Tibetan Royal Year of 2151 | Year of the Wood Dragon

༸གོང་ས་མཆོག

༸གོང་ས་མཆོག་དབུ་བཞུགས་ཐོག་འབྲས་སྤུངས་ཕྱག་བཏབ་ནས་ལོ་ངོ་ ༦༠༠ འཁོར་བའི་དུས་དྲན་སྲུང་བརྩི་ཞུས་པ།

དེ་རིང་ཟླ་ ༡༢ ཚེས་ ༢༡ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཁུལ་དུ་རྟེན་གཞི་བྱས་པའི་བྱེས་ཀྱི་གདན་ས་ཆེན་པོ་འབྲས་སྤུངས་ཚོགས་ཆེན་དུ་༸རྗེ་ཙོང་ཁ་པ་བློ་བཟང་གྲགས་པ་མཆོག་གི་དངོས་སློབ་འཇམ་དབྱངས་ཆོས་རྗེ་བཀྲིས་དཔལ་ལྡན་མཆོག་གིས་གདན་ས་ཆེན་པོ་དཔལ་ལྡན་འབྲས་སྤུངས་དགོན་པ་ཕྱག་བཏབ་ནས་ལོ་ངོ་ ༦༠༠ འཁོར་བའི་རྗེས་དྲན་མཛད་སྒོ་ཚོགས་ཡོད་པ་རེད། མཛད་སྒོའི་མགྲོན་གྱི་གཙོ་བོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་གཙོས་པའི་དགའ་ལྡན་ཁྲི་པ་གསར་རྙིང་གཉིས་དང་། ཤར་བྱང་གི་ཆོས་རྗེ། འབྲས་སྤུངས་ཁྲི་པ་རིན་པོ་ཆེ། མཁན་བླ་སྤྲུལ་དགེ་བའི་བཤེས་གཉེན་རྣམ་པ། དབུས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། ཨུ་རུ་སུའི་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག རྒྱ་གར་ས་གནས་རྫོང་དཔོན་བཅས་ཕྱི་ནང་གི་གནད་ཡོད་སྐུ་མགྲོན་རྣམ་པ་དང་། དེ་བཞིན་ས་གནས་ཀྱི་སེར་སྐྱ་མང་ཚོགས་ ༣༠༠༠ ལྷག་འདུ་འཛོམས་ཀྱིས་དུས་དྲན་སྲུང་བརྩི་གཟབ་རྒྱས་ཞུས་ཡོད་པ་རེད། ༸གོང་ས་མཆོག་གིས་སྐབས་དེར་དགེ་ལྡན་ལུགས་བཟང་གཙུག་ལག་སློབ་གཉེར་ཁང་ཆེན་མོའི་དགེ་བཤེས་ལྷ་རམས་པ་ ༢༣༥ དང་སློབ་དཔོན་ ༢༣༩ བཀའ་རམས་པ་ ༣༣༤ བཅས་ལ་ཕྱག་འཁྱེར་གསོལ་བསྩལ་མཛད་ཡོད་པ་དང་། ༸གང་ཉིད་མཆོག་གིས་དགེ་བཤེས་དེ་དག་ལ་ཕྱག་དཔེ་གཟིགས་པའི་དགོས་དོན་གཙོ་བོ་ནི་རང་ཉིད་ལ་མཁས་པའི་མིང་གྲགས་ཡོང་བའི་ཆེད་དུ་མིན་པར་གཤིས་རྒྱུད་འདུལ་ཐབས་གནང་དགོས་པ་དང་། དེའང་རང་རྒྱུད་ཀྱི་ཉོན་མོངས་དུག་གསུམ་དྲུང་ནས་མེད་པ་བཟོ་ཐབས་ལ་འབད་དགོས་གལ་ཡིན་པར་ལམ་སྟོན་བཀའ་སློབ་བསྩལ་ཡོད་པ་རེད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་ངོས་ནས་འཚམས་འདྲི་གནང་པ་དང་ཆབས་ཅིག བོད་མི་རྣམས་བཙན་བྱོལ་དུ་གྱར་རྗེས་༸གོང་ས་མཆོག་གིས་གཙོས་པའི་དགེ་འདུན་པ་རྒན་པ་རྣམས་ཀྱི་བཀའ་དྲིན་འོག་བོད་ཀྱི་ནང་ཆོས་དེ་སླར་ཡང་བཙན་བྱོལ་ནང་བསྐྱར་གསོ་གནང་པ་མ་ཟད། འཛམ་གླིང་ཡོངས་ལ་ངོམས་སུ་ཆོག་པ་ཞིག་ཆགས་ཡོད་པ་རེད། ད་ལན་འབྲས་སྤུངས་དགོན་པ་ཕྱག་བཏབ་ནས་ལོ་ ༦༠༠ འཁོར་བའི་རྗེས་དྲན་དེའང་རླབས་ཆེན་ཞིག་ཆགས་ཡོད་པ་དང་། ང་ཚོས་ངོས་ནས་ཀྱང་འདས་པའི་ལོ་ ༦༠༠ ནང་གདན་ས་འབྲས་སྤུངས་གཙོས་པའི་གདན་གསུམ་གྱི་ངོས་ནས་དཔལ་ན་ལེནྡྲའི་ཆོས་བརྒྱུད་འཛིན་སྐྱོང་སྤེལ་གསུམ་གནང་པའི་མཁས་པ་གྲངས་ལས་འདས་པ་གསོ་སྐྱོང་གནང་ཡོད་པ་ལྟར། མ་འོངས་པར་ལོ་ངོ་ ༦༠༠ གནས་ཐུབ་ཐབས་ལ་སྙིང་སྟོབས་དང་འབད་བརྩོན་གནང་དགོས་པ་རེད་ཅེས་འབོད་སྐུལ་ཞུས་སོང་། དེ་བཞིན་བོད་མི་མང་སྤྱི་འཐུས་ཚོགས་གཙོ་མཆོག་གིས་དེ་རིང་མཛད་སྒོ་དང་འབྲེལ་བའི་གསུང་བཤད་སྐབས་ད་བར་གཞིས་བཞུགས་བོད་མི་ཚོས་རྒྱ་གཞུང་གིས་དྲག་གནོན་བཟོད་ཐབས་མེད་པ་ལ་མ་ལྟོས་པར་བོད་ཀྱི་ཆོས་དང་རིག་གཞུང་། སྐད་ཡིག་བཅས་ཀྱི་ཆེད་དུ་ཞུམ་པ་མེད་པའི་ལྷག་བསམ་དང་ལ་རྒྱ། དེ་བཞིན་སྙིང་སྟོབས་བཅས་ལ་ཡི་རངས་བསྔགས་བརྗོད་དང་རྗེས་དྲན་ཞུས་ཡོད་པ་རེད། གཞི་རྩའི་དེ་རིང་གི་མཛད་སྒོའི་ཐོག་ལ་རྒྱ་གར་ས་གནས་རྫོང་དཔོན་མཆོག་དང་དགའ་ལྡན་ཁྲི་པ་རིན་པོ་མཆོག་གིས་མཛད་སྒོ་དང་འབྲེལ་བའི་གསུང་བཤད་གནང་ཡོད་པ་རེད། ཨུ་རུ་སུ་བོད་ཀྱི་དོན་གཅོད་ཏེ་ལོ་རིན་པོ་ཆེ་མཆོག་གིས་ཁལ་མིག་དང་། ཐུ་བ་སྤྱི་མཐུན་རྒྱལ་ཁབ་ཀྱི་སྲིད་འཛིན་རྣམ་པ་གཉིས་ནས་གནང་པའི་འཚམས་འཕྲིན་སྒྲོག་སྦྱངས་གནང་ཡོད། དེ་བཞིན་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་འཚམས་འཕྲིན་སྒྲོག་སྦྱངས་གནང་ཡོད་པ་རེད། མཛད་འཆར་ལྟར་ན། སང་ཚེས་ ༢༢ ཉིན་སྔ་ཐོག་མགོན་པོ་༸གང་ཉིད་མཆོག་གིས་དགེ་བཤེས་མ་ཐོན་མཁན་རྣམས་ལ་དགེ་བཤེས་མའི་ཕྱག་འཁྱེར་གསོལ་བསྩལ་མཛད་རྒྱུ་དང་། ཉིན་རྒྱབ་ལ་མོན་གྷོ་འདོ་རྒུ་གླིང་བོད་མིའི་གཞིས་ཆགས་ཀྱི་གཏན་སློབ་གསར་འཛུགས་གནང་སྟེ་ལོ་ ༥༠ འཁོར་བའི་དུས་དྲན་མཛད་སྒོར་དབུ་བཞུགས་མཛད་ཀྱི་ཡོད་པ་རེད།

༸གོང་ས་མཆོག་གིས་དུས་འཁོར་དབང་ཆེན་ཞུ་བར་བཅར་མི་ཐུབ་མཁན་བོད་མི་རྣམས་ལ་སྨོན་ལམ་རྒྱག་གི་ཡིན་ཅེས་བཀའ་བསྩལ་བ།

༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་གཞིས་སྒར་མོན་གྷོ་འདུད་རྒུ་གླིང་དུ་མཛད་འཆར་ཁག་ཅིག་སྐྱོང་བཞིན་པའི་ཁྲོད། དཔལ་དུས་ཀྱི་འཁོར་ལོའི་དབང་ཆེན་ཞུ་བར་བཅར་མི་ཐུབ་མཁན་བོད་ནས་གསར་དུ་འབྱོར་བའི་བོད་མི་ཁག་ཅིག་ལ་ཟུར་དུ་མཇལ་ཁ་དང་བཀའ་སློབ་སྩལ་ཡོད་པ་རེད། སྐབས་དེར་༸གང་ཉིད་མཆོག་གིས་བོད་ནས་གསར་དུ་འབྱོར་བ་རྣམས་ལ་ཁྱེད་རང་ཚོ་དུས་འཁོར་དབང་ཆེན་ཞུ་བར་བཅར་མི་ཐུབ་ཀྱང་། སེམས་འཁྲལ་གཏན་ནས་མ་བྱེད། བོད་ཟླ་ ༡༡ ཚེས་ ༡༣ ནས་ ༡༥ བར་དུས་འཁོར་དབང་ཆེན་དངོས་གཞི་འཁེལ་གྱི་ཡོད་སྐབས་དེར་ཁྱེད་རང་ཚོས་སྨོན་ལམ་ཡག་པོ་བརྒྱབ། ངོས་ཀྱིས་རྡོ་རྗེ་གདན་ནས་ཁྱེད་རང་ཚོ་དབང་འོག་ཏུ་བཅུག་ནས་སྨོན་ལམ་རྒྱག་གི་ཡིན་ཅེས་བཀའ་བསྩལ་འདུག ༸གང་ཉིད་མཆོག་གིས་ཆེས་ཐོག་མར་བོད་ནས་གསར་དུ་འབྱོར་བའི་བོད་མི་རྣམས་ལ་བོད་ཅེས་དུས་ད་ལྟ་བར་དུ་འཛམ་གླིང་འདིའི་ཐོག་གནས་ཐུབ་པའི་རྒྱུ་རྐྱེན་གཙོ་བོ་ནི་བོད་རྒྱ་ཆེ་མི་མང་གི་སྙིང་སྟོབས་དང་། ལྷ་བསམ་འགྱུར་བ་མེད་པ་ལ་བརྟེན་ནས་གནས་པ་ཞིག་ཡིན་པར་བཀའ་བསྩལ་དང་ཆབས་ཅིག མགོན་པོ་མཆོག་གིས་༸གང་ཉིད་མཆོག་དགུང་གྲངས་ ༨༡ ལ་ཕེབས་ཡོད་ཀྱང་སྐུ་གཟུགས་གསལ་ཐང་ཡིན་པ་གསུངས་ཡོད། ལྷག་དོན་འབྱུང་འགྱུར་ལོ་ཁ་ཤས་ནང་ཏན་ཏན་ང་ཚོ་གཞིས་བྱེས་མཉམ་འཛོམས་ཕལ་ཆེར་ཡོང་ཐུབ་ངེས་ཡིན་སྟབས།  ཁྱེད་རང་ཚོ་བློ་བདེ་པོ་བྱས་ནས་སྡོད་ཨ་ཅེས་བཀའ་སྩལ་མཛད་འདུག ཁྱད་པར་དུ་བོད་ནང་གི་བོད་མི་ཚོས་ད་ལྟའི་རྒྱ་ནག་གི་དཔལ་འབྱོར་ལྷུག་པོའི་སྲིད་བྱུས་ཀྱི་གོ་སྐབས་བཟུང་ནས་དཔལ་འབྱོར་འདུ་འགོད་བྱེད་དགོས་པ་དང་། དཔལ་འབྱོར་འདུ་འགོད་བྱས་པ་དེ་ཚོ་རང་ཉིད་སྒེར་གྱི་ཁང་པ་རྫིག་པོ་དང་མོ་ཊ་རིགས་ཉོ་རྒྱུ་སོགས་མིན་པར།  དངུལ་བྱུང་བ་རྣམས་ས་གནས་སུ་སློབ་གྲྭ་འཛུགས་རྒྱུ་དང་། སྨན་ཁང་འཛུགས་རྒྱུ་སོགས་ཀྱི་སླད་བེད་སྤྱོད་གཏོང་དགོས་གལ་ཡིན་པ་བཀའ་སྩལ་འདུག དེ་བཞིན་༸གོང་ས་མཆོག་གིས་བོད་མི་ཚོ་སངས་རྒྱས་པའི་ཆོས་ལ་དད་པ་བྱེད་མཁན་ཞིག་དང་འཕགས་པ་སྤྱན་རས་གཟིགས་ཀྱི་འདུལ་ཞིང་ཡིན་སྟབས། སངས་རྒྱས་པའི་ཆོས་ལ་དད་པ་ཙམ་མིན་པར་སློབ་སྦྱོང་བྱེད་དགོས་ཅེས་བཀའ་སྩལ་བ་དང་། ལྷག་པར་དུ་མགོན་པོ་མཆོག་གིས་ད་ལན་རྒྱ་གཞུང་གིས་དམ་དྲག་འོག་ཁྱེད་རང་ཚོ་ཁྱེད་རང་ཚོ་དུས་འཁོར་དབང་ཆེན་ཞུ་བར་བཅར་ཐུབ་ཀྱི་མེད་ཀྱང་། སེམས་འཁྲལ་གཏན་ནས་མ་བྱེད། བོད་ཟླ་ ༡༡ ཚེས་ ༡༣ ནས་ ༡༥ བར་དུས་འཁོར་དབང་ཆེན་དངོས་གཞི་འཁེལ་གྱི་ཡོད་སྐབས་དེར་ཁྱེད་རང་ཚོས་སྨོན་ལམ་ཡག་པོ་བརྒྱབ། ངོས་ཀྱིས་རྡོ་རྗེ་གདན་ནས་ཁྱེད་རང་ཚོ་དབང་འོག་ཏུ་བཅུག་ནས་སྨོན་ལམ་རྒྱག་གི་ཡིན། ཏན་ཏན་དབང་ཐོབ་ཀྱི་རེད་ཅེས་བཀའ་བསྩལ་མཛད་ཡོད་པ་རེད། རྩ་བའི་རྒྱ་ནག་གཞུང་གིས་འདི་ལོ་ནང་བོད་ནས་རྒྱ་གར་དུ་༸གོང་ས་མཆོག་གི་དྲུང་ནས་དུས་འཁོར་དབང་ཆེན་ཞུ་བར་བཅར་མཁན་བོད་མི་རྣམས་ལ་དམ་དྲག་ཆེད་ཕྱིར་བསྐྱོད་ལག་འཁྱེར་ཕྱིར་བསྡུ་དང་། དེ་བཞིན་རྒྱ་གར་དུ་བསླེབས་ཟིན་པ་མང་པོ་ཞིག་ལ་མཐོང་མཆན་དུས་བཀག་བཟོས་པ་མ་ཟད། བོད་དུ་ཕྱིར་ལོག་བྱེད་དགོས་པའི་ཉན་བརྡ་ཡང་བཏང་བ་བཅས་ལ་བརྟེན་ནས་བོད་མི་མང་པོ་ཞིག་དུས་དབང་ཞུ་བར་བཅར་མ་ཐུབ་ནས་ཕྱིར་ལོག་དགོས་བྱུང་ཡོད་སྟབ། ༸གོང་ས་མཆོག་གིས་ཟླ་བ་སྔོན་མའི་ཟླ་མཇུག་དང་ཟླ་བ་འདིའི་ཚེས་ཤར་བཅས་སུ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དམིགས་བསལ་ཟུར་མཇལ་གནང་པ་དང་སེམས་བསྐྱེད་ཀྱི་ཆོས་འབྲེལ། དུས་དབང་སྐབས་བཀའ་ཆོས་བསྩལ་གཏན་འཁེལ་བའི་ཕྱག་དཔེ་སྤྱོད་འཇུག་ཆེན་མོ་དང་སྒོམ་རིམ་བར་པའི་གཞུང་གཉིས་པོ་ངོ་སྤྲོད་སྤྱི་བཤད་ཀྱི་བཀའ་ཆོས་བཀྲིན་ཆེ་བ་བསྩལ་ཡོད་པ་རེད།   དེ་རིང་ཟླ་ ༡༢ ཚེས་ ༢༠ ཉིན་སྔ་དྲོར་༸གོང་ས་མཆོག་དབུ་བཞུགས་ཀྱིས་རྣམ་ཤེས་ཡོད་མེད་ཐོག་ལ་ཚན་རིག་གི་བགྲོ་གླེང་ཉིན་གསུམ་པ་ཚོགས་ཡོད་པ་དང་། ཉིན་རྒྱབ་ཏུ་༸གོང་ས་༸སྐྱབས་མགོན་ཆེན་པོ་དབུ་བཞུགས་ཐོག་ཤེས་ཡོན་སློབ་གསོའི་ནང་ཆོས་ལུགས་དང་མ་འདྲེས་པའི་བཟང་སྤྱོད་ལག་བསྟར་གནང་ཕྱོགས་སྐོར་ལ་གསུང་བཤད་དང་བགྲོ་གླེང་སོགས་ཀྱང་གནང་ཡོད་པ་རེད།དེ་བཞིན་ཕྱི་དྲོ་ནང་ཆོས་དང་ཚན་རིག་དབར་ཕན་ཚུལ་ལེགས་སྤེལ་གྱི་འབྲེལ་ལམ་འཛུགས་པ་ཞེས་པའི་ཚན་རིག་བགྲོ་གླེང་ཐེངས་དང་པོ་རེ་ཞིག་མཇུག་སྒྲིལ་གནང་ཡོད།

༸གོང་ས་མཆོག་མཆོག་གིས་ཚན་རིག་གི་བགྲོ་གླེང་ཚོགས་འདུ་ཉིན་གཉིས་པར་ལམ་སྟོན་བཀའ་སློབ་བསྩལ་བ།

དེ་རིང་ཟླ་ ༡༢ ཚེས་ ༡༩  ཉིན་སྔ་དྲོ་ཚོུད་ ༨།༠༠ ཡོལ་ཙམ་ལ་འབྲས་སྤུངས་བློ་གསལ་གླིང་གྲྭ་ཚང་དུ་ནང་ཆོས་དང་ཚན་རིག་དབར་ཕན་ཚུན་ལེགས་སྤེལ་གྱི་འབྲེལ་ལམ་འཛུགས་པ་ཞེས་པའི་ཨེ་མོ་རི་དང་བོད་ཀྱི་ཆེད་བསྡུས་ནང་ཆོས་དང་ཚན་རིག་མཁས་པའི་རྒྱལ་སྤྱིའི་བགྲོ་གླེང་ཚོགས་འདུ་ཉིན་གཉིས་པར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་གཙོས། རྒྱལ་སྤྱིའི་རིམ་པར་མིང་གྲགས་ཅན་གྱི་ཚན་རིག་པ་ཆེད་མཁས་ཁག་གཅིག བོད་བརྒྱུད་ནང་བསྟན་གྱི་སློབ་གཉེར་བ་དེང་རབས་ཚན་རིག་ལ་སྦྱངས་པ་ཅན་ཁག་གཅིག དེ་བཞིན་དགོན་སྡེ་གྲྭ་ཚང་ཁག་དང་མོན་གྷོ་འདོད་རྒུ་གླིིང་གཏན་སློབ་བཅས་ལྷན་འཛོམས་ཐོག་བགྲོ་གླེང་དབུ་འཛུགས་གནང་ཡོད་པ་རེད། དེ་རིང་གི་བརྗོད་གཞི་འཛམ་གླིང་འདི་ཐོག་མར་ཇི་ལྟར་ཆགས་ཡོད་མེད་སྐོར་དང་དེང་དུས་ཚན་རིག་གི་གཟའ་སྐར་རིག་པའི་སྐོར་ཨེམ་པི་ནི་ཨེ་རི་ཛོ་ནའི་གཙུག་ལག་སློབ་གཉེར་ཁང་གི་སྐར་དཔྱད་རིག་པའི་སློབ་དཔོན་ཆེན་མོ་ཁི་རི་སི་ལགས་ཀྱིས་གསུང་བཤད་གནང་པ་དང་དེའི་ཐོག་ལ་༸གོང་ས་༸སྐྱབས་མགོན་ཆེན་པོ་མཆོག་གིས་ནང་པ་སངས་རྒྱས་པའི་སེམས་ཙམ་པའི་ལྟ་གྲུབ་ཀྱི་ཐོག་ནས་དགོངས་ཚུལ་གསུང་གནང་ཡོད་པ་རེད། གཞན་ཡང་སེར་བྱེས་ཧར་གདོང་ཁམས་ཚན་གྱི་རྒན་ཐབས་མཁས་ལགས་ཀྱིས་ནང་པའི་གཞུང་ནས་གསུང་པའི་འཇིག་རྟེན་ཁམས་ཆགས་སྟངས་ཀྱི་ཐོག་མའི་རྒྱུ་རྐྱེན་ཞེས་པའི་བརྗོད་གཞིའི་ཐོག་གསུང་བཤད་གནང་པ་མ་ཟད། དེ་དང་དེང་དུས་ཚན་རིག་པའི་ལྟ་སྟངས་དབར་མཐུན་པའི་ཆ་གང་དང་གང་ཡོད་མེད་སྐོར་གསུང་བཤད་ཡང་གནང་ཡོད་པ་རེད། དེ་རིང་ཉིན་རྒྱབ་༸གོང་ས་མཆོག་དབུ་བཞུགས་ཐོག་སྐྱེ་དངོས་རིག་པའི་སློབ་དཔོན་ཟུར་པ་སི་ཁོཌ་གྷིལ་བྷཌ་ལགས་ཀྱིས་སྐྱེ་དངོས་རིག་པ་དེ་རྟེན་བྱུང་གི་ཚན་རིག་ཡིན་ཚུལ་སྐོར་གསུང་བཤད་གནང་པ་དང་འདི་བཞིན་སེར་བྱེས་མཁས་སྙན་གྲྭ་ཚང་གི་ཚན་རིག་སྡེ་ཚན་གྱི་འབྲེལ་མཐུད་པ་ངག་དབང་ནོར་བུ་ལགས་ཀྱིས་སའི་གོ་ལའི་སྟེང་ཚེ་སྲོག་ཇི་ལྟར་ཆགས་ཚུལ་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད། དེ་དང་ཕྱོགས་མཚུངས་ཁ་ས་ཕྱི་ཚེས་ ༡༨ ཉིན་གྱི་བགྲོ་གླེང་ཉིན་དང་པོར་སའི་གོ་ལའི་སྟེང་དུ་ཚེ་སྲོག་ཇི་ལྟར་ཆགས་ཚུལ་ཞེས་པའི་ཐོག་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་འབྲས་སྤུངས་བློ་གསལ་གླིང་དུ་ཚན་རིག་གི་བགྲོ་གླེང་དབུ་འཛུགས་གནང་ཡོད་པ་རེད། སྐབས་དེར་འབྲས་སྤུངས་བློ་གསལ་གླིང་དུ་༸གོང་ས་༸སྐྱབས་མགོན་ཆེན་པོ་དབུ་བཞུགས་ཐོག དགའ་ལྡན་ཁྲི་རིན་པོ་ཆེ་མཆོག་དང་དགའ་ལྡན་ཁྲི་ཟུར་རིན་པོ་ཆེ་མཆོག གླིང་མཆོག་སྤྲུལ་རིན་པོ་ཆེ་མཆོག བྱང་རྩེ་ཆོས་རྗེ་མཆོག་གིས་དབུས་གདན་ས་ཁག་གི་མཁན་པོ་དང་མཁན་ཟུར། ཤེས་རིག་བཀའ་བློན་དངོས་གྲུབ་ཚེ་རིང་མཆོག རྒྱལ་སྤྱིའི་རིམ་པར་མིང་གྲགས་ཅན་གྱི་ཚན་རིག་པ་ཆེད་མཁས་ཁག་གཅིག ཕྱོགས་བཞུགས་སྤྱི་འཐུས་ཁག་གཅིག བོད་བརྒྱུད་ནང་བསྟན་གྱི་སློབ་གཉེར་བ་དེང་རབས་ཚན་རིག་ལ་སྦྱངས་པ་ཅན་ཁག་ཅིག དེ་བཞིན་དགོན་སྡེ་གྲྭ་ཚང་ཁག་དང་མོན་གྷོ་འདོད་རྒུ་གླིིང་གཏན་སློབ་བཅས་ལྷན་འཛོམས་ཐོག་བགྲོ་གླེང་ཚོགས་འདུ་དབུ་འཛུགས་གནང་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་ཐོག་མར་བགྲོ་གླེང་ཚོགས་ཆེན་འདིའི་ཐོག་ཕེབས་མཁན་རྣམས་པར་དབྱིན་སྐད་ཐོག་ནས་འཚམས་འདྲིའི་གསུང་བཤད་གནང་པ་དང་སྦྲགས། ༸གོང་ས་མཆོག་གིས་འབྲས་སྤུངས་དགོན་པ་ཕྱག་བཏབ་ནས་ལོ་ངོ་ ༦༠༠ འགྲོ་བཞིན་པ་དང་དེའི་རིང་རྒྱལ་དབང་སྐུ་ཕྲེང་གཉིས་པས་འབྲས་སྤུངས་དགོན་པའི་མཁན་པོ་གནང་ཞིང་༸གོང་ས་ལྔ་པ་ཡང་འབྲས་སྤུངས་དགོན་པ་ནས་ཡིན་པ་སོགས་རྒྱལ་དབང་སྐུ་ཕྲེང་དང་འབྲས་སྤུངས་དགོན་པའི་བར་གྱི་དམིགས་བསལ་འབྲེལ་བའི་སྐོར་སོགས་བཀའ་སློབ་བསྩལ་བ་མ་ཟད། བགྲོ་གླེང་གི་གལ་ཆེའི་རང་བཞིན་དང་ལྷག་དོན་འདས་པའི་དུས་ཡུན་ལོ་ ༣༠ ཙམ་རིང་ཚན་རིག་དང་ནང་ཆོས་དབར་གྱི་འབྲེལ་བའི་འཕེལ་རིམ་དང་གྲུབ་འབྲས་ཇི་སོན་བཅས་ཀྱི་སྐོར་བཀའ་སློབ་བསྩལ་ཡོད་པ་རེད། དེ་བཞིན་༸གོང་ས་མཆོག་གིས་བོད་སྐད་ཐོག་ནས་ནང་ཆོས་དང་ཚན་རིག་བར་གྱི་འབྲེལ་བའི་བརྒྱུད་རིམ་སྐོར་ལ་ངོ་སྤྲོད་གསུང་གནང་པ་དང་ཆབས་ཅིག ད་བར་ཚན་རིག་པ་དང་འབྲེལ་བ་གནང་པའི་བརྒྱུད་རིམ་ནང་ཚན་རིག་པས་ནང་པའི་སེམས་ཁམས་རིག་པར་དོ་སྣང་བྱེད་འགོ་བཙུགས་ཟིན་པ་དང་། ཕྱིའི་འཇིག་རྟེན་ཆགས་རབས་སྐོར་ནང་པའི་གཞུང་ནས་གསུང་པའི་རིའི་རྒྱལ་པོ་རི་རབས་ཡོད་པ་སྒྲུབ་ཐུབ་མེད་སྐོར་གསུངས་སོང་། ཚན་རིག་དང་ནང་ཆོས་ཀྱི་འབྲེལ་བའི་བརྒྱུད་རིམ་ནང་ནང་པ་སངས་རྒྱས་པའི་གཞུང་ཁག་ནང་སྣོད་ཀྱི་འཇིག་རྟེན་གྱི་ཆགས་དབྱིབས་སྐོར་གཅིག་གྱུར་ཞིག་མེད་ཀྱང་དེར་གནད་འགག་དེ་ཙམ་གཟིགས་ཀྱི་མེད་སྐོར་གསུངས་པ་དང་། ལྷག་དོན་༸གང་ཉིད་མཆོག་གིས་སྣོད་བཅུད་ཀྱི་འཇིགས་རྟེན་ཆགས་རབས་སྐོར་ལ་ནང་པ་ལས་ཚན་རིག་པ་ཞིབ་ཚགས་པ་ཡོད་སྟབས་ཚན་རིག་དང་ནང་ཆོས་དབར་ཕན་ཚུལ་ལེགས་ཆ་མང་པོ་ཞིག་ལེན་རྒྱུ་ཡོད་སྐོར་བཀའ་སློབ་གནང་ཡོད། ཚན་རིག་བགྲོ་གླེང་གི་བརྗོད་གཞིའི་ནང་དུས་རབས་ ༢༡ པ་གཞུང་ཐིག་གསར་པའི་དུས་རབས་ཤིག་ཡིན་ནམ་ཞེས་པ་དང་ཚན་རིིག་དང་ནང་ཆོས་བར་གྱི་འབྲེལ་བའི་ཟམ་པར་གྱུར་བའི་ལྟ་གྲུབ་རིག་པ།  མི་མཐུན་པའི་ཁྱད་པར་ལས་བློ་སྐྱེད་ལེན་པ། ཚད་མ་ཇི་ལྟར་སྐྱེད་དགོས་མིན་སོགས་བརྗོད་གཞི་མི་འདྲ་བ་ ༦ ཐོག་མཁས་དབང་རྣམས་ནས་གསུང་བཤད་གནང་ཡོད་པ་མ་ཟད། ཉིན་རྒྱབ་ལ་གསུང་བཤད་གནང་མཁན་དང་ལྷན་དུ་བགྲོ་གླེང་དང་དྲི་བ་འདྲི་ལན་ཡང་གནང་ཡོད་པ་རེད། བགྲོ་གླེང་ཚོགས་འདུ་དེ་ནི་ཏཱ་ལའི་བླ་མའི་དགེ་རྩ་དང་ཨེ་མོ་རི་གཙུག་ལག་སློབ་གཉེར་ཁང་གཉིས་ནས་གོ་སྒྲིག་དང་རྒྱུ་གྲོན་མཐུན་རྐྱེན་གཙོ་བོར་སྦྱར་བའི་སྟེང་འབྲས་སྤུངས་བླ་སྤྱི་དང་འབྲས་སྤུངས་སྒོ་མང་གྲྭ་ཚང་། འབྲས་སྤུངས་བློ་གསལ་གླིང་གྲྭ་ཚང་། རྡ་ས་བོད་ཀྱི་དཔེ་མཛོད་ཁང་བཅས་ནས་རམ་འདེགས་མཐུན་འགྱུར་གནང་བ་བརྒྱུད་ནང་ཆོས་དང་ཚན་རིག་དབར་ཕན་ཚུན་ལེགས་སྤེལ་གྱི་འབྲེལ་ལམ་འཛུགས་པ།  ཞེས་པའི་ཨེ་མོ་རི་དང་བོད་ཀྱི་ཆེད་བསྡུས་ནང་ཆོས་དང་ཚན་རིག་མཁས་པའི་རྒྱལ་སྤྱིའི་བགྲོ་གླེང་འཚོགས་བཞིན་ཡོད་པ་རེད།

༸གོང་ས་༸སྐྱབས་མགོན་ཆེན་པོ་མཆོག་རྭ་སྟོད་གྲྭ་ཚང་དང་བདེ་ཡངས་གྲྭ་ཚང་དུ་ལམ་སྟོན་བཀའ་སློབ་བསྩལ་བ།

དེ་རིང་ཟླ་ ༡༢ ཚེས་ ༡༧ ཉིན་སྔ་དྲོ་ཚོུད་ ༩།༠༠ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འབྲས་སྤུངས་བདེ་ཡངས་གྲྭ་ཚང་གི་ཚོགས་མགོན་དུ་༸ཞབས་སོར་བདེ་བར་འཁོད་བསྟུན་བསླབ་པ་སློབ་གཉེར་གནང་ཕྱོགས་དང་འབྲེལ་བའི་ལམ་སྟོན་བཀའ་སློབ་གནང་ཡོད་པ་རེད། དེའང་ཆེས་ཐོག་མར་བདེ་ཡངས་གྲྭ་ཚང་གི་ཆོས་སྐྱབས་རིན་པོ་ཆེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ནས་མཛད་འཕྲིན་དང་སྐུ་ངལ་ལ་འཛེམས་མེད་ཀྱིས་གྲྭ་ཚང་འདིར་༸ཞབས་སོར་བདེ་བར་འཁོད་གནང་མཛད་པར་བཀའ་དྲིན་རྗེས་དྲན་གྱི་གསུང་བཤད་གནང་ཡོད་པ་རེད། ༸གོང་ས་མཆོག་གིས་བདེ་ཡངས་གྲྭ་ཚང་ནི་རྒྱལ་དབང་ལྔ་པའི་ཡིག་ཆའི་བདག་པོ་ཡིན་པ་དང་གནས་ཆུང་རྡོ་རྗེ་བྲག་ལྡན་དང་དམིགས་བསལ་གྱི་འབྲེལ་བ་ཡོད་སྐོར་སོགས་བཀའ་སློབ་བསྩལ་བ་དང་མ་ཟད། དགོན་སྡེ་གྲྭ་ཚང་དང་བཙུན་མའི་དགོན་པ་ཚོས་ཀྱང་གཞུང་ཆེན་དག་ལ་བསླབ་པ་སློབ་གཉེར་གནང་རྒྱུ་གལ་ཆེ་ཡིན་པ་དང་། དེ་སྔའི་གཞུང་ཆེན་ལ་སློབ་གཉེར་བྱེད་མ་དགོས་པའི་རྗེས་ལུས་ཀྱི་བསམ་བློ་དེ་དོར་དགོས་ཞིང་ཇི་སྲིད་རྗེས་ལུས་ཀྱི་བསམ་བློ་གནས་པ་དེ་སྲིད་དུ་ལོ་བརྒྱ་ཕྲག་རིང་རྗེས་ལུས་ཤོར་ངེས་ཡིན་པ་དང་། གལ་ཏེ་གཞུང་ཆེན་ལ་སློབ་གཉེར་གནང་ཚེ་ལོ་བརྒྱ་ཕྲག་རིང་སངས་རྒྱས་ཀྱི་བསྟན་པ་གནས་ཐུབ་ཀྱི་རེད་ཅེས་བཀའ་ནན་བསྩལ་ཡོད་པ་རེད། དེ་རྗེས་བདེ་ཡངས་གྲྭ་ཚང་གི་མཛད་རིམ་ལེགས་པ་གྲུབ་བསྟུན་ཚོུད་ ༡༡།༠༠ ཙམ་ལ་རྭ་སྟོད་གྲྭ་ཚང་དུ་༸ཞབས་སོར་བདེ་བར་འཁོད་གནང་སྟེ་ཆོས་རྭ་གསར་པ་དབུ་འབྱེད་རབ་གནས་མཛད་ཡོད་པ་རེད། ད་དུང་རྭ་སྟོད་གྲྭ་ཚང་ནས་མགོན་པོ་༸གང་ཉིད་མཆོག་ལ་ཇི་ལྟར་གསོལ་འདེབས་ཞུས་དོན་བཞིན་གྲྭ་ཚང་དེའི་བཅའ་ཡིག་ཆེན་མོ་དབུ་འབྱེད་གནང་པ་དང་། ལྷག་དོན་ནང་པའི་ནང་ཚད་མ་རིག་པ་དང་སེམས་ཁམས་རིག་པ་ནི་དེང་སྐབས་འཛམ་གླིང་སྤྱི་ལ་ཕན་བདེ་སྒྲུབ་ཐུབ་པའི་ནུས་པ་ཡོད་པ་དང་དེའི་ཐོག་དེང་དུས་ཚན་རིག་གི་ཤེས་བྱ་བརྒྱན་ཐུབ་པ་ཞིག་བྱུང་ན་ཕན་ཐོགས་རྒྱ་ཆེ་ཡོང་ངེས་ཡིན་པར་ལམ་སྟོན་བསྩལ་ཡོད། ཕྱི་རྒྱལ་མི་རིགས་ཡིན་པའི་རྭ་སྟོད་གྲྭ་ཚ་གིི་མཁན་པོ་ཐུབ་བསྟན་ལྷུན་འགྲུབ་ལགས་ནས་རྭ་སྟོད་གྲྭ་ཚང་གི་གནས་སྟངས་དང་འབྲེལ་བའི་ལས་བསྡོམས་ཤིག་སྙན་སྒྲོན་ཞུས་ཡོད་པ་དང་། གྲྭ་ཚང་དེའི་སློབ་གཉེར་བ་ཚོས་༸གོང་ས་མཆོག་ལ་གཞུང་ཆེན་ཀ་པོད་ལྔའི་ཐོག་ལ་རྟགས་གསལ་གཟིགས་འབུལ་ཞུས་ཡོད་པ་རེད། རྩ་བའི་སང་ཉིན་ཕྱི་ཚེས་ ༡༨ ནས་དབུ་འཛུགས་ཀྱིས་ཚེས་ ༢༠ བར་ཉིན་གསུམ་རིང་ཚན་རིག་བགྲོ་གླེང་ཐོག་དབུ་བཞུགས་ཀྱིས་བཀའ་སློབ་བསྩལ་རྒྱུ་ཡིན་པ་རེད།

༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་༸ཞབས་སོར་བདེ་བར་འཁོད་པ།

དེ་རིང་ཟླ་ ༡༢ ཚེས་ ༡༦ ཉིན་སྔ་དྲོ་ཚོུད་ ༡༡།༠༠ ཡོལ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་གྲོང་ཁྱེར་སྦེང་ལོར་ནས་མཁའ་ལམ་བརྒྱུད་ཧུབ་ལི་གནམ་ཐང་དང་། དེ་ནས་ཆིབས་གྲུ་ནང་རྒྱ་གར་ལྷོ་ཕྱོགས་བོད་མིའི་གཞིགས་སྒར་མོནགྷོ་འདོད་རྒུ་གླིང་དུ་རྟེན་གཞི་བྱས་པའི་གདན་ས་ཆེན་པོ་འབྲས་སྤུངས་ཚོགས་ཆེན་དུ་༸ཞབས་སོར་བདེ་བར་འཁོད་པར་གཞུང་འབྲེལ་དང་གཞུང་མིན་པའི་ཚོགས་ཁག་གི་གནད་ཡོད་མི་སྣ་སོགས་ཆེད་བཅར་གྱིས་ཕེབས་བསུ་ཞུས་པ་དང་། མོན་གྷོ་འདོད་རྒུ་གླིང་གི་ཕེབས་ལམ་གཡས་གཡོན་དུ་ས་གནས་བོད་མི་སེར་སྐྱ་མང་ཚོགས་ཚོས་ཕྱག་ཏུ་དཀར་གཙང་གི་མཇལ་དར་སོགས་བསྣམས་ཏེ་དགའ་གུས་ཆེན་པོས་༸གང་ཉིད་མཆོག་ལ་ཕེབས་བསུ་ཞུས་པ་མ་ཟད། འབྲས་སྤུངས་བླ་སྤྱིའི་ཚོགས་ཆེན་གྱི་སྒོ་འགྲམ་དུ་དགའ་ལྡན་ཁྲི་པ་གསར་རྙིང་དབུས་པའི་བྱང་རྩེ་ཆོས་རྗེ་རིན་པོ་ཆེ། འབྲས་སྤུངས་ཁྲི་པ་སོགས་མཁན་བླ་སྤྲུལ་དགེ་བའི་བཤེས་གཉེན་རྣམས་ནས་༸གང་ཉིད་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་ཐོག་མར་འབྲས་སྤུངས་ཚོགས་ཆེན་གྱི་རྟེན་གཙོ་ཁག་ལ་གནས་གཟིགས་མཛད་གྲུབ་བསྟུན་བཞུགས་ཁྲིར་༸ཞབས་སོར་འཁོད་མཚམས་དགའ་ལྡན་ཁྲི་པ་མཆོག་གིས་མཎྜལ་རྟེན་གསུམ་འདེགས་འབུལ་ཞུས་ཡོད་པ་དང་། དེ་རྗེས་༸གོང་ས་མཆོག་གིས་དཔལ་ན་ལེནྡྲ་གཉིས་པར་གྲགས་པའི་འབྲས་སྤུངས་དགོན་པ་ཕྱག་བཏབ་ཏེ་ལོ་ངོ་ ༦༠༠ ཐམ་པ་འཁོར་བ་དེའི་རིང་བསྟན་འཛིན་གྱི་སྐྱེས་ཆེན་དུ་མ་བྱོན་པ་མ་ཟད། ལྷག་དོན་བསྟན་པ་དང་འགྲོ་བའི་དོན་གྱི་སླད་དུ་རླབས་ཆེན་གྱི་མཛད་རྗེས་འཇོག་གནང་པར་བཀའ་དྲིན་རྗེས་དྲན་གྱི་བཀའ་སློབ་བསྩལ་ཡོད་པ་རེད། ༸གོང་ས་མཆོག་གིས་སྐབས་དེར་དཔལ་ན་ལེནྡྲ་ནས་བརྒྱུད་པའི་ཆོས་ཚུལ་དེ་དག་སོག་པོ་དང་བོད་གཉིས་ཀྱི་ནང་ལ་ལོ་སྟོང་ཕྲག་རིང་མི་ཉམས་རྒྱུན་འཛིན་བྱས་ཡོད་པ་དང་། མ་འོངས་པར་ཡང་མུ་མཐུད་མི་ཉམས་རྒྱུན་འཛིན་གནང་དགོས་གལ་ཡིན་པར་ལམ་སྟོན་བཀའ་སློབ་བསྩལ་སོང་། ༸གོང་ས་མཆོག་གིས་ཐེངས་འདིར་དགེ་བཤེས་མ་ཐོན་མཁན་བཙུན་མ་ ༢༠ རྣམས་ལ་དགེ་བཤེས་མའི་ཕྱག་འཁྱེར་གསོལ་བསྩལ་གནང་གཏན་འཁེལ་ཡོད་པ་ལྟར། དེ་ནི་བོད་ཀྱི་ལོ་རྒྱུས་ཐོག་ཆེས་ཐོག་མ་དེ་ཆགས་ཀྱི་ཡོད་སྟབས། ༸གོང་ས་མཆོག་གི་ངོས་ནས་བསྟན་པའི་ཞབས་འདེགས་ཞིག་ཡིན་པ་དགོངས་ཀྱི་ཡོད་པ་དེ་བཞིན་སངས་རྒྱས་ཀྱི་བསྟན་པ་དེ་མ་འོངས་གཞི་རིམ་མང་ཚོགས་ཀྱི་ཁྲོད་ནས་འཛིན་སྐྱོང་སྤེལ་གསུམ་གནང་རྒྱུ་གནད་ཆེ་ཡིན་པ་ལྟར་མང་ཚོགས་ཚོའི་ངོས་ནས་ནང་ཆོས་ལ་སློབ་གཉེར་གནང་པར་ཤུགས་སྣོན་བསྐྱོན་དགོས་སྐོར་བཀའ་སློབ་བསྩལ་སོང་། མཛད་འཆར་ལྟར་ན། སང་ཉིན་ཟླ་ ༡༢ ཚེས་ ༡༧ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་འབྲས་སྤུངས་བདེ་ཡངས་གྲྭ་ཚང་གི་ཞོགས་ཚོགས་ཀྱི་ཚོགས་མགོན་དུ་དབུ་བཞུགས་མཛད་རྒྱུ་དང་། དེ་རྗེས་རྭ་སྟོད་གྲྭ་ཚང་གི་ཆོས་ར་གསར་པ་དབུ་འབྱེད་རབ་གནས་བཀྲིན་ཆེ་བ་བསྐྱང་རྒྱུ་བཅས་ཀྱི་མཛད་རིམ་ཁག་ཅིག་ཡོད་པ་རེད། གཞན་ཡང་འབྲས་སྤུངས་དགོན་པ་ཕྱག་བཏབ་ནས་ལོ་ངོ་ ༦༠༠ འཁོར་བའི་རྗེས་དྲན་གྱི་གནང་སྒོའི་ཆ་ཤས་སུ་ཚེས་ ༡༨ ནས་ ༢༠ བར་ཉིན་གསུམ་རིང་ཚན་རིག་བགྲོ་གླེང་ཐོག་དབུ་བཞུགས་ཀྱིས་བཀའ་སློབ་བསྩལ་རྒྱུ་ཡིན་པ་རེད།

༸གོང་ས་མཆོག་གིས་སྦེང་ལོར་ནང་ཁྲིམས་ཀྱི་སློབ་གཉེར་ཁང་ཆེ་གྲས་ཤིག་ལ་ཆིབས་བསྒྱུར་མཛད་པ།

དེ་རིང་ཟླ་ ༡༢ ཚེས་ ༡༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྦེང་ལོར་གྲོང་ཁྱེར་ནང་རྟེན་གཞི་བྱས་པའི་རྒྱ་གར་རྒྱལ་ཡོངས་ནང་གི་ཁྲིམས་ཀྱི་སློབ་གཉེར་ཁང་སྙན་སྒྲགས་ཆེ་ཤོས་ National Law School of India University ཞེས་པ་དེར་ཆིབས་བསྒྱུར་བསྐྱངས་གནང་མཛད་ཡོད་པ་རེད། དེ་རིང་ཟླ་ ༡༢ ཚེས་ ༡༥ ཉིན་སྦེང་ལོར་ནང་གི་སྙན་སྒྲགས་ཆེ་བའི་ཁྲིམས་ཀྱི་སློབ་གཉེར་ཁང་དེའི་ངོས་ནས་ལོ་ཤས་གོང་༸གང་ཉིད་མཆོག་སློབ་གཉེར་ཁང་དུ་ཆིབས་བསྒྱུར་མཛད་རྒྱུར་ཇི་ལྟར་གསོལ་འདེབས་ཞུས་དོན་ལྟར། ༸གོང་ས་༸སྐྱབས་མགོན་ཆེན་པོ་མཆོག་གིས་༸གང་ཉིད་མཆོག་སྦེང་ལོར་དུ་ཆིབས་བསྒྱུར་གནང་པ་དང་བསྟུན་སློབ་གཉེར་ཁང་དུ་དངོས་སུ་ཆིབས་བསྒྱུར་བཀྲིན་ཆེ་བ་བསྐྱངས་ཏེ་དགེ་ལས་སློབ་གཉེར་བ་རྣམས་ལ་བླང་དོར་གྱི་བཀའ་སློབ་བསྩལ་ཡོད་པ་རེད། སྐབས་དེར་༸གོང་ས་མཆོག་གིས་དགེ་ལས་སློབ་གཉེར་བ་རྣམས་ལ་དུས་རབས་ ༢༡ པ་འདི་ཞི་བདེ་ལྡན་པའི་དུས་རབས་ཤིག་ཏུ་བསྐྲུན་རྒྱུའི་ཐད་གཞོན་སྐྱེས་ཚོར་འོས་འགན་ཆེན་པོ་ཡོད་སྐོར་བཀའ་སྩལ་གནང་པ་དང་འབྲེལ། འཕགས་བོད་གཉིས་ཟེར་ནས་ལོ་རྒྱུས་ཐོག་ནས་དམིགས་བསལ་འབྲེལ་བ་ཡོད་པ་ཞིག་ཆགས་ཡོད་པ་དང་དེ་ནི་ཧ་ལམ་ཆོས་དང་ལྟ་གྲུབ་ཀྱི་ཆ་ནས་ང་ཚོ་དབར་དམིགས་བསལ་གྱི་འབྲེལ་བ་ཞིག་ཆགས་ཡོད་སྐོར་བཀའ་བསྩལ་མཛད་འདུག དེ་རིང་༸གང་ཉིད་མཆོ་གིས་སྦེང་ལོར་ནང་གི་མཛད་འཆར་མཐའ་མ་བསྐྱངས་གྲུབ་བསྟུན། སང་ཉིན་ཕྱི་ཚེས་ ༡༦ ཉིན་༸གོང་ས་མཆོག་མཁའ་ལམ་བརྒྱུད་མོན་གྷོ་ཕྱོགས་སུ་ཆིབས་བསྒྱུར་མཛད་རྒྱུ་རེད་འདུག རྩ་བའི་༸གོང་ས་མཆོག་གིས་མོན་གྷོ་བོད་མིའི་གཞིས་སྒར་དུ་བོད་ཀྱི་ལོ་རྒྱུས་ནང་ཆེས་ཐོག་མ་ཆགས་པའི་དགེ་བཤེས་མའི་བསླབ་པ་མཐར་སོན་གྱི་བཙུན་ ༢༠ དེ་དག་ལ་དགེ་བཤེས་མའི་ཕྱག་འཁྱེར་གསོལ་བསྩལ་མཛད་རྒྱུ་ཡིན་པ་དང་། སེམས་དང་སྲོག་གི་ཚན་རིག་བགྲོ་གླེང་ཐོག་དབུ་བཞུགས་མཛད་ཀྱི་ཡོད་པ་རེད། དེ་མཚུངས་སུ་དཔལ་ལྡན་འབྲས་སྤུངས་དགོན་པ་ཕྱག་བཏབ་ནས་ལོ་ ༦༠༠ འཁོར་བའི་རྗེས་དྲན་མཛད་སྒོར་དབུ་བཞུགས་མཛད་ནས་དགེ་བཤེས་ལྷ་རམས་དང་བཀའ་རམས་ཐོན་མཁན་རྣམས་ལ་ཕྱག་འཁྱེར་གསོལ་བསྩལ་མཛད་རྒྱུ་ཡིན་པ་མ་ཟད། ༸གང་ཉིད་མཆོག་མོན་གྷོ་འདོ་རྒུ་གླིང་བོད་མིའི་གཞིས་ཆགས་ཀྱི་གཏན་སློབ་གསར་འཛུགས་གནང་སྟེ་ལོ་ ༥༠ འཁོར་བའི་དུས་དྲན་མཛད་སྒོར་དབུ་བཞུགས་མཛད་རྒྱུ་སོགས་ཀྱི་མཛད་འཆར་ཁག་ཅིག་ཐུགས་གཏན་འཁེལ་ཡོད་པ་རེད།

༸གོང་ས་མཆོག་གིས་ཏཱ་ལའི་བླ་མ་མཐོ་རིམ་སློབ་གཉེར་ཁང་དབུ་འབྱེད་རབ་གནས་དང་བཀའ་སློབ་བསྩལ་གནང་མཛད་པ།

རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་སྦེང་ལོར་གྲོང་ཁྱེར་ནང་གི་ཏཱ་ལའི་བླ་མ་མཐོ་རིམ་སློབ་གཉེར་ཁང་ནས་༸གང་ཉིད་མཆོག་ལ་ཇི་ལྟར་གདན་ཞུ་གསོལ་འདེབས་ཞུས་དོ ན་ལྟར།༸གོང་ས་༸སྐྱབས་མགོན་ཆེན་པོ་མཆོག་གིས་ཏཱ་ལའི་བླ་མ་མཐོ་སློབ་ཁང་དབུ་འབྱེད་རབ་གནས་བཀྲིན་ཆེ་བ་བསྐྱངས་པ་དང་དགེ་ལས་སློབ་གཉེར་བ་དང་སྐུ་མགྲོན་རྣམ་པར་བཀའ་སློབ་བསྩལ་ཡོད་པ་རེད། དེ་རིང་ཟླ་ ༡༢ ཚེས་ ༡༤ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྷེང་ལོར་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་༸ཞབས་སོར་བདེ་བར་འཁོད་ནས་སློབ་གཉེར་ཁང་དབུ་འབྱེད་རབ་གནས་བཀའ་དྲིན་བསྐྱངས་པ་དང་འབྲེལ། སྐུ་མགྲོན་གཙོ་བོ་ཀ་ན་ཊ་ཀའི་ནང་སྲིད་བློན་ཆེན་སྐུ་ཞབས་ Dr G Parameshwara མཆོག་གིས་དབུས་པའི་དམིགས་བསལ་སྐུ་མགྲོན་དུ་མེ་སོར་གཙུག་ལག་སློབ་གཉེར་ཁང་གི་ཉེ་བའི་རིགས་བདག་སྐུ་ཞབས་ K.S Rangappa མཆོག་དང་གནད་ཡོད་མི་སྣ་ཁག་ཅིག བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་དངོས་གྲུབ་ཚེ་རིང་མཆོག ཕྱོགས་བཞུགས་སྤྱི་འཐུས་རྣམ་པ། ས་འགོ་རྣམ་པ་གཙོས་པའི་ས་གནས་མང་ཚོགས། ཕྱི་ནང་གི་སྐུ་མགྲོན་རྣམ་པ་དང་དེ་བཞིན་དགེ་ལས་སློབ་གཉེར་བ་བཅས་ཁྱོན་མི་གྲངས་ ༡༠༠༠ ལྷག་ལྷན་འཛོམས་གནང་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་བསྩལ་ཡོད་པ་རེད། མཛད་སྒོ་དེའི་ཆེས་ཐོག་མར་མཐོ་སློབ་དེའི་སློབ་སྤྱི་བོུ་ཚེ་རིང་ལགས་ཀྱིས་མཐོ་སློབ་ཁང་དེ་ ༢༠༠༦ ལོར་༸གོང་ས་མཆོག་གིས་འཛུགས་བསྐྲུན་རྨང་གཞིའི་ས་བོན་འོག་དབུ་འཛུགས་གནང་པ་ནས་བཟུང་ད་བར་ལོ་བཅུ་ཙམ་འགྲོ་བཞིན་ཡོད་པ་དང་། སློབ་གཉེར་ཁང་འདི་ནི་ཤེས་ཡོན་ཁོ་ན་ཙམ་མིན་པར་མིའི་བཟང་སྤྱོད་གོང་འཕེལ་གཏོང་ཐབས་བཅས་ལ་ཆེད་དམིགས་གནང་པ་ཞིག་ཡིན་པ་གསུངས་ཡོད་པ་རེད། ༸གོང་ས་མཆོ་གིས་མཛད་སྒོར་བཅར་བའི་སྐུ་མགྲོན་དང་དགེ་ལས་སློབ་གཉེར་བ་རྣམས་ལ་འཚམས་འདྲི་གནང་པ་དང་སྦྲགས། ད་བར་བོད་མིའི་ཐུན་མིན་ཆོས་རིག་གསོན་པོ་གནས་ཐུབ་པ་བྱུང་བ་འདི་ནི་གཞིགས་ལུས་རྒྱ་ཆེ་མང་ཚོགས་ཀྱི་ཞུམ་པ་མེད་པའི་སྙིང་སྟོབས་ཁོ་ནར་བརྟེན་ནས་བྱུང་བ་ཞིག་ཡིན་སྐོར་བཀའ་སྩལ་གནང་སོང་བ་དང་། དེ་མིན་ཕྱོགས་མང་པོ་ཞིག་ནས་གནོན་ཤུགས་ཧ་ཅང་སྤྲོད་བཞིན་ཡོད་པས་ད་ལྟའི་བོད་རིགས་གཞོན་སྐྱེས་ཚོར་བོད་ཀྱི་ཆོས་རིག་མི་ཉམས་རྒྱུན་གནས་ཐུབ་ཐབས་སུ་འགན་འཁྲི་ཆེན་པོ་ཡོད་པ་བཀའ་བསྩལ་ཡོད། དེ་བཞིན་༸གོང་ས་མཆོག་གིས་འཕགས་བོད་གཉིས་ཟེར་ནས་ལོ་རྒྱུས་ཐོག་ནས་དམིགས་བསལ་འབྲེལ་བ་ཡོད་པ་ཞིག་ཆགས་ཡོད། འཕགས་བོད་གཉིས་ཀྱི་འབྲེལ་བ་ནི་ཧ་ལམ་ཆོས་དང་ལྟ་གྲུབ་ཆ་ནས་ང་ཚོ་དགེ་རྒན་དང་དགེ་ཕྲུག་ནང་བཞིན་ཆགས་ཡོད། དེ་ལྟ་བུའི་དམིགས་བསལ་གྱི་འབྲེལ་བ་ཆགས་ཡོད་པར་བརྟེན་འཕགས་བོད་གཉིས་ཀྱི་མིའི་བསམ་བློ་ནང་བོད་ཅེས་བརྗོད་དུས་རང་བཞིན་གྱི་སེམས་ཐག་ཉེ་བོ་ཡོང་བཞིན་འདུག་ཅེས་སོགས་བཀའ་སློབ་བསྩལ་ཡོད་པ་རེད། དེ་བཞིན་སྐུ་མགྲོན་གཙོ་བོ་ཀ་ན་ཊ་ཀའི་ནང་སྲིད་བློན་ཆེན་སྐུ་ཞབས་ Dr G Parameshwara མཆོག་གིས་བོད་མི་རྣམས་རྒྱ་གར་ནང་དུ་མི་མཐུད་བཞུགས་དགོས་པ་མ་ཟད། བོད་མི་རྣམས་ལ་དཀའ་ངལ་རིགས་གང་འཕྲད་ཀྱང་མངའ་སྡེ་གཞུང་གིས་མུ་མཐུད་ནས་མཐུན་བསྒྱུར་རོགས་རམ་གནང་ངེས་ཡིན་པ་སོགས་ཀྱི་གསུང་བཤད་གནང་ཡོད། དམིགས་བསལ་སྐུ་མགྲོན་མེ་སོར་གཙུག་ལག་སློབ་གཉེར་ཁང་གི་ཉེ་བའི་རིགས་བདག་སྐུ་ཞབས་ K.S Rangappa མཆོག་གིས་ཤེས་ཡོན་གྱི་གལ་གནད་སྐོར་གསུང་བཤད་གནང་པ་དང་འབྲེལ་ཏེ་མེ་སོར་གཙུག་ལག་སློབ་གཉེར་ཁང་གིས་ཏཱ་ལའི་བླ་མ་མཐོ་སློབ་ཁང་ལ་ད་བར་རྒྱབ་སྐྱོར་གནང་མུས་ཡིན་པ་དང་མ་འོངས་པའང་མུ་མཐུད་རྒྱབ་སྐྱོར་གནང་ངེས་ཡིན་སྐོར་གསུངས་སོང་། གཞན་ཡང་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་བོད་པའི་གཞོན་སྐྱེས་ཚོའི་ངོས་ནས་རང་རིགས་ཀྱི་སྐད་ཡིག་ལ་རྒྱུ་མཚན་ཤེས་པའི་ཐོག་ནས་དོ་སྣང་གནང་དགོས་གལ་ཡིན་པའི་གཞེན་སྐུལ་ཤུགས་ཆེ་གནང་ཡོད་པ་རེད།

༸གོང་ས་༸སྐྱབས་མགོན་ཆེན་པོ་མཆོག་གིས་མེ་སོར་ཆེས་མཐོའི་གཙུག་ལག་སློབ་གཉེར་ཁང་གི་བསླབ་པ་མཐར་སོན་གྱི་སློབ་མ་རྣམས་ལ་ཕྱག་འཁྱེར་བསྩལ་བ།

རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་མེ་སོར་གྲོང་ཁྱེར་ནང་གི་མཐོ་སློབ་རྙིང་ཤོས་གྲས་ཡིན་པ་ཀ་ན་ཊ་ཀ་ཆེས་མཐོའི་གཙུག་ལག་སློབ་གཉེར་ཁང་ནས་ཇི་ལྟར་གདན་ཞུ་གསོལ་འདེབས་ཞུས་དོན་ལྟར། ༸གོང་ས་༸སྐྱབས་མགོན་ཆེན་པོ་མཆོག་གིས་མེ་སོར་ཆེས་མཐོའི་གཙུག་ལག་སློབ་གཉེར་ཁང་གི་བསླབ་པ་མཐར་སོན་གྱི་སློབ་མ་རྣམས་ལ་ཕྱག་འཁྱེར་བསྩལ་གནང་མཛད་ཡོད་པ་རེད། དེ་རིང་ཟླ་ ༡༢ ཚེས་ ༡༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ crawfort hall མཐོ་སློབ་དེའི་བསླབ་པ་མཐར་སོན་གྱི་མཛད་སྒོ་ཐེངས་ ༩༧ གྱི་སྐུ་མགྲོན་གཙོ་བོར་དབུ་བཞུགས་མཛད་པ་གཙོས། ཀ་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ His Execellency Sri Vajubhai Rudabhai vala མཆོག་དང་གནད་ཡོད་མི་སྣ་ཁག་ཅིག མཐོ་སློབ་དེའི་ཉེ་བའི་རིགས་བདག་མཆོག་གིས་དབུས་པའི་སློབ་མཐར་སོན་པའི་སློབ་གཉེར་བ་རྣམས་དང་དགེ་ལས་སློབ་གཉེར་བ་བཅས་ལྷན་འཛོམས་གནང་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བསླབ་པ་མཐར་སོན་གྱི་སློབ་མ་རྣམས་ལ་ཕྱག་འཁྱེར་གསོལ་སྩལ་མཛད་ཡོད་པ་རེད། མཛད་སྒོ་དེའི་ཆེས་ཐོག་མར་མཐོ་སློབ་དེའི་ཉེ་བའི་རིགས་བདག་མཆོག་ནས་མཐོ་སློབ་ཁང་དེའི་ངོ་སྤྲོད་གསུང་བཤད་གནང་གྲུབ་བསྟུན། མཐོ་སློབ་དེའི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་ཀྱི་ཕྱག་འཁྱེར་ཞིག་དང་དྲན་རྟེན་གྱི་ཕྱག་ཚོད་གཅིག་བཅས་ཕུལ་ཡོད་པ་རེད། ༸གོང་ས་མཆོག་གིས་སྐབས་དེར་བསླབ་པ་མཐར་སོན་གྱི་སློབ་ཕྲུག་ཚོར་ཕྱག་འཁྱེར་གསོལ་སྩལ་གནང་པ་དང་འདི་བཞིན་སློབ་མཐར་སོན་པའི་སློབ་གཉེར་བ་རྣམས་ལ་དགའ་བསུའི་འཚམས་འདྲི་མཛད་ཡོད་པ་རེད། དེ་བཞིན་མགོན་པོ་༸གང་ཉིད་མཆོག་གིས་ཀ་ན་ཊ་ཀའི་མངའ་སྡེ་སྲིད་སྐྱོང་མཆོག་ལ་ཞལ་ཕྱོགས་ཏེ་བོད་མི་རྣམས་བཙན་བྱོལ་དུ་འགྱར་རྗེས་རྒྱ་གར་གྱི་སྲིད་བློན་ནེཧརུ་མཆོག་དང་སྐབས་དེའི་མངའ་སྡེའི་བློན་ཆེན་འདས་པོ་སྐུ་ཞབས་ནི་ཇ་ལིང་ག་པ་མཆོག་གིས་ཐུགས་འཁུར་གཙོ་བཞེས་ཐོག་བོད་མི་སྐྱབས་བཅོལ་བ་ཁྲི་བཞི་ལྔ་ཙམ་ལ་མངའ་སྡེའི་དེའི་ནང་གཞིས་ཆགས་པ་ནས་བཟུང་མངའ་སྡེ་དེ་དང་དམིགས་བསལ་གྱི་འབྲེལ་བ་ཞིག་ཆགས་ཡོད་པར་ཐུགས་དགྱེས་ཚོར་ཆེན་པོ་བྱུང་སྐོར་སོགས་ཀྱི་བཀའ་སློབ་བསྩལ་མཛད་ཡོད་པ་རེད། གཞན་ཡང་༸གང་ཉིད་མཆོག་གིས་ཤེས་ཡོན་གྱི་རིན་ཐང་ནི་མིའི་སྤྱི་ཚོགས་ལ་ཕན་བདེ་བསྐྲུན་རྒྱུ་དེ་ཡིན་པ་མ་ཟད། ལྷག་དོན་མཐོ་སློབ་དེ་ནས་ཐོན་པའི་སློབ་མ་ཚོས་ཀྱང་རྒྱལ་ཁབ་འདི་ཡར་རྒྱས་ཆེད་ཕན་བདེ་རྒྱ་ཆེན་པོ་བསྐྲུན་ཐུབ་རྒྱུ་ཡིན་སྐོར་སོགས་བཀའ་སློབ་ཟབ་མོ་བསྩལ་གནང་སོང་། ཐེངས་འདིའི་བསླབ་པ་མཐར་སོན་གྱི་ཕྱག་འཁྱེར་བཞེས་མཁན་སློབ་ཕྲུག་ཁོངས་སུ་མོན་གྷོ་བོད་མིའི་གཞིས་ཆགས་ནས་ཡིན་པའི་བོད་རིགས་བོུ་གཉིས་ཡོད་པ་རེད། མཛད་འཆར་ལྟར་ན། སང་ཉིན་ཟླ་ ༡༢ ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་སྦེང་ལོར་གྲོང་ཁྱེར་ནང་རྟེན་གཞི་བྱས་པའི་ཏཱ་ལའི་བླ་མ་མཐོ་སློབ་ཁང་དབུ་འབྱེད་ཀྱི་མཛད་སྒོར་དབུ་བཞུགས་མཛད་ཀྱི་ཡོད་པ་རེད།

མོན་གྷོ་བཙུན་དགོན་བྱང་ཆུབ་གླིང་དུ་དགེ་བཤེས་མའི་གྲྭ་བསྐོར་དམ་བཅའ་འཇོག་འགོ་ཚུགས་འདུག

འདི་ལོའི་ཕྱི་ཟླ་ ༥ ནང་དགེ་བཤེས་མའི་རྒྱུགས་སྤྲོད་སྐབས་ ༤ པའི་གྲུབ་འབྲས་གསལ་བསྒྲགས་གནང་པ་དང་སྦྲགས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་མདུན་ནས་བཙུན་མ་ཉི་ཤུ་དེ་དག་གིས་བོད་བརྒྱུད་ནང་བསྟན་གྱི་ལོ་རྒྱུས་རང་བཞིན་ལྡན་པའི་དགེ་བཤེས་མའི་མཚན་གནས་ཆེས་ཐོག་མ་དེ་བཞེས་རྒྱུ་གཏན་འཁེལ་བྱུང་དོན་ལྟར། ཁ་སང་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་གཙོ་འགན་ཐོག་རྒྱ་གར་ལྷོ་ཕྱོག་མོན་གྷོ་བཙུན་དགོན་བྱང་ཆུབ་གླིང་དུ་ཉིན་བཞིའི་རིང་དགེ་བཤེས་མའི་གྲྭ་བསྐོར་དམ་བཅའ་འཇོག་འགོ་ཚུགས་ཡོད་པ་རེད། དེ་ཡང་ཆོས་རིག་ལས་ཁུངས་དང་དགེ་བཤེས་མའི་རྒྱུགས་སྤྲོད་དོ་དམ་ལྷན་ཚོགས། བཙུན་དགོན་བྱང་ཆུབ་ཆོས་གླིང་གསུམ་གྱིས་ཇི་ལྟར་གསོལ་འདེབས་ཞུས་དོན་ལྟར། ཁ་སང་དགེ་བཤེས་མའི་གྲྭ་བསྐོར་དམ་བཅའ་འབུལ་བཞེས་ཀྱི་མཛད་སྒོའི་ཚོགས་མགོན་དུ་༸སྐྱབས་རྗེ་དགའ་ལྡན་ཁྲི་ཟུར་རི་རྫོང་སྲས་སྤྲུལ་རིན་པོ་ཆེ་མཆོག་གིས་དབུས། བཙུན་དགོན་ཁག་གི་དཔེ་འཁྲིད་དགེ་རྒན་རྣམ་པ། འཇང་དགུན་ཆོས་ཐོག་བཅར་བའི་བཙུན་དགོན་ཁག་བཅུའི་བཙུན་མ་ ༥༠༠ བཅས་ལྷན་འཛོམས་གནང་འདུག། དགེ་བཤེས་མའི་སློབ་མཐར་སོན་པའི་བཙུན་མ་ ༢༠ དེ་དག་ལ་བཙུན་དགོན་བྱང་ཆུབ་ཆོས་གླིང་དང་འཇམ་དབྱངས་ཆོས་གླིང་། སྒྲོལ་མ་གླིང་བཅས་ཀྱི་དགེ་བཤེས་མ་ལྔ་ནས་དབུ་པ། ཚད་མ། ཕར་ཕྱིན། འདུལ་བ། དེ་བཞིན་མཛོད་བཅས་གཞུང་ཆེན་བཀའ་པོད་ལྔའི་ཐོག་ལ་དམ་འཇོག་ཚིག་འདོན་གནང་པ་དང་འདི་བཞིན་དེ་རེ་རེའི་ཐོག་དམ་བཅའ་འཇོག་དགོས་པ་དང་དྲི་བ་འདྲི་ལན་གནང་གི་ཡོད་པ་རེད། བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་འཕར་ཐུབ་བསྟན་ལགས་སུ་བཀའ་འདྲི་ཞུས་པར། ཁོང་གིས་ཁ་སང་ནས་དབུ་འཛུགས་གནང་པའི་ཉིན་བཞིའི་དགེ་བཤེས་མའི་གྲྭ་བསྐོར་དམ་བཅའ་འཇོག་རྒྱུའི་མཛད་རིམ་དེར་དགེ་བཤེས་མ་ ༢༠ ནས་གཞུང་ཆེན་བཀའ་པོད་ལྔའི་དམ་བཅའི་ཚིག་རྣམས་རིམ་བཞིན་གསུང་འདོན་གྱིས་དམ་བཅའ་འཇོག་རྒྱུ་མ་ཟད། རིང་མིན་ཟླ་ ༡༢ ཚེས་ ༢༢ ཉིན་འབྲས་སྤུངས་བླ་སྤྱིར་༸གོང་ས་༸སྐྱབས་མགོན་ཆེན་པོ་མཆོག་ནས་དགེ་བཤེས་མའི་མཚན་རྟགས་ཀྱི་ཕྱག་འཁྱེར་གསོལ་སྩལ་མཛད་རྒྱུ་ཡིན་པ་རེད་ཅེས་སོགས་གསུངས་སོང་། གཞི་རྩའི་དགེ་བཤེས་མ་གཏོང་རྒྱུའི་ལས་རིམ་དེ་ནི་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་སྔ་རྗེས་སུ་ཕེབས་པའི་དགོངས་དོན་ལྟར།  བོད་མིའི་སྒྲིག་འཛུགས་ཆོས་རིག་ལས་ཁུངས་ནས་གཙོ་འགན་བཞེས་ཏེ་ཕྱི་ལོ་ ༢༠༡༢ ལོར་བོད་ཀྱི་བཙུན་དགོན་དང་སློབ་གཉེར་ཁང་ནས་གཞུང་ཆེན་བཀའ་པོད་ལྔའི་ཐོག་ལ་བསླབ་མཐར་སོན་པའི་བཙུན་མ་རྣམས་ལ་དགེ་བཤེས་མའི་རྒྱུགས་སྤྲོད་དང་མཚན་རྟགས་འབུལ་ཕྱོགས་ཀྱི་སྒྲིག་གཞི་ཞེས་པ་གསར་དུ་གཏན་ལ་ཕབ་སྟེ། ༢༠༡༣ ནས་དབུ་འཛུགས་གནང་ཡོད་པ་དང། དེ་ཡང་གཙོ་བོ་བོད་མིའི་སྒྲིག་འཛུགས་ཆོས་རིག་ལས་ཁུངས་དང་། བཙུན་དགོན་དགེ་ལྡན་ཆོས་གླིང་དང་སྒྲོལ་མ་གླིང་སོགས་བཙུན་དགོན་དྲུག་དང་། དེ་བཞིན་རྡ་ས་རིགས་ལམ་སློབ་གཉེར་ཁང་བཅས་ནས་ཐུགས་འགན་བཞེས་གནང་ཡོད་པ་རེད། དགེ་བཤེས་མའི་རྒྱུགས་སྤྲོད་དོ་དམ་ཚོགས་ཆུང་གིས་གྲུབ་འབྲས་ཕྱོགས་བསྡོམས་ཀྱི་གསལ་བསྒྲགས་སྤེལ་དོན་བཞིན་ཐེངས་འདིར་ལོ་རིམ་ཁག་བཞིའི་བཙུན་མ་ཞལ་གྲངས་ ༤༤ ནས་རྒྱུགས་སྤྲོད་ནང་མཉམ་ཞུགས་གནང་པའི་ཁྲོད།  ལོ་རིམ་དང་པོའི་རྒྱུགས་སྤྲོད་ནང་བཙུན་མ་ཞལ་གྲངས་ ༨ ཞུགས་ཡོད་པ་དང། ལོ་རིམ་གཉིས་པའི་ནང་དུ་ ༡༠ དང་། ལོ་རིམ་གསུམ་པའི་ནང་དུ་ ༦ དང་ལོ་རིམ་བཞི་པ་སྟེ་ལོ་རིམ་མཐའ་འམ་དགེ་བཤེས་མའི་རྒྱུགས་སྤྲོད་ནང་ཞུགས་མཁན་བཙུན་མ་ཞལ་གྲངས་ ༢༠ བྱུང་ཡོད་པ་བཅས་ལོ་རིམ་བཞི་ཀའི་ནང་བཙུན་པ་ཆ་ཚང་རྒྱུགས་ཕྲོད་ཐུབ་པ་བྱུང་ཡོད་པ་རེད།

Latest news