བཙན་བྱོལ།

༸ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་ཟླ་བ་གོང་མའི་ཚེས་ ༢༠ ནས་ཟླ་བ་འདིའི་ཚེས་ ༡༩ བར་ཡོ་རོབ་ཁུལ་དུ་ཆོས་འབྲེལ་མཛད་རྒྱུའི་ཆིབས་བསྒྱུར་བསྐྱངས་ཡོད་པ་ལྟར། ཚེས་ ༡༧ ཉིན་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་ མཆོག་ཕ་རན་སིའི་རྒྱལ་ས་པེ་རིས་ནང་ཞབས་སོར་བདེ་བར་འཁོད་ཡོད་པ་དང་། རིན་པོ་ཆེ་མཆོག་གིས་རིག་པ་ཆོས་ཚོགས་ཀྱི་ཚོགས་ཁང་དུ་བོད་མི་རྣམས་ནང་ཁུལ་མཐུན་སྒྲིལ་དམ་ཚིག་གཙང་མ་གནང་དགོས་གལ་ཡིན་པ་ལམ་སྟོན་གནང་འདུགཟླ་བ་འདིའི་ཕྱི་ཚེས་ ༡༨ ཉིན་གྱི་ཕྱི་དྲོ་ཆུ་ཚོད་ ༥ ཐོག་༸སྐྱབས་རྗེ་རྒྱལ་བ་སྨན་རི་ཁྲི་འཛིན་ ༣༤ མཆོག་ཕ་རན་སི་བོད་རིགས་ཚོགས་པའི་རིག་པ་ཆོས་ཚོགས་ཀྱི་ཚོགས་ཁང་དུ་གདན་ཞུས་ཀྱིས་སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ཕ་རན་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་འཛིན་སྤེན་པ་ལགས་རྣམ་གཉིས་ཀྱིས་མཎྡལ་རྟེན་གསུམ་འདེགས་འབུལ་ཞུས་རྗེས་རིན་པོ་ཆེ་མཆོག་གིས་ཁུལ་དེར་གནས་སྡོད་བོད་རིགས་རྣམས་ལ་གཡུང་དྲུན་བོན་གྱི་བྱུང་རིམ་དང་། དར་རྒུད། གཡུང་དྲུང་བོན་གྱི་ལྟ་གྲུབ་གཙོ་བོ་ནི་གཞི་ལམ་འབྲས་གསུམ་དང་། བོན་བློ་རབ་འབྲིང་ཐ་གསུམ་སོགས་ཡིན་སྐོར། དེ་བཞིན་རྒྱལ་བ་སྨན་རི་བའི་ཁྲི་འཛིན་བསྐོ་གཞན་གནང་ཕྱོགས་སོགས་ཀྱི་སྐོར་གསུངས་པ་མ་ཟད། ལྷག་པར་དུ་རིན་པོ་ཆེ་མཆོག་གིས་བཙན་བྱོལ་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་གཡུང་དྲུང་བོན་གྱི་བསྟན་པ་ཉམས་པ་སླར་གསོ་དང་འཛིན་སྐྱོང་སྤེལ་གསུམ་འཐུས་སྒོ་ཚང་བ་ཞིག་གནང་ཐུབ་པ་བྱུང་ཡོད་སྐོར་ངོ་སྤྲོད་གནང་འདུག༸ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་མཆོག་གིས་ད་དུང་བཙན་བྱོལ་དུ་བཞུགས་པའི་བོད་མི་ནང་ཁུལ་དབར་མགོན་པོ་༸གང་ཉིད་མཆོག་གི་བཀའ་དགོངས་བཞིན་མཐུན་སྒྲིལ་དམ་ཚིག་གཙང་མ་གནང་དགོས་གལ་ཡིན་པ་ལམ་སྟོན་བཀའ་སློབ་གནང་བ་དང་ཆབས་ཅིག བཀའ་སློབ་གནང་གྲུབ་མཚམས་སུ་སྐབས་དེར་ཆེད་བཅར་ཞུས་པའི་དད་ལྡན་མང་ཚོགས་དག་ལ་རྩ་རླུང་སྒོམ་སྒྲུབ་ཀྱི་བཀའ་ཆོས་གནང་འདུགརྩ་བའི་ཕ་རན་སི་བོད་རིགས་ཚོགས་པའི་ཚོགས་གཙོ་ལགས་ནས་༸སྐྱབས་རྗེ་རྒྱལ་བ་སྨན་རི་ཁྲི་འཛིན་ ༣༤ མཆོག་ཆིབས་བསྒྱུར་གནང་བར་བཀའ་དྲིན་ཆེ་ཞུ་དང་ཐུགས་རྗེ་ལེགས་གསོལ་གྱི་གཏམ་བཤད་གནང་བ་དང་རིན་པོ་ཆེ་མཆོག་གིས་དབུས་སྐུ་མགྲོན་རྣམས་ལ་དགོང་མོའི་གསོལ་ཚིགས་འདེགས་འབུལ་ཞུས་འདུགཕྱི་ཚེས་ ༡༩ ཉིན་༸སྐྱབས་རྗེ་རིན་པོ་ཆེ་མཆོག་ཕ་རན་སིའི་རྒྱལ་སྤྱིའི་གནམ་ཐང་ནས་མཁའ་ལམ་བརྒྱུད་ཨ་རིའི་རྒྱལ་ས་ཝ་ཤིན་ཊོན་རྒྱལ་སྤྱིའི་གནམ་ཐང་དུ་ཞབས་སོར་བདེ་བར་འཁོད་ཡོད་པ་དང་། སྐབས་དེར་རྒྱལ་སྤྱིའི་ལིག་མི་རྐྱའི་བོན་ཚོགས་ཀྱི་དབུ་བླ་བླ་མ་བསྟན་འཛིན་དབང་རྒྱལ་གཙོས་རྒྱུན་ལས་ཁག་དང་ས་གནས་དེ་གར་ཡོད་པའི་དད་ལྡན་བོན་འབངས་རྣམས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་རེད།   གཞི་རྩའི་༸ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་ནི་ཕྱི་ལོ་ ༢༠༡༨ ཟླ་ ༢ ཚེས་ ༢༠ ཉིན་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་སིར་མོར་རྫོང་དུ་ཆགས་པའི་བོན་གྱི་གདན་ས་ཆེན་པོ་དཔལ་གཤེན་བསྟན་སྨན་རིའི་གླིང་དུ་༸རྒྱལ་བ་མཉམ་མེད་ཆེན་པོའི་འཁྲུངས་མཆོད་དུས་ཚེས་དང་བསྟུན་༸ཞྭ་དཀར་བསྟན་པའི་གཙུག་རྒྱན་སྨན་རིའི་ཁྲི་འཛིན་ ༣༤ པའི་ཁྲི་གསོལ་མཛད་སྒོ་གཟབ་རྒྱས་གནང་ཡོད་པ་དང་། དེ་རྗེས་༸ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་༸རྒྱལ་བ་སྨན་རིའི་ཁྲི་རབས་ ༣༣ པ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་དགོངས་པ་བོན་དབྱིངས་སུ་ཐིམ་ནས་ལོ་གཅིག་འཁོར་བའི་དུས་ཚིགས་དང་བསྟུན་ནས་དངོས་སུ་ཁྲི་འདོན་མཛད་སྒོ་འཚོགས་ཡོད་པ་ལྟར། ༸སྐྱབས་རྗེ་རྒྱལ་བ་སྨན་རི་བ་མཆོག་ཟླ་ ༥ ཚེས་ ༢༠ ནས་ཟླ་ ༦ ཚེས་ ༡༩ བར་ཡོ་རོབ་ཁུལ་དུ་ཆིབས་སྒྱུར་ཆེས་ཐོག་མ་དེ་བསྐྱངས་ཡོད།

དེ་རིང་ཚེས་ ༡༩ ཉིན་གྱི་སྔ་དྲོ་ཚོུད་ ༡༠ ཙམ་ལ་བཞུགས་སྒར་༸རྒྱལ་བའི་ཕོ་བྲང་དུ་༸གོང་ས་མཆོག་གིས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༧ ཐོག་བཅར་བའི་དབུས་རྒྱུན་ལས་གསར་རྙིང་གཉིས་གཙོ་གྱུར་ཚོགས་ཞུགས་པ་ ༡༠༠ ལྷག་ལ་མཇལ་ཁ་དང་ལོ་རྒྱུས་ཀྱི་ཐོག་ནས་བོད་དེ་རང་དབང་རང་བཙན་གྱི་རྒྱལ་ཁབ་ཅིག་ཡིན་པ་ཁུངས་སྐྱེལ་གནང་རྒྱུ་གལ་ཆེན་པོ་ཡིན་པའི་བཀའ་བསྩལ་འདུགམགོན་པོ་༸གང་ཉིད་མཆོག་གིས་གཙོ་བོ་བོད་ཀྱི་ནང་པའི་བསྟན་པ་རིན་པོ་ཆེ་དེ་གལ་ཆེན་ཡིན་པ་བཞིན་བོད་ཀྱི་ཆོས་རིག་འཛིན་སྐྱོང་སྤེལ་གསུམ་གནང་རྒྱུར་ཚང་མས་ཕྱར་བ་གྲུ་འདེགས་ཀྱི་སྒོ་ནས་གནང་དགོས་གལ་ཡིན་པའི་ལམ་སྟོན་བཀའ་སློབ་བསྩལ་ཏེ་དབུས་བོད་མིའི་སྒྲིག་འཛུགས་ཀྱི་བཞེངས་ཕྱོགས་དེ་དབུ་མིའི་ལམ་ཡིན་ཀྱང་། རྒྱ་ནག་ལ་ལོ་རྒྱུས་ཀྱི་ཐོག་བོད་དེ་རང་དབང་རང་བཙན་གྱི་རྒྱལ་ཁབ་ཅིག་ཡིན་པ་དེ་ཁུངས་སྐྱེལ་གནང་རྒྱུ་གལ་ཆེན་པོ་ཡིན་པར་བཀའ་སློབ་བཀྲིན་ཆེ་བ་བསྩལ་འདུགམཇལ་ཁ་གྲུབ་མཚམས་སུ་སྐབས་ ༡༧ པའི་དབུས་གཞོན་ནུའི་ཚོགས་གཙོ་མགོན་པོ་དོན་གྲུབ་ལགས་ཀྱིས་གསར་འགོད་པར་ཁོང་ཚོགས་གཙོར་འཁོད་མ་ཐག་ནས་༸གོང་ས་མཆོག་གི་གསེར་ཞལ་མཇལ་རྒྱུ་བྱུང་བ་ནི་མ་འོངས་པའི་ལས་དོན་བྱེད་ཕྱོགས་ཀྱི་སྐོར་ནས་རྟེན་འབྲེལ་བཟང་པོ་ཞིག་ཡིན་པའི་ངེས་ཤེས་རྙེད་ཡོད་སྐོར་དང་འབྲེལ་ནས་མགོན་པོ་༸གང་ཉིད་མཆོག་གིས་གཞིས་ལུས་བོད་མི་ཚོར་ཆོད་སེམས་བརྟན་ཞིང་ཞུམ་པ་མེད་པའི་སྙིང་སྟོབས་ཡོད་པ་ལ་མིག་དཔེ་ཞུས་པའི་ཐོག་ནས་བྱེས་ཀྱི་གཞོན་སྐྱེས་ཚོས་བོད་ཀྱི་རྩ་དོན་ཐོག་ལ་ཤུགས་སྣོན་རྒྱག་དགོས་གལ་ཡིན་པའི་བཀའ་མངགས་མཛད་ཡོད་པ་གསུངས་སོང་།དེ་བཞིན་ཚོགས་འདུར་ཕེབས་པའི་དགུང་ལོ་ ༨༠ སོན་པའི་སྤོ་པ་སངས་ཚེ་དབང་ལགས་སུ་དེ་རིང་༸གོང་ས་མཆོག་གི་ཞལ་མཇལ་ཞུ་སྐབས་མགོན་པོ་༸གང་ཉིད་མཆོག་གིས་བོད་ཀྱི་གཞོན་ནུ་ལྷན་ཚོགས་ལ་ཐུགས་བརྩེ་བ་ཆེན་པོའི་སྒོ་ནས་ལམ་སྟོན་མཛད་ཡོད་སྐོར་གསུངས་ཡོད།དབུས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་ཀྱིས་༸སྐུ་མདུན་གྱིས་ཆུ་ཚོད་གཅིག་དང་ཕྱེད་ཀ་ལྷག་གི་རིང་བཀའ་སློབ་བསྩལ་ནས་བོད་ཀྱི་ཆབ་དཔལ་རིག་གསུམ་གཙོ་གྱུར་འཐབ་རྩོད་ཐོག་ཧུར་བརྩོན་གནང་དགོས་པའི་ལམ་སྟོན་བཀའ་ནན་ཕེབས་པར་བརྟེན་ཁོང་ཉིད་ཀྱིས་རང་གི་ལས་ཡུན་རིང་ལ་ཆོད་སེམས་བརྟན་པོས་ལས་དོན་ཞུ་སྒོ་ཀུན་ལ་འབད་བརྩོན་རྒྱུར་སེམས་ཤུགས་འཕར་མ་བྱུང་ཞེས་གསུངས་ཡོད།རྩ་བའི་ཟླ་འདིའི་ཚེས་ ༡༡ ཉིན་བཞུགས་སྒར་དྷ་ཤོད་མུ་ནིས་པཱལ་ཚོགས་ཁང་དུ་བོད་ཀྱི་གཞོན་ལྷན་ཚོགས་ཀྱི་ཚོགས་ཆེན་ཐེངས་ ༡༧ པ་ཚོགས་ནས་ཚེས་ ༡༦ ཉིན་ཚོགས་ཆེན་ཉིན་མཐའ་མའི་ཐོག་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དབུས་རྒྱུན་ལས་ཁང་གི་སྐབས་ ༡༧ པའི་རྒྱུན་ལས་གསར་འདེམས་གནང་ཡོད་པ་ལྟར། དེ་རིང་བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་གསར་རྙིང་གཉིས་ཀྱིས་གཙོས་པའི་ཚོགས་ཞུགས་པ་ཡོངས་ལ་མགོན་པོ་༸གང་ཉིད་མཆོག་གི་མཇལ་ཁ་དང་ལམ་སྟོན་བཀའ་སློབ་ཞུས་ཡོད་པ་རེད། ༸སྐུ་པར་༸དཔལ་ལྡན་དགའ་ལྡན་ཕོ་བྲང་ཡིག་ཚང་།

ཕྱི་ལོ་ ༢༠༡༩ ལོའི་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་འདུ་དང་པོ་ཁ་སང་ཕྱི་ཚེས་ ༡༧ ཉིན་རྒྱབ་སུད་སི་རྒྱལ་ས་ Bern དུ་རྟེན་གཞི་བྱས་པའི་སུད་སི་གྲོས་ཚོགས་ཀྱི་ཚོགས་ཁང་ནང་ཚོགས་འདུག ཟླ་ ༦ ཚེས་ ༣ ནས་ ༢༡ བར་སུད་སི་དབྱར་དུས་གྲོས་ཚོགས་འཚོགས་བཞིན་ཡོད་པ་དང་བསྟུན་ཁ་སང་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་འདུ་དེ་སུད་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་ Maya Graf མཆོག་གིས་གཙོ་སྐྱོང་གནང་འདུག སྐབས་དེར་ཚོགས་འདུའི་ཐོག་གཙོ་བོ་ཚོགས་དུས་སྔོན་མའི་ལས་དོན་ཁག་ལ་བསྐྱར་ཞིབ་དང་ཉེ་ཆར་འཇུག་སྒྲིལ་ཟིན་པའི་རྒྱལ་སྤྱིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཐེངས་ ༧ པ་ཐོག་བཞག་པའི་གྲོས་ཆོད་ཁག་ལ་གྲོས་བསྡུར་དང་དེ་འབྲེལ་མ་འོངས་ལས་དོན་གནང་ཕྱོགས། བོད་དོན་དང་འབྲེལ་བའི་ནང་མོལ་གྱི་གནད་དོན་ཁག་གཅིག དེ་བཞིན་སུད་སི་གྲོས་ཚོགས་ནང་གཉིས་སྨན་དབུ་མའི་ལམ་གྱི་སྲིད་བྱུས་སྐོར་གླེང་སློང་གནང་ཕྱོགས་སོགས་ཀྱི་ཐོག་གྲོས་བསྡུར་གནང་འདུག ཚོགས་འདུའི་ཐོག་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་ Maya Graf མཆོག་གིས་གཙོས་པའི་གྲོས་ཚོགས་འཐུས་མི་ལྕམ་ Barbara Gysi ལགས་དང་སྐུ་ཞབས་ Claude Begle ལགས། སྐུ་ཞབས་ Nik Gugger ལགས། སྐུ་ཞབས་ Martin Naef ལགས། ལྕམ་ Martina Munz ལགས། ལྕམ་ Prisca Birrer Hemio ལགས། ལྕམ་ Claudia Friedl ལགས། གཞན་ཡང་ཡོ་རོབ་སྤྱི་འཐུས་ཟམ་མདོ་བྱམས་པ་ཚེ་རིང་ལགས་དང་སུད་སུ་སྐུ་ཚབ་དོན་གཅོད་འཆི་མེད་རིན་འཛིན་ལགས། སུད་བོད་མཐུན་ཚོགས་ཀྱི་ཚོགས་གཙོ་ Thomas ལགས། ཚོགས་གཞོན་ལྷ་དབང་ལགས་བཅས་ཕེབས་འདུག རྩ་བའི་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་དེ་ལོ་ལྟར་ལོ་གཅིག་ནང་ཐེངས་གཉིས་ཚོགས་གནང་གི་ཡོད་པ་རེད། ད་ལྟའི་ཆར་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ནང་སུད་སི་ཆབ་སྲིད་ཚོགས་པ་འདྲ་མིན་ནས་གྲོས་ཚོགས་འཐུས་མི་གྲངས་ ༣༣ ཡོད་པ་རེད།

ཟླ་བ་འདིའི་ཚེས་ ༡༥ ཉིན་བཞུགས་སྒར་བོད་མིའི་སྒྲིག་འཛུགས་ཀྱི་ཚོགས་ཁང་གསར་པའི་ནང་དུ་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པ་དབུ་འཛུགས་གནང་ཡོད་པ་ལྟར། ཁ་སང་ཚོགས་ཆེན་ཉིན་མཐའ་མ་འམ་མཇུག་སྒྲིལ་ཐོག་རྒྱ་གར་དབུས་གཞུང་ནས་༸གོང་ས་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པ་དང་དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་བོད་མིའི་སྒྲིག་འཛུགས་ཀྱི་སྐུ་ཚབ་དང་ལྷན་དུ་རྒྱ་གཞུང་ནས་བོད་རྒྱ་འབྲེལ་མོལ་གནང་དགོས་པའི་གསལ་བསྒྲགས་སྤེལ་གནང་སོང་།ཐེངས་འདིའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པའི་ཐོག་རྒྱ་གར་གྱི་མངའ་སྡེ་ཁག་ ༢༡ ནས་བོད་དོན་རྒྱབ་སྐྱོར་བ་ཁྱོན་མི་གྲངས་ ༢༡༦ ཕེབས་པ་རྣམས་ཀྱིས་ཁ་སང་ཉིན་རྒྱབ་ཏུ་ཚོགས་ཆེན་མཇུག་སྒྲིལ་དང་འབྲེལ་ཏེ་རྒྱ་གར་དབུས་གཞུང་ནས་༸གོང་ས་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པ་དང་དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་བོད་མིའི་སྒྲིག་འཛུགས་ཀྱི་སྐུ་ཚབ་དང་ལྷན་དུ་རྒྱ་གཞུང་ནས་བོད་རྒྱ་འབྲེལ་མོལ་གནང་དགོས་པའི་རེ་སྐུལ། བོད་མིའི་སྒྲིག་འཛུགས་དེ་བོད་གཞིས་བྱེས་གཉིས་ཀྱི་བོད་མིའི་ངོ་བོ་མཚོན་པའི་ཁྲིམས་མཐུན་གྱི་སྒྲིག་འཛུགས་ཤིག་ཡིན་པ་དང་། བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་ལ་རྒྱབ་སྐྱོར་ཡོད་སྐོར་འགྲེལ་བརྗོད་གནང་བ་མ་ཟད། རྒྱ་ནག་གཞུང་ལ་བོད་ནང་ལ་དྲག་གནོན་གྱི་བྱ་སྤྱོད་རིགས་ཡོངས་རྫོགས་མཚམས་འཇོག་བྱེད་དགོས་པ་དང་བོད་ཀྱི་ཁོར་ཡུག་གཏོར་བཤིག་དང་འབྲེལ་བའི་ལས་དོན་ཀུན་མཚམས་འཇོག་དགོས་པ། རྒྱལ་སྤྱིའི་ཚོགས་སྡེ་ཁག་ནས་བོད་མིའི་སྒྲིག་འཛུགས་ལ་རྒྱབ་སྐྱོར་གནང་ཐོག་བོད་ཀྱི་གནད་དོན་དེ་ཞི་བའི་ཐོག་ནས་སེལ་ཐབས་ལ་རྒྱབ་སྐྱོར་གནང་དགོས་པ་སོགས་ཀྱི་དོན་གནད་གཙོ་ཆེ་བཅུ་ཅན་ཞིག་གསལ་བཏོན་གྱིས་གསལ་བསྒྲགས་སྤེལ་གནང་སོང་།ཚོགས་ཆེན་མཇུག་སྒྲིལ་གྱི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པའི་ཐོག་རྒྱ་གར་གྱི་མངའ་སྡེ་ཁག་ ༢༡ ནས་བོད་དོན་རྒྱབ་སྐྱོར་བ་ཁྱོན་མི་གྲངས་ ༢༡༦ ཕེབས་ཡོད་པ་རྣམས་ལ་ཐུགས་རྗེ་ཆེ་ཞེས་ཞུས་པ་དང་སྦྲགས། ད་རེས་ཚོགས་ཆེན་ཐོག་རྒྱ་གར་བ་དགུང་ལོ་བགྲེས་གཞོན་དར་གསུམ་བཅས་ཕེབས་ཡོད་པ་གཟིགས་སྐབས་བོད་དོན་བདེན་མཐའ་གསལ་ཐབས་ལ་རེ་བ་ཆེན་པོ་ཡོད་སྟབས་དགའ་སྤོབས་ཆེན་པོ་བྱུང་ཞེས་གསུངས་སོང་།བཀའ་བློན་མཆོག་གིས་ད་དུང་ད་ལན་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པ་མཇུག་སྒྲིལ་དང་འབྲེལ་དོན་ཚན་བཅུ་ཅན་གྱི་ཡོངས་ཁྱབ་གསལ་བསྒྲགས་སྤེལ་བར་ཡི་རང་བསྔགས་བརྗོད་ཀྱང་གནང་ཡོད་པ་མ་ཟད། ལྷག་དོན་བཀའ་བློན་མཆོག་གིས་རྒྱ་གར་གྱི་གཞུང་འཛིན་གསར་པ་ཕེབས་ཡོད་པ་ལྟར་གྲོས་ཚོགས་ཀྱི་འཐུས་མི་རྣམས་ཀྱང་གསར་པ་ཕེབས་པ་བཞིན་ཁྱེད་རྣམས་རང་ཉིད་ཀྱི་ས་གནས་སུ་ཕྱིར་ཕེབས་སྐབས་ས་གནས་ནང་ཡོད་པའི་གྲོས་ཚོགས་ཀྱི་འཐུས་མི་རྣམས་ལ་བོད་དོན་ཐོག་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་གྱི་ལས་འགུལ་གང་མང་སྤེལ་རོགས་ཞེས་རེ་སྐུལ་སོགས་གནང་ཡོད།གཞི་རྩའི་ཐེངས་འདིའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པ་འདི་རྐང་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མས་གོ་སྒྲིག་ཞུས་པ་ཞིག་ཆགས་ཀྱི་ཡོད་པ་དང་། ལྷན་ཚོགས་ཐོག་ཚོགས་བཅར་བ་མི་གྲངས་ ༢༡༦ ནས་མཉམ་ཞུགས་གནང་ཡོད་པ་ལྟར། བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་ལྷན་ཚོགས་སྐབས་རྒྱབ་གཉེར་བསམ་འཆར་ཁག་གཞིར་བཞག་སྟེ་འབྱུང་འགྱུར་བོད་དོན་ལས་འགུལ་ཚགས་ཚུད་ཇི་ལྟར་སྤེལ་དགོས་པའི་གོ་བསྡུར་གནང་ཡོད།

ཕྱི་ཟླ་ ༦ ཚེས་ ༡༡ ཉིན་བཞུགས་སྒར་དྷ་ཤོད་མུ་ནིས་པཱལ་ཚོགས་ཁང་དུ་བོད་ཀྱི་གཞོན་ལྷན་ཚོགས་ཀྱི་ཚོགས་ཆེན་ཐེངས་ ༡༧ པ་དབུ་འཛུགས་གནང་ཡོད་པ་དང་། དེ་རིང་ཕྱི་ཚེས་ ༡༦ ཉིན་ཚོགས་ཆེན་ཉིན་མཐའ་མའི་ཐོག་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དབུས་རྒྱུན་ལས་ཁང་གི་སྐབས་ ༡༧ པའི་རྒྱུན་ལས་གསར་འདེམས་ཀྱི་ལས་རིམ་ཁག་གནང་སོང་།ཚོགས་ཆེན་ཐོག་ཕེབས་པའི་ཚོགས་མི་ ༡༥༠ ལྷག་གིས་སྔོན་འགྲོའི་འོས་མི་ཁོངས་སུ་མི་སྣ་ ༡༨ འདེམས་སྒྲུག་གནང་ཡོད་པ་དང་། དེ་ནས་རིམ་བཞིན་ས་གནས་གཞོན་ནུ་སོ་སོའི་ཚོགས་མིའི་གྲངས་འབོར་དང་ཚོགས་བཅར་བའི་གྲངས་འབོར་བཅས་ལ་གཞིགས་པའི་འོས་ཤོག་གི་ཐོབ་ཐང་ཁག་བླངས་ཏེ་འོས་མི་  ༡༨ དེ་དག་ནས་མགོན་པོ་དོན་གྲུབ་ལགས་དང་། བསོད་ནམས་ཚེ་རིང་ལགས། བློ་བཟང་ཚེ་རིང་ལགས། ཡེ་ཤེས་ཆོས་འཕེལ་ལགས། ཚེ་དབང་རབ་རྒྱལ་ལགས། བསྟན་འཛིན་ལྷ་མོ་ལགས། སྤེན་པ་ཚེ་རིང་ལགས་བཅས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དབུས་རྒྱུན་ལས་ཁང་གི་སྐབས་ ༡༧ པའི་རྒྱུན་ལས་སུ་བདམས་ཐོན་གནང་ཡོད། སྐབས་དེར་འདེམས་ཐོན་རྒྱུན་ལས་རྣམ་པས་ནང་མོལ་གྲོས་བསྡུར་གནང་ཏེ་ཚོགས་གཙོ་ཚོགས་གཞོན་དང་དྲུང་ཆེ་བཅས་ཀྱི་འོས་མི་གསལ་བསྒྲགས་གནང་ཐོག་ཚོགས་བཅར་བ་རྣམ་པས་གསང་བའི་འོས་འཕངས་ཏེ་བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་དབུས་རྒྱུན་ལས་ཁང་གི་སྐབས་ ༡༧ པའི་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་དང་ཚོགས་གཞོན་བློ་བཟང་ཚེ་རིང་ལགས། དེ་བཞིན་དྲུང་ཆེ་བསོད་ནམས་ཚེ་རིང་ལགས་བཅས་གསུམ་བསྐོ་གཞག་གིས་ལས་འཁུར་དམ་འབུལ་གནང་སོང་། འདམས་ཐོན་ཚོགས་གཙོ་མགོན་པོ་དོན་གྲུབ་ལགས་ནས་ད་ལྟའི་ཆར་ལས་ཀ་འདི་དང་འདི་བྱེད་ཀྱི་ཡིན་ཞེས་བཤད་རྒྱུ་མེད་ཀྱང་། གཙོ་བོ་དབུས་རྒྱུན་གོང་མ་ཚོས་གནང་བའི་ཕྱག་ལས་ཁག་རྒྱུན་སྐྱོང་གནང་རྒྱུ་དང་རབ་བྱུང་ཚེ་དེ་ལས་ལྷག་པ་གནང་རྒྱུ་ཡིན་ཞེས་གསུངས་སོང་།  དེ་བཞིན་འཁྱུར་མ་ཐག་པའི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་ད་རེས་གཞོན་ནུའི་སྒྲིག་འཛུགས་ནང་ཉམས་མྱོང་ཡོད་མཁན་གྱི་རྒྱུན་ལས་གསར་པ་བདུན་འོས་འདེམས་བྱུང་བར་དགའ་སྤོབས་ཆེན་པོ་བྱུང་ཞེས་གསུངས་པ་དང་སྦྲགས། རྒྱུན་ལས་གསར་པ་རྣམས་ནས་མ་འོངས་པར་ལས་དོན་གང་གནང་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གོང་དུ་བཀུར་བའི་ཐོག་ནས་གནང་དགོས་གལ་ཡིན་པ་དང་རྒྱུན་ལས་ནང་ཁུལ་འཆམ་མཐུན་གནང་གནད་ཡིན་པ་སོགས་ལམ་སྟོན་གནང་ཡོད།   རྒྱུན་ལས་གསར་འདེམས་ཀྱི་ལས་རིམ་ཁག་གྲུབ་མཚམས་སུ་འཁྱུར་མ་ཐག་པའི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཛིགས་མེད་ལགས་སུ་ཉིན་གྲངས་དྲུག་གི་རིང་འཚོགས་ཡོད་པའི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༧ ཐོག་གྲོས་ཆོད་གང་དག་ཅིག་གཏན་འབེབས་གནང་ཡོད་པའི་ཐོག་བཅར་འདྲི་ཞུས་པར་ཐེངས་འདིའི་ཚོགས་ཆེན་ཐོག་གཞོན་ནུ་ལྷན་ཚོགས་ཀྱི་ལས་དོན་སྤྱི་དང་ལྷག་པར་དུ་མ་འོངས་ཆབ་སྲིད་ཀྱི་ལས་འགུལ་སྤེལ་ཕྱོགས་སོགས་ཀྱི་ཐད་ཁྱོན་གྲོས་ཆོད་ ༢༥ ཙམ་གཏན་འབེབས་གནང་ཡོད་ཅེས་གསུངས་ཡོད། གཞི་རྩའི་བདམས་ཐོན་བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་ནི་རྒྱ་གར་བྱང་ཕྱོགས་བོད་མིའི་གཞིས་སྒར་ལ་དྭགས་ནང་སྐྱེས་ཡོད་པ་ལྟར་གཞི་རིམ་འབྲིང་འོག་གི་སློབ་གཉེར་ལ་དྭགས་རང་དུ་གནང་ཡོད་པ་དང་། གཞི་རིམ་གོང་མ་བོད་ཁྱིམ་གོ་པཱལ་པུར་དུ་སློབ་གཉེར་གནང་འདུག དེ་རྗེས་ O.P. Jindal མཐོ་སློབ་ཏུ་འཛིན་སྐྱོང་ཐོག་སློབ་གཉེར་གནང་བ་མ་ཟད་སློབ་ཞོར་དུ་ལྡི་ལིར་རྟེན་གཞི་བྱས་པའི་རོ་ཧི་ནི་ས་གནས་གཞོན་ནུའི་དྲུང་ཆེ་གནང་མྱོང་ཡོད་པ་རེད།

དེ་རིང་བཞུགས་སྒར་དུ་རྟེན་གཞི་བྱས་པའི་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དུ་བྱང་ཨ་རིའི་སྐུ་ཚབ་དོན་གཅོད་ཟུར་པ་ཚོགས་ཟུར་སྤེན་པ་ཚེ་རིང་ལགས་ཀྱིས་སྲིད་སྐྱོང་བློ་བཟང་སེང་གེ་བརྒྱུད་འཛིན་སྐྱོང་བཀའ་ཤག་གིས་ཁོང་ལ་མ་ཉེས་ཁག་གཡོག་གནང་བའི་ཁ་མཆུ་ཨང་ ༢༠ པའི་གནད་དོན་གཏན་འབེབས་ཀྱི་ཉན་ཞིབ་ལས་རིམ་དེ་ཚོགས་སོང་།གནད་དོན་གཏན་འབེབས་ཀྱི་ཉན་ཞིབ་ལས་རིམ་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་དབུས་པའི་ཁྲིམས་ཞིབ་པ་རྣམ་པ་དང་། ཆེ་མཐོའི་ཁྲིམས་ཞིབ་ཁང་གི་ལས་བྱེད་རྣམ་པ། གྱོད་ཡ་ཞུ་སྦྱོར་བ་སྤེན་པ་ཚེ་རིང་ལགས་དང་ཁོང་གི་ཁྲིམས་རྩོད་པ་ཆེས་མཐོའི་ཁྲིམས་ཞིབ་ཁང་གི་ས་གནས་ཁྲིམས་ཞིབ་པ་ཟུར་པ་རྣམ་རྒྱལ་ཚེ་སྐྱིད་ལགས། དེ་བཞིན་གྱོད་ཡ་རྩོད་ལན་པ་འཛིན་སྐྱོང་བཀའ་ཤག་གི་ཁྲིམས་རྩོད་པ་བོད་མིའི་ཁྲིམས་ལུགས་རིག་པ་བའི་ཚོགས་པའི་འགན་འཛིན་བོད་མིང་མང་སྤྱི་འཐུས་བློ་བཟང་གྲགས་པ་ལགས་དང་ངོ་ཚབ་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གཙོ་གྱུར་བཀའ་དྲུང་ཚེ་རྒྱལ་ལགས་དང་བཀའ་དྲུང་ཟུར་པ་སྟོབས་རྒྱལ་ཚེ་རིང་ལགས། དེ་བཞིན་དྲུང་ལས་བསྟན་འཛིན་ཕུན་ཚོགས་ལགས་བཅས་དང་། གཞན་ཡང་ཟུར་ཉན་པ་དང་གསར་འགོད་པ་བཅས་ཕེབས་འདུགསྐབས་དེར་ཆེས་མཐོའི་ཁྲིམས་ཞིབ་པ་རྣམ་པས་བཙན་བྱོལ་བོད་མིའི་བཅའ་ཁྲིམས་ཀྱི་སྤྱི་དམངས་གཏུག་བཤེར་ཁྲིམས་སྒྲིག་གི་དགོངས་དོན་ལྟར་གྱོད་ཡ་ཞུ་སྦྱོར་བ་དང་གྱོད་ཡ་རྩོད་ལན་པ་གཉིས་ཀྱི་ཞུ་རྩའི་ནང་གང་དང་གང་འཁོད་མེད་དང་། ལྷག་པར་དུ་ཟླ་ ༦ ཕྱི་ཚེས་ ༥ ཉིན་ཚོགས་པའི་གནད་དོན་གསལ་བཟོའི་ལས་རིམ་སྐབས་འཛིན་སྐྱོང་བཀའ་ཤག་གིས་དོན་གཅོད་སྤེན་པ་ཚེ་རིང་ལགས་འཕོ་འགྱུར་གནང་དགོས་པའི་རྒྱུ་མཚན་དོན་ཚན་ ༡༠ སྤེལ་བའི་གནད་དོན་ཁག་གི་ཐད་འདྲི་ཞིབ་གནང་རྗེས་ཐག་གཅོད་གང་གནང་ཡོད་མེད་བཅས་ལ་གཞིར་བཞག་ནས་གྱོད་ཡ་ཞུ་སྦྱོར་བ་དང་གྱོད་ཡ་རྩོད་ལན་པ་གཉིས་ནས་རྗེས་མའི་ཁྲིམས་རའི་ཐོག་དོན་ཚན་བཅུ་པོ་དེ་དག་ལས་དངོས་དོན་གྱི་གནད་དོན་བརྒྱད་དང་ཁྲིམས་དོན་གྱི་གནད་དོན་གཉིས་བཅས་གནད་དོན་བཅུའི་ཐོག་ལ་ཕྱོགས་སོ་སོ་ནས་ཁུངས་སྐྱེལ་གནང་དགོས་པ་མ་ཟད། གྱོད་ཡ་ཞུ་སྦྱོར་བ་དང་གྱོད་ཡ་རྩོད་ལན་པ་གཉིས་ནས་གནད་དོན་དེ་དག་ཐོག་གནད་དོན་གཞན་ཁ་སྣོན་དགོས་པ་གཟིགས་ཚེ་ཟླ་ ༦ ཕྱི་ཚེས་ ༡༩ ནང་ཚུད་ལ་ཁྲིམས་དྲུང་ལས་ཁུངས་སུ་ཕུལ་ཟིན་པ་དགོས་ཞེས་གསུངས་སོང་།གཞི་རྩའི་ཐེངས་འདིའི་གནད་དོན་གཏན་འབེབས་ཀྱི་ཉན་ཞིབ་ལས་རིམ་ཐོག་མར་ཆེས་མཐོའི་ཁྲིམས་ཞིབ་པ་མཆོག་ནས་རྩོད་ལན་པའི་ཁྲིམས་རྩོད་པ་བློ་བཟང་གྲགས་པ་ལགས་ནས་ཆེས་མཐོའི་ཁྲིམས་ཞིབ་ཁང་གི་ངོས་ནས་གྱོད་གཞིའི་གནད་དོན་ཁག་གི་ནང་གསེས་དོན་ཚན་ཁག་གཅིག་གི་ཐོག་གསལ་བཤད་ལན་འདེབས་དགོས་སྐོར་གསུངས་པ་རྣམས་ལ་ལན་འདེབས་ཁ་གསལ་འགོད་འབུལ་ཞུ་རྒྱུ་དང་དྲང་བདེན་གྱི་ཁྲིམས་བཤེར་ཡོང་ཆེད་ལོ་འདིའི་ཕྱི་ཟླ་ ༩ ཚེས་ ༥ སྟེ་ཟླ་བ་གསུམ་གྱི་དུས་ཚོད་འཕར་འགྱངས་གནང་དགོས་པའི་ཞུ་སྐུལ་དེ་ཁྲིམས་ཞིབ་པའི་ལས་དོན་གནང་ཕྱོགས་ལ་སྒྲོ་སྐུར་དང་ཁྲིམས་ཡིག་གི་བྱ་ལུགས་ལྟར་མ་འགྲུབ་པ་མ་ཟད། ཁྲིམས་ཞིབ་ཁང་གི་ལམ་སྟོན་ཐོག་ལའང་གནས་མེད་པ་སོགས་དོན་བཅུ་ཙམ་འགྲེལ་བརྗོད་དང་སྦྲགས། རྩོད་ལན་པའི་ཞུ་སྐུལ་དེར་བདག་སྤྲོད་བྱས་མེད་ཅེས་གསུངས་སོང་།ད་རེས་གནད་དོན་གཏན་འབེབས་ཀྱི་ཉན་ཞིབ་ལས་རིམ་གྲུབ་མཚམས་སུ་གྱོད་ཡ་ཞུ་སྦྱོར་བ་བྱང་ཨ་རིའི་སྐུ་ཚབ་དོན་གཅོད་ཟུར་པ་ཚོགས་ཟུར་སྤེན་པ་ཚེ་རིང་ལགས་རྩོད་ལན་པ་འཛིན་སྐྱོང་བཀའ་ཤག་གི་ཁྲིམས་རྩོད་པ་བློ་བཟང་གྲགས་པ་ལགས་རྣམ་གཉིས་ལ་བཅར་འདྲི་ཁག་ཅིག་ཞུས་ཡོད།

དེ་རིང་ཕྱི་ཚེས་ ༡༥ ཉིན་གྱི་སྔ་དྲོ་ཚོུད་ ༩ ཐོག་བཞུགས་སྒར་བོད་མིའི་སྒྲིག་འཛུགས་ཀྱི་ཚོགས་ཁང་གསར་པའི་ནང་དུ་དམིགས་བསལ་སྐུ་མགྲོན་རྒྱ་གར་གྱི་ RSS རྒྱལ་ཞེན་ཚོགས་པའི་དབུ་ཁྲིད་དང་འཕགས་བོད་འབྲེལ་མཐུད་ཚོགས་པའི་སློབ་སྟོན་པ་སྐུ་ཞབས་ Indresh Kumar ལགས། སྐུ་མགྲོན་ཧིན་བོད་འཛའ་འབྲེལ་ཚོགས་པའི་ཚོགས་པའི་ཚོགས་གཙོ་སྐུ་ཞབས་ Anand Kumar ལགས་ཀྱིས་གཙོས་པའི་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ R.K.Khrimey ལགས། ཚོགས་གཞོན་སྐུ་ཞབས་ Sunder Kumar ལགས། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་བཅས་དབུ་བཞུགས་ཐོག་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པ་དབུ་འཛུགས་གནང་སོང་།རྒྱ་གར་རྒྱལ་ཡོངས་ནས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་གྱི་མཛད་སྒོའི་ཐོག་སྐུ་ཞབས་ Anand Kumar ལགས་དང་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ R.K.Khrimey ལགས་རྣམ་གཉིས་ཀྱིས་གཙོས་པའི་རྒྱ་གར་གྱི་སྐུ་མགྲོན་རྣམས་ཀྱིས་རྒྱལ་སྤྱིའི་ཁྱོན་ལ་རྒྱ་ནག་སྟོབས་ཤུགས་ཉིན་རེ་བཞིན་ཇེ་ཆེར་འགྲོ་བཞིན་ཡོད་པ་མ་ཟད་རྒྱ་ནག་གིས་བོད་ལ་བཙན་འཛུལ་བྱས་ནས་ལོ་ངོ་ ༦༠ འཁོར་གྱི་ཡོད་པར་བརྟེན་བོད་ཀྱི་གནད་དོན་དང་འབྲེལ་བའི་འཐབ་རྩོད་ཀྱི་ལས་འགུལ་རྒྱུན་གནས་ཐུབ་པ་གནང་དགོས་གལ་ཡིན་པ་དང་། བོད་རྒྱའི་དཀའ་རྙོག་དེ་གང་མགྱོགས་སེལ་བར་རྒྱ་གར་གཞུང་མང་གཉིས་ཀྱིས་འགན་གཙོ་བཞེས་གནང་ཚེ་དེས་བོད་མི་ཙམ་མ་ཟད་རྒྱ་གར་ལའང་དགེ་མཚན་ཆེན་པོ་ཡོད་པ་གསུངས་སོང་།ལྷག་དོན་༸གོང་ས་མཆོག་གིས་དབུས་བོད་མི་རྣམས་རྒྱ་གར་དུ་སྐུ་མགྲོན་གྱི་ངོ་བོ་ཐོག་ནས་སྣེ་ལེན་ཞུས་པ་ལྟར་རྒྱ་གར་གཞུང་མང་གཉིས་ནས་ནམ་ཞིག་བོད་མི་དག་རང་ཡུལ་དུ་ཕྱིར་ཕེབས་སྐབས་ཕེབས་སྐྱེལ་གཟབ་རྒྱས་ཞུ་རྒྱུའི་འོས་འགན་ཡོད་པ་སོགས་གསུངས་ཡོད།སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་མི་ཚོའི་སེམས་ནང་ལ་བོད་མིའི་བདེན་དོན་སླད་དུ་རྒྱ་གར་གཞུང་མང་གཉིས་ལས་ལྷག་པའི་བཀའ་དྲིན་ཆེ་བ་གཞན་རྒྱལ་ཁབ་སུའང་མེད་པ་འགྲེལ་བརྗོད་དང་འབྲེལ། འཛམ་གླིང་གི་རྒྱལ་ཁབ་ཚང་མའི་ནང་ལ་རྒྱ་ནག་གི་གནོན་ཤུགས་རྐྱེན་པས་ཁོང་གིས་སྲིད་སྐྱོང་གི་ལས་གནས་བཞེས་པའི་ཐོག་མའི་ལོ་བཞི་ལྔ་ཙམ་གྱི་རིང་རྒྱ་ནག་གིས་འགོག་རྐྱེན་ལ་བརྟེན་ནས་རྒྱལ་སྤྱིའི་ཁྲོད་བོད་དོན་གླེང་རྒྱུའི་གླེང་སྟེགས་ཉུང་དུ་ཕྱིན་ཡོད་པ་དེ་ལྟར་ཡང། ད་སྐབས་ཨོ་སི་ཊོ་ལི་ཡ་གཙོས་ རྒྱལ་སྤྱིའི་རྒྱལ་ཁབ་མང་དག་ཅིག་ནང་རྒྱ་ནག་གི་ཚོང་འབྲེལ་དང་མཉམ་དུ་རིམ་བཞིན་རྒྱལ་ཁབ་སོ་སོའི་ཆབ་སྲིད་དང་ཤེས་ཡོན་སྡེ་ཚན་བཅས་ཀྱི་ཐོག་རྒྱ་ནག་གི་གནོན་ཤུགས་བརྒྱུད་བདེ་འཇགས་ལའང་བརྡབ་གསིག་ཆེན་པོ་འགྲོ་བཞིན་པ་གསལ་པོ་ཆགས་བ་མ་ཟད་དེ་འབྲེལ་བགྲོ་གླེང་ཡང་ཤུགས་ཆེན་ཡོང་གི་ཡོད་སྟབས། འདས་པའི་ལོ་ངོ་གཉིས་གསུམ་ནས་གནས་སྟངས་ལ་འགྱུར་བ་འགྲོ་བཞིན་ཡོད་པ་དང་། རྒྱ་གར་གཞུང་མང་གཉིས་ནས་ཀྱང་དེའི་ཐོག་ཐུགས་སྣང་དང་བགྲོ་གླེང་གནང་རྒྱུ་གལ་ཆེན་པོ་ཡིན་པ་འགྲེལ་བརྗོད་གནང་སོང་།འདི་ག་རླུང་འཕྲིན་ཁང་གི་གསར་འགོས་པས་བོད་མིའི་སྒྲིག་འཛུགས་ཀྱི་འཕགས་བོད་འབྲེལ་མཐུན་ཁང་གི་འབྲེལ་མཐུད་པ་དཔལ་འབྱོར་ལགས་སུ་ཐེངས་འདིའི་ཚོགས་ཆེན་དང་འབྲེལ་བའི་ཐོག་བཅར་འདྲི་ཁག་གཅིག་ཞུ་སྐབས་ཁོང་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་གཙོས་པའི་བོད་དེ་རྒྱ་གར་ལ་ཇི་ཙམ་གནད་ཆེ་ཡིན་སྐོར། བོད་ཀྱི་ཁོར་ཡུག རྒྱ་གར་གཞུང་མང་ནས་བོད་ཐོག་རྒྱབ་སྐྱོར་གནང་ཐབས། དེ་བཞིན་ལྔ་དང་ལྔ་བཅུའི་འཆར་སྣང་སོགས་ཀྱི་གནད་དོན་ལྔའི་ཐོག་གླེང་སློང་གནང་གི་ཡོད་པ་གསུངས་སོང་།དེ་བཞིན་ཨ་རུ་ནཱ་ཅལ་མངའ་སྡེའི་ནང་འཕགས་བོད་རོགས་སྐྱོར་ཚོགས་པའི་ཚོགས་གཙོ་སྐུ་ཞབས་ལྷུན་གྲུབ་ཆོས་བཟང་ལགས་སུ་རྣམ་ཀུན་ཁུལ་དེར་བོད་དོན་དང་འབྲེལ་བའི་ཕྱག་ལས་གང་དང་གང་གནང་གི་ཡོད་མེད་ཐད་ལ་བཅར་འདྲི་ཞུས་པར་ཁོང་གིས་སྔར་བྱུང་མྱོང་མེད་པའི་བོད་མིའི་རང་དབང་སྒེར་ལངས་སྲུང་བརྩི་ཞུས་ཐུབ་ཡོད་པ་མ་ཟད། ལྷག་དོན་རྒྱ་གར་དབུས་གཞུང་ལ་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་རེ་སྐུལ་གྱི་མཚན་རྟགས་བསྡུ་རུབ་གནང་བཞིན་ཡོད་སྐོར་གསུངས་སོང་།གཞི་རྩའི་ཐེངས་འདིའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པ་འདི་རྐང་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མས་གོ་སྒྲིག་ཞུས་པ་ཞིག་ཆགས་ཀྱི་ཡོད་པ་དང་། ལྷན་ཚོགས་ཐོག་ཚོགས་བཅར་བ་མི་གྲངས་ ༡༨༠ ནས་ ༢༠༠ བར་མཉམ་ཞུགས་གནང་ཡོད་པ་ལྟར། བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་ལྷན་ཚོགས་སྐབས་རྒྱབ་གཉེར་བསམ་འཆར་ཁག་གཞིར་བཞག་སྟེ་འབྱུང་འགྱུར་བོད་དོན་ལས་འགུལ་ཚགས་ཚུད་ཇི་ལྟར་སྤེལ་དགོས་པའི་གོ་བསྡུར་གནང་གི་འདུག

དབྱིན་ཇི་རྒྱལ་མོ་མཆོག་གིས་ལོ་གཅིག་ནང་དབྱིན་ཇིའི་ལོ་གསར་དང་དབྱིན་ཇི་རྒྱལ་མོའི་འཁྲུངས་སྐར་གྱི་དུས་ཚོད་དང་སྟབས་བསྟུན་དམག་ནང་བྱས་རྗེས་འཇོག་མཁན་དང་སྤྱི་ཚོགསས་ནང་གཟེངས་སུ་ཐོན་པའི་ཞབས་འདེགས་ཞུ་མཁན་ལ་གཟེངས་རྟགས་གནང་བའི་མཛད་སྒོ་ཐེངས་གཉིས་སྤེལ་སྲོལ་ཡོད་པ་ལྟར། འདི་ལོ་དབྱར་དུས་སྐབས་རྒྱལ་མོའི་འཁྲུངས་སྐར་གྱི་དུས་ཚིགས་ཐོག་གཟེངས་རྟགས་བཞེས་མཁན་ཁྱོན་མི་གྲངས་ཆིག་སྟོང་བརྒལ་བའི་མཚན་ཐོ་བཏོན་གནང་བའི་ཁོངས་སུ་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སེ་ར་སྨད་གྲྭ་ཚང་གི་༸སྐྱབས་རྗེ་མཁན་རིན་པོ་ཆེ་དགེ་བཤེས་བཀྲ་ཤིས་ཚེ་རིང་ལགས་སམ་མཚན་གཞན་དགེ་བཤེས་ལྷུན་གྲུབ་དཔལ་འབར་མཆོག་ལ་དབྱིན་ཡུལ་ནང་ལོ་ངོ་བཅུ་ཕྲག་མང་པོར་བོད་བརྒྱུད་ནང་བསྟན་ཐད་ནས་སྤྱི་ཚོགས་ལ་སྨན་པའི་ཞབས་འདེགས་བླ་མེད་ཞུས་པར་ཆེ་བསྟོད་གཟེངས་རྟགས་འབུལ་རྒྱུའི་གསལ་བསྒྲགས་གནང་འདུགདེ་རིང་ཕྱི་ཟླ་ ༦ ཚེས་ ༡༤ ཉིན་རྒྱབ་ཚོུད་ ༢༌༣༠ ཐོག་སེར་སྨད་གྲྭ་ཚང་གི་ཕྱག་མཛོད་ཁང་དང་དབུ་མཛད་དགེ་བསྐོས་བཅས་ཀྱིས་གྲྭ་ཚང་གི་ཐོག་ཁར་མཁན་རིན་པོར་ཆེར་མཎྜལ་རྟེན་གསུམ་འདེགས་འབུལ་དང་རྟེན་འབྲེལ་མཇལ་དར་ཕུལ་བའི་ཐོག་ནས་རྟེན་འབྲེལ་གྱི་མཛད་སྒོ་སྟབསས་བདེ་ཞིག་ཀྱང་ཚོགས་ཡོད་པ་རེད།རྩ་བའི་ད་རེས་རྒྱལ་མོའི་འཁྲུངས་སྐར་དང་འབྲེལ་གཟེངས་རྟགས་འབུལ་བཞེས་མཁན་ཁོངས་བརྒྱ་ཆ་ ༤༧ ཙམ་ཞིག་བུད་མེད་དང་སྒོས་བརྒྱ་ཆ་ ༡༠༌༤ ཙམ་མི་རིགས་ནག་པོ་དང་། ཨེ་ཤ་ཡ་སོགས་ཡིན་སྟབས་གཟེངས་རྟགས་དེའི་ལོ་རྒྱུས་ཁྲོད་ད་ལན་མི་རིགས་ནག་པོ་དང་ཨེ་ཤ་ཡའི་མི་རིགས་ནས་རྒྱལ་མོའི་ཆེ་བསྟོད་ཀྱི་གཟེངས་རྟགས་བཞེས་མཁན་གྱི་བརྒྱ་ཆ་མང་ཤོས་ཆགས་ཡོད་པ་རེད།གཞི་རྩའི་དགེ་བཤེས་བཀྲ་ཤིས་ཚེ་རིང་ལགས་ནི་ཕྱི་ལོ་ ༡༩༥༨ ལོར་བོད་ཀྱི་ནུབ་ཕྱོགས་སུ་ཆགས་པའི་པུ་རང་ཁུལ་དུ་འཁྲུངས་ཤིང་། བོད་ནས་བྲོས་བྱོལ་དུ་ཕེབས་རྗེས་ནང་མི་དང་ལྷན་དུ་ལྷོ་ཕྱོགས་བོད་མིའི་གཞིས་ཆགས་སུ་ཕེབས་རྗེས་སེ་སྨད་གྲྭ་ཚང་ཀོང་པོ་ཁང་ཚན་དུ་ཆོས་ཞུགས་དང་འབྲེལ་གཞུང་ཆེན་ཀ་པོད་ལྔར་གསན་བསམ་སློབ་གཉེར་མཐར་ཕྱིན་གནང་སྟེ་ཕྱི་ ལོ་ ༡༩༩༠ ལོར་དགེ་བཤེས་ལྷ་རམས་པའི་མཚན་གནས་བཞེས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དགོངས་ལམ་སྟོན་དང་འབྲེལ་ནས་ཕྱི་ལོ་ ༡༩༩༡ ལོ་ནས་བཟུང་ཡོ་རོབ་དང་། བྱང་ཨ་མི་རི་ཀ།དེ་བཞིན་ཨེ་ཤ་ཡ་རྒྱལ་ཁབ་སོགས་ནང་བོད་བརྒྱུད་ནང་བསྟན་ཐད་སློབ་ཁྲིད་གནང་གི་ཡོད་པ་རེད་འདུག དགེ་བཤེས་བཀྲ་ཤིས་ཚེ་རིང་ལགས་ནས་ཕྱི་ལོ་ ༢༠༡༧ ལོར་ཨེ་ཤ་ཡ་དང་ཨ་ཕི་རི་ཀའི་ཐོག་གི་ལོན་ཌོན་གཙུག་ལག་སློབ་གཉེར་ཁང་ནས་མི་རྒྱུད་དཔྱད་རིག་ཐད་གཙུག་ལག་རབ་འབྱམས་ཀྱི་སློབ་མཐར་སོན་པ་དང་། ཁོང་ནས་དབྱིན་ཡིག་ཐོག་ The Foundation of Buddhist Thought འམ་ནང་པའི་ལྟ་གྲུབ་ཀྱི་རྨང་གཞི་ཞེས་པའི་ཕྱག་དེབ་པོད་ ༧ ཙམ་བརྩམས་ཡོད་པ་མ་ཟད། སྒོས་སུ་ནང་པའི་ལྟ་གྲུབ་ཀྱི་རྨང་གཞི་དང་ལམ་རིམ་སོགས་ཀྱི་བརྗོད་གཞིའི་ཐད་དྲྭ་རྒྱ་བརྒྱུད་ནང་ཆོས་དོན་གཉེར་བ་ཚོར་སློབ་ཁྲིད་གནང་གི་ཡོད་པ་རེད་འདུག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་སེར་སྨད་ཐོས་བསམ་ནོར་གླིང་གྲྭ་ཚང་གི་མཁན་ཐོག་ ༩༡ པར་བསྐོ་གཞག་གི་བཀའ་ཡིག་ཕེབས་ཏེ་ཕྱི་ལོ་ ༢༠༡༨ ཟླ་ ༦ ཚེས་ ༡༧ ཉིན་སེར་སྨད་ཐོས་བསམ་ནོར་གླིང་གྲྭ་ཚང་དུ་དངོས་སུ་མཁན་པོའི་ཁྲི་འདོན་མཛད་སྒོ་གཟབ་རྒྱས་གནང་ཡོད་པ་དང་ད་ལྟ་མཁན་པོའི་མཛད་འགན་བཞེས་མུས་ཡིན་པ་རེད།

ཨ་རིའི་སྐུ་ཚབ་དོན་གཅོད་ཟུར་པ་ཚོགས་ཟུར་སྤེན་པ་ཚེ་རིང་ལགས་ཀྱིས་སྲིད་སྐྱོང་བློ་བཟང་སེང་གེ་མཆོག་བརྒྱུད་འཛིན་སྐྱོང་བཀའ་ཤག་གིས་ཁོང་ལ་མ་ཉེས་ཁག་གཡོགས་གནང་བའི་ཁ་མཆུ་ཨང་ ༢༠ པའི་གནད་དོན་གཏན་འབེབས་ཀྱི་ཉན་ཞིབ་སང་ཉིན་གནང་གཏན་ཁེལ་འདུགདེའང་ཟླ་བ་འདིའི་ཚེས་ ༥ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་གཏུག་བཤེར་ཁང་དུ་ཆེས་མཐོའི་ཁྲིམས་ཞིབ་པ་ཆེ་བ་མཆོག་གཙོས་པའི་ཁྲིམས་ཞིབ་པ་རྣམ་པ་དབུ་བཞུགས་དང་། ཞུ་སྦྱོར་བ་སྤེན་པ་ཚེ་རིང་ལགས་དང་ཁོང་གི་ཁྲིམས་རྩོད་པ་རྣམ་རྒྱལ་ཚེ་སྐྱིད་ལགས། དེ་བཞིན་རྩོད་ལན་པ་སྲིད་སྐྱོང་བློ་བཟང་སེང་གེ་མཆོག་གི་ཁྲིམས་རྩོད་པ་སྤྱི་འཐུས་བློ་བཟང་གྲགས་པ་ལགས་ལྷན་ཞུགས་ཐོག་མ་ཉེས་ཁག་གཡོགས་དང་འབྲེལ་བའི་ཁ་མཆུ་ཨང་ ༢༠ པའི་ཐོག་ཉན་ཞིབ་ཐོག་མ་དེ་དབུ་འཛུགས་དང་འབྲེལ། བཀའ་ཤག་གིས་དོན་གཅོད་སྤེན་པ་ཚེ་རིང་ལགས་འཕོ་འགྱུར་གཏོང་དགོས་པའི་རྒྱུ་མཚན་དོན་ཚན་ ༡༠ སྤེལ་བའི་གནད་དོན་ཁག་གི་ཐད་འདྲི་ཞིབ་གནང་སྐབས། རྩོད་ལན་པའི་ཁྲིམས་རྩོད་པ་བློ་བཟང་གྲགས་པ་ལགས་ཀྱིས་གྱོད་གཞིའི་གནད་དོན་ཁག་གི་ནང་གསེས་དོན་ཚན་ཁག་གཅིག་གི་ཐོག་ལེན་འདེབས་ཁ་གསལ་དང་དྲང་བདེན་གྱི་ཁྲིམས་བཤེར་ཡོང་ཆེད་ཁ་མཆུ་དེ་ལོ་འདིའི་ཕྱི་ཟླ་ ༩ ཚེས་ ༥ བར་ཟླ་བ་གསུམ་གྱི་རིང་ཕར་འགྱངས་ཡོང་བའི་འབོད་སྐུལ་ཞུས་ཡོད་པ་རེད།འོན་ཀྱང་དེ་རིང་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གིས་གསལ་སྒྲགས་སྤེལ་བའི་ནང་། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་དོན་ཚན་ ༤༠ གཞིར་བཟུང་ཁ་མཆུ་འདིའི་གནད་དོན་གཏན་འབེབས་ཀྱི་ཉན་ཞིབ་སང་ཕྱི་ཟླ་ ༦ ཚེས་ ༡༥ རེས་གཟའ་སྤེན་པའི་ཕྱི་དྲོ་ཚོུད་ ༢.༣༠ ཐོག་གནང་གཏན་ཁེལ་ཡོད་པ་ཡོངས་ཁྱབ་གསལ་བསྒྲགས་གནང་འདུག གཞི་རྩའི་དབུས་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་ནས་ཕྱི་ལོ་ ༢༠༡༧ ཟླ་ ༡༡ ཚེས་ ༧ ཉིན་སྐབས་དེའི་བྱང་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་ལགས་ལས་གནས་ནས་འཕོ་འགྱུར་དང་འབྲེལ་རྗེས་སུ་དོན་ཚན་བཅུ་ཅན་གྱི་གསལ་བཤད་ཅིག་འདོན་སྤེལ་གནང་སྟེ་དོན་གཅོད་སྤེན་པ་ཚེ་རིང་ལགས་ཀྱིས་བཀའ་ཤག་གི་ཐུགས་རེ་བཞིན་ལས་དོན་གནང་མ་ཐུབ་པ་དང་། ཡིད་ཆེས་བློས་འགེལ་མི་ཐུབ་པ། དེ་བཞིན་འཛིན་སྐྱོང་ལ་བྱ་སྤུ་གནོན་གྱི་གོ་རིམ་ལ་ལྟོས་མེད་གནང་ཡོད་པ་བཅས་ཀྱི་རྒྱུ་མཚན་ལ་བརྟེན་ནས་ཐག་གཅོད་དེ་ལྟར་གནང་དགོས་བྱུང་ཡོད་པ་གསལ་བཤད་གནང་ཡོད་པ་རེད། སྐུ་ཞབས་སྤེན་པ་ཚེ་རིང་ལགས་ཀྱིས་སྐབས་དེར་དོན་གཅོད་འཕོ་འགྱུར་ཐོག་འཛིན་སྐྱོང་གི་ཐག་གཅོད་ལ་ངོས་ལེན་ཞུས་ཡོད་པ་དེ་ལྟར་ཡང་ཁོང་གི་ལས་དོན་ལ་འཐུས་ཤོར་ཕྱིན་པ་སོགས་ཀྱི་གནད་དོན་ཁག་ལ་ངོས་ལེན་རྩ་བ་ནས་ཞུ་ཐབས་མེད་པའི་འགྲེལ་བརྗོད་དང་འབྲེལ། ཕྱི་ལོ་ ༢༠༡༨ ཟླ་ ༥ ཚེས་ ༡༨ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུག་གནང་ཡོད་པ་རེད།