༸གོང་ས་མཆོག

 བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡོ་རོབ་རྒྱལ་ཁབ་གསུམ་ནང་གི་མཛད་འཕྲིན་ཁག་ལེགས་པར་གྲུབ་བསྟུན། བཞུགས་སྒར་དུ་༸ཞབས་སོར་བདེ་བར་འཁོད་གནང་མཛད་སོང། དེ་རིང་ཟླ་ ༩ ཕྱི་ཚེས་ ༢༣ སྔ་དྲོ་ཚོུད་ ༩།༠༠ ཙམ་ལ་མགོན་པོ་༸གང་ཉིད་མཆོག་བཞུགས་སྒར་ཉེ་འདབས་སུ་ཡོད་པའི་གྷ་གལ་གནམ་ཐང་དུ་༸ཞབས་སོར་བདེ་བར་འཁོད་པར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་གཙོས་གཞུང་འབྲེལ་དང་གཞུང་མིན་པའི་ཚོགས་ཁག་གི་གནད་ཡོད་མི་སྣ་སོགས་ཆེད་བཅར་གྱིས་ཕེབས་བསུ་ཞུས་པ་དང་། བཞུགས་སྒར་ཕེབས་ལམ་གྱི་གཡས་གཡོན་དུ་སྲི་ཞུ་ལས་བྱེད་གཙོས་ས་གནས་བོད་མི་ཚོས་ལག་ཏུ་དཀར་གཙང་གི་མཇལ་དར་སོགས་བསྣམས་ཏེ་༸གང་ཉིད་མཆོག་ལ་ཕེབས་བསུ་ཞུས་པ་མ་ཟད། བཞུགས་སྒར་༸རྒྱལ་བའི་ཕོ་བྲང་དུ་༸ཞབས་སོར་བདེ་བར་འཁོད་སྐབས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོས་གཙོས་སྤྱི་འཐུས་རྣམས་ནས་དཀར་གཙང་གི་མཇལ་དར་དང་དྲི་ཞིམ་གྱི་དུག་སྤོས་བཅས་བསྣམས་ཏེ་དགའ་དད་ཆེན་པོས་མགོན་པོ་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་སོང་། གཞི་རྩའི་མགོན་པོ་༸གང་ཉིད་མཆོག་ད་རེས་ཡོ་རོབ་རྒྱལ་ཁབ་བྷེལ་ཇམ་དང་ཕ་རན་སི། པོ་ལན་ཌི་བཅས་ཀྱི་ཁུལ་དུ་ཟླ་འདིའི་ཚེས་ ༦ ཉིན་དབུ་འཛུགས་ཀྱིས་དེ་རིང་ཚེས་ ༢༣ བར་ཁྱོན་གཟའ་འཁོར་གཉིས་ལྷག་རིང་མཛད་འཕྲིན་བསྐྱངས་པའི་ཁྲོད། གཙོ་བོ་ཕྱི་ཚེས་ ༨ ཉིན་ཁུལ་དེའི་རྒྱལ་ས་སྦར་སིལ་ནང་དུ་ཚོགས་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ ༧ པའི་དབུ་འབྱེད་ཀྱི་མཛད་སྒོར་ཚོགས་མགོན་དུ་དབུ་བཞུགས་མཛད་པ། དེ་རྗེས་ཚེས་ ༩ ནས་དབུ་འཛུགས་ཀྱིས་ཚེས་ ༡༡ བར་ཁུལ་དེའི་བྷོ་ཛར་སྒྱུ་རྩལ་བསྟི་གནས་ཁང་དུ་ཡུ་རོབ་སེམས་དང་སྲོག་གི་ལྷན་ཚོགས་ཐོག་ཚོགས་མགོན་དུ་ཆིབས་སྒྱུར་བསྐྱངས་གནང་མཛད།  དེ་བཞིན་ས་གནས་མང་ཚོགས་དང་། བོད་རིགས་བཅས་ཁག་སོ་སོར་བཀའ་སློབ་བསྩལ་བ་མ་ཟད།   ༸གོང་ས་མཆོག་གིས་བྷེལ་ཇམ་གྱི་ RTBF བརྙན་འཕྲིན་གསར་ཁང་གི་བཅར་འདྲི་དང་ལེན་གྱིས་འཛམ་གླིང་འདི་བྱམས་བརྩེ་ལྡན་པ་ཞིག་ཡོང་བར་གཙོ་བོ་ཤེས་ཡོན་སློབ་གསོ་ལ་ཐུག་ཡོད་པ་ལམ་སྟོན་བསྩལ་ཡོད། དེ་རྗེས་ཚེས་ ༡༢ ཉིན་བྷེལ་ཇམ་གྱི་རྒྱལ་ས་ Brussels ནང་དུ་རྟེན་གཞི་བྱས་པའི་ Louvain གཙུག་ལག་སློབ་གཉེར་ཁང་དུ་ཆོས་ལུགས་མཐུན་འབྲེལ་གྱི་ལྷན་ཚོགས་ཐོག་ཆིབས་སྒྱུར་གྱིས་དབུ་བཞུགས་མཛད་ཡོད་པ་དང་། དེ་ཉིན་ཉི་རྒྱབ་ཏུ་༸གོང་ས་མཆོག་གིས་བྷེལ་ཇམ་ནང་གི་མཛད་འཆར་ཁག་ལེགས་པར་གྲུབ་ཀྱིས་ཧྥ་རན་སིའི་རྒྱལ་ས་ Paris ནང་དུ་༸ཞབས་སོར་བདེ་བར་འཁོད་ཡོད་པ་དང་། ༸གང་ཉིད་མཆོག་གིས་ཕྱི་ཚེས་ ༡༣ དང་། ༡༤ བཅས་ཉིན་གཉིས་རིང་བོད་རིགས་ ༣༥༠༠ སྐོར་ཞིག་ལ་ཟུར་དུ་བཀའ་སློབ་བཀྲིན་བསྩལ།  བཟོད་སྒོམ་དང་གུས་བརྩི་ཞེས་པའི་བརྗོད་གཞིའི་འོག་གོ་སྒྲིག་ཞུས་པའི་ཆོས་ལུགས་མཐུན་འབྲེལ་ལྷན་ཚོགས་ཐོག་ཚོགས་མགོན་དུ་དབུ་བཞུགས་ཀྱིས་བཀའ་སློབ་བསྩལ་བ་དང་། དེ་བཞིན་ཚེས་ ༡༥ ནས་དབུ་འཛུགས་ཀྱིས་ཚེས་ ༡༩ བར་ཧྥ་རན་སའི་ Strasbourg གྲོང་ཁྱེར་དུ་བོད་ཀྱི་ནང་ཆོས་མཐུན་ཚོགས་ནས་ཇི་ལྟར་གསོལ་འདེབས་ཞུ་དོན་བཞིན། ཁུལ་དེའི་དད་ལྡན་མང་ཚོགས་ལ་དཔལ་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་དང་ཐུགས་རྗེ་ཆེན་པོའི་བཀའ་དབང་བསྩལ་བ་དང་། ༸གང་ཉིད་མཆོག་གིས་ཡོ་རོབ་གྲོས་ཚོགས་ནང་ཆིབས་སྒྱུར་གྱིས་ཡོ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ Martin Schulz མཆོག་དང་མཇལ་འཕྲད་གནང་པ་མ་ཟད། བོད་མིའི་རང་དབང་འཐབ་རྩོད་ཀྱི་བརྒྱུད་དང་འབྲེལ་རང་ལུས་མེ་སྲེག་གི་ལས་འགུལ་སྤེལ་བ་མཐའ་དག་གཞན་ལ་གནོད་འཚེ་མེད་པར་ཞི་བའི་ཐབས་ལམ་གྱི་སྒོ་ནས་རྒྱུན་སྐྱོང་གནང་བཞིན་ཡོད་སྐོར་བཀའ་སྩལ་བ་དང་། མ་འོངས་པར་ཡོ་རོབ་གྲོས་ཚོགས་འཐུས་མི་རྣམས་ལ་རྒྱ་གཞུང་གི་འགོ་ཁྲིད་ཚོ་དང་མཇལ་མོལ་བྱུང་ཚེ། ཁྱེད་ཚོས་བོད་དོན་ལ་ཐུགས་འཁུར་དང་རྒྱབ་སྐྱོར་གནང་དོན་གང་ཡིན་གྱི་རྒྱུ་མཚན་འགྲེལ་བརྗོད་གནང་དགོས་གལ་ཡིན་པ་གཞེན་སྐུལ་གནང་པ་དང་། དེ་ལྟར་བྱུང་བ་ཡིན་ན་ཕན་ཐོགས་ཧ་ཅང་ཆེན་པོ་ཡོང་རྒྱུ་ཡིན་པ་བཅས་བཀའ་བསྩལ་ཡོད་པ་རེད། དེ་བཞིན་ཚེས་ ༡༩ ཉིན་༸གོང་ས་མཆོག་གིས་པོ་ལན་ཌིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་ ༢༠ དང་མཇལ་འཕྲད་ཀྱིས་བཀའ་སློབ་བཀྲིན་བསྩལ། དེ་རྗེས་ཚེས་ ༢༠ ཉིན་མགོན་པོ་མཆོག་གིས་ Wcrolaw གྲོང་ཁྱེར་གྱི་སྤྱི་ཁྱབ་མཆོག་ནས་གསོལ་འདེབས་ཕུལ་བ་ལྟར་པོ་ལན་ཌིའི་ Wroclaw གྲོང་ཁྱེར་དེ་ ༢༠༡༦ ལོའི་ཡུ་རོབ་རིག་གཞུང་གི་རྒྱལ་སར་འདེམས་ཐོན་བྱུང་བའི་གཞུང་འབྲེལ་མཛད་སྒོའི་ཐོག་དབུ་བཞུགས་གནང་པ་དང་འབྲེལ་བཀའ་སློབ་བཀའ་འདྲིན་བསྩལ་བའི་ཁྲོད། གྲོང་ཁྱེར་དེའི་གཞུང་མང་གཉིས་ནས་ ༢༠༡༦ ལོའི་དུས་ཡུན་དེའི་ནང་གྲོང་ཁྱེར་དེ་གར་གནས་སྡོད་རྒྱལ་ཁབ་འདྲ་མིན་དང་ཆོས་ལུགས་འདྲ་མིན་ནང་ཕན་ཆུལ་དབར་མཐུན་སྒྲིལ་དང་ཆིག་སྒྲིལ་གྱི་བློ་གོང་འཕེལ་གཏང་ཐུབ་ཚེ། ཁྱེད་ཚོས་ཡུ་རོབ་རིག་གཞུང་གི་རྒྱལ་སའི་ཆ་ནས་འཛམ་གླིང་གི་སྤྱི་ཚོགས་འདིར་དོན་དམ་གྱི་ལེགས་སྐྱེས་ཤིག་ཕུལ་ཐུབ་ཀྱི་རེད་ཅེས་བཀའ་བསྩལ་གནང་ཡོད་པ་རེད། ཕྱི་ཚེས་ ༢༡ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཡོ་རོབ་རྒྱལ་ཁབ་པོ་ལན་ཌིའི་ Wroclaw གྲོང་ཁྱེར་ནས་རྒྱང་ཐག་སྤྱི་ལེ་ ༥༠ སར་ཆགས་པའི་  Swidnica གྲོང་ཁྱེར་ནང་དུ་རྟེན་གཞི་བྱས་པའི་ཞི་བདེའི་ལྷ་ཁང་ Church of Peace ཞེས་རྒྱལ་ཚོགས་ཀྱི་ཤེས་ཡོན་དང་རིག་གཞུང། ཚན་རིག་བཅས་ཀྱི་ལྷན་ཚོགས་འཛམ་གླིང་གཅེས་ནོར་དུ་ངོས་འཛིན་ཡོད་པའི་ཡི་ཤུའི་ལྷ་ཁང་དུ་ཆིབས་སྒྱུར་གྱིས་ཆོས་ལུགས་རིས་མེད་ཀྱི་ལྷན་ཚོགས་ཐོག་དབུ་བཞུགས་དང་། ཞི་བདེའི་གོང་འཕེལ་ཐོག་ཤུགས་སྣོན་སྐྱོན་དགོས་པའི་སྤྱི་བསྒྲགས་ཐོག་རྒྱབ་སྐྱོར་གྱི་མཚན་རྟགས་བཀོད་གནང་མཛད་པ་མ་ཟད།  དེ་རྗེས་ Wroclaw ནང་དུ་༸གང་ཉིད་མཆོག་གི་བཞུགས་གནས་མགྲོན་ཁང་དུ་ The Book of Joy ཞེས་༸གོང་ས་མཆོག་དང་༸གང་ཉིད་ཀྱི་མཛའ་གྲོགས་ Desmond Tutu མཆོག་གི་ལྷན་དུ་ལྗགས་རྩོམ་མཛད་པའི་ཕྱག་དེབ་དབུ་བྱེད་དང་འབྲེལ་ཨ་རི་དང་ཨིན་ཡུལ་གྱི་བརྒྱུད་ལམ་གཉིས་ཀྱི་བཅར་འདྲིའི་ལས་རིམ་ཞིག་ཐོག་དབུ་བཞུགས་མཛད་གནང་ཡོད། རྩ་བའི་༸གོང་ས་མཆོག་དེ་རིང་ཟླ་ ༩ ཚེས་ ༢༢ ཉིན་གྱི་སྔ་ཐོག་ Wroclaw གྲོང་ཁྱེར་སྤྱི་ཁྱབ་དང་ཁུལ་དེའི་གནད་ཡོད་མི་སྣ་ཁག་ཅིག་གིས་གནམ་ཐང་བར་ཕེབས་སྐྱེལ་ཞུས་ཐོག་༸གང་ཉིད་མཆོག་དང་སྐུ་འཁོར་ལྷན་རྒྱས་ Wroclaw ནས་མཁའ་ལམ་བརྒྱུད་བཞུགས་སྒར་དུ་༸ཞབས་སོར་བདེ་བར་འཁོད་གནང་མཛད་སོང་། ཤེས་རྟོགས་བྱུང་བར་གཞིགས་ན། ཟླ་ ༡༠ ཚེས་ ༣ ནས་ ༦ བར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་ཐེ་ཝན་གྱི་དད་ལྡན་ཆོས་ཞུ་བ་ཁག་ཅིག་གིས་ཇི་ལྟར་གསོལ་འདེབས་ཞུས་དོན་བཞིན་འཕགས་པ་ལྷས་མཛད་པའི་དབུ་མ་བཞི་བརྒྱ་པའི་གསུང་ཆོས་སྩལ་རྒྱུ། དེ་རྗེས་ཚེས་ ༡༤ ནས་དབུ་འཛུགས་ཀྱིས་ Baltic མཚོ་མཐའི་རྒྱལ་ཁབ་ Latvia རྒྱལ་ས་ Riga དང་། Swiss གྲོང་ཁྱེར་ Zurich དེ་བཞིན་ Italy གྲོང་ཁྱེར་ Milan བཅས་ཀྱི་ནང་དུ་ཆོས་འབྲེལ་དང་བཀའ་སློབ་བཅས་ཀྱི་མཛད་འཆར་ཁག་ཅིག་བསྐྱང་གཏན་འཁེལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་པོ་ལན་ཌིའི་ Wroclaw གྲོང་ཁྱེར་གྱི་ཞི་བདེ་ལྷ་ཁང་དུ་ཆོས་ལུགས་རིས་མེད་ཀྱི་ལྷན་ཚོགས་ཐོག་ཆིབས་སྒྱུར་གྱི་དབུ་བཞུགས་མཛད་པ་དང་འབྲེལ། ཞི་བདེ་ཞེས་པ་དེ་ཆོས་གཅིག་པོའི་ཐོག་ནས་ཡོང་ཐབས་མེད་པ་དང་དེ་གཙོ་བོ་ནང་སེམས་ཀྱི་ཞི་བདེ་བརྒྱུད་ནས་བསྐྲུན་དགོས་གལ་ཡིན་པ་བཀའ་སྩལ་གནང་འདུག དེའང་ཁ་སང་ཟླ་ ༩ ཚེས་ ༢༡ སྟེ་རྒྱལ་སྤྱིའི་ཞི་བདེ་ཉིན་མོ་དང་བསྟུན་པོ་ལན་ཌིའི་ Swidnica གྲོང་ཁྱེར་ནང་དུ་རྟེན་གཞི་བྱས་པའི་ཞི་བདེའི་ལྷ་ཁང་ནང་དུ་ཆོས་ལུགས་རིས་མེད་ཀྱི་ལྷན་ཚོགས་ཤིག་ཚོགས་ཡོད་པ་དང། མཛད་སྒོ་དེའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་ Catholic དང་། Protestant བཅས་ཡི་ཤུའི་ཆོས་བརྒྱུད་ཆེན་པོ་གཉིས་དང་ཁ་ཆེ། དེ་བཞིན་ Jew དང་། ནང་པ་སོགས་ཆོས་ལུགས་འདྲ་མིན་གྱི་དབུ་བླ་དང་ Swidnica གྲོང་ཁྱེར་སྤྱི་ཁྱབ་དང་གནད་ཡོད་མི་སྣ་བཅས་ཁྱོན་མི་གྲངས་ ༥༠༠ ཡས་མས་ཤིག་ལྷན་འཛོམས་གནང་ཡོད་པ་རེད། སྐབས་དེར་༸གོང་ས་མཆོག་གིས་ངོས་རང་དེ་རིང་འདིར་ཞི་བདེ་སྲུང་བརྩི་ཞུ་རྒྱུའི་དུས་ཚིགས་ཁྱད་པར་ཅན་གྱི་ཐོག་བཅར་ཐུབ་པར་དགའ་ཚོར་ཆེན་པོ་བྱུང་ཞེས་བཀའ་སྩལ་བ་དང་འབྲེལ།  འཛམ་གླིང་ཞི་བདེ་ཞེས་པ་དེ་སྨོན་ལམ་བཏབ་པ་ཁོ་ན་མིན་པར་གཙོ་བོ་ནང་སེམས་ཀྱི་ཞི་བདེ་བརྒྱུད་ནས་བསྐྲུན་དགོས་པ་ལས། འཇིགས་སྣང་དང་ང་རྒྱལ་གྱི་ཚོར་བའི་ཐོག་ནས་བསྐྲུན་ཐབས་མེད་པ་དང། ལྷག་པར་དུ་འཛམ་གླིང་ཞེ་བདེ་ལྡན་པ་ཞིག་བསྐྲུན་མཁན་དེ་འགྲོ་བ་མི་རང་ཉིད་ཡིན་སྟབས། ཞི་བདེ་བསྐྱར་གསོ་བྱེད་མཁན་དེའང་འགྲོ་བ་མི་རང་ཉིད་ཡིན་དགོས་པ་དང།  ཞི་བདེ་བསྐྱར་གསོ་ཡོང་བར་ཐབས་ཤེས་གནང་ཟིན་རྗེས་སླར་དཀའ་ངལ་རིགས་མུ་མཐུད་འཕྲད་ངེས་ཡིན་པ་རེད།  དཀའ་ངལ་དེ་དག་འཚེ་བའི་ཐོག་ནས་མ་ཡིན་པར་ཐབས་ལམ་གཞན་གྱི་ཐོག་ནས་སེལ་དགོས་གལ་ཡིན་པར་བཀའ་སྩལ་མཛད་འདུག དེ་བཞིན་༸གོང་ས་མཆོག་གིས་ཆོས་ལུགས་ཁག་ཕན་ཚུལ་དབར་མཐུན་འབྲེལ་གནང་གལ་ཆེ་བ་དང་། གོ་ལ་འདིིའི་ཐོག་ཡོད་པའི་ཆོས་ལུགས་འདྲ་མིན་གྱི་དབུ་བླ་རྣམ་པས་ཀྱང་ཞི་བདེ་བསྐྲུན་པར་ཐུགས་བཞེས་གནང་གལ་ཡིན་པ་བཀའ་སྩལ་བ་མ་ཟད་། ༸གང་ཉིད་མཆོག་གིས་ཞི་བདེ་གོང་འཕེལ་ཐོག་ཤུགས་སྣོན་སྐྱོན་དགོས་པའི་སྤྱི་བསྒྲགས་ཐོག་རྒྱབ་སྐྱོར་གྱི་མཚན་རྟགས་བཀོད་གནང་མཛད་འདུག ༸གོང་ས་མཆོག་གིས་ Swidnica གྲོང་ཁྱེར་ནང་གི་ཞི་བདེ་ལྷ་ཁང་དུ་མཛད་འཆར་ལེགས་པར་གྲུབ་རྗེས། ༸གོང་ས་མཆོག་ Wroclaw ཕྱོགས་སུ་ཕྱིར་ཕེབས་གནང་སྐབས་ཕེབས་ལམ་དུ་ Swidnica གྲོང་ཁྱེར་གྱི་ཡི་ཤུའི་ཆོས་དཔོན་ Bishop Ignacy Dec མཆོག་གིས་གདན་ཞུ་ལྟར་ཆོས་དཔོན་ཁོང་གི་ལྷ་ཁང་དུ་གནས་གཟིགས་ཕེབས་གནང་མཛད་འདུག དེ་རྗེས་ Wroclaw ནང་དུ་༸གང་ཉིད་མཆོག་གི་བཞུགས་གནས་མགྲོན་ཁང་དུ་ The Book of Joy ཞེས་༸གོང་ས་མཆོག་དང་༸གང་ཉིད་ཀྱི་མཛའ་གྲོགས་ Desmond Tutu མཆོག་གི་ལྷན་དུ་ལྗགས་རྩོམ་མཛད་པའི་ཕྱག་དེབ་དབུ་བྱེད་དང་འབྲེལ་ཨ་རི་དང་ཨིན་ཡུལ་གྱི་བརྒྱུད་ལམ་གཉིས་ཀྱི་བཅར་འདྲིའི་ལས་རིམ་ཞིག་ཐོག་དབུ་བཞུགས་མཛད་གནང་འདུག རྩ་བའི་དེ་རིང་ཟླ་ ༩ ཚེས་ ༢༣ ཉིན་གྱི་སྔ་ཐོག་ Wroclaw གྲོང་ཁྱེར་སྤྱི་ཁྱབ་དང་ཁུལ་དེའི་གནད་ཡོད་མི་སྣ་ཁག་ཅིག་གིས་གནམ་ཐང་བར་ཕེབས་སྐྱེལ་ཞུས་ཐོག་༸གང་ཉིད་མཆོག་དང་སྐུ་འཁོར་ལྷན་རྒྱས་ Wroclaw ནས་མཁའ་ལམ་བརྒྱུད་རྒྱ་གར་ཕྱོགས་སུ་ཆིབས་ཞལ་སྒྱུར་གནང་མཛད་འདུག

དེ་རིང་ཟླ་ ༩ ཚེས་ ༢༡ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡོ་རོབ་རྒྱལ་ཁབ་པོ་ལན་ཌིའི་ Wroclaw གྲོང་ཁྱེར་ནས་རྒྱང་ཐག་སྤྱི་ལེ་ ༥༠ སར་ཆགས་པའི་ Swidnica གྲོང་ཁྱེར་ནང་དུ་རྟེན་གཞི་བྱས་པའི་ཞི་བདེའི་ལྷ་ཁང་  Church of Peace ཞེས་རྒྱལ་ཚོགས་ཀྱི་ཤེས་ཡོན་དང་རིག་གཞུང། ཚན་རིག་བཅས་ཀྱི་ལྷན་ཚོགས་འཛམ་གླིང་གཅེས་ནོར་དུ་ངོས་འཛིན་ཡོད་པའི་ཡི་ཤུའི་ལྷ་ཁང་དུ་ཆིབས་སྒྱུར་གྱིས་ཆོས་ལུགས་རིས་མེད་ཀྱི་ལྷན་ཚོགས་ཐོག་དབུ་བཞུགས་མཛད་འདུག སྐབས་དེར་༸གོང་ས་མཆོག་གིས་རྒྱལ་སྤྱིའི་ཞི་བདེ་ཉིན་མོ་ International day of Peace དང་བསྟུན། Appeal for Peace ཞེས་ཡི་ཤུའི་བླ་ཆེན་ Pope Francis མཆོག་གིས་སྣེ་ཁྲིད་པའི་འཛམ་གླིང་གོ་ཁྲིད་རྣམས་ལ་རྩོད་རྙོག་མཚམས་འཇོག་དང་ཞི་བདེའི་གོང་འཕེལ་ཐོག་ཤུགས་སྣོན་སྐྱོན་དགོས་པའི་སྤྱི་བསྒྲགས་ཐོག་རྒྱབ་སྐྱོར་གྱི་མཚན་རྟགས་བཀོད་གནང་མཛད་འདུག ༸གོང་ས་མཆོག་གིས་ Swidnica གྲོང་ཁྱེར་ནང་དུ་ཆིབས་སྒྱུར་མ་མཛད་གོང་སྔ་ཐོག་ཚོུད་ ༨ སྟེང་ Wroclaw ནང་ཡོད་པའི་བོད་རིགས་ ༢༥ ཙམ་དང་སོག་པོའི་མི་རིགས་ ༢༠ སྐོར་ཞིག་ལ་མཇལ་ཁ་དང་བཀའ་སློབ་བཀའ་དྲིན་བསྩལ་གནང་འདུག རྩ་བའི་༸གོང་ས་མཆོག་ནས་ཁ་སང་ཉིན་རྒྱབ་ཏུ་པོ་ལན་ཌིའི་ Wroclaw གྲོང་ཁྱེར་སྤྱི་ཁྱབ་སྐུ་ཞབས་ Rafal Dutkiewicz ལགས་དང་ལྷན་དུ་གྲོང་སྡེ་ལྷན་ཚོགས་ཀྱི་ཚོགས་ཁང་ཉེ་འདབས་སུ་ཆགས་པའི་གྲོང་ཁྱེར་གྱི་འགྲེམས་སྟོན་ཁང་དུ། དེ་སྔ་དུས་རབས་ཉི་ཤུའི་མགོ་སྟོད་དུ་ཡུ་རོབ་གཅིག་སྒྲིལ་ཐོག་ཕྱག་ལས་གནང་མཁན་གཙོ་གྲས་དུས་དེའི་ཚེ་ Wroclaw གྲོང་ཁྱེར་གྱི་ཡི་ཤུའི་ཆོས་དཔོན་ Cardinal Boleslaw Kominek མཆོག་ལ་ཆེ་བསྟོད་ཞུ་ཕྱིར་གོ་སྒྲིག་ཞུས་པ་ Forgiveness and Reconciliation འམ་བཟོད་པ་དང་འཆམ་མཐུན་ཞེས་མིང་བྱང་འཁོད་པའི་འགྲེམས་སྟོན་གཟིགས་འབུལ་ཐོག་ཆིབས་སྒྱུར་དང་། དེར་བཅར་ཡོད་པའི་སློབ་ཕྲུག་ཁག་ཅིག་དང་མཇལ་འཕྲད་ཀྱིས་བཀའ་སློབ་བསྩལ་གནང་བའི་ཁྲོད། མགོན་པོ་མཆོག་གིས་དུས་རབས་ ༢༠ པའི་ནང་དུ་འཚེ་བ་དང་དྲག་སྤྱོད་ཀྱི་གནད་དོན་རྣམས་དྲན་སྐུལ་མཛད་པ་དང་སྦྲགས། གལ་སྲིད་དུས་རབས་ ༢༡ པ་དེ་ཞི་བདེ་ལྡན་པ་ཞིག་ཡོང་བ་འདོད་ཚེ། མ་འོངས་པར་དཀའ་ངལ་མཐའ་དག་སེལ་བར་དོན་དམ་གྱི་གྲོས་མོལ་དང་བཟོད་པ་དང་འཆམ་མཐུན་གྱི་ལམ་ནས་སེལ་དགོས་གལ་ཡིན་པ་བཀའ་སློབ་བཀྲིན་བསྩལ་འདུག་པ་མ་ཟད། ༸གང་ཉིད་མཆོག་གིས་ཡོ་རོབ་སྤྱི་མཐུན་ཚོགས་པའི་ངོས་ནས་རྒྱལ་ཁབ་སྒེར་གྱི་ཁེ་ཕན་སླད་སྤྱི་ཡོངས་ཀྱི་ཁེ་ཕན་ལ་བསམ་བློ་ཤུགས་ཆེ་བ་བཏང་ནས་འཆམ་མཐུན་གྱི་འདུ་ཤེས་འཛིན་ཕྱོགས་ལ་སྔགས་བརྗོད་གནང་སྐོར་བསྐྱར་ནན་མཛད་འདུག མགོན་པོ་མཆོག་གིས་ཁུལ་དེའི་ Polityka བརྒྱུད་ལམ་གྱི་བཅར་འདྲི་ལས་རིམ་ཐོག་ལ་དབུ་བཞུགས་མཛད་འདུག་པ་དང། སྐབས་དེར་༸གང་ཉིད་མཆོག་བཙན་བྱོལ་དུ་ཇི་ཕེབས་ཚུལ་དང། ཕྱི་ལོ་ ༡༩༧༤ ནས་བཟུང་བོད་མིའི་ངོས་ནས་རང་བཙན་རྩོད་རྒྱུ་དོར་ཏེ་གཉིས་སྨན་དབུ་མའི་ལམ་གྱི་སྲིད་བྱུས་ཐོག་ཤར་བསྐྱོད་གནང་རྒྱུ་ཐུགས་ཐག་བཅད་གནང་ཡོད་པ་དང། སྲིད་བྱུས་དེར་རྒྱ་རིགས་མང་ཚོགས་ཁྲོད་ནས་ཤེས་ལྡན་མི་སྣ་མང་པོས་རྒྱབ་སྐྱོར་ཇི་ཙམ་གནང་གི་ཡོད་པ་བཅས་ཀྱི་སྐོར་ལ་བཀའ་བསྩལ་འདུག ༸གང་ཉིད་མཆོག་ལ་གནད་དོན་མང་དག་ཐོག་བཀའ་འདྲི་ཞུས་འདུག་ཀྱང་དེ་དག་ལས་འཇིགས་སྐུལ་དྲག་སྤྱོད་རིང་ལུགས་པ་རྣམས་དམར་བསད་བཏང་ཚེ། འཇིགས་སྐུལ་གྱི་དཀའ་ངལ་དེ་སེལ་ཐུབ་མིན་ཐད་བཀའ་འདྲི་ཞུས་པར་༸གོང་ས་མཆོག་གིས་ཁོ་ཚོ་དམར་བསད་བཏང་བ་ཡིན་ན། དཀའ་རྙོག་དེ་ལས་མང་བ་བཟོ་རྒྱུ་ཉག་ཅིག་ཡིན་སྟབས། དྲག་སྤྱོད་པར་མི་གཅིག་མཚུངས་ཡིན་པ་འདུ་ཤེས་འཛིན་པའི་ཐབས་ལམ་ཤིག་ཐོག་ནས་ངལ་བ་དེ་དག་སེལ་དགོས་གལ་ཡིན་པ་བཀའ་བསྩལ་འདུག དེ་བཞིན་ཁ་སང་ཉིན་རྒྱབ་ཏུ་༸གོང་ས་མཆོག་གིས་ Wroclaw གྲོང་ཁྱེར་གྱི་ History Center བསྟི་གནས་ཁང་དུ་མི་གྲངས་ ༢༥༠ ལྷག་འདུ་འཛོམས་ཡོད་པ་ལས་འཕལ་མོ་ཆེ་སློབ་ཕྲུག་ཡིན་སྟབས། དེ་དག་ལ་ད་སྐབས་འགྲོ་བ་མིའི་རིགས་ལ་དཀའ་ངལ་སྣ་མང་ཞིག་འཕྲད་བཞིན་ཡོད་པ་དང། དེའང་ང་ཚོས་ཕུགས་རྒྱང་རིང་པོའི་བསམ་བློ་གཏང་མ་ཐུབ་པ་དང། སྤྱི་ཡོངས་ཀྱི་དངོས་ཡོད་གནས་སྟངས་གང་མ་ཤེས་པས་གང་ཟག་སྒེར་གྱི་ཐོག་ལ་བསམ་བློ་ཤུགས་ཆེ་བཏང་བའི་དབང་གིས་བྱུང་བཞིན་ཡོད་པ་དང་། དེ་དག་སེལ་བར་མི་ཚང་མ་གཅིག་མཚུངས་ཡིན་པ་དྲན་གསོ་གནང་གལ་ཡིན་པ་སོགས་བཀའ་སློབ་གནང་འདུག སྐབས་དེར་སློབ་ཕྲུག་རྣམས་ནས་༸གོང་ས་མཆོག་ལ་ཕྱག་རྟགས་འབུལ་གཞེས་དང་༸སྐུ་པར་སོགས་སྒྲོན་པ་མ་ཟད། ༸གང་ཉིད་དང་ལྷན་དུ་དྲི་བ་དྲི་ལན་ཡང་གནང་འདུག འདི་གར་མཛད་འཆར་དང་འབྲེལ་ཡོད་གནས་ཚུལ་འབྱོར་བར་གཞིགས་ན། པོ་ལན་ཌི་ནང་གི་མཛད་འཆར་ཁྲོད་༸གོང་ས་མཆོག་གིས་༸སྐུའི་མཛའ་གྲོགས་ཡི་ཤུའི་ཆོས་དཔོན་ Desmond Tutu མཆོག་དང་ལྷན་དུ་ལྗགས་རྩོམ་གནང་པ་ Book of Joy འམ་དགའ་བའི་ཕྱག་དེབ་དབུ་བྱེད་དང་འབྲེལ་བཅར་འདྲིའི་ལས་རིམ་ཞིག་གི་ཐོག་ལ་དབུ་བཞུགས་མཛད་ཀྱི་ཡོད་པ་རེད་འདུག མཛད་ཆར་ལྟར་ན། སང་ཉིན་ཚེས་ ༢༢ ཉིན་གྱི་སྔ་དྲོ་༸གོང་ས་མཆོག་རྒྱ་གར་དུ་ཚུར་ཆིབས་ཞལ་བསྒྱུར་གནང་མཛད་ཀྱི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་པོ་ལན་ཌིའི་ Wroclaw གྲོང་ཁྱེར་གྱི་ངོས་ནས་ནང་སེམས་ཀྱི་ཞི་བདེ་དང་འགྲོ་བ་མིའི་གཅིག་འགྱུར་གྱི་བློ་གོང་འཕེལ་གྱི་ལས་དོན་ལ་ཤུགས་སྣོན་ཆེ་ཙམ་སྐྱོན་ཐུབ་པ་ཡིན་ན། གྲོང་ཁྱེར་དེ་ཡུ་རོབ་རིག་གཞུང་གི་རྒྱལ་ས་མིང་དོན་མཚུངས་པ་ཞིག་ལ་འགྱུར་ཐུབ་ཀྱི་རེད་ཅེས་བཀའ་གནང་འདུག དེའང་ཡུ་རོབ་མཐུན་ཚོགས་ཀྱི་ངོས་ནས་ལོ་ལྟར་སྒྲིགས་འཛུགས་དེའི་ཚོགས་མི་རྒྱལ་ཁབ་གྱི་གྲོང་ཁྱེར་གཉིས་རེ་རེ་མོས་གནང་སྟེ་ཡུ་རོབ་རིག་གཞུང་གི་རྒྱལ་ས་ཞེས་འདེམས་སྲོལ་ཡོད་པ་ལྟར། འདི་ལོ་ ༢༠༡༦ ལོའི་ཡུ་རོབ་རིག་གཞུང་གི་རྒྱལ་ས་པོ་ལན་ཌིའི་ Wroclaw གྲོང་ཁྱེར་དང་། Spain ཡི་ San Sebastian གྲོང་ཁྱེར་གཉིས་འདེམས་ཐོན་གནང་ཡོད་པ་རེད། Wroclaw གྲོང་ཁྱེར་གྱི་སྤྱི་ཁྱབ་མཆོག་གིས་ད་རེས་མཚན་གནས་དེའི་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གྲོང་ཁྱེར་དེའི་ནང་དམིགས་བསལ་གདན་འདྲེན་ཞུས་པ་ཞིག་ཡིན་པ་རེད་འདུག དེ་རིང་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་ཁོ་རོ་ལོ་གྲོང་ཁྱེར་གྱི་སྤྱི་ཁྱབ་མཆོག་ནས་གདན་ཞུ་གསོལ་འདེབས་ཕུལ་བ་ལྟར་གྲོང་སྡེ་ལས་ཁུངས་ཀྱི་མི་སྣ་དང་། གཙུག་ལག་སློབ་གཉེར་ཁང་འདྲ་མིན་ཁག་ཅིག་གི་སྐུ་ཚབ་མཚོན་པའི་ཤེས་ཡོན་གྱི་མི་སྣ་། དེ་བཞིན་གཞོན་སྐྱེས་ཤ་སྟགས་འདུ་འཛོམས་ཡོད་སར་རང་དབང་གི་རྨི་ལམ་ཞེས་པའི་བརྗོད་གཞིའི་ཐོག་བཀའ་སློབ་བཀྲིན་སྩལ་ཡོད་པ་དང་། སྐབས་དེར་༸གོང་ས་མཆོག་གིས་ད་ལྟའི་དུས་སྐབས་འདིར་ང་ཚོའི་ངོས་ནས་འཛམ་གླིང་གཅིག་འགྱུར་དང་འགྲོ་བ་མིའི་གཅིག་འགྱུར་གྱི་བློ་གོང་འཕེལ་གཏོང་རྒྱུའི་དུས་ལ་འབབ་ཡོད་སྐོར་བཀའ་ནན་བསྩལ་བ་མ་ཟད། ༸གང་ཉིད་མཆོག་གིས་ངོས་ནས་ད་ལྟ་རང་གྲོང་ཁྱེར་སྤྱི་ཁྱབ་མཆོག་ལ་ཞུ་རྒྱུ་བྱུང་། གྲོང་ཁྱེར་འདི་བཞིན་ཕྱི་ལོ་ ༢༠༡༦ ལོའི་ཡུ་རོབ་རིག་གཞུང་གི་རྒྱལ་སར་འདེམས་ཐོན་བྱུང་བ་ལྟར། གྲོང་ཁྱེར་དེའི་ངོས་ནས་གཙོ་བོ་དུས་ཡུན་དེའི་རིང་ལ་མང་ཚོགས་ནང་སེམས་ཀྱི་ཞི་བདེ་དང་འགྲོ་བ་མིའི་གཅིག་འགྱུར་གྱི་བློ་གོང་འཕེལ་གཏོང་རྒྱུའི་ལས་དོན་ཐད་ཤུགས་སྣོན་ཆེ་ཙམ་སྐྱོན་དགོས་ཀྱི་རེད། སྟབས་སྡུག་པ་ཞིག་ལ་ད་སྐབས་ང་ཚོ་རྒྱལ་ཁབ་འདྲ་མིན་དང་ཆོས་ལུགས་འདྲ་མིན་ཕན་ཚུན་དབར་ཡིད་ཆེས་མེད་པ་དང་། ཞེད་སྣང་གི་བློ་ཞིག་ཡོང་བསྡད་ཀྱི་འདུག འཛམ་གླིང་འདིའི་ནང་གི་ཆོས་ལུགས་ཚང་མས་བྱམས་པ་དང་བརྩེ་བ་གཅིག་པ་བཤད་ཀྱི་ཡོད་སྟབས། ཁྱེད་ཚོས་ཕྱི་ལོ་ ༢༠༡༦ ལོའི་དུས་ཡུན་དེའི་ནང་གྲོང་ཁྱེར་དེ་གར་གནས་སྡོད་རྒྱལ་ཁབ་འདྲ་མིན་དང་ཆོས་ལུགས་འདྲ་མིན་བཅས་ཕན་ཚུན་དབར་མཐུན་སྒྲིལ་དང་ཆིག་སྒྲིལ་གྱི་བློ་གོང་འཕེལ་གཏང་ཐུབ་ཚེ། ཁྱེད་ཚོའི་ཡུ་རོབ་རིག་གཞུང་གི་རྒྱལ་སའི་ཆ་ནས་འཛམ་གླིང་འདིའི་སྤྱི་ཚོགས་ལ་དོན་དམ་གྱི་ལེགས་སྐྱེས་ཤིག་ཕུལ་ཐུབ་ཀྱི་རེད་ཅེས་བཀའ་གནང་འདུག རྩ་བའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁ་སང་ཚེས་ ༡༩ ཉིན་རྒྱབ་པོ་ལན་ཌིའི་ Wroclaw གྲོང་ཁྱེར་ནང་དུ་༸ཞབས་སོར་བདེ་བར་འཁོད་ཡོད་པ་དང་། ༸གང་ཉིད་མཆོག་གིས་ཁུལ་དེར་༸ཞབས་སོར་འཁོད་མ་ཐག་ཡུལ་དེའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་ ༢༠ ལྷག་དང་མཇལ་འཕྲད་གནང་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་པོ་ལན་ཌིའི་ཁོ་རོ་ལོ་གྲོང་ཁྱེར་ནང་ཆིབས་སྒྱུར་མཛད་པ་དེ་ཐེངས་ ༣ པ་ཆགས་ཀྱི་ཡོད་པ་དང་། དེ་སྔ་ཕྱི་ལོ་ ༢༠༠༨ ལོར་ཆིབས་སྒྱུར་བསྐྱངས་སྐབས་མགོན་པོ་མཆོག་ལ་གྲོང་ཁྱེར་དེའི་ཆེས་མཐོའི་མི་སེར་གྱི་མཚན་གནས་ཀྱང་ཕུལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་ཡོ་རོབ་France ནང་གི་མཛད་འཕྲིན་ཁག་ལེགས་གྲུབ་ཀྱིས་དེ་རིང་Poland ནང་གི་ Wroclaw གྲོང་ཁྱེར་དུ་ཉིན་རྒྱབ་ཚོུད་ ༢།༠༠ ཙམ་ལ་༸ཞབས་སོར་བདེ་བར་འཁོད་འདུག་པ་དང་། ས་གནས་ཀྱི་ཉིན་དང་པོའི་མཛད་འཆར་དང་འབྲེལ་མགོན་པོ་མཆོག་གིས་Poland གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་རྣམས་པ་དང་མཇལ་འཕྲད་མཛད་ཀྱི་འདུག ༸གོང་ས་མཆོག་ད་རེས་Wroclaw གྲོང་ཁྱེར་ནང་དུ་ཉིན་གྲངས་གསུམ་རིང་མཛད་འཆར་ཐུགས་གཏན་འཁེལ་ཡོད་པ་དང་། དེའང་རྐང་གྲོང་ཁྱེར་དེ་གའི་སྤྱི་ཁྱབ་པ་Rafal Dutkiewicz མཆོག་གིས་གཞུང་འབྲེལ་གྱི་གདན་ཞུ་གསོལ་འདེབས་ཞུས་པ་ཞིག་རེད་འདུག སང་ཉིན་ནས་༸གོང་ས་མཆོག་གིས་ཁུལ་དེའི་ནང་གི་གཞུང་འབྲེལ་དུས་ཆེན་ཞིག་ཏུ་ཆིབས་བསྒྱུར་དང་། དེ་བཞིན་སློབ་ཕྲུག་ཚོ་ལ་ལམ་སྟོན་བཀའ་སློབ་དང་ཆོས་ལུགས་འདྲ་མིན་གྱི་ལྷན་ཚོགས་ཐོག་ཆིབས་བསྒྱུར་བསྐྱང་རྒྱུ་སོགས་ཀྱི་མཛད་འཆར་ཡོད་པ་རེད་འདུག རྩ་བའི་མགོན་པོ་མཆོག་གིས་ཁ་སང་France ནང་གི་ཉིན་མཐའ་མའི་མཛད་འཆར་ཁྲོད་༸གོང་ས་མཆོག་གིས་གྲོང་ཁྱེར་Strasbourg ནང་དུ་མང་ཚོགས་ལ་ཐུགས་རྗེ་ཆེན་པོའི་བཀའ་དབང་བཀྲིན་བསྩལ་འདུག་པ་དང་། ཉིན་རྒྱབ་ཏུ་མང་ཚོགས་ཆིག་ཁྲི་བརྒལ་བར་ཆོས་དང་མ་འབྲེལ་བའི་བཟང་སྤྱོད་ཐོག་བཀའ་སློབ་བསྩལ་འདུག    France གཙོ་བོར་གྱུར་པའི་ཁྱིམ་མཚེས་རྒྱལ་ཁབ་ནས་བཅར་བའི་མང་ཚོགས་རྣམས་ལ་བཀའ་སློབ་སྩལ་སྐབས་མགོན་པོ་མཆོག་གིས་མི་ཚེའི་དགོས་དོན་གཙོ་བོ་ནི་བདེ་སྐྱིད་ཡིན་པ་དང་། རེ་བ་ཞེས་པ་དེ་ང་ཚོའི་འཚོ་གནས་ཀྱི་གཞི་རྟེན་ལྟ་བུ་ཆགས་ཡོད་སྟབས། འཛམ་གླིང་ནང་གི་མི་དུང་ཕྱུར་ ༧༠ ཡོད་པ་ཚང་མ་བདེ་སྐྱིད་འདོད་པ་གཅིག་མཚུངས་ཡིན་པ་དང་། མགོན་པོ་༸གང་ཉིད་མཆོག་ས་ཕྱོགས་གང་དུ་ཆིབས་སྒྱུར་བསྐྱངས་རུང་བྱམས་བརྩེའི་ཐོག་ནས་འགྲོ་བ་མི་ལ་གཅིག་མཚུངས་ཀྱི་བདེ་སྐྱིད་བསྐྲུན་ཐབས་དང་འཛམ་གླིང་ཆོས་ལུགས་མཐུན་འབྲེལ་གོང་འཕེལ་སྐོར་བཀའ་གནང་གི་ཡོད་པ་གསུངས་འདུག ད་དུང་༸གོང་ས་མཆོག་གིས་ཆོས་དད་ཡོད་མིན་ལ་ལྟོས་མེད་ང་ཚོའི་ནང་སེམས་ཀྱི་བདེ་སྐྱིད་ཀྱི་གཞི་རྩ་གཞན་ཕན་དང་བྱམས་བརྩེར་ཐུགས་ཡོད་སྟབས། ཆོས་དང་མ་འབྲེལ་ཀུན་ཁྱབ་བཟང་སྤྱོད་ཀྱི་རིན་ཐང་དེ་དག་ལ་དོ་སྣང་དང་དེང་གི་ཤེས་ཡོན་སློབ་གསོའི་ཁོངས་སུ་བཞག་དགོས་གལ་དུ་གཟིགས་ཀྱི་ཡོད་པ་ལམ་སྟོན་མཛད་འདུག ཁྱད་པར་དུ་༸གོང་ས་མཆོག་གིས་ཕྱི་ལོ་ ༢༠༡༡ ནས་༸གང་ཉིད་མཆོག་གིས་ཆབ་སྲིད་ཀྱི་སྐུ་དབང་མང་ཚོགས་ཀྱི་འགོ་ཁྲིད་ལ་གསོལ་བསྩལ་གནང་ཡོད་རུང་། ༸སྐུ་ཉིད་བོད་མི་གཅིག་ཡིན་པའི་ཆ་ནས་བོད་ཀྱི་ཆོས་རིག་འཛིན་སྐྱོང་སྤེལ་གསུམ་མཛད་གནང་གི་སྐོར་ལ་བཀའ་གནང་པ་དང་སྦྲགས། མང་ཚོགས་ཁྲོད་བོད་ནང་བསྐྱོད་ཐུབ་མཁན་ཚོས་ས་གནས་ཀྱི་དངོས་ཡོད་གནས་གཟིགས་ནས་རྒྱ་རིགས་མང་ཚོགས་ལ་དངོས་ཡོད་གནས་ཚུལ་གསུངས་དགོས་ཡག་གལ་ཡིན་སྐོར་སོགས་གསུངས་འདུག རྩ་བའི་མགོན་པོ་མཆོག་གིས་ཟླ་བ་འདིའི་ཚེས་ ༧ ནས་བཟུང་ཏེེ་འདས་པའི་བདུན་ཕྲག་གཉིས་མན་ཅམ་རིང་ལ་  Belgium གི་གྲོང་ཁྱེར་ Brussels དང་། France ཡི་ Strasbourg གྲོང་ཁྱེར་སུ་ཆིབས་སྒྱུར་བཀྲིན་བསྐྱངས་ནས་རྐང་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་དང་སེམས་དང་སྲོག་གི་ལྷན་ཚོགས་ཀྱི་ཚོགས་དགོན་དུ་ཆིབས་སྒྱུར་བསྐྱངས་ཡོད་པ་མ་ཟད། གཞན་ཡང་ཡོ་རོབ་གྲོས་སུ་ཆིབས་སྒྱུར་མཛད་ནས་གྲོས་ཚོགས་ཀྱི་ཚོགས་གཙོ་དབུས་པའི་འཐུས་མི་ཁག་ཅིག་དང་མཇལ་འཕྲད་དང་། ལྷག་པར་དུ་མང་ཚོགས་ཁྲི་ཚོ་མང་པོར་ཆོས་འ་བྲེལ་དང་བརྗོད་གཞི་སྣ་མང་ཐོག་ལམ་སྟོན་བཀའ་སློབ་བཅས་གནང་ཡོད་པ་རེད།

ཧྥ་རན་སི་ནང་དུང་རྟེན་གཞི་བྱས་པའི་གི་ Sciences po གཙུག་ལག་སློབ་གཉེར་ཁང་ནས་ཉིན་ཤས་སྔོན་སློབ་ཁང་དེའི་ནང་གི་༸གོང་ས་མཆོག་གི་མཛད་འཆར་ཞིག་ཕྱིར་འཐེབ་བྱེད་རྐྱེན་ད་ཆ་སློབ་གཉེར་ཁང་དེའི་སློབ་ཕྲུག་ཁག་ཅིག་ནས་གནངས་ཚེས་ ༡༩ ཉིན་ངོ་རྒོལ་གྱི་ལས་འགུལ་སྤེལ་རྒྱུ་རེད་འདུག རྩ་བའི་༸གོང་ས་མཆོག་གིས་ཟླ་བ་འདིའི་ཚེས་ ༡༣ ཉིན་སློབ་གཉེར་ཁང་དེ་གའི་ནང་དུ་བཀའ་སློབ་བསྩལ་རྒྱུའི་མཛད་འཆར་གཏན་འཁེལ་གསལ་བསྒྲགས་སོང་ཟིན་ཡོད་ནའང། ཉིན་གཅིག་གཉིས་སྔོན་དུ་ལྟེ་གནས་ཁང་དེ་ནས་གློ་བུར་དུ་རྒྱུ་མཚན་གང་ཡིན་གསལ་ཁ་མེད་པར་ལས་རིམ་ཕྱིར་འཐེན་གནང་ཡོད་པ་རེད། སློབ་གྲྭ་དེའི་རང་ལོ་ ༡༩ སོན་པའི་སློབ་མ་ Matei  ལགས་ཀྱིས་ངོ་དེབ་སྟེང་སློབ་གྲྭར་སྐྱོན་བརྗོད་ཀྱི་ཡིག་ཆུང་ཞིག་སྤེལ་བའི་ནང་། ༸གོང་མ་མཆོག་གི་མཛད་འཆར་ཕྱིར་འཐེན་གྱི་གནས་ཚུལ་དེ་ཐོས་རྗེས་ཁོང་ཚོ་ཧང་སང་དགོས་པ་བྱུང་ཡོད་སྐོར་གསུངས་པ་དང་སྦྲགས། ཁོང་ཚོར་གནས་ཚུལ་དེ་གསར་འགྱུར་བརྒྱུད་ལམ་ནས་ཐོས་པ་དང་། དེའང་སློབ་ཕྲུག་སྐོར་ཞིག་གིས་ལས་རིམ་དེ་ལ་ཐུགས་སྣང་མེད་སྐོར་གསུངས་ཡོད་པ་དེ་ནི་ Sciences Po ཤེས་ཡོན་ལྟེ་གནས་ཁང་གིས་ཕྱི་གསལ་ནང་གསལ་དང་དྲང་བདེན་མིན་པ་ཞིག་ཡིན་སྐོར་གསུངས་འདུག སློབ་མ་ Matei ལགས་དང་འདྲ་བ་སྐྱོན་བརྗོད་གནང་མཁན་སློབ་ཕྲུག་གཞན་ཁག་ཅིག་གིས་གསུངས་པར་མ་གཞི་ཁོང་ཚོ་ཚང་མ་ཡི་ཤུ་བ་ཞིག་ཆགས་ཡོད་པ་དང་༸གོང་ས་ཏཱ་ལའི་བླ་མ་མཆོག་ནང་པའི་དབུ་ཁྲིད་གཅིག་ཆགས་ཡོད་ཀྱང་།  ཁོང་རྣམས་ནས་༸གོང་ས་མཆོག་ལ་ཞི་བདེ་དང་གྲོས་མོལ་གོང་འཕེལ་གནང་མཁན་རྒྱལ་སྤྱིའི་གུས་བཀུར་ཞུ་ཡུལ་ཞིག་ཏུ་བརྩི་ཡི་ཡོད་སྟབས། འཛིན་གྲོགས་མང་པོས་༸གོང་ས་ཏཱ་ལའི་བླ་མ་མཆོག་ནས་རྒྱ་གཞུང་གིས་རིག་གཞུང་གཏོར་བཤིག་དང་བཙན་འཛུལ་སྲིད་བྱུས་ཐོག་འཚེ་མེད་ཞི་བའི་ཐབས་ལམ་དང་ལྟ་གྲུབ་འཛིན་ཕྱོགས་སྐོར་ལམ་སྟོན་བཀའ་སློབ་ཉན་འདོད་དང་ཤེས་འདོད་ཡོད་སྐོར་ཡང་གསུངས་འདུག དེ་རིང་ཧྥ་རན་སི་རྒྱལ་ནང་གི་གསར་གནས་ཐོག་དེ་དོན་གནས་ཚུལ་ཐོན་པར་ Sciences po གཙུག་ལག་སློབ་གཉེར་ཁང་གི་སློབ་མ་སློབ་མ་ Matei ལགས་ཀྱིས་གཙོས་པའི་གཞན་ཁག་ཅིག་ནས་ངོ་དེབ་སོགས་ཀྱི་སྟེང་སློབ་གྲྭའི་ཐག་གཅོད་དེ་ལ་སྐྱོན་བརྗོད་ཀྱིས་གནངས་ཉིན་རེས་གཟའ་ཟླ་བའི་ཉིན་སློབ་གཉེར་ཁང་དེ་གའི་ནང་ཞུ་གཏུགས་དང་ངོ་རྒོལ་གྱི་ལས་འགུལ་ཞིག་སྤེལ་གནང་རྒྱུ་ཡིན་པ་དང་།  གཙོ་བོ་མ་འོངས་པ་ན་དེ་ལྟར་མི་ཡོང་བའི་སླད་དུ་ཡིན་པ་བརྗོད་འདུག ཕྱོགས་མཚུངས་ཡང་ཧྥ་རན་སི་ནང་གི་གསོལ་མགྲོན་ཁང་གྲགས་ཅན་ Park Hyett Paris ཡི་འགན་འཛིན་ལས་བྱེད་ཚོས་༸གོང་ས་མཆོག་དང་ལྷན་དུ་༸སྐུ་པར་སྒྲོན་པའི་པར་ཞིག་མགྲོན་ཁང་དེ་གའི་གཞུང་འབྲེལ་ངོ་དེབ་སྟེང་བཞག་སྟེ། ༸གོང་ས་མཆོག་གིས་ཐུགས་བརྩེ་བ་ཆེན་པོས་གསོལ་མགྲོན་ཁང་དེ་གར་ཆིབས་སྒྱུར་མཛད་པར་བཀྲིན་ཆེ་ཞུ་གསུངས་འདུག་ཀྱང། མི་རིང་བར་རྒྱ་རིགས་མང་པོ་ཞིག་གིས་༸སྐུ་པར་དེའི་འོག་མཆན་འགོད་དེ་མགྲོལ་ཁང་གི་ལས་བྱེད་རྣམས་ལ་སྐྱོན་བརྗོད་ཀྱིས་ཁོང་ཚོ་ཁ་བྲལ་བ་དང་འཇིགས་སྐུལ་བ་ཞིག་དང་འབྲེལ་བ་བྱེད་ཀྱི་ཡོད་སྐོར་བརྗོད་སྟབས། གསོལ་མགྲོན་ཁང་དེས་༸གོང་ས་མཆོག་དང་ལྷན་རྒྱས་༸སྐུ་པར་སྒྲོན་ཡོད་པ་དེ་ཕྱིར་འཐེན་གནང་འདུག ༸གོང་ས་མཆོག་ད་རེས་ཡོ་རོབ་རྒྱལ་ཁབ་གསུམ་ནང་གི་མཛད་འཕྲིན་ཐོག་ལ་རྒྱ་གཞུང་གིས་སྐྱོན་བརྗོད་དང་འགོག་རྐྱེན་བཟོ་དང་བཟོ་མུས་ཡིན་ཀྱང་། ཕྱོགས་གཞན་ཞིག་ནས་ད་བར་འདས་པའི་ཉིན་ཤས་ཀྱི་མཛད་འཕྲིན་ཁྲོད་བྷེལ་ཇམ་དང་ཧྥ་རན་སི་གཞུང་གི་གནད་ཡོད་མི་སྣ་གཙོས། ཡོ་རོབ་གྲོས་ཚོགས་ཀྱི་ཚོགས་གཙོས་དབུས་པའི་ཡོ་རོབ་གྲོས་ཚོགས་ཀྱི་འཐུས་མི་མང་དག་ནས་༸གང་ཉིད་མཆོག་དང་མཇལ་འཕྲད་ཞུས་ཡོད་པ་མ་ཟད། ཁྱད་པར་དུ་ཁུལ་དེ་དག་གི་མང་ཚོགས་ཁྲི་ཚོ་མང་པོས་༸གོང་ས་མཆོག་གི་བཀའ་སློབ་ཞུ་ཕྱིར་ཆེད་བཅར་ཞུས་ཞུ་མུས་ཡིན་པ་རེད། མཛད་འཆར་ལྟར་ན། དེ་རིང་མགོན་པོ་མཆོག་གིས་ཁུལ་དེའི་དད་ལྡན་མང་ཚོགས་ལ་བྱང་ཆུབ་སེམས་འགྲེལ་གྱི་བཀའ་ཆོས་སྩལ་འདུག་པ་དང་། ཁ་སང་ཚེས་ ༡༨ ཉིན་༸གོང་ས་མཆོག་གིས་ Strasbourg གཙུག་ལག་སློབ་གཉེར་ཁང་དུ་ཚན་རིག་པ་དང་ལྷན་དུ་བགྲོ་གླེང་བཀའ་བསྡུར་མཛད་རྒྱུ་དང་། དེ་བཞིན་སྤྱན་རས་གཟིགས་ཀྱི་བཀའ་དབང་བཀྲིན་བསྩལ་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུ་དོན་ལྟར། ཁ་སང་ཧྥ་རན་སི་གྲོང་ཁྱེར་ Strasbourg ནང་རྟེན་གཞི་བྱས་པའི་ཡོ་རོབ་གྲོས་ཚོགས་དང། ཡོ་རོབ་ལྷན་ཚོགས་ནང་ཆིབས་སྒྱུར་གྱིས་བཀའ་སློབ་བཀྲིན་བསྩལ་པ་དང་འབྲེལ། ༸གང་ཉིད་མཆོག་གིས་ཡོ་རོབ་སྤྱི་མཐུན་ཚོགས་པའི་ཐོུང་གི་དམིགས་ཡུལ་གཅིག་གི་འོག་རང་ཉིད་ཀྱི་རྒྱལ་ཁབ་སོ་སོའི་རིག་གཞུང་གཅེས་ཉར་བྱེད་བཞིན་པའི་སྒྲིག་འཛུགས་ཀྱི་སྒྲོམ་གཞིར་ཡི་རངས་ཀྱི་ཆེ་བསྟོད་མཛད་པ་དང་། བོད་མི་ཚོས་ཀྱང་རྒྱ་ནག་ནས་ཁ་བྲལ་རྩོད་ཀྱི་མེད་པ་མ་ཟད། ལྷག་དོན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མངའ་འོག་ཏུ་རང་མི་རིགས་ཀྱི་ཆོས་དང་རིགས་གཞུང་དག་ལ་གུས་བརྩི་དང་སྲུང་སྐྱོབ་བྱེད་དགོས་ཅེས་བཀའ་ནན་བསྩལ་འདུག དེའང་༸གོང་ས་མཆོག་གིས་ཁ་སང་ Strasbourg གྲོང་ཁྱེར་ནང་གི་ཉིན་དང་པོའི་མཛད་འཆར་དབུ་འཛུགས་དང་འབྲེལ། སྔ་དྲོ་གྲོང་ཁྱེར་དེར་རྟེན་གཞི་བྱས་པའི་ཡོ་རོབ་གྲོས་ཚོགས་ནང་ཆིབས་སྒྱུར་གྱིས་ཡོ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ལགས་ Martin Schulz མཆོག་དང་མཇལ་འཕྲད་གནང་པ་དང་།  Council of Europe ཞེས་ཡོ་རོབ་ནང་འགྲོ་བ་མིའི་ཐོབ་ཐང་དང་མང་གཙོ། དེ་བཞིན་ཁྲིམས་ལུགས་དབང་བསྒྱུར་གོང་འཕེལ་གནང་མཁན་གྱི་རྒྱལ་སྤྱིའི་སྒྲིག་འཛུགས་ཀྱི་སྐུ་ཚབ་བཅས་གནད་ཡོད་མི་སྣ་ཁག་ཅིག་ལ་བྱམས་བརྩེ་དང་ཆོས་དང་མ་འབྲེལ་བའི་བཟང་སྤྱོད་སྐོར་ལ་བཀའ་སློབ་བཀྲིན་བསྐྱངས་པ་མ་ཟད། བོད་དོན་ཀྱི་གནད་དོན་དེ་སེལ་ཐུབ་རྒྱུར་རེ་བ་ཡོད་སྐོར་བཀའ་སྩལ་བ་དང་འབྲེལ། གལ་འགངས་ཆེ་ཤོས་ཤིག་ལ་ཕྱིའི་རྒྱལ་ཁབ་དང་ལྷག་པར་དུ་ཡོ་རོབ་སྤྱི་མཐུན་ཚོགས་པ་ལྟ་བུས་ཀུན་སློང་ཡང་དག་པའི་ཐོག་ནས་རྒྱ་ནག་གི་མ་འོངས་པའི་མདུན་ལམ་ལ་ཕན་ཕྱིར་རྒྱ་གཞུང་ལ་སྐབས་རེ་དོན་ཕན་ལྡན་པའི་སྐྱོན་བརྗོད་བྱེད་དགོས་ངེས་རེད་ཅེས་བཀའ་བསྩལ་འདུག དེ་བཞིན་༸གོང་ས་མཆོག་གིས་ཡོ་རོབ་སྤྱི་མཐུན་ཚོགས་པས་ད་བར་བོད་དོན་ལ་ཐུགས་འཁུར་ཆེ་བཞེས་ཀྱིས་རྒྱབ་སྐྱོར་གནང་བར་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞེས་བཀའ་གནང་པ་དང་འབྲེལ། ལོ་རྒྱུས་ནི་ལོ་རྒྱུས་རང་རེད། ང་ཚོའི་ངོས་ནས་རྒྱ་ནག་ནས་རང་བཙན་རྩོད་ཀྱི་མེད་ཅེས་བཀའ་སྩལ་བ་དང་ཆབས་ཅིག  ང་ཚོའི་ངོས་ནས་ཡོ་རོབ་སྤྱི་མཐུན་ཚོགས་པའི་སྒྲོམ་གཞིར་ཡི་རངས་ཀྱི་བསྔགས་བརྗོད་ཞུ་བཞིན་ཡོད་ཅེས་བཀའ་བསྩལ་འདུག ཁྱད་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ལ་ཡོད་པའི་ནང་པ་སངས་རྒྱས་པའི་ཆོས་ཕྱུག་པོ་དེ་འཛིན་སྐྱོང་སྤེལ་གསུམ་གནང་རྒྱུར་བོད་མི་ཁོ་ན་ཙམ་མིན་པར་རྒྱ་ནག་ནང་གི་ནང་པའི་མང་ཚོགས་མང་པོ་ཞིག་ལ་ཧ་ཅང་གི་ཕན་ཐོགས་ཆེན་ཡོད་པ་མ་ཟད། ལྷག་དོན་དེང་གི་ཆར་རྒྱ་ནག་ནང་ལ་ནང་པའི་མང་ཚོགས་ས་ཡ་ ༤༠༠ ལྷག་ཡོད་པ་དང། དེ་དག་མང་ཆེ་བས་བོད་ལ་ཡོད་པའི་ནང་པ་སངས་རྒྱས་པའི་ཆོས་དེ་དཔལ་ན་ལེནྡྲ་ནས་བརྒྱུད་པའི་སངས་རྒྱས་ཀྱི་ཆོས་ཚད་ལྡན་ཞིག་ལ་ངོས་འཛིན་གྱིས་དོ་སྣང་ཤུགས་ཆེ་གནང་བཞིན་ཡོད་ཅེས་བཀའ་བསྩལ་འདུག གཞན་ཡང་ཉིན་རྒྱབ་ཏུ་ Strasbourg གྲོང་ཁྱེར་སྤྱི་ཁྱབ་མཆོག་གིས་གོ་སྒྲིག་འོག་ཁུལ་དེའི་ནང་གི་ཆོས་ལུགས་འདྲ་མིན་ཁག་གི་དབུ་ཁྲིད་ཁག་དང་ལྷན་ལྗགས་སྨིན་ལྷན་བཞེས་དང། དེ་བཞིན་གྲོང་ཁྱེར་དེའི་ཚོགས་ཁང་ཆེན་མོར་སློབ་ཕྲུག་དང་མང་ཚོགས་བཅས་ཁྱོན་མི་གྲངས་ ༢༠༠༠ ལྷག་ལ་བཀའ་སློབ་བཀྲིན་བསྩལ་ཡོད་པ་རེད། སྔ་དྲོ་མགོན་པོ་མཆོག་གིས་ཁུལ་དེར་རྟེན་གཞི་བྱས་པའི་ཡོ་རོབ་གྲོས་ཚོགས་དང། Council of Europe ནང་གི་གནད་ཡོད་མི་སྣ་ཁག་ཅིག་ལ་བཀའ་སློབ་བཀྲིན་སྩལ་བའི་ཁྲོད།

ཁ་སང་ཟླ་ ༩ ཚེས་ ༡༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡོ་རོབ་རྒྱལ་ཁབ་ཧྥ་རན་སི་ Strasbourg  ནང་ལ་རྟེན་གཞི་བྱས་པའི་ཡོ་རོབ་གྲོས་ཚོགས་སུ་ཆིབས་སྒྱུར་བཀྲིན་བསྐྱངས་པའི་དབང་གིས་རྒྱ་ནག་གཞུང་ནས་རིང་མིན་ཡོ་རོབ་གྲོས་ཚོགས་འཐུས་མིའི་སྐུ་ཚབ་ཚོགས་ཁག་ཅིག་རྒྱ་ནག་ནང་ལ་སྐོར་བསྐྱོད་ཕེབས་འཆར་གྱི་ལས་རིམ་ཞིག་ཕྱིར་འགྱངས་བྱས་འདུག དེའང་ཡོ་རོབ་གྲོས་ཚོགས་ཀྱི་མགྲིན་ཚབ་པ་སྐུ་ཞབས་ Jaume Duch Guillot ལགས་ཀྱིས་ The Politico ཞེས་པའི་གསར་ཤོག་ཐོག་འགྲེལ་བརྗོད་གནང་དོན་ལྟར་ན། ཡོ་རོབ་གྲོས་ཚོགས་ཀྱི་དཔལ་འབྱོར་དང་མ་དངུལ་ལས་དོན་ཚོགས་ཆུང་གི་སྐུ་ཚབ་ཁག་ཅིག་གཟའ་འཁོར་རྗེས་མའི་ནང་རྒྱ་ནག་གི་ Shanghai དང་རྒྱལ་ས་པེ་ཅིང་བཅས་སུ་ཆེད་ཕེབས་ཀྱིས་ཚོང་འབྲེལ་འགོ་ཁྲིད་ཁག་གཅིག་དང་མཇལ་མོལ་སོགས་ཀྱི་ལས་རིམ་གཏན་འབེབས་ཟིན་་ཡོད་ཀྱང། རྒྱ་ནག་གི་གཞུང་ཚབ་ལས་ཁུངས་ཀྱིས་ཁ་སང་རང་ཡོ་རོབ་གྲོས་ཚོགས་སུ་གློག་འཕྲིན་ཞིག་བཏང་སྟེ། རྒྱ་གཞུང་གི་ངོས་ནས་༸གོང་ས་མཆོག་དང་འབྲེལ་བའི་གནད་དོན་རྐྱེན་གྱིས་གྲོས་ཚོགས་འཐུས་མིའི་སྐོར་བསྐྱོད་ལས་རིམ་དེ་གནས་སྐབས་རིང་ཕྱིར་འགྱངས་བྱས་པ་ཡིན་ཅེས་འགྲེལ་བརྗོད་བྱས་ཡོད་པ་རེད་འདུག The Politico གསར་ཤོག་ལ་གློག་འཕྲིན་དེའི་ངོ་བཤུས་ཤིག་རག་སོན་བྱུང་བ་དེའི་ནང། རྒྱ་ནག་གཞུང་གི་འབྲེལ་ཡོད་དབུ་ཁྲིད་གཅིག་གིས་ཡོ་རོབ་གྲོས་ཚོགས་ཀྱི་ཚོགས་གཙོ་ Martin Schulz ལགས་ནས་རྒྱ་གཞུང་གི་འབོད་སྐུལ་བསྟུད་མར་བྱས་པར་ལྟོས་མེད་ཀྱིས་ཏཱ་ལའི་བླ་མ་ཡོ་རོབ་གྲོས་ཚོགས་སུ་ཨུ་ཚུགས་ཀྱིས་གདན་འདྲེན་ཞུས་པ་དང། དེ་ནི་ཡོ་རོབ་སྤྱི་མཐུན་ཚོགས་པས་འཛིན་བཞིན་པའི་རྒྱ་ནག་གཅིག་གི་སྲིད་བྱུས་དང་ཡོངས་སུ་འགལ་བ་མ་ཟད། ལྷག་དོན་རྒྱ་ནག་གི་ནང་སྲིད་གནད་དོན་ལ་ཐེ་བྱུས་དང་ཕྱོགས་གཉིས་ཀྱི་ཕན་ཚུལ་འབྲེལ་ལམ་ལ་དོ་ཕོག་གཏོང་རྒྱུའི་གཞི་རྩ་ཞིག་རེད་ཅེས་བརྗོད་འདུག ཁ་སང་ཟླ་ ༩ ཚེས་ ༡༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡོ་རོབ་གྲོས་ཚོགས་དང་། Council of Europe ཞེས་ཡོ་རོབ་ནང་འགྲོ་བ་མིའི་ཐོབ་ཐང་དང་མང་གཙོ། དེ་བཞིན་ཁྲིམས་ལུགས་དབང་བསྒྱུར་གོང་འཕེལ་གནང་མཁན་གྱི་རྒྱལ་སྤྱིའི་སྒྲིག་འཛུགས་ནང་ཆིབས་སྒྱུར་གྱིས་བཀའ་སློབ་བཀྲིན་བསྩལ་པ་དང་འབྲེལ། ༸གང་ཉིད་མཆོག་གིས་ཡོ་རོབ་སྤྱི་མཐུན་ཚོགས་ཀྱི་ཐོུང་གི་དམིགས་ཡུལ་གཅིག་གི་འོག་རྒྱལ་ཁབ་སོ་སོའི་རིག་གཞུང་གཅེས་ཉར་བྱེད་བཞིན་པའི་སྒྲིག་འཛུགས་ལམ་ལུགས་དེའི་སྙིང་སྟོབས་ལ་ཆེ་བསྟོད་མཛད་པ་དང་། བོད་མི་ཚོས་རྒྱ་ནག་ནས་ཁ་བྲལ་རྩོད་ཀྱི་མེད་པ་མ་ཟད། ལྷག་དོན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མངའ་འོག་ཏུ་རང་མི་རིགས་ཀྱི་ཆོས་དང་རིགས་གཞུང་སྲུང་སྐྱོབ་ཡོང་བའི་ཁེ་དབང་རྩོད་ཀྱི་ཡོད་ཅེས་བཀའ་བསྩལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཧྥ་རན་སི་གྲོས་ཚོགས་གོང་འོག་གཉིས་ཀྱི་འཐུས་མི་ ༣༠ སྐོར་ཞིག་དང་ལྷན་མཇལ་གྱིས་གྲོས་ཚོགས་འཐུས་མི་རྣམས་ནས་རྒྱ་གཞུང་གི་དཔོན་རིགས་ཚོ་ལ་བོད་དོན་ལ་ཐུགས་འཁུར་དང་རྒྱབ་སྐྱོར་གནང་དོན་གང་ཡིན་འགྲེལ་བརྗོད་གནང་དགོས་པའི་རེ་སྐུལ་གནང་འདུག ཁ་སང་ཟླ་ ༩ ཚེས་ ༡༤ ཉིན་ཧྥ་རན་སི་རྒྱལ་ཁབ་གྱི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་འཐུས་མི་རྣམས་པས་ཇི་ལྟར་གསོལ་འདེབས་ཞུ་དོན་ལྟར། ༸གོང་ས་མཆོག་གིས་ཡུལ་དེའི་གྲོས་ཚོགས་གོང་འོག་གི་འཐུས་མི་ ༣༠ སྐོར་དང་ལྷན་དུ་རྒྱལ་ས་པེ་རིས་ནང་རྟེན་གཞི་བྱས་པའི་ལོ་རྒྱུས་ཀྱི་རང་བཞིན་ལྡན་པའི་ Grand Building ཚོགས་ཁང་ཆེན་མོར་སྔ་དྲོའི་གསོལ་སྟོན་ཐོག་དབུ་བཞུགས་ཀྱིས་གྲོས་ཚོགས་འཐུས་མི་རྣམས་དང་མཇལ་མོལ་མཛད་འདུག སྐབས་དེར་༸གོང་ས་མཆོག་གིས་ད་བར་གྲོས་ཚོགས་འཐུས་མི་རྣམས་ནས་བོད་དོན་ལ་ཐུགས་འཁུར་ཆེ་བཞེས་ཀྱིས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་མཛད་པ་དང་། བོད་པའི་བདེན་པའི་འཐབ་རྩོད་དེ་ཡང་ཐོག་མ་ཉིད་ནས་ འཚེ་མེད་ཞི་བའི་ལམ་གི་ཐོག་ནས་འགོ་བཙུགས་བྱས་པ་ཞིག་ཡིན་ཞིང་། ཉེ་བའི་ཆར་བོད་ནང་བྱུང་བཞིན་པའི་བོད་མིའི་རང་ལུས་མེར་སྲེག་གི་ལས་འགུལ་དེའི་བརྒྱུད་ནས་བོད་མི་ཚོས་གཞན་ལ་འཚེ་བ་མེད་པའི་ཐོག་བོད་དོན་འཐབ་རྩོད་རྒྱུན་སྐྱོང་བྱེད་བཞིན་ཡོད་པ་གསལ་པོ་རེད་ཅེས་བཀའ་བསྩལ་འདུག  ལྷག་དོན་ང་ཚོའི་ངོས་ནས་འདས་པའི་ལོ་རྒྱུས་ཕར་བཞག་སྟེ་རྒྱ་ནག་ནས་ཁ་བྲལ་རྩོད་ཀྱི་མེད་པ་ནི་བོད་དོན་ལ་རྒྱབ་སྐྱོར་བྱེད་མཁན་ཚང་མས་ཤེས་གསལ་ཡིན་པ་མ་ཟད། ཉེ་ཆར་རྒྱ་ནག་ནང་གི་མང་ཚོགས་ཁྲོད་བོད་མིའི་དབུ་ལམ་གྱི་སྲིད་བྱུས་ལ་རྒྱབ་སྐྱོར་གྱི་རྩོམ་ཡིག་སྟོང་ཁྲག་ལྷག་སྤེལ་ཡོད་པ་དང་། ལྷག་དོན་ད་ཡོད་རྒྱ་གཞུང་གིས་འཛིན་པའི་སྲིད་བྱུས་ལ་སྐྱོན་བརྗོད་བྱེད་ཀྱི་ཡོད་ཅེས་བཀའ་བསྩལ་འདུག ༸གང་ཉིད་མཆོག་གིས་ད་ལྟའི་ཆར་རྒྱ་ནག་མི་མང་སྤྱི་མཐུན་རྒྱལ་ཁབ་དེ་བཞིན་དེ་སྔ་གཞུང་དེ་གསར་འཛུགས་བྱེད་མཁན་དམར་ཤོག་ཚོགས་པ་དེའི་ལམ་ལུགས་ཐོག་མུ་མཐུད་སྐྱོད་བཞིན་པ་དེ་ལྟར་ཡང། རྒྱ་ནག་ནང་ལ་འགྱུར་བ་འགྲོ་བཞིན་ཡོད་སྟབས། དམར་ཤོགས་ཚོགས་པའི་ལྟ་བ་མཁྲེགས་བཟུང་ཅན་གྱི་འགོ་ཁྲིད་དེ་ཚོ་བྱེད་སྟངས་མ་ཤེས་པར་ལྷག་ཡོད། རྒྱ་གཞུང་གིས་ད་བར་ཞི་བདེ་དང་བརྟན་ལྷིང་། ཆིག་སྒྲིལ་ཟེར་བའི་འབོད་ཚིག་འོག་འཛིན་པའི་སྲིད་བྱུས་དེ་དོན་དངོས་ཐོག་གྲུབ་འབྲས་གང་ཡང་སོན་མེད་ཅེས་བཀའ་གནང་པ་མ་ཟད། ༸གང་ཉིད་མཆོག་གིས་རྒྱ་ནག་གི་འགོ་ཁྲིད་དེ་དག་ལ་གཞུང་མང་སྐྱོང་རྒྱུའི་ཀླད་པ་མེད་པ་འདྲ་ཞེས་བཀའ་བསྩལ་དང་འབྲེལ། མ་འོངས་པར་ཧྥ་རན་སི་གྲོས་ཚོགས་འཐུས་མི་རྣམས་ལ་རྒྱ་གཞུང་གི་འགོ་ཁྲིད་ཚོ་དང་མཇལ་མོལ་བྱུང་ཚེ། ཁྱེད་ཚོས་བོད་དོན་ལ་ཐུགས་འཁུར་དང་རྒྱབ་སྐྱོར་གནང་དོན་གང་ཡིན་གྱི་རྒྱུ་རྒྱུ་མཚན་འགྲེལ་བརྗོད་གནང་དགོས་པའི་གཞེན་སྐུལ་གནང་པ་དང། དེ་ལྟར་བྱུང་བ་ཡིན་ན་ཕན་ཐོགས་ཧ་ཅང་ཆེན་པོ་ཡོང་རྒྱུ་ཡིན་པ་བཀའ་བསྩལ་ཡོད་པ་རེད། ཁྱད་པར་དུ་༸གོང་ས་མཆོག་གིས་ཉེ་བའི་ཆར་རྒྱ་རིགས་སློབ་ཕྲུག་དང་ཡུལ་སྐོར་སྤྲོ་འཆམ་པ་མང་པོ་ཕྱིའི་རང་དབང་རྒྱལ་ཁབ་ནང་འགྲོ་འོང་བྱེད་བཞིན་པར་བརྟེན། རྒྱ་རིགས་དེ་དག་གིས་རང་དབང་ལུང་པའི་ནང་གི་འགྲོ་བ་མིའི་འདྲ་མཉམ་གྱི་ཐོབ་ཐང་དང། བསམ་བརྗོད་རང་དབང་ཐད་ལ་གོ་རྟོགས་ཀྱི་ཤེས་ཡོན་མང་དག་ཐོབ་ཀྱི་ཡོད་སྟབས། རྒྱ་ནག་གཞུང་གིས་ རང་ཉིད་ཀྱི་རྒྱལ་ཁབ་དེ་བཞིན་ཕྱིའི་འཛམ་གླིང་ལ་སྒོ་མོ་ཕྱི་ནས་གུ་ཡངས་པོ་བྱ་ཚེ་རྒྱ་ནག་རང་ལའང་ཕན་ཐོགས་ཆེན་པོ་ཡོད་ཅེས་བཀའ་བསྩལ་འདུག གཞན་ཡང་༸གོང་ས་མཆོག་གིས་གྲོས་ཚོགས་འཐུས་མི་རྣམས་ནས་བཀའ་འདྲི་ཞུས་པར་བཀའ་ལན་སྩལ་དོན་ལ། ༸གང་ཉིད་མཆོག་གིས་བོད་ནང་གི་བོད་མི་ཚོས་ཁོར་ཡུག་སྲུང་སྐྱོབ་བྱེད་བཞིན་པར་ལྷོས་མེད། རྒྱ་གཞུང་གིས་བཙན་དབང་འོག་བོད་མཐོ་སྒང་གི་ནགས་ཚལ་གཅོད་འབྲེག་དང། གཏེར་ཁ་སྔོག་འདོན་གྱི་ལས་གཞི་གང་མང་སྤེལ་སྟབས་གནམ་གཤིས་འགྱུར་ལྡོག་ཐོག་ད་ལྟའི་ཆར་འཛམ་གླིང་བྱང་སྣེ་དང་ལྷོ་སྣེ་གཉིས་ལས་བོད་མཐོ་སྒང་གི་རང་འབྱུང་ཁོར་ཡུག་གནད་དོན་གལ་ཆེ་ཆགས་ཡོད་ཅེས་བཀའ་བསྩལ་འདུག གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་ཚོས་བོད་ལ་ཆེད་བསྐྱོད་ཀྱིས་བོད་ཀྱི་རང་འབྱུང་ཁོར་ཡུག་གི་གནས་བབ་ཇི་ཆགས་ཐད་ཐུགས་ཞིབ་གནང་དགོས་པའི་གཞེན་སྐུལ་ཞུ་བཞིན་ཡོད་ཅེས་བཀའ་བསྩལ་ཡོད་པ་རེད། འདི་ག་རླུང་འཕྲིན་ཁང་གིས་ཧྥ་རན་སི་གྱི་རྒྱལ་ས་པེ་རིས་ Paris དུ་བཅར་བཞུགས་བོད་མིའི་སྒྲིག་འཛུགས་ཀྱི་འབྲེལ་མཐུད་པ་ཚེ་རིང་དོན་གྲུབ་ལགས་སུ་དེ་འབྲེལ་བཅར་འདྲི་ཞུས་པར་ཁོང་གིས་ཧྥ་རན་སི་སྲིད་འཛིན་མཆོག་གིིས་ཆབ་སྲིད་དང་རྒྱ་ནག་གི་ཚོང་འབྲེལ་ཆ་ནས་ད་ལན་༸གོང་ས་མཆོག་ལ་གཞུང་འབྲེལ་མཇལ་འཕྲད་ཞུས་མེད་ཀྱང་། ཁ་སང་ཧྥ་རན་སི་གྲོས་ཚོགས་གོང་འོག་གི་འཐུས་མི་ ༣༠ སྐོར་ཞིག་གིས་༸གང་ཉིད་མཆོག་ལ་མཇལ་འཕྲད་ཞུས་པ་དེ་ནི་གྲོས་ཚོགས་འཐུས་མི་རྣམས་ནི་མང་ཚོགས་ཀྱིས་འོས་འདེབས་གནང་པ་ཞིག་ཡིན་པས་དོན་དངོས་ཐོག་ཧྥ་རན་སི་མང་ཚོགས་ཁྲོད་༸གོང་ས་མཆོག་ལ་དད་གུས་དང་བརྩི་བཀུར་ཞུ་མཁན་ཡོད་པ་མངོན་གསལ་རེད་ཅེས་གསུངས་སོང། གཞི་རྩའི་ཟླ་ ༩ ཚེས་ ༡༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཧྥ་རན་སི་ནང་ཆིབས་སྒྱུར་མཛད་སྐབས་ཧྥ་རན་སིའི་སྲིད་འཛིན་སྐུ་ཞབས་ Francois Hollande མཆོག་གིས་གཙོས་གནད་ཡོད་མི་སྣ་འགས་མཇལ་འཕྲད་ཞུས་མེད་ཀྱང་། ཉེ་བའི་ཆར་ཁུལ་དེར་རྟེན་གཞི་བྱས་པའི་ IFOP POLL ཞེས་མང་ཚོགས་ཀྱི་བསམ་ཚུལ་བསྡུ་རུབ་བྱེད་མཁན་གྱི་ལྟེ་གནས་ཁང་གིས་སྲིད་འཛིན་ཨོ་ལན་ཌི་མཆོག་ནས་༸གོང་ས་མཆོག་དང་མཇལ་འཕྲད་ཞུ་མིན་དང་འབྲེལ་མང་ཚོགས་ཀྱི་དགོངས་ཚུལ་ཁག་ཅིག་བསྡུ་རུབ་བྱས་ཡོད་པ་དང་། སྐབས་དེར་ཧྥ་རན་སི་ས་གནས་མང་ཚོགས་བརྒྱ་ཆ་ ༨༦ གིས་མང་མོས་ཐོག་སྲིད་འཛིན་ Hollande མཆོག་ནས་འགྲོ་བ་མིའི་ཐོབ་ཐང་ལ་བརྩི་སྲུང་གནང་པའི་ཐོག་ད་རེས་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་ཆིབས་སྒྱུར་བཀའ་དྲིན་མཛད་པ་དང་བསྟུན་གཞུང་འབྲལ་གྱི་ཕེབས་བསུའི་མཇལ་འཕྲད་ཞུ་དགོས་གལ་ཡིན་པ་ཞུ་སྐུལ་གནང་འདུག དེ་བཞིན་ཁ་སང་ཚེས་ ༡༤ ཉིན་ཧྥ་རན་སི་ནང་གི་ཉིན་གཉིས་པའི་མཛད་འཆར་ཁྲོད། ཆོས་ལུགས་མཐུན་འབྲེལ་གྱི་ལྷན་ཚོགས་ཐོག་དབུ་བཞུགས་ཀྱིས་འཛམ་གླིང་ནང་ཆོས་ལུགས་ཕན་ཚུན་དབར་མཐུན་འབྲེལ་གནང་གལ་ཆེ་བར་བཀའ་སློབ་བསྩལ་ཡོད་པ་མ་ཟད། དེ་བཞིན་ཁུལ་དེར་རྟེན་གཞི་བྱས་པའི་ National Institute of Oriental Language and Civilization ལྟེ་གནས་ཁང་དུ་བོད་ཀྱི་སྐད་ཡིག་གི་གལ་འགངས་ཆེ་ཚུལ་སྐོར་སློབ་མ་ཚོར་བཀའ་སློབ་བསྩལ་ཡོད་པ་རེད། རྩ་བའི་ཁ་སང་༸གོང་ས་མཆོག་གིས་ཧྥ་རན་སི་རྒྱལ་ས་ Paris ནང་གི་མཛད་འཕྲིན་ཁག་ལེགས་གྲུབ་ཟིན་རྗེས། ཕྱི་དྲོ་ཡུལ་དེའི་གྲོང་ཁྱེར་ Strasbourg ནང་ཆིབས་སྒྱུར་བསྐྱངས་གནང་ཡོད་པ་དང་། དེ་རིང་སྔ་དྲོ་མགོན་པོ་མཆོག་གིས་གྲོང་ཁྱེར་དེར་རྟེན་གཞི་བྱས་པའི་ཡོ་རོབ་གྲོས་ཚོགས་ནང་ཆིབས་སྒྱུར་གྱིས་ཡོ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ལགས་ Martin Schulz མཆོག་དང་མཇལ་འཕྲད་གནང་པ་མ་ཟད། Council of Europe ཞེས་ཡོ་རོབ་ནང་འགྲོ་བ་མིའི་ཐོབ་ཐང་དང་མང་གཙོ། དེ་བཞིན་ཁྲིམས་ལུགས་དབང་བསྒྱུར་གོང་འཕེལ་གནང་མཁན་གྱི་རྒྱལ་སྤྱིའི་སྒྲིག་འཛུགས་ཀྱི་སྐུ་ཚབ་རྣམས་ལ་བྱམས་བརྩེ་དང་ཆོས་དང་མ་འབྲེལ་བའི་བཟང་སྤྱོད་སྐོར་ལ་བཀའ་སློབ་བཀྲིན་བསྐྱངས་གནང་ཡོད་པ་རེད།