Monthly Archives: April, 2022

ཉན་པ།: Listen ཕབ་ལེན། Download རྒྱ་གར་གྲོས་ཚོགས་གོང་འོག་དང་གཞུང་འབྲེལ་མི་སྣ་ཁག་ཅིག་བཞུགས་སྒར་དུ་འཚམས་གཟིགས། སྲིད་སྐྱོང་མཆོག་གིས་བོད་པའི་མང་གཙོའི་འཕེལ་རིམ་དང་ཐབས་བྱུས་སྐོར་གསུང་བཤད་གནང་བ། རྒྱལ་ཚོགས་ཀྱི་སྐུ་ཚབ་ཚོགས་ཆུང་ཞིག་རྒྱ་ནག་ཏུ་འབྱོར་འདུག འཇམ་དཔལ་དབང་འདུས་ལགས་ཀྱི་ལྷོ་ཕྱོགས་ཁུལ་གྱི་འཚམས་གཟིགས་མཇུག་སྒྲིལ། ཧོང་ཀོང་ནང་གི་གསར་འགོད་རང་དབང་གནས་སྟངས་ཛ་དྲག་གྱུར་བར་མངོན་གསལ། Wednesday 27/04/2022 Indian parliamentary delegation visits Central Tibetan Administration A New Strategy for The Tibetan Movement: Sikyong speaks at NED program in DC UN team in China ahead of visit by human rights chief Arunachal Pradesh religion officer concludes south India Tibetan settlements visit Free media in Hong Kong almost completely dismantled –report

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་རྒྱལ་ས་ Washington DC ནང་དུ་གཞུང་འབྲེལ་འཚམས་གནང་བཞིན་པ་ལྟར་ཁ་སང་སྲིད་སྐྱོང་མཆོག་གིས་ཁུལ་དེར་རྟེན་གཞི་བྱས་པའི་ National Endowment for Democracy ཞེས་རྒྱལ་ཡོངས་མང་གཙོ་གོང་འཕེལ་བསྟི་གནས་ཁང་གིས་གོ་སྒྲིག་ཞུས་དོན་བཞིན་བོད་པའི་མང་གཙོའི་འཕེལ་རིམ་ཁྲོད་ཀྱི་ཐབས་བྱུས་གསར་པ་ཞེས་པའི་བརྗོད་ཐོག་གསུང་བཤད་གནང་ཡོད། སྐབས་དེའི་མཛད་རིམ་ཐོག་རྒྱལ་ཡོངས་མང་གཙོ་གོང་འཕེལ་བསྟི་གནས་ཁང་གི་འགན་འཛིན་སྐུ་ཞབས་ Damon Wilson ལགས་གཙོས་འབྲེལ་ཡོད་ལས་བྱེད་རྣམ་པ་དང་། རྒྱ་རིགས་འགྲོ་བ་མིའི་ཐོབ་ཐང་རྩོད་ལེན་པ་ Yang Jianli ལགས་གཙོས་རྒྱ་རིགས་དང་། རྒྱལ་སྤྱིའི་རྒྱལ་ཁབ་འདྲ་མིན་ནང་མང་གཙོ་དང་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན། འཐབ་རྩོད་པ་སོགས་གནད་ཡོད་མི་སྣ་མི་ཉུང་བ་ཞིག་ལྷན་ཞུགས་གནང་ཡོད་པ་རེད། སྐབས་དེར་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་ལ་༸ཞབས་སོར་བདེ་བར་འཁོད་ནས་ལོ་གཅིག་ཙམ་ལས་མ་སོང་བའི་མཚམས་སུ་བཙན་བྱོལ་བོད་མིའི་ལས་དོན་ཚང་མ་མང་གཙོའི་ལམ་སྲོལ་ཐོག་ཕེབས་རྒྱུའི་སྲོལ་བཟང་གཏོད་གནང་མཛད་པ་སོགས་ངོ་སྤྲོད་དང་སྦྲགས། བར་སྐབས་ཤིག་ལ་བཙན་བྱོལ་བོད་མིའི་མང་གཙོའི་ལས་དོན་ཐོག་དཀའ་ངལ་ཁག་ཅིག་འཕྲད་ཡོད་ཀྱང་སྤྱི་ཡོངས་ནས་ལས་དོན་བྱེད་ཕྱོགས་ཁག་མང་གཙོ་ཚད་དང་ལྡན་པ་ཞིག་གི་ཐོག་ནས་ཕེབས་བཞིན་ཡོད་པ་གསུངས་འདུག  དེ་བཞིན་རྒྱ་ནག་གི་ཕྱི་འབྲེལ་སྲིད་བྱུས་དང་འབྲེལ་ཏེ་ཞི་ཅིན་ཕིང་གི་དམིགས་ཡུལ་གཙོ་བོ་དེ་དབང་ཆ་ཚང་མ་གཅིག་བསྡུས་བྱེད་རྒྱུ་དེ་ཡིན་པ་དང་། འདས་པའི་ལོ་བཞི་ལྔའི་ནང་ལ་བོད་དང་ཧོང་ཀོང་། དེ་བཞིན་ཤིན་ཅང་། ནང་སོག་བཅས་ཀྱི་ནང་ལག་བསྟར་བྱས་པའི་དྲག་པོའི་སྲིད་བྱུས་ཁག་ནས་རྟོགས་ཐུབ་པར་འགྲེལ་བརྗོད་དང་སྦྲགས། དལྟའི་ཆར་ང་ཚོའི་ངོས་ནས་རེ་བ་དེ་ཙམ་མཐོང་གི་མེད་པ་དེ་ལྟར་ནའང་། བོད་ཀྱི་འཐབ་རྩོད་ཐོག་ལ་ མུ་མཐུད་ནས་འབད་བརྩོན་གནང་རྒྱུ་དང་། ད་ལྟའི་ཡུཀ་རེན་ནང་གི་ཆབ་སྲིད་གནས་སྟངས་དབང་གིས་ཡོང་རྒྱུའི་ཟླ་བ་གསུམ་ཙམ་གྱི་རྗེས་སུ་རྒྱ་ནག་གི་སྲིད་བྱུས་ངོ་མ་གང་ཡིན་གསལ་ཁ་ཞིག་ཡོང་ངེས་ཡིན་པས་ང་ཚོའི་ངོས་ནས་རེ་བ་ནམ་ཡང་དོར་ཐབས་མེད་ཅེས་གསུངས་ཡོད། དེ་བཞིན་ད་ལྟའི་རྒྱ་ནག་གི་བྱེད་བབ་ཁག་ལ་ཨ་རིའི་ངོས་ནས་གདོང་ལེན་གནང་བཞིན་པ་མ་ཟད་ད་ཆ་ཡོ་རོབ་ཁུལ་ནས་ཀྱང་དེ་མཚུངས་ཀྱི་བསམ་བློ་གཏོང་མཁན་མང་དུ་འགྲོ་བཞིན་པ་དེ་ནི་བཟང་ཕྱོགས་ཀྱི་འགྱུར་བ་ཞིག་ཡིན་པ་སོགས་གསུངས་འདུག་ལ། ལྷག་པར་དུ་བོད་ཀྱི་གནད་དོན་དང་འབྲེལ་ནས་ད་ཆ་ང་ཚོས་༸ཀུན་གཟིགས་༸པཎ་ཆེན་རིན་པོ་ཆེའི་༸སྐུའི་འཁྲུངས་སྐར་སྲུང་བརྩི་ཞུ་བཞིན་ཡོད་ཀྱང་། རྒྱ་ནག་གཞུང་གིས་རིན་པོ་ཆེ་འཛིན་བཟུང་བཙན་ཁྲིད་བྱས་པ་ནས་བཟུང་ད་བར་རིན་པོ་ཆེའི་གནས་སྟངས་ཐོག་གསལ་ཁ་གང་ཡང་མེད་སྟབས། རིན་པོ་ཆེ་མཆོག་༸སྐུ་འཚོ་ཞུགས་ཡིན་མིན་གྱི་གནས་སྟངས་ཡང་ཤེས་ཀྱི་མེད་པ་སོགས་འགྲེལ་བརྗོད་གནང་སྟེ། རྒྱ་ནག་གཞུང་ནས་རིན་པོ་ཆེའི་གནད་དོན་བརྒྱུད་མ་འོངས་པར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་པའི་བླ་སྤྲུལ་ཡང་སྲིད་ཀྱི་གནད་དོན་ཐོག་ཐེ་བྱུས་བྱ་འཆར་ཡོད་ཀྱང་། ཆོས་དང་ཡང་སྲིད་ཀྱི་གནང་སྒོ་ཁག་ལ་ཡིད་ཆེས་མེད་མཁན་གྱི་རྒྱ་ནག་གཞུང་ལ་བོད་པའི་བླ་སྤྲུལ་ངོས་འཛིན་ཞུ་རྒྱུའི་གཞི་རྩའི་ཐོབ་ཐང་རྩ་བ་ཉིད་ནས་མེད་ཅེས་ནན་པོ་གསུངས་ཡོད། དེ་བཞིན་སྐབས་དེར་ཚོགས་བཅར་བ་ཁག་ཅིག་ནས་སྲིད་སྐྱོང་མཆོག་གིས་རྒྱ་རིགས་མང་གཙོ་དོན་གཉེར་བ་ཚོ་དང་མཉམ་ལས་གནང་འཆར་དང་། བོད་རྒྱ་འབྲེལ་མོལ་བསྐྱར་གསོ་ཐུབ་རྒྱུའི་རེ་བ་ཡོད་དམ་ཞེས་སོགས་ཀྱི་ བཀའ་འདྲི་ཁག་ཅིག་ཞུས་ཡོད་པ་ལྟར་སྲིད་སྐྱོང་མཆོག་ནས་བོད་མི་དང་རྒྱ་རིགས་མང་གཙོ་དོན་གཉེར་བ། དེ་བཞིིན་ཧོང་ཀོང་མང་གཙོའི་ལས་འགུལ་བ་སོགས་ཀྱི་འཐབ་རྩོད་ཀྱི་ངོ་བོ་ལ་ཕྲན་བུའི་མི་འདྲ་བའི་ཆ་འདྲ་ཡོད་ཀྱང་། ཁ་གཏད་གཅོག་ས་རྒྱ་ནག་གཞུང་ཡིན་པ་དེ་གཅིག་མཚུངས་ཡིན་པར་བརྟེན་ང་ཚོའི་ངོས་ནས་མཐུན་ཕྱོགས་ཀྱི་གནད་དོན་ཁག་གཞི་རྩར་བཟུང་སྟེ་རྒྱ་ནག་འདི་འགན་འཁུར་ལྡན་པ་ཞིག་བཟོ་རྒྱུ་ཡོད་སྐོར་གསུངས་འདུག སྲིད་སྐྱོང་སྤེན་པ་ཚེ་རིང་མཆོག་ཁ་སང་རྒྱལ་ཡོངས་མང་གཙོ་གོང་འཕེལ་བསྟི་གནས་ཁང་གི་མཛད་རིམ་ཐོག་མ་ཕེབས་པའི་གོང་ལ་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ Jan Lipavský མཆོག་དང་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་སྟེ་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་གཙོས་ད་ལྟའི་བོད་ནང་གི་གནས་སྟངས་སྤྱི་ཡོངས་ཐོག་གྲོས་བསྡུར་གནང་ཡོད།

རྒྱ་གར་སྲིད་དོན་ཚོགས་པ་འདྲ་མིན་གྱི་གྲོས་ཚོགས་འཐུས་མི་བཅུ་གཅིག་གཙོས་རྒྱ་གར་གཞུང་དང་ཧི་མཱ་ཅལ་མངའ་སྡེ་གཞུང་གི་གནད་ཡོད་མི་སྣ་ཁག་ཅིག་དང་དེ་དག་གི་སྐུ་འཁོར་ནང་མི་བཅས་ཁྱོན་མི་གྲངས་ ༤༠ ཡས་མས་ཤིག་རྒྱ་གར་ཧི་མཱ་ཅལ་མངའ་སྡེ་ནང་གཞུང་འབྲེལ་ལས་དོན་དང་སླད་ཆེད་ཕེབས་གནང་བ་དང་བསྟུན་ཁ་སང་ཕྱི་དྲོར་བཞུགས་སྒར་བོད་མིའི་སྒྲིག་འཛུགས་དང་ཐེག་ཆེན་ཆོས་གླིང་གཙུག་ལག་ཁང་སོགས་ལ་འཚམས་གཟིགས་ཕེབས་སྐབས་བཀའ་སྤྱི་གཉིས་ནས་སྣེ་ལེན་གཟབ་རྒྱས་ཞུས་ཡོད་པ་རེད།བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དབུས་སྤྱི་འཐུས་རྒྱུན་ལས་དང་ཚོགས་དྲུང་ལས་ཁུངས་ཀྱིས་བོད་མི་མང་སྤྱི་འཐུས་ལྷན་ཚོགས་སུ་སྣེ་ལེན་གཟབ་རྒྱས་ཞུས་ཏེ་སྤྱི་འཐུས་རྒྱུན་ལས་ཚོགས་ཁང་ནང་བོད་མིའི་རྩ་དོན་དང་འབྲེལ་ནས་བཀའ་མོལ་གནང་བ་དང་། རྗེས་སུ་གྲོགས་ཚོགས་སུ་གདན་ཞུ་གནང་ནས་ལས་དོན་གནང་ཕྱོགས་སོགས་ཞིབ་ཕྲ་ངོ་སྤྲོད་གནང་ཡོད། སྐབས་དེར་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཁོང་རྣམ་པས་བོད་ཀྱི་གནད་དོན་དང་འབྲེལ་ནས་༸གོང་ས་མཆོག་བཞུགས་སྒར་དུ་༸སྐུ་བཞུགས་མཛད་པ་འདིས་རྒྱ་གར་རྒྱལ་ཡོངས་ལ་བྱིན་རླབས་ཆེན་པོ་ཞིག་ཐོབ་པ་མ་ཟད་རྒྱ་གར་གྱི་མཚན་སྙན་ཡང་ཆེ་རུ་ཕྱིན་ཡོད་སྐོར་གསུངས་སོང་ཞེས་འགྲེལ་བརྗོད་དང་སྦྲགས། ལྷག་དོན་ཚོགས་གཙོའི་ངོས་ནས་གཞིས་བཞུགས་བོད་མིའི་དཀའ་ངལ་སེལ་ཐབས་དང་དང་འབྲེལ་བོད་དོན་དོན་བདེན་མཐའ་སེལ་ཐབས་དང་། བོད་མིའི་ཆོས་དང་རིག་གཞུང་། ལེགས་བྱང་། སྐད་ཡིག་སོགས་སྲུང་སྐྱོབ་གནང་བར་མཐུན་འགྱུར་རྒྱབ་སྐྱོར་ཤུགས་ཆེ་གནང་ཡོད། དེས་ན་རྒྱ་གར་གཞུང་མང་གཉིས་ནི་ང་ཚོ་བོད་མིར་ཧ་ཅང་གི་བཀའ་དྲིན་ཆེན་པོ་ཡིན་ཞེས་ཞུས་ཡོད་པ་རེད། ནུབ་བྷེང་གྷལ་མངའ་ཁོངས་ནས་ཡིན་པའི་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ Shri. Sunil Kumar Mondal མཆོག་ལ་ཐེངས་འདིའི་འཚམས་གཟིགས་དང་འབྲེལ་ཏེ་གཟིགས་ཚུལ་དང་། བོད་དོན་སླད་དགོངས་པ་གང་ཞིག་ཡོད་དམ་ཞེས་བཀའ་འདྲི་ཞུས་པར་བཞུགས་སྒར་དུ་བཅར་དོན་གཙོ་བོ་ནི་༸གོང་ས་མཆོག་དང་མཇལ་མོལ་ཞུ་རྒྱུ་དང་བོད་མིའི་སྒྲིག་འཛུགས་ཀྱི་འགྲོ་སྟངས་འགྲོ་ལུགས་ལ་གཟིགས་ཞིབ་ཆེད་ཡིན་པར་གསུངས་སོང་བ་དང་འབྲེལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་མཇལ་དཀའ་བའི་ཚད་མཐོའི་གནད་ཡོད་མི་སྣ་ཞིག་ཡིན་པ་དང་། རྒྱ་ནག་གཞུང་གིས་བོད་དུ་བཙན་འཛུལ་བྱས་པ་ནས་བཟུང་སྟེ་རྒྱ་གར་གཞུང་ནི་བོད་མི་དང་མཉམ་དུ་ཡོད་པ་ལྟར་དུས་ད་ལྟ་དང་མ་འོངས་པ་ལའང་རྒྱ་གར་གཞུང་མང་གཉིས་ནི་བོད་མི་དང་ལྷན་དུ་ཡོད་ངེས་རེད་ཅེས་གསུངས་ཡོད། རྒྱ་གར་གཞུང་འབྲེལ་གྱི་གནད་ཡོད་མི་སྣས་བོད་མིའི་སྒྲིག་འཛུགས་སུ་འཚམས་གཟིགས་གྲུབ་པའི་རྗེས་སུ་ཐེག་ཆེན་ཆོས་གླིང་གཙུག་ལག་ཁང་དུ་མཆོད་མཇལ་ལ་ཆེད་ཕེབས་གནང་བ་དང་། དེའི་རྗེས་སུ་བོད་མིའི་སྒྲིག་འཛུགས་བཀའ་ཤག་ནས་བོད་ཀྱི་ཟློས་གར་ཚོགས་ཁང་དུ་སྐུ་མགྲོན་རྣམ་པར་རིག་གཞུང་གཞས་སྣ་ཁག་གཅིག་གཟིགས་འབུལ་དང་བཅས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། སྐབས་དེར་བོད་མིའི་སྒྲིག་འཛུགས་ཀྱི་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས། དེ་བཞིན་དྷ་ས་ས་གནས་འགོ་འཛིན་ཀུན་དགའ་ཚེ་རིང་ལགས་བཅས་ཆེད་བཅར་ཞུས་ཡོད། སྐབས་དེར་བོད་མིའི་སྒྲིག་འཛུགས་ཀྱི་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་རྒྱ་གར་གཞུང་མང་གཉིས་ནས་འདས་པའི་ལོ་ངོ་ ༦༠ ལྷག་རིང་བཙན་བྱོལ་བོད་མི་རྣམས་ལ་རྒྱབ་སྐྱོར་དང་རོགས་རམ་གཡོ་མེད་གནང་བར་བཀའ་དྲིན་རྗེས་དྲན་ཞུས་པ་དང་ཆབས་ཅིག བོད་མི་རྣམས་ཀྱིས་ཀྱང་རང་དབང་ངང་ནས་བོད་ཀྱི་ཆོས་དང་རིག་གཞུང་། ལེགས་བྱང་བཅས་པ་མི་ཉམས་རྒྱུན་འཛིན་ཞུས་ཡོད་སྐོར་བཅས་གསུངས་སོང་། དེ་བཞིན་ཁ་ཉིན་ཕྱི་ཚེས་ ༢༥ ཉིན་ཨོ་རི་ས་མངའ་སྡེའི་ཁོངས་དང་བྷི་ཇེ་ཌི་སྲིད་དོན་ཚོགས་པ་ནས་ཡིན་པའི་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་ Muzibulla Khan ལགས་དང་། ཆ་ཏི་སི་གྷར་མངའ་སྡེའི་ཁོངས་དང་ཀོང་རེ་སི་སྲིད་དོན་ཚོགས་པ་ནས་ཡིན་པའི་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་ K. T. S. Tulsi ལགས་རྣམ་གཉིས་སོགས་བོད་མི་མང་སྤྱི་འཐུས་ལྷན་ཁང་དུ་ཆེད་ཕེབས་ཀྱིས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཚོགས་གཙོའི་ལས་ཁུངས་སུ་སྣེ་ལེན་དང་མཇལ་འཕྲད་ཞུས་ཡོད་པ་རེད།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོང་ཐང་གཙོ་འཛིན་མཆོག་རིང་མིན་ཕྱི་ཟླ་ ༥ པའི་ནང་ཤིན་ཅང་གཙོ་གྱུར་རྒྱ་ནག་ནང་གི་འགྲོ་བ་ཐོབ་ཐང་གི་གནས་སྟངས་རྟོག་ཞིབ་སླད་ཕེབས་གཏན་ཁེལ་ཡོད་པ་དང་འབྲེལ་ཁ་ཉིན་རྒྱལ་ཚོགས་ཀྱི་སྐུ་ཚབ་ཚོགས་ཆུང་ཞིག་རྒྱ་ནག་ནང་སྔ་རོལ་དུ་ཕེབས་འབྱོར་བྱུང་འདུག འདི་ལོའི་ཕྱི་ཟླ་ ༣ ཚེས་ ༨ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་ལྕམ་སྐུ་ Michelle Bachlet མཆོག་ནས་རིང་མིན་ཕྱི་ཟླ་ ༥ ནང་ཤིན་ཅང་གཙོ་བོར་གྱུར་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཞན་པའི་ས་ཁུལ་ཁག་ཏུ་སྐོར་སྐྱོད་གནང་གཏན་ཁེལ་བ་ཡོངས་གྲགས་གནང་ཡོད་པའི་ཁྲོད། དེ་རིང་བརྒྱུད་ལམ་ཁག་ཏུ་དེ་འབྲེལ་གནས་ཚུལ་ཐོན་པར་ཁ་ཉིན་རེས་གཟའ་ཟླ་བའི་ཉིན་རྒྱལ་ཚོགས་ཀྱི་སྐུ་ཚབ་ཚོགས་མི་ལྔ་ལས་གྲུབ་པའི་ཚོགས་ཆུང་ཞིག་རྒྱ་ནག་ནང་ལྕམ་སྐུ་ Bachlet མཆོག་གི་སྐོར་སྐྱོད་གྲ་སྒྲིག་དང་འབྲེལ་ནས་སྔོན་ཚོད་ནས་ཕེབས་འབྱོར་གྱིས་ད་ཆ་ཁོང་རྣམས་རྒྱ་ནག་གི་ Guangzhou གྲོང་ཁྱེར་ནང་ཟུར་བཀག་གནང་བཞིན་འདུག ཚོགས་ཆུང་དེ་གཙོ་བོ་རྒྱ་ནག་གཞུང་གི་ངོས་ནས་གདན་འདྲེམ་ཞུས་དོན་ལྟར་ཕེབས་པ་ཞིག་ཆགས་ཡོད་ཅིང་། ཁོང་རྣམས་ཀྱིས་ཕྱོགས་སྐྱོད་འདིའི་ཁྲོད་ལྕམ་ Bachlet ལགས་དང་ལྷན་དུ་ཤིན་ཅང་གཙོ་བོར་གྱུར་པའི་རྒྱ་ནག་ནང་གི་ས་ཁུལ་གཞན་ཁག་ཏུ་ཕེབས་འཆར་ཡོད་པ་བཅས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་མགྲིན་ཚབ་པ་ལྕམ་ Liz Throssell ལགས་ཀྱིས་འགྲེལ་བརྗོད་གནང་འདུག རྩ་བའི་ལྕམ་སྐུ་ Michelle Bachelet མཆོག་གིས་དེ་སྔ་ཕྱི་ལོ་ ༢༠༡༨ ནས་བཟུང་ཤིན་ཅང་ནང་གི་གནས་སྟངས་རྟོག་ཞིབ་སླད་རང་དབང་ངང་སྐོར་སྐྱོད་ཀྱིས་ཡུལ་དེའི་གཞི་རིམ་མང་ཚོགས་ཀྱི་ཚོགས་སྡེ་ཁག་སོགས་ལ་བཅར་འདྲི་གནང་རྒྱུའི་འཆར་གཞི་ཡོད་སྐོར་ལ་རྒྱ་ནག་གཞུང་དང་ལྷན་དུ་གྲོས་མོལ་ཐེངས་མང་གནང་ཡོད་པ་དེ་ལྟར་ཡང་། རྒྱ་ནག་གཞུང་གིས་ད་བར་གནད་དོན་དེའི་ཐོག་གཡོལ་ཐབས་ཁོ་ན་བྱས་ཡོད་པའི་མཚམས་སུ་འདི་ལོའི་ཕྱི་ཟླ་ ༣ ཚེས་ ༨ ཉིན་ལྕམ་སྐུ་མཆོག་ནས་རིང་མིན་ལོ་འདིའི་ཕྱི་ཟླ་ ༥ ནང་ཤིན་ཅང་གཙོ་བོར་གྱུར་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཞན་པའི་ས་ཁུལ་ཁག་ཏུ་སྐོར་སྐྱོད་གནང་གཏན་ཁེལ་བ་ཡོངས་གྲགས་གནང་ཡོད་པ་རེད། རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Wang Wenbin ཡིས་རྒྱལ་ཚོགས་ཀྱི་སྐུ་ཚབ་ཚོགས་ཆུང་དེ་ཁ་ཉིན་རྒྱ་ནག་ཏུ་འབྱོར་ཡོད་པ་དང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་མཆོག་གི་འཚམས་གཟིགས་དེ་ཕན་ཚུན་འབྲེལ་ལམ་ཡར་རྒྱས་དང་མཉམ་འབྲེལ་ལ་དམིགས་པ་ཞིག་ཡིན་པ་དང་རྒྱ་གཞུང་ནས་དེ་འབྲེལ་གནད་དོན་ཁག་ཆབ་སྲིད་ཀྱི་གཡོ་འགུལ་ལ་སྤྱོད་རྒྱུར་མཐའ་གཅིག་ཏུ་ངོ་རྒོལ་ཡོད་ཅེས་བཤད་འདུག དེའི་ཁྲོད་ཁ་སང་རྒྱལ་ཚོགས་ཀྱི་གང་བྱུང་འཛིན་བཟུང་གི་གནས་སྟངས་ཐད་ལ་རྟོག་ཞིབ་གནང་མཁན་ཚོགས་ཆུང་གིས་རྒྱ་གཞུང་ནས་འགྲོ་བ་མིའི་ཐོབ་ཐང་གི་ལས་འགུལ་བ་ Zhang Baocheng ལགས་སུ་རྒྱལ་ཁབ་ཁ་བྲལ་དང་འབྲེལ་ནས་དོ་དམ་བཀག་བསྐྱིལ་བྱས་ཡོད་པར་སྐྱོན་བརྗོད་གནང་བ་དང་ཆབས་ཅིག ཚོགས་ཚུང་དེ་ཉིད་ཀྱི་ངོས་ནས་ལས་འགུལ་བ་ཁོང་ཁྲིམས་འགལ་གང་ཡང་གཟིགས་ཀྱི་མེད་སྐོར་གསུངས་པ་མ་ཟད། གྱོད་ཞིབ་སྐབས་སུ་སྐུ་ཞབས་ཁོང་ལ་ཁྲིམས་གཏུག་བྱ་རྒྱུའི་དཔང་རྟགས་གཙོ་བོ་དེ་ཁོང་གིས་དེ་སྔ་རང་གི་ Twitter དྲ་གནས་ཐོག་ཤིན་ཅང་གི་བཀག་བསྐྱིལ་ཁང་དང་འབྲེལ་བའི་ སྐྱོན་འཛུགས་གནང་བ་དེ་ཆགས་ཡོད་པར་ནན་བརྗོད་གནང་སྟེ་རྒྱ་གཞུང་ནས་སྐུ་ཞབས་ Zhang ལགས་འཕྲལ་དུ་གློད་བཀྲོལ་གཏོང་དགོས་པ་དང་ཁོང་གི་གནད་དོན་ལ་རང་དབང་ལྡན་པའི་རྟོག་ཞིབ་བྱེད་འཇུག་དགོས་པའི་འབོད་སྐུལ་ཞུས་འདུག དེ་བཞིན་རྒྱལ་ཚོགས་ཀྱི་ཞིབ་འཇུག་ཚོགས་པ་དེས་འདས་པའི་ལོ་ངོ་ ༣༠ ནང་རྒྱ་ནག་དེ་རྒྱལ་སྤྱིའི་ཁྲིམས་སྒྲིག་ལ་བརྩི་སྲུང་ཞུ་རྒྱུའི་ཁས་ལེན་བྱས་པའི་གནད་དོན་ཆིག་སྟོང་ལྷག་ལ་བརྩི་མེད་རྡོག་རོལ་གཏོང་མཁན་གྱི་རྒྱལ་ཁབ་ཆེས་སྡུག་ཤོས་གྲས་ཤིག་ཆགས་ཡོད་པ་དང་དེས་རྒྱ་ནག་ནང་གང་བྱུང་འཛིན་བཟུང་བྱེད་བཞིན་པའི་གནད་དོན་འདིར་སྒྲིག་སྲོལ་དང་མཐུན་པའི་དཀའ་ངལ་ཞིག་མཚོན་གྱི་ཡོད་པར་མངོན་གསལ་གནང་ཡོད། གཞི་རྩའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོང་ཐང་གཙོ་འཛིན་ལྕམ་སྐུ་ Michelle Bachelet མཆོག་རིང་མིན་ཕྱི་ཟླ་ ༥ ནང་ཤིན་ཅང་གཙོ་གྱུར་རྒྱ་ནག་ཏུ་སྐོར་སྐྱོད་ལ་ཕེབས་གཏན་ཁེལ་བ་དང་བསྟུན་རྒྱལ་སྤྱིའི་ཁྲོད་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་ཁག་ ༦༠ ཡིས་མཉམ་འབྲེལ་ཐོག་ལྕམ་སྐུ་མཆོག་ལ་སྔ་ལོའི་ཕྱི་ཟླ་ ༡༢ ནང་འདོན་སྤེལ་གནང་འཆར་སྐོར་གསུངས་པའི་ཤིན་ཅང་ནང་གི་འགྲོ་བ་མིའི་ཐོབ་ཐང་གནས་སྟངས་ཐོག་གི་སྙན་ཐོ་གང་མགྱོགས་འདོན་སྤེལ་དང་རྒྱ་ནག་གི་སྐོར་སྐྱོད་དེ་དོན་སྨིན་སོན་པ་ཞིག་གནང་དགོས་པའི་ཞུ་སྐུལ་གནང་ཡོད་པ་རེད།

རྒྱ་གར་ནང་ལ་རྟེན་གཞི་བྱས་པའི་བོད་པའི་དགོན་སྡེ་གྲྭ་ཚང་ཁག་ཏུ་རྒྱ་གར་བྱང་ཤར་ཁུལ་གྱི་མོན་པའི་དགེ་འདུན་པ་མི་ཉུང་བ་ཞིག་ནས་སློབ་གཉེར་གནང་བཞིན་ཡོད་སྟབས་ཨ་རུ་ནཱ་ཅལ་མངའ་སྡེའི་ཆོས་རིག་དབུ་འཛིན་འཇམ་དཔལ་དབང་འདུས་ལགས་ཀྱིས་ཟླ་བ་གཅིག་ཙམ་གྱི་རིང་རྒྱ་གར་ལྷོ་ཕྱོགས་བོད་མིའི་གཞིགས་ཆགས་ཁག་ཏུ་ཡོད་པའི་དགོན་སྡེ་གྲྭ་ཚང་ཁག་ལ་འཚམས་གཟིགས་དང་སྦྲགས་ཏེ་མོན་པའི་དགེ་འདུན་པ་ཚོ་ལ་ལམ་སྟོན་གསུང་བཤད་སོགས་གནང་ཡོད། སྐབས་དེར་སྐུ་ཞབས་འཇམ་དཔལ་དབང་འདུས་ལགས་ཀྱིས་དགོན་སྡེ་གྲྭ་ཚང་ཁག་གི་ནང་ལ་མོན་པའི་དགེ་འདུན་པ་ཚོར་དགེ་འདུན་པ་གཞན་དང་གཅིག་མཚུངས་ཐོག་ནས་ནང་པའི་གཞུང་ཆེན་ཁག་ལ་སློབ་གཉེར་གནང་རྒྱུའི་གོ་སྐབས་དང་འཚོ་བའི་མཐུན་རྐྱེན་སོགས་གནང་བཞིན་ཡོད་པ་སོགས་ངོ་སྤྲོད་དང་སྦྲགས། གདན་ས་གྲྭ་ཚང་ཁག་ཏུ་འཛུལ་ཞུགས་གནང་རྗེས་ངེས་པར་དུ་ནང་པའི་གཞུང་ཆེན་དག་ལ་སློབ་གཉེར་ལེགས་པོ་གནང་དགོས་པའི་ལམ་སྟོན་གནང་སོང་།དེ་བཞིན་ཁོང་གིས་ཨ་རུ་ནཱ་ཅལ་མངའ་སྡེ་གཞུང་ནས་མོན་པའི་དགེ་འདུན་པ་ཚོ་ལ་སློབ་གཉེར་གྱི་མཐུན་འགྱུར་ཚུལ་དུ་སློབ་ཡོན་སོགས་ཀྱི་མཐུན་འགྱུར་ཁག་ཅིག་གནང་དང་གནང་མུས་ཡིན་པ་རྣམས་ངོ་སྤྲོད་གནང་ཡོད།གསར་འགོད་པས་ཨ་རུ་ནཱ་ཅལ་མངའ་སྡེའི་ཆོས་རིག་དབུ་འཛིན་འཇམ་དཔལ་དབང་འདུས་ལགས་སུ་ཐེངས་འདིའི་འཚམས་གཟིགས་ཕེབས་གནད་དང་མོན་པ་དང་བོད་པའི་དབར་གྱི་འབྲེལ་ལམ་སོགས་དང་འབྲེལ་བའི་བཀའ་འདྲི་ཁག་ཅིག་ཞུས་པར་ཁོང་གིས་མོན་དང་བོད་ཀྱི་འབྲེལ་བ་དེ་སྔ་ནས་ཡོད་པ་དང་། ཁོང་གི་ངོས་ནས་ཀྱང་སྔར་ཡོད་འབྲེལ་བ་དེ་དམ་ཟབ་ཏུ་གཏོང་རྒྱུའི་འདོད་པ་ཡོད་ཅེས་གསུངས་སོང་།སྐུ་ཞབས་འཇམ་དཔལ་དབང་འདུས་ལགས་ཀྱི་ཐེངས་འདིའི་འཚམས་གཟིགས་ཁག་ལེགས་གྲུབ་དང་བསྟུན་དེ་རིང་ཉིན་རྒྱབ་ཨ་རུ་ནཱ་ཅལ་མངའ་སྡེར་ཕྱིར་ཕེབས་ཀྱི་ཡོད་པ་རེད། གཞི་རྩའི་རྒྱ་གར་ལྷོ་ཕྱོགས་བོད་མིའི་གཞིས་ཆགས་ནང་རྟེན་གཞི་བྱས་པའི་སེར་སྨད་གྲྭ་ཚང་དང་བཀྲ་ཤིས་ལྷུན་པོ། རྣམ་གྲོལ་གླིང་བཅས་ཀྱི་ནང་བྱང་ཤར་ཨ་རུ་ནཱ་མངའ་སྡེ་ནས་ཡིན་པའི་མོན་པའི་དགེ་འདུན་པ་ཞལ་གྲངས་ ༦༧༥ ལྷག་ཡོད་པ་རེད།

ཉན་པ།: Listen ཕབ་ལེན། Download ༸དཔལ་ས་སྐྱའི་ཆོས་བརྒྱུད་འཛིན་པ་ཡོངས་ནས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ། ༸པཎ་ཆེན་རིན་པོ་ཆེའི་གནས་བབ་གང་ཡིན་མངོན་གསལ་གནང་དགོས་པའི་གཞེན་སྐུལ། ༢༠༢༡ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ལོ་འཁོར་སྙན་ཐོ་འདོན་སྤེལ། སྲིད་སྐྱོང་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་དང་མཇལ་འཕྲད་ཀྱིས་བོད་དོན་གླེང་བ། ཉེ་ཆར་སེང་འབྲུག་སྟག་རྩེ་སློབ་གྲྭའི་དགེ་རྒན་ཟུར་པ་རིན་ཆེན་སྐྱིད་ལགས་གློད་བཀྲོལ་བཏང་འདུག གླུ་གཞས་ལས་རིམ། པཎ་ཆེན་བླ་མ་མཁྱེན་ནོ། Tuesday 26/04/2022 Sakya Tibetan Buddhist Tradition to offer Long Life Prayer to Dalai Lama US calls on China to account for Panchen Lama’s whereabouts and wellbeing Tibetan rights group launches annual report on Human Rights Situation in Tibet Sikyong meets with US Special coordinator for Tibet, discusses Tibet issue Rinchen Kyi released after 8 months detention MUSIC feature: Panchen Lama khen no by Nyima Dhondup

བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རིང་མིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸དཔལ་ས་སྐྱའི་ཆོས་བརྒྱུད་འཛིན་པ་ཡོངས་ནས་བརྟན་བཞུགས་བསྟར་འབུལ་ཞུ་རྒྱུ་རེད་འདུག ༸དཔལ་ས་སྐྱ་པའི་ཆོས་བརྒྱུད་འཛིན་པ་ཡོངས་ཀྱིས་འདི་ལོའི་ཟླ་ ༥ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་མི་འཇིག་རྡོ་རྗེ་འཆང་གི་ངོ་བོར་བརྟན་ཕྱིར་སྒྲོལ་དཀར་ཡིད་བཞིན་འཁོར་ལོའི་ཆོ་གའི་ཐོག་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུ་གཏན་ཁེལ་ཡོད་པ་ལྟར་རྟེན་འབྲེལ་མཚོན་བྱེད་དུ་མཁན་བླ་དང་དགེ་བཙུན་བཅས་གང་ཟག་ ༡༡༣ གྱིས་སྒྲོལ་དཀར་ཡིད་བཞིན་འཁོར་ལོའི་བསྙེན་སྒྲུབ་གནང་གི་ཡོད་འདུག་ལ། བཞུགས་སྒར་དྷརྨ་སཱ་ལཱར་ཕྱི་ཟླ་ ༥ ཚེས་ ༢༡ ཉིན་ནས་དབུ་འཛུགས་ཀྱིས་༸སྐྱབས་མགོན་༸གོང་མ་ཁྲི་ཆེན་རིན་པོ་ཆེ་མཆོག ༸སྐྱབས་མགོན་གོང་མ་ཁྲི་འཛིན་ཞེ་གཉིས་པ་དང་༸སྐྱབས་མགོན་གོང་མ་ཁྲི་འཛིན་ཞེ་གསུམ་པ་རྣམ་གཉིས་བཅས་དབུ་བཞུགས་ཐོག་བརྟན་བཞུགས་ཀྱི་སྒྲུབ་བཞག་གནང་རྒྱུ་རེད་འདུག བརྟན་བཞུགས་དང་འབྲེལ་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་སྐབས་བཅུ་བདུན་པའི་ས་སྐྱའི་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་སུ་བཀའ་འདྲི་ཞུས་པར་སྤྱིར་དེ་སྔ་ལོ་གཉིས་ཙམ་གྱི་གོང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་དགུང་གེགས་དང་བསྟུན་བརྟན་བཞུགས་བསྟར་འབུལ་ཞུ་རྒྱུ་གསོལ་འདེབས་ཞུས་ཡོད་ཀྱང་བར་ལམ་ནས་གཉན་རིམས་ཁྱབ་གདལ་ཆེས་ཆེར་སོང་རྐྱེན་དེ་ལྟར་བྱུང་མེད་སྟབས།  ཉེ་ཆར་ནད་ཡམས་ཕྲན་བུ་ཞི་བའི་ཁྲོད་འདིར་༸དཔལ་ལྡན་དགའ་ལྡན་ཕོ་བྲང་ཡིག་ཚང་ནས་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་སླད་མར་དུས་ཚོད་གནང་བ་ཞིག་ཡིན་པར་གསུངས་སོང་། གཞི་རྩའི་༸དཔལ་ས་སྐྱ་པའི་ཆོས་བརྒྱུད་འཛིན་པ་ཡོངས་ཀྱི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀྲ་ཤིས་པ་དང་༸སྐུ་ཚེ་ཞབས་པད་བརྟན་པའི་འབུལ་རྫས་སོགས་འབུལ་འཆར་འདུག རྩ་བའི་འདས་པའི་ལོ་ངོ་གཉིས་ཙམ་གྱི་རིང་ཏོག་དབྱིབས་གཉན་རིམས་ ༡༩ ཁྱབ་གདལ་ཤུགས་ཆེར་སོང་སྟབས་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ཐོག་བརྒྱུད་མང་ཚོགས་ལ་བཀའ་ཆོས་དང་བཀའ་དབང་། བཀའ་སློབ་སོགས་ཀྱི་མཛད་འཕྲིན་བསྐྱངས་ཡོད་ཀྱང་། ད་ཆ་ནད་ཡམས་ཀྱི་གནས་སྟངས་ཕྲན་བུ་ཡར་རྒྱས་སུ་སོང་བར་བརྟེན་རིམ་པས་སྔར་བཞིན་མཛད་འཆར་ཁག་མུ་མཐུད་དབུ་འཛུགས་བསྐྱང་གནང་མཛད་ཀྱི་འདུག མགོན་པོ་༸གང་ཉིད་མཆོག་གི་མཛད་འཆར་ལྟར་ན། འདི་ལོའི་ཟླ་ ༦ ཚེས་ ༡ དང་ ༢ བཅས་ཉིན་གྲངས་གཉིས་རིང་ཐེག་ཆེན་ཆོས་གླིང་གཙུག་ལག་ཁང་དུ་བོད་པའི་གཞོན་སྐྱེས་རྣམས་ལ་དབུ་མའི་ལྡེ་མིག་ཐོག་བཀའ་ཆོས་བསྩལ་རྒྱུ་རེད་འདུག

ཁ་སང་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་སོ་གསུམ་ལ་ཕེབས་པའི་༸སྐུའི་འཁྲུངས་སྐར་ཉིན་མོ་དང་བསྟུན་ཨ་རིའི་ཕྱི་སྲིད་ལས་ཁང་གིས་གསར་འགོད་བསྒྲགས་གཏམ་ཞིག་སྤེལ་བ་བརྒྱུད་རྒྱ་གཞུང་ནས་༸པཎ་ཆེན་རིན་པོ་ཆེའི་གནས་བབ་གང་ཡིན་མངོན་གསལ་བྱས་པའི་ཐོག་ནས་འགྲོ་བ་མིའི་ཐོབ་ཐང་ལོངས་སུ་སྤྱོད་རྒྱུའི་ཐོབ་ཐང་ཕུལ་དགོས་ཞེས་གསུངས་འདུག ཁ་སང་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་སྐུ་ཞབས་ Ned Price ལགས་ཀྱིས་༸པཎ་ཆེན་རིན་པོ་ཆེ་མཆོག་དགུང་གྲངས་ ༣༣ ལ་ཕེབས་པའི་༸སྐུའི་འཁྲུངས་སྐར་དུས་ཆེན་དང་བསྟུན་གསར་འགོད་བསྒྲགས་གཏམ་ཞིག་ཆེད་སྤེལ་གནང་འདུག་པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་མཛད་པའི་༸པཎ་ཆེན་རིན་པོ་ཆེ་མཆོག་དགུང་ལོ་དྲུག་ལ་ཕེབས་སྐབས་རྒྱ་གཞུང་གིས་བཙན་ཁྲིད་བྱས་ནས་ད་ལན་ལོ་ངོ་ ༢༧ འཁོར་གྱི་ཡོད་ཀྱང་ད་བར་རྒྱ་གཞུང་ནས་རིན་པོ་ཆེ་མཆོག་དང་༸སྐུ་འཁོར་ནང་མི་རྣམ་པའི་གནས་བབ་གང་འདྲ་ཡོད་མེད་ཕྱིར་བསྒྲགས་ཞུས་མེད་པར་བློ་ཕམ་ཡོད་ཅེས་གསུངས་པ་དང་སྦྲགས། རྒྱ་གཞུང་ནས་རིན་པོ་ཆེ་མཆོག་ད་ཆ་གང་དུ་ཡོད་མེད་དང་༸སྐུ་ཁམས་ཀྱི་གནས་བབ་ཇི་ལྟར་ཡོད་པ་སོགས་འཕྲལ་མར་ཡོངས་གྲགས་ཞུ་དགོས་པ་མ་ཟད། རྒྱ་གཞུང་གིས་རྒྱལ་སྤྱིའི་ཁྲིམས་སྒྲིག་ཁག་ལ་སྲུང་བརྩི་ཞུ་རྒྱུའི་ཁས་ལེན་བྱས་པ་བཞིན་༸ཀུན་གཟིགས་༸པཎ་ཆེན་རིན་པོ་ཆེར་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ཁག་ལོངས་སུ་སྤྱོད་རྒྱུའི་སྐུ་དབང་ཕུལ་དགོས་པའི་འབོད་སྐུལ་ཞུས་འདུག དེ་བཞིན་སྐུ་ཞབས་ Ned Price ལགས་ཀྱིས་བོད་མི་ཚོར་རྒྱ་ནག་གཞུང་ནས་ཐེ་བྱུས་གང་ཡང་མེད་པར་༸གོང་ས་༸སྐྱབས་མགོན་ཆེན་པོ་མཆོག་དང་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གིས་དབུས་པའི་སོ་སོའི་དབུ་ཁྲིད་རྣམས་ཀྱི་ཡང་སྲིད་རྩད་གཅོད་ཞུ་རྒྱུ་དང་། ཁོང་རྣམ་པར་སློབ་གཉེར་གྱི་གོ་སྐབས་བསྐྲུན་རྒྱུའི་རང་དབང་ཕུལ་དགོས་པ་མ་ཟད། བོད་མི་ཚོར་སོ་སོའི་ཐུན་མོང་མ་ཡིན་པའི་ཆོས་དང་སྐད་ཡིག་གཙོས་པའི་ལེགས་བྱང་ཁག་མི་ཉམས་རྒྱུན་འཛིན་གནང་རྒྱུའི་གཞི་རྩའི་རང་དབང་དང་ཐོབ་ཐང་ཁག་ལ་ཨ་རིའི་གཞུང་གི་ངོས་ནས་རྒྱབ་སྐྱོར་ཞུས་དང་ཞུ་བཞིན་ཡོད་ཅེས་ནན་བརྗོད་གནང་འདུག ཁ་སང་ཕྱི་ཟླ་ ༤ ཚེས་ ༢༥ ཉིན་མོ་དེ་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་མཛད་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་༸སྐུའི་འཁྲུངས་སྐར་དུས་ཆེན་ཡིན་པ་དང་བསྟུན་ཨ་རིའི་རྒྱལ་ས་ཝ་ཤིན་ཊོན་ཌི་སིར་བྱང་ཨ་རིའི་སྐུ་ཚབ་དོན་གཅོད་ལས་ཁུངས་དང་རྒྱལ་སྤྱིའི་བོད་དོན་ལས་འགུལ་ཁང་། ཨ་རིའི་རྒྱལ་སའི་ཁུལ་གྱི་བོད་རིགས་སྤྱི་མཐུན་ཚོགས་པ་བཅས་ཐུན་མོང་གི་གོ་སྒྲིག་འོག་རིན་པོ་ཆེ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུས་འདུག་པ་དང་། སྐབས་དེའི་མཛད་སྒོ་ཐོག་སྲིད་སྐྱོང་སྤེན་པ་ཚེ་རིང་མཆོག་དང་། བཀྲིས་ལྷུན་པོ་དགོན་པའི་མཁན་ཟུར་དང་ཨཀྱཱ་རིན་པོ་ཆེ་མཆོག བཀྲིས་ལྷུན་པོའི་མཁན་རིན་པོ་ཆེ་གཟིག་རྒྱབ་རིན་པོ་ཆེ་མཆོག  དེ་བཞིན་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་གཞུང་ཚབ་ཆེན་མོ་སྐུ་ཞབས་ Rashad Hussain ལགས། རང་དབང་སྲུང་སྐྱོབ་ཚན་པའི་ཚོགས་གཞོན་ Nury Turkel ལགས། བྱང་ཨ་རི་སྐུ་ཚབ་དོན་གཅོད་དང་ཨ་རིའི་གྲོས་ཚོགས་འཐུས་མི་སོགས་ལྷན་ཞུགས་གནང་འདུགགདན་ས་བཀྲིས་ལྷུན་པོའི་༸སྐྱབས་རྗེ་མཁན་རིན་པོ་ཆེ་གཟིག་རྒྱབ་སྤྲུལ་སྐུ་མཆོག་གིས་ཁོང་ད་ལན་ཨ་རིར་ཕེབས་དོན་གཙོ་བོ་ནི་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་གནད་དོན་དང་འབྲེལ་རིན་པོ་ཆེ་མཆོག་གང་མགྱོགས་གློད་བཀྲོལ་ཡོང་ཐབས་ཆེད་ཡིན་པ་དང་ཕྱོགས་ཕེབས་དེའི་ཁྲོད་ཨ་རིའི་གྲོས་ཚོགས་འཐུས་མི་གཙོས་གནད་ཡོད་མི་སྣ་མང་དག་ཅིག་དང་ཐུག་འཕྲད་ཀྱི་གོ་སྐབས་བྱུང་དོན་ལྟར་ཁོང་རྣམས་ཀྱིས་རིན་པོ་ཆེའི་གནད་དོན་ཐད་རྒྱབ་སྐྱོར་སྔར་ལྷག་གནང་རྒྱུའི་ཞལ་བཞེས་གནང་ཡོད་སྐོར་གསུངས་པ་དང་སྦྲགས་ཏེ། འབྲེལ་ཡོད་ཚང་མར་ཐུགས་རྗེ་ཆེ་ཞེས་ཞུས་པ་དང་ཆབས་ཅིག་ཏུ་རིན་པོ་ཆེ་མཆོག་གང་མགྱོགས་གློད་བཀྲོལ་ཐོབ་ནས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་གསན་བསམ་སློབ་གཉེར་མཛད་དེ་བོད་སྤྱིའི་རྩ་དོན་དང་སྒོས་འཛམ་གླིང་སྤྱིར་ཞབས་འདེགས་རླབས་པོ་ཆེ་བསྒྲུབ་ཐུབ་པའི་ཐུགས་སྨོན་འདུག ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་ཚོགས་གཙོ་གཞོན་པ་སྐུ་ཞབས་ Nury Turkel ལགས་ཀྱིས་ཁོང་སྒེར་ལ་མཚོན་ལ་བོད་མིའི་སྤྱི་ཚོགས་དང་འབྲེལ་བ་ཟབ་པོ་ཡོད་སྟབས་ཨ་རི་གཞུང་གི་སྐུ་ཚབ་ཐོག་ནས་མཛད་སྒོར་ཆེད་བཅར་ཞུས་ཡོད་ཀྱང་༸པཎ་ཆེན་རིན་པོ་ཆེའི་གནད་དོན་དེ་ཁོང་སྒེར་གྱི་གནད་དོན་ཞིག་ཀྱང་ཆགས་ཡོད་པར་མ་ཟད་ཡུ་གུར་དང་བོད་མི་གཉིས་ཀ་རྒྱ་ནག་གཞུང་གི་དྲག་གནོན་འོག་དཀའ་སྡུག་ཚད་མེད་མྱོང་མཁན་གྱི་མི་རིགས་ཤིག་ཆགས་ཡོད་པར་བརྟེན་ཁོང་ནས་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚབ་ཞུས་ཏེ་བོད་མིའི་དཀའ་སྡུག་ལ་གདུང་སེམས་མཉམ་བསྐྱེད་ཞུས་པ་དང་འབྲེལ་བོད་དོན་ཐད་མུ་མཐུད་ནས་རྒྱབ་སྐྱོར་གང་ཐུབ་གནང་རྒྱུའི་ཆོད་སེམས་བརྟན་པོ་ཡོད་ཅེས་གསུངས་ཡོད།  དེ་བཞིན་ཁ་སང་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་༸སྐུའི་འཁྲུངས་སྐར་དང་བསྟུན་བྱེས་ཀྱི་གདན་ས་བཀྲིས་ལྷུན་པོའི་མཁན་རིན་པོ་ཆེ་གཟིག་རྒྱབ་སྤྲུལ་སྐུ་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ Uzara Zaya མཆོག་དང་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་གཞུང་ཚབ་པ་ཆེན་མོ་སྐུ་ཞབས་ Rashad Hussain ལགས་དང་མཇལ་འཕྲད་ཞུས་ཏེ་༸གོང་ས་༸སྐྱབས་མགོན་ཆེན་པོ་མཆོག་བོད་ནང་ཆིབས་བསྒྱུར་མཛད་ཐབས་དང་༸པཎ་ཆེན་རིན་པོ་ཆེའི་གནད་དོན་དེ་བརྒྱུད་བསྒྲགས་རྒྱ་ཆེར་ཡོང་སླད་ཆེ་བསྟོད་ཀྱི་ངོས་འཛིན་དགོས་པ་སོགས་ཞུ་གཏུག་གནང་འདུག

དེ་རིང་ཉིན་རྒྱབ་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བོད་དབྱིན་རྒྱ་གསུམ་ཐོག་ཕྱི་ལོ་ ༢༠༢༡ ལོའི་བོད་ནང་གི་འགྲོ་བ་མིའི་ཐོབ་ཐང་གི་ལོ་འཁོར་སྙན་ཐོ་ཞིག་འདོན་སྤེལ་དང་སྦྲགས། གསར་འགོད་ལྷན་ཚོགས་སུ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བྱེད་དང་ཆབ་སྲིད་ཀྱི་བཙན་གནོན་གཏོང་བྱེད་ཀྱི་སྒྲིག་ཁྲིམས་ཁག་ལ་ངེས་པར་དུ་བསྐྱར་བཅོས་དགོས་པ་སོགས་ཀྱི་ཞུ་སྐུལ་གནང་སོང་།སྙན་ཐོ་དབུ་འབྱེད་དང་འབྲེལ་དེ་རིང་གི་གསར་འགོད་ལྷན་ཚོགས་ཐོག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་དང་ལྟེ་གནས་ཁང་གི་བོད་གནས་ཉམས་ཞིབ་པ་ཉི་འོད་ལགས་རྣམ་གཉིས་ཀྱིས་སྙན་ཐོ་ཞིབ་ཕྲ་ངོ་སྤྲོད་གནང་བ་དང་དེ་བཞིན་ལྟེ་གནས་ཁང་གིས་ལེགས་བཅོས་ཞུས་པའི་དྲ་ཚིགས་གསར་པ་དབུ་འབྱེད་གནང་ཡོད།དེ་རིང་འདོན་སྤེལ་གནང་བའི་ཤོག་གྲངས་ ༣༢ ཅན་གྱི་སྙན་ཐོ་ནང་སྐད་ཡིག་དང་ཤེས་ཡོན་གྱི་ཐོབ་ཐང་། བོད་ཀྱི་ཤེས་ལྡན་མི་སྣ་འབུར་འཇོམས། བོད་བརྒྱུད་ནང་བསྟན་རྒྱ་བསྒྱུར་སོགས་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་བྱ་སྤྱོད་དང་སྲིད་བྱུས་ཁག་དང་འབྲེལ་བའི་ཚན་པ་དགུ་ཆེད་བཀོད་གནང་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་ཉི་འོད་ལགས་སུ་ཕྱི་ལོ་ ༢༠༢༡ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ལོ་འཁོར་སྙན་ཐོའི་ནང་དོན་དང་ས་བཅད། དེ་བཞིན་ ༢༠༢༡ ལོར་བོད་ནང་གི་ཆེས་ཛ་དྲག་གི་གནས་སྟངས་དང་སྔ་ལོ་གཅིག་པོར་བོད་མི་འཛིན་བཟུང་དང་བཀག་ཉར་གང་ཚོད་བྱེད་ཡོད་མེད་སོགས་ཀྱི་སྐོར་བཅར་འདྲི་ཞུས་ཡོད།