༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རི་དང་རྒྱ་གར་ལྷོ་ཕྱོགས་ཁུལ་གྱི་མཛད་འཕྲིན་ཁག་ལེགས་པར་འགྲུབ་བསྟུན།  དེ་རིང་བཞུགས་སྒར་དུ་༸ཞབས་གསོར་བདེ་བར་འཁོད་གནང་མཛད་སོང། དེ་རིང་ཟླ་ ༧ ཕྱི་ཚེས་ ༨ ཉིན་སྔ་དྲོ་ཚོུད་ ༡༡།༠༠ ཡོལ་ཙམ་ལ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྡི་ལིའི་གནམ་ཐང་ནས་མཁའ་ལམ་བརྒྱུད་རྡ་སའི་ཉེ་འདབས་སུ་རྟེན་གཞི་བྱས་པའི་གྷ་གལ་གནམ་ཐང་ངུ་༸ཞབས་སོར་བདེ་བར་འཁོད་མ་ཐག་ཕེབས་བསུར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱིས་དབུས་པའི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་བཅས་ཆེད་བཅར་ཞུས་འདུག་པ་དང་། སྐབས་དེར་བོད་ལུགས་ལྟར་གྲོ་སོ་ཕྱེ་མར་འདེགས་འབུལ་དང་ཕེབས་ལམ་གྱི་གཡས་གཡོན་དུ་དཀར་གཙང་གི་མཇལ་དར་དང་དྲི་ཞིམ་བདུག་སྤོས་སྣམ་པ་དང་། དེ་བཞིན་བཀྲིས་པའི་བྲོ་དང་གླུ་དབྱངས་མཆོད་འབུལ་གྱིས་༸གང་ཉིད་མཆོག་ལ་ཕེབས་བསུ་གཟབ་རྒྱས་ཞུས་ཡོད་པ་རེད། དེ་བཞིན་མགོན་པོ་༸གང་ཉིད་མཆོག་བཞུགས་སྒར་དུ་༸ཞབས་གསོར་བདེ་བར་འཁོད་སྐབས་བཞུགས་སྒར་ཕེབས་ལམ་གྱི་གཡས་གཡོན་དུ་གཞུང་ཞབས་སྲི་ཞུ་བ་དང་།  དགེ་བཙུན། སློབ་གྲྭའི་དགེ་སློབ་རྣམས་དང་དེ་བཞིན་ས་གནས་བོད་མི་ཚོས་ལག་ཏུ་དཀར་གཙང་གི་མཇལ་དར་དང་དྲི་ཞིམ་གྱི་བདུག་སྤོས་བཅས་བསྣམས་ཏེ་དགའ་དད་སྤྲོ་གསུམ་ངང་དམིགས་བསལ་གྱི་ཕེབས་བསུ་གཟབ་རྒྱས་ཞུས་གནང་སོང་། གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟླ་བ་སྔོན་མའི་ཕྱི་ཚེས་ ༡༠ ཉིན་བཞུགས་སྒར་ནས་ཆིབས་སྒྱུར་མཛད་དེ། ཨ་རིའི་ནང་ཉིན་གྲངས་ ༡༣ ལྷག་རིང་མཛད་འཕྲིན་བསྐྱངས་ཡོད་པ་དང། དེའི་ཁྲོད་མགོན་པོ་༸གང་ཉིད་མཆོག་གིས་ཨ་རིའི་རྒྱལ་ས་ཝ་ཤིང་ཊོན་ཌི་སི་གཙོས་པའི་ California དང་།  Utah དེ་བཞིན་ Colorado དང་། Indiana བཅས་ཨ་རིའི་མངའ་སྡེ་ཆེ་ཁག་ལྔའི་ནང་ནང་པའི་ཆོས་ཚོགས་དབུ་འབྱེད་དང་བཀའ་ཆོས།  གཞུང་འབྲེལ་གནད་ཡོད་མི་སྣར་མཇལ་འཕྲད། དེ་བཞིན་མང་ཚོགས་ལ་བླང་དོར་གྱི་བཀའ་སློབ་བསྩལ་རྒྱུ་སོགས་ཀྱི་མཛད་འཕྲིན་སྣ་མང་ཞིག་བསྐྱངས་ཡོད་པ་རེད། ལྷག་པར་དུ་ཐེངས་དེའི་ཨ་རིའི་མཛད་འཕྲིན་སྐྱོང་བཞིན་པའི་ཁྲོད་རྒྱ་ནག་དང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གི་དོ་སྣང་ཆེན་པོ་བྱེད་ཡུལ་དུ་གྱུར་བ་ནི། ཕྱི་ཚེས་ ༡༥ ཉིན་༸གོང་ས་མཆོག་དང་ཨ་རིའི་སྲིད་འཛིན་ཨོ་བྷ་མ་མཆོག་གཉིས་དབར་མཇལ་ཕྲད་གནང་བ་དེ་ཆགས་ཀྱི་ཡོད་པ་དང། དབུ་ཁྲིད་རྣམ་གཉིས་དབར་མཇལ་མོལ་གནང་སྐབས་བོད་ནང་གི་བོད་མིའི་གནས་སྟངས་སྐོར་གླེང་མོལ་མཛད་པ་དང། ཨ་རིའི་སྲིད་འཛིན་མཆོག་གིས་ཨ་རིའི་སྲིད་གཞུང་ནས་དུས་དང་རྣམ་པ་ཀུན་ཏུ་བོད་ནང་གི་བོད་མི་རྣམས་ཀྱི་ཐོུང་མ་ཡིན་པའི་ཆོས་དང་རིག་གཞུང། སྐད་ཡིག དེ་བཞིན་འགྲོ་བ་མིའི་ཐོབ་ཐང་སྲུང་སྐྱོབ་ཐད་རྒྱབ་སྐྱོར་གནང་བཞིནཡོད་པ་དང། ལྷག་དོན་སྲིད་འཛིན་མཆོག་གིས་མགོན་པོ་༸གང་ཉིད་མཆོག་གིས་འདོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་ལ་བསྔགས་བརྗོད་ཞུས་པ་དང་སྦྲགས། རྒྱབ་སྐྱོར་ཤུགས་ཆེ་ཡོད་པ་ནན་བརྗོད་གནང་ཡོད་པ་རེད། དེ་བཞིན་དབུ་ཁྲིད་རྣམ་གཉིས་དབར་གྱི་མཇལ་མོལ་གྲུབ་མཚམས་སུ་༸གོང་ས་མཆོག་གིས་ Fox བརྙན་འཕྲིན་གསར་ཁང་གི་བཅར་འདྲི་དང་ལེན་མཛད་ནས་རྒྱ་ནག་གཞུང་གིས་མགོན་པོ་༸གང་ཉིད་མཆོག་རྒྱལ་སྤྱིའི་དབུ་ཁྲིད་རྣམས་དང་མཇལ་འཕྲད་གནང་སྐབས་སྐྱོན་བརྗོད་ཤུགས་ཆེ་བྱེད་བཞིན་པར་རྒྱ་ནག་མི་མང་ཐེར་འབུམ་གཅིག་དང་ཕྱེད་ཀ་ཙམ་ཡོད་པ་དེ་དག་ལ་བཀའ་འདྲི་ཞུས་ན་ངོས་ལན་བྱེད་མིན་ཐེ་ཚོམ་རེད་ཅེས་བཀའ་སྩལ་ཡོད་པ་རེད། གཞན་ཡང་ཆིབས་སྒྱུར་སྐབས་རྒྱལ་སྤྱིའི་བེུད་གཞས་མ་གྲགས་ཅན་ Lady Gaga ལགས་ནས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་ཏེ་བྱམས་བརྩེ་དང་ན་གཞོན་ཀྱི་དཀའ་རྙོག་སྐོར་གླེང་མོལ་ཞུས་སྟབས།  རྒྱ་ནག་གཞུང་གིས་སྐབས་དེར་ཁོང་ལ་སྐྱོན་བརྗོད་ཤུགས་ཆེ་བྱས་པར་བརྟེན་རྒྱལ་སྤྱིའི་གསར་འགྱུར་བརྒྱུད་ལམ་ཁག་དང་མང་ཚོགས་ཚོས་ཀྱང་དོ་སྣང་ཆེན་པོ་བྱ་ཡུལ་གྱི་གནས་ཚུལ་ཞིག་དུའང་གྱུར་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གི་ཨ་རིའི་ནང་གི་མཛད་འཕྲིན་ཁག་ལེགས་པར་གྲུབ་རྗེས། རྒྱ་གར་དུ་ཆིབས་ཞལ་སྒྱུར་གནང་མཛད་ནས་ཟླ་བ་འདིའི་ཕྱི་ཚེས་ ༡ ཉིན་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནང་འབྲས་སྤུངས་བླ་སྤྱིར་ཞབས་སོར་བདེ་བར་འཁོད་གནང་མཛད་པ་དང་། ཕྱི་ཚེས་ ༢ ནས་དབུ་འཛུགས་ཀྱིས་ཕྱི་ཚེས་ ༥ བར་གདན་ས་སེ་འབྲས་དགའ་གསུམ་གྱི་དགེ་འདུན་པ་གཙོས་པའི་དགེ་འདུན་ཞལ་གྲངས་ ༣༣༣ བསྙེན་རྫོགས་ཀྱི་སྡོམ་པ་འབོག་ཆོག་མཛད་པ་དང་།  ཕྱི་ཚེས་ ༦ ཉིན་༸གོང་ས་མཆོག་འབྲས་སྤུངས་བླ་སྤྱིར་སྔ་ཐོག་དགེ་ལུགས་ཡོངས་དང་མོན་གྷོ་གཞིས་ཆགས་ཀྱི་སེར་སྐྱ་མི་མང་ཀུན་ཐུན་མོང་གིས་༸གང་ཉིད་མཆོག་ལ་༸རྗེས་ཚེ་འཛིན་མའི་བརྟན་བཞུགས་རྒྱས་པ་ཞིག་བསྟར་འབུལ་ཞུས་པ་དང་༸སྐུའི་འཁྲུངས་སྐར་གྱི་མཛད་སྒོར་དབུ་བཞུགས་མཛད་ཡོད་པ་བཅས་ཀྱི་མཛད་འཕྲིན་བསྐྱངས་ཡོད། ཤེས་རྟོགས་བྱུང་བར་གཞིགས་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟླ་བ་འདིའི་ཚེས་ ༡༣ ནས་ ༡༥ བར་གུ་རུའི་གནས་མཆོག་མཚོ་པདྨར་ཆིབས་བསྒྱུར་མཛད་རྒྱུ་ཡིན་འདུག་པ་དང་། དེའང་འདི་ལོའི་སྤྲེལ་ཟླ་ཚེས་བཅུའི་གཞུང་འབྲེལ་མཛད་སྒོར་དབུ་བཞུགས་མཛད་རྒྱུ་དང། མང་ཚོགས་ཚོར་ཆོས་འབྲེལ་བསྐྱང་རྒྱུ་རེད་འདུག གཞན་ཡང་ཕྱི་ཟླ་ ༨ ནང་ལ་དྭགས་སུ་ཆིབས་བསྒྱུར་བསྐྱང་མཛད་རྒྱུ་རེད་འདུག

རྒྱ་གར་གྱི་ Hindustan Times གསར་ཁང་གི་གསར་འགོད་པ་སྐུ་ཞབས་ Sutirtho Patranobis ལགས་ཀྱིས་དཔྱད་རྩོམ་ཞིག་སྤེལ་བའི་ནང་བོད་ནང་གི་བོད་མི་ཚོ་༸གོང་ས་༸སྐྱབས་མགོན་ཆེན་པོ་མཆོག་དྲན་བཞིན་ཡོད་ཀྱང་དངོས་གསལ་དོད་པོའི་སྒོ་ནས་དྲན་ཆོག་གི་མེད་པ་མ་ཟད། ལྷག་པར་དུ་༸སྐུའི་འཁྲུངས་ཉིན་ལའང་དགའ་གུས་ཆེན་པོས་དུས་སྟོན་སྲུང་བརྩི་ཞུ་ཆོག་གི་མེད་པའི་སེམས་ཚོར་ཁག་མངོན་གསལ་གནང་འདུག དེའང་གསར་འགོད་པ་སྐུ་ཞབས་ Sutirtho Patranobis ལགས་ཀྱིས་ཁ་སང་རྒྱལ་ཁབ་ཁག་མི་འདྲ་བ་ ༣༠ ནས་མཁས་པ་དང་གསར་འགོད་པ་བཅས་ཁྱོན་མི་གྲངས་ ༡༣༠ ལྷག་བོད་ཀྱི་རྒྱལ་ས་ལྷ་སར་བསྐྱོད་ཡོད་པ་དང་། ཁུལ་དེར་ཚོགས་པའི་བོད་ཡར་རྒྱས་ཞེས་པའི་ཚོགས་འདུའི་ཐོག་མཉམ་ཞུགས་གནང་སྐབས་འདོན་སྤེལ་གནང་བ་ཞིག་ཡིན་འདུག དེའི་ཐོག་བཅར་བའི་རྒྱ་གར་གྱི་ Hindustan Times གསར་འགོད་པ་ཁག་ཅིག་ནས་ལྷ་སའི་ནང་གི་བོད་མི་མང་ཚོགས་རྣམས་ལ་ཁོང་རྣམས་ནས་ལྷ་ས་གཙོས་བོད་ཀྱི་ས་ཁུལ་ཁག་ཏུ་༸གོང་ས་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་གྱི་ཡོད་མེད་ཐད་བཅར་འདྲི་ཞུས་པར་བོད་མི་གཅིག་མ་གཏོགས་གཞན་ཚང་མའི་གནད་དོན་དེའི་ཐད་ལན་འདེབས་གང་ཡང་མེད་པར་ཁ་ཁུ་སིམ་པོར་བཞུགས་ཡོད་པ་མ་ཟད། དེ་དག་ལས་བོད་མི་གཅིག་གིས་དྲི་བ་དེ་ཐོས་མ་ཐག་རང་ཉིད་ཀྱི་ཞལ་ལ་མཛུབ་མོ་བཞག་ཏེ་གནད་དོན་དེའི་ཐོག་གླེང་སློང་རྩ་བ་ནས་བྱེད་ཆོག་གི་མེད་པའི་རྣམ་འགྱུར་མངོན་བཏོན་གནང་ཡོད་སྐོར་སོགས་འཁོད་འདུག དེ་མཚུངས་སུ་དཔྱད་རྩོམ་དེའི་ནང་ལ་བོད་མི་ཁག་ཅིག་གིས་བོད་ཀྱི་ས་ཁུལ་ཁག་ཏུ་གསང་སྟབས་ཀྱིས་གནང་པ་ལས་ མངོན་གསལ་དོདོ་པོའི་ཐོག་འཁྲུངས་སྐར་སྲུང་བརྩི་ཞུ་ཆོག་གི་མེད་པ་གསལ་བཏོན་གནང་པ་མ་ཟད། རྒྱ་གཞུང་གིས་དམ་དྲག་ཤུགས་ཆེ་རྐྱེན་པས་ཁོང་ནས་ལོ་ལྟར་༸སྐུའི་འཁྲུངས་སྐར་དེ་མངོན་གསལ་དོད་པོ་མེད་པར་རང་ཉིད་ཀྱི་སེམས་ནང་སྲུང་བརྩི་ཞུ་བཞིན་ཡོད་ཅེས་གསར་འགོད་པར་བརྗོད་སྐོར་ཡང་བཀོད་ཡོད་པ་རེད། གང་ལྟར་རྒྱ་གཞུང་གིས་དམ་དྲག་ལ་ལྟོས་མེད་བོད་ཁམས་ལི་ཐང་དང་བྲག་མགོ་གཉིས་ནང་བོད་མི་ཚོས་༸རྒྱལ་བའི་༸ཞབས་བརྟན་བཅས་བགྲང་གསོག་གིས་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་མ་ཟད། འཛམ་གླིང་ས་ཕྱོགས་གང་སར་གནས་པའི་བོད་མི་དང་བོད་དོན་རྒྱབ་སྐྱོར་བ་རྣམས་ནས་༸གོང་ས་མཆོག་གི་བླ་ན་མེད་པའི་བཀའ་དྲིན་རྗེས་སུ་དྲན་པའི་ཐོག་ནས་འཁྲུངས་སྐར་གྱི་དུས་སྟོན་སྲུང་བརྩི་ཞུས་ཡོད་པ་ལྟར། ཡུ་རོབ་གྲོས་ཚོགས་ཀྱི་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Thomas Mann ལགས་ཀྱིས་ཀྱང་༸གོང་ས་མཆོག་དགུང་གྲངས་ ༨༡ ཕེབས་པའི་༸སྐུའི་འཁྲུངས་ལ་འཚམས་འདྲི་དང་སྦྲགས། ༸གང་ཉིད་ཀྱི་དགོངས་གཞི་གྲུབ་པར་ཡོ་རོབ་གྲོས་ཚོགས་ནང་མུ་མཐུད་དཀའ་ལས་རྒྱག་རྒྱུའི་དམ་བཅའ་ཡོད་ཅེས་གསུངས་འདུག སྐུ་ཞབས་ Thomas Mann ལགས་ཀྱིས་བརྙན་འཕྲིན་བརྒྱུད་༸གོང་ས་མཆོག་གི་འཁྲུངས་སྐར་ལ་འཚམས་འདྲི་གནང་པའི་ནང་། ༸གོང་ས་མཆོག་གིས་མི་ཚེའི་ནང་ལ་འཕྲད་བཞིན་པའི་གནས་ཚུལ་ཚང་མར་ཞི་བའི་ཐོག་ནས་གཟིགས་མཁན་གྱི་མིག་དཔེ་བལྟ་ཡུལ་ཞིག་ཡིན་པར་ངོས་བཞེས་ཀྱིས་ཡོ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་མགོན་པོ་༸གང་ཉིད་ཀྱི་དགོངས་གཞི་ཁག་བསྒྲུབ་ཐབས་ཀྱི་ལས་དོན་མུ་མཐུད་སྤེལ་རྒྱུའི་དམ་བཅའ་བཞག་རྒྱུ་ཡིན་ཅེས་དང་། ལྷག་དོན་འདས་པའི་མི་ལོ་བཅོ་ལྔའི་རིང་ཡུ་རོབ་གྲོས་ཚོགས་ནང་༸གང་ཉིད་ཀྱིས་འདོན་གནང་མཛད་པའི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཞུ་མཁན་གྱི་སྒྲིག་འཛུགས་ཤིག་གི་འགོ་ཁྲིད་བྱེད་རྒྱུ་བྱུང་བར་ངོས་ལ་དགའ་སྤོབས་ཆེན་པོ་ཡོད་སྐོར་གསུངས་པ་དང་ཆབས་ཅིག ཡོ་རོབ་གྲོས་ཚོགས་ནང་བོད་དང་འགྲོ་བ་མིའི་ཐོབ་ཐང་གི་གནད་དོན་སྐོར་གོ་སྐབས་ནམ་བྱུང་སྐབས་གླེང་སློང་ཡང་ཡང་བྱས་དང་བྱེད་མུས་ཁར། འདི་ལོའི་བཙན་བྱོལ་བོད་མིའི་འོས་བསྡུའི་སྐབས་ངོས་རང་འཛམ་གླིང་རྒྱལ་ཁབ་གཞན་ནས་ཕེབས་པའི་གྲོས་ཚོགས་འཐུས་མི་རྣམ་པའི་ལྷན་དུ་རྡ་རམ་ས་ལར་འོས་བསྡུའི་ལས་དོན་རྟོག་ཞིབ་དང་མགོན་པོ་༸གང་ཉིད་ཀྱི་ཞལ་མཇལ་ཞུ་རྒྱུ་བྱུང་བར་ཧ་ཅང་དགའ་པོ་བྱུང་ཞེས་སོགས་གསུངས་ཡོད།

བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཁུལ་དུ་ཉིན་གྲངས་བཞིའི་རིང་གི་མཛད་འཆར་ཁག་ལེགས་པར་གྲུབ་རྗེས། དེ་རིང་ཟླ་ ༧ ཚེས་ ༧ ཉིན་གྱི་སྔ་དྲོ་ཚོུད་ ༧ སྟེང་འབྲས་སྤུངས་དགའ་ལྡན་ཕོ་བྲང་ནས་༸སྐུ་འཁོར་ལྷན་རྒྱས་གྷོ་བ་ཕྱོགས་སུ་ཆིབས་ཞལ་སྒྱུར་གནང་སོང་། དེའང་གྷོ་བ་ནས་མཁའ་ལམ་བརྒྱུད་ལྡི་ལི་དང་དེ་ནས་སང་ཚེས་ ༨ ཉིན་ལྡི་ལི་ནས་མཁའ་ལམ་བརྒྱུད་བཞུགས་སྒར་ཕྱོགས་སུ་ཆིབས་སྒྱུར་མཛད་རྒྱུ་རེད་འདུག གཞི་རྩའི་འབྲས་སྤུངས་བླ་སྤྱིའི་ངོས་ནས་ཇི་ལྟར་གསོལ་འདེབས་ཞུས་དོན་ལྟར། ༸གོང་ས་༸སྐྱབས་མགོན་ཆེན་པོ་མཆོག་ཟླ་བ་འདིའི་ཕྱི་ཚེས་ ༡ ཉིན་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནང་འབྲས་སྤུངས་བླ་སྤྱིར་ཞབས་སོར་བདེ་བར་འཁོད་གནང་མཛད་པ་དང་། ཕྱི་ཚེས་ ༢ ནས་དབུ་འཛུགས་ཀྱིས་ཕྱི་ཚེས་ ༥ བར་གདན་ས་སེ་འབྲས་དགའ་གསུམ་གྱི་དགེ་འདུན་པ་གཙོས་པའི་དགེ་འདུན་ཞལ་གྲངས་ ༣༣༣ བསྙེན་རྫོགས་ཀྱི་སྡོམ་པ་འབོག་ཆོག་མཛད་པ་དང་། དེ་བཞིན་༸གང་ཉིད་མཆོག་ནང་པའི་ལྟ་གྲུབ་དང་ཚན་རིག་ཞེས་པའི་བརྗོད་གཞིའི་བགྲོ་གླེང་ཐོག་དབུ་བཞུགས་མཛད་པ་མ་ཟད། ཕྱི་ཚེས་ ༦ ཉིན་༸གོང་ས་མཆོག་འབྲས་སྤུངས་བླ་སྤྱིར་སྔ་ཐོག་དགེ་ལུགས་ཡོངས་དང་མོན་གྷོ་གཞིས་ཆགས་ཀྱི་སེར་སྐྱ་མི་མང་ཀུན་ཐུན་མོང་གིས་༸གང་ཉིད་མཆོག་ལ་༸རྗེས་ཚེ་འཛིན་མའི་བརྟན་བཞུགས་རྒྱས་པ་ཞིག་བསྟར་འབུལ་ཞུས་པ་དང་༸སྐུའི་འཁྲུངས་སྐར་གྱི་མཛད་སྒོར་དབུ་བཞུགས་མཛད་ཡོད། ཤེས་རྟོགས་བྱུང་བར་གཞིགས་ན། ༸གོང་ས་༸སྐྱབས་མགོན་ཆེན་པོ་མཆོག་འདི་ལོ་ཕྱི་ཟླ་ ༡༢ ནང་སླར་མོན་གྷོ་འདོད་རྒུ་གླིང་དུ་ཞབས་སོར་འཁོད་ནས་མཛད་འཆར་ཁག་ཅིག་བསྐྱང་གཏན་འཁེལ་འདུག དེའང་ཕྱི་ཟླ་ ༡༢ ཚེས་ ༡༨ ནས་ ༢༠ བཅས་ཉིན་གྲངས་གསུམ་རིང་འབྲས་སྤུངས་བློ་གསལ་གླིང་དུ་ཚན་རིག་དང་ནང་ཆོས་དབར་གྱི་བགྲོ་གླེང་ཆེན་མོ་འཚོགས་གཏན་ཁེལ་བ་ལྟར་ཚོགས་མགོན་དུ་༸གང་ཉིད་དབུ་བཞུགས་མཛད་རྒྱུ་རེད་འདུག བགྲོ་གླེང་དེའི་གོ་སྒྲིག་གནང་མཁན་ནི་ཨ་རིའི་ཨེ་མོ་རི་དང་བོད་ཀྱི་མཐུན་ཚོགས་དང་རྡ་ས་བོད་ཀྱི་དཔེ་མཛོད་ཁང་། འབྲས་སྤུངས་དགོན་པ་བཅས་ཡིན་པ་དང་། དེ་ནི་ལོ་ལྟར་ཚོགས་བཞིན་པའི་སེམས་དང་སྲོག་གི་ཚན་རིག་བགྲོ་གླེང་དང་མི་འདྲ་བར་དམིགས་བསལ་ནང་པའི་དགེ་འདུན་པ་དང་ནུབ་ཕྱོགས་ཚན་རིག་པ་གཉིས་ཀ་སྡིངས་ཆ་གཅིག་ཐོག་བཞུགས་ནས་ཐོུང་གི་བགྲོ་གླེང་གནང་རྒྱུ་རེད་འདུག གཞན་ཡང་ཕྱི་ཟླ་ ༡༢ ཚེས་ ༢༡ ཉིན་ནི་འཇམ་དབྱངས་ཆོས་རྗེ་བཀྲིས་དཔལ་ལྡན་མཆོག་གིས འབྲས་སྤུངས་དགོན་པ་ཕྱག་བཏབ་ནས་ལོ་ངོ་ ༦༠༠ འཁོར་བའི་དུས་དྲན་གྱི་མཛད་སྒོར་ཇི་ལྟར་གསོལ་འདེབས་ཞུས་པ་ལྟར་༸གང་ཉིད་མཆོག་དབུ་བཞུགས་མཛད་རྒྱུ་རེད་འདུག དེ་རྗེས་ཚེས་༢༣ ཉིན་མོ་སྟེ་དགའ་ལྡན་ལྔ་མཆོད་འཁེལ་གྱི་ཡོད་སྟབས། ༸གོང་ས་མཆོག་༸རྗེ་ཙོང་ཁ་པའི་གདན་ས་དགའ་ལྡན་དུ་ཆིབས་བསྒྱུར་གྱིས་དགའ་ལྡན་ལྔ་མཆོད་སྲུང་བརྩི་མཛད་རྒྱུ་བཅས་ཀྱི་མཛད་འཆར་འདུག

ཨ་རིའི་གྲོང་ཁྱེར་ Ithaca ནང་དུ་སྤྱི་ནོར་༸གོང་ས་༸སྐྱབས་མགོན་ཆེན་མོ་མཆོག་གི་མཚན་གནས་རྗེས་དྲན་གྱི་དཔེ་མཛོད་ཁང་དང་འགྲེམས་སྟོན་ཁང་ཞིག་ཆེད་འཛུགས་གནང་རྒྱུ་རེད་འདུག དེ་ཡང་ Ithaca Journal ཐོག་གནས་ཚུལ་ཐོན་པར་གཞིགས་ན། ད་རེས་ Ithaca གྲོང་ཁྱེར་ནང་ Dalia Lama’s library ཞེས་༸གོང་ས་༸སྐྱབས་མགོན་ཆེན་མོ་མཆོག་གི་མཚན་གནས་རྗེས་དྲན་གྱི་དཔེ་མཛོད་ཁང་དང་འགྲེམས་སྟོན་ཁང་དེ་ཁུལ་དེའི་ནང་རྟེན་གཞི་བྱས་པའི་རྣམ་རྒྱལ་གྲྭ་ཚང་འགན་འཁུར་འོག་ཆེད་འཛུགས་གནང་རྒྱུ་ཡིན་འདུག་པ་དང། དཔེ་མཛོད་ཁང་དེའི་སྒྲོམ་གཞི་དང་ཁྱད་ཆོས་ནི་ཨ་རིའི་སྲིད་འཛིན་གྱི་དཔེ་མཛོད་ཁང་ལྟར། དཔེ་མཛོད་ཁང་དེའི་ནང་ལ་༸གོང་ས་མཆོག་གི་ད་བར་ལྗགས་རྩོམ་མཛད་པའི་ཕྱག་དེབ་དང་ཆོས་འབྲེལ་གྱི་ཕྱག་དཔེ། དེ་བཞིན་བརྙན་མཛོད་དང་གསུང་མཛོད། གཞན་ཡང་༸སྐུ་ཆས་སོགས་ཡོད་པའི་ལྟེ་གནས་ཁང་ཞིག་ཆགས་ཀྱི་འདུག ལྷག་པར་དུ་ཐེངས་འདིའི་ ༸གོང་ས་༸སྐྱབས་མགོན་ཆེན་མོ་མཆོག་གི་མཚན་གནས་རྗེས་དྲན་གྱི་དཔེ་མཛོད་ཁང་དང་འགྲེམས་སྟོན་ཁང་དེ་ལྟ་བུ་ཆེད་འཛུགས་གནང་པའི་དགོས་དམིགས་གཙོ་བོ་ནི་ད་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཡུལ་གྲུ་ཀུན་ལ་བསྐྱངས་གནང་མཛད་པའི་རླབས་ཆེན་གྱི་མཛད་རྗེས་ཁག་སྲུང་སྐྱོབ་ཞུ་རྒྱུའི་ཆེད་ཡིན་པ་རེད་འདུག ད་ལན་ Ithaca གྲོང་ཁྱེར་ནང་༸གོང་ས་༸སྐྱབས་མགོན་ཆེན་མོ་མཆོག་གི་མཚན་གནས་རྗེས་དྲན་གྱི་དཔེ་མཛོད་ཁང་དང་འགྲེམས་སྟོན་ཁང་ཆེད་འཛུགས་གནང་རྒྱུའི་གསལ་བསྒྲགས་དེའང་ཁ་སང་ཚེས་ ༦ སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགུང་གྲངས་ ༨༡ ཕེབས་པའི་༸སྐུའི་འཁྲུངས་སྐར་ཉིན་སྲུང་བརྩི་དང་བསྟུན་ནས་གསལ་བསྒྲགས་གནང་བ་ཞིག་དང། མཛད་སྒོའི་ཐོག Ithaca གྲོང་ཁྱེར་སྤྱི་ཁྱབ་པ་སྐུ་ཞབས་ Svante Myrick ལགས་དང། གཞུང་འབྲེལ་གནད་ཡོད་མི་སྣ་ཁག་ཅིག་སོགས་ཕེབས་འདུག སྐབས་དེར་གྲོང་ཁྱེར་སྤྱི་ཁྱབ་པ་སྐུ་ཞབས་ Svante Myrick ལགས་ཀྱི་ལས་འཆར་འདི་ནི་ད་ལན་ Ithaca གྲོང་ཁྱེར་ལ་གོ་སྐབས་ཧ་ཅང་བཟང་པོ་ཞིག་ཡིན་པ་དང། ང་ཚོའི་ལས་འཆར་འདིའི་ཐོག་ཕྱོགས་གང་ས་ནས་མཐུན་འགྱུར་རོགས་རམ་གང་ཐུབ་ཞུ་རྒྱུ་ཡིན་ཅེས་གསུངས་འདུག ཁོང་གི་ངོ་དེབ་ཐོག་ད་བར་འཛམ་གླིང་ནང་གི་གྲོང་ཁྱེར་མང་པོ་ཞིག་གི་༸གོང་ས་༸སྐྱབས་མགོན་ཆེན་མོ་མཆོག་གི་མཚན་གནས་རྗེས་དྲན་གྱི་དཔེ་མཛོད་ཁང་དང་འགྲེམས་སྟོན་ཁང་ཆེད་འཛུགས་གནང་རྒྱུར་འབོད་སྐུལ་ཞུས་ཡོད་ཀྱང། ད་ལན་Ithaca གྲོང་ཁྱེར་ལ་རྒྱལ་ཁ་ཐོབ་ཡོད་པ་གསུངས་པ་སོགས་གསུངས་འདུག དེ་བཞིན་ལས་འཆར་འདིའི་འགན་འཁུར་མི་སྣ་ཁུལ་དེའི་རྣམ་རྒྱལ་གྲྭ་ཚང་གི་དགེ་བཤེས་བསྟན་འཛིན་ཆོས་བཟང་ལགས་ཀྱིས་ལྟེ་གནས་ཁང་འདིའི་དམིགས་ཡུལ་གཙོ་བོ་ནི། ཚན་རིག་པ་དང་ནང་ཆོས་སློབ་གཉེར་བ་ཕན་ཚུན་མཉམ་གནས་ཡོང་རྒྱུ་དང། ལྷག་པར་དུ་ཆེད་འཛུགས་གནང་རྒྱུའི་༸གོང་ས་༸སྐྱབས་མགོན་ཆེན་མོ་མཆོག་གི་མཚན་གནས་རྗེས་དྲན་གྱི་དཔེ་མཛོད་ཁང་དང་འགྲེམས་སྟོན་ཁང་དེའི་བརྒྱུད་ནས་ནང་པ་སངས་རྒྱས་པའི་ཆོས་དང་ལྟ་གྲུབ་སོགས་ཀྱི་དོ་དབྱིངས་ཡོད་མཁན། མ་འོངས་པར་གཞོན་སྐྱེས་སློབ་གཉེར་བ་དང་ཞིབ་འཇུག་པ། རྩོམ་པ་པོ་བཅས་ལ་ཕན་ཐོགས་ཡོང་སླད་ཡིན་པ་གསུངས་ཡོད་པ་རེད།

ཁ་སང་ཚེས་ ༦ ཉིན་བལ་ཡུལ་གཞུང་ནས་བོད་མི་ཚོར་༸གོང་ས་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་མི་བཅུག་པའི་དམ་དྲག་འོག་འཛིན་བཟུང་བྱས་པའི་བོད་མི་དེ་དག་ཁ་སང་ཕྱི་དྲོ་གློད་གྲོལ་བཏང་འདུག དེའང་བལ་ཡུལ་ནང་ཁ་སང་བལ་ཡུལ་གཞུང་གིས་ཁུལ་དེའི་ནང་གི་བོད་མི་ཚོས་༸གང་ཉིད་ཀྱི་༸སྐུའི་འཁྲུངས་སྐར་སྲུང་བརྩི་ཞུ་བཅུག་མེད་པ་མ་ཟད། མཆོད་འབྱོར་ས་གནས་འགོ་འཛིན་གཙོས་པའི་བོད་མི་ ༢༥ དང་། བལ་ཡུལ་ཡུལ་མི་གསུམ་བཙན་དབང་གིས་འཛིན་བཟུང་བྱས་པའི་གནས་ཚུལ་བྱུང་ཡོད་པ་རེད། དེ་རིང་འདི་ག་རླུང་འཕྲིན་ཁང་ནས།་ཁ་སང་འཛིན་བཟུང་བྱས་པའི་མཆོད་འབྱོར་ས་གནས་འགོ་འཛིན་སྐལ་བཟང་དོན་གྲུབ་ལགས་སུ་ཞལ་པར་བརྒྱུད་ནས་གནས་སྟངས་ཇི་ཆགས་ཐད་བཀའ་འདྲི་ཞུས་པར་ཁོང་གིས་ས་གནས་བལ་ཡུལ་ཉེན་རྟོག་པས་བཀག་དཀྱིལ་ཁང་མི་འདྲ་བ་གསུམ་ནང་རེ་མོས་གནས་སྤོ་བྱེད་བཅུག་འདུག་ཀྱང་། མཐར་ཁ་སང་ཕྱི་དྲོ་ཚོུད་ལྔ་ཙམ་ལ་ཁོང་གཙོས་པའི་བོད་མི་གཞན་རྣམས་གློད་གྲོལ་བཏང་འདུག དེ་བཞིན་བལ་ཡུལ་ས་གནས་གཞོན་ནུ་པ་སངས་ཆུང་བདག་ལགས་ཀྱི་གསུངས་པར་ཉེ་ཆར་རྒྱ་གཞུང་གི་དཔོན་རིག་ཁག་ཅིག་བལ་ཡུལ་ནང་སླེབས་རྗེས་རྒྱ་གཞུང་གིས་གནོན་ཤུགས་འོག བལ་ཡུལ་ནང་སྔར་ལྷག་དམ་དྲག་བྱེད་ཤུགས་ཆེ་རུ་ཕྱི་ན་ཡོད་པ་མ་ཟད། ལོ་རྗེས་མ་ཡང་༸སྐུའི་འཁྲུངས་སྐར་སྲུང་བརྩི་ཞུ་རྒྱུར་ཁག་པོ་ཆགས་རྒྱུའི་ཉེན་ཁ་ཡོད་པ་གསུངས་སོང་། ཁ་སང་བལ་ཡུལ་གཞུང་གིས་བོད་མི་ཚོས་ཁུལ་དེའི་ནང་༸སྐུའི་འཁྲུངས་སྐར་སྲུང་བརྩི་ཞུ་བཅུག་མེད་པ་དང་། བོད་མི་ཁག་ཅིག་འཛིན་བཟུང་བྱས་པའི་གནས་ཚུལ་ཁག་བརྒྱུད་ལམ་ཁག་ཏུ་ཐོན་སྟབས། བོད་མི་ཁག་ཅིག་གིས་བལ་ཡུལ་གཞུང་གི་བྱ་སྤྱོད་ལ་སྐྱོན་བརྗོད་དང་བློ་ཕམ་གྱི་རྣམ་འགྱུར་ཤུགས་ཆེ་སྟོན་མཁན་འདུག་པ་མ་ཟད། བལ་ཡུལ་གཞུང་གིས་རང་ཉིད་ཀྱི་རང་དབང་བློས་གཏོང་བྱས་ཏེ་རྒྱ་གཞུང་གིས་གནོན་ཤུགས་འོག་མགོ་འགུར་བར་ངོས་འཛིན་ཞུ་མཁན་ཡང་འདུག ལྷག་པར་དུ་ད་རེས་ཀྱི་གནད་དོན་དེའི་ཐོག བལ་ཡུལ་ནང་ཡོད་པའི་ Inhured རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས་བལ་ཡུལ་ཉེན་རྟོག་པས་འཛིན་བཟུང་གི་བཀའ་རྒྱ་གང་ཡང་མེད་པར་བོད་མི་རྣམས་གང་བྱུང་འཛིན་བཟུང་བཀག་ཉར་བྱས་པར་སྐྱོན་བརྗོད་ཀྱིས་གསར་འགོད་གསལ་བསྒྲགས་ཤིག་སྤེལ་འདུག དེའི་ནང་བལ་ཡུལ་གཞུང་དང་དེ་བཞིན་འགྲོ་བ་མིའི་ཐོབ་ཐང་གི་གཞི་རྩའི་རྩ་ཁྲིམས་འབྲུ་དོན་ནང་དུ་མི་སྣ་སུ་འདྲ་ཞིག་ཡིན་རུང་། ཆོས་ཕྱོགས་དང་འདུ་འཛོམས་ཀྱི་རང་དབང་ཡོད་པ་གསལ་ཡོད་པ་ལྟར། ད་ལན་བལ་ཡུལ་ཉེན་རྟོག་པས་གཞི་རྩའི་འབྲུ་དོན་དེ་དག་བརྩི་མེད་ཀྱིས་བོད་མིར་གང་བྱུང་འཛིན་བཟུང་བྱས་པ་དེ་ནི་རྒྱལ་སྤྱིའི་ཁྲིམས་དང་འགྲོ་བ་མིའི་ཐོབ་ཐང་གི་རྩ་ཁྲིམས་དང་འགལ་བའི་བྱ་སྤྱོད་ཞིག་རེད་ཅེས་སྐྱོན་བརྗོད་བྱས་པ་དང་སྦྲགས། བལ་ཡུལ་གཞུང་གིས་སླད་མར་བྱ་སྤྱོད་དེའི་རིགས་སྤེལ་རྒྱུ་མེད་པར་ནན་སྐུལ་ཤུགས་ཆེ་བྱས་འདུག

དེ་རིང་ཟླ་ ༧ ཚེས་ ༦ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་འབྲས་སྤུངས་བླ་སྤྱིར་༸གང་ཉིད་མཆོག་ཕྱི་ལུགས་དགུང་གྲངས་ ༨༡ དང་བོད་ལུགས་དགུང་གྲངས་ ༨༢ ཕེབས་པའི་གཞུང་འབྲེལ་གྱི་༸སྐུའི་འཁྲུངས་སྐར་དང་། མོན་གྷོ་འདོད་རྒུ་གླིང་བོད་མིའི་གཞིས་ཆགས་ཚུགས་ནས་ལོ་ངོ་ ༥༠ འཁོར་བའི་དུས་ཆེན་གཉིས་ལྷན་ཅིག་ཏུ་༸གང་ཉིད་མཆོག་དབུ་བཞུགས་ཀྱིས་གཙོས་དེ་སྔོན་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཚུགས་རྒྱུར་མཐུན་གྱུར་དང་རྒྱབ་སྐྱོར་ཤུགས་ཆེ་གནང་མཁན་ཀ་ན་ཊ་ཀ་མངའ་སྡེའི་བློན་ཆེན་འདས་པོ་སྐུ་ཞབས་ནི་ཇ་ལིང་གཱ་པ་མཆོག་གི་བཀྲིན་རྗེས་དྲན་ཞུ་ཕྱིར་ཁོང་གི་སྐུ་ཚ་ཞིག་ཀྱང་གདན་ཞུས་དང་། དམིགས་བསལ་སྐུ་མགྲོན་དུ་ཀར་ན་ཊ་ཀ་མངའ་སྡེའི་བློན་ཆེན་གྱི་ལྕམ་སྐུ་umashreeji མཆོག་དང་རྩ་ཆེའི་ཡུལ་སྐོར་སྤྲོ་འཆམ་བློན་ཆེན་སྐུ་ཞབས་ShriR.V.Dephande མཆོག་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་གསུམ་སོགས་ཕྱི་ནང་གི་སྐུ་མགྲོན་མང་དག་ཞིག་གདན་ཞུས་གནང་པ་མ་ཟད། དེ་བཞིན་བོད་མི་སེར་སྐྱ་མང་ཚོགས་བཅས་སྟོང་ཕྲག་བརྒལ་བ་ལྷན་འཛོམས་ཐོག་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་གནང་ཡོད་པ་རེད་འདུག སྐབས་དེར་ཆེས་ཐོག་མར་འབྲས་སྤུངས་ཁྲི་པ་མཆོག་ནས་གུས་བསུའི་འཚམ་འདྲིའི་གསུང་བཤད་གནང་པ་དང་། འཁྲུངས་སྐར་གྱི་མངར་ཟས་འདེགས་འབུལ་ཞུས་གནང་སོང་བ་དང་། དེ་བཞིན་ཕྱི་ལོ་ ༡༩༦༦ ལོར་མོན་གྷོ་བོད་མིའི་གཞིས་ཆགས་ཚུགས་ནས་ད་བར་ལོ་ངོ་ ༥༠ ཧྲིལ་པོ་འཁོར་བར་མོན་གྷོ་འདོད་རྒུ་གླིང་གི་སེར་སྐྱ་མི་མང་ཚོགས་ཡོངས་ནས་མགོན་པོ་༸གང་ཉིད་མཆོག་ལ་ བཀའ་དྲིན་རྗེས་དྲན་མཚོན་ཕྱིར་དངུལ་ལས་གྲུབ་པའི་ཆོས་ཀྱིི་འཁོར་ལོ་གསར་ཚགས་ཅན་ཞིག་འབུལ་ལམ་ཞུས་ཡོད་པ་རེད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་བའི་ནང་ང་ཚོ་བཙན་བྱོལ་དུ་འགྱར་ཏེ་ལོ་ངོ་ ༥༧ ཕྱིན་ཡོད་པ་དང་དེ་སྔོན་འཛམ་གླིང་ཐོག་བོད་མི་ཟེར་བ་དེ་རྗེས་ལུས་དང་ཡ་མཚན་ཅན་ཞིག་ཏུ་རྩིས་བཞིན་ཡོད་ན་ཡང་། དེང་སྐབས་ང་ཚོས་སྤོབས་པ་བྱེད་འོས་པ་ཞིག་ནི་ད་བར་ང་ཚོས་རྩ་ཆེར་གཅེས་ཉར་བྱས་པའི་སེམས་ཁམས་རིག་པ་དང་འབྲེལ་བའི་ནང་པའི་ལྟ་གྲུབ་ཀྱི་ཤེས་ཡོན་དེས་འཛམ་གླིང་སྤྱི་ལ་ཕན་ཐོགས་བྱེད་པའི་དུས་ལ་སླེབས་ཡོད་སྐོར་བཀའ་སྩལ་དང་སྦྲགས། དེང་སྐབས་ང་ཚོས་འགྲིག་བསྡད་ཡོད་བསམ་ནས་ཆོག་ཞེན་བྱས་ཏེ་ལྷོད་གཡེངས་མ་བཏང་བར་ད་དུང་མུ་མཐུད་ཡར་རྒྱས་དང་འཐུས་ཤོར་མེད་པ་བྱེད་དགོས་པའི་བཀའ་སློབ་བརྩལ་གནང་སོང་།    གཞན་ཡང་སློབ་ཕྲུག་ཚོར་དམིགས་ནས་ཁྱེད་རང་ཚོ་བོད་ཀྱི་ཆོས་དང་རིག་གཞུང་བདག་པོ་རྒྱག་མཁན་ཡིན་པས་ཚང་མས་ཧུར་ཐག་བྱེད་དགོས་པའི་བཀའ་སློབ་བསྩལ་བ་མ་ཟད། ༸གང་ཉིད་མཆོག་ནས་ཁ་ཆེ་དང་ཡེ་ཤུ་ཧིན་དུ་བཅས་ཆོས་ལུགས་ཁག་གསུམ་གྱི་བླ་ཆེན་རྣམ་པ་དང་གཞན་ཡང་རྒྱ་གར་སྐུ་མགྲོན་རྣམས་ལ་༸གོང་ས་མཆོག་གི་ཕྱག་ནས་སྟོན་པའི་༸སྐུ་བརྙན་གྱི་དྲན་རྟེན་ཕྱག་རྟགས་རེ་རེ་གནང་ཡོད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་མཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ནས་བཀའ་སྤྱི་གཉིས་ཀྱི་འཁྲུངས་སྐར་དང་འབྲེལ་བའི་ཡོངས་ཁྱབ་གསུང་འཕྲིན་སྙན་སྒྲོན་གནང་སོང་། བཀའ་ཤག་གི་གསུང་འཕྲིན་དེའི་ནང་། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཚེའི་ནང་བོད་དང་བོད་མིའི་ཆེད་རླབས་ཆེན་གྱི་ཆོས་སྲིད་གཉིས་ཀྱི་མཛད་འཕྲིན་བསྐྱངས་ཁག་ལ་དྲན་གསོ་དང་བཀའ་དྲིན་རྗེས་དྲན་ཞུས་ཡོད་པ་མ་ཟད། སྔ་ལོ་སྲིད་སྤྱི་གཉིིས་ཀྱི་འོས་བསྡུའི་སྐབས་ཆོལ་ཁའི་འཐེན་འཁྱེར་སོགས་ཀྱི་ཐད་༸གོང་ས་མཆོག་གིས་བོད་མི་རྣམས་མཐུན་ལམ་རྡོག་རྩ་གཅིག་སྒྲིལ་དགོས་གལ་ཆེ་བ་སོགས་ཀྱི་ལམ་སྟོན་གནང་ཁག་ལུང་འདྲེན་དང་བཅས་བོད་མི་ཚང་མས་ཆོལ་ཁ་ཆོས་ལུགས་ཀྱི་འཐེན་ཁྱེར་སྤངས་ཏེ་མཐུན་ལམ་རྡོག་རྩ་གཅིག་སྒྲིལ་བྱེད་གལ་ཆེ་བ་སོགས་ཀྱི་གཏམ་བཤད་གནང་ཡོད་པ་རེད། གོང་ཚེས་ཉིན་རྒྱབ་ཏུ་༸གོང་ས་མཆོག་གིས་འབྲས་སྤུངས་བློ་གསལ་གླིང་གི་ཆོས་ར་གསར་པ་དབུ་འབྱེད་རབ་གནས་མཛད་ཡོད་པ་དང་། སང་ཚེས་ ༧ ཉིན་༸གང་ཉིད་མཆོག་གི་སྐུ་འཁོར་ལྷན་རྒྱས་ མོན་གྷོ་བོད་མིའི་གཞིས་ཆགས་ནས་བཞུགས་སྒར་ཕྱོགས་སུ་ཆིབས་ཞལ་བསྒྱུར་གནང་རྒྱུ་རེད་འདུག

དེ་རིང་ཟླ་ ༧ ཚེས་ ༦ ཉིན་གྱི་སྔ་དྲོ་ཚོུད་ ༨ ཐོག་བཞུགས་སྒར་ལྷ་རྒྱལ་རིར་༸སྐུ་ཁམས་དང་མཐུན་པའི་༸སྐུ་རླུང་དར་འཛུགས་གྲུབ་བསྟུན། ཚོུད་ ༡༠ པའི་ཐོག་ཐེག་ཆེན་ཆོས་གླིང་གཙུག་ལག་གི་གསུང་ཆོས་ར་བའི་ནང་འཁྲུངས་སྐར་དུས་ཆེན་གྱི་དམིགས་བསལ་སྐུ་མགྲོན་དུ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་ཇེ་སིངྒ་མཆོག་དང་། བོད་མིའི་སྒྲིག་འཛུགས་ཀྱི་སྲིད་ ཚབ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་དང་བོད་མི་མང་སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་སོགས་མང་གཙོ་ཀ་བ་གསུམ་གྱི་མཛད་གཙོ་ཁག་ཅིག་དང་། དེ་བཞིན་ས་གནས་ཀྱི་སེར་སྐྱ་རྒན་གཞོན་བཅས་མང་ཚོགས་རྣམས་ཚང་འཛོམས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༡ ཕེབས་པའི་༸སྐུའི་འཁྲུངས་སྐར་བརྩི་གཟབ་རྒྱས་ཞུས་ཡོད། བོད་མིའི་སྒྲིག་འཛུགས་ཀྱི་སྲིད་ཚབ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་དང་བོད་མི་མང་སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་རྣམ་གཉིས་ནས་བཀའ་སྤྱི་གཉིས་ཀྱི་གསུང་འཕྲིན་སྒྲོག་གནང་པ་དང་འབྲེལ། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཚེའི་ནང་བོད་དང་བོད་མིའི་ཆེད་རླབས་ཆེན་གྱི་ཆོས་སྲིད་གཉིས་ཀྱི་མཛད་འཕྲིན་བསྐྱངས་ཁག་ལ་དྲན་གསོ་དང་བཀའ་དྲིན་རྗེས་དྲན་ཞུས་ཡོད་པ་མ་ཟད། སྔ་ལོ་སྲིད་སྤྱི་གཉིིས་ཀྱི་འོས་བསྡུའི་སྐབས་ཆོལ་ཁའི་འཐེན་འཁྱེར་སོགས་ཀྱི་ཐད་༸གོང་ས་མཆོག་གིས་བོད་མི་རྣམས་མཐུན་ལམ་རྡོག་རྩ་གཅིག་སྒྲིལ་དགོས་གལ་ཆེ་བ་སོགས་ཀྱི་ལམ་སྟོན་གནང་ཁག་ལུང་འདྲེན་དང་བཅས་བོད་མི་ཚང་མས་ཆོལ་ཁ་ཆོས་ལུགས་ཀྱི་འཐེན་ཁྱེར་སྤངས་ཏེ་མཐུན་ལམ་རྡོག་རྩ་གཅིག་སྒྲིལ་བྱེད་གལ་ཆེ་བ་སོགས་ཀྱི་གཏམ་བཤད་གནང་ཡོད་པ་རེད།

དེ་རིང་ཟླ་ ༧ ཕྱི་ཚེས་ ༦ ཉིན་གྱི་སྔ་དྲོ་ཚོུད་ ༨།༠༠ སྟེང་མོན་གྷོ་འབྲས་སྤུངས་བླ་སྤྱིའི་གཙུག་ལག་ཁང་དུ་དགེ་ལུགས་ཡོངས་དང་མོན་གྷོ་འདོད་རྒུ་གླིང་གི་སེར་སྐྱ་མི་མང་ཐོུང་གིས་༸རྒྱལ་བའི་༸སྐུའི་འཁྲུངས་སྐར་དང་བསྟུན་ཏེ་༸གོང་ས་༸སྐྱབས་མགོན་ཆེནེ་པོ་མཆོག་ལ་༸རྗེ་ཚེ་འཛིན་མའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་གནང་སོང་། དེའང་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་གི་ཆོས་རྗེ་རྣམ་གཉིས། འབྲས་སྤུངས་ཁྲི་པ་བཅས་ནས་སྤོས་སྣེ་དང་བཅས་མགོན་པོ་༸གང་ཉིད་མཆོག་འབྲས་སྤུངས་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གཟིམ་ཆུང་ནས་འབྲས་སྤུངས་ཚོགས་ཆེན་འདུ་ཁང་དུ་གདན་འདྲེན་ཞུས་ཏེ་བཞུགས་ཁྲིར་༸ཞབས་སོར་འཁོད་མཚམས་བརྟན་བཞུགས་ཀྱི་རྡོ་རྗེ་སློབ་དཔོན་དགའ་ལྡན་ཁྲི་པ་མཆོག་ནས་མཇལ་དར་ཕུལ་གནང་རྗེས། ༸རྒྱལ་བའི་འཁྲུངས་རབས་གསོལ་འདེབས་པཎ་གྲུབ་ ༡༧ གསོལ་འདེབས་སོགས་གསུང་འདོན་དང་རྟེན་འབྲེལ་གྱི་གསོལ་ཇ་འབྲས་སིལ་འདེགས་འབུལ་གནང་སོང་། བརྟན་བཞུགས་དངོས་གཞིའི་སྐབས་རྡོ་རྗེ་སློབ་དཔོན་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་ནས་མཎྜལ་ལྗགས་བཤད་གནང་པ་དང་། གཞུང་འབྲེལ་སྲུང་མ་གནས་ཆུང་ཆོས་རྒྱལ་ཆེན་པོ་མཆོག་སྤྱན་འདྲེན་ཞུས་ཡོད་པ་རེད། སྐབས་དེར་༸གོང་ས་མཆོག་གིས་བཀའ་སློབ་སྩལ་བའི་ནང་ཐེངས་འདིའི་བརྟན་བཞུགས་འདི་ནི་སྔར་གྱི་ལམ་ལུགས་སྲོལ་ཙམ་མིན་པར་གཉན་འཕྲང་ཅན་གྱི་དུས་སྐབས་འདིར་ལྷག་བསམ་དང་མོས་གུས་གདུང་ཤུགས་དྲག་པོས་ཕུལ་བ་ཞིག་ཆགས་ཡོད་སྟབས། བདེན་པའི་ནུས་པ་ཞིག་གཏན་གཏན་ཡོད་པ་ཙམ་དུ་མ་ཟད། ལྷག་དོན་བསྟན་སྲུང་དམར་ནག་གཉིས་གཙོ་བོར་གྱུར་བའི་དཀར་ཕྱོགས་སྐྱོང་བའི་སྲུང་མ་ཚོས་ཀྱང་གྲོགས་དང་འཕྲིན་ལས་མཛད་བཞིན་ཡོད་སྐོར་བཀའ་བསྩལ་སོང་། ༸གོང་ས་མཆོག་གིས་༸གང་ཉིད་དགུང་ལོ་ ༡༡༣ བར་བཞུགས་ཐུབ་རྒྱུར་ལྷ་དང་བླ་མའི་ལུང་བསྟན་དང་གཟིམ་ལམ་སོགས་མང་པོ་ཞིག་ནས་རྟགས་མཚན་དུ་མ་བྱུང་ཡོད་སྐོར་དང་། མགོན་པོ་མཆོག་གིས་ཀྱང་རྒྱུན་དུ་༸སྐུ་ཚེ་ཡུན་དུ་འཚོ་བཞེས་ཐུབ་ཏེ་འགྲོ་དོན་རྒྱ་ཆེ་མཛད་ཐུབ་པའི་ཐུགས་སྨོན་གནང་བཞིིན་ཡོད་པ་བཀའ་བསྩལ་གནང་པ་དང་ཆབས་ཅིག ལྷག་དོན་༸གོང་ས་མཆོག་དགུང་ལོ་ ༡༡༣ བར་བཞུགས་ཐུབ་མིན་གཙོ་བོ་ནི་རྒྱུ་རྐྱེན་གྱི་རྟེན་འབྲེལ་མང་པོ་ཞིག་ལ་ལྟོོས་དགོས་པས་ཆོས་ཕྱོགས་ནས་བླ་སློབ་ཀྱི་དམ་ཚིག་དེ་གལ་ཆེན་པོ་ཡིན་སྟབས། བླ་མའི་༸སྐུ་ཚེ་སྲིང་མིན་གལ་ཆེ་ཤོས་ནི་དད་པ་དང་དམ་ཚིག་གཙང་མ་དགོས་པ་དེ་རེད་ཅེས་བཀའ་བསྩལ་མཛད་ཡོད་པ་རེད། གཞན་ཡང་ཤར་པ་ཆོས་རྗེ་རིན་པོ་ཆེ་མཆོག་ནས་གཏང་རག་གི་མཎྜལ་འདེགས་འབུལ་དང་ས་གནས་གཞིས་འགོ་ནས་མཎྜལ་རྟེན་གསུམ་འདེགས་འབུལ་ཞུས་པ་དང་འབྲེལ་དགེ་ལུགས་ཡོངས་ཀྱི་༸རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གི་ཚོགས་མིི་རྣམས་དང་ས་གནས་ཀྱི་འཐུས་མི་གསུམ་བཅས་ལ་མཇལ་ཁ་གནང་ནས་བརྟན་བཞུགས་ཀྱི་མཛད་སྒོ་མཇུག་སྒྲིལ་གནང་སོང་།

དེ་རིང་བལ་ཡུལ་གཞུང་ནས་ཁུལ་དེའི་ནང་གི་བོད་མི་ཚོར་༸གོང་ས་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་བཅུག་མེད་པ་མ་ཟད། མཆོད་འབྱོར་ས་གནས་འགོ་འཛིན་ཡང་ཉེན་རྟོག་པསའཛིན་བཟུང་བྱས་འདུག དེའང་དེ་རིང་བཙན་བྱོལ་ནང་གི་བོད་མིའི་གཞིས་སྡོད་གང་སར་བྱེད་སྒོ་འདྲ་མིན་བརྒྱུད་ནས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༡ ཕེབས་པའི་༸སྐུའི་འཁྲུངས་སྐར་དུས་ཆེན་ལ་དགའ་དད་སྤྲོ་གསུམ་གྱིས་དགའ་སྐྱིད་དཔལ་ལ་རོལ་བཞིན་སྲུང་བརྩི་ཞུ་བཞིན་ཡོད་ཀྱང་། བལ་ཡུལ་ནང་དེ་རིང་བལ་ཡུལ་གཞུང་གིས་ཁུལ་དེའི་ནང་གི་བོད་མི་ཚོར་༸གང་ཉིད་ཀྱི་༸སྐུའི་འཁྲུངས་སྐར་སྲུང་བརྩི་ཞུ་བཅུག་མི་འདུག བལ་ཡུལ་གྱི་ཉེན་རྟོག་པས་འཁྲུངས་སྐར་གྱི་མཛད་སྒོ་མ་འཚོགས་གོང་ནས་ཁུལ་དེའི་མཆོད་འབྱོར་ས་གནས་འགོ་འཛིན་སྐལ་བཟང་དོན་གྲུབ་ལགས་བཙན་འཁྲིད་ཀྱིས་འཛིན་བཟུང་བྱས་པ་མ་ཟད། ས་གནས་ཀྱི་བོད་མི་ཚོར་༸གང་ཉིད་ཀྱི་༸སྐུའི་འཁྲུངས་སྐར་སྲུང་བརྩིའི་མཛད་སྒོ་མཚམས་འཇོག་དགོས་པའི་བཀོད་ཁྱབ་བཏང་དགོས་པའི་གནོན་ཤུགས་སྤྲད་ཡོད་པ་རེད། ད་ལྟའི་ཆར་འཁྲུངས་སྐར་གྱི་མཛད་སྒོ་ཚོགས་ཡུལ་སྲོང་བཙན་སློབ་གྲྭའི་མཐའ་འཁོར་དུ་བལ་ཡུལ་ས་གནས་ཉེན་རྟོག་པ་འཕོན་ཆེ་འགྲེམས་འཇོག་གིས་བོད་མི་ཚོ་སློབ་གྲྭའི་ར་བའི་ནང་བཀག་དཀྱིལ་བྱས་འདུག རྩ་བའི་ད་ལྟའི་ཆར་བལ་ཡུལ་ནང་བོད་མི་ ༡༢༠༠༠ ལྷག་ཡོད་པ་དང་རྒྱ་གཞུང་གི་གནོན་ཤུགས་འོག་བོད་མི་དེ་དག་ལ་རྒྱལ་ཁབ་དེའི་ནང་གནས་སྡོད་ཆོག་པའི་ཡིག་ཆ་རག་རྒྱུར་ངལ་བ་ཤུགས་ཆེ་འཕྲད་བཞིན་ཡོད་པ་མ་ཟད། ས་གནས་སུ་རྒྱུན་དུ་བོད་མི་ཚོ་བོད་དོན་དང་འབྲེལ་བའི་ལས་འགུལ་དང། ༸གོང་ས་མཆོག་གི་སྐུའི་འཁྲུངས་སྐར་སོགས་སྲུང་རྩི་ཞུ་རྒྱུར་དམ་དྲག་བྱེད་བཞིན་ཡོད་པ་རེད།