༸གོང་ས་མཆོག

བོད་ཀྱི་བླ་ན་མེད་པའི་དབུ་ཁྲིད་༸གོང་ས་༸སྐྱབས་དགོན་ཆེན་པོ་མཆོག་གིས་དེ་རིང་ཕྱི་ཚེས་ ༩ ཉིན་གྱི་སྔ་དྲོ་ཚོུད་ ༨།༣༠ ཐོག་ལ་དྭགས་གི་རྒྱལ་ས་གླེ་ནས་རྒྱང་ཐག་ཀི་ལོ་མི་ཊ། ༡༩ སར་ཆགས་པའི་ས་གནས་ཀྱི་དགེ་ལུགས་པ་དགོན་པ་རྙིང་ཤོས་ཁྲིག་དགོན་ཚུལ་ཁྲིམས་རྣམ་དག་གླིང་དུ་ཆིབས་སྒྱུར་བཀྲིན་བསྐྱངས་ཏེ། གཙུག་ལག་ཁང་གསར་པར་རབ་གནས་དང་ཉིན་གྲངས་ ༡༢ རིང་ཚོགས་རྒྱུའི་དབྱར་ཆོས་ཆེན་མོ་དབུ་འབྱེད་བཀྲིན་བསྩལ་གནང་སོང་བ་མ་ཟད། སེར་སྐྱ་མང་ཚོགས་སྟོང་ཕྲག་བརྒལ་བར་བླང་དོར་བཀའ་སློབ་བཀྲིན་བསྩལ་སོང་། ཁྲིག་དགོན་དབྱར་ཆོས་ཆེན་མོ་དབུ་འབྱེད་མཛད་སྒོའི་ཐོག་མར་ཁྲིག་རྩེ་མཁན་པོ་རིན་པོ་ཆེ་ངག་དབང་བྱམས་པ་བསྟན་འཛིན་ལགས་ནས་༸གོང་ས་མཆོག་དབུ་བཞུགས་གཙོས། དགའ་ལྡན་ཁྲི་རིན་པོ་ཆེ་མཆོག་དང་གླིང་མཆོག་སྤྲུལ་རིན་པོ་ཆེ་མཆོག བ་ཀུ་ལ་རིན་པོ་ཆེ་མཆོག། ས་གནས་ཀྱི་ཁ་ཆེ་དང་ཡི་ཤུའི་སྐུ་མགྲོན་རྣམ་པ་དང་། དེ་བཞིན་ཇ་མུ་དང་ཀཤ་མིར་མངའ་སྡེའི་མཉམ་འབྲེལ་དང་ལ་དྭགས་སྡེ་ཚན་གྱི་བློན་ཆེན་སྐུ་ཞབས་ཚེ་རིང་རྡོ་རྗེ་མཆོག་དང་ལ་དྭགས་རི་ལྗོངས་ཡར་རྒྱས་ཚོགས་ཆེན་གྱི་སྡེ་དཔོན་འབུམ་རམས་པ་བསོད་ནམས་ཟླ་བ་ལགས་སོགས་ཆོས་ཕྱོགས་དང་གཞུང་གི་དཔོན་རིགས་རྣམས་ལ་དགའ་བསུ་དང་སྦྲགས་དུས་ཚིགས་ངོ་སྤྲོད་ཀྱི་གསུང་བཤད་གནང་སོང་བ་དང་། རྐང་ཐེངས་འདིའི་དབྱར་ཆོས་ཆེན་མོ་འདི་ནི་ཚོགས་ཐེངས་ ༤ དེ་ཆགས་ཡོད་པ་རེད་འདུག དེ་ཡང་གཙོ་བོ་༸གོང་ས་མཆོག་གིས་བཀའ་དགོངས་ལྟར། ཆོས་བརྒྱུད་ཕན་ཚུན་དབར་ལ་བགྲོ་གླེང་སྦྱང་བཤད་དང་། ལ་དྭགས་མང་ཚོགས་ལ་ནང་ཆོས་ངོ་སྤྲོད་ཡོང་ཆེད་དུ་དམིགས་ཡོད་སྐོར་དང། དབྱར་ཆོས་ཐོག་མ་ཕྱི་ལོ་ ༢༠༡༣ ལོར་ལ་དྭགས་མཚན་ཉིད་སློབ་གྲྭར་ཚོགས་ཡོད་པ་དང་། ཐེངས་གཉིས་པ་ལི་འཁྱིལ་དགོན་པ་དང་། གསུམ་པ་དཔེ་ཐུབ་དགོན་པར་ཚོགས་གྲུབ་ཡོད་པ་ངོ་སྤྲོད་གནང་པ་མ་ཟད། ལྷག་པར་དུ་འདས་པའི་དབྱར་ཆོས་ཆེན་པོའི་ལས་རིམ་ནས་མང་ཚོགས་ལ་ཕན་ཐོགས་རྒྱ་མི་ཆུང་བ་བྱུང་ཡོད་སྐོར་གསུངས་སོང་། ཁྲིག་རྩེ་མཁན་པོ་རིན་པོ་ཆེ་མཆོག་གིས་མཛད་སྒོ་འདིའི་ཐོག་༸སྐུའི་གྱ་སྟོན་ལ་བཀྲིན་རྗེས་དྲན་ཞུ་ཆེད་གསེར་གྱི་རྟགས་མ་ཞིག་༸གང་ཉིད་མཆོག་ལ་ཕུལ་ཡོད་པ་རེད། ད་རེས་ཉིན་གྲངས་ ༡༢ རིང་ཚོགས་རྒྱུའི་དབྱར་ཆོས་ཆེན་མོའི་ཐོག་གཙོ་བོ་ལི་འཁྱིལ་དགོན་པ་དང་དཔེ་ཐུབ་དགོན། མཚན་ཉིད་སློབ་གྲྭ་དང་ཁྲིག་རྩེ་དགོན་སོགས་ལ་དྭགས་ནང་གི་དགོན་ཁག་ཚང་མ་ནས་དགེ་བཙུན་སྐུ་ཚབ་ཙམ་མ་ཟད། ཉེ་འཁོར་སློབ་གྲྭ་ཁག་བཅུའི་སློབ་ཕྲུག་ཁག་ཅིག་བསྡོམས་ཁྱོན་མཉམ་ཞུགས་གནང་མཁན་ ༣༠༠ ཙམ་འདུག་པ་དང་། ལས་རིམ་ལྟར་ན་དབྱར་ཆོས་འདིའི་ཁྲོད་གདན་ཞུ་ནང་པའི་དགེ་བཤེས་ཁག་ཅིག་དང་ས་གནས་ཀྱི་ཡི་ཤུ་དང་ཁ་ཆེའི་མཁས་པ་འགའ། ཆོས་ལུགས་དང་མི་རིགས་མཐུན་སྒྲིལ་གལ་གནད་དང་ཆང་རག་གི་ཉེས་དམིགས། ནང་ཆོས་དང་ཚན་རིག་གི་འབྲེལ་བའི་སྐོར། བདེན་བཞི་དང་ཐེག་པ་གསུམ་སོགས་བརྗོད་སྣ་མང་ཐོག་གསུང་བཤད། དེ་ནས་ཉིན་ལྟར་བྱང་ཆུབ་ལམ་སྒྲོན་གྱི་གཞུང་ཐོག་དམ་བཅའ་དང་རྩོད་པ་སོགས་རྩོད་གནང་གི་འདུག དེ་རིང་སྔ་ཐོག་དབུ་འབྱེད་མཛད་སྒོའི་ཐོག་དགའ་ལྡན་ཁྲི་རིན་པོ་ཆེ་མཆོག་དང། ས་གནས་ཀྱི་ཁ་ཆེ་shia དང་ sunny འི་སྐུ་ཚབ་སྐུ་ཞབས་ Molvi Abdul ལགས་དང་སྐུ་ཞབས་ Mohammad Javid ལགས་བཅས་ནས་ཆོས་ལུགས་མཐུན་སྒྲིལ་དང་འཆམ་མཐུན། འཛམ་གླིང་ཞི་བདེའི་གལ་གནད་སོགས་ཀྱི་ཐོག་གསུང་བཤད་གནང་པ་མ་ཟད། ཁྱད་པར་དུ་སྐབས་དེར་ཇ་མུ་དང་ཀཤ་མིར་མངའ་སྡེའི་མཉམ་འབྲེལ་དང་ལ་དྭགས་སྡེ་ཚན་གྱི་བློན་ཆེན་སྐུ་ཞབས་ཚེ་རིང་རྡོ་རྗེ་མཆོག་ནས་མངའ་སྡེའི་སྤྱི་ཁྱབ་བློན་ཆེན་ལྕམ་སྐུ་ Mehbooba Mufti མཆོག་གིས་༸གོང་ས་མཆོག་ལ་འཚམས་འདྲིའི་ཞུས་ཡོད་པ་དང་ཁོང་མོ་ད་རེས་ས་གནས་སུ་འཕྲད་བཞིན་པའི་དཀའ་རྙོག་གི་རྐྱེན་པས་བཅར་ཐུབ་མེད་པ་སྙན་གསེང་ཞུས་སོང་། ༸གོང་ས་སྐྱབས་མགོན་ཆེན་པོ་མཆོག་གིས་དེ་རིང་འདི་ག་ཁྲིག་རྩེ་དབྱར་ཆོས་ཆེན་མོའི་མཛད་སྒོའི་ཐོག་བཅར་བའི་མང་ཚོགས་སྟོང་ཕྲག་བརྒལ་བར་ཐོག་མར་༸གང་ཉིད་མཆོག་འཛམ་གླིང་ས་ཕྱོགས་གང་དུ་ཕེབས་རུང་། མི་སུ་འདྲ་ཞིག་དང་མཇལ་རུང་༸སྐུ་ཉིད་འགྲོ་བ་མི་གཅིག་ཡིན་པའི་འདུ་ཤེས་ཐོག་ནས་མཇལ་འཕྲད་གནང་གི་ཡོད་སྐོར་བཀའ་བསྩལ་གནང་སྟེ། ༸སྐུའི་ཐུགས་བསྐྱེད་དམ་བཅའ་གསུམ་ལས་འགྲོ་བ་མའི་བཟང་སྤྱོད་ཀྱི་རིན་ཐང་གོང་འཕེལ་དང་འཛམ་གླིང་ཆོས་ལུགས་མཐུན་སྒྲིལ་སྐོར་ལ་བཀའ་སློབ་གནང་པ་མ་ཟད། ཁྱད་པར་སྐབས་དེར་ཆོས་ལུགས་མཐུན་སྒྲིལ་སྐོར་ལས་ད་ལྟ་ལ་དྭགས་ནང་གི་ནང་པ་དང་ཁ་ཆེའི་དབར་གྱི་འབྲེལ་བ་དང། དེ་བཞིན་ཁ་ཆེ་ནང་ཕུན་ཚུན་གྱི་འབྲེལ་བ་དེ་ནི་གཅེས་པའི་ནོར་བུ་ལྟ་བུ་ཆགས་ཡོད་པས་བསྔགས་བརྗོད་ཆེན་པོ་གནང་པ་དང་ཆབས་ཅིག ནོར་བུ་དེ་ཡིས་འོད་ཟེར་དེ་རིམ་པས་འཛམ་གླིང་སྤྱི་ལ་ཁྱབ་སྤེལ་གནང་རྒྱུའི་འགན་བཞེས་དགོས་པ་ལམ་སྟོན་མཛད་ཡོད། དེ་བཞིན་༸གོང་ས་མཆོག་གིས་དབྱར་ཆོས་ཆེན་མོ་སྐོར་ལས་འཕྲོས་ཏེ།  དེ་གར་འདུས་པའི་གྲྭ་བཙུན་དང་མི་སྐྱ་ཕོ་མོ་ཀུན་ལ་སངས་རྒྱས་ཀྱི་ཆོས་ཤེས་པ་ལ་ལུང་རྟོགས་ཀྱི་ཆོས་ལ་སློབ་སྦྱོང་བྱ་རྒྱུ་ཤིན་ཏུ་ནས་གལ་ཆེ་ཡིིན་ཞིང་ཁ་འདོན་ལ་༸སྐུ་འདྲ་བཞེངས་པ་ཙམ་གྱིས་འགྲིག་ཐབས་མེད་པས་རྟགས་གསལ་དང་རིགས་ལམ་སྦྱོང་རྒྱུ་ནི་དེ་བས་གལ་ཆེ་བ་ཡིན་པ་བཀའ་བསྩལ་མཛད་སོང་། ཁྱད་པར་དུ་༸གོང་ས་མཆོག་གིས་དུས་རབས་ ༢༡ པའི་ནང་པའམ་ཆོས་ལ་ཤེས་ནས་དད་པ་ཐོབ་གལ་ཡིན་པ་མ་གཏོགས། དབང་བརྟུལ་དད་པའི་རྗེས་འབྲངས་ཁོ་ནར་འཇུག་པ་ཡིན་ན་སངས་རྒྱས་ཀྱི་བསྟན་པ་ཡུན་རིང་གནས་ཀྱི་མ་རེད་ཅེས་བཀའ་ནན་བསྩལ་སོང། རྩ་བའི་མཛད་འཆར་ལྟར་སང་ཉིན་༸གོང་ས་མཆོག་གིས་ཁྲིག་རྩེ་དགོན་དུ་ཇོ་བོ་རྗེས་མཛད་པའི་བྱང་ཆུབ་ལམ་སྒྲོན་དང་དཔལ་མགོན་འཕགས་པ་ཀླུ་གྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་ཆོས་འབྲེལ་བཀྲིན་བསྩལ་རྒྱུ་ཡིན་འདུགཔ་དང་། གནངས་ཚེས་ ༡༡ ཉིན་ཁྲིག་རྩེ་འདུས་མང་ནས་མགོན་པོ་མཆོག་ལ་བརྟན་བཞུགས་རྒྱས་པ་ཞིག་བསྟར་འབུལ་ཞུ་འཆར་འདུག

དེ་རིང་ཟླ་ ༨ ཚེས་ ༨ ཉིན་གྱི་སྔ་དྲོ་ཚོུད་ ༨།༠༠ ཡོལ་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་ས་ཕུག་ས་གནས་སུ་ཆིབས་སྒྱུར་གྱིས་རིས་མེད་ཤེས་ཡོན་ལྟེ་གནས་ཁང་ཞིག་ལེགས་གྲུབ་བྱུང་བར་དབུ་འབྱེད་རབ་གནས་གྲུབ་བསྟུན། ༸གང་ཉིད་མཆོག་ཚོུད་ ༩།༠༠ ཡོལ་ཙམ་ནས་སྟོག་ཁྱབ་ཁོངས་ Siddhartha འབྲིང་རིམ་སློབ་གྲྭར་ཆིབས་སྒྱུར་མཛད་པ་དང་། དེའང་གཙོ་བོ་སློབ་མ་རྣམས་ཀྱིས་མགོན་པོ་མཆོག་ལ་རིགས་ལམ་རྟགས་གསལ་སྤྱན་འབུལ་ཞུས་ཡོད་པ་རེད། དེ་རྗེས་ཚོུད་ ༡༠།༠༠ ཙམ་ལ་བ་ཀུ་ལ་རིན་པོ་ཆེ་མཆོག་གི་གུར་བུ་དགོན་དུ་གནས་གཟིགས་མཛད་པ་མ་ཟད། དགོན་པ་དེའི་རྟེན་གཙོ་སྟོན་པ་ཐུབ་པའི་དབང་པོ་མཆོག་གི་སྣང་བརྙན་གསར་པ་ཕི་ཊི་ ༧༡ ཅན་རྟེན་དང་བརྟེན་པ་བཅས་པ་རབ་གནས་དབུ་འབྱེད་བཀྲིན་བསྐྱངས་ཡོད་པ་དང་། ༸གང་ཉིད་མཆོག་གི་སྐུ་འཁོར་ལྷན་རྒྱས་སྟོག་རྒྱལ་ཁང་དུ་ཉིན་དགུང་ལྗགས་སྨིན་བཞེས་གནང་མཛད་ཡོད། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་སྔ་དྲོ་ཚོུད་  ༩།༠༠ ཐོག་ལ་དྭགས་གླེ་ལྕོག་ལམ་སར་རྟེན་གཞི་བྱས་པའི་བོད་ཕྲུག་ཁྱིམ་སྡེའི་རྩེད་ཐང་དུ་ས་གནས་བོད་རིགས་རྣམས་ལ་བཀའ་སློབ་བཀྲིན་བསྐྱངས་ཡོད་པ་དང་། སྐབས་དེར་མགོན་པོ་༸གང་ཉིད་ནས་བོད་མི་རྣམས་ནས་རང་ཉིད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ལ་དགའ་ཞེན་དང་སྤོབས་པ་ཆེན་པོའི་ཐོག་མི་ཉམས་རྒྱུན་འཛིན་དང་ཉམས་པ་སླར་གསོ་གནང་བཞིན་པ་དེ་ནི་ཁ་བྲལ་བའི་བྱ་སྤྱོད་ཞིག་མ་རེད་ཅེས་བཀའ་སྩལ་འདུག དེའང་༸གོང་ས་མཆོག་གིས་མང་ཚོགས་རྣམས་ལ་བཀའ་སློབ་སྩལ་དོན་ལ། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རིགས་དེ་ལོ་ངོ་སྟོང་ཕྲག་མང་པོའི་ལོ་རྒྱུས་ཡོད་པའི་མི་རིགས་ཤིག་ཡིན་པ་དང། མི་རིགས་ཀྱི་ངོ་བོ་མཚོན་སླད་གཙོ་ཆེ་ཤོས་སྐད་ཡིག་ཡིན་སྟབས། རྒྱ་རིགས་མི་མང་རྣམས་ནས་སྔ་རབས་ནས་ཡོད་པའི་རང་ཉིད་ཀྱི་ངོ་བོ་དང་རིག་གཞུང་ལ་དགའ་ཞེན་ཆེན་པོ་གནང་བཞིན་པ་ལྟར། བོད་མི་ཚོ་ལའང་དེ་མཚུངས་རང་ཉིད་ཀྱི་ཐུན་མོང་མ་ཡིན་པའི་མི་རིགས་ཀྱི་ངོ་བོ་དང་རིག་གཞུང་། ཆོས་དང་སྐད་ཡིག་སོགས་ལ་དགའ་ཞེན་དང་སྤོབས་པ། ལྷག་དོན་རིག་གཞུང་དེ་དག་སྲུང་སྐྱོབ་དང་མི་ཉམས་རྒྱུན་འཛིན་གནང་རྒྱུའི་རང་དབང་ཡོད་པ་རེད་ཅེས་བཀའ་སྩལ་མཛད་འདུག ༸གང་ཉིད་མཆོག་གིས་རྒྱ་གཞུང་གི་ལྟ་བ་མཁྲེགས་བཟུང་ཅན་གྱི་རྒྱ་རིགས་འགོ་ཁྲིད་ཁག་ཅིག་གིས་བོད་ནང་གི་བོད་མི་ཚོས་རང་ཉིད་ཀྱི་ཆོས་དང་སྐད་ལ་སློབ་སྦྱོང་གནང་པར་གདུག་རྩུབ་ཅན་གྱི་སྲིད་བྱུས་འོག་དམ་དྲག་ཤུགས་ཆེ་བྱེད་བཞིན་པ་དེ་ནི་བློ་ཕམ་གྱི་གནས་སྟངས་ཤིག་ཡིན་པ་བཀའ་སྩལ་དང་སྦྲགས།  བོད་མི་རྣམས་ནས་རང་ཉིད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ་གནང་བཞིན་པ་དེ་ནི་ཁ་བྲལ་བའི་བྱ་སྤྱོད་ཞིག་མ་རེད་ཅེས་བཀའ་སྩལ་ནན་པོ་མཛད་ཡོད་པ་རེད། དེ་བཞིན་༸གོང་ས་མཆོག་གིས་བོད་ཀྱི་སྐད་ཡིག་དང་ནང་ཆོས་ཀྱི་གལ་གནད་སྐོར་བཀའ་སྩལ་བ་མ་ཟད། གཞན་ཡང་ ས་གནས་ལ་དྭགས་མི་མང་དང་གནད་ཡོད་མི་སྣ་རྣམས་ནས་ད་བར་ཁུལ་དེར་ཡོད་པའི་བོད་མི་གཙོ་བོར་གྱུར་བའི་ས་གནས་སློབ་གྲྭ་ཁག་ལ་གཟིགས་སྐྱོང་དང་རོགས་རམ་ཤུགས་ཆེ་གནང་པར་ཐུགས་རྗེ་ཆེ་ཞུ་དང་། བོད་ནང་གི་བོད་མི་ཚོར་རང་ཉིད་ཀྱི་རིག་གཞུང་སྲུང་སྐྱོབ་ཞུ་རྒྱུར་རང་དབང་མེད་སྟབས། བོད་ཀྱི་ཆོས་དང་སྐད་ཡིག་སོགས་གཅིག་མཚུངས་ཡིན་པའི་ལ་དྭགས་ནས་མོན་བར་གྱི་ཧི་མཱ་ལ་ཡའི་མི་རིགས་རྣམས་ནས་བོད་ཀྱི་ཆོས་དང་སྐད་ཡིག་ལ་དོ་སྣང་དང་སློབ་སྦྱོང་གནང་རྒྱུ་གལ་ཆེན་པོ་ཡིན་པར་བཀའ་སློབ་བཀྲིན་བསྩལ་འདུག རྩ་བའི་ད་ལྟའི་ཆར་༸གོང་ས་མཆོག་གིས་ལ་དྭགས་ཁུལ་གྱི་མཛད་འཆར་སྐྱང་བཞིན་ཡོད་པ་དང་། ༸ གང་ཉིད་མཆོག་ད་ལན་ཁུལ་དེའི་ནང་བཞུགས་ཞག་དུས་ཡུན་ནི་ཟླ་འདིའི་ཚེས་ ༢༤ བར་ཡིན་པ་རེད།

དེ་རིང་ཟླ་ ༨ ཚེས་ ༥ ཉིན་གྱི་སྔ་དྲོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་ལ་ཇི་ལྟར་གསོལ་འདེབས་ཞུ་དོན་ལྟར། མགོན་པོ་༸གང་ཉིད་མཆོག་ལ་དྭགས་ཞི་བའི་ཚལ་ཕོ་བྲང་ནས་རྒྱང་ཐག་སྤྱི་ལེ་ ༤༠ སར་ཡོད་པའི་སྔ་འགྱུར་བྲག་ཐོག་དགོན་ཆོས་འཁོར་པདྨ་གླིང་དུ་ཆིབས་བསྒྱུར་གྱིས་དགོན་པའི་དུ་ཁང་གསར་པ་དབུ་འབྱེད་རབ་གནས་བཀྲིན་བསྩལ་བ་དང་། གཏང་རག་གི་ཚོགས་མཆོད་འབུལ་བཞེས་མཛད་འདུག ༸གོང་ས་མཆོག་གི་སྐབས་དེར་སྔ་འགྱུར་བྲག་ཐོག་དགོན་པའི་འདུ་ཁང་དབུ་འབྱེད་ཀྱི་མཛད་སྒོའི་ཐོག་བཅར་བའི་སེར་སྐྱ་མང་ཚོགས་རྣམས་ལ།  གང་ཉིད་ཀྱིས་ས་གནས་མང་ཚོགས་ཚོས་ནང་ཆོས་ལ་དད་པ་ཙམ་མ་ཡིན་པར་བསླབ་པ་སློབ་གཉེར་གནང་གལ་ཆེ་བའི་བཀའ་སློབ་བསྩལ་བ་དང་ཆབས་ཅིག  དེང་སྐབས་ཕྱིའི་དངོས་པོ་ཡར་རྒྱས་ཕྱིན་པའི་དུས་དང་བསྟུན། ནང་སེམས་ཀྱི་ཞེ་བདེ་དང་བྱམས་བརྩེ་གོང་འཕེལ་གཏོང་གལ་ཆེ་སྐོར་ལའང་བཀའ་སློབ་ལམ་སྟོན་མཛད་འདུག གཞི་རྩའི་༸གོང་ས་མཆོག་ཆིབས་སྒྱུར་མཛད་ཡུལ་ལ་དྭགས་སྔ་འགྱུར་རྙིང་མའི་བྲག་ཐོག་དགོན་པ་དེ་སྔ་འགྱུར་རྙིང་མའི་མ་དགོན་ཐུབ་བསྟན་རྡོ་རྗེ་བྲག་ཨེ་ཝམ་ལྕོག་སྒར་ཆོས་འཁོར་རྣམ་རྒྱལ་གླིང་གི་ཡན་ལག་དགོན་པ་ཞིག་ཡིན་པ་དང་། དགོན་པ་དེའི་དགོན་བདག་སྔ་འགྱུར་རྙིང་མའི་ཞིང་གཤེགས་༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་ཡིན་པ་རེད། ད་ལྟའི་ཆར་དགོན་པའི་དགེ་འདུན་པ་ཞལ་གྲངས་ ༢༨ ཙམ་སློབ་གཉེར་གནང་བཞིན་ཡོད་པ་རེད་འདུག རྩ་བའི་ད་ལྟའི་ཆར་༸གོང་ས་མཆོག་གི་ལ་དྭགས་ཁུལ་གྱི་མཛད་འཆར་བསྐྱང་བཞིན་ཡོད་པ་དང་། ༸ གང་ཉིད་མཆོག་ད་ལན་ཁུལ་དེའི་ནང་བཞུགས་ཞག་དུས་ཡུན་ནི་ཟླ་འདིའི་ཚེས་ ༢༡ བར་ཡིན་པ་རེད། ༸གོང་ས་མཆོག་གིས་སྔ་འགྱུར་རྙིང་མའི་བྲག་ཐོག་དགོན་པའི་འདུ་ཁང་དབུ་འབྱེད་སྐབས་སྩལ་བའི་བཀའ་སློབ། བརྙན་པར། http://www.youtube.com/watch?v=wRJt2i1d9Kw

 སྐབས་ ༡༦ བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨ་ཅཱ་རྱ་ཡེ་ཤེས་ཕུན་ཚོགས་མཆོག་གིས་སྣེ་ཁྲིད་པའི་སྤྱི་འཐུས་སྒྲོལ་མ་ཚེ་རིང་ལགས་དང་བློ་བཟང་ཆོས་འབྱོར་ལགས་བཅས་རྣམ་པ་གསུམ་ནས་ཟླ་སྔོན་མའི་ཕྱི་ཚེས་ ༢༦ ནས་དབུ་འཛུགས་གནང་སྟེ་རྒྱལ་ས་ལྡི་ལིར་རྒྱ་གར་གྱི་ཆར་དུས་གྲོས་ཚོགས་འཚོགས་བཞིན་པ་དང་བསྟུན། རྒྱ་གར་གྱི་དབུས་གཞུང་གི་ཆེས་མཐོའི་དཔོན་རིགས་ཁག་དང་གྲོས་ཚོགས་གོང་འོག་གི་འཐུས་མི་རྣམས་ལ་མཇལ་འཕྲད་ཞུས་ཡོད་པ་རེད། དེའང་ཆེས་མཐོའི་དཔོན་རིགས་དང་གྲོས་ཚོགས་གོང་འོག་གཉིས་ཀྱི་འཐུས་མི་རྣམས་ལ་བོད་མི་རང་ལུས་མེར་སྲེག་གིས་གཙོས་བོད་ནང་གི་ཛ་དྲག་གནས་སྟངས་སྤྱི་སྙན་སེང་དང་། ལྷག་དོན་རྒྱ་གར་གྲོས་ཚོགས་ནས་བོད་མིའི་སྒྲིག་འཛུགས་ཀྱི་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་འབྲེལ་མོལ་བསྐྱར་གསོ། དེ་བཞིན་རྒྱ་དཀར་ནག་གཉིས་ཀྱི་འབྲེལ་ལམ་སྐབས་བོད་ཀྱི་གནད་དོན་གཙོ་གྲས་སུ་གླེང་སློང་གིས་གྲོས་ཆོད་འཇོག་སྐྱོང་ཡོང་བའི་ཞུ་སྐུལ་གནང་པའི་ཁྲོད། ད་བར་བདུན་ཕྲག་གཅིག་གི་ནང་གཞུང་གི་བློན་ཆེན་ཆེ་ཆུང་ ༨ དང་གྲོས་ཚོགས་གོང་འགོ་གི་འཐུས་མི་ ༥༢ དང་མཇལ་འཕྲད་ཞུས་ཐུབ་པ་བྱུང་འདུག  

དེ་རིང་ཟླ་ ༨ ཚེས་ ༣ ཉིན་རྡ་ས་ཆོལ་གསུམ་དང་བླངས་ཚོགས་པས་གོ་སྒྲིག་འོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭའི་ཞབས་རིམ་གསོག་སྒྲུབ་ཆེད་དྷ་ས་ཁུལ་གྱི་བཙུན་དགོན་ཁག་གཙོས་པའི་བཞུགས་སྒར་དུ་བཅའ་བཞུགས་བ་སེར་སྐྱ་མང་ཚོགས་ཐུན་མོང་གིས་མདོ་སྡེ་བསྐལ་བཟང་གི་ཕྱག་དཔེ་ཚར་ ༡༡༣ ལྗགས་ཀློག་གནང་བཞིན་འདུག དེའང་དེ་རིང་ནས་དབུ་འཛུགས་ཀྱིས་བོད་ཟླ་ ༦ ཚེས་ ༤ སྟེ་ཆོས་འཁོར་དུས་ཆེན་གྱི་དུས་ཁྱད་ཉིན་བར་ཁྱོན་ཉིན་གྲངས་བཞིའི་རིང་༸སྐུ་ཕྱྭའི་ཞབས་རིམ་གསོག་སྒྲུབ་རྒྱ་གང་ཆེ་ཞུ་ཕྱིར་མདོ་སྡེ་བསྐལ་བཟང་གི་ཕྱག་དཔེ་ཚར་ ༡༡༣ ལྗགས་ཀློག་གནང་རྒྱུའི་ཆོས་ཕྱོགས་ཀྱི་གནང་སྒོ་ཚོགས་འཚོགས་བཞིན་འདུག འདི་ག་རླུང་འཕྲིན་ཁང་གིས་༸རྒྱལ་བའི་༸སྐུ་ཕྱྭའི་ཞབས་རིམ་གོ་སྒྲིག་གནང་མཁན་རྡ་ས་ཆོལ་གསུམ་དང་བླངས་ཚོགས་པའི་ཚོགས་གཙོ་བློ་བཟང་ཚེ་རིང་ལགས་སུ་བཅར་འདྲི་ཞུས་པར། ཁོང་གིས་དེ་སྔ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༸གང་ཉིད་མཆོག་དགུང་གྲངས་ ༡༡༣ བར་བཞུགས་རྒྱུའི་བཀའ་བཞེས་བཟང་པོ་སྨིན་སྩལ་ཐོབ་དོན་ལྟར། ངེད་ཅག་གིས་རྟེན་འབྲེལ་བཟང་པོ་མཚོན་ཕྱིར་མདོ་སྡེ་བསྐལ་བཟང་གི་ཕྱག་དཔེ་ཚར་ ༡༡༣ ལྗགས་ཀློག་གནང་གི་ཡོད་ཅེས་གསུངས་གནང་སོང་། དེ་བཞིན་བཞུགས་སྒར་རྣམ་གྲྭ་ཕན་བདེ་ལེགས་བཤད་གླིང་གི་དཔེ་ཁྲིད་དགེ་རྒན་དང་ནང་ཆོས་ངོ་སྤྲོད་ཚོགས་ཆུང་གི་ལྟ་གྲུབ་དགེ་རྒན་གཅིག་ལྕོགས་དགེ་བཤེས་བློ་བཟང་གྲགས་པ་ལགས་ཀྱིས་ཀྱང་གསུངས་པར་རྣམ་ཀུན་བླ་མའི་༸སྐུ་ཚེ་བརྟན་པའི་ཆེད་ཞབས་རིམ་གསོག་སྒྲུབ་གནང་སྟངས་མི་འདྲ་བ་མང་དག་ཡོད་པ་ལས། མདོ་སྡེ་བསྐལ་བཟང་ལྗགས་ཀློག་གནང་རྒྱུ་འདི་ནི་དམིགས་བསལ་ཞིག་ཡིན་པ་དང་། ལྷག་དོན་དེའི་ཕན་ཡོན་ཡང་བསམ་གྱིས་མི་ཁྱབ་པ་ཞིག་ཡོད་པ་ཅེས་སོགས་གསུངས་སོང་། རྩ་བའི་ཐེངས་འདིའི་༸སྐུ་ཕྱྭའི་ཞབས་རིམ་གོ་སྒྲིག་ཚོགས་ཆུང་གིས་༸གོང་ས་མཆོག་གི་༸སྐུ་ཕྱྭའི་ཞབས་རིམ་གསོག་སྒྲུབ་ཀྱི་ཉིན་མཐའ་མ་བོད་ཟླ་ ༦ ཚེས་ ༤ སྟེ་ཆོས་འཁོར་དུས་ཆེན་གྱི་དུས་ཚིགས་ཁྱད་པར་ཅན་དང་བསྟུན་ཚོགས་མཆོད་རྒྱས་པ་ཞིག་ཀྱང་འཚོགས་རྒྱུ་ཡིན་པ་རེད།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་ལོའི་ཕྱི་ཟླ་བཅུ་པའི་ནང་ཤར་ཡུ་རོབ་ཀྱི་རྒྱལ་ཁབ་ Slovakia ནང་དུ་ཆིབས་བསྒྱུར་བསྐྱང་རྒྱུའི་ཐུགས་གཏན་འཁེལ་འདུག དེའང་དེ་རིང་ཟླ་ ༨ ཚེས་ ༢ ཉིན་ཡུལ་དེའི་ས་གནས་བརྒྱུད་ལམ་ཐོག་ཏུ་གནས་ཚུལ་ཐོན་པར་གཞིགས་ན། ༸གོང་ས་༸སྐྱབས་མགོན་ཆེན་པོ་མཆོག་འདི་ལོའི་ཟླ་ ༡༠ ཚེས་ ༡༥ ཉིན་ཤར་ཡུ་རོབ་ཀྱི་རྒྱལ་ཁབ་ Slovakia འི་རྒྱལ་ས་ Bratislava ནང་ལ་༸ཞབས་སོར་འཁོད་གནང་གི་འདུག་པ་དང་། མགོན་པོ་༸གང་ཉིད་མཆོག་རྒྱལ་ཁབ་འདིའི་ནང་ད་ལན་གྱི་ཆིབས་སྒྱུར་མཛད་པ་དེ་ཐེངས་གསུམ་པ་དེ་ཆགས་ཀྱི་ཡོད་པ་རེད་འདུག རྒྱལ་ས་ Bratislava ནང་གི་ཆིབས་བསྒྱུར་དེའི་སྐབས་༸གོང་ས་མཆོག་ནས་ཁུལ་དེའི་ནང་རྟེན་གཞི་བྱས་པའི་ National Tennis Center ཟེར་བའི་རྩེད་འགྲན་ཁང་དུ་མང་ཚོགས་ལ་བཀའ་སློབ་བཀྲིན་སྩལ་གནང་རྒྱུ་ཡིན་པ་དང་། ༸གང་ཉིད་མཆོག་ལ་གདན་ཞུ་ཕུལ་མཁན་ Suzanne Kiss ལགས་ཀྱིས་མགོན་པོ་༸གང་ཉིད་མཆོག་གི་བཀའ་སློབ་དེ་ནི་མང་ཚོགས་ལ་ཞི་བདེ་དང་རེ་བའི་བརྡ་ལན་ཆེས་གསལ་པོ་དང་ནུས་པ་ལྡན་པ་ཞིག་ཆགས་ངེས་ཡིན་པར་འགྲེལ་བརྗོད་གནང་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ཁབ་འདིའི་ནང་ཆིབས་སྒྱུར་ཐོག་མ་དེ་ཕྱི་ལོ་ ༢༠༠༠ ཐམ་པའི་ལོ་དང་། ཐེངས་གཉིས་པ་དེ་ཕྱི་ལོ་ ༢༠༠༩ ལོར་ཡིན་འདུག་ལ། སྐབས་དེར་མགོན་པོ་མཆོག་ལ་མང་གཙོ་དང་འགྲོ་བ་མིའི་ཐོབ་ཐང་གོང་འཕེལ་དང་འབྲེལ་བའི་རླབས་ཆེན་གྱི་མཛད་རྗེས་ལ་ཆེ་བསྟོད་ཀྱི་ Jan Langos ཞེས་པའི་གྲགས་ཅན་གཟེངས་རྟགས་འབུལ་བཞེས་གནང་ཡོད་པ་རེད། དཔའ་ལྡན་དགའ་ལྡན་ཕོ་བྲང་གི་དྲ་གནས་ཐོག་གནས་ཚུལ་བཀོད་པར་ལྟར་ན། ༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་ ༡༠ པའི་ནང་ཤར་ཡུ་རོབ་ཀྱི་རྒྱལ་ཁབ་ Slovakia ནང་ཆིབས་བསྒྱུར་མ་མཛད་གོང་ལ་ Latvia འི་རྒྱལ་ས་ Riga དང་སུད་སིའི་གྲོང་ཁྱེར་ Zurich བཅས་གཉིས་ཀྱི་ནང་ལ་ཆིབས་བསྒྱུར་མཛད་འཆར་ཡོད་པ་རེད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རང་ཉིད་ཀྱི་མི་ཚེ་སྐྱིད་སྣང་ལྡན་པ་ཞིག་ཡོང་བར་གཙོ་བོ་འགྲོ་བ་གཞན་གྱི་བདེ་སྡུག་ལ་སེམས་འཁུར་བྱ་རྒྱུ་དེ་རེད་ཅེས་བཀའ་བསྩལ་ཡོད་པ་རེད། དེའང་ཁ་སང་ཟླ་ ༧ ཚེས་ ༢༩ ཉིན་རྒྱལ་སྤྱིའི་ཐོག་ནང་པའི་ཆོས་དང་རིག་གཞུང་། དེ་བཞིན་སྒོམ་གྲུབ་ཉམས་ལེན་གནང་ཕྱོགས་སོགས་དང་འབྲེལ་བའི་དཔྱད་རྩོམ་རིགས་ཁྱབ་སྤེལ་གནང་མཁན་ Lion’s Roar ཐེབས་རྩ་ཁང་གྱི་བརྙན་དེབ་ Lion’s Roar ཞེས་པའི་དེ་ལས་སྤྱི་ཁྱབ་རྩོམ་སྒྲིག་པ་སྐུ་ཞབས་ Melvin McLeod ལགས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་འགྲོ་བ་མིའི་བཟང་སྤྱོད་དང་བདེ་སྡུག དེ་བཞིན་བྱམས་སྙིང་རྗེ། སྒོམ་གྲུབ་ཉམས་ལེན་གནང་ཕྱོགས་སོགས་དང་འབྲེལ་བའི་དམིགས་བསལ་བཅར་འདྲི་ཁག་ཅིག་ཞུས་པ་ཁྱབ་སྤེལ་གནང་འདུག སྐུ་ཞབས་ Melvin McLeod ལགས་ཀྱིས་མགོན་པོ་༸གང་ཉིད་མཆོག་ལ་དེང་སྐབས་ནུབ་ཕྱོགས་པའི་མི་རིགས་མང་པོ་ཞིག་ནས་རང་ཉིད་ཀྱི་བདེ་སྐྱིད་སླད་གཞན་གྱི་བདེ་སྡུག་ལ་བསམ་ཤེས་དེ་ཙམ་གནང་གི་མེད་སྐོར་དང་འབྲེལ། འགྲོ་བ་གཞན་ལ་བདེ་སྐྱིད་བསྐྲུན་ཐབས་སུ་རང་ཉིད་ཀྱི་བདེ་སྐྱིད་བློས་བཏང་གནང་དགོས་ཀྱི་རེད་དམ་ཞེས་བཀའ་འདྲི་ཞུས་པར། ༸གོང་ས་༸སྐྱབས་མགོན་ཆེན་པོ་མཆོག་གིས་རང་ཉིད་ཀྱི་བདེ་སྐྱིད་དང་འགྲོ་བ་གཞན་གྱི་བདེ་སྐྱིད་དབར་ལ་ཁྱད་པར་གྱི་རྩོད་གཞི་གང་ཡང་མེད་སྐོར་བཀའ་བསྩལ་དང་འབྲེལ། ཕྱིའི་སྣང་ཚུལ་གྱི་ཆ་ནས་ང་ཚོས་འགྲོ་བ་གཞན་གྱི་བདེ་སྡུག་ལ་བསམ་ཤེས་གནང་སྐབས་རང་ཉིད་ཀྱི་བདེ་སྐྱིད་བློས་བཏང་བྱས་པ་ལྟར་སྣང་སྲིད་ཀྱང་། དོན་དངོས་ཐོག་འགྲོ་བ་གཞན་ལ་ཇི་ཙམ་གྱིས་ཕན་པ་བྱེད་པ་དེ་ཚོད་ཀྱིས་རང་ཉིད་ལ་བདེ་སྐྱིད་དང་ཕན་ཡོན་ཆེ་བ་ཡོང་བའི་དགེ་མཚན་ཡོད་པ་བཀའ་བསྩལ་འདུག ལྷག་པར་དུ་མགོན་པོ་༸གང་ཉིད་མཆོག་ནས་ང་ཚོ་ཚང་མ་སྤྱི་ཚོགས་སེམས་ཅན་ཡིན་སྟབས་གང་ཟག་སྒེར་གྱི་བདེ་སྡུག་གང་འདྲ་ཞིག་ཡིན་ཡང་འགྲོ་བ་གཞན་ལ་ལྟོས་རྒྱུ་གལ་ཆེན་པོ་ཡིན་པ་དང་།  རང་གཅེས་གཛིན་གྱི་བསམ་བློ་ཁོ་ན་བཏང་ཚེ། རང་ཉིད་ཀྱི་མི་ཚེ་ནང་སེམས་ཁྲལ་དང་སེམས་སྡུག དེ་བཞིན་མི་སྐྱིད་པ་དང་རང་ཉིད་ཁེར་རྐྱང་གི་སེམས་འཚོར་ཤུགས་ཆེ་བྱུང་ངེས་རེད་ཅེས་ལམ་སྟོན་བཀའ་སློབ་དང་སྦྲགས། རང་ཉིད་ཀྱི་མི་ཚེ་སྐྱིད་སྣང་ལྡན་པ་ཞིག་ཡོང་བར་གཙོ་བོ་འགྲོ་བ་གཞན་གྱི་བདེ་སྡུག་ལ་སེམས་འཁུར་བྱ་རྒྱུ་དེ་རེད་ཅེས་བཀའ་བསྩལ་ཡོད་པ་རེད། དེ་བཞིན་རྩོམ་སྒྲིག་པས་དེང་སྐབས་རྒྱལ་སྤྱིའི་ཐོག་འགྲོ་བ་མི་རྣམས་ནས་དཀའ་རྙོག་མང་དག་ཞིག་བཟོ་བཞིན་པའི་དུས་སྐབས་འདིར། ༸གང་ཉིད་མཆོག་ནས་འགྲོ་བ་མིའི་རང་བཞིན་དེ་བཟང་པོ་ཡིན་པའི་གོ་རྟོགས་ཇི་ལྟར་སྤེལ་གནང་གི་ཡོད་དམ་ཞེས་བཀའ་འདྲི་ཞུས་པར། ༸གང་ཉིད་མཆོག་གིས་དེང་སྐབས་རྒྱལ་སྤྱིའི་ཐོག་འཕྲད་བཞིན་པའི་དཀའ་རྙོག་དེ་དག་རྒྱལ་ཁབ་དང་ལུང་ཚན། མི་རིགས་དང་ཆོས་ལུགས། དེ་བཞིན་རིགས་རུས་སོགས་རིམ་པ་གཉིས་པའི་ཁྱད་པར་ལ་དོ་སྣང་ཆེ་དྲགས་པའི་དབང་གིས་བྱུང་གི་ཡོད་སྐོར་བཀའ་བསྩལ་དང་སྦྲགས། ང་ཚོ་ཚང་མ་ཨ་མའི་བྱམས་སྙིང་རྗེའི་འོག་ནས་འཚར་ལོངས་བྱུང་བའི་འགྲོ་བ་མིའི་རིགས་གཅིག་མཚུངས་ཡིན་སྟབས། འགྲོ་བ་མིའི་རང་བཞིན་གཙོ་བོ་དེ་ཞི་དུལ་བག་ཕེབས་དང་བྱམས་སྙིང་རྗེ་ལྡན་པ་ཞིག་རེད་ཅེས་བཀའ་བསྩལ་ཡོད་པ་རེད། དེ་བཞིན་༸གོང་ས་མཆོག་གིས་དཀའ་རྙོག་དེ་དག་སེལ་ཐབས་སུ་ཤེས་ཡོན་སློབ་གསོའི་ཁྲོད་ན་གཞོན་རྣམས་ལ་ཕྱི་དངོས་པོའི་གནས་ལུགས་ཙམ་མ་ཡིན་པར་འགྲོ་བ་མིའི་རིན་ཐང་དང་འབྲེལ་བའི་བཟང་སྤྱོད་སོགས་ཀྱི་སློབ་གསོ་གང་མང་སྤྲོད་གལ་ཆེ་བ་དང་། ལྷག་པར་དུ་ཤེས་ཡོན་སློབ་གསོ་དེ་མིའི་ཀླད་པ་རྒྱ་བསྐྱེད་བཏང་རྒྱུ་ཁོ་ན་མིན་པར་འགྲོ་བ་མིའི་ནང་སེམས་ཀྱི་ཞི་བདེ་དང་བྱམས་སྙིང་རྗེའི་བསམ་པ་གོང་མཐོར་གཏོང་རྒྱུ་བཅས་ལ་དོ་སྣང་ཆེ་བཞེས་གནང་དགོས་པའི་ལན་སྟོན་མཛད་འདུག ཁོང་གི་༸གོང་ས་༸སྐྱབས་མགོན་ཆེན་པོ་མཆོག་ལ་ནུབ་ཕྱོགས་ཁུལ་དུ་མི་མང་པོ་ཞིག་ནས་ནང་ཆོས་མ་ཤེས་ཀྱང་སྒོམ་གྲུབ་ཉམས་ལེན་གྱི་ཐོག་ལ་དོ་དབྱིངས་ཆེན་པོ་གནང་བཞིན་པར་དགོངས་ཚུལ་ཇི་ཡོད་བཀའ་འདྲི་ཞུས་པར། མགོན་པོ་ཆོག་ནས་འཛམ་བུ་གླིང་འདིའི་ཐོག་ཡོད་པའི་འགྲོ་བ་མི་ཐེར་འབུམ་བདུན་ལྷག་གི་ནང་ནས་ཐེར་འབུམ་གཅིག་ལྷག་ཆོས་ཁས་ལེན་གནང་གི་མེད་སྐོར་འགྲེལ་བརྗོད་གནང་པ་དང་ཆབས་ཅིག གཞི་རྩའི་ཆ་ནས་སྒོམ་གྲུབ་ཉམས་ལེན་གནང་རྒྱུ་དེ་ཆོས་ཕྱོགས་ནས་དར་བ་ཞིག་ཡིན་ཀྱང་། འགྲོ་བ་མི་རྣམས་ནས་ཕན་ཡོན་དང་དགེ་མཚན་ལྡན་པར་གཟིགས་ཀྱི་ཡོད་ན་ཆོས་དང་མ་འབྲེལ་བའི་སྒོམ་གྲུབ་ཉམས་ལེན་རིགས་གནང་ཚེ། དེ་ནི་ནོར་འཁྲུལ་གང་ཡང་མེད་པ་མ་ཟད། ལྷག་དོན་སྒོམ་གྲུབ་ཉམས་ལེན་གནང་ཐུབ་ན་རང་ཉིད་ཀྱི་རིག་སྟོབས་འཕེལ་རྒྱུ་དང་བསམ་བློའི་དཔྱད་ཞིབ་ཀྱི་རང་བཞིན་རྒྱ་བསྐྱེད་འགྲོ་རྒྱུ་སོགས་ལ་ཆེས་དགེ་མཚན་ཡོད་པ་བཀའ་བསྩལ་ཡོད། མཐའ་མ་དེར་ Lion’s Roar བརྙན་དེབ་ཀྱི་སྤྱི་ཁྱབ་རྩོམ་སྒྲིག་པ་སྐུ་ཞབས་ Melvin McLeod ལགས་ནས་མགོན་པོ་༸གང་ཉིད་མཆོག་གིས་འཛམ་བུ་འདིའི་ཐོག་ཡོད་པའི་འགྲོ་བ་ཐེར་འབུམ་མང་པོའི་བསམ་བློ་བཀུག་ཐུབ་པའི་རྒྱུ་མཚན་གཙོ་བོ་དེ་གང་ཡིན་པར་གཟིགས་ཀྱི་ཡོད་དམ་ཞེས་བཀའ་འདྲི་ཞུས་པར། ༸གོང་ས་མཆོག་གིས་ངོས་རང་ཏཱ་ལའི་བླ་མ་ཡིན་བསམ་པའི་དམིགས་བསལ་གྱི་བསམ་བློ་གང་ཡང་གཏོང་གི་མེད་པ་མ་ཟད། ངོས་ནས་རྒྱལ་སྤྱིའི་ཐོག་ཆོས་འབྲེལ་དང་གསུང་བཤད་སོགས་གང་བསྩལ་ཡང་ང་ཚོ་ཚང་མ་འགྲོ་བ་མིའི་རིགས་གཅིག་གྱུར་གྱི་འདུ་ཤེས་འཛིན་པ་དེས། འགྲོ་བ་ཡོངས་དང་སེམས་ཐག་ཉེ་པོ་བྱུང་ཐུབ་ཀྱི་ཡོད་པར་བཀའ་བསྩལ་གནང་བཞིན་ཡོད་པ་བཀའ་ལན་དང་སྦྲགས། འགྲོ་བ་མི་རྣམས་ལ་ཆོས་ཁས་བླངས་དང་མི་བླངས་ཀྱི་རང་དབང་ཡོད་ཀྱང་། གལ་ཏེ་ཆོས་གང་རུང་ཞིག་ཁས་ལེན་གནང་རྗེས་རང་ཉིད་ཀྱི་ངོས་ནས་སེམས་པ་རྣམ་དག་གནང་རྒྱུ་དེ་གལ་ཆེན་པོ་ཡིན་པ་མ་ཟད། དེ་ལྟར་གནང་ཚེ་རིམ་པས་རང་ཉིད་ཀྱི་སེམས་རྒྱུད་ལ་བཟང་ཕྱོགས་ཀྱི་འགྱུར་བ་ཞིག་ངེས་པར་ཐེབས་ཀྱི་རེད་ཅེས་བཀའ་སློབ་བཀྲིན་བསྩལ་འདུག  

བོད་ཀྱི་བླ་ན་མེད་པའི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་ལ་དྭགས་ཀྱི་རྒྱལ་ས་སླེར་རྟེན་གཞི་བྱས་པའི་ཇོ་བོ་གཙུག་ལག་ཁང་དང་། དེ་བཞིན་ ཤིཡཱ་ དང་ ཤུནི་ཁ་ཆེ་ལྷ་ཁང་གཉིས་བཅས་སུ་གནས་གཟིགས་མཛད་པ་དང་། མང་ཚོགས་ལ་ཆོས་ལུགས་མཐུན་སྒྲིལ་སྐོར་བླང་དོར་བཀའ་སློབ་བཀྲིན་བསྩལ་འདུག དེ་ཡང་མགོན་པོ་མཆོག་ཁ་ཉིན་ཚེས་ ༢༥ ཉིན་ལ་དྭགས་ཞི་བའི་ཚལ་ཕོ་བྲང་དུ་༸ཞབས་སོར་བདེ་བར་འཁོད་གནང་མཛད་ཡོད་པ་ལྟར། དེ་རིང་ཉིན་གསུམ་པའི་སྔ་དྲོ་ཚོུད་ ༨།༠༠ ཡོལ་ཙམ་ལ་རྒྱལ་ས་སླེར་རྟེན་གཞི་བྱས་པའི་ཇོ་བོ་གཙུག་ལག་ཁང་དུ་གནས་གཟིགས་དང་སྨོན་ལམ་གསུང་འདོན་མཛད་འདུག སྐབས་དེར་ལ་དྭགས་རི་ལྗོངས་ཡར་རྒྱས་ཚོགས་པའི་སྲིད་སྐྱོང་ཌོཀ་ཊར་བསོད་ནམས་ཟླ་བ་མཆོག་གིས་དབུས་པའི་བློན་ཆེན་རྣམ་པ་དང་། ཁྲིག་རྩེ་དགོན་པའི་མཁན་རིན་པོ་ཆེ་མཆོག་གིས་དབུས་པའི་བླ་སྤྲུལ་དགེ་བཤེས་རྣམ་པ། གཞུང་གི་གནད་ཡོད་མི་སྣ་བཅས་མང་ཚོགས་བརྒྱ་སྐོར་ཁ་ཤས་ནས་སྤོས་སྣེས་སྔོན་བསུས་ཏེ་མགོན་པོ་༸གང་ཉིད་མཆོག་ལ་ཕེབས་བསུ་གཟབ་རྒྱས་ཞུས་འདུག དེ་རྗེས་༸གོང་ས་མཆོག་རྒྱལ་ས་སླེར་རྟེན་གཞི་བྱས་པའི་ ཤིཡཱ་ དང་ ཤུ་ནི་ཁ་ཆེ་ལྷ་ཁང་གཉིས་སུ་གནས་གཟིགས་མཛད་པ་དང་། དེ་འབྲེལ་ཁ་ཆེའི་གཙོ་འཛིན་དང་མང་ཚོགས་བརྒྱ་སྐོར་ཁ་ཤས་ལ་མཇལ་ཁ་དང་༸གང་ཉིད་ཀྱི་༸སྐུའི་ཐུགས་བསྐྱེད་དམ་བཅའ་གསུམ་ལས་ཆོས་ལུགས་མཐུན་སྒྲིལ་གྱི་གལ་གནད་སྐོར་བཀའ་སློབ་བསྩལ་འདུག ཁྱད་པར་དུ་མགོན་པོ་མཆོག་གིས་དེ་གར་འདུས་པའི་ཁ་ཆེའི་ཆོས་གྲོགས་རྣམས་ལ། ལ་དྭགས་གཙོས་པའི་རྒྱ་གར་ནང་གི་ཁ་ཆེ་བ་ཚོས་འཛམ་གླིང་ཆོས་ལུགས་མཐུན་སྒྲིལ་གྱི་མཚོན་རྟགས་སུ་འགྱུར་ཐུབ་པ་གནང་གལ་ཡིན་པའི་བླང་དོར་ལམ་སྟོན་རྒྱ་ཆེ་མཛད་འདུག མཛད་འཆར་ལྟར་ན་སང་ཉིན་ནས་ཉིན་གྲངས་བཅུ་ཙམ་རིང་ལ་མགོན་པོ་༸གང་ཉིད་མཆོག་ཞི་བའི་ཚལ་ཕོ་བྲང་དུ་༸སྐུ་མཚམས་སུ་བཞུགས་གནང་གི་འདུག་པ་དང། དེ་ནས་ཕྱི་ཚེས་ ༡༠ དང་ ༡༡ བཅས་སུ་ཁྲིག་རྩེ་དགོན་པར་བྱང་ཆུབ་ལམ་སྒྲོན་དང་བྱང་ཆུབ་སེམས་འགྲེལ་གྱི་ཆོས་འབྲེལ་བསྩལ་རྒྱུ་མ་ཟད། བཀའ་ཆོས་ཉིན་གཉིས་པའི་སྐབས་ཚེ་དབང་བཀྲིན་བསྩལ་གཏན་འཁེལ་འདུག དེ་ནས་ཕྱི་ཚེས་ ༡༩ ནས་ཉིན་གྲངས་གསུམ་རིང་ལ་༸གོང་ས་མཆོག་གིས་ཞི་བའི་ཚལ་དུ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་བཀའ་ཆོས་བསྐྱང་རྒྱུ་དང་། ཕྱི་ཚེས་ ༢༡ ཉིན་ཐུགས་རྗེ་ཆེན་པོ་བཀའ་དབང་བཅས་བསྩལ་གཏན་འཁེལ་འདུག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁ་ཉིན་སྔ་དྲོ་རྡ་རམ་ས་ལའི་བཞུགས་སྒར་༸རྒྱལ་བའི་ཕོ་བྲང་ནས་ཆིབས་ཐོན་གྱིས་ཇ་མུ་བརྒྱུད་ལ་དྭགས་སུ་ཆིབས་སྒྱུར་བཀྲིན་བསྐྱངས་ཡོད་པ་དང་། མགོན་པོ་༸གང་ཉིད་མཆོག་ལ་དྭགས་ཞི་བའི་ཚལ་ཕོ་བྲང་དུ་ཞབས་གསོར་འཁོད་མ་ཐག་ཞི་བའི་ཚལ་ཕོ་བྲང་གི་ཚོམས་ཆེན་དུ་དགའ་ལྡན་ཁྲི་རིན་པོ་ཆེ་མཆོག་གིས་གཙོས། འབྲི་དགུ་ཆེ་ཚང་རིན་པོ་ཆེ་མཆོག་སོགས་ནང་པའི་ཆོས་བརྒྱུད་ཁག་གི་སྐུ་ཚབ་དང་གཞུང་འབྲེལ་གནད་ཡོད་མི་སྣ། བོད་མིའི་གཞིས་སྒར་སྐུ་ཚབ་ཁག་ཅིག་འདུ་འཛོམས་ཐོག་བཀའ་སློབ་བཀྲིན་བསྩལ་འདུག སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་རྣམས་ལ་༸གང་ཉིད་ཀྱི་༸སྐུའི་ཐུགས་བསྐྱེད་དམ་བཅའ་གསུམ་པོ་ངོ་སྤྲོད་གནང་པ་དང་ཆབས་ཅིག མགོན་པོ་མཆོག་གིས་དེང་གི་དུས་ཚོད་དང་མཐུན་པའི་ཆོས་དང་མ་འབྲེལ་བའི་ཡ་རབས་བཟང་སྤྱོད་ཀྱི་གལ་འགངས་ཐད་ལ་བཀའ་བསྩལ་མཛད་པ་མ་ཟད། ཕྱིའི་རྒྱལ་ཁབ་ཀྱི་གནད་ཡོད་མི་སྣ་དང་མང་ཚོགས་སོགས་ནས་དོ་སྣང་ཇེ་ཆེར་གནང་བཞིན་ཡོད་སྟབས། ༸གང་ཉིད་མཆོག་གིས་ཆོས་དང་མ་འབྲེལ་བའི་ཡ་རབས་བཟང་སྤྱོད་ཀྱི་སློབ་གཞི་དེའང་འདི་ལོའི་ལོ་མཇུག་ནང་འདོན་སྤེལ་བཟོ་སྒྲིག་འཐུས་ཚང་ཟིན་གྱི་ཡོད་སྐོར་བཀའ་བསྩལ་མཛད་འདུག  ཁྱད་པར་དུ་ལ་དྭགས་ས་གནས་འགོ་ཁྲིད་ཚོས་ཀྱང་སློབ་གཞི་དེ་ཁུལ་དེའི་སློབ་གྲྭ་ཁག་གི་སློབ་མའི་སློབ་ཚན་ཁོངས་སུ་བཅུག་དགོས་པའི་ལམ་སྟོན་བསྩལ་བ་དང་སྦྲགས། ༸གང་ཉིད་མཆོག་གིས་སློབ་གཞི་དེ་ཆོས་དད་ཡོད་མེད་ལ་ལྟོས་མེད་ཚང་མར་འབྲེལ་བ་དང་ཕན་ཐོགས་ཡོད་པ་ཞིག་རེད་ཅེས་བཀའ་སྩལ་འདུག བརྙན་འཕྲིན། http://www.youtube.com/watch?v=xXFDIsXDrpg&feature=youtu.be