday 02/05/2021 Women of Tibet: Tenzin Chodon, executive trainer, presenter and cross-cultural communication coach Tibetan medicinal healing for those in quarantine

༧གོང་ས་མཆོག་གིས་ཤེས་རབ་སྙིང་པོའི་བཀའ་ཆོས་བཀའ་དྲིན་སྩལ་བ།

དེ་རིང་ཕྱི་ཟླ་ ༣ ཕྱི་ཚེས་ ༡ ཉིན་གྱི་སྔ་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཐེ་ཝན་ནང་རྟེན་གཞི་བྱས་པའི་ཐེ་ཝན་བོད་ཀྱི་ནང་བསྟན་སྨོན་ལམ་ཚོགས་ཆུང་ནས་ཇི་ལྟར་གསོལ་བཏབས་པ་ལྟར་དྲ་ཐོག་བརྒྱུད་ཤེས་རབ་སྙིང་པོའི་བཀའ་ཆོས་བཀའ་དྲིན་སྩལ་སོང་བ་དང་བཀའ་ཆོས་ཀྱི་ཐོག་མ་དེར་དྲ་ཐོག་ནས་ལྷན་ཞུགས་གནང་བའི་ཐེ་ཝན་ནང་གི་དད་ལྡན་མང་ཚོགས་རྣམས་ནས་མགོན་པོ་༧གང་ཉིད་མཆོག་ལ་མཎྜལ་འདེགས་འབུལ་དང་སྦྲགས་ཤེས་རབ་སྙིང་པོ་གསུང་འདོན་གནང་སོང་།མགོན་པོ་༧གང་ཉིད་མཆོག་ནས་ཐེངས་འདིའི་བཀའ་ཆོས་ཀྱི་སྔོན་འགྲོའི་བཀའ་སློབ་ཁྲོད་ང་ཚོ་ཚང་མ་སྟོན་པ་བཅོམ་ལྡན་འདས་ཀྱིས་གསུངས་པའི་ནང་ཆོས་ཉམས་ལེན་གནང་མཁན་གཅིག་མཚུངས་ཡིན་པ་དང་། དེ་ཡང་བཅོམ་ལྡན་འདས་ཀྱི་གསུངས་པ་ལྟར་སངས་རྒྱས་ཀྱི་ཆོས་ལ་དད་པ་ཙམ་མིན་པར་རིགས་པས་དཔྱད་པ་བྱས་པའི་ཐོག་ནས་ཉམས་ལེན་གནང་རྒྱུ་གལ་ཆེན་པོ་ཡིན་པར་ལམ་སྟོན་མཛད་པ་དང་ཆབས་ཅིག བདེན་བཞི་ཆོས་འཁོར་གཙོས་པའི་སྟོང་ཉིད་ཀྱི་ལྟ་བ་དང་སྤྱོད་འཇུག་སོགས་ཀྱི་ཐད་ལ་ཉམས་ལེན་གནང་བའི་དགེ་མཚན་ཇི་ཡོད་ངོ་སྤྲོད་མཛད་ཡོད། སྔོན་འགྲོའི་བཀའ་སློབ་གྲུབ་མཚམས་མགོན་པོ་༧གང་ཉིད་མཆོག་ནས་སངས་རྒྱས་བཅོམ་ལྡན་འདས་ཀྱིས་བྱ་རྒོད་ཕུང་པོའི་རི་ལ་སྩལ་བའི་ཆོས་འཁོར་གཉིས་པ་ཤེས་རབ་སྙིང་པོའི་བཀའ་ཆོས་བཀའ་དྲིན་སྩལ་བ་དང་སྦྲགས་ཤེས་རབ་སྙིང་པོ་འདི་རྒྱུན་དུ་ཞལ་འདོན་གནང་བ་ཙམ་མ་ཡིན་པར་རྩ་བ་ཤེས་རབ་དང་དབུ་མ་འཇུག་པའི་ནང་གསུངས་པའི་ཤེས་རབ་རྙིང་པོའི་བཀའ་འགྲེལ་ཁག་ལ་ཐོས་བསམ་སྒོམ་གསུམ་གྱི་ཐོག་ནས་སློབ་སྦྱོང་གནང་ཐུབ་པ་ཡིན་ན་དགེ་མཚན་ཆེན་པོ་ཡོད་པ་དང་། ལྷག་པར་དུ་རྒྱ་རིགས་ནང་པ་ཚོས་ཆོ་ག་ཕྱག་ལེན་དང་སྒོམ་ཆེན་པ་ལྟ་བུར་གནང་ནས་མ་བཞུགས་པར་རིགས་ལམ་སོགས་ཀྱི་ཐོག་དམིགས་བསལ་སློབ་སྦྱོང་གནང་དགོས་པའི་ལམ་སྟོན་མཛད་སོང་། དེ་བཞིན་མགོན་པོ་༧གང་ཉིད་མཆོག་ནས་ཐེངས་འདིའི་བཀའ་ཆོས་ཐོག་ཐེ་ཝན་ནས་དྲ་ཐོག་བརྒྱུད་མཉམ་ཞུགས་གནང་བའི་དད་ལྡན་ཆོས་ཞུ་བ་ཁག་ཅིག་གིས་སྟོང་པ་ཉིད་དང་། བྱང་ཆུབ་སེམས་པ། དེ་བཞིན་ཆགས་སྡང་གི་བློ་ཆུང་རུ་གཏང་སྟངས་དང་ཆོས་ལུགས་རིས་མེད་སོགས་ཀྱི་ཐད་བཀའ་འདྲི་དགོངས་སྐོར་ཞུས་པ་རྣམས་ལ་བཀའ་ལན་མཛད་པ་དང་སྦྲགས། རིས་མེད་ཀྱི་ལྟ་གྲུབ་ཁག་ལ་སློབ་སྦྱོང་བྱེད་ཐུབ་པ་ཡིན་ན་སོ་སོའི་བློ་རྒྱ་འཕེལ་རྒྱུ་སོགས་ཀྱི་དགེ་མཚན་ཡོད་པ་དང་། ཆགས་སྡང་དང་ཁོང་ཁྲོའི་བློ་ཆུང་རུ་གཏང་ཐབས་སུ་གཙོ་ཆེ་ཤོས་རང་གཅེས་འཛིན་གྱི་བསམ་བློ་ཆུང་རུ་གཏང་དགོས་པ་དང་། དེ་ཡང་གཙོ་བོ་སྤྱོད་འཇུག་གི་ལེའུ་དྲུག་པ་དང་བརྒྱད་པའི་ཐོག་སློབ་སྦྱོང་གནང་གལ་སོགས་ཀྱི་ལམ་སྟོན་མཛད་ཡོད། བཀའ་ཆོས་ཀྱི་མཐའ་མར་༧གོང་ས་༧སྐྱབས་མགོན་ཆེན་པོ་མཆོག་ནས་དད་ལྡན་ཆོས་ཞུ་བ་རྣམས་ལ་སེམས་བསྐྱེད་ཀྱི་ཆོས་འགྲེལ་དང་སྦྲགས་བྱང་ཆུབ་སེམས་ཉམས་ལེན་གནང་ཐུབ་ན་ཚེ་འདི་དང་ཕྱི་མ་གཉིས་ཀར་ཕན་ཐོགས་ཆེན་པོ་ཡོད་པ་བཀའ་སྩལ་ཡོད། གཞི་རྩའི་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་རྐྱེན་གྱིས་༧གོང་ས་༧སྐྱབས་མགོན་ཆེན་པོ་མཆོག་གི་མཛད་འཕྲིན་ཁག་དྲ་ཐོག་ནས་སྐྱོང་བཞིན་ཡོད་པ་དང་། གསན་གཟིགས་གནང་མཁན་ཡོངས་ནས་ས་གནས་སོ་སོར་བཅས་པའི་སྤྱི་ཚོགས་རྒྱང་བཀྱེད་སོགས་རིམས་ནད་སྔོན་འགོག་གི་བྱ་གཞག་ཁག་འཐུས་ཤོར་མེད་པར་བསྟེན་དགོས་ཀྱི་ཡོད་པ་རེད། མཛད་འཆར་ལ་གཞིགས་ན་༧གོང་ས་༧སྐྱབས་མགོན་ཆེན་པོ་མཆོག་གིས་ཕྱི་ཚེས་ ༥ ཉིན་ཚན་རིག་གི་ཐབས་ལམ་ཐོག་ནས་སྒོམ་སྒྲུབ་ཉམས་ལེན་ལ་ཉམས་ཞིབ་གནང་སྟངས་སྐོར་བཀའ་སློབ་སྩལ་གཏན་འཁེལ་འདུག

རེས་གཟའ་སྤེན་པ། ༢༠༢༡།༠༥།༠༡

ཉན་པ།: Listen ཕབ་ལེན། Download ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་ཁྲོད་བཙན་བྱོལ་བོད་མིའི་གནས་སྟངས་རྒྱུས་ལོན་དང་ནད་རླབས་ལ་གདོང་ལེན་་གནང་ཕྱོགས་སྐོར་གླེང་མོལ། Saturday 01/05/2021 Situation of exile Tibetans amidst second COVID wave: In conversation with CTA's COVID 19 Task Force Coordinator

Latest news