དེ་རིང་ཟླ་ ༨ ཚེས་ ༤ ཉིན་གནས་ཚུལ་འབྱོར་གསལ་ལྟར་ན། བོད་རྔ་བ་ཀིརྟི་དགོན་པའི་གྲྭ་ཨ་གྲགས་ལགས་ལ་རྒྱ་གཞུང་གིས་ལོ་ ༣ གྱི་བཙོན་འཇུག་ཁྲིམས་ཐད་བཅད་འདུག་པ་དང་། དེའང་ད་ལྟ་ཁོང་ཟིན་ཁྲོན་མི་ཡང་བཙོན་ཁང་
དུ་བཙོན་འཇུག་བྱས་ཡོད་པ་རེད་འདུག
གཞི་རྩའི་རྔ་བ་ཀིརྟི་དགོན་པའི་རང་ལོ་ ༢༡ སོན་པའི་གྲྭ་ཨ་གྲགས་ལགས་ཀྱིས་སྔ་ལོའི་ཟླ་ ༩ ཚེས་ ༡༠ ཉིན་གྱི་སྔ་དྲོར་”བོད་ལ་རང་དབང་དགོས། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག་” ཅེས་རྒྱ་གཞུང་ལ་ཞི་རྒོལ་སྐད་འབོད་བྱེད་བཞིན་རྔ་པ་རྫོང་མཁར་གྱི་གཞུང་ལམ་དུ་ཞི་བའི་གོམ་བགྲོད་བྱས་པར་དེ་མ་ཐག་རྒྱ་གཞུང་ཉེན་རྟོག་པས་ཉེས་རྡུང་གཏོང་བཞིན་འཛིན་བཟུང་བྱས་ཡོད་པ་རེད། འོན་ཀྱང་འཛིན་བཟུང་བྱས་རྗེས་ད་བར་ཁོང་གི་གནས་སྟངས་ཇི་ཆགས་སོགས་ཞིབ་ཕྲའི་གནས་ཚུལ་ཤེས་རྟོགས་ཐུབ་མེད།
