Monthly Archives: January, 2022

༸སྐྱབས་རྗེ་རྡོ་གྲུབ་ཆེན་རིན་པོ་ཆེ་མཆོག་ཉེ་ཆར་ཕྱི་ཟླ་ ༡ ཚེས་ ༢༥ ཉིན་རྒྱ་གར་བྱང་ཕྱོགས་འབྲས་ལྗོངས་མངའ་སྡེར་རྟེན་གཞི་བྱས་པའི་རྡོ་གྲུབ་མཆོད་རྟེན་དགོན་དུ་དགུང་གྲངས་ ༩༥ ཐོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་དང་། ད་ལྟའི་ཆར་རིན་པོ་ཆེ་མཆོག་ཐུགས་དམ་ལ་བཞུགས་མུས་རེད་འདུགརྡོ་གྲུབ་ཆེན་མཆོན་རྟེན་དགེ་རྩ་ཚོགས་པས་རིན་པོ་ཆེ་མཆོག་དགོངས་པ་གཞན་དུ་གཤེགས་པའི་གནས་ཚུལ་དེ་ཚེས་ ༢༦ བར་གསང་རྒྱ་གནང་ཡོད་པ་རེད།གཞི་རྩའི་༸སྐྱབས་རྗེ་རྡོ་གྲུབ་ཆེན་སྐུ་འཕྲེང་བཞི་པ་འཇིགས་མེད་ཐུབ་བསྟན་འཕྲིན་ལས་དཔལ་འབར་མཆོག་ནི། མགོ་ལོག་གསེར་རྟའི་གསེར་ཁོག་ཏུ་ཕྱི་ལོ་ ༡༩༢༧ ལོར་ཡབ་རྗེས་དཀར་དགྲ་བླ་དང་ཡུམ་ཀ་བཞི་བཟའ་ཀ་ལི་སྐྱིད་གཉིས་ཀྱི་སྲས་སུ་སྐུ་འཁྲུངས་ཤིང་། རྫོགས་སྤྲུལ་ལྔ་པ་དྷརྨ་བཛྲས་རྡོ་གྲུབ་ཆེན་སྐུ་འཕྲེང་གསུམ་པའི་ཡང་སྲིད་དུ་ངོས་འཛིན་མཛད་ཅིང་། རང་ལོ་བཞིའི་ཐོག་གྲུབ་ཆེན་དགོན་དུ་གསེར་ཁྲི་མངའ་གསོལ་བ་དང་། ནང་པའི་གཞུང་ཆེན་དག་ལ་བསླབ་པ་སློབ་གཉེར་གནང་བ་དང་དེ་རྗེས་ཕྱི་ལོ་ ༡༩༥༧ ཟླ་ ༡༠ ཚེས་ ༡༢ ཉིན་རྒྱ་གར་བྱང་ཕྱོགས་འབྲས་ལྗོངས་མངའ་སྡེའི་རྒྱལ་ས་སྒང་ཏོག་ལ་ཕེབས། བཙན་བྱོལ་དུ་ཕེབས་དོན་ལྟར་ ༡༩༦༠ ཟླ་ ༤ ཚེས་ ༢༦ རྣམ་རྒྱལ་བོད་ཀྱི་ཤེས་རིག་ཉམས་ཞིབ་གཙོ་བོ་གནང་བ་མ་ཟད་དུས་ད་ལྟ་བར་དུ་བོད་བརྒྱུད་ནང་བསྟན་སྤྱི་དང་སྒོས་སྔ་འགྱུར་རྙིང་མའི་གཞུང་ཆེན་དག་ལ་གསན་བསམ་སློབ་གཉེར་མཛད་ཡོད། ལྷག་དོན་དུ་རིན་པོ་ཆེ་མཆོག་གིས་རྡོ་གྲུབ་མཆོད་རྟེན་དགོན་གསར་འཛུགས་མཛད་དེ་བཤད་གྲྭ་དང་སྒྲུབ་སྡེ། དེ་བཞིན་འབྲུག་ཡུལ་དུ་ཆོས་སྡེ་གསར་འཛུགས་དང་། བལ་ཡུལ། རྒྱ་གར། དེ་བཞིན་ཨ་རི་དང་དབྱིན་ཡུལ་སོགས་འཛམ་གླིང་ཤར་ནུབ་ཀུན་ཏུ་ཞབས་བཅགས་ཏེ་བཀའ་མ། གཏེར་མཛོད། པད་གླིང་ཆོས་བསྐོར། མཛོད་བདུན། ཀློང་ཆེན་སྙིང་ཐིག་ལ་སོགས་པའི་ཆོས་འཁོར་སྐོར་ནས་ཕྱི་ནང་གི་གདུལ་བྱ་དཔག་ཏུ་མེད་པའི་དོན་མཛད་ཡོད་པ་རེད།རླུང་འཕྲིན་ཁང་གིས་༸སྐྱབས་རྗེ་རྡོ་གྲུབ་ཆེན་མཆོག་གི་སྐུ་སྒེར་དྲུང་ཆེ་དཀོན་མཆོག་ཡོན་ཏན་ལགས་ལ་རྡོ་གྲུབ་ཆེན་རིན་པོ་མཆོག་དགོངས་པ་གཤེགས་ཚུལ་དང་འབྲེལ་ནས་བཀའ་འདྲི་ཞུས་པར་ཁོང་གིས་རིན་པོ་ཆེ་མཆོག་སྙུང་གཞི་གང་ཡང་བཞེས་མེད་སྐོར་གསུངས་སོང་།ཤེས་རྟོགས་བྱུང་བར་གཞིགས་ན། སང་ཕྱི་ཟླ་ ༡ ཚེས་ ༢༩ ཉིན་དགོངས་རྫོགས་ཀྱི་མཆོད་འབུལ་དངོས་སུ་དབུ་འཛུགས་གནང་རྒྱུ་དང་ཕྱི་ཚེས་ ༣༡ ཉིན་ཐུགས་དམ་དཀྲོལ་གཏན་ཁེལ་འདུག

རྒྱ་གར་བྱང་ཤར་མེའོ་ཆོས་འཕེལ་གླིང་བོད་མིའི་གཞིས་ཆགས་ཀྱི་བུ་བསྟན་འཛིན་ཚེ་རིང་ལགས་ཀྱིས་དུས་རྒྱུན་ནས་དང་བླང་གིས་ཁུལ་དེའི་འབྱོར་འཁས་ཞན་པའི་སློབ་མ་རྣམས་ལ་དང་བླང་གིས་སློབ་ཁྲིད་གནང་བཞིན་སྟབས། ཁ་ཉིན་རྒྱ་གར་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་ ༧༣ འཁོར་བའི་དུས་དྲན་གྱི་ཉིན་མོར། ཁུལ་དེའི་མེའོ་རྫོང་དཔོན་གཞོན་པའི་ལས་ཁུངས་ནས་ཁོང་ལ་ཡི་རང་བསྔགས་བརྗོད་ཀྱི་གཟེངས་བསྟོད་ཕྱག་འཁྱེར་ཞིག་གནང་འདུག རྩ་བའི་བསྟན་འཛིན་ཚེ་རིང་ལགས་ནི་མཐོ་སློབ་འགྲིམ་བཞིན་པའི་སློབ་མ་ཞིག་ཡིན་ཞིང་། ཏོག་དབྱིབས་ནད་དུག་གི་རྐྱེན་གྱིས་མཐོ་སློབ་ཀྱི་འཛིན་གྲྭ་ཁག་དྲྭ་ལམ་དུ་འཚོགས་བཞིན་པ་དང་སྟབས་བསྟུན་གྱིས།  ཁོང་གིས་ཁུལ་དེའི་འབྱོར་འཁས་ཞན་པའི་ཁྱིམ་ཚང་གི་སློབ་མ་མང་པོར་དང་བླང་གིས་སློབ་ཁྲིད་བྱེད་མུས་རེད་འདུག ཁོང་གིས་འདི་ག་གསར་ཁང་ལ་བརྗོད་པ་ལྟར་ན། དུས་རྒྱུན་ནས་༸གོང་ས་མཆོག་གི་ཆོས་ལུགས་ལ་མ་བརྟེན་པའི་བཟང་སྤྱོད་ཡིད་ལ་བཅིངས་བའི་ཐོག་ནས་མི་རིགས་དང་ཆོས་ལུགས་ཀྱི་དབྱེ་བ་མེད་པར་དཔལ་འབྱོར་གྱི་མཐུན་རྐྱེན་ཞན་པའི་སློབ་མ་རྣམས་ལ་སློབ་ཁྲིད་བྱེད་རྒྱུར་འབད་བརྩོན་བྱེད་མུས་ཡིན་པ་མ་ཟད།  དེ་ནི་རང་གཞན་གཉིས་ཕན་གྱི་བྱ་བཞག་ཅིག་ཡིན་པར་གསུངས་སོང་།

༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་ག་ཁ་ཉིན་ཚེས་ ༢༦ ཉིན་ཤྲི་ལངྒའི་རྒྱལ་ས་ཁོ་ལོམ་བོའི་རྒྱལ་སྤྱིའི་གནམ་ཐང་དུ་༸ཞབས་སོར་བདེ་བར་འཁོད་པ་དང་འབྲེལ། Amarapura Maha Nikaya ཞེས་ཡུལ་དེའི་ནང་པའི་སྒྲིག་འཛུགས་ཆེ་ཤོས་ཀྱི་བླ་ཆེན་ Waskaduwe Mahindawansa Mahanayake Thero མཆོག་དང་སྒྲིག་འཛུགས་ཀྱི་སྐུ་ཚབ་མི་སྣ། International Buddhist Confederation འམ་རྒྱལ་སྤྱིའི་ནང་པའི་ལྷན་ཚོགས་ཀྱི་ཚོགས་གཞོན་སོགས་གནད་ཡོད་མི་སྣ་ཁག་ཅིག་གིས་ཕེབས་བསུའི་སྣེ་ལེན་གཟབ་རྒྱས་ཞུས་འདུགསིངྒ་ནང་གི་མཛད་འཆར་ཐོག་མ་ཕྱི་ཚེས་ ༢༧ ཉིན་ Amarapura Maha Nikaya ཞེས་པའི་ནང་པའི་སྒྲིག་འཛུགས་ཀྱིས་རིན་པོ་ཆེ་མཆོག་ལ་ཁོ་ལོམ་བོ་ལས་ཁུངས་དབུས་སུ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་རེད། ནང་པའི་སྒྲིག་འཛུགས་དེའི་བསྟན་བདག་ Dodampahala Chandrasiri Mahanayake Thero མཆོག་གིས་དབུས་པའི་ཆོས་བརྒྱུད་ཁག་གི་དབུ་ཁྲིད་རྣམས་དང་མཇལ་འཕྲད་གནང་སྟེ་ཕན་ཚུལ་དབར་དམ་ཆོས་འདུལ་བའི་ཉམས་བཞེས་སྐོར་བགྲོ་གླེང་ལྷུག་པོ་མཛད་པ་མ་ཟད་དེ་རྗེས་ཡུལ་དེའི་གསར་འགྱུར་བརྒྱུད་ལམ་གྱི་བཀའ་འདྲིའི་ལས་རིམ་ཐོག་དབུ་བཞུགས་མཛད་ཡོད་པ་ལྟར་བརྒྱུད་ལམ་ཁག་གིས་གླིང་རིན་པོ་ཆེ་མཆོག་ཤྲི་ལངྒར་ཆིབས་བསྒྱུར་མཛད་པ་དེས་བོད་བརྒྱུད་ནང་བསྟན་དང་སིངྒ་ལའི་ནང་པའི་དབར་ཐུང་མོང་མ་ཡིན་པའི་འབྲེལ་ལམ་ཡོད་པ་དེ་དམ་ཟབ་ཏུ་ཕྱིན་པ་ཞིག་མཚོན་གྱི་ཡོད་པ་གསུངས་འདུགཤྲི་ལངྒ་ནང་པའི་ཚོགས་སྡེ་ཁག་གི་ངོས་ནས་དེ་སྔོན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེར་ཆིབས་བསྒྱུར་མཛད་གནང་ཡོང་བའི་གདན་ཞུའི་གསོལ་འདེབས་ཞུས་ཡོད་ཀྱང་། ཤྲི་ལངྒ་དང་རྒྱ་ནག་དབར་གྱི་འབྲེལ་ལམ་དང་ལྷག་དོན་རྒྱ་ནག་གིས་གནོན་ཤུགས་སྤྲོད་བཞིན་པའི་རྐྱེན་གྱིས་ད་བར་ཤྲི་ལངྒ་གཞུང་གི་ངོས་ནས་ཆོག་མཆན་ཕུལ་མེད་པ་དེ་ལྟར་ཡང་། ཉེ་ཆར་ཕྱི་ཟླ་ ༡༢ ནང་དུ་ཤྲི་ལངྒ་གཙོས་པའི་ཨིན་ཌོ་ནི་ཤ་ཡའི་དང་མ་ལེ་ཤ་ཡ། འབར་མ། ཐ་ལན་ཌི། དེ་བཞིན་སིངྒ་པུར་བཅས་ཀྱི་ནང་པའི་དད་ལྡན་པས་ཇི་ལྟར་གསོལ་འདེབས་ཞུས་པ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་དྲན་པ་ཉེར་བཞག་གི་བཀའ་ཆོས་བཀའ་དྲིན་སྩལ་ཡོད་པ་རེད།

ཉེ་ལམ་ཟླ་ ༡ ཚེས་ ༢༡ ཉིན་རྒྱ་གར་མངའ་སྡེ་ཧར་ཡ་ནའི་གྲོང་ཁྱེར་ཨམ་བྷ་ལ་ནང་ Potala Tibetan Refugee Market ཞེས་བོད་མིའི་སུད་ཚོང་གཉེར་སའི་ཁྲོམ་རར་མེ་སྐྱོན་ཕོག་ནས་ཁྲོམ་ས་བཅུ་རྩ་གཏོར་ཕྱིན་པའི་ཁྲོད་ཚོང་པ་རྣམས་ལ་ཁྱོན་ཧིན་སྒོར་འབུམ་དགུ་བཅུ་གོ་བརྒྱད་ལྷག་གི་གྱོང་གུད་ཕོག་འདུག ཨམ་བྷ་ལ་བོད་མིའི་ཁྲོམ་རར་མེ་སྐྱོན་ཕོག་པའི་གནད་དོན་བྱུང་རྗེས་རྐང་ས་གནས་སུ་བཙན་བྱོལ་བོད་མིའི་ཚོང་པ་ཚོགས་པའི་ཚོགས་གཞོན་བསྟན་འཛིན་མཁྱེན་བརྩེ་ལགས་དང་ལྷན་ཕྱག་རོགས་ཁག་གཅིག་གིས་ས་གནས་སུ་གནས་སྟངས་ཇི་ཆགས་ཞིབ་འཇུག་གནང་སླད་ཨམ་བྷ་ལར་ཆེད་བཅར་གནང་བ་ལྟར་རླུང་འཕྲིན་ཁང་གིས་མཁྱེན་བརྩེ་ལགས་སུ་བཅར་འདྲི་ཞུས་པར་ཁྲོམ་ས་བཅུ་ལ་ཁྱོན་ཧིན་སྒོར་འབུམ་དགུ་བཅུ་གོ་བརྒྱད་དང་སྟོང་ཕྲག་བདུན་ཅུ་དོན་གཉིས་ལྷག་གི་གྱོང་གུད་ཕོག་ཡོད་སྐོར་སོགས་འགྲེལ་བརྗོད་གནང་སོང་། ད་ལན་མེ་སྐྱོན་གྱི་དོན་རྐྱེན་བྱུང་བ་དེ་ཐོག་མ་མིན་པར་དེ་སྔའང་བོད་མིའི་སུད་ཚོང་གཉེར་ཡུལ་ཁག་གཅིག་ལ་མེའི་འཇིག་པའི་ངལ་བ་འཕྲད་མྱོང་ཡོད་པ་རེད། མཁྱེན་བརྩེ་ལགས་ཀྱིས་སྤྱིར་བཙན་བྱོལ་བོད་མིའི་ཚོང་པ་ཚོགས་པས་དུས་དང་རྣམ་པ་ཀུན་ཏུན་ས་གནས་སོ་སོར་མེ་སྐྱོན་དང་བརླག་སྟོར་ལ་སོགས་པའི་ཐད་ལམ་སྟོན་ཞུས་དང་ཞུ་མུས་ཡིན་པ་གསུངས་པ་དང་ཆབས་ཅིག ལྷག་པར་དུ་ད་རེས་ཀྱི་མེ་སྐྱོན་དེ’ང་གློག་འཁྱུད་ལ་བརྟེན་ནས་བྱུང་བ་ཡིན་པར་ཐེ་ཚོམ་ཡོད་སྐོར་གསུངས་ཡོད།ཨམ་བྷ་ལའི་དོན་རྐྱེན་ལ་ད་བར་ཧར་ཡ་ན་ནང་བཙན་བྱོལ་བོད་མིའི་ཚོང་པ་ཚོགས་པའི་ཁྱབ་ཁོངས་སུ་གཏོགས་པའི་ཚོགས་པས་སྟོང་ཕྲག་ལྔ་བཅུ་ཞལ་འདེབས་གནང་འདུག་པ་དང་དེ་བཞིན་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ས་གནས་སུ་ཆེད་བཅར་གྱིས་བོད་མི་རྣམས་དང་ཐུག་འཕྲད་གནང་སྟེ། སེམས་གསོ་ཆེད་ཧིན་སྒོར་འབུམ་གཅིག་ཞལ་འདེབས་ཕུལ་འདུག དབུས་བོད་ཀྱི་བུད་མེད་ལྷན་ཚོགས་ཀྱིས་ཀྱང་ཞལ་འདེབས་ཕུལ་འདུག་པར་མ་ཟད་གཞོན་ལྷན་དང་བུད་མེད་ལྷན་ཚོགས་ཀྱི་ཁྱབ་ཁོངས་ས་གནས་ཁག་ནས་ཞལ་འདེབས་བསྡུ་རུབ་གནང་མུས་ཡིན་པ་རེད།

ཉན་པ།: Listen ཕབ་ལེན། Download བོད་ནང་རྒྱལ་ཁབ་ཀྱི་བདེ་འཇགས་ལ་ཉེན་ཚབས་བཟོས་པའི་ཉེས་དོན་འོག་ཁྲིམས་བཤེར་ཇེ་མང་། རོང་བོ་དགེ་འདུན་ལྷུན་འགྲུབ་ལགས་འཛིན་བཟུང་བྱས་ནས་ལོ་གཅིག་ཕྱིན་ཀྱང་གར་སོང་ཆ་མེད་རེད་འདུག རྒྱ་ནག་གིས་བོད་ཁུལ་དུ་དཔེ་བཟང་གྲྭ་བཙུན་ལ་གཟེངས་རྟགས་ཀྱི་ཚོགས་འདུ་བསྡུས་བ། པེ་ཅིང་གི་ཨོ་རྩལ་ཐོག་བོད་མི་རྩེད་འགྲན་པ་གཉིས་མཉམ་ཞུགས། བོད་དོན་ཆེད་སྦག་སྦག་སྐོར་སྐྱོད་གནང་མཁན་དང་ཟུར་ཚེ་རིང་ཡེ་ཤེས་ལགས་སྦེང་ལོང་འབྱོར་བ། རྒྱ་ནག་གི་ཨོ་རྩལ་ལ་ངོ་རྒོལ་གྱི་ལས་འགུལ་སྤེལ་སྐབས་ཇག་ཚོགས་བཏང་སྟེ་ཁ་རྡུང་བཏང་འདུག རྒྱ་ནག་གིས་ Fight Club ཞེས་པའི་གློག་བརྙན་གྱི་ལེའུ་མཐའ་མ་བཅོས་སྒྲིག་བྱས་པ། Thursday 27/01/2022 Endangering State Security cases in Tibet rose sharply in 2020: Dui Hua Foundation New details emerge about Gendun Lhundup a year after his arrest, whereabouts still unknown Chinese authorities announce awards for ‘harmonious’ monasteries and ‘law abiding’ monks and nuns 2 Tibetans to take part in Beijing winter Olympics, Portugal not sending political representation All India Bike rally for Tibet: Solo activist reaches Bangalore Taiwanese activists, lawmakers protest Beijing Olympics; harassed by pro-China goons China changes Fight Club film ending so the authorities win

ཕྱི་ལོ་ ༢༠༡༧ ནས་ ༢༠༢༠ བར་གྱི་རྒྱ་ནག་ཁྲིམས་ཁང་གི་ཚིག་ཐོར་གཞིགས་ཚེ་དེ་སྔའི་ལོ་གཉིས་དང་བསྡུར་ན་ཕྱི་ལོ་ ༢༠༢༠ ནང་རྒྱ་ནག་རྒྱལ་ཡོངས་སུ་རྒྱལ་ཁབ་ཀྱི་བདེ་འཇགས་ལ་ཉེན་ཚབས་བཟོས་པའི་ཉེས་དོན་འོག་ཁྲིམས་བཤེར་ཧ་ཅང་མང་པོ་བྱས་པ་དང་སྒོས་སུ་བོད་ནང་རྒྱལ་ཁབ་ཀྱི་བདེ་འཇགས་ལ་ཉེན་ཚབས་བཟོས་པའི་ཉེས་དོན་འོག་ཁྲིམས་བཤེར་གྱི་གྱོད་དོན་ཆེས་མང་བ་ཡོད་པ་མངོན་གསལ་གནང་ཡོད།ཨ་རིར་རྟེན་གཞི་བྱས་པའི་ Dui Hua ཞེས་ཆབ་སྲིད་བཙོན་པའི་གནད་དོན་ཐོག་ཉམས་ཞིབ་གཙོ་བོ་གནང་སྟེ་རྒྱ་ནག་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་ཐད་ཕྱག་ལས་གནང་མཁན་ཐེབས་རྩ་ཁང་གི་དྲ་གནས་ཐོག་གནས་ཚུལ་སྤེལ་བར་ National Bureau of Statistics ཞེས་རྒྱ་ནག་རྒྱལ་ཡོངས་གྲངས་རྩིས་བསྡུ་བཤེར་ལས་ཁུངས་ཀྱི་དྲ་རྒྱར་ཕྱི་ལོ་ ༢༠༡༧ ནས་ ༢༠༢༠ བར་ལོ་གསུམ་གྱི་དུས་ཡུན་ནང་རྒྱ་ནག་ཏུ་ཉེས་དོན་ཁྲིམས་བཤེར་བྱས་པའི་གྲངས་ཐོ་ལུང་འདྲེན་གྱིས་ཕྱི་ལོ་ ༢༠༢༠ ལོར་རྒྱ་ནག་ཁྱོན་དུ་ Endangering State Security འམ་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོ་བའི་ཉེས་དོན་ ༤༡༧ ལ་ཁྲིམས་བཤེར་བྱས་ཡོད་པ་དང་། ཕྱི་ལོ་ ༢༠༡༨ ལོར་ཁྲིམས་དོན་ ༢༥༧ དང་ ༢༠༡༩ ལོར་ཁྲིམས་དོན་ ༣༡༧ བཅས་བྱུང་བ་ལས་མང་བ་ཡོད་པར་མངོན་གསལ་གནང་འདུག Dui Hua ཚོགས་པའི་ངོས་ནས་བོད་དང་ཤིན་ཅང་ནང་དུ་ཉེས་དོན་གྱི་གནད་དོན་ཁག་ལོགས་སུ་དབྱེ་ནས་བོད་ནང་དུ་རྒྱ་ནག་གིས་ས་ཁུལ་གཞན་ལས་རྒྱལ་ཁབ་བདེ་འཇགས་དང་འབྲེལ་བའི་ཉེས་དོན་ཁྲིམས་བཤེར་བྱས་པ་ཧ་ཅང་མང་བ་ཡོད་པ་དང་ཕྱི་ལོ་ ༢༠༡༨ ལོར་བོད་རང་སྐྱོང་ལྗོངས་ཟེར་བའི་ནང་ཁ་བྲལ་གྱི་ཀུན་སློང་སྤེལ་བ་དང་། རྒྱལ་ཁབ་ཀྱི་བདེ་འཇགས་ལ་གནོད་པའི་སྡེ་ཁག་ལ་དངུལ་གྱི་རོགས་སྐྱོར་བྱས་པའི་ཉེས་མིང་འོག་བོད་མི་ ༢༥ ལ་ཁྲིམས་ཐག་བཅད་ཡོད་པ་དང་དེ་རྗེས་ ༢༠༡༩ ལོར་གྱོད་དོན་ཁག་ ༢༤ འི་ཁྲོད་མི་ ༣༧ ལ་ཁྲིམས་ཐག་བཅད་པ། དེ་བཞིན་ ༢༠༢༠ ལོར་གྱོད་དོན་ ༦༥ ཁྲོད་མི་ ༧༤ ལ་རྒྱལ་ཁབ་ཀྱི་བདེ་འཇགས་ལ་ཉེན་ཚབས་བཟོས་པའི་ཉེས་མིང་འོག་ཁྲིམས་ཐག་བཅད་པ་སོགས་ཕྱི་ལོ་ ༢༠༢༠ ལོར་གྲངས་འབོར་དེ་ཧ་ཅང་མང་བ་ཆགས་ཡོད་པར་ཆེས་མངོན་གསལ་གནང་ཡོད་པ་རེད།དེ་བཞིན་རྒྱ་གཞུང་གིས་དབྱེ་བའི་ཟི་ཁྲོན་ཞིང་ཆེན་གྱི་དཀར་མཛེས་བོད་རིགས་རང་སྐྱོང་ཁུལ་དུ་ཁྲིམས་ཐག་བཅད་པའི་གྲངས་འབོར་ཁ་གསལ་མེད་ཀྱང་དཀར་མཛེས་ས་གནས་ཁྲིམས་གཞི་ལས་ཁུངས་ཀྱིས་སྔ་ལོའི་ལོ་འཁོར་སྙན་ཐོ་འདོན་སྤེལ་བྱས་པའི་ནང་ཕྱི་ལོ་ ༢༠༢༠ ལོར་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཟོས་པའི་གྱོད་དོན་ ༧ གྱི་འོག་བོད་མི་ ༩ ལ་ཁྲིམས་ཐག་བཅད་པ་དང་། དེ་བཞིན་ལོ་དེར་གྱོད་དོན་གཞན་ ༡༢ ཁྲོད་མི་ ༡༥ ལ་ཁྲིམས་ཐག་བཅད་ཡོད་པ་ཤེས་རྟོགས་བྱུང་འདུག དཀར་མཛེས་ས་གནས་ཁྲིམས་ཁང་གིས་ཁྲིམས་ཐག་བཅད་པའི་གྱོད་དོན་ལ་ཉམས་ཞིབ་གནང་བའི་ཁྲོད་ ༢༠༢༠ ཕྱི་ཟླ་ ༦ ནས་ ༨ བར་མི་དགུ་ལ་ཁྲིམས་ཀྱི་ཉེས་ཆད་བཏང་ཡོད་པ་དང་དེ་རྗེས་ཕྱི་ཟླ་ ༩ ནས་ ༡༢ བར་མི་ ༦ ལ་ཁྲིམས་ཐག་བཅད་ཡོད་པ་རེད། དེ་མཚུངས་སུ་ཟི་ཁྲོན་ཞིང་ཆེན་གྱི་རྔ་བ་ཁུལ་དུ་བོད་མི་ ༧ ལ་ཁྲིམས་ཐག་བཅད་ཡོད་པ་ཤེས་རྟོགས་ཐུབ་ཡོད། Dui Hua ཐེབས་རྩ་ཁང་གིས་ད་དུང་རྒྱ་ནག་རྒྱལ་ཡོངས་སུ་རྒྱལ་ཁབ་ཀྱི་བདེ་འཇགས་ལ་ཉེན་ཚབས་ཀྱི་གྱོད་དོན་མང་ཤོས་ཤིན་ཅང་འམ་ཤར་ཏུར་ཀིས་ཐན་ཁུལ་དུ་བྱུང་ཡོད་པ་གསུངས་འདུག དེའང་ཕྱི་ལོ་ ༢༠༡༣ དང་ ༡༤ ནང་དུ་ཤར་ཏུར་ཀིས་ཐན་ཁྲིམས་ཁང་གི་ངོས་ནས་རྒྱལ་ཁབ་ཀྱི་བདེ་འཇགས་དང་འབྲེལ་བའི་གྱོད་དོན་ ༣༠༠ ཙམ་ཐག་བཅོད་བྱས་ཡོད་པ་དང་། རྒྱ་ནག་ཁྱོན་གྱི་གྲངས་འབོར་གྱི་གསུམ་ཆ་གཅིག་ཆགས་ཀྱི་ཡོད་པ་དང་། ཕྱིས་སུ་ ༢༠༡༥ ལོར་གྱོད་དོན་ ༢༡༤ ཞེས་གྲངས་འབོར་ཕྲན་བུ་ཉུང་དུ་ཕྱིན་ཡོད་ཀྱང་། སྐབས་དེའི་རྒྱ་ནག་ཁྱོན་གྱི་གྲངས་འབོར་ལས་ཕྱེད་ཀ་ཙམ་ཆགས་ཀྱི་ཡོད་པར་གསུངས་འདུག ཕྱི་ལོ་ ༢༠༡༧ ལོ་ནས་ཤིན་ཅང་དུ་མང་ཚོགས་རྣམས་བཙན་དབང་གིས་ངལ་རྩོལ་ར་བར་བཅུག་ནས་དམ་དྲག་ཆེས་ཆེར་བྱས་ཡོད་སྐོར་གསུངས་པ་དང་ཆབས་ཅིག ཉེས་དོན་གྱི་གནད་དོན་རྣམས་ཀྱི་ཐོག་གནས་ཚུལ་དངོས་གང་ཡིན་གསལ་རྟོགས་དཀའ་བར་གྱུར་བའི་ཁྲོད་ཚོགས་པའི་ཉམས་ཞིབ་ནང་ཕྱི་ལོ་ ༢༠༢༠ ལོར་ཤིན་ཅང་ནང་མི་ ༦༨ ལ་རྒྱལ་ཁབ་བདེ་འཇགས་ཀྱི་གནད་དོན་དང་འབྲེལ་ནས་ཁྲིམས་ཐག་བཅད་ཡོད་པ་ཤེས་རྟོགས་བྱུང་བ་ལས་དེ་མིན་ཤེས་རྟོགས་གང་ཡང་བྱུང་མེད། Dui Hua ཐེབས་རྩ་ཁང་གིས་ད་རེས་སྙན་ཐོ་རིམ་པ་དང་པོ་དེ་དངོས་སུ་འདོན་སྤེལ་གནང་བའི་ནང་བོད་དང་ཤིན་ཅང་དུ་རྒྱལ་ཁབ་བདེ་འཇགས་དང་འབྲེལ་བའི་གྱོད་དོན་ཁག་མངོན་གསལ་གནང་རྗེས་ཟླ་བ་རྗེས་མར་སྙན་ཐོ་རིམ་པ་གཉིས་པ་འདོན་སྤེལ་གནང་རྒྱུའི་ནང་ཧན་མི་རིགས་གནས་པའི་རྒྱ་ནག་གི་ས་ཁུལ་གཞན་ཁག་གི་གནས་སྟངས་སྐོར་མངོན་གནང་རྒྱུ་རེད་འདུག

རྒྱ་ནག་གིས་དུས་རྒྱུན་ནས་ཞི་དྲག་གཉིས་ལྡན་གྱི་ཐབས་ཤེས་ཡོད་ཚད་སྤྱད་ནས་བོད་ཁུལ་གྱི་དགོན་པ་གྲྭ་ཚང་གི་གཙོ་བྱས་པའི་ཤེས་ལྡན་མི་སྣ་དང་མང་ཚོགས་སྤྱི་ཡོངས་ལ་དམ་དྲག་བྱེད་བཞིན་པའི་ཁྲོད། ཁ་ཉིན་ཚེས་ཉེར་ལྔའི་ཉིན། རྒྱ་ནག་གིས་ཁམས་དཀར་མཛེས་ཁུལ་གྱི་དགོན་པ་ཁག་ ༧༦ དང་གྲྭ་བཙུན་གྲངས་༩༡༣ ལ་གཞུང་འབྲེལ་གྱི་དཔེ་བཟང་གཟེངས་རྟགས་སྤྲོད་རྒྱུའི་ཚོགས་འདུ་འཚོགས་འདུགདེ་ཡང་ཁ་སང་རྒྱ་ནག་གཞུང་འབྲེལ་གྱི་ཁམས་ཁུལ་གྱི་སྐད་འཕྲིན་གྱི་སྤྱི་སྟེགས་ཤིག་ཏུ་གསར་འགྱུར་ཐོན་པ་ལྟར་ན། སྤྱི་ཟླ་དང་པོའི་ཚེས ༢༥ ཉིན། ཁམས་དར་རྩེ་མདོ་རུ་དཀར་མཛེས་ཁུལ་གྱི་དཔལ་ཡོན་དང་ཞི་མཐུན། བདེ་འཇགས་བཅས་ཀྱི་དགོན་སྡེར་མིང་བཏགས་སྒོ་བྱང་སྤྲོད་པ་དང་རྒྱལ་གཅེས་ཁྲིམས་སྲུང་གི་དཔེ་བཟང་གྲྭ་བཙུན་ལ་གཟེངས་བསྟོད་བྱེད་པའི་ཚོགས་འདུ་ཞེས་པ་ཞིག་འཚོགས་ཡོད་པ་ཁྱབ་བསྒྲགས་ཀྱིས། དགོན་པ་ཁག་ཅིག་དང་གྲྭ་བཙུན་ཁག་ཅིག་ལ་སྲིད་གཞུང་གི་ངོས་ནས་གཟེངས་རྟགས་སྤྲོད་རྒྱུ་ཐག་བཅད་བྱས་འདུག སྐབས་དེའི་ཚོགས་ཆེན་ཐོག་གཞུང་འབྲེལ་གྱི་མི་སྣའི་གཏམ་བཤད་བྱས་པའི་ནང་དུ། ཞིང་ཆེན་ཡོངས་ཀྱི་ཆོས་ལུགས་ལས་དོན་ཚོགས་འདུའི་དགོངས་དོན་ལག་བསྟར་གཏིང་ཟབ་བྱས་པ་དང་། ཆོས་ལུགས་ཀྲུང་གོ་ཅན་གྱི་ཁ་ཕྱོགས་མཐའ་འཁྱོངས་བྱེད་པ། དགོན་སྡེར་ཁྲིམས་ལྟར་ཚད་ལྡན་དོ་དམ་བྱེད་པའི་གྲུབ་འབྲས་སྲ་བརྟན་དུ་གཏོང་བ། སྔོན་ཐོན་ལ་བསྔགས་བརྗོད་བྱེད་ཅིང་ཐུན་མོང་གི་ངོས་འཛིན་གཅིག་ཏུ་འགྲིལ་བ་བཅས་བྱས་ནས་ཁུལ་ཡོངས་ཀྱི་ཆོས་ལུགས་ལས་དོན་གྱི་རྣམ་པ་གསར་པ་གཏོད་ཡོད་པ་དང་འབྲེལ་ནས།  ཁུལ་རིམ་པའི་དཔལ་ཡོན་དང་ཞི་མཐུན། བདེ་འཇགས་བཅས་ཀྱི་དགོན་སྡེ ༧༦ དང་རྒྱལ་གཅེས་ཁྲིམས་སྲུང་གི་དཔེ་བཟང་གྲྭ་བཙུན ༨༡༣ ལ་གཟེངས་བསྟོད་བྱ་རྒྱུའི་སྐོར་གྱི་བརྡ་ཁྱབ་སྤེལ་འདུགཐེངས་འདིའི་རྒྱ་ནག་གི་ཚོགས་འདུ་དེའི་ཐོག   ཁུལ་དེའི་དམར་ཤོག་ཚོགས་པའི་རྒྱུན་ལས་དང་འཐབ་ཕྱོགས་གཅིག་གྱུར་ལས་ཁུངས་ཀྱི་འགོ་གཙོ། དེ་བཞིན་ ཁུལ་རིམ་པའི་འབྲེལ་ཡོད་སྡེ་ཚན་གྱི་འགན་འཁུར་བ་གཙོ་བོ་དང་མི་རིགས་ཆོས་ལུགས་ལས་དོན་ཁང་གི་འགོ་གཙོ་སོགས་ཀྱི་མཚོན་པའི་ནང་བསྟན་མཐུན་ཚོགས་ཀྱི་དྲུང་ཡིག  གཟེངས་བསྟོད་ཐོབ་པའི་དཔལ་ཡོན་དང་ཞི་མཐུན། བདེ་འཇགས་བཅས་ཀྱི་དགོན་སྡེ་དང་རྒྱལ་གཅེས་ཁྲིམས་སྲུང་གི་དཔེ་བཟང་གྲྭ་བཙུན་གྱི་འཐུས་མི་བཅས་ཚོགས་འདུར་ཞུགས་ཡོད་པར་འཁོད་འདུག གོང་གི་གནད་དོན་དེ་དང་འབྲེལ་ནས། འདི་གའི་གསར་འགོད་པས་བཞུགས་སྒར་ཁུལ་གྱི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་ཉི་མ་འོད་ཟེར་ལགས་སུ་བཀའ་འདྲི་ཞུས་པར་ཁོང་གིས། རྒྱ་ནག་གིས་དུས་རྒྱུན་བོད་ཁུལ་དུ་འཐབ་བྱུས་འདྲ་མིན་སྤྱད་ནས་བོད་རིགས་མི་མང་ལ་བསླུ་བྲིད་གཏོང་གི་ཡོད་པར་འགྲེལ་བརྗོད་ཀྱིས།  ཐེངས་འདིར་དགོན་པ་གྲྭ་ཚང་དང་གྲྭ་བཙུན་ལ་དངུལ་དངོས་ཀྱི་གཟེངས་རྟགས་སྤྲོད་ཀྱི་ཡོད་ཟེར་བ་དེ་ཡང་གཙོ་བོ་རྒྱ་ནག་གི་བཀའ་རྒྱ་ལག་ལེན་ལ་ཁེལ་བའི་བོད་མི་རྣམས་ལ་གཞུང་འབྲེལ་གྱི་ཐོག་ནས་དཔེ་བཟང་གི་མི་སྣར་ངོས་འཛིན་བྱས་པའི་ཞི་བའི་བསླུ་བྲིད་ཀྱི་རྣམ་གྲངས་ཤིག་ཡིན་པར་ངོ་སྤྲོད་གནང་སོང་།

གཞིས་བཞུགས་རྩོམ་པ་པོ་གྲགས་ཅན་དང་རིག་གནས་འཆད་ཁྲིད་ཀྱི་དགེ་རྒན། རོང་བོ་དགེ་འདུན་ལྷུན་འགྲུབ་ལགས་རྒྱ་ནག་གིས་ཕྱི་ལོ་ ༢༠༢༠ ལོར་བཙན་ཁྲིད་བྱས་ཏེ་ད་ཆ་ལོ་གཅིག་ལྷག་ཕྱིན་ཡོད་ཀྱང་། ཁོང་རྒྱ་ནག་གི་བཙོན་ཁང་གང་དུ་ཡོད་པ་སོགས་ཀྱི་གནས་ཚུལ་ཅི་ཡང་གསལ་ཁ་ཆགས་མེད་པར་རང་སོར་གནས་ཡོད་པ་རེད། ཁ་སང་། བཞུགས་སྒར་དུ་རྟེན་གཞི་བྱས་པའི་བོད་གནས་ཉམས་ཞིབ་ཁང་གིས་རོང་བོ་དགེ་འདུན་ལྷུན་འགྲུབ་ལགས་དང་འབྲེལ་ནས་གནས་ཚུལ་གསར་བ་ཞིག་སྤེལ་བའི་ནང་དུ། ཕྱི་ལོ་ ༢༠༢༠ ལོའི་ཟླ་བ་༡༢ བའི་ཚེས་ ༢ ཉིན། ཁོང་རོང་བོ་དགོན་ཆེན་དང་ཐག་ཉེ་བའི་སྲང་ལམ་ཞིག་ཏུ་རྒྱ་ནག་གིས་ཁོང་འཛིན་བཟུང་བྱས་ཏེ་རླངས་ནག་པོ་ཞིག་གི་ནང་དུ་བཅུག་ནས་བཙན་ཁྲིད་བྱེད་བཞིན་ཉེ་འགྲམ་གྱི་ཚལ་བཙོང་མཁན་ཞིག་གིས་མཐོང་ཡོད་ཀྱང་། སྐབས་དེ་ནས་བཟུང་ཁོང་གར་ཡོད་གང་ཁྱེར་གྱི་གནས་ཚུལ་གཅིག་ཀྱང་ཤེས་རྟོགས་མེད་པར་གྱུར་ཡོད་པར་བརྗོད་འདུག དེ་སྔོན་ཁོང་རྒྱ་ནག་གིས་འཛིན་བཟུང་བྱེད་སྐབས་ཁོང་ནག་ཉེས་ཅི་ཞིག་ལ་ཁ་གཡར་གྱིས་འཛིན་བཟུང་བྱས་པ་ཤེས་རྟོགས་མེད་པར་གྱུར་ཡོད་ཀྱང་། ཕྱིས་སུ་གནས་ཚུལ་ཤེས་གསལ་ལྟར་ན། རྒྱ་ནག་གིས་ནང་བསྟན་རྒྱ་བསྒྱུར་གྱི་ལས་གཞི་དང་འབྲེལ་ནས། རེབ་གོང་རོང་བོ་ས་ཁུལ་དུ་དེར་འབྲེལ་གྱི་ཟབ་སྦྱོང་ཞིག་གོ་སྒྲིག་བྱས་པའི་སྐབས་སུ། རོང་བོ་དགེ་འདུན་ལྷུན་འགྲུབ་ལགས་ཀྱིས་ཀྱང་ཉམས་ཞུགས་གནང་ཡོད་པ་དང་། སྐབས་དེར་ཁོང་གིས་ནང་བསྟན་རྒྱ་བསྒྱུར་ཀྱི་ཟབ་ཁྲིད་པ་རྣམས་ལ་དོན་དངོས་སུ་ནང་བསྟན་རྒྱ་བསྒྱུར་ཟེར་བ་དེ་ཇི་ལྟ་བུ་ཞིག་ཡིན་མིན་གྱི་དྲི་བ་དྲིས་བ་དང་འབྲེལ་ནས་ཕན་ཚུན་གྱི་བར་དུ་ཚིག་རྩོད་ཅིག་བྱུང་ཡོད་པ་དང་འབྲེལ་བ་ཡོད་པ་ཞིག་ཡིན་པར་བརྗོད་འདུག གནད་དོན་དེ་བྱུང་ནས་ཉིན་ཤས་ཀྱི་རྗེས་སུ། ཁོང་རོང་བོ་དགོན་ཆེན་ནས་རོང་བོ་གྲོང་བརྡལ་དུ་རྟག་རིག་གི་འཛིན་གྲྭ་ཞིག་ལ་ཕེབས་བཞིན་པའི་ལམ་བར་ནས། རྒྱ་ནག་གིས་གསང་སྟབས་ཀྱིས་ཁོང་འཛིན་བཟུང་གིས་བཙན་ཁྲིད་བྱས་ཡོད་པར་ལུང་འདྲེན་གྱིས། ཕྱི་ལོ་ ༢༠༢༡ ལོའི་ཟླ་བ་ ༡༠ བའི་ཚེས་ ༢༧ ཉིན་ཁོང་གི་ནང་མིར་རྒྱ་ནག་གིས་ཁ་པར་ཞིག་བཏང་སྟེ། གང་མགྱོགས་རོང་བོ་དགེ་འདུན་ལྷུན་འགྲུབ་ལགས་ཀྱི་གནད་དོན་ཐག་གཅོད་བྱེད་རྒྱུ་ཡིན་པར་བརྗོད་ཀྱང་། དེའི་རྗེས་ནས་བཟུང་ཁོང་གི་གནས་སྟངས་གང་ཡང་གསལ་ཆ་དང་གྲགས་འགུལ་མེད་པར་གྱུར་ཡོད་པར་འཁོད་འདུག དེ་བཞིན་བོད་གནས་ཉམས་ཞིབ་ཁང་གིས། རོང་བོ་དགེ་འདུན་ལྷུན་འགྲུབ་ལགས་ཀྱིས་གོང་རིམ་གྱི་ཟབ་ཁྲིད་པར་དྲི་བ་དྲིས་བའི་ནང་བསྟན་རྒྱ་བསྒྱུར་གྱི་གནད་དོན་དེ་ནི། ཕྱི་ལོ་༢༠༡༧ ལོའི་རྒྱ་ནག་མི་མང་འཐུས་མི་ཚོགས་ཆེན་སྐབས་ ༡༩ བའི་ཐོག་རྒྱ་ནག་གིས་གཏན་འབེབས་བྱས་པའི་སྲིད་བྱུས་ཤིག་ཡིན་པ་ཞིང་། ཕྱིས་སུ་རྒྱ་ནག་གི་འཐབ་ཤོག་གཅིག་གྱུར་ལས་ཁུངས་ཀྱིས་སྲིད་བྱུས་འདིར་གཙིག་འཛིན་གྱིས་བོད་ཁུལ་དུ་ཆོས་ལུགས་ཀྱི་ལས་དོན་ཡོད་ཚད་ལ་སྟངས་འཛིན་བྱེད་འགོ་ཚུགས་ཡོད་པ་ཞིག་ཡིན་པར་འགྲེལ་བརྗོད་གནང་འདུག ད་ལྟའི་ཆར་རྒྱ་ནག་གི་ནང་བསྟན་རྒྱ་བསྒྱུར་གྱི་སྲིད་བྱུས་ཟེར་བ་དེ་དགོན་པ་གྲྭ་ཚང་ཁག་གི་ར་བ་ལས་བརྒལ་ཏེ། ཤེས་ཡོན་གྱི་ལྟེ་གནས་ཁག་གང་སར་ཁྱབ་བརྡལ་དུ་འགྲོ་མུས་ཡིན་པ་མ་ཟད། ད་ཆ་དངོས་སུ་བོད་བརྒྱུད་ནང་བསྟན་གྱི་དཔེ་ཆ་ཁག་རྒྱ་ཡིག་ཏུ་སྒྱུར་རྒྱུའི་ཐད་ནས་གྲོས་བསྡུར་བྱེད་མུས་ཡིན་པར་ལུང་འདྲེན་གྱིས། རྒྱ་ནག་གིས་རོང་བོ་དགེ་འདུན་ལྷུན་འགྲུབ་ལགས་ཀྱི་ནང་མིར་ཁ་པར་བཏང་ནས་ཁོང་གི་གནད་དོན་ཐག་གཅོད་བྱེད་རྒྱུ་ཡིན་པར་བསྒྲགས་པའི་ཉིན་མོ་དེར། རྒྱ་ནག་གིས་རོང་བོ་དགོན་ཆེན་དང་ས་ཐག་ཉེ་བའི་ཟི་ལིང་གྲོང་ཁྱེར་དུ་ཉིན་གསུམ་གྱི་རིང་ལ་མཚོ་སྔོན་ནང་བསྟན་སློབ་གྲྭ་ཆེན་མོར་ནང་བསྟན་བོད་བསྒྱུར་གྱི་ཟབ་སྦྱོང་ཚོགས་འདུ་ཞིག་བསྡུས་ཡོད་པ་དང་། སྐབས་དེར་རོང་བོ་དགོན་ཆེན་གྱི་སྐུ་ཚབ་མི་སྣ་སོགས་ཀྱི་མཚོན་པའི་བོད་ཁུལ་གྱི་བླ་མ་དང་དགེ་རྒན། དེ་བཞིན་རྒྱ་ནག་གི་གཞུང་འབྲེལ་ལས་བྱེད་སོགས་གྲངས་ ༥༠༠ ལྷག་གིས་ཚོགས་ཞུགས་བྱས་ཏེ། འབྲེལ་ཡོད་ཀྱི་རྒྱུ་ཆ་༣༥ ལྷག་གི་ཐོག་ནས་གྲོས་བསྡུར་བྱས་ཡོད་པ་མངོན་གསལ་གནང་འདུག རོང་བོ་དགེ་འདུན་ལྷུན་འགྲུབ་ལགས་འཛིན་བཟུང་མ་བྱས་པའི་ཟླ་བ་གཉིས་ཀྱི་གོང་དུ། ཁོང་གིས་འཁོར་བ་ཞེས་པའི་ཆེད་དེབ་ཅིག་པར་དཔར་སྐྲུན་བྱས་ཡོད་པ་དང་། སྐབས་དེར་ཁོང་གིས་མང་ཚོགས་ཀྱིས་དཔེ་དེབ་དེར་རྒྱབ་སྐྱོར་བྱེད་དགོས་ལུགས་ཀྱི་སྐུལ་མ་གནང་སྟེ། དེའི་ནང་དུ་གོང་རིམ་གྱི་བཀའ་རྒྱ་ལ་ལྟོས་མེད་ཀྱིས་དངོས་བདེན་གྱི་གནད་དོན་མང་པོ་ཞིག་འཁོད་ཡོད་པར་གསལ་བཤད་གནང་ཡོད་པར་འཁོད་འདུག རྒྱ་ནག་གིས་ཁོང་འཛིན་བཟུང་བྱས་པ་ནས་བཟུང་། ཁོང་གི་སྒེར་གཉེར་གྱི་བཙན་པོ་དྲྭ་བ་ཞེས་པ་དེ་ཡང་རྒྱ་ནག་གིས་བཀག་སྡོམ་བྱས་ཡོད་པ་ཡོངས་གྲགས་ཆགས་ཡོད་པ་མ་ཟད། ཉེ་སྔོན་བོད་ཀྱི་སྐད་ཡིག་གི་ལས་འགུལ་བ་དང་ཆབ་སྲིད་བཙོན་ཟུར་བཀྲ་ཤིས་དབང་ཕྱུག་ལགས་ཀྱིས་ཀྱང་བོད་ནང་གི་བོད་ཡིག་གི་དྲྭ་བ་ཁག་ཅིག་སྒོ་འབྱེད་བྱེད་མི་ཐུབ་པར་གྱུར་ཡོད་པ་པར་བླངས་ནས་ཁོང་གི་ཝེ་པོ་དྲྭ་ལམ་དུ་བཞག་པའི་ནང་དུ་ཡང་བཙན་པོ་དྲྭ་བ་འཁོད་ཡོད་པ་རེད། གཞི་རྩའི་ཉེ་སྔོན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱལ་ལྟེ་གནས་ཁང་གིས་ཀྱང་རྒྱ་ནག་གིས་བོད་ཁུལ་གྱི་ཤེས་ལྡན་མི་སྣར་དམིགས་བསལ་གྱིས་དྲག་གནོན་བྱེད་བཞིན་པའི་གནད་དོན་དང་འབྲེལ་ནས་གནས་ཚུལ་སྤེལ་བའི་ནང་དུ་ཡང་རོང་བོ་དགེ་འདུན་ལྷུན་འགྲུབ་ལགས་འཁོད་ཡོད་པ་དང་། སྐབས་དེར་ཉམས་ཞིབ་པ་ཉི་མ་འོད་ཟེར་ལགས་ཀྱིས་ རྒྱ་ནག་གིས་དུས་རྒྱུན་ནས་བོད་ཀྱི་རིག་གཞུང་རྩ་མེད་བཏང་སྟེ་བོད་ཀྱི་ངོ་བོ་རྒྱ་བསྒྱུར་གྱི་སྲིད་བྱུས་ལག་བསྟར་བྱེད་བཞིན་པའི་ལམ་ལུགས་ཀྱི་འོག་ཏུ་བོད་ཁུལ་གྱི་ཤེས་ལྡན་མི་སྣ་དང་རིག་གཞུང་ལ་ཤ་ཞེན་ཡོད་པའི་བོད་མི་ཚོར་སྡང་སེམས་ཆེན་པོས་བཙན་ཁྲིད་བཙོན་འཇུག་བྱེད་བཞིན་པ་ཞིག་ཡིན་པར་གསུངས་ཡོད།

པེ་ཅིང་གི་དགུན་དུས་ཨོ་རྩལ་འགྲན་བསྡུར་འཚོགས་ལ་ཉེ་བ་དང་བསྟུན་འདི་ལོའི་འགྲན་བསྡུར་ཐོག་བོད་མི་གཉིས་ནས་མཉམ་ཞུགས་གནང་རྒྱུ་ཡིན་པ་དང་ཁོང་གཉིས་ནི་དགུན་དུས་ཨོ་རྩལ་ནང་མཉམ་ཞུགས་གནང་མཁན་བོད་མི་ཐོག་མ་དེ་ཆགས་ཀྱི་ཡོད་པ་རེད། བརྒྱུད་ལམ་ཁག་ཏུ་ཐོན་པའི་གནས་ཚུལ་ལ་གཞིགས་ན། ཟླ་བ་རྗེས་མར་འཚོགས་རྒྱུའི་རྒྱ་ནག་གི་དགུན་དུས་ཨོ་རྩལ་ཐོག་ལོ་ན་ ༡༨ སོན་པ་ཆབ་མདོ་ནས་ཡིན་པ་དབྱངས་ཅན་ལྷ་མོ་དང་ནག་ཆུ་ནས་ཡིན་པ་ཚེ་རིང་དགྲ་འདུལ་གཉིས་ snowboarding དང་ cross-country skiing ཞེས་གངས་ཤུད་རྩེད་འགྲན་ནང་འདེམས་སྒྲུག་བྱས་འདུག དབྱངས་ཅན་ལྷ་མོ་ལགས་ནི་དེ་སྔ་ཁོང་རྐང་རྩེད་སྤོ་ལོ་རྩེད་མཁན་ཞིག་ཆགས་ཀྱི་ཡོད་པ་དང་། དགུན་དུས་ཨོ་རྩལ་དང་འབྲེལ་ཁོང་གིས་པེ་ཅིང་ཨོ་རྩལ་ནང་རྩེད་འགྲན་སླད་འདེམས་སྒྲུག་བྱུང་བར་ཧ་ཅང་དགའ་བོ་བྱུང་སོང་བ་དང་རང་ཉིད་ནས་རྩེད་འགྲན་ཆེད་དུ་གྲ་སྒྲིག་ཡག་པོ་ཞིག་གནང་རྒྱུ་དང་རང་རྒྱལ་ཁབ་ཆེད་སོ་སོ་ནས་གང་ལེགས་གནང་ཐབས་ལ་འབད་ཀྱི་ཡིན་ཞེས་གསུངས་འདུག རྩ་བའི་རྒྱ་ནག་གི་པེ་ཅིན་དགུན་དུས་ཨོ་རྩལ་ལ་བཙན་བྱོལ་བོད་མི་གཙོས་པའི་ཡུ་གུར་དང་དེ་བཞིན་རྒྱལ་སྤྱིའི་ཁྲོད་པེ་ཅིང་གི་དགུན་དུས་ཨོ་རྩལ་ཕྱིར་འཐེན་དགོས་པའི་ངོ་རྒོལ་བསྟུད་མར་གནང་མུས་ཡིན་པ་དང་། ལྷག་པར་ཨ་རི་གཙོས་ཁེ་ན་ཌ་དང་དབྱིན་ཡུལ། ཨོ་སི་ཀྲོ་ལི་ཡ། ལི་ཐོ་ནི་ཡ། ནི་ཌར་ལན་ཌི་སོགས་རྒྱལ་ཁབ་ཁག་གཅིག་ནས་རྒྱ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བའི་བྱ་སྤྱོད་ལ་སྐྱོན་བརྗོད་མཚོན་ཕྱིར་ཨོ་རྩལ་འགྲན་ཚོགས་སྐབས་གཞུང་འབྲེལ་མི་སྣ་གཏང་རྒྱུ་མིན་པ་ཡོངས་གྲགས་གནང་ཡོད། གཞུང་འབྲེལ་སྐུ་ཚབ་གཏང་རྒྱུ་མིན་པའི་ཐོ་གཞུང་ནང་ཁ་སང་ Portugal ནས་ཀྱང་པེ་ཅིང་གི་དགུན་དུས་ཨོ་རྩལ་འགྲན་ཚོགས་ཀྱི་སྒོ་འབྱེད་དང་མཇུག་སྡོམ་མཛད་སྒོར་གཞུང་འབྲེལ་སྐུ་ཚབ་གཏང་རྒྱུ་མིན་པའི་གསལ་བསྒྲགས་གནང་འདུག  དེ་འབྲེལ་ Portugal གྱི་ཕྱི་འབྲེལ་བློན་ཆེན་སྐུ་ཞབས་ Augusto Santos Silva མཆོག་གིས་ཡུལ་དེའི་ནང་གི་ད་ལྟའི་ཆབ་སྲིད་ཀྱི་གནས་སྟངས་དང་ལྷག་པར་ད་ལྟའི་གནས་བབ་ལ་ཡོ་རོབ་མཐུན་ཚོགས་ཀྱི་ཆིག་སྒྲིལ། དེ་བཞིན་དགུན་དུས་ཨོ་རྩལ་འགྲན་བསྡུར་དེ་རྒྱལ་ཡོངས་ཀྱི་རྩེད་འགྲན་གཙོ་བོ་ཞིག་མིན་པའི་རྒྱུ་མཚན་གསུངས་འདུག ཉེ་ལམ་ཅེཀ་སྤྱི་མཐུན་རྒྱལ་ཁབ་ནང་དུ་ཡོད་པའི་ Kaputin ཞེས་པའི་ཚོགས་སྡེའི་ལས་འགུལ་བ་ཁག་གཅིག་གིས་ཁུལ་དེར་ཡོད་པའི་རྒྱ་ནག་གཞུང་ཚབ་མདུན་དུ་ཞི་ཅིན་ཕིང་གི་འདྲ་གཟུགས་དམར་ཧྲེང་ཞིག་དང་ཨོ་ལམ་པིཀ་ཡི་མཚོན་རྟགས་ཞགས་ཐག་འགྲེམས་སྟོན་བརྒྱུད་ཨོ་རྩལ་ཕྱིར་འཐེན་དང་དེ་བཞིན་ཡུ་གུར་ངལ་རྩོལ་དང་འབྲེལ་ཐོན་རྫས་ཁག་བཀག་སྡོམ། རྒྱ་ནག་གིས་བོད་གཙོས་ཧོང་ཀོང་དང་ཐེ་ཝན་ཐད་ནོར་འཁྲུལ་ཅན་གྱི་སྲིད་བྱུས་ལག་བསྟར་བྱེད་བཞིན་པར་ངོ་རྒོལ་གནང་འདུག