བོད་མཚོ་སྔོན་ཁྲི་ཀ་ནས་འཚར་ལོངས་བྱུང་བའི་བོད་ཀྱི་གློག་བརྙན་བཟོ་སྐྲུན་པ་པདྨ་ཚེ་བརྟན་ལགས་ཀྱིས་མི་འགྱངས་བར་གངས་གཟིག་ཅེས་པའི་འགྲོ་བ་མི་དང་གཅན་གཟན་སེམས་ཅན་བར་གྱི་འབྲེལ་ལམ་གཙོ་བོར་སྟོན་པའི་གློག་བརྙན་གསར་བ་ཞིག་ཕབ་སྐྲུན་བྱེད་རྒྱུ་རེད་འདུག 
རྒྱ་ནག་གི་གཞུང་འབྲེལ་གྱི་གསར་ལམ་ Global Times ཡིས་གནས་ཚུལ་སྤེལ་བར་གཞིགས་ན། བོད་ཀྱི་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་ཀྱིས་གངས་གཟིག་ཅེས་པའི་གློག་བརྙན་ཞིག་གི་འཁྲབ་གཞུང་བྲིས་ཟིན་པ་མ་ཟད། རྒྱ་གཞུང་གི་ཆོག་མཆན་སྤྲད་ཟིན་པ་བཞིན་གང་མགྱོགས་བརྙན་ལེན་གྱི་ལས་གཞི་མགོ་རྩོམ་རྒྱུ་ཡིན་པ་ལྟར། ད་ལྟ་རྒྱ་ནག་གི་མི་སེར་མང་པོ་ཞིག་གིས་གློག་བརྙན་དེར་སྤྲོ་སེམས་ཆེན་པོས་ངང་སྒུག་བྱེད་བཞིན་པར་འགྲེལ་བརྗོད་བྱས་འདུག
གློག་བརྙན་དེའི་བརྗོད་བྱ་གཙོ་བོ་འགྲོ་བ་མི་དང་གཅན་གཟན་རྣམས་ཞི་བདེ་ངང་མཉམ་གནས་ཐུབ་པ་དང་འབྲེལ་བ་ཞིག་ཡིན་པ་དང་། དེའི་ནང་འབྲོག་ཁྱིམ་ཞིག་གི་སྒོ་ཕྱུགས་སེམས་ཅན་དགུ་ལྷག་གངས་གཟིག་ཅིག་གིས་བསད་པའི་དོན་རྐྱེན་དང་འབྲེལ། ཕྱུགས་བདག་གི་བུ་ཡིས་གངས་གཟིག་དེ་གསོད་རྩིས་བྱས་ཀྱང་ནང་གི་ཕ་རྒན་གྱིས་བཟོད་བསྲན་ཆེན་པོའི་ངང་ནས་གངས་གཟིག་དེ་ཐར་བ་གཏོང་དགོས་བ་དང་འབྲེལ་ཕ་བུ་གཉིས་ཀྱི་བར་ལ་རྩོད་གླེང་བྱུང་བའི་དོན་རྐྱེན་ཞིག་ལ་སྦྱར་ཡོད་པ་དང་། པདྨ་ཚེ་བརྟན་ལགས་ཀྱིས་གསར་ཁང་ལ་འགྲེལ་བརྗོད་བྱས་པའི་ནང་དུ། ལོ་གཉིས་གསུམ་ཞིག་གི་ཡར་སྔོན་དུ། ཁོང་གིས་དངོས་སུ་དེ་ལྟ་བུའི་གཏམ་རྒྱུད་ཅིག་ཐོས་མྱོང་བས་སྐབས་དེ་ནས་བཟུང་དོན་རྐྱེན་དེ་བརྗེད་མྱོང་མེད་པར་བསམ་བློ་ཡང་ཡང་འཁོར་བསྡད་པ་ཞིག་ཡིན་སྟབས། སྔར་ལོའི་ཏོག་དབྱིབས་རིམས་ནད་ཁྱབ་བརྡལ་གྱི་སྐབས་སུ་གློག་བརྙན་གྱི་འཁྲབ་གཞུང་བྲིས་ཟིན་ཏེ་ཐེངས་འདིར་དངོས་སུ་དོན་རྐྱེན་དེར་གཞིར་བཞག་གིས་གློག་བརྙན་ཞིག་ཕབ་སྐྲུན་བྱེད་འཆར་ཡོད་པར་གསུངས་འདུག
རྒྱ་ནག་གི་གཞུང་འབྲེལ་གསར་ཁང་གིས། བོད་མཐོ་སྒང་སྟེ། དམིགས་བསལ་གྱི་རྨ་འབྲི་རྫ་གསུམ་གྱི་ཁུལ་དུ་རྟེན་གཞི་བྱས་པའི་བོད་མི་རྣམས་ནི་དུས་རྒྱུན་ནས་སྔར་འགྲོ་བ་མིའི་རིགས་ཀྱིས་རྒྱུས་ལོན་བྱས་མེད་པའི་རང་བྱུང་གི་ས་ཁུལ་དུ་འཚོ་བ་སྐྱེལ་བཞིན་སྟབས་རྒྱུན་དུ་གཅན་གཟན་དང་ལྷན་དུ་ཞི་བདེ་ངང་མཉམ་གནས་བྱེད་ཕྱོགས་ཀྱི་ཐད་ནས་དཀའ་ངལ་འཕྲད་བཞིན་ཡོད་པར་འགྲེལ་བརྗོད་བྱས་མ་ཟད། རང་བྱུང་ཁོང་ཡུག་དང་རི་སྐྱེས་སྲོག་ཆགས་རྣམས་ལ་གཅེས་སྲུང་གི་གོ་རྟོགས་སྤེལ་ཆེད་དུ། དེང་སྐབས་ཕྱུགས་རྫི་མང་པོས་རི་སྐྱེས་སེམས་ཅན་དེ་དག་གི་འཚོ་གནས་ལ་བརྙན་བླངས་ཏེ་ཁྱབ་སྤེལ་བྱེད་བཞིན་པར་བརྗོད་འདུག
དེ་བཞིན་འབྲོག་ཁུལ་གྱི་ཕྱུགས་རྫི་གསུམ་གྱིས་དབྱར་དུས་སུ་དབྱར་རྩ་དགུན་འབུ་འཐུ་སྐབས་གཟིག་ཨ་མ་ཞིག་གིས་བྲག་ཕུག་ཅིག་ཏུ་རང་གི་ཕྲུ་གུ་རྣམས་གསོ་སྐྱོང་བྱེད་བཞིན་པ་རྙེད་སོན་བྱུང་བ་དང་འབྲེལ་ནས་ཟླ་གསུམ་གྱི་རིང་ལ་དེར་བརྙན་ཕབ་བྱས་ཡོད་པར་ངོ་སྤྲོད་གནང་འདུག
པེ་ཅིང་དུ་རྟེན་གཞི་བྱས་པའི་རྒྱ་ནག་གི་གློག་བརྙན་དཔྱད་བརྗོད་པ་ Luo Luo གིས། པདྨ་ཚེ་བརྟན་ལགས་ཀྱི་གློག་བརྙན་དེ་ཡིས་རི་སྐྱེས་སེམས་ཅན་རྣམས་སྲུང་སྐྱོབ་ཀྱི་ཐད་ལ་ཤུགས་རྐྱེན་ཐེབས་ངེས་བ་མ་ཟད། གློག་བརྙན་ལ་གཟིགས་མཁན་གྱི་ལྟད་མོ་བ་རྣམས་ཀྱི་སེམས་ངོར་གཅན་གཟན་དང་འཕྲད་སྐབས་བསམ་བློ་ཇི་ལྟར་གཏོང་དགོས་བའི་ཐད་ནས་བློ་སྐྱེད་སྤྲོད་ཐུབ་པ་དང་འབྲེལ། དེ་ལྟ་བུའི་གློག་བརྙན་གྱི་རིགས་ཀྱིས་མིའི་རིགས་ཀྱི་སེམས་ངོར་རང་བྱུང་ཁོར་ཡུག་ལ་གཅེས་སྲུང་བྱེད་རྒྱུའི་གོ་རྟོགས་སྤེལ་ཐུབ་པར་ཕན་ནུས་ཆེ་བ་ཞིག་ཡིན་པ་མངོན་གསལ་གནང་སྟེ། ཁོང་གིས་གློག་བརྙན་དེ་བརྒྱུད་ནས་མི་དང་རི་སྐྱེས་སེམས་ཅན་བར་གྱི་འབྲེལ་བ་དང་། དེ་བཞིན་ཕ་བུ་གཉིས་ཀྱི་རྩོད་གླེང་གི་ཁྲོད་ནས་སེམས་ཅན་ལ་གཟིགས་སྐྱོང་དང་འབྲེལ་བའི་འགྱུར་བ་ཅི་བྱུང་གི་ཐད་ནས་གློག་བརྙན་དེར་ངང་སྒུག་བྱས་ནས་ཡོད་པར་བརྗོད་འདུག
གཞི་རྩའི་པདྨ་ཚེ་བརྟན་ལགས་ནི་བོད་ཁུལ་དུ་གྲགས་ཆེ་བའི་གློག་བརྙན་བཟོ་སྐྲུན་པ་ཞིག་ཡིན་པ་དང་། ད་སྔ་བར་ཁོང་གིས་བོད་ཀྱི་ཁོར་ཡུག་དང་བོད་མིའི་འཚོ་བ་དང་སྦྱར་ནས་ཕབ་སྐྲུན་གནང་བའི་དབུགས་ལྒང་དང་ཐར་ལོ། དེ་བཞིན་སྦྱིན་པ་སོགས་ཀྱི་གྲགས་ཅན་གྱི་གློག་བརྙན་ཁག་ཅིག་འདོན་སྤེལ་གནང་ཡདོ་པ་མ་ཟད། རྒྱལ་སྤྱིའི་གྲགས་ཅན་གྱི་གློག་བརྙན་དུས་སྟོན་མང་པོར་ཞུགས་ནས་གློག་བརྙན་ཁག་ཅིག་ལ་བྱ་དགའ་ཡང་ཐོབ་མྱོང་ཡོད་པ་རེད།
