༸གོང་ས་མཆོག

རྒྱ་གར་བྱང་ཤར་ཨ་རུ་ནཱ་ཅལ་ངའ་སྡེའི་བོད་དོན་རྒྱབ་སྐྱོར་ཚོགས་པས་བོད་ཀྱི་གནད་དོན་མ་སེལ་གྱི་བར་དུ་བོད་དོན་ལ་རྒྱབ་སྐྱོར་དང་གདུང་སེམས་མཉམ་བསྐྱེད་ཀྱི་ལས་འགུལ་རིམ་པ་སྤེལ་རྒྱུའི་ཁས་ལེན་དམ་བཅའ་ཞུས་པ་དང་འབྲེལ། རྒྱ་ནག་གཞུང་ལ་༸གོང་ས་མཆོག་དང་གྲོས་མོལ་གནང་དགོས་པའི་ནན་སྐུལ་གནང་འདུག དེའང་ཨ་རུ་ནཱ་ཅལ་མངའ་སྡེའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Gicho Kabak ལགས་ཀྱིས་གཙོས་པའི་སྐུ་ཚབ་འཐུས་མི་ཁག་གཅིག་ནས་ཟླ་བ་འདིའི་ཚེས་ ༢༥ ཉིན་རྒྱ་གར་གྱི་རྒྱལ་ས་ལྡི་ལིར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་མོལ་ཞུས་ཡོད་པ་དང་། ཐེངས་དེའི་མཇལ་མོལ་གྲུབ་རྗེས་ཕྱི་ཉིན་ཚེས་ ༢༦ སྟེ་རེས་གཟའ་པ་སངས་ཉིན་ཚོགས་པ་དེའི་ངོས་ནས་གསར་འགོད་བསྒྲགས་གཏམ་ཞིག་སྤེལ་བའི་ནང་ལ། དབུས་བོད་མིའི་སྒྲིག་འཛུགས་ཀྱི་ངོས་ནས་གཉིས་སྨན་དབུ་མའི་ལམ་གྱི་སྲིད་བྱུས་གཞི་རྩ་བཟུང་བའི་ཐོག་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཀྱི་ཁེ་དབང་ལས་བོད་རང་བཙན་རྩ་བ་ནས་རྩོད་ཀྱི་མེད་པ་ཟད། བོད་མིའི་འཐབ་རྩོད་དེའང་རྒྱ་ནག་མི་མང་ལ་ཁ་གཏད་གཅག་རྒྱུ་ཞིག་གཏན་ནས་མ་རེད་ཅེས་གསུངས་འདུག གཞན་ཡང་བསྒྲགས་གཏམ་དེའི་ནང་དུ་དེ་སྔ་ཕྱོ་ལོ་ ༡༩༧༩ ལོར་སྐུའི་གཅེན་པོ་རྒྱལ་ལོ་དོན་གྲུབ་མཆོག་རྒྱ་ནག་ཏུ་ཕེབས་སྐབས་རྒྱ་ནག་གི་འགོ་ཁྲིད་ཏིང་ཞའོ་ཕེང་གིས་ཁོང་ལ་རང་བཙན་མ་གཏོགས་གནད་དོན་གཞན་གང་ཞིག་ཡིན་རུང་གྲོས་མོལ་གྱི་ལམ་ནས་སེལ་ཐུབ་རྒྱུ་ཡོད་པ་བཤད་དོན་ལྟར། མགོན་པོ་༸གང་ཉིད་མཆོག་ནས་དེར་ཐུགས་རེ་ཆེན་པོ་གནང་ཡོད་སྐོར་ཡང་བཀོད་འདུག ལྷག་དོན་ཚོགས་པ་དེའི་ངོས་ནས་༸གོང་ས་མཆོག་ལ་བོད་ཀྱི་གནད་དོན་མ་སེལ་གྱི་བར་དུ་བོད་དོན་དང་འབྲེལ་བའི་བགྲོ་གླེང་དང་དུས་དེབ་འགྲེམས་སྤེལ་གནང་པའི་བརྒྱུད་བོད་དོན་ལ་རྒྱབ་སྐྱོར་དང་གདུང་སེམས་བསྐྱེད་གནང་རྒྱུའི་ཁས་ལེན་ཡང་ཞུས་ཡོད་པ་མ་ཟད། མགོན་པོ་༸གང་ཉིད་མཆོག་གི་ངོས་ནས་ཀྱང་ད་རེས་ཨ་རུ་ནཱ་ཅལ་མངའ་སྡེའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མཆོག་གིས་དབུས་པའི་ཚོགས་མི་རྣམས་ལ་བོད་དོན་ལ་རྒྱབ་སྐྱོར་དང་གདུང་སེམས་བསྐྱེད་གནང་པར་ལེགས་གསོལ་མཛད་ཡོད་པ་རེད་འདུག རྩ་བའི་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Gicho Kabak ལགས་ཀྱིས་གཙོས་པའི་ཚོགས་གཞོན་མངའ་སྡེའི་བློན་ཆེན་ཟུར་པ་ Tanyong Tatak ལགས་དང་སྤྱི་ཁྱབ་དྲུང་ཆེ་ Anok Wangsa ལགས་སོགས་སྐུ་ཚབ་འཐུས་མི་ལྔ་ནས་༸གོང་ས་མཆོག་གི་མཇལ་ཁ་ཞུས་འདུག

  ༸གོང་ས་༸སྐྱབས་མགོན་ཆེན་པོ་མཆོག་གིས་ནང་པའི་གཞུང་ལུགས་ནས་སྦྱང་བའི་ཡོན་ཏན་རྣམས་ད་ཆ་ནང་པའི་སྤྱི་ཚོགས་ཙམ་མིན་པར། འགྲོ་བ་མིའི་འཇིག་རྟེན་འདིར་ལེགས་སྐྱེས་འབུལ་རྒྱུའི་དུས་ལ་བབ་ཡོད་ཅེས་བཀའ་གནང་སོང། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་ཨ་རིའི་ཨེ་མོ་རི་གཙུག་ལག་སློབ་གཉེར་ཁང་གི་སློབ་མ་ ༣༠ ཙམ་ཞིག་དང་ལྷན་ཚོུད་གཅིག་ཙམ་རིང་མཇལ་མོལ་དང་སློབ་མ་རྣམ་པའི་ངོས་ནས་བཀའ་འདྲི་ཞུས་ཁག་ལ་བཀའ་ལན་བསྩལ་ཡོད་པ་རེད། སྐབས་དེར་༸གོང་ས་མཆོག་ནས་ཐོག་མར་སློབ་མ་རྣམས་ལ་ངོས་ནས་ནང་པའི་གཞུང་ཆེན་ནང་འཁོད་པའི་སེམས་ཁམས་རིག་པའི་རྣམ་གཞག་དེ་ནང་པའི་ཆོས་ཀྱི་སེམས་ཁམས་རིག་པ་ཞེས་མ་ཡིན་པར། རྒྱ་གར་གྱི་གནའ་བོའི་སེམས་ཁམས་རིག་པའི་རྣམ་གཞག་ཞེས་འབོད་ཀྱི་ཡོད། རྒྱ་གར་གྱི་གནའ་བོའི་ཡོན་ཏན་དེ་དག་ཐོག་མར་རྒྱ་གར་རྒྱལ་ནང་དང་དེ་རྗེས་རིམ་བཞིན་འཛམ་གླིང་ཡོངས་ལ་གོང་འཕེལ་གཏོང་རྒྱུ་ནི་ངོས་ཀྱི་འགན་ཁུར་གཙོ་གྲས་ཤིག་ཆགས་ཀྱི་ཡོད་ཅེས་བཀའ་བསྩལ་བ་མ་ཟད། དེའི་ཐོག་རྒྱ་གར་ནང་ལོ་ངོ་སྟོང་ཕྲག་གོང་ནས་ཆོས་ལུགས་འདྲ་མིན་ཁག་འཆམ་མཐུན་མཉམ་གནས་བྱེད་བཞིན་ཡོད་པ་དེར་མིག་དཔེ་བལྟ་ནས་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུར་འབད་བརྩོན་ཤུགས་ཆེ་གནང་རྒྱུ་ནི་ཧ་ཅང་གི་གལ་ཆེན་ཡིན་པར་བཀའ་བསྩལ་འདུག དེ་རྗེས་ཨེ་མོ་རི་གཙུག་ལག་སློབ་གཉེར་ཁང་གི་སློབ་མ་ཁག་གཅིག་ནས་༸གོང་ས་མཆོག་ལ་གནད་དོན་འདྲ་མིན་ཐོག་ལ་བཀའ་འདྲི་ཞུས་པའི་ཁོངས་ནས་སློབ་མ་ཞིག་གིས་༸གོང་ས་མཆོག་གི་ངོས་ནས་དུས་རབས་ ༢༡ པ་དེ་ཞི་བདེ་དང་ལྡན་པའི་དུས་རབས་ཤིག་ཏུ་འགྱུར་ཐུབ་མིན་ནི་དུས་རབས་ ༢༡ པ་འདིའི་ནང་གི་མང་ཚོགས་ཀྱི་ལག་ཏུ་ཡོད་པ་བཀའ་སྩལ་ལྟར། དེང་གི་སྤྱི་ཚོགས་ནང་ཁུལ་དབར་དབྱེ་བ་མང་བ་དང་དབུལ་ཕྱུག་ཁྱད་པར་ཆེ་བ། ལྷག་དོན་མི་རིགས་རིང་ལུགས་ཀྱི་དཀའ་ངལ་དུ་མའི་ཁྲོད་ང་ཚོས་ཞི་བདེ་ཇི་ལྟར་བསྐྲུན་དགོས་ཀྱི་རེད་དམ་ཞེས་བཀའ་འདྲི་ཞུས་པར། མགོན་པོ་༸གང་ཉིད་མཆོག་གིས་འཛམ་གླིང་འདིའི་ནང་གི་འགྲོ་བ་མི་རྣམས་ཕན་ཚུན་གཅིག་ལ་གཅིག་བརྟེན་གྱི་སྤྱི་ཚོགས་ཀྱི་སེམས་ཅན་ཞིག་ཡིན་སྟབས། འགྲོ་བ་མི་གཅིག་འགྱུར་གྱི་བློ་གོང་འཕེལ་གཏོང་རྒྱུ་ནི་བདེ་སྐྱིད་ཀྱི་རྩ་བ་ཡིན་པ་དང་། དེ་ནི་གཙོ་བོ་ཤེས་ཡོན་གྱི་ལམ་ནས་གོ་རྟོགས་སྤེལ་བའི་བརྒྱུད་བསྒྲུབ་ཐུབ་པ་ཞིག་རེད་ཅེས་བཀའ་བསྩལ་སོང་བ་དང་། ལྷག་དོན་༸གོང་ས་མཆོག་ནི་ཡུ་རོབ་མཐུན་ཚོགས་ཀྱི་སྒྲོམ་གཞིར་ཡིད་སྨོན་ཆེན་པོ་མཛད་བཞིན་ཡོད་པ་དང་། དེ་ལྟ་བུའི་སྒྲོམ་གཞི་ཞིག་མ་འོངས་པར་ཨ་ཕི་རི་ཀའི་གླིང་ཕྲན་དང་། ལྷོ་ཨ་མི་རི་ཀ། ཨེ་ཤ་ཡ་བཅས་སུ་བྱུང་ཐུབ་ན་ཕུགས་རྒྱང་རིང་པོའི་ཐོག་ནས་ཞི་བདེ་བསྐྲུན་ཐུབ་ངེས་ཡིན་པར་བཀའ་བསྩལ་བ་མ་ཟད། དབྱིན་ཡུལ་གཞུང་ཡུ་རོབ་མཐུན་ཚོགས་ནས་ཕྱིར་ཐོན་པ་དང། ཉེ་བའི་འར་ཨ་མི་རི་ཀའི་སྲིད་འཛིན་ trump མཆོག་ནས་ཨ་མི་རི་ཀ་དང་པོ་ཞེས་པའི་ལྟ་གྲུབ་བཟུང་བཞིན་པ་བཅས་རང་ཉིད་ཀྱི་རྒྱལ་ཁབ་ཀྱི་ཁེ་ཕན་དང་པོར་བཞག་པ་ནི་འཕྲལ་སེལ་མ་གཏོགས་ཕུགས་རྒྱང་རིང་པོའི་དགོངས་པ་མ་བཞེས་པ་ཞིག་ལ་ངོས་འཛིན་གནང་གི་ཡོད་ཅེས་བཀའ་ནན་བསྩལ་འདུག དེ་བཞིན་བོད་ཀྱི་གནད་དོན་དང་འབྲེལ་མགོན་པོ་༸གང་ཉིད་མཆོག་ནས་སྔ་རྗེས་སུ་གཉིས་སྨན་དབུ་མའི་ལམ་གྱི་ཐོག་ལ་དགོངས་པ་བཞེས་ཕྱོགས་ཞིབ་ཕྲ་བཀའ་འགྲེལ་དང་སྦྲགས། ༸གོང་ས་མཆོག་ནས་བོད་ལ་རང་བཙན་རྩ་བ་ནས་རྩོད་ཀྱི་མེད་པའི་བཞེངས་ཕྱོགས་བསྐྱར་ནན་མཛད་པ་དང་། ལྷག་དོན་གཉིས་སྨན་དབུ་མའི་ལམ་གྱི་ཐབས་ལམ་ལ་བརྟེན་ནས་ད་སྐབས་རྒྱ་རིགས་མང་པོས་བོད་མིར་རྒྱབ་སྐྱོར་གནང་གི་ཡོད་སྟབས།  འཚེ་བའི་ཐབས་ལམ་འམ་མི་གསོད་ཁྲག་སྦྱོར་གྱི་བརྒྱུད་ནས་རང་བཙན་ལེན་ཐུབ་རྒྱུ་མེད་སྐོར་བཀའ་བསྩལ་བ་མ་ཟད། འགྲོ་བ་མི་གཅིག་གྱུར་གྱི་བློ་འཁྱེར་ཐོག་རྒྱ་རིགས་དང་བོད་རིགས་གཉིས་སྤུན་མཆེད་ཀྱི་བསམ་བློ་འཛིན་ནས་གནད་དོན་དེ་སེལ་དགོས་ཀྱི་རེད་ཅེས་བཀའ་སློབ་ཟབ་མོ་བསྩལ་འདུག གཞི་རྩའི་ཨ་རིའི་ཨེ་མོ་རི་གཙུག་ལག་སློབ་གཉེར་ཁང་གི་སློབ་མ་དེ་དག་ནང་ཆོས་དང་ཚན་རིག་གི་འབྲེལ་བ་འི་སྐོར་ལ་སློབ་སྦྱོང་གནང་བཞིན་ཡོད་པ་ལྟར། ད་ཆ་ས་རཱ་མཐོ་སློབ་ཏུ་བདུན་ཕྲག་གསུམ་རིང་གི་དབྱར་ཁའི་ཟབ་སྦྱོང་ནང་མཉམ་ཞུགས་གནང་མུས་ཡིན་པ་དང་། དེ་རྗེས་ཁོང་རྣམས་རྒྱ་གར་ལྷོ་ཕྱོགས་འབྲས་སྤུངས་བློ་གསལ་གླིང་དུ་བདུན་ཕྲག་གསུམ་རིང་སློབ་གཉེར་གནང་ཕྱིར་ཕེབས་ཀྱི་ཡོད་པ་རེད།

Amfar ཞེས་པའི་ཚོགས་པའི་ངོས་ནས་ Cannes རྒྱལ་སྤྱིའི་གློག་བརྙན་དུས་སྟོན་དང་བསྟུན་དཔལ་འབྱོར་འདུ་འགོད་ཀྱི་ལས་རིམ་ཞིག་གོ་སྒྲིག་ཞུས་ཐོག གློག་བརྙན་འཁྲབ་སྟོན་པ་སོགས་གྲགས་ཅན་མི་སྣ་མང་དག་ཞིག་གདན་ཞུ་ཕུལ་བའི་ཁོངས་སུ་རྒྱ་རིགས་དཔེ་གསར་གྱོན་ཆས་དྲིལ་སྒྲགས་བྱེད་མཁན་ Ming Xi ཞུ་བ་ཁོང་ཡང་ཆེད་འབོད་བྱས་ཡོད་ཀྱང། ཁོང་ནས་༸གོང་ས་༸སྐྱབས་མགོ་ཆེན་པོ་མཆོག་གི་གནད་དོན་ཞིག་གི་རྐྱེན་པས་གློ་བུར་དུ་ལས་རིམ་དེ་ནས་ཕྱིར་འཐེན་བྱས་འདུག Amfar ནི་གཉན་ནད་རེག་དུག་གི་ནད་གཞི་རྩ་འགོག་གི་ཉམས་ཞིབ་ལས་དོན་གཉེར་མཁན་གྱི་ཚོགས་པ་ཞིག་ཡིན་པ་དང། ཚོགས་པ་དེའི་ངོས་ནས་ལོ་ལྟར་རྒྱལ་སྤྱིའི་ཐོག་སྙན་གྲགས་ཆེ་བའི་ Cannes གློག་བརྙན་དུས་སྟོན་དང་བསྟུན་གྲགས་ཅན་མི་སྣ་མང་པོ་གདན་ཞུ་གནང་པའི་བརྒྱུད་དཔེ་གསར་གྱོན་ཆས་དྲིལ་སྒྲགས་དང་རིན་སྤར་འཚོང་སྒྱུར་སོགས་ཀྱི་ལམ་ནས་ཚོགས་པའི་ལས་དོན་ཆེད་དཔལ་འབྱོར་འདུ་འགོད་གནང་གི་ཡོད་པ་དང། ཟླ་བ་འདིའི་ཚེས་ ༢༥ ཉིན་གོ་སྒྲིག་ཞུས་པའི་ཐེངས་འདིའི་དཔལ་འབྱོར་འདུ་འགོད་ཀྱི་ལས་རིམ་ཁྱབ་ཁོངས་སུ་ཉིན་གྲངས་ལྔའི་རིང་བཞུགས་སྒར་དུ་ཆེད་བསྐྱོད་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་ཁའི་གོ་སྐབས་ཤིག་དང་། དེ་བཞིན་དེ་སྔ་ཕྱི་ལོ་ ༢༠༡༥ ལོར་༸སྐུའི་གྱ་སྟོན་སྐབས་སུ་བསྐྱོན་པའི་མགོན་པོ་༸གང་ཉིད་མཆོག་གི་ 3D ཅན་གྱི་༸སྐུ་པར་བཅས་ auction འམ་རིན་སྤར་འཚོང་སྒྱུར་བཟོས་ཡོད་པ་རེད་འདུག གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་གསལ་ལྟར་ན། འདི་ལོའི་ amfAR དཔལ་འབྱོར་འདུ་འགོད་ཀྱི་ལས་རིམ་དེའི་ནང་སྐུ་མགྲོན་དུ་གློག་བརྙན་འཁྲབ་ཁྲིད་པ་ Nicole Kidman དང་། Dustin Hoffman དེ་བཞིན་ Jessica Chastain སོགས་གནད་ཞུ་གནང་ཡོད་པ་མ་ཟད། རྒྱ་ནག་ནང་གི་གྲགས་ཅན་དཔེ་གསར་གྱོན་ཆས་དྲིལ་བསྒྲགས་བྱེད་པོ་ Ming Xi ལགས་ཆེད་འབོད་གནང་ཡོད་ཀྱང་། ཁོང་ནས་ཐེངས་འདིའི་ལས་འཆར་དེ་ཆབ་སྲིད་ཀྱི་ངོ་བོར་བསྒྱུར་ཡོད་པས་དེ་ནས་ཕྱིར་འཐེན་གནང་དགོས་བྱུང་བ་བཀོད་ཡོད་པ་རེད། གནད་དོན་དེ་དང་འབྲེལ་ནས་སྤྱི་ཚོགས་བརྒྱུད་ལམ་ Weibo ཐོག་གླེང་སློང་མང་དག་བྱུང་ཡོད་པ་དང་། ཁག་གཅིག་གིས་ Ming Xi ལགས་ལ་རྒྱབ་སྐྱོར་བྱས་ཏེ་བོད་མི་ཁ་བྲལ་བར་ངོ་རྒོལ་སོགས་བྱས་པ་དང།ཡང་ཁག་གཅིག་གིས་ཁོང་མོར་དགག་པ་བྱས་པ་མ་ཟད། རྒྱ་རིགས་ཀྱི་དཔེ་གསར་གྱོན་ཆས་དྲིལ་བསྒྲགས་བྱེད་པོ་གྲགས་ཅན་ juror Fan Bingbing དང་། Victoria’s Secret གྱོན་ཆས་དྲིལ་བསྒྲགས་བྱེད་པོ་གྲགས་ཅན་  Liu Wen གཉིས་ནས་ཀྱང་ལས་རིམ་དེ་ནས་ཕྱིར་འཐེན་བྱས་ཡོད་སྐོར་གནས་ཚུལ་བཀོད་ཀྱང་Amfar ནས་དེའི་ཐོག་གནས་ཚུལ་ཁ་གསལ་གང་ཡང་འགྲེལ་བརྗོད་གནང་མི་འདུག རྩ་བའི་ amfAR ཚོགས་པས་གློག་བརྙན་དུས་སྟོན་དེའི་ཐོག་ནས་གཉན་ནད་རེག་དུག་རྩ་འགོག་དང་སྨན་བཅོས་ཞུ་ཆེད་དུ་ཨ་སྒོར་ས་ཡ་ $190 མཁོ་སྒྲུབ་གནང་འདུག ལས་འཆར་དེའི་མིང་ལ་ “Golden Age of Hollywood Collection,” ཞེས་བཏགས་འདུག་པ་དེས་ལས་འཆར་དེ་Cannes གློག་བརྙན་དུས་སྟོན་སྐབས་ཀྱི་ལས་རིམ་གཞན་དང་མི་འདྲ་བ་གལ་ཆེ་ཞིག་ཡིན་པ་མཚོན་ཆེད་དུ་ཡིན་པ་རེད་འདུག

ཁ་སང་ཟླ་ ༥ ཚེས་ ༢༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལིའི་ནང་སྙན་གྲགས་ཆེ་བའི་རྒྱ་གར་གྱི་མཁས་དབང་དང་། རྩོམ་བྲིས་པ། དབུས་གཞུང་གི་བློན་ཆེན་བཅས་གནང་མྱོང་ཡོད་པའི་སྐུ་ཞབས་ Arun Shourie མཆོག་གིས་ཉེ་ཆར་རྩོམ་བྲིས་གནང་པའི་ Two Saint འམ་རྒྱ་གར་གྱི་བླ་ཆེན་སྐྱེས་བུ་དམ་པ་གཉིས་ཀྱི་ལོ་རྒྱུས་ཕྱག་དེབ་དབུ་འབྱེད་མཛད་ཡོད་པ་རེད། ལྡི་ལི་གསར་པའི་ IIC རྒྱ་གར་དང་རྒྱལ་སྤྱའི་ལྟེ་གནས་ཀྱི་ཚོགས་ཁང་ཞིག་ཏུ་གོ་སྒྲིག་ཞུས་པའི་ཕྱག་དེབ་དབུ་འབྱེད་ཀྱི་མཛད་སྒོར་དེ་སྔོན་སྲིད་བློན་གཞོན་པ་གནང་མྱོང་ཡོད་པའི་སྐུ་ཞབས་ L K Advani མཆོག་གིས་དབུས་པའི་ཆབ་སྲིད་ཚོགས་པ་འདྲ་མིན་གྱི་གནད་ཡོད་མི་སྣ་མང་དག་ཞིག་ཆེད་ཕེབས་གནང་འདུག་པ་མ་ཟད། གསར་ཁང་གྲགས་ཅན་ཁག་གི་རྩོམ་བྲིས་པ་དང་། སྤྱི་ཚོགས་ཞབས་ཞུ་བ། ཆོས་ལུགས་ཀྱི་དབུ་ཁྲིད་སོགས་ཁྱོན་མི་གྲངས་ ༣༠༠ བརྒལ་བ་ཞིག་འདུ་འཛོམས་བྱུང་འདུག ༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར་སྐུ་ཞབས་ Arun Shourie མཆོག་གི་རིགས་མྱུག་གི་ལྷན་དུ་ཕྱག་དེབ་དེ་དབུ་འབྱེད་གནང་ཡོད་པ་དང། ཕྱག་དེབ་རྩོམ་བྲིས་པ་མཆོག་ནས་༸གོང་ས་མཆོག་ལ་མཛད་སྒོའི་ཐོག་དེང་གྱི་འཛམ་གླིང་དང་གནའ་བོའི་རྒྱ་གར་གྱི་ཤེས་བྱའི་སྐོར་ལམ་སྟོན་བཀའ་སློབ་བརྩལ་གནང་ཡོང་བའི་གསོལ་འདེབས་ཞུ་དོན་ལྟར། མགོན་པོ་༸གང་ཉིད་མཆོག་ནས་སྤྱིར་བཏང་རྒྱ་གར་མི་མང་ཚོས་དེང་དུས་ཀྱི་ཤེས་ཡོན་ཐོག་ནས་ཕྱིའི་དངོས་པོའི་མཐུན་རྐྱེན་ཐོག་མདུན་བསྐྱོད་བྱེད་མུས་ཡིན་ཀྱང་། གལ་སྲིད་དེ་དང་ཟུང་དུ་རང་ཉིད་སོ་སོའི་གནའ་བོའི་རིག་གཞུང་དག་ལ་དོ་སྣང་ཆེ་ཙམ་གནང་ཐུབ་ཚེ་རྒྱལ་ཁབ་གཞན་ལ་མེད་པའི་རྩ་ཆེའི་རིག་གཞུང་དེའི་རིན་ཐང་ཤེས་པ་ཙམ་མ་ཟད། མི་ཚེ་ཡང་བདེ་སྐྱིད་དང་ལྡན་པ་ཞིག་ཡོང་གི་རེད་ཅེས་ལམ་སྟོན་བསྩལ་གནང་སོང་། ལྷག་དོན་༸གོང་ས་མཆོག་གིས་ངོས་རང་གི་བསམ་བློ་ལྟར་བྱ་ཚེ་འཛམ་གླིང་ནང་རྒྱལ་ཁབ་ཁག་ ༢༠༠ ལྷག་ཙམ་ཡོད་པ་ལས་རྒྱ་གར་ནི་ཕྱིའི་དངོས་པོའི་མཐུན་རྐྱེན་དང་ནང་སེམས་ཀྱི་རིན་ཐང་གཉིས་ཟུང་སྦྲེལ་གྱི་བེད་སྤྱོད་བྱེད་ཐུབ་མཁན་གྱི་རྒྱལ་ཁབ་གཅིག་པོ་དེར་ངོས་འཛིན་གནང་གི་ཡོད་ཅེས་སོགས་བཀའ་སློབ་བསྩལ་ཡོད། ༸གོང་ས་མཆོག་གིས་རྒྱ་གར་གྱི་གནའ་བོའི་རིག་གཞུང་ལས་བློ་དང་ཤེས་པའི་རྣམ་གཞག་དེ་ཚོ་ཆོས་དང་འབྲེལ་བ་མེད་པའི་གནད་དོན་ཞིག་ཏུ་ངོས་འཛིན་གནང་གི་ཡོད་པ་བཀའ་བསྩལ་གནང་སྟེ། ནང་སེམས་ཀྱི་བདེ་སྐྱིད་ཟེར་སྐབས་མིག་བཙུམ་ནས་སྨོན་ལམ་བརྒྱབ་པ་ཙམ་མིན་པར་མིག་ཕྱེ་སྟེ་མཐོང་རྒྱ་ཆེ་ཙམ་བྱེད་དགོས་པ་མ་ཟད། གནད་དོན་ལ་རིག་པའི་ལམ་ནས་དཔྱད་དེ་བློ་དང་ཤེས་པའི་རྣམ་གཞག་ལ་འགྱུར་བ་གཏོང་ཐུབ་པ་ཞིག་བྱ་དགོས་གལ་ཡིན་པའི་ལམ་སྟོན་མཛད་པ་དང་ཆབས་ཅིག རྒྱ་གར་གྱི་རྩ་ཆེའི་རིག་གཞུང་དེ་དག་ནི་དེང་དུས་ཀྱི་ཚན་རིག་དང་ཟུང་སྦྲེལ་ཐོག་འགྲོ་ཐུབ་མཁན་གྱི་ལྟ་གྲུབ་རྩ་ཆེན་ཞིག་ཡིན་སྐོར་སོགས་ལམ་སྟོན་བཀའ་སློབ་བཀྲིན་ཆེ་བ་བརྩལ་གནང་ཡོད། དཔེ་དེབ་དབུ་འབྱེད་ཀྱི་མཛད་སྒོ་དེའི་ཐོག་རྒྱ་གར་གྱི་ཁྲིམས་ཁང་གོང་མའི་ཁྲིམས་རྩོད་པ་སྐུ་ཞབས་ Fali S Nariman མཆོག་དང་། རྒྱ་གར་གྱི་ཕྱི་སྲིད་དྲུང་ཆེ་སོགས་ཀྱི་ཕྱག་ལས་གནང་མྱོང་མཁན་སྐུ་ཞབས་ Shyam Saran དང་དེ་བཞིན་མཁས་དབང་ Dr. Ambarish Sarwik བཅས་ནས་ཀྱང་དཔེ་དེབ་དེ་དང་འབྲེལ་བའི་གསུང་བཤད་གནང་པ་མ་ཟད། བོད་མིའི་བླ་ན་མེད་དབུ་ཁྲིད་སྤྱི་ནོར་ ༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་ཆོས་ལུགས་མཐུན་འབྲེལ་བཅས་ཀྱི་ཐད་ཐུགས་འགན་ཆེ་བཞེས་གནང་པའི་མཛད་འཕྲིན་ཁག་ལ་ཞལ་གཅིག་གྲགས་ཀྱི་ཡི་རངས་བསྔགས་བརྗོད་ཤུགས་ཆེ་གནང་ཡོད་པ་རེད། རྒྱལ་ས་ལྡི་ལི་གཉིས་ཀྱི་ནང་མཛད་འཕྲིན་ཁག་ལེགས་པར་གྲུབ་བསྟུན། དེ་རིང་སྔ་དྲོ་ཚོུད་ ༡༢།༣༠ ཐོག་བཞུགས་སྒར་དུ་༸ཞབས་སོར་བདེ་བར་འཁོད་གནང་སོང་། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ནས་འདས་པའི་བདུན་ཕྲག་འདིའི་ནང་རྒྱལ་ས་ལྡི་ལི་ཙམ་མ་ཟད། རྒྱ་གར་ལྷོ་ཕྱོགས་གྲོང་ཁྱེར་སྦེང་ལོར་ནང་ཆིབས་བསྒྱུར་གྱིས་ཉིན་གཅིག་གི་མཛད་འཆར་བཀའ་དྲིན་བསྐྱངས་ཡོདཔ་རེད། དེའང་མགོན་པོ་༸གང་ཉིད་མཆོག་ཚེས་ ༢༢ ཉིན་བཞུགས་སྒར་ནས་སྦེང་ལོར་ཕྱོགས་སུ་ཕེབས་ཐོན་གྱིས་ཚེས་ ༢༣ ཉིན་རྒྱ་གར་གྱི་རྩ་ཁྲིམས་གསར་བཟོ་གནང་མཁན་དང་སྤྱི་ཚོགས་དྲང་བདེན་དང་ཕོ་མོ་འདྲ་མཉམ་བཅས་ཀྱི་ཐོག་ཆེས་མཛད་རྗེས་སྙན་གྲགས་ཆེ་བའི་རྒྱ་གར་གྱི་དབུ་ཁྲིད་ Dr.B.R. Ambedkar དམ་པ་དེ་ཉིད་སྐུ་འཁྲུངས་ནས་ལོ་ ༡༢༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་གཙོ་བོར་དབུ་བཞུགས་ཀྱིས་སྤྱི་ཚོགས་ཁྲོད་དྲང་བདེན་གྱི་ཁྲིམས་ལུགས་ལག་བསྟར་དགོས་པའི་སྐོར་དང་མི་རིགས་འདྲ་མཉམ་སྐོར་གྱི་བརྗོད་གཞིའི་ཐོག་ལམ་སྟོན་བཀའ་སློབ་བརྩལ་བ་དང་ཆབས་ཅིག མངའ་སྡེའི་ཡུལ་སྐོར་སྤྲོ་འཆམ་བློན་ཆེན་མཆོག་དང་སྐོར་སྲུང་དཔོན་རིགས་སོགས་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་ཡོད་པ་རེད། ཁ་ཉིན་༸གོང་ས་མཆོག་སྦེང་ལོར་ནས་རྒྱལ་ས་ལྡི་ལིར་ཆིབས་ཞལ་བསྒྱུར་གནང་སྟེ། ཁུལ་དེར་རྒྱ་གར་གྱི་ Indian Express གསར་ཁང་གི་ལས་བྱེད་རྣམས་ཀྱིས་ཇི་ལྟར་གདན་ཞུ་གསོལ་འདེབས་ཞུ་དོན་བཞིན་གསར་ཁང་དེའི་ལས་བྱེད་རྣམས་ལ་བླང་དོར་གྱི་ལམ་སྟོན་བཀའ་སློབ་བརྩལ་གནང་པ་དང་། དེ་བཞིན་ཁ་སང་རྒྱ་གར་གྱི་བློན་ཆེན་ཟུར་པ་ Arun Shourie མཆོག་གིས་རྩོམ་བྲིས་གནང་པའི་ཕྱག་དེབ་དབུ་འབྱེད་དང་བཀའ་སློབ་བརྩལ་བ་སོགས་ཀྱི་མཛད་འཕྲིན་བསྐྱངས་ཡོད་པ་རེད། མཛད་འཆར་ལྟར་ན། སང་ཉིན་ཚེས་ ༢༧ ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མང་ཚོགས་ལ་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བཀའ་དྲིན་བསྩལ་རྒྱུ་རེད་འདུག

རྒྱ་གར་གྱི་རྒྱལ་ས་ལྡི་ལིར་རྒྱ་གར་གྱི་ Indian Express གསར་ཁང་གིས་གོ་སྒྲིག་ཞུས་པའི་གླེང་སྟེགས་ཐོག་ལ་བོད་མིའི་བླ་ན་མེད་པའི་དབུ་ཁྲིད་སྤྱིནོར་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་༸གང་ཉིད་མཆོག་དགུང་ལོ་ ༩༠ ལ་ཕེབས་སྐབས་༸སྐུའི་ཡང་སྲིད་ཐོག་དགོངས་བཞེས་ནན་པོ་གནང་རྒྱུ་ཡིན་ཅེས་བཀའ་བརྩལ་སོང་། ཁ་སང་ཟླ་ ༥ ཚེས་ ༢༤ ཉིན་རྒྱབ་ཏུ་ལྡི་ལི་གསར་པའི་ Taj Mansingh མགྲོན་ཁང་དུ་གོ་སྒྲིག་ཞུས་པའི་ Indian Express གསར་ཁང་གི་ Express Adda ཞེས་པའི་གླེང་མོལ་གྱི་ལས་རིམ་ཐོག་ལ་༸གོང་ས་མཆོག་གིས་༸གང་ཉིད་མཆོག་གི་ཐུགས་བསྐྱེད་དམ་བཅའ་གསུམ་པོ་སྟེ། ཆོས་དད་ཡོད་མེད་ལ་མ་ལྟོས་པར་ང་ཚོ་ཚང་མ་འགྲོ་བ་མི་གཅིག་པ་ཡིན་པའི་ཆ་ནས་ནང་སེམས་ཀྱི་བདེ་སྐྱིད་གལ་ཆེ་ཡིན་པ་དང་། དེ་ཡང་འགྲོ་བ་མི་ལ་རང་ཆས་སུ་ཡོད་པའི་བྱམས་པ་དང་བརྩེ་བ། ཚན་རིག་པས་ཞིབ་འཇུག་གནང་པའི་རྒྱུ་མཚན་ཁག་གཞི་རྩར་བཟུང་སྟེ་བདེ་སྐྱིད་ཀྱི་རྩ་བ་དེ་བྱམས་བརྩེ་ཡིན་པ་ངོ་སྤྲོད་གནང་པ་མ་ཟད། འཛམ་གླིང་ཐོག་གི་ཆོས་ལུགས་ཚང་མའི་དབར་ཞི་མཐུན་མཉམ་གནས་ཡོང་ཐབས། དེ་བཞིན་བོད་མི་ཞིག་ཡིན་པའི་ཆ་ནས་བོད་ཀྱི་ཆོས་དང་རིག་གཞུང་ཁོར་ཡུག་བཅས་པ་སྲུང་སྐྱོབ་ཡོང་ཐབས་སོགས་ལ་སྐུ་ལས་སྐྱོན་བཞིན་ཡོད་སྐོར་ངོ་སྤྲོད་གནང་ཡོད་པ་རེད། མགོན་པོ་༸གང་ཉིད་མཆོག་ལ་༸སྐུའི་ཡང་སྲིད་ཀྱི་གན་དོན་ཐོག་བཀའ་འདྲི་ཞུས་པའི་བཀའ་ལན་དུ། ངོས་ཀྱིས་ཕྱི་ལོ་ ༡༩༦༩ སྐབས་ནས་ཏཱ་ལའི་བླ་མའི་སྐུ་ཕྲེང་རྒྱུན་མཐུད་དགོས་དང་མི་དགོས་དེ་བོད་མི་མང་ལ་རགས་ལུས་ཡོད་པའི་གཞུང་འབྲེལ་གྱི་གསལ་བསྒྲགས་ཤིག་བྱས་པ་ཡིན། ངོས་ནས་དུས་ཚོད་དེ་གཏན་གཏན་དྲན་གསོས་ཀྱི་མི་འདུག འོན་ཀྱང་དུས་ནས་དུས་སུ་ང་ཚོ་བོད་ཀྱི་ཆོས་བརྒྱུད་ཁག་གི་བླ་ཆེན་རྣམ་པ་འདུ་འཛོམས་གནང་སྟེ་ཡང་སྲིད་སྐོར་བཀའ་མོལ་རིམ་པ་གནང་ཡོད་པ་མ་ཟད། བར་སྐབས་འདུ་འཛོམས་བྱུང་བའི་ཚོགས་འདུ་ཞིག་གི་ཐོག་ངོས་རང་ལོ་ ༩༠ ཙམ་ལ་སླེབས་པའི་སྐབས་དེར་ངོས་ཀྱི་ཡང་སྲིད་སྐོར་ནན་ཏན་གྱིས་སྐད་ཆ་བཤད་རྒྱུའི་ཐག་གཅོད་བྱུང་ཡོད་པ་རེད་ཅེས་བཀའ་བསྩལ་གནང་སོང་། མགོན་པོ་༸གང་ཉིད་མཆོག་གིས་༸སྐུའི་ཡང་སྲིད་སྐོར་ལ་བཀའ་འདྲི་ཞུས་པ་དེར་བཀའ་ལན་བརྩལ་བ་དང་། ལྷག་དོན་རྒྱ་ནག་གཞུང་གི་ཐོག་ནས་ངོས་ཀྱི་ཡང་སྲིད་ཀྱི་གནད་དོན་ཐད་ལ་བོད་མི་ལས་དངངས་སྐྲག་མང་བ་ཡོད་པའི་རྣམ་པ་ཞིག་འདུག་ཅེས་བཀའ་བསྩལ་གནང་ཡོད་པ་རེད། ངོས་ནས་སྐབས་རེ་རྩེད་མོ་དང་སྦྲགས་ཏེ་གལ་ཏེ་རྒྱ་ནག་གཞུང་ལ་ངོས་ཀྱི་ཡང་སྲིད་སྐོར་དངངས་སྐྲག་དེ་འདྲ་ཡོད་པ་ཡིན་ན། ཡང་སྲིད་ཀྱི་གནད་དོན་ལ་ཐེ་བྱུས་མ་བྱེད་པའི་སྔོན་ལ་དང་པོ་རྒྱ་ནག་དམར་ཤོག་ཚོགས་པའི་ངོས་ནས་སྐྱེ་བ་སྔ་ཕྱི་ཁས་ལེན་བྱེད་དགོས་པ་མ་ཟད། སྲིད་འཛིན་མའོ་ཀྲུའུ་ཞི་དང་། ཏིང་ཞའོ་ཕིང་བཅས་ཀྱི་ཡང་སྲིད་ངོས་འཛིན་བྱེད་དགོས་པ་རེད། དེ་རྗེས་གཞི་ནས་ངོས་ཀྱི་ཡང་སྲིད་སྐོར་ཐེ་བྱུས་བྱས་པ་ཡིན་ན་བཟང་སྤྱོད་དང་མ་འགལ་བ་ཞིག་ཡོང་གི་རེད། གལ་སྲིད་དེ་འདྲ་མེད་པ་ཡིན་ན་ཐེ་བྱུས་བྱེད་པའི་དགོས་པ་གང་ཡང་མེད་པ་རེད། ལོ་རྒྱུས་ལ་བལྟས་ཚེ་རྒྱ་ནག་གོང་མ་ཁག་གཅིག་ནང་པ་ཡིན་པའི་ཆ་ནས་ཆོས་ཡོན་འབྲེལ་བའི་ཐོག་ནས་པཎ་ཆེན་རིན་པོ་ཆེ་མཆོག་དང་ཏཱ་ལའི་བླ་མའི་ཡང་སྲིད་ལ་རང་བཞིན་གྱི་བློ་འཚབ་ཡོད་པའི་གནས་ཚུལ་བྱུང་ཡོད་ཅེས་བཀའ་བསྩལ་གནང་སོང། མགོན་པོ་༸གང་ཉིད་གིས་སྐབས་དེར་རྒྱ་ནག་གི་མའོ་དུས་རབས་ནས་ད་ལྟ་བར་གྱི་དུས་རབས་དེ་དག་ནང་རྩ་བའི་ཆབ་སྲིད་ཀྱི་ལྟ་གྲུབ་དང་ལམ་ལུགས་དེ་རང་འཇག་གནས་ཡོད་ཀྱང་། དུས་ཚོད་དང་བསྟུན་ཏེ་གནས་སྟངས་ལ་འགྱུར་བ་ཆེན་པོ་ཕྱིན་ཡོད་སྐོར་བཀའ་གནང་པ་དང་སྦྲགས། ལྷག་པར་དུ་ད་ལྟའི་སྲིད་འཛིན་ཞི་ཅིང་ཕིང་ལ་ཆ་མཚོན་པ་ཡིན་ན་རྒྱ་ནག་གི་དཔལ་འབྱོར་གྱི་གནས་སྟངས་ལ་ཡར་རྒྱས་ཆེན་པོ་ཞིག་ཕྱིན་ཡོད་པ་མ་ཟད། དེ་མཚུངས་གནད་དོན་གཞན་གྱི་ཐོག་ལ་ཡང་འགྱུར་བ་ཤུགས་ཆེན་པོ་ཞིག་ཕྱིན་པ་ཡོད་པ་རེད། ཞི་ཅིང་ཕིང་གིས་ལྐོག་ཟ་རུལ་སུངས་ཐོག་འཛིན་པའི་སྲིད་བྱུས་བཅས་ལ་བསྔགས་བརྗོད་མཛད་པ་དང་ཆབས་ཅིག རྒྱ་མི་རིགས་ནི་ལོ་རྒྱུས་དང་རིག་གཞུང་ལྡན་པའི་མི་རིགས་ཤིག་ཡིན་པའི་ཁར། ལས་ཀ་རུ་ངར་པོ་བྱེད་ཐུབ་མཁན་གྱི་མི་རིགས་ཤིག་ཡིན་པ་སོགས་བཀའ་བརྩལ་དང་འབྲེལ་གནས་སྟངས་ཁྱོན་ཡོངས་ནས་བལྟས་ཚེ་མ་འོངས་པར་བོད་ཀྱི་དཀའ་ངལ་སེལ་བར་རེ་བ་ཡོད་པའི་བཟང་པོའི་ཆ་ཞིག་གཟིགས་ཀྱི་ཡོད་པ་བཀའ་གནང་ཡོད། དེ་བཞིན་༸གོང་ས་མཆོག་ལ་རིང་མིན་མགོན་པོ་༸གང་ཉིད་ཨ་རིར་ཆིབས་བསྒྱུར་གནང་སྐབས་ཨ་རིའི་སྲིད་འཛིན་གསར་པ་ Donald Trump མཆོག་དང་མཇལ་འཕྲད་གནང་རྒྱུའི་མཛད་རིམ་ཡོད་མེད་དང་། ༸གོང་ས་མཆོག་ནས་སྲིད་འཛིན་ཊམ་ཐོག་དགོངས་ཚུལ་ཇི་འདྲ་ཡོད་དམ་ཞེས་བཀའ་འདྲི་ཞུས་པར། ༸གོང་ས་མཆོག་གིས་ངོས་རང་ཨ་མི་རི་ཀར་དངོས་གནས་དགའ་མཁན་ཞིག་ཡིན། ཨ་རི་ནི་རང་དབང་ཅན་གྱི་འཛམ་གླིང་སྣེ་ཁྲིད་བྱེད་མཁན་གྱི་རྒྱལ་ཁབ་ཞིག་ཏུ་ངོས་འཛིན་བྱེད་ཀྱི་ཡོད། འོན་ཀྱང་ཨ་རིའི་མི་གང་ཟག་གཅིག་གི་གནད་དོན་སྐོར་ལ་ངོས་ནས་ཞུ་ཚོད་ཐིག་གི་མི་འདུག། ད་ལྟ་འཕྲལ་དུ་དེའི་སྐོར་བཤད་ན་སྔ་དྲག་ཡོད་སྟབས། དེ་ལས་གང་ཡང་མ་གསུང་པར་བཞུགས་ན་ལེགས་པ་མེད་དམ་ཞེས་བཀའ་གནང་ཡོད། རྩ་བའི་ཁ་སང་ལྡི་ལི་གསར་པའི་ Taj Mansingh མགྲོན་ཁང་དུ་གོ་སྒྲིག་ཞུས་པའི་ Indian Express གསར་ཁང་གི་ Express Adda ཞེས་པའི་གླེང་མོལ་གྱི་ལས་རིམ་ཐོག་ལ་༸གོང་ས་མཆོག་དབུ་བཞུགས་གཙོས། རྒྱ་གར་གྱི་གནད་ཡོད་ཆབ་སྲིད་མི་སྣ་དང་། དཔལ་འབྱོར་རིག་པ་བ། ཚོང་འབྲེལ་མི་སྣ། མཁས་དབང་དང་ཕྱི་རྒྱལ་གཞུང་ཚབ་ཁག་ཅིག་གི་མི་སྣ་སོགས་ཁྱོན་མི་གྲངས་ ༣༠༠ བརྒལ་བ་ཞིག་འདུ་འཛོམས་བྱུང་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེ་གཞུང་གི་སྤྱི་ཚོགས་བདེ་དོན་ཡར་རྒྱས་ཚན་པ་དང་། རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་གཉིས་ཐུན་མོང་གིས་ཇི་ལྟར་གདན་ཞུ་གསོལ་འདེབས་ཞུས་དོན་བཞིན་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་གྲོང་ཁྱེར་སྦེང་ལོར་ནང་དུ་རྒྱ་གར་གྱི་དབུ་ཁྲིད་ Dr.B.R. Ambedkar དམ་པ་དེ་ཉིད་སྐུ་འཁྲུངས་ནས་ལོ་ ༡༢༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་གཙོ་བོར་དབུ་བཞུགས་མཛད་པ་དང་འདི་བཞིན་མཛད་འཆར་ཁག་ལེགས་གྲུབ་ཀྱིས་དེ་རིང་ཟླ་ ༥ ཚེས་ ༢༤ ཉིན་སྔ་དྲོ་ཚོུད་ ༧།༠༠ སྟེང་སྦེང་ལོར་གྲོང་ཁྱེར་ནས་མཁའ་ལམ་བརྒྱུད་རྒྱལ་ས་ལྡི་ལིར་ཆིབས་ཞལ་སྒྱུར་གནང་མཛད་ཡོད་པ་རེད། སྐབས་དེར་ཀ་ན་ཊ་ཀ་མངའ་སྡེ་གཞུང་གི་སྤྱི་ཚོགས་བདེ་དོན་ཚན་པའི་དྲུང་ཆེ་མཆོག་དང་ལྷོ་སྤྱི་ཆོས་འཕེལ་ཐུབ་བསྟན་བཅས་གནམ་ཐང་དུ་ཕེབས་སྐྱེལ་ལ་ལྷན་བཅར་ཞུས་འདུག གཞི་རྩའི་ཁ་སང་ཚེས་ ༢༣ ཉིན་སྦེང་ལོར་ནང་དུ་རྒྱ་གར་གྱི་དབུ་ཁྲིད་ Dr.B.R. Ambedkar དམ་པ་དེ་ཉིད་སྐུ་འཁྲུངས་ནས་ལོ་ ༡༢༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་གཙོ་བོར་དབུ་བཞུགས་ཀྱིས་ལམ་སྟོན་བཀའ་སློབ་བརྩལ་ཡོད་པ་དང་། དེ་བཞིན་མངའ་སྡེའི་ཡུལ་སྐོར་བློན་ཆེན་དང་སྐོར་སྲུང་དཔོན་སོགས་གནད་ཡོད་མི་སྣ་ཁག་ཅིག་ལ་མཇལ་འཕྲད་མཛད་ཡོད་པ་རེད། ཤེས་རྟོགས་བྱུང་བར་གཞིགས་ན། དེ་རིང་ཚེས་ ༢༤ ཉིན་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལིར་༸ཞབས་སོར་བདེ་བར་འཁོད་གནང་ཡོད་པ་དང་། རྒྱ་གར་གྱི་ Indian Express གསར་ཁང་གི་ལས་བྱེད་རྣམས་ཀྱིས་ཇི་ལྟར་གདན་ཞུ་གསོལ་འདེབས་ཞུ་དོན་ལྟར། ཉིན་རྒྱབ་ཏུ་མགོན་པོ་༸གང་ཉིད་མཆོག་གི་བཞུགས་གནས་ Taj Mahal གསོལ་མགྲོན་ཁང་དུ་གསར་ཁང་དེའི་ལས་བྱེད་རྣམས་ལ་མཇལ་ཁ་དང་བླང་དོར་གྱི་ལམ་སྟོན་བཀའ་སློབ་བརྩལ་གནང་གི་ཡོད་པ་རེད། སང་ཉིན་ཚེས་ ༢༥ ཉིན་རྒྱལ་ས་ལྡི་ལིར་རྒྱ་གར་གྱི་བློན་ཆེན་ཟུར་པ་ Arun Shouri མཆོག་གིས་ལྗགས་རྩོམ་གནང་པའི་ཕྱག་དེབ་དབུ་འབྱེད་དང་བཀའ་སློབ་བརྩལ་གནང་རྒྱུའི་མཛད་རིམ་ཡོད་པ་རེད་འདུག

རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེ་གཞུང་གི་སྤྱི་ཚོགས་བདེ་དོན་ཡར་རྒྱས་ཚན་པ་དང་། རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་གཉིས་ཐུན་མོང་གིས་ཇི་ལྟར་གདན་ཞུ་གསོལ་འདེབས་ཞུས་དོན་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ཟླ་ ༥ ཚེས་ ༢༣ ཉིན་རྒྱ་གར་གྱི་རྩ་ཁྲིམས་གསར་བཟོ་གནང་མཁན་དང་སྤྱི་ཚོགས་དྲང་བདེན་དང་ཕོ་མོ་འདྲ་མཉམ་བཅས་ཀྱི་ཐོག་ཆེས་མཛད་རྗེས་སྙན་གྲགས་ཆེ་བའི་རྒྱ་གར་གྱི་དབུ་ཁྲིད་ Dr.B.R. Ambedkar དམ་པ་དེ་ཉིད་སྐུ་འཁྲུངས་ནས་ལོ་ ༡༢༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་གཙོ་བོར་དབུ་བཞུགས་ཀྱིས་སྤྱི་ཚོགས་ཁྲོད་དྲང་བདེན་གྱི་ཁྲིམས་ལུགས་ལག་བསྟར་དགོས་པའི་སྐོར་དང་མི་རིགས་འདྲ་མཉམ་སྐོར་གྱི་བརྗོད་གཞིའི་ཐོག་ལམ་སྟོན་བཀའ་སློབ་བརྩལ་གནང་མཛད་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ Dr.B.R. Ambedkar དམ་པ་དེ་ཉིད་ནི་རྒྱ་གར་གྱི་རྩ་ཁྲིམས་གསར་གཏོད་གནང་པ་དང་། ལྷག་པར་དུ་རྒྱ་གར་ནང་དུ་རིགས་དམན་པའི་མི་རིག ས་ལ་དབྱེ་འབྱེད་ཀྱིས་མཐོང་ཆུང་བྱེད་པའི་ལམ་ལུགས་ལ་བསྒྱུར་བཅོས་གནང་པའི་རླབས་ཆེན་གྱི་བྱ་གཞག་ལ་ཡི་རངས་བསྔགས་བརྗོད་གནང་པ་དང་འབྲེལ། སྤྱིར་རིགས་དམན་པར་དབྱེ་འབྱེད་དང་མཐོང་ཆུང་བྱེད་པ་དེ་ནི་ཆོས་ལུགས་ནང་ནས་བྱུང་བ་ཞིག་མིན་པར་དེ་ནི་མིའི་སྤྱི་ཚོགས་དང་བསམ་བློ་གཏོང་སྟངས་ཐོག་ནས་བྱུང་བ་ཞིག་ཡིན་པས་ད་ལྟའི་དུས་འདིར་ལམ་ལུགས་དེ་དག་རྩ་བ་ནས་མེད་པ་བཟོ་དགོས་གལ་ཡིན་པའི་ལམ་སྟོན་བཀའ་སློབ་མཛད་ཡོད། ༸གོང་ས་མཆོག་ནས་མུ་མཐུད་མི་སུ་འདྲ་ཞིག་ཡིན་རུང་མིའི་ནུས་པ་གཅིག་མཚུངས་ཡོད་སྟབས་རིགས་དམན་པ་ཚོས་རང་ཉིད་ལ་རིགས་དམན་པ་ཡིན་བསམ་པའི་བག་འཁུམས་པའི་བསམ་བློ་དོར་ཏེ་རང་ཉིད་ལ་འགྲོ་བ་མི་སྤྱི་མཚུངས་ཀྱི་ནུས་པ་ཡོད་བསམ་ནས་རང་གིས་རང་ལ་གདེང་ཚོད་དང་སྤོབས་པ་བསྐྱེད་དགོས་གལ་ཡིན་པ་སོགས་ཀྱི་བཀའ་སློབ་བརྩལ་ཡོད་པ་རེད། ༸གོང་ས་མཆོག་གིས་དེ་སྔོན་མགོན་པོ་༸གང་ཉིད་མཆོག་ལྷོ་ཨ་ཕི་རི་ཁའི་ནང་དུ་ཕེབས་སྐབས་ཁྱེད་རང་ཚོོ་རང་དབང་ཐོབ་ཡོད་པས་ད་ནས་སྤོབས་པ་དང་གདེང་ཚོད་ཡོད་པའི་སྒོ་ནས་ལས་ཀ་བྱེད་དགོས་ཞེས་བཀའ་བརྩལ་སྐབས་ཡུལ་དེའི་མི་རིགས་ཀྱིས་ང་ཚོ་མི་ནི་རིགས་ནག་པོ་ཡིན་སྟབས་རང་བཞིན་གྱིས་སྐྱོ་བ་ཡོད་ཅེས་ལན་འདེབས་བྱས་པ་ཞིག་ལུང་འདྲེན་གནང་པ་དང་ཆབས་ཅིག མི་རིགས་དང་ཤ་མདོག་གི་ཁྱད་པར་གང་ཡིན་ཡང་མི་ཚང་མར་ནུས་པ་གཅིག་མཚུངས་ཡོད་སྟབས་རིགས་དམན་པ་ཚོས་སློབ་སྦྱོང་ལ་དོ་སྣང་གནང་ཚེ་རང་ཉིད་ཙམ་མིན་པར་སྤྱི་ཚོགས་ཁྱོན་ལ་ཕན་པའི་ཞབས་འདེགས་བསྒྲུབ་ཐུབ་ངེས་ཡིན་པའི་བཀའ་ནན་བརྩལ་ཡོད་པ་རེད། སྐབས་དེར་མཛད་སྒོའི་སྐུ་མགྲོན་གཙོ་བོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་ཀ་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Siddaramaiah མཆོག་དང་སྤྱི་ཚོགས་བདེ་དོན་བློན་ཆེན་སྐུ་ཞབས་ Sri. H. Anjaneya མཆོག རྒྱ་གར་གྱི་ཕྱོགས་འགལ་ཚོགས་པའི་གྲོས་ཚོགས་ཀྱི་དབུ་ཁྲིད་སྐུ་ཞབས་ Malikarjuna Kharge མཆོག མངའ་སྡེའི་གྲོས་ཚོགས་ཀྱི་ཚོགས་གཙོ་དང་ཕྱོགས་འགལ་ཚོགས་པའི་ཚོགས་གཙོ། བློན་ཆེན་སོགས་གནད་ཡོད་མི་སྣ་མང་དག་ཞིག་ཕེབས་གནང་པ་མ་ཟད། ཁོང་རྣམ་པ་གསུམ་གྱིས་ Dr.B.R. Ambedkar དམ་པ་དེ་ཉིད་སྐུ་འཚོ་བཞུགས་སྐབས་ཀྱི་མཛད་རྗེས་ལ་རྗེས་དྲན་ཆེ་བསྟོད་ཀྱི་གསུང་བཤད་གནང་པ་དང་། དེ་བཞིན་ཀ་ན་ཊ་ཀ་མངའ་སྡེ་གཞུང་ནས་རིགས་དམན་པ་ཚོར་དམིགས་བསལ་གཟིགས་སྐྱོང་གནང་བཞིན་པའི་ཁར། ཤེས་ཡོན་དང་དཔལ་འབྱོར་སོགས་ཀྱི་འཛུགས་སྐྲུན་ལས་འཆར་མང་པོ་ཞིག་ཡོད་པ་སོགས་ཀྱི་གསུང་བཤད་གནང་ཡོད་པ་རེད། ལྷག་དོན་རྒྱ་གར་གྱི་ཕྱོགས་འགལ་ཚོགས་པའི་གྲོས་ཚོགས་ཀྱི་དབུ་ཁྲིད་སྐུ་ཞབས་ Malikarjuna Kharge མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ནི་འཛམ་གླིངའདིའི་ནང་གི་མི་ས་ཡ་མང་པོས་གུས་བརྩི་ཞུ་ཡུལ་གྱི་སྐྱེས་བུ་ཁྱད་དུ་འཕགས་པ་ཞིག་ཡིན་པ་སོགས་ཀྱི་ཆེ་བསྟོད་ཀྱང་རྒྱ་ཆེ་ཞུས་གནང་ཡོད། རྩ་བའི་དེ་རིང་གི་མཛད་སྒོ་དེའི་ཐོག་ལ་སྐུ་མགྲོན་རྣམ་པ་དང་གནད་ཡོད་མི་སྣ། དེ་བཞིན་མང་ཚོགས་སོགས་ཁྱོན་མི་གྲངས་ ༢༠༠༠ ལྷག་ཕེབས་ཡོད་པ་རེད་འདུག ཤེས་རྟོགས་བྱུང་བར་གཞིགས་ན།  སང་ཚེས་ ༢༤ ཉིན་༸གོང་ས་མཆོག་སྦེང་ལོར་ནས་ཆིབས་ཞལ་བསྒྱུར་གནང་སྟེ་རྒྱ་གར་གྱི་རྒྱལ་ས་ལྡི་ལིར་ཕེབས་གནང་གི་ཡོད་པ་དང་། རྒྱ་གར་གྱི་ Indian Express གསར་ཁང་གི་ལས་བྱེད་རྣམས་ཀྱིས་ཇི་ལྟར་གདན་ཞུ་གསོལ་འདེབས་ཞུ་དོན་བཞིན་གསར་ཁང་དེའི་ལས་བྱེད་རྣམས་ལ་བླང་དོར་གྱི་ལམ་སྟོན་བཀའ་སློབ་བརྩལ་གནང་རྒྱུ་དང་། དེ་རྗེས་ཕྱི་ཚེས་ ༢༥ ཉིན་རྒྱལ་ས་ལྡི་ལིར་རྒྱ་གར་གྱི་བློན་ཆེན་ཟུར་པ་ Arun Shouri མཆོག་གིས་ལྗགས་རྩོམ་གནང་པའི་ཕྱག་དེབ་དབུ་འབྱེད་དང་བཀའ་སློབ་བརྩལ་གནང་རྒྱུའི་མཛད་རིམ་ཡོད་པ་རེད་འདུག

རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེ་གཞུང་གི་སྤྱི་ཚོགས་བདེ་དོན་ཡར་རྒྱས་ཚན་པ་དང་། རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་གཉིས་ཐུན་མོང་གིས་ཇི་ལྟར་གདན་ཞུ་གསོལ་འདེབས་ཞུས་དོན་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སང་ཉིན་ཚེས་ ༢༣ ཉིན་རྒྱ་གར་གྱི་རྩ་ཁྲིམས་གསར་བཟོ་གནང་མཁན་དང་སྤྱི་ཚོགས་དྲང་བདེན་དང་ཕོ་མོ་འདྲ་མཉམ་བཅས་ཀྱི་ཐོག་ཆེས་མཛད་རྗེས་སྙན་གྲགས་ཆེ་བའི་རྒྱ་གར་གྱི་དབུ་ཁྲིད་ Dr.B.R. Ambedkar དམ་པ་དེ་ཉིད་སྐུ་འཁྲུངས་ནས་ལོ་ ༡༢༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་གཙོ་བོར་གདན་ཞུ་གསོལ་འདེབས་ཞུ་དོན་ལྟར་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་དེ་རིང་ཚེས་ ༢༢ སྔ་དྲོ་ཚོུད་ ༩།༣༠ ཐོག་ལྷོ་ཕྱོགས་སྦེང་ལོར་གྲོང་ཁྱེར་གྱི་གནམ་ཐང་དུ་༸ཞབས་སོར་བདེ་བར་འཁོད་གནང་ཡོད་པ་དང་། སྐབས་དེར་ལྷོ་ཕྱོགས་ཀ་ན་ཊ་ཀ་མངའ་སྡེ་གཞུང་གི་སྤྱི་ཚོགས་བདེ་དོན་བློན་ཆེན་སྐུ་ཞབས་ Sri. H. Anjaneya མཆོག་དང་ལྷོ་སྤྱི་ཆོས་འཕེལ་ཐུབ་བསྟན། ལྷོ་ཕྱོགས་གཞིས་ཆགས་ཁག་ལྔའི་ནང་རྟེན་གཞི་བྱས་པའི་ཆོས་བརྒྱུད་ཁག་གི་མཁན་པོ་དང་སྐུ་ཚབ་རྣམ་པ། བླ་སྤྲུལ་ཁག་ཅིག ལྷོ་ཕྱོགས་གཞིས་ཆགས་ཁག་གི་ས་གནས་འགོ་འཛིན་རྣམ་པ་སོགས་གནད་ཡོད་མི་སྣ་ཁག་ཅིག་ཕེབས་བསུར་བཅར་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་བཞུགས་གནས་མགྲོན་ཁང་དུ་༸ཞབས་སོར་འཁོད་བསྟུན་བྱང་རྩེ་ཆོས་རྗེ་རིན་པོ་ཆེ་མཆོག་དང་མཁན་བླ་སྤྲུལ་ཁག་ཅིག སེར་བྱེས་ཕྱག་མཛོད་ཆེན་མོ་སོགས་གནད་ཡོད་མི་སྣ་ཁག་ཅིག་གིས་ཕེབས་བསུ་ཞུས་ཡོད་པ་དང་། སྐབས་དེར་༸གོང་ས་མཆོག་གིས་སེར་བྱེས་མཁས་སྙན་གྲྭ་ཚང་གི་འབྲེལ་ཡོད་ཨ་རི་ཨེ་མོ་རི་གཙུག་ལག་སློབ་གྲྭ་ནས་ཕེབས་པའི་དགེ་རྒན་མི་སྣ་བདུན་ལ་མཇལ་ཁ་དང་ལམ་སྟོན་བཀའ་སློབ་བརྩལ་བ་མ་ཟད། ཀ་ན་ཊ་ཀ་མངའ་སྡེའི་ཡུལ་སྐོར་བློན་ཆེན་སོགས་དཔོན་རིགས་ཁག་ཅིག་ལ་མཇལ་ཁ་དང་བཀའ་སློབ་བརྩལ་ཡོད་པ་རེད། གཞི་རྩའི་སང་ཕྱི་ཚེས་ ༢༣ ཉིན་སྔ་དྲོ་ཆུ་ཚོད་ ༡༠ ནས་ ༡༢།༠༠ བར་༸གོང་ས་མཆོག་གིས་སྦེང་ལོར་གྲོང་ཁྱེར་གི་ Dr.B.R. Ambedkar Bhavan ཞེས་དམ་པ་དེའི་དྲན་རྟེན་ཚོགས་ཁང་དུ་མཛད་སྒོའི་ཐོག་དབུ་བཞུགས་གནང་རྒྱུ་དང་། སྤྱི་ཚོགས་ཁྲོད་དྲང་བདེན་གྱི་ཁྲིམས་ལུགས་ལག་བསྟར་དགོས་པའི་སྐོར་གྱི་བརྗོད་གཞིའི་ཐོག་མང་ཚོགས་སྟོང་ཚོོ་བརྒལ་བར་བཀའ་སློབ་བརྩལ་གནང་རྒྱུ་རེད་འདུག སྐབས་དེར་ཀ་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Siddaramaiah མཆོག་དང་སྤྱི་ཚོགས་བདེ་དོན་བློན་ཆེན་སྐུ་ཞབས་ Sri. H. Anjaneya མཆོག རྒྱ་གར་གྱི་ཕྱོགས་འགལ་ཚོགས་པའི་གྲོས་ཚོགས་ཀྱི་དབུ་ཁྲིད་སྐུ་ཞབས་ Malikarjuna Kharge མཆོག་བཅས་ཕེབས་རྒྱུ་ཡིན་པ་མ་ཟད། མངའ་སྡེའི་གྲོས་ཚོགས་ཀྱི་ཚོགས་གཙོ་དང་ཕྱོགས་འགལ་ཚོགས་པའི་ཚོགས་གཙོ།  བློན་ཆེན་སོགས་གནད་ཡོད་མི་སྣ་མང་དག་ཞིག་ཕེབས་གནང་གི་ཡོད་པ་རེད། ཤེས་རྟོགས་བྱུང་བར་གཞིགས་ན།  རྒྱ་གར་གྱི་ Indian Express གསར་ཁང་གི་ལས་བྱེད་རྣམས་ཀྱིས་ཇི་ལྟར་གདན་ཞུ་གསོལ་འདེབས་ཞུ་དོན་བཞིན་༸གོང་ས་མཆོག་ཚེས་ ༢༤ ཉིན་སྦེང་ལོར་ནས་ཆིབས་ཞལ་བསྒྱུར་གནང་སྟེ་རྒྱ་གར་གྱི་རྒྱལ་ས་ལྡི་ལིར་ཡོད་པའི་རྒྱ་གར་གྱི་ Indian Express གསར་ཁང་གི་ལས་བྱེད་རྣམས་ལ་བླང་དོར་གྱི་ལམ་སྟོན་བཀའ་སློབ་བརྩལ་གནང་རྒྱུ་དང་། དེ་རྗེས་ཕྱི་ཚེས་ ༢༥ ཉིན་རྒྱལ་ས་ལྡིི་ལིར་རྒྱ་གར་གྱི་བློན་ཆེན་ཟུར་པ་ Arun Shouri མཆོག་གིས་ལྗགས་རྩོམ་གནང་པའི་ཕྱག་དེབ་དབུ་འབྱེད་དང་བཀའ་སློབ་བརྩལ་གནང་རྒྱུའི་མཛད་རིམ་ཡོད་པ་རེད་འདུག

ཡུ་རོབ་གྲོས་ཚོགས་ཀྱི་ཡོ་རོབ་མི་མང་ཚོགས་པ་དང་སྤྱི་ཚོགས་རིང་ལུགས་དང་མང་གཙོའི་རིང་ལུགས་ཀྱི་ཡར་ཐོན་སྣ་འབྲེལ་ཚོགས་པ་སོགས། ཆབ་སྲིད་ཚོགས་པ་ཁག་མི་འདྲ་བ་ལྔ་ཡི་གྲོས་ཚོགས་འཐུས་མི་ཁག་ཅིག་གིས་ཕྱག་རོགས་བོད་དོན་རྒྱབ་སྐྱོར་བ་ལས་བྱེད་བདུན་ཁ་སང་ཚེས་ ༢༡ ཉིན་དགུང་བཞུགས་སྒར་དུ་ཕེབས་འབྱོར་བྱུང་མ་ཐག་ཀངྒ་ར་གནམ་ཐང་དུ་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུས་འདུག རྩ་བའི་ཐེངས་འདིའི་ཡུ་རོབ་གྲོས་ཚོགས་འཐུས་མིའི་ལས་བྱེད་བོད་དོན་རྒྱབ་སྐྱོར་བ་བདུན་པོའི་ཁོངས་ལྕམ Zsuzsana Ferenczy ལགས་དང་། ལྕམ་ Dalila Bernard ལགས། ལྕམ་ Margareta Kovacova ལགས་དང་ལྕམ་ Harriet Clayton ལགས་ལྕམ་ Gyongyver Forro ལགས་དང་སྐུ་ཞབས་ Flavien Deltortl དེ་བཞིན་སྐུ་ཞབས་Francesco Giorgi ལགས་བཅས་ཕེབས་འདུག ལྕམ་སྐུ་ Harriet ལགས་ཀྱིས་གསར་འགོད་པའི་བཅར་འདྲི་དང་ལེན་དང་སྦྲགས་ཁོང་རྣམ་པ་ཁ་སང་༸གོང་ས་མཆོག་མཇལ་རྒྱུ་བྱུང་བ་གོ་སྐབས་བཟང་པོ་ཞིག་དང་དགའ་ཚོར་ཆེན་པོ་བྱུང་ཡོད་པ་དང་། ༸གང་ཉིད་མཆོག་གི་དྲུང་ནས་འཚེ་མེད་ཞི་བ་དང་གྲོས་མོལ་གྱི་ཐབས་ལམ་སྐོར་ལམ་སྟོན་གནང་ཡོད་སྐོར་གསུངས་སོང་། སྐུ་ཞབས་ Francesco Giorgi ལགས་སུ་དེ་རིང་སྔ་ཐོག་ཁོང་རྣམ་པ་འཚམས་གཟིགས་འདིའི་ཁྲོད་དེ་རིང་བོད་མི་མང་སྤྱི་འཐུས་ལྷན་ཚོགས་སུ་ཕེབས་པ་དང་སྤྱི་འཐུས་ཚོགས་གཞོན་ཨཙཱརྱ་ཡེ་ཤེས་ཕུན་ཚོགས་མཆོག་མཇལ་འཕྲད་སྐོར་བཅར་འདྲི་ཞུས་པར། ཚོགས་གཞོན་མཆོག་དང་མཇལ་འཕྲད་འདི་ནས་ང་ཚོས་གཞུང་དང་གཞུང་གི་གནང་མ་ཐུབ་པ་ཁག་ཅིག་གྲོས་ཚོགས་ཀྱི་འབྲེལ་ལམ་ཐོག་ནས་གནང་ཐུབ་ཡག་ཡོད་པ་ངོས་འཛིན་ཐུབ་ཡོད་སྐོར་གསུངས་ཀྱིས་འདུག ཐེངས་འདིའི་ཡོ་རོབ་གྲོས་ཚོགས་འཐུས་མིའི་ཕྱག་རོགས་ལས་བྱེད་རྣམས་པ་དང་ལྷན་དུ་ཕེབས་པ་སྦར་སེལ་སྐུ་ཚབ་དོན་ཁང་གི་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚན་པའི་འབྲེལ་ཡོད་ལས་བྱེད་རིག་འཛིན་ཆོས་སྒྲོན་ལགས་ཀྱིས་གསུངས་པར། ཡུ་རོབ་གྲོས་ཚོགས་ནས་བོད་དོན་རྒྱབ་སྐྱོར་ཡོང་བར་གྲོས་ཚོགས་འཐུས་མི་གཅིག་པོ་མ་ཡིན་པར་ཁོང་རྣམ་པ་དང་ལྷན་དུ་ཕྱག་རོགས་ལས་བྱེད་རྣམ་པའི་རྒྱབ་སྐྱོར་དེ་ཡང་ཧ་ཅང་གལ་གནད་ཆགས་ཀྱི་ཡོད་སྟབས་ད་རེས་ཁོང་ལས་བྱེད་རྣམས་ལ་བོད་མིའི་སྤྱི་ཚོགས་རྒྱུས་ལོན་ཆེད་དུ་གདན་ཞུ་ཕུལ་བ་ཞིག་རེད་འདུག གཞི་རྩའི་ཡུ་རོབ་གྲོས་ཚོགས་འཐུས་མིའི་ལས་ཁུངས་སུ་ཕྱག་ལས་གནང་མཁན་ལས་བྱེད་བོད་དོན་རྒྱབ་སྐྱོར་ཚོགས་པ་དེ་བཞིན་སྔ་ལོ་༢༠༡༦ཕྱི་ཟླ་ ༡༠ཚེས་༡༧གསར་འཛུགས་གནང་ཡོད་པ་དང་། ཚོགས་པ་དེ་དང་གྲོས་ཚོགས་འཐུས་མི་རྣམས་པའི་རྒྱབ་སྐྱོར་འོག་སྔ་ལོའི་ཟླ་༡༢ནང་ཡོ་རོབ་གྲོས་ཚོགས་ནས་བོད་གྲོས་ཆོད་བཞག་གནང་སྟེ། རྒྱ་ནག་གཞུང་ནས་བླ་རུང་སྒར་གཏོར་བཤིག་དང་གྲྭ་བཙུན་རྣམ་པ་བཙན་དབང་གིས་ཕྱིར་འབུད་གཏོང་བཞིན་པ་དེར་སྐྱོན་བརྗོད་ཤུགས་ཆེ་བྱས་པ་དང་སྦྲགས། རྒྱ་ནག་གཞུང་ལ་བོད་མིའི་སྐུ་ཚབ་དང་ལྷན་བོད་རྒྱ་ཞི་མོལ་བསྐྱར་གསོ་དགོས་པའི་རེ་འདུན་བཏོན་ཡོད་པ་རེད། ཡུ་རོབ་གྲོས་ཚོགས་འཐུསམིའི་ལས་བྱེད་བོད་དོན་རྒྱབ་སྐྱོར་བ་རྣམས་པ་ཟླ་བ་འདིའི་ཚེས་༢༦བར་བཞུགས་སྒར་དུ་འཚམས་གཟིགས་གནང་གི་འདུག་པ་དང་དེའི་ཁྲོད་ཁོང་རྣམས་པས་བོད་མིའི་སྒྲིག་འཛུགས་དང་གཞུང་འབྲེལ་མིན་པའི་ཚོགས་པ་ཁག་ཅིག་གིས་ལས་བྱེད་ཚོགས་མི་རྣམ་པ་དང་མཇལ་འཕྲད་ཙམ་མ་ཟད། ས་ར་མཐོ་སློབ་དང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་སོགས་ཤེས་ཡོན་དང་རིག་གཞུང་ལྟེ་གནས་ཁང་ཁག་ཅིག་ཏུ་ཕེབས་གནང་གི་འདུག